WESA NSAKI KƐNYISHA ONTO
WEKELO 8
Onga la solo dia lotutsha
Tɔndɔ: “Ngandji ekɔ la solo dia lotutsha.”—1 Kɔr. 13:4.
Kɛnɛ kakasale Yeso
1. Enda VIDƐO kana adia Joani 7:3-5 ndo 1 Kɔrɛtɔ 15:3, 4, 7. Oma laasɔ, kana yimba lo ambola wayela anɛ:
Kakɔna kakasale anango wa Yeso la losango lande oma l’etatelo?
Kakɔna kɛnya dia Yeso akatetemala nyanga dia nkimanyiya Jakɔba y’ɔnango?
Wetshelo akɔna wakondjaso oma le Yeso?
2. Sho pombaka monga la solo dia lotutsha nɛ dia nɔmbamaka yema y’etena le anto amɔtshi dia mbetawɔ lokumu l’ɔlɔlɔ.
Okoya Yeso
3. Kamba la yoho kina. Naka onto hetawe mbala kakɔ ɔtɔi dia nyu mbeka Bible, tootshutshuyake la wolo. Naka kokaka, kamba la tovidɛo kana asawo dia mbokimanyiya dia nde nshihodia woho wasalema wekelo wa Bible ndo woho wakokande nkondja wahɔ oma lɔkɔ.
4. Tɛdikake anto. Anto tshikitana. Naka owotɔ ayɛ kana onto lokalodiyɛ tenda ekɔ lo mengenga dia mbeka Bible kana dia mbetawɔ wetshelo wele lo Bible, yanga dia mbeya ɔkɔkɔ. Onde dietawɔ dia l’ɔtɛmwɛlɔ ɔmɔtshi diamboka edio l’otema ande? Onde ewɔtɔ ande kana asukanyi mbawodja pɛpɔ diaha nde mbetawɔ? Tshikɛnde etena dia nde kana yimba la kɛnɛ kawotɛyɛ ndo dia nde mɛna nɛmɔ diele la kɛnɛ kata Bible.
5. Lɔmba dikambo di’onto lɛnya nsaki. Lɔmba Jehowa dia kokimanyiya dia mɛna akambo la sso di’ɔlɔlɔ ndo dia wɛ monga l’ɔkɔmi. Lɔmba Jehowa dia kokimanyiya dia mbeya onto lahɛnya mɛtɛ nsaki ndo ntshika dia towendaka.—1 Kɔr. 9:26.