“Atshi Wa Diui” Wele L’ɔngɛnɔngɛnɔ
“Nyetawo diui diunewo l’etema anyu [l’okitshakitsha, “NW”]; dio mbeya nshimbela [anima anyu, “NW”]. Keli nyuyali atshi wa diui aha ambuki atu.”—JAKOBA 1:21, 22.
“NYUYALI ATSHI WA DIUI.” Wotelo waha l’okakatanu ɔsɔ wekɔ la diewoyelo dia mamba. Vɔ mbɔsama oma lo Bible lo “Mukanda Wakafundi Jakoba” ndo wayofundama lo Mbalasa ya Diolelo oko divɛsa di’Ɛmɛnyi wa Jehowa di’ɔnɔnyi w’otondo wa 1996.
2 Jakɔba, ɔnango Nkumadiɔndjɔ Yeso lakasange lande nyangɛwɔ oto, aki l’ɔkɛndɛ a woke l’atei w’etshumanelo ka ntondotondo k’Akristo. L’etena kɛmɔtshi l’ɔkɔngɔ wa eolwelo ka Yeso, Nkumɛso akɛnɛ ndamɛmɛ le Jakɔba la ntondo ka nde mɛnama le apɔstɔlɔ tshɛ. (1 Koreto 15:7) L’ɔkɔngɔ diko, lam’akayotshungɔka ɔpɔstɔlɔ Petero lo dihindo dia mamba oma lo lokanu, nde akatɛ olui w’Akristo wakatshumana ate: “Nyuteli Jakoba la [anangɛso, NW] akambu ane.” (Etsha 12:17) Akɛnama dia, kânga mbakinde kondjala ɔpɔstɔlɔ, Jakɔba akalɔmbɔla losanganya la la Jerusalɛma l’olui walɔmbɔla lam’akɔsɛ apɔstɔlɔ la dikumanyi tɛdikɔ t’aha mbahenya Ase Wedja wakakadimola etema ohekele. Jakɔba akasambola akambo akɔ, ndo yɛdikɔ shɔ yaketawɔma le nyuma k’ekila, yakatomama lo tshumanelo tshɛ.—Etsha 15:1-29.
3 Mɛnamaka dia, woho wakakanaka Jakɔba yimba oko onto lambotshunda wɔngɔɔ akawoshaka nɛmɔ efula. Koko, l’okitshakitsha tshɛ, nde akahotɔ ɔnɛ: “ukambi wa [Nzambi, NW] la Khumadiondjo Jesu Kristu” oto mbênde. (Jakoba 1:1) Mukanda ande wakasambiyama ɔsɔ wekɔ l’alako w’eshika ndo wakeketsha Akristo ɛlɔ kɛnɛ. Vɔ wakashile la fundama suke l’ɛnɔnyi ɛnɛi la ntondo k’alembe w’Ase Rɔmɔ wakalɔmbwama oma le Ɔnɔmbɔdi awɔ Cestius Gallus tatɛ la sɔmbwɛ Jerusalɛma mbala ka ntondo, l’ɔkɔngɔ wa lokumu l’ɔlɔlɔ sambishama l’ahole efula le ‘ditongami tshɛ dia l’ɛse olongo.’ (Kolosai 1:23) Tena dia wolo efula diakikɔ, ndo ekambi wa Jehowa wakeyaka ɔnɛ elombwelo Kande kakikɔ suke la kotshama le Ase Juda.
4 Lâsɔ ko Akristo asɔ wambokondjaka Afundelo tshɛ wa lo Hɛbɛru la etenyi ka woke k’Afundelo wa lo Grɛkɛ. Oko wɛnamadiɔ l’avɛsa efula wakawashile oma l’afundelo w’edjedja, Akristo wakafunde Bible wakɛkamaka Dui dia Nzambi. Woho akɔ wâmɛ mbele ɛlɔ kɛnɛ, sho pombaka mbeka Dui dia Nzambi l’otema ɔtɔi ndo dikotsha lo nsɛnɔ yaso. Dia sho tetemala, sho tekɔ l’ohomba w’ekeketshelo ka lo nyuma la dihonga diatosha Afundelo w’Ekila.—Osambu 119:97; 1 Timote 4:13.
