Tshikala l’“usumba w’eshamelu” kele ônge la lɔsɛnɔ!

“Undjakanyi ako [pombaka, “NW”] ntshikala l’usumba w’eshamelu edja ndu olombedi a ladiku ambuvo.”​—⁠WALELU 35:⁠28.

1. Ele Ɔsɔmbɔyishi wa dikila, ndo ayondotsha kema edja nto na?

YESO Kristo, Ɔsɔmbɔyishi wa dikila waki Jehowa, aya suke la mpɔhɔla ta. Kema edja nto, Ɔsɔmbɔyishi ɔsɔ kâmɛ la nyemba yande y’andjelo waya suke la ndɔsha anto tshɛ wambokongola onongo wa dikila koko hawoyatshumoya. Eelo, Yeso ayoyala Dembe dia woke diaki Nzambi diayodiakaka anto lam’ayokongotɔ “fɔnu ka woke” kayaye shamanya tsho. (Mateu 24:​21, 22, NW; Isaya 26:21) L’etena kɛsɔ, anto hawotokoka ndawɔ etombelo w’oma l’onongo wa dikila wakawakongola.

2. Naa tshɔi yakɔ ya dihole dia mɛtɛ di’eshamelo diekɔ, ndo wembola akɔna wele l’ohomba w’ekadimwelo?

² Di’onto shimbamela, nde pombaka mbɔtɔ lo mboka katɔla otsha l’osomba w’eshamelo wa mɛtɛ mɛtɛ ndo ndawɔ lɛkɔ dia nshimbela lɔsɛnɔ lande! Naka wambowetawɔ l’osomba akɔ, kete ose dawo pombaka ntshikala lɔkɔ dikambo dia osomba akɔ ɔsɔ mbele tshɔi yakɔ ya dihole dia mɛtɛ di’eshamelo. Koko, wɛ kokaka ndjambola wate: ‘Lam’ele efula ka l’atei aso tatadiakaka ndoko onto, onde mɛtɛ tekɔ l’onongo wa dikila oka? Lande na kele Yeso Ɔsɔmbɔyishi wa dikila? Ele osomba w’eshamelo wa nshi nyɛ na? Onde onto ɔmɔtshi kokaka tomba oma lɔkɔ ko shimbamela oka?’

Onde Mɛtɛ Tekɔ l’Onongo wa Dikila?

3. Akambo akɔna amɔtshi w’ohomba watanema l’Ɛlɛmbɛ wa Mɔsɛ watokimanyiya dia sho mɛna ɔnɛ miliyara y’anto ya la nkɛtɛ yekɔ l’onongo wa dikila?

³ Dikambo dimɔtshi di’ohomba diele l’Ɛlɛmbɛ wa Mɔsɛ diayotokimanyiya dia sho mpotɔ ɔnɛ miliyara y’anto yekɔ l’onongo wa dikila. Nzambi akakitsha ɔkɛndɛ w’etshwelo ka dikila l’ahɛka w’Ase Isariyɛlɛ oko onongo wa wodja w’otondo. Naka wamboshola onto ɔmɔtshi lakadiakema koko haweye akɔna akôdiake, embadi wakahombaka mbɛdika etale kânganyi dihole diakɔ diakadiakema onto l’esomba wa l’emamu adiɔ dia mbeya osomba woleki suke. Dia dimola onongo akɔ, dikumanyi dia l’osomba wafɔnyama ɔnɛ vɔ mbakakongola onongo wa dikila wakahombaka mbɔkɔla mpô k’ɔsɔngɔ a ngɔmbɛ wa wâdi wahatakambaka olimu l’okidi wa kiɔkɔ y’ashi yeke otekele. Dikambo sɔ diakasalemaka la ntondo k’ɛlɔmbɛdi w’Ase Lɛwi ‘nɛ dia Jehowa akâsɔnɔla dia vɔ sambolaka esanyi a wolo.’ Dikumanyi dia l’osomba akɔ wakɔtshaka anya awɔ lâdiko di’ɔsɔngɔ akɔ wa ngɔmbɛ ka wâdi ndo wakataka ɔnɛ: “Anya asu kuntshulula dikila, ndu ashu asu komena dikambu diako. [Jehowa] li, udimanyia wudja aye wa Isariyele wakayashimbela. Tukitshiyaki wudja aye Isariyele dikila diaha la unungu.” (Euhwelu k’Elembe 21:​1-9) Jehowa Nzambi konangaka nkɛtɛ ya wodja w’Isariyɛlɛ mbɔtɔ mindo la dikila kana anto awɔ tshɛ mɛmba onongo wa dikila.

