Lokristo lambodiangana lo wedja efula

Apɔstɔlɔ wakakitanyiya didjango dia Yeso dia dianganya lokumu l’ɔlɔlɔ lo nkɛtɛ k’otondo. L’ɔnɔnyi 47 T.D., anangɛso wa l’Atiyɔka wakatome Pɔɔlɔ la Barnabasɛ dia tosambisha. Esambisha ehende w’ohetoheto ɛsɔ wakande lɔkɛndɔ lo Asie Mineure w’otondo polo lo ahole wele oko Dɛrɛbɛ, Lustɛra ndo Ikɔniyo.

Pɔɔlɔ la Barnabasɛ wakasambisha onto tshɛ, oyadi kanga ɔngɔnyi kana ose wola, dikɛnda kana opalanga. Anto efula waketawɔ akambo wa mɛtɛ wendana la Kristo. Etena kakasambisha Pɔɔlɔ nde la Barnabasɛ Sɛrɛngiyo Paolosɛ nguvɛrnɛrɛ ka la Kupiro, kanga dɔka ɔmɔtshi akayange dia mbashimba. Pɔɔlɔ akatɛ kanga dɔka akɔ ate: ‘Jehowa kohetshaka.’ Wonya akɔ waamɛ, kanga dɔka akayala tshungu. Etena kakandɛnyi dui sɔ, nguvɛrnɛrɛ Paolosɛ akakome ombetawudi.

Pɔɔlɔ la Barnabasɛ wakasambisha ahole tshɛ, lo luudu la luudu, lo bingu, l’etadimbo ndo lo toshinangɔnga. Lam’akawakɔnɔla pami kɛmɔtshi kaki ekuse la Lustɛra, wanɛ wakɛnyi dihindo sɔ, wakafɔnya dia vɔ wekɔ waa nzambi ndo wakalange mbatɛmɔla. Ko Pɔɔlɔ la Barnabasɛ wakaashimbe, wata vate: ‘Nyɔtɛmɔlɛ paka Nzambi! Sho tekɔ tsho anto.’ Ko ose Juda ɔmɔtshi akaye ndo akatshutshuya olui w’anto dia nsalɛ Pɔɔlɔ kɔlɔ. Olui w’anto wakawoke ave, wakootondja oma l’osomba ndo wakotshike l’asa eko la nyɔi. Koko Pɔɔlɔ komvɔ! Wonya akɔ waamɛ, anango wakaye ndjookokɛ ndo wakawɔshi ko wakokaloya l’osomba. L’ɔkɔngɔ wa laasɔ, Pɔɔlɔ akakalola l’Atiyɔka.

L’ɔnɔnyi 49 T.D., Pɔɔlɔ akande lɔkɛndɔ lokina. L’ɔkɔngɔ wa nde nkalola dia tenda anango wa l’Asie Mineure, nde akatɔlɛ lokumu l’ɔlɔlɔ polo l’Erɔpɛ. Nde akatshu otsha l’Atɛna, l’Ɛfɛsɔ, la Filipɛ, la Tɛsalɔnika ndo l’ahole akina. Silasɛ, Luka ndo dikɛnda dimɔtshi diakawelɛka Timɔte, wakatshu kaamɛ la Pɔɔlɔ lo lɔkɛndɔ lande. Vɔ wakakambe kaamɛ dia nkenga tshumanelo ndo wakakimanyiya dia diɔ nkeketala. Pɔɔlɔ akatshikala la Kɔrɛtɔ l’edja k’ɔnɔnyi l’etenyi, akeketsha anangɛso wa lɛkɔ. Nde akasambisha, aketsha ndo akafundɛ tshumanelo efula mikanda. Nde akakambaka ndo olimu wa nsala apɛma. L’ekomelo, Pɔɔlɔ akakalola l’Atiyɔka.

L’ɔkɔngɔ diko, l’ɔnɔnyi 52 T.D., Pɔɔlɔ akande l’ɔkɛndɔ la sato, ntatɛ oma l’Asie Mineure. Nde akande lɔkɛndɔ l’otale polo lo Nɔrdɛ la Filipɛ ndo akatokoma la Kɔrɛtɔ. Pɔɔlɔ aketsha ɛnɔnyi efula l’Ɛfɛsɔ, etsha, akɔnɔla ndo akimanyiya etshumanelo. Nde akashaka ndo asawo wa lo sɛkɛ lushi tshɛ lo luudu lɔmɔtshi la kalasa. Anto efula wakahokamɛka ndo wakatshikitanyaka yoho yawɔ ya lɔsɛnɔ. L’ekomelo, l’ɔkɔngɔ wa nde nsambisha lokumu l’ɔlɔlɔ lo wedja efula, Pɔɔlɔ akatshu la Jɛrusalɛma.