5 Ɛlɔ kɛnɛ, anto tshɛ waya ka onyɔ wa “[fɔnu ka woke, NW] kayuya, wuhu wahatayala uma k’etatelu k’andja edja ndu kakiane, ndu wuhu wahayalaki pundju.” (Mateu 24:21) Panda kaso nemanɛka la ndjela ɛlɔmbwɛlɔ ka Nzambi. Ngande wakokaso kondja ɛlɔmbwɛlɔ kakɔ na? Oma lo ndjiholɛ wetshelo watomba oma lo Dui dia Nzambi diakasambiyama lo tshimbo ya nyuma kande etema aso. Dikambo sɔ diayotokonya lo sho ‘ndjâla atshi wa dui,’ oko waki ekambi wa Jehowa wa lo nshi ya ntondo. Sho pombaka mbala la mbeka Dui dia Nzambi la kiongamu tshɛ, l’otema ɔtɔi ndo kamba la diɔ dia tombola Jehowa.—2 Timote 2:15; 3:16, 17.
Tokikɛ l’Ɔngɛnɔngɛnɔ
6 K’etatelo ka mukanda ande, Jakɔba ekɔ lo tɛkɛta dikambo di’ɔngɛnɔngɛnɔ, olowa wa hende wa nyuma ka Nzambi. Nde akafunde ate: “[Analengo, nyodiɛnake, NW] ongenongeno tshe lam’ayunyutana wehu efula w’ehimba; nyeyi nyati: Ehimbelu ka mbetawo kanyu katutungaka etetemalu. Etetemalu aluwanya ulimu ato, dia nyu nduwana la nkukiama, uku wane wahahumbi engo.” (Jakoba 1:2-4; Ngalatiya 5:22, 23) Woho akɔna wakokadiɔ mbutama ɔnɛ ekɔ “ongenongeno tshe” dia tanema l’ehemba efula na? Eelo, kânga Yeso nde lawɔ akate lo Sawo diande dia lo Dikona ate: “Lam’ayuwunyotenga, lam’ayuwunyusuya, lam’ayuwunyumamanyia wehu tshe w’akambu wa kolo dia dikambu diami, [nyɔngɛnɛngɛnɛ, NW]. Nyongenengene, nyutamanya ngenangena, ne dia difutu dianyu dieko efula l’ulungu.” (Mateu 5:11, 12) Ekɔ ɔngɛnɔngɛnɔ wa mɛtɛ lo mɛna woho watshɔkɔla Jehowa weolo wadjaso l’etete tshɛ dia kotsha oweso aso wa monga la lɔsɛnɔ la pondjo.—Joani 17:3; 2 Timote 4:7, 8; Heberu 11:8-10, 26, 35.
7 Yeso ndamɛmɛ akatetemala “ne dia ongenongeno wakakitshama la ntundu kandi.” (Heberu 12:1, 2) Ndo sho lawɔ kokaka tetemala naka tayendaka l’etete ɛnyɛlɔ ka dihonga kakasha Yeso! Oko wadita Jakɔba otsha l’ekomelo ka mukanda ande, Jehowa futaka akanga wa kɔlamelo dimɛna efula. Jakɔba akate ate: “Sho teekɔ lo mbuta dya vɔ weekɔ amɛnyi ɔlɔ, dikambo vɔ wakakekeca etema polo ndo lo nkomeelo. Kaa nyu nyakooke watɛkɛta dya lotuca laaki la Yɔbɛ, ndo nyu mbewaka kɛnɛ kakayowoshaka [Jehowa] lo nkomeelo; dikambo [Jehowa] eekɔ nkanga nkɛci ndo nkanga ɔlɔlɔ.” (Yakɔbɔ 5:11, Dyookaneelo dy’oyooyo) Ohɔ woho wakafutama kɔlamelo yaki Jɔbɔ lam’akandakɔnɔ ndo akandayokondjaka lɔsɛnɔ loludi tɔɔ l’ɔngɛnɔngɛnɔ efula nde la wakinde wa ngandji. Naka ndo wɛ lawɔ ayotetemala la kɔlamelo, kete dikambo sɔ diayokoka kêla ɔngɛnɔngɛnɔ wa woho ɔsɔ lo Paradiso ka l’andja w’oyoyo waki Nzambi, dikuma di’ɔngɛnɔngɛnɔ wa woho wakambɛso Jehowa olimu ɛlɔ kɛnɛ.