4. Ɔkɔndɔ akɔna wele la Babilɔna ka Woke lo dikambo di’okongwelo w’onongo wa dikila na?

⁴ Eelo, woho wa dikambo dia ngasɔ di’ele oko onongo wa dikila wambokongola anto tshɛ diekɔ ɛlɔ kɛnɛ. Ohokanyiya dikambo di’onongo a woke wa dikila wele l’ahɛka wa Babilɔna ka Woke, etshumanelo k’ɛtɛmwɛlɔ wa kashi wa l’andja w’otondo. Tɔ kambodjɔ dikila di’ekambi wa Jehowa! (Enyelo 17:​5, 6; 18:24) Ɛtɛmwɛlɔ wa Lokristokristo sɛmaka ɔnɛ vɔ ndjelaka Owandji wa Ki, koko ata, woho wadiakawɔ anto wele kema l’ɛtɛmwɛlɔ awɔ, ata washilawɔ anto oshiki wambowêtɛ kanga onongo a woke wa dikila lo asho wa Nzambi. (Isaya 9:6; Jeremiya 2:34) Mɛtɛ, Babilɔna ka Woke pombaka monga l’onongo a woke lo dikambo dia nyɔi ya miliyɔ y’anto yovwe lo ata ahende w’andja w’otondo l’eleko kɛnɛ. Ɔnkɔnɛ, ase ɛtɛmwɛlɔ wa kashi, kâmɛ la wanɛ wâsukɛ ndo wɔtɔ l’ata wa ndjaka anto wambokongola onongo wa dikila lo asho a Nzambi.

5. Woho akɔna wele anto amɔtshi wekɔ oko andjakanyi waki konkana ndjaka l’Isariyɛlɛ?

⁵ Anto amɔtshi wakadiake anto efula la lolango lawɔ kana oma lo wendjudi awɔ. Amɔtshi wakayatambiya l’atei w’elui watamane anto oshiki, mbala mɔtshi oma lo shɛngiya y’ewandji w’ɛtɛmwɛlɔ lam’awatɛwɔ ɔnɛ Nzambi mbetawɔka dikambo diakɔ. Polo ndo kakianɛ, akina wekɔ lo mpɛnyahɛnya ndo lo ndjaka ekambi a Nzambi. Koko, oyadi kânga tatatshaka weoho w’akambo wa ngasɔ, ndo sho mbele l’onongo ɔsɔ w’anto tshɛ l’ɔtɛ wa nyɔi y’anto dikambo dia sho kombeyaka lolango la Nzambi kâmɛ l’ɛlɛmbɛ ande. Sho tekɔ oko ondjakanyi waki konkana ndjaka ‘wakadiake onyande onto lakinde konkanela ndo lakinde kompetshaka ntondo.’ (Euhwelu k’Elembe 19:⁠4) Anto wa ngasɔ pombaka nɔmba Nzambi kɛtshi ndo ndawɔ otsha l’osomba w’eshamelo wa mɛtɛ mɛtɛ. Naka aha ɔsɔku, kete vɔ ndjohomana l’Ɔsɔmbɔyishi wa dikila ko nde ndjâdiaka.

Olimu w’Ohomba Efula Wakamba Yeso

6. Lande na kakokaso mbuta ɔnɛ Yeso mbele owotɔ wa ka suke w’anto tshɛ?

⁶ L’Isariyɛlɛ, ɔsɔmbɔyishi wa dikila akayalaka pami koleki mbotɔ l’onto lakadiakema. Dia sɔmbɔya anto tshɛ wakadiakema la nkɛtɛ, djekoleko ekambi wa Jehowa wakadiakema l’okonda, Ɔsɔmbɔyishi wa dikila wa nshi nyɛ ayohomba monga pami kôtɔ l’anto tshɛ. Yeso Kristo mbakakotsha ɔkɛndɛ ɔsɔ. Nde akotɔ onto la kokele. Yeso akakimɔ lɔsɛnɔ lande la kokele lo nyɔi oko olambo w’etshungwelo, ndo l’ɔkɔngɔ w’eolwelo la edelo kande otsha l’olongo, nde akalambola Nzambi nɛmɔ di’olambo dikambo di’ekana w’Adama w’akanga a pɛkato ndo wasunasuna ka nyɔi. Ɔnkɔsɔ mbakayala Kristo Otshungodi w’anto tshɛ, owotɔ aso wa ka suke​—⁠Ɔsɔmbɔyishi wa dikila wa mɛtɛ. (Romo 5:12; 6:23; Heberu 10:12) Yeso mbelamɛka ɔnɛ ɔnango ambeki ande w’akitami wayela wanya ande. (Mateu 25:​40, 45; Heberu 2:​11-17) Oko wende Nkumekanga ka l’olongo, nde amboyala ‘Ombutshi wa pondjo’ le wanɛ wayokondja ɛlɔlɔ oma l’olambo ande oko ambolami ande wayodjasɛ la nkɛtɛ. Anto asɔ wayonga la lɔsɛnɔ la pondjo. (Isaya 9:​6, 7) Omalɔkɔ, lo yoho yasungana, Jehowa akasɔnɔla Pami kɛsɔ kôtɔ l’anto tshɛ oko Ɔsɔmbɔyishi wa dikila.

7. Oko wende Ɔlɔmbɛdi a Lâdiko, kakɔna kasalɛ Yeso anto na?

⁷ Nto, Yeso ekɔ Ɔlɔmbɛdi a Lâdiko waha la pɛkato, wakahembama, ndo wokana kɛtshi. (Heberu 4:15) Lo ndjela akoka ɔsɔ wele lande, nde ekɔ lo kamba olimu la nɛmɔ di’olambo ande w’edimanyielo ka pɛkato lo dikambo di’anto. Esomba w’eshamelo wakakama ‘lo dikambo di’Ase Isariyɛlɛ la di’angɛndangɛnda la di’ase wedja wakadjasɛ l’atei awɔ.’ (Walelu 35:15) Omalɔkɔ, Ɔlɔmbɛdi a Lâdiko wa woke akakambe olimu ntondotondo la nɛmɔ di’olambo ande lo dikambo di’ambeki ande w’akitami, “asi Isariyele.” Ɛlɔ kɛnɛ, nɛmɔ di’olambo akɔ diekɔ lo kambema olimu lo dikambo ‘di’angɛndangɛnda’ la ‘di’ase wedja’ wa l’osomba w’eshamelo wa mɛtɛ mɛtɛ. “Ekoko ekina” ɛsɔ waki Nkumadiɔndjɔ Yeso Kristo wekɔ l’elongamelo ka monga la lɔsɛnɔ la pondjo la nkɛtɛ.​—⁠Joani 10:16; Osambu 37:​29, 34.

Osomba w’Eshamelo wa Nshi Nyɛ

8. Ele osomba w’eshamelo wa mɛtɛ mɛtɛ na?

⁸ Ele osomba wa mɛtɛ mɛtɛ w’eshamelo na? Vɔ kema osomba wele lo lɛtshi lɔmɔtshi la nkɛtɛ oko Hɛbɛrɔna, osomba ɔmɔtshi wa l’atei w’esomba esamalo w’eshamelo w’Ase Lɛwi ndo ngelo kakadjasɛka ɔlɔmbɛdi a lâdiko wa l’Isariyɛlɛ. Osomba w’eshamelo wa nshi nyɛ ele yɛdikɔ yakɔsɛ Nzambi dia tokokɛ oma lo nyɔi l’ɔkɔkɔ w’ohindwelo w’ɔlɛmbɛ ande w’endana l’ekila ka dikila. (Etatelu 9:⁠6) Oyadi wanɛ wasala l’okonda kana kema, onto tshɛ lahindola ɔlɛmbɛ ɔsɔ pombaka nyanga edimanyielo ka pɛkato kande oma lo ndjâla la mbetawɔ lo dikila dia Yeso Kristo, Ɔlɔmbɛdi a Lâdiko. Akristo w’akitami wele l’elongamelo ka lɔsɛnɔ la l’olongo la “ului a wuki” wele l’elongamelo ka lɔsɛnɔ la la nkɛtɛ wambokondja wahɔ oma l’ɛlɔlɔ w’olambo w’edimanyielo ka pɛkato ndo wekɔ l’atei w’osomba w’eshamelo wa mɛtɛ mɛtɛ.​—⁠Enyelo 7:​9, 14; 1 Joani 1:7; 2:​1, 2.