Toyange Lomba
8 Wekelo aso wa Dui dia Nzambi la kiɔmi, kâmɛ ndo okitanyielo w’alako wa lɔkɔ, ayotosha lomba la Nzambi ndo akoka wa sho mbikikɛ asui l’atei wa dikongɛ nɛ diaki Satana diambofukutana ndo diasunyasunya lumu. Woho akɔna wakokaso ndjashikikɛ ɔnɛ tambokondja lomba la ngasɔ na? Jakɔba ekɔ lo totɛ ate: “Naka omotshi ambuhumba [lo]mba, ndi alombe [Nzambi, NW], katushaka antu tshe diango la lukahu, hâhangwela, ku ndi ayuwusha[lɔ]. Keli ndi alombe la mbetawo, aha la tamu, ne dia untu ladja tamu, eko uku sukhu di’ashi a wuki, diasukuyama la diasutshasutshama la loheledi.” (Jakoba 1:5, 6) Sho pombaka nɔmbaka l’otema ɔtɔi, tayashikikɛ l’ɔlɔlɔ tshɛ shate Jehowa ayolonga alɔmbɛlɔ aso ndo ɔnɛ nde ayokadimola l’etena kahombama ndo lo woho wayondɛna ɔlɔlɔ.
9 Lomba la Nzambi lekɔ woshasha w’oma le Jehowa. Lam’akandalembetshiyaka weshasha akɔ ɛsɔ, Jakɔba akate ate: ‘Losha tshɛ l’ɔlɔlɔ la kokele ndja oma l’olongo, nɛ dia lɔ ndja oma le She esase wa l’olongo, ndo le nde kema otshikitanu wa woho watatshimbe alɛdi.’ L’ɔkɔngɔ diko, Jakɔba akayolembetshiyaka, l’atei a mukanda ande, etombelo w’oma lo lomba la mɛtɛ lam’atande ate: “Untu akona eli la ewu la yimba l’atei anyu? Ndi enya antu akambu andi w’ololo la etsha andi w’ololo la memakana ka [lomba lande, NW]. . . . [Lomba l’oma l’olongo lekɔ ntondotondo, pudipudi, ko wɔladi, hatshe akambo otshatsha, suke dia kitanyiya, lɔ ndola la kɛtshi ndo l’elowa w’ɔlɔlɔ, kema la shɔnɔdi, kema la lokeso, NW].”—Jakoba 1:17; 3:13-17.
10 Oyadi l’atei w’etshumanelo k’ɛtɛmwɛlɔ wa kashi wa l’andja w’otondo kana l’atei a Lokristokristo kana lo wedja ekina, atɛmɔdi wekɔ la mbekelo ka membaka nkembo mɔtshi tsho, ka nongaka alɔmbɛlɔ akɔ wâmɛ mbala la mbala, ndo kana nongaka dako dimɔtshi. Ndoko ekeketshelo kakondja ambetawudi akɔ dia vɔ sambisha losango lele l’elongamelo, dikambo ɛtɛmwɛlɔ efula kema l’elongamelo k’oshika lo kɛnɛ k’endana la nshi yayaye. Ndoko lushi latɛkɛtawɔ dikambo di’elongamelo ka Diolelo diaki Mɛsiya ndo, endaka vɔ ditɛkɛtaka, kete hawohotɔ dikambo diakɔ kânga yema tshitshɛ. Jehowa ekɔ lo mbuta lo pɔlɔfɛsi lo dikambo di’ase Lokristokristo ate: “Wudja ami wambutsha kolo hyendi: Vo wakanseke, dimi eteko k’ashi wa lumu, Ndu wakayatshimela afuku w’ashi, Wako weli elonge, waheyi nkimela ashi.” (Jeremiya 2:13) Vɔ kema l’ashi w’akambo wa mɛtɛ. Vɔ kema la lomba l’oma l’olongo.