9. Woho akɔna wakahindola Saulo k’Ose Taraso ɔlɛmbɛ a Nzambi w’endana la dikila, ndo woho akɔna wakandɛnya ɔnɛ nde ambokadimola lɔkɛwɔ lande na?

⁹ La ntondo ka nde monga Okristo, ɔpɔstɔlɔ Paulo akahindola ɔlɛmbɛ wa dikila. Oko wakinde Saulu k’Ose Taraso, nde akahɛnyahɛnyaka ambeki wa Kristo ndo aketawɔka dia vɔ diakema. Paulo akate ate: “Keli dimi lakukama ketshi, ne dia dimi lakatshaka osoku lam’akimi kumbeya ndu [aha la mbetawɔ, NW].” (1 Timote 1:13; Etsha 9:​1-19) Saulu aki la lɔkɛwɔ l’onto layatshumoya, nde akayɛnya dui sɔ l’ɔkɔngɔ, oma l’etsha efula wa mbetawɔ wakandasale. Koko, di’onto mbɔtɔ l’osomba w’eshamelo wa mɛtɛ mɛtɛ, awui akina efula wekɔ lo nɔmbama, aha paka monga la mbetawɔ keto lo tshungo kakafutama.

10. Woho akɔna wakoka onto kondja nkum’otema k’ɔlɔlɔ, ndo kakɔna kahomba ntshama dia kilama?

¹⁰ Ondjakanyi waki konkana ndjaka akakokaka ntshikala l’osomba w’eshamelo wa l’Isariyɛlɛ onyake paka kana nde ambɛnya ɔnɛ nde aki la nkum’otema k’ɔlɔlɔ la ntondo ka Nzambi lo kɛnɛ k’endana l’etshwelo ka dikila. Dia kondja nkum’otema k’ɔlɔlɔ, sho pombaka monga la mbetawɔ l’olambo wa Yeso, ndjatshumoya oma lo pɛkato yaso ndo tshikitanya eyango aso. Sho pombaka nɔmba nkum’otema k’ɔlɔlɔ lo ndjakimɔ le Nzambi lo dɔmbɛlɔ oma lo tshimbo ya Kristo, ndo oma lo mɛnya ndjakimɔ kakɔ kɛsɔ lo nongola batismu ka l’ashi. (1 Petero 3:​20, 21) Nkum’otema k’ɔlɔlɔ kɛsɔ toshaka lotshungɔ la sho monga la diokanelo dia pudipudi lam’asaso la Jehowa. Yoho yâmɛ yakoka tokimanyiya dia sho nama nkum’otema k’ɔlɔlɔ ele ndjela ɛlɛmbɛ a Nzambi ndo kamba olimu watoshawɔ l’atei w’osomba w’eshamelo wa mɛtɛ mɛtɛ oko wakahombaka ase dawo wa l’esomba w’eshamelo w’edjedja kitanyiya Ɛlɛmbɛ ndo kamba olimu wakawawashaka. Olimu woleki ohomba le anto waki Jehowa ɛlɔ kɛnɛ ko olimu wa sambisha losango la Diolelo. (Mateu 24:14; 28:​19, 20) Naka tayokambaka olimu ɔsɔ, kete dui sɔ diayotokimanyiya dia sho monga anto w’ohomba wodjashi l’osomba w’eshamelo wa nshi nyɛ.