11 Ande woho wotshikitanyi Ɛmɛnyi wa Jehowa l’anto asɔ ɛlɔ kɛnɛ lee! Oma lo wolo wawasha Nzambi, vɔ wekɔ lo ndodja nkɛtɛ la lokumu l’ɔlɔlɔ l’eyelo ka Diolelo Diande. Lomba latɛkɛtawɔ lɔsɔ mbika etshina kalɔ shikaa lo Dui dia Nzambi. (Ɛdika la Tukedi 1:20; Isaya 40:29-31.) Mɛtɛ, vɔ kambaka olimu la ewo ndo l’akoka wa kana yimba lam’atawasambisha asangwelo wa weke waki Nzambi ndo Otungi aso. Kɛnɛ kakombolaso ele dia tshumanelo tshɛ ‘dialole la ewo k’oshika ka lolango la Nzambi ndo la lomba la shihodia akambo wa lo nyuma.’ (Kolosai 1:9) Naka vɔ monga l’etshina ka ngasɔ, kete oyadi epalanga kana akɛnda, vɔ wayotshutshuyamaka nshi tshɛ dia ‘ndjâla atshi wa dui.’
12 “Lomba l’oma l’olongo” tɔhɛmɔlaka dikambo dia pɛkato kakoka konya onto di’aha nde mbetawɔma le Nzambi. “Analeengo wa ngandji, nyohɔke dimɛna akambo anɛ,” mbata Jakɔba. “Onto cɛɛ mpombaka mpokɛka lotoi, ndo atoyaalake esadi etoo ko nde ntɛkɛta la momala nkɛlɛ; dikambo onto lele la nkɛlɛ, hace kɛnɛ kele dimɛna lo washo wa [Nzambi, NW].” Eelo, sho pombaka sasikɔ, monga la saki k’efula ka nonga alako wa Nzambi ndo mbayelaka. Koko, sho pombaka ndjalama di’aha kamba olimu wa kɔlɔ la lolemi, “leke la tshitshe la dimba.” Oma lo monga l’otako, l’ɔyɔkayɔka, kana lo monga la lɔkɛwɔ la paka anto tshɛ ndjela kɛnɛ katayɛ keto, lolemi mbeyaka tshumba ‘okonda wa woke’ lo yoho ya didjidji. Omalɔkɔ, sho pombaka ndjâla anto w’ɔlɔlɔ ndo monga la ndjâkimela lo waɔtɔnganelo wakiso.—Yakɔbɔ 1:19, 20; 3:5, Dyookaneelo dy’oyooyo.
13 Jakɔba akafunde ate: “Okone nyunya akambu wa sonyi la wa kolo tshe. Nyetawo diui diunewo l’etema anyu la memakana; dio mbeya nshimbela [anima anyu, NW].” (Jakoba 1:21) Andja wa lokaki ɔnɛ, kâmɛ la dɛngalɛnga diawɔ, mbo yawɔ ya l’emunyi, yoho yawɔ ya lɔsɛnɔ y’ɔnɛ onto ndamɛ hayatokɛ fusa la nkɛwɔ yawɔ yatafukutana tsho aya suke la mbeta. “Koko, ɔnɛ latsha lolango la Nzambi ayotshikalaka pondjo.” (1 Joani 2:15-17, NW) Ande ohomba wekɔ dia sho mbetawɔ “diui diunewo l’etema [aso]” lee! Lomba latosha Dui dia Nzambi tshikitana l’akambo wa kɔlɔ wasalema l’andja ɔnɛ wasunyasunya lumu. Tatokombolake akambo wa kɔlɔ asɔ kânga yema. (1 Petero 2:1, 2) Sho tekɔ l’ohomba w’ɔnɛ ngandji k’akambo wa mɛtɛ la mbetawɔ ka nge wônɛmi l’etema aso woho wa sho mbeya la nshikimala paka lo mboka y’osembwe yaki Jehowa. Ko onde, naka tambolonga Dui dia Nzambi to kete lâsɔ ambokoka?