11. Kakɔna kahombaso mbewɔ naka sho nangaka shimbamela l’atei w’osomba w’eshamelo wa nshi nyɛ na?

¹¹ Naka sho tomba oma l’osomba w’eshamelo wa nshi nyɛ, kete sho ndjakitsha lo wâle wa nanyema, nɛ dia kema edja nto, kete Ɔsɔmbɔyishi wa dikila ambotatɛ ndɔshana l’anto tshɛ wele l’onongo wa dikila. Ɔnɛ kema etena ka tondama l’andja w’osomba w’eshamelo kana l’ahole wa wâle wele suke l’olelo w’ekambɔ keso lo ndeshama l’osomba akɔ w’eshamelo. Endaka ɔsɔku, kete ekomelo a shimu ko tayototanema l’andja w’osomba w’eshamelo wa mɛtɛ mɛtɛ naka sho shisha mbetawɔ kaso l’olambo w’edimanyielo ka pɛkato waki Ɔlɔmbɛdi wa Lâdiko. (Heberu 2:1; 6:​4-6) Ndo, hatotoshimbamela naka sho ndjela mboka y’andja ɔnɛ, mbidja paka lokolo ɔtɔi loto lo ɔlɔngɔswamelo waki Jehowa, ko sekolaka ɛlɛmbɛ w’osembwe waki Shɛso le l’olongo.​—⁠1 Koreto 4:⁠4.

Otombelo w’Oma l’Osomba w’Eshamelo

12. Edja ndo kânde wahomba tshikala wanɛ waki ntondo l’onongo wa dikila l’osomba w’eshamelo?

¹² Ondjakanyi waki konkana ndjaka wa l’Isariyɛlɛ akahombaka tshikala l’osomba w’eshamelo “edja ndu olombedi a ladiku ambuvo.” (Walelu 35:28) Omalɔkɔ, edja ndo kânde wahomba tshikala wanɛ waki ntondo l’onongo wa dikila l’osomba w’eshamelo wa mɛtɛ mɛtɛ na? Edja ndo lam’ahawatoyala l’ohomba w’elimu waki Yeso Kristo, Ɔlɔmbɛdi a Lâdiko. Paulo akate ate: “Ndi mbeyaka nshimbela wane watusukanaka [la Nzambi oma lo tshimbo yande pondjo pondjo, NW].” (Heberu 7:25) Edja tshɛ kayowoyalaka l’onongo wa dikila, elimu w’Ɔlɔmbɛdi a Lâdiko wayôngaka ohomba woho w’anto mɛnama oko anto w’ɛlɔlɔ lo asho wa Nzambi.

13. Wa na wele “asi Isariyele” wa nshi nyɛ ndo edja ndo kânde kahombawɔ tshikala “l’usumba w’eshamelu”?

¹³ Ohɔ dia, esomba w’eshamelo w’edjedja wakahikama lo dikambo “di’asi Isariyele,” di’angɛndangɛnda, la di’ase wedja wakadjasɛ l’atei awɔ. “Asi Isariyele” asɔ wekɔ Ase Isariyɛlɛ wa lo nyuma. (Ngalatiya 6:16) Vɔ pombaka tshikala l’osomba w’eshamelo wa mɛtɛ mɛtɛ edja tshɛ kayowôngaka la lɔsɛnɔ la nkɛtɛ. Lande na? Nɛ dia vɔ weke l’alemba w’emunyi waha kokele ndo oma lo dikambo sɔ, vɔ wekɔ l’ohomba wa kondja edimanyielo kasungana k’oma le Ɔlɔmbɛdi awɔ a Lâdiko wele l’olongo. Koko, lam’avɔ Akristo asɔ w’akitami ndo wôlwamawɔ otsha lo lɔsɛnɔ la lo nyuma la l’olongo, vɔ hawônge l’ohomba w’olimu w’edimanyielo waki Ɔlɔmbɛdi wa Lâdiko nto; vɔ wayotshika demba diawɔ di’emunyi pondjo pondjo ndo hawotonga l’onongo wa dikila nto pondjo. Ɔlɔmbɛdi a Lâdiko ayovwɛ akitami wamboshila la mbolɔ asɔ, ele l’ɔkɛndɛ wa dimanyiya pɛkato ndo wa mbakokɛ.

14. Kakɔna nto kalɔmba wanɛ wele l’elongamelo k’otsha l’olongo dia vɔ tshikala l’osomba w’eshamelo wa nshi nyɛ?

¹⁴ Woho wewɔ l’alemba w’anto nɔmbaka wanɛ wayonga “ekito kame la Kristo” l’olongo dia vɔ tshikala l’osomba w’eshamelo wa mɛtɛ mɛtɛ edja ndo wamboshidiya lowango lawɔ la la nkɛtɛ polo ndo lo nyɔi la kɔlamelo tshɛ. Kam’avɔwɔ mbalambolawɔ alemba awɔ w’anto pondjo pondjo. (Romo 8:17; Enyelo 2:10) Olambo wa Yeso kambaka olimu paka le wanɛ wele l’alemba w’anto. Ɔnkɔnɛ, Ɔlɔmbɛdi a Lâdiko mvɔ̂ka lo kɛnɛ k’endana l’Isariyɛlɛ wa lo nyuma lam’olwamawɔ oko ditongami dia lo nyuma diayotônga pondjo pondjo l’olongo oko “asanganyi wa eongelo ka Nzambi.”​—⁠2 Petero 1:​4, NW.

15. Wa na wele ‘angɛndangɛnda’ ndo ‘ambidjashi wa l’atei a wodja’ ɛlɔ kɛnɛ, ndo etena kakɔna kayovɔ Ɔlɔmbɛdi a Lâdiko le wɔ na?

¹⁵ Etena kakɔna ‘kayovɔ’ Ɔlɔmbɛdi a Lâdiko lo dikambo di’‘angɛndangɛnda’ wa nshi nyɛ ndo ‘di’ase wedja wodjashi l’atei awɔ,’ ko mbasha diaaso dia vɔ tomba oma l’osomba w’eshamelo wa mɛtɛ mɛtɛ na? Anto asɔ wa l’atei w’olui a woke hawokoke tomba oma l’osomba w’eshamelo esadi eto l’ɔkɔngɔ wa fɔnu ka woke. Lande na? Nɛ dia vɔ wayotetemala la monga l’alemba awɔ wele kema kokele, l’alemba wa pɛkato ndo wayohomba tshikala la tshina di’ekokelo k’Ɔlɔmbɛdi wa Lâdiko. Oma lo kondja ɛlɔlɔ w’elimu ande w’edimanyielo ka pɛkato l’edja ka diolelo diakinde di’ɛnɔnyi kinunu ndo oma l’olimu ande w’ɔlɔmbɛdi, vɔ wayokoma anto wa kokele. L’etena kɛsɔ, Yeso ayowalɔmbɔla vɔ tshɛ le Nzambi dia vɔ mbidjama l’ohemba wa komelo, ohemba wa wolo efula ndo wa pondjo w’endana la kɔlamelo yawɔ lam’ayotshungɔma Satana l’ɛdiɛngɛ ande lo tshenyi ya wonya. Lam’ayowotondoya ohemba ɔsɔ ndo mbetawɔma le Nzambi, Jehowa ayowaɔsa oko akanga a losembwe. Ɔnkɔsɔ mbayowokoma lo eongelo k’oshika ndo ka pondjo k’anto wa kokele.​—⁠1 Koreto 15:28; Enyelo 20:​7-10.a

16. Etena kakɔna kahatonga ehandɔ wa fɔnu ka woke l’ohomba w’elimu w’ɛdiɛlɔ waki Ɔlɔmbɛdi a Lâdiko?

¹⁶ Ɔnkɔnɛ, ehandɔ wa lo fɔnu ka woke wayohomba nama nkum’otema kawɔ k’ɔlɔlɔ oma lo tshikala l’osomba w’eshamelo wa mɛtɛ mɛtɛ polo ndo l’ekomelo ka Diolelo diaki Kristo di’Ɛnɔnyi Kinunu. Oko ayowonga anto wele kokele, vɔ hawotonga ndoko l’ohomba w’elimu w’edimanyielo w’Ɔlɔmbɛdi a Lâdiko nto ndo hawotonga la tshina di’ekokelo kande nto. Sho kokaka mbuta ɔnɛ: l’etena kɛsɔ mbayowavwɛ Yeso oko Ɔlɔmbɛdi a Lâdiko, dikambo dia nde honga l’ohomba wa mbakambɛ nto l’ekimanyielo ka dikila diande di’ɛdiɛlɔ diakandalambola oko olambo. L’etena kɛsɔ mbayowotomba oma l’osomba w’eshamelo wa mɛtɛ mɛtɛ.