Toyâle “Atshi wa Diui”
14 Lo Jakoba 1:22, sho mbalaka ɔnɛ: “Nyuyali atshi wa diui, aha ambuki atu, watuyadimbiyaka.” “Nyuyali atshi wa diui”! Mɛtɛ, kanyi shɔ mbatɛtɛwɔ lo mukanda wa Jakɔba. Sho pombaka nonga, ko l’ɔkɔngɔ diko, sho ndjosala “osoku”! (Etatelu 6:22) Anto efula sɛmaka ɛlɔ kɛnɛ ɔnɛ: kɛnɛ kele ohomba ele dia nongaka alako kana tshɔ̂ka mbala mɔtshi tsho lo wa mvudu ya nzambi dia mɛnama le anto, koko, hawokoke ntsha ndoko dikambo dikina nto lâdiko wa lâsɔ. Vɔ kokaka fɔnya ɔnɛ: edja tshɛ kêwɔ la ‘lɔsɛnɔ la dimɛna’ lo ndjela tokanyi tawɔ vamɛ, vɔ wayoyakotsha. Koko Yeso akate ate: “Naka untu alanga ndjelami, ndi embe utamba andi [w’asui, atetemale ndjelami, NW].” (Mateu 16:24) Lo mɛtɛ, Akristo w’eshika pombaka ndjasɛka ndo mbidja etete lo ndjela ɛnyɛlɔ ka Yeso ka ntshâka lolango la Nzambi. Le wɔ, Dui dia Nzambi hadiotshikitanyi ɛlɔ kɛnɛ la woho wakidiɔ l’eleko ka ntondo lam’akatome Yeso dui lâsɔ ko nde ambolɔ, ate: “Okone nyutshu, nyete wedja tshe ambeki.” (Mateu 28:19) Ngande wakambayɛ olimu akɔ ɔsɔ na?
15 Naka tayotetemala la sɛdingola Dui dia Nzambi, kete diɔ diayonga oko talatala katɛnya nganɛ weso. Jakɔba ate: “Ɔnɛ latetemala la menda ɛlɛmbɛ wa kokele washa lotshungɔ ndo latetemala lɔkɔ, onto ɔsɔ ayoyala l’ɔngɛnɔngɛnɔ lam’ayondodikotsha nɛ dia nde kema ombuki wa dui ladiohɛ koko ekɔ otshi a diɔ.” (Jakoba 1:23-25, NW) Eelo, nde ayoyala ‘otshi wa dui’ wele l’ɔngɛnɔngɛnɔ. Lâdiko dia lâsɔ, ekɔ ohomba efula ndjâla “utshi” oyadi kânga lo tokambokambo tshɛ t’endana la nsɛnɔ yaso y’Akristo. Tatoyakesake pondjo lo kanyiyaka shoamɛ ɔnɛ: naka sho tɛmɔlaka tena dimɔtshi to, kete ambokoka. Jakɔba ekɔ lo tolaka dia sho sɛdingola awui amɔtshi w’endana l’ɔtɛmwɛlɔ wa mɛtɛ wakoka kânga Akristo wele l’ohetoheto mbânya yimba. Nde akafunde ate: “Otemwelo weli pudipudi, waha la vadi lu ashu wa [Nzambi, NW] Shesu, weko okone: ntsho dia ntenda ana wa tshiki la wadi waki edu lu asui awo, la dia untu ndjalama diaha ndi ndjala la akambu wa kolo wa la kete.”—Jakoba 1:27.