17. Lande na kele honga ohomba le wanɛ wayolwama l’edja ka Diolelo diaki Kristo di’Ɛnɔnyi Kinunu dia vɔ mbɔtɔ l’osomba w’eshamelo wa mɛtɛ mɛtɛ ndo tshikala lɔkɔ na?

¹⁷ Onde wanɛ wayolwama l’edja ka Diolelo diaki Yeso di’Ɛnɔnyi Kinunu pombaka mbɔtɔ l’osomba w’eshamelo wa mɛtɛ mɛtɛ ndo tshikala lɔkɔ polo ndo lo nyɔi k’ɔlɔmbɛdi a lâdiko? Kema, nɛ dia, lam’akawavu, vɔ wakafute kibawo ka pɛkato yawɔ. (Romo 6:7; Heberu 9:27) Koko, Ɔlɔmbɛdi a Lâdiko ayowakimanyiya dia vɔ koma lo lokokele. Naka vɔ wambotenyanya ohemba wa komelo l’ɔlɔlɔ tshɛ l’ɔkɔngɔ wa Diolelo di’Ɛnɔnyi Kinunu, kete Nzambi ayowaɔsa oko akanga a losembwe ndo ayowasha lɔsɛnɔ la pondjo la nkɛtɛ. Mɛtɛ, onto lahindola ɛlɛmbɛ wa Nzambi ayanyema ndo ayolanyema l’elanyelo kayokomɛ oseka onto tshɛ lahotenyanya ohemba w’ekomelo oko kanga kɔlamelo.

18. Lo menda lowandji lele la Yeso ndo olimu ande w’ɔlɔmbɛdi, kakɔna kayotshikala l’anto pondjo pondjo na?

¹⁸ Mɛtɛ, ɛlɔmbɛdi a lâdiko wa l’Isariyɛlɛ wakavɔkaka. Koko, Yeso “[akayala, NW] olombodi a ladiku uku Melekizedeke pundju.” (Heberu 6:​19, 20; 7:​3, sho mbɛnganyisha alɛta ango.) Omalɔkɔ, ekomelo k’olimu wa Yeso oko Ɔlɔmbɔdi a Lâdiko watɛkɛtɛ̂ anto hakumiya lɔsɛnɔ lande. Etombelo w’ɔlɔlɔ w’oma l’olimu ande wa Nkumekanga ndo Ɔlɔmbɛdi a Lâdiko wayotshikala kâmɛ l’anto pondjo pondjo, ndo anto wayotshikala la lowando la pondjo otsha le nde lo woho wakandakambe elimu l’akoka wa ngasɔ. Lâdiko dia lasɔ, Yeso mbayetaka la ntondo pondjo pondjo lo dikambo di’ɔtɛmwɛlɔ wa pudipudi waki Jehowa.​—⁠Filipi 2:​5-11.

Wetshelo w’Ohomba Efula le So

19. Wetshelo akɔna wakokaso kondja lo dikambo dia lohetsho la ngandji lo menda yɛdikɔ yakɔsama dikambo di’esomba w’eshamelo?

¹⁹ Sho kokaka kondja wetshelo efula oma lo tɛdikɔ takɔsama dikambo di’esomba w’eshamelo. Oko ɛnyɛlɔ, ndoko ondjakanyi kânga ɔtɔi lakahetshaka onto lakandadiake laketawɔmaka dia nde mbidjasɛ l’osomba w’eshamelo. (Walelu 35:​20, 21) Omalɔkɔ, woho akɔna wakoka onto ɔmɔtshi la l’osomba w’eshamelo wa mɛtɛ mɛtɛ tshikɛ lohetsho lokande ɔnango dihole dia lɔ pama l’otema ande na? Ɔpɔstɔlɔ Joani akafunde ɔnɛ: “Untu tshe latuhetshaka unyandi eko undjakanyi. Nyu mbeyaka nyati: Nduku undjakanyi leli la lumu la pundju [le nde, NW].” Omalɔkɔ, “tokani ngandji; ne dia ngandji [ndja oma le Nzambi, NW].”​—⁠1 Joani 3:15; 4:⁠7.