16 Aha paka mbutaka tsho ɔnɛ: ‘Dimi mbetawɔka Nzambi’ ko mpembetɛ paka lâsɔ ato. Oko wadishikikɛ Jakoba 2:19: “We ambetawo wati: [Nzambi, NW] eko otoi; we ambutsha ololo; Ndu edienge mbatetawoka pupu—watudidimaka.” Jakɔba ekɔ lo tɛtɛ ɔnɛ: “mbetawo kaha la etsha ambuyavwela,” ndo ambɔtɛkɛta diaki Abarahama, ate: “Mbetawo kandi kakakimanyiama la etsha andi, ndu mbetawo kandi [kamboyonga kokele, NW] ne dia etsha andi.” (Jakoba 2:17, 20-22) Etsha w’Abarahama wakendanaka ndo la woho wakandakotshaka ehomba wa nkumbo kande, woho wakandalongolaka angɛndangɛnda, wakandayalɔngɔsɔla dia nambola Isaka oko olambo, ndo ‘wakandasambishaka lo sɛkɛ’ lo dikambo dia mbetawɔ ka nge kaki lande lo daka dia Nzambi di’endana la Diolelo diaki Mɛsiya diayaye, “usumba weli la tshina dia wulu.” (Etatelu 14:16; 18:1-5; 22:1-18; Heberu 11:8-10, 13, 14; 13:2) Sunganaka mɛtɛ woho wele Abarahama ‘akelamɛka ɔnɛ ɔngɛnyi a Nzambi.’ (Jakoba 2:23) Ndo sho lawɔ mbeyaka mbɔsama oko ‘angɛnyi wa Jehowa’ lama wewoyaso la wangasanu tshɛ, mbetawɔ kaso la elongamelo kele laso lo Diolelo diakinde di’osembwe diayaye.
17 Mɛtɛ, wanɛ ‘wayala atshi wa dui’ ‘nyindjamaka oma l’etsha awɔ, koko aha dia mbetawɔ keto.’ (Jakoba 2:24) Rahaba aki onto lakakotsha etsha lâdiko dia mbetawɔ kande lo “diui” diakandoke di’endana la etsha wa mamba waki Jehowa. Nde akashɛ atɔpi w’Ase Isariyɛlɛ ndo akâkimanyiya dia vɔ ndawɔ, ko nde ndjotshumanya nkumbo ka she l’ɔkɔngɔ diko dia vɔ kondja panda. Ande woho wayondoyɔngɛnangɛna lo eolwelo lam’ayondoyeya ɔnɛ mbetawɔ kande, kakɛnyama oma l’etsha, kakokimanyiya dia nde ndjoyala tshende kɛmɔtshi la Mɛsiya lee! (Jashua 2:11; 6:25; Mateu 1:5) Heberu tshapita 11 shilaka ɔlɔndji w’otale efula w’anto akina ‘wakayala atshi’ lam’akawɛnya mbetawɔ kawɔ, ndo vɔ wayokondja difuto dia woke. Tatohɛke Jɔbɔ, lakate lam’akinde l’asui a wolo ate: “Lukumbu la [Jehowa] latumbwami.” Oko wambotodilembetɛ, mbetawɔ l’etsha ande wakayokomiyaka lo nde kondja difuto dia woke. (Jobo 1:21; 31:6; 42:10; Jakoba 5:11) Woho akɔ wâmɛ mbele, etete kadjaso ɛlɔ kɛnɛ oko “atshi wa diui” ayotokimanyiya dia sho mbetawɔma le Jehowa.
18 Sho kokaka mbadia anangɛso wa la Mputu k’Ehotwelo ka wonya l’atei a wanɛ wakakikɛ ɛnɔnyi efula. Lam’ele efula kawɔ wambokondja lotshungɔ ɛlɔ kɛnɛ, mɛtɛ, vɔ ‘waya atshi wa dui’ lo ndjela eongelo k’oyoyo kaya lawɔ kɛsɔ. Wa misiɔnɛrɛ l’ambatshi mboka w’oma lo wedja wosukanyi lawɔ wakatshu lɛkɔ dia takimanyiya l’olimu w’olakanyelo ndo w’ɛlɔngɔswɛlɔ. Filialɛ ka lo wodja wa Finlande kâmɛ la filialɛ kina yaki la Société Watch Tower yosukanyi latɔ yakatome tomanamana t’ambiki a mvudu lɛkɔ, ndo weshasha wa la lolango wakimɔ nkumbo kaso ka l’andja w’otondo wakatomama dia mbika bilɔ y’eyoyo ya filialɛ la wa Mbalasa ya Diolelo.—Ɛdika la 2 Koreto 8:14, 15.
19 Ande woho wakayasha anangɛso wakasoyamaka efula ngasɔ l’ohetoheto tshɛ l’olimu w’esambishelo lee! Sho kokaka mbuta ɔnɛ vɔ ‘wekɔ lo kamba la wolo tshɛ ndo wekɔ lo ndjasha efula,’ wate kana oko anto wasɔmbɔya diaaso diakawahandja lo “tena dia kolo.” (1 Timote 4:10; 2 Timote 4:2) Oko ɛnyɛlɔ, lo ngɔndɔ ka Mɔmbi ketshi kɛnɛ, lo wodja wa Albanie, lɛnɛ akawashimbe olimu aso la hiadi ya wolo efula, tokatshikatshi Nkumu ya Diolelo yele l’ɔtɛ a dui ɔnɛ: “Lande na Kambolola Lɔsɛnɔ l’Ekakatanu” takawalongola, takakahanyema tshɛ lo nshi shato tsho. Ɔsɔ aki diaaso dia mamba dia ndjelana l’anto, yema tshitshɛ l’ɔkɔngɔ wa Eohwelo ka Nyɔi ka Yeso, kakɔtɔ anto 3 491 lo losanganya lakɔ—lofulo l’anto loleki apandjudi awɔ 538 wâsasa.
20 Wedja ekina nto wakasha lonya woho w’ɔlɔlɔ lo dikambo dia lofulo l’ampokami wakɔtɔ lo losanganya l’Eohwelo ka Nyɔi ka Yeso, ko lofulo lakɔ lambodɛ ɛnɔnyi ɛnɛ weke kambeta lo yɛdikɔ y’anto ndekana 10 000 000. L’ahole efula, anto w’eyoyo ‘komaka atshi wa dui’ nɛ dia mbetawɔ kawɔ kakakeketshama lam’akawɔtɔ lo losanganya la Eohwelo oko amendji. Onde hatokoke keketsha anto efula w’eyoyo wasangana laso dia vɔ monga l’akoka wa kondja diɛsɛ sɔ?
21 Lo ndjela ɛnyɛlɔ k’Akristo asɔ wa l’eleko ka ntondo waki l’ohetoheto, ndo akina efula tatɛ oma l’etena kɛsɔ, nyɛsɔ tɔsɛ tɛdikɔ t’eshika ta sho ndjasha lo ‘mbawɛɛ oweso aso’ wa kondja lɔsɛnɔ la pondjo, oyadi lo Diolelo dia l’olongo kana lo edjaselo kadiɔ ka la nkɛtɛ. (Filipi 3:12-14) Dui sɔ sunganaka sho mbidja weolo aso tshɛ wahombama dia munda oweso akɔ. Ɔnɛ kema etena ka kalolaka tsho ɛkɔngɔkɔngɔ lo mongaka ombuki wa dui oto, koko ekɔ etena k’oshika mɛtɛ ka ‘keketala ndo kamba olimu.’ (Hangai 2:4; Heberu 6:11, 12) Lam’ele ‘taketawɔ dui dionɛwɔ l’etema aso,’ nyɛsɔ ‘toyale atshi wa dui wangɛnangɛna’ ɛlɔ kɛnɛ ndo lam’ayotɔtɔ lo tena dia pondjo pondjo diayaye.
[Study Questions]
1. Woho akɔna wahombaso mbɔsa divɛsa diakiso di’ɔnɔnyi wa 1996 na?
2, 3. Lande na kakadiasungana dia Jakɔba funda mukanda wɔlame lokombo lande?