20. Dia shimbamela oma l’anya w’Ɔsɔmbɔyishi wa dikila, kakɔna kahomba sala wanɛ wele l’osomba w’eshamelo wa mɛtɛ mɛtɛ?

²⁰ Dia shimbamela oma le ɔsɔmbɔyishi wa dikila, ondjakanyi waki konkana ndjaka akahombaka tshikala l’osomba w’eshamelo koko aha tɛngɔlaka wɛngɔlɛngɔla l’elelo wa dikambɔ di’ɛtshi kakɔ ka nkɛtɛ. Kahombaso mbuta lo dikambo dia wanɛ wele l’osomba w’eshamelo wa mɛtɛ mɛtɛ? Dia shimbamela oma le Ɔsɔmbɔyishi wa dikila wa woke, vɔ pombaka tshikala l’osomba. Mɛtɛ, vɔ pombaka ndjâlama oma lo wɔnganu wa ntshɔ l’elelo w’ekambɔ kêso lo ndeshama. Vɔ pombaka monga la sso dia wolo di’aha tshikɛ ngandji k’andja waki Satana ɔnɛ dihole dia tɔ pama l’etema awɔ. Ondo dui sɔ mbeyaka nɔmba dia sala alɔmbɛlɔ ndo mbidja weolo, koko nsɛnɔ yawɔ kimamɛ lo dikambo sɔ.​—⁠1 Joani 2:​15-17; 5:⁠19.

21. Olimu akɔna w’ɔngɛnɔngɛnɔ wakamba wanɛ wele l’osomba w’eshamelo wa nshi nyɛ na?

²¹ Ondjakanyi waki konkana ndjaka wa l’esomba w’eshamelo w’edjedja wakahombaka ndjâla akambikambi w’elimu. Woho akɔ wâmɛ mbele, akitami w’“asi Isariyele” wekɔ lo mbisha ɛnyɛlɔ ka dimɛna oko ekambi wa lo dinela ndo oko apandjudi wa Diolelo. (Mateu 9:​37, 38; Mako 13:10) Oko ‘angɛndangɛnda’ ndo ‘ase wedja wodjashi l’atei awɔ’ l’osomba w’eshamelo wa nshi nyɛ, Akristo wele l’elongamelo ka lɔsɛnɔ la la nkɛtɛ wekɔ la diɛsɛ dia kamba olimu wa shimbela nsɛnɔ y’anto kâmɛ l’akitami weke la lɔsɛnɔ lâ nkɛtɛ. Ande olimu w’ɔngɛnɔngɛnɔ wa ngasɔ lee! Wanɛ wakamba olimu akɔ la kɔlamelo tshɛ l’atei w’osomba w’eshamelo wa mɛtɛ mɛtɛ wayohandɔ oma lo nyɔi ka pondjo l’anya w’Ɔsɔmbɔyishi wa dikila. Koko, vɔ wayokondja ɛlɔlɔ wa pondjo oma l’olimu ande w’Ɔlɔmbɛdi wa Lâdiko waki Nzambi ndo wa woke. Onde wɛ ayotshikala l’osomba w’eshamelo dia monga la lɔsɛnɔ pondjo pondjo oka?

[Footnote]

Okonde Ayokadimola Na?

◻ Lande na kakokaso mbuta ɔnɛ miliyara y’anto wa la nkɛtɛ yekɔ l’onongo wa dikila?

◻ Ɔkɛndɛ akɔna w’ohomba efula wakotsha Yeso Kristo lo dikambo di’anto?

◻ Ele osomba w’eshamelo wa mɛtɛ mɛtɛ, ndo woho akɔna wakoka onto mbɔtɔ lɔkɔ na?

◻ Etena kakɔna kayotomba anto oma l’osomba w’eshamelo wa mɛtɛ mɛtɛ?

◻ Wetshelo akɔna w’ohomba wakokaso kondja oma lo yɛdikɔ yakɔsama lo dikambo di’esomba w’eshamelo na?

[Caption]

Onde wɛ mbeyaka olimu w’ohomba efula wakamba Yeso kristo?