4. Kakɔna kɛnya ɔnɛ Akristo wa ntondotondo wakɛkamaka Dui dia Nzambi l’otema ɔtɔi na?
5. Lande na keso l’ohomba w’ɛlɔmbwɛlɔ ka lânde ɛlɔ kɛnɛ ndo lende ahombaso kikondja na?
6. Lande na kahombaso ngɛnangɛna lam’ahomanaso l’ekakatanu?
7. (a) Kakɔna kokoki tokimanyiya dia sho tetemala? (b) Woho akɔna wokokiso futama lo ndjela ɛnyɛlɔ ka Jɔbɔ?
8. Woho akɔna wokokiso kondja lomba la mɛtɛ, l’oshika ndo ohomba wa na wele la dɔmbɛlɔ lo dikambo sɔ?
9. Woho akɔna walembetshiya Jakɔba lomba la Nzambi kâmɛ ndo woho wakambalɔ olimu na?
10. Woho akɔna wotshikitanyi ɔtɛmwɛlɔ wa mɛtɛ la wa kashi?
11, 12. (a) Lomba la Nzambi koka la monga la shɛngiya yakɔna le so? (b) Dia dikambo diakɔna diatɔhɛmɔla lomba la Nzambi?
13. Lande na kele ekɔ ohomba sho mbetawɔ ‘eonamelo ka dui l’etema aso’?
14. Woho akɔna wakokaso ndjâla “ambuki” ndo “atshi” wa dui na?
15. (a) Wɛla akɔna wakasha Jakɔba wɛnya woho wakokaso ndjâla “atshi wa diui” wele l’ɔngɛnɔngɛnɔ na? (b) Lande na kele ɔtɛmwɛlɔ wa lo tena dimɔtshi to hate dikambo?
16. Oma l’akambo akɔna wakayokomaka Abarahama “ongenyi wa [Jehowa],” ndo woho akɔna wakokaso mbɔtɔ Lande ɔngɛnyi?
17. (a) Lande na kele Rahaba ‘akɛnama onto ɔlɔlɔ,’ ndo ngande wakandafutama? (b) Ɔlɔndji akɔna w’otale washila Bible lo dikambo dia wanɛ ‘wayala atshi wa dui’? (c) Woho akɔna wakafutama Jɔbɔ, ndo lande na?
18, 19. Woho akɔna wele anangɛso amɔtshi wakahɛnyahɛnyama edja efula ‘waya atshi wa dui,’ ndo ɛtshɔkɔ akɔna waya oma l’olimu awɔ?
20. Kakɔna kɛnya lofulo l’ampokami wakɔtɔ lo losanganya la Eohwelo ka Nyɔi ka Yeso, ndo woho akɔna wakoka anto efula kimanyiyama?
21. Lo ndjela kɛnɛ kata divɛsa diaso di’ɔnɔnyi, eyango akɔna wahombaso ndjela, ndo l’oweso akɔna?
[Caption]
[Wembola]
[Caption on page 10]
[Diombwɛlo di’osato wa lo lɛkɛ 10]
Ndo sho lawɔ, todihole wetshelo wa Nzambi etema
[Caption on page 11]
[Diombwɛlo di’osato wa lo lɛkɛ 11]
Oma lo kɔlamelo yande, Jɔbɔ akayokondjaka lɔsɛnɔ loludi tɔɔ l’ɔngɛnɔngɛnɔ oko difuto, nde la wakinde wa ngandji
[Caption on page 14]
Okonde Ayokadimola Na?
◻ Woho akɔna wakokaso mbikikɛ ko tele ndo l’ɔngɛnɔngɛnɔ?
◻ Ele “[Lomba l’oma l’olongo, NW],” ndo woho akɔna wakokaso likondja?
◻ Lande na kahombaso ‘ndjâla atshi wa dui koko aha ampokami ato’?
◻ Alapɔlɔ akɔna wahomba tosokoya dia sho ‘ndjâla atshi wa dui’?