Toshishake Mbetawɔ Kayɛ Kânga L’ehemba!
‘Analengo, nyodiɔsake oko ɔngɛnɔngɛnɔ wa tshɛ lam’ahomananyu l’ehemba wa weho la weho.’—JAKOBA 1:2.
OKO wewɔ Ɛmɛnyi ande, ekambi wa Jehowa mbokambɛka la mbetawɔ ndo ‘l’otema w’ɔngɛnɔngɛnɔ.’ (Euhwelu k’Elembe 28:47; Isaya 43:10) Vɔ salaka dui sɔ kânga mbalɔshanawɔ l’ehemba. Kânga mbɛnawɔ pâ, vɔ keketshamaka oma l’ɛtɛkɛta ɛnɛ: ‘Analengo, nyodiɔsake oko ɔngɛnɔngɛnɔ wa tshɛ lam’ahomananyu l’ehemba wa weho la weho, nyêya ɔnɛ ehembelo ka mbetawɔ kanyu tondjaka etetemalo.’—Jakoba 1:2, 3.
2 Jakɔba y’ɔnango Yeso Kristo ndo ombeki ande mbakafunde awui asɔ oya l’ɔnɔnyi 62 T.D. (Mako 6:3) Jakɔba aki ekumanyi l’etshumanelo ka la Jerusalɛma. Mɛtɛ, nde la Kɛfasi (Petero), la Joani “wakalema uku dikundji”—dia wolo, diakasukɛka etshumanelo wolo efula. (Ngalatiya 2:9) Oya l’ɔnɔnyi 49 T.D. (lo Tena Diaso nɛ), lam’akakome dikambo dia wahemelo w’ohekele la ntondo ‘k’apɔstɔlɔ la dikumanyi di’anto,’ Jakɔba akawaɛnya kanyi y’Afundelo lo dikambo sɔ ko ase olui walɔmbɔla wa l’eleko ka ntondo wakayietawɔ.—Etsha 15:6-29.
3 Oko olami wa lo nyuma wakayakiyanyaka dikambo di’ɛkɔkɔ, Jakɔbɔ ‘akeyaka lɔɔwa l’ɛkɔkɔ ande dimɛna.’ (Tukedi 27:23) Nde akeyaka ɔnɛ Akristo waki l’ehemba a wolo efula l’etena kɛsɔ. Akahombe nyomongola timba t’amɔtshi nɛ dia vɔ wakalekaka mamema akanga w’ɛngɔnyi. Akristo amɔtshi wakatɛmɔlaka Nzambi paka l’ɛlɔmɔ oto. Amɔ wakatshɛka akina kɔlɔ oma l’ɛtɛkɛta wa kandji wakawâtondjɛka. Yimba y’andja ɔnɛ yaki la shɛngiya ya kɔlɔ l’etshumanelo, ko efula kombikikɛ nto ndo kɔ̂kɔlamɛka nɔmba. Omalɔkɔ, Akristo amɔ wakayoka hemɔ ya lo nyuma. Mukanda wakafunde Jakɔba wekɔ lo sɛdingola awui asɔ lo yoho yahomba keketsha anto, ndo dako diakandasha diekekɔ ohomba polo nd’ɛlɔ oko wakidiɔ l’eleko ka ntondo T.D. Tayokondja wahɔ efula naka sho mbɔsa di’oko sho mbotomewɔ mukanda ɔsɔ.a
Lam’ahomanaso l’Ehemba
4 Jakɔba tɛnyaka nganɛ wahombaso mbɔsaka ehemba. (Jakoba 1:1-4) Lo dihole dia nde mbuta ɔnɛ ɔnango Yeso mbakinde, l’okitshakitsha tshɛ, nde ndjaetaka ɔnɛ “ukambi wa [Nzambi] la [wa] Khumadiondjo Jesu Kristu.” Jakɔba ambofundɛ “wauhu dikumi la ahendi” w’Isariyɛlɛ wa lo nyuma “wakahandjo” mukanda ande nɛ dia wekɔ lo pɛnyahɛnyama. (Etsha 8:1; 11:19; Ngalatiya 6:16; 1 Petero 1:1) Oko weso Akristo, ndo sho lawɔ tekɔ lo pɛnyahɛnyama, ndo sho ‘pomanaka l’ehemba wa weho la weho.’ Koko naka tayohɔ ɔnɛ, ehemba wakikɛso keketshaka mbetawɔ kaso, kete ‘tayodiɔsa oko ɔngɛnɔngɛnɔ wa tshɛ’ lam’atokomɛwɔ. Naka sho nama kɔlamelo yaso otsha le Nzambi lam’eso l’ehemba, kete dui sɔ diayotela ɔngɛnɔngɛnɔ wa pondjo.
5 Ehemba watokomɛ mendanaka ndo l’awui wɛnya anto tshɛ pâ. Oko ɛnyɛlɔ, demba dia tohemɔ hemɔ kokaka tɛnya pâ. Ɛlɔ kɛnɛ, Nzambi hakɔnɔla anto lo dihindo, koko lam’awɔlɔmbaso lomba la wolo wele laso ohomba dia sho mbikikɛ hemɔ, nde toshakawɔ. (Osambu 41:1-3) Vɔ tɔhɛnyahɛnyaka nto nɛ dia losembwe laso lo woho weso Ɛmɛnyi wa Jehowa. (2 Timote 3:12; 1 Petero 3:14) Lam’atondoyaso ehemba wa ngasɔ, mbetawɔ kaso mɛnyaka dia tɔ ‘ndekaka ehemba wolo.’ Ndo lam’aleka mbetawɔ kaso ehemba wolo, tɔ ‘tokimanyiyaka dia sho tetemala.’ Mbetawɔ kambokeketshama oma l’ehemba kayotokimanyiya dia sho mbikikɛ ehemba wa la ntondo.
6 Jakɔba ate: “etetemalu aluwanya ulimu ato.” Naka sho tshika ehemba tetemala aha la sho mbaemadia esadi lo pindola kɛnɛ kata Afundelo, kete etetemalo ayosala “ulimu” atɔ wa tokonya Akristo w’eshika wakukutɛ mbetawɔ kawɔ. Lo mɛtɛ, naka ehemba wambotondja wɛɔdu aso ɛmɔ sɛkɛ, kete sho la dia nɔmba Jehowa ekimanyielo dia mbatondoya. Kayototsha naka ohemba akɔ mendanaka l’akambo wa mindo wa dieyanelo na? Naka ngasɔ, kete sho la dia nɔmba dia dikambo diakɔ, ndo ndjaɔtɔnganyiya l’alɔmbɛlɔ aso. Oko ɛnyɛlɔ, naka lɛnɛ akambaso vɔ tɔnganyaka l’awui wa monanyi, sho kokaka nyanga olimu okina kana mbɔsa tɛdikɔ tokina dia namaka kɔlamelo yaso le Nzambi.—Etatelu 39:7-9; 1 Koreto 10:13.
Dɔmbɛlɔ dia Kondja Lomba
7 Jakɔba tɛnyaka kɛnɛ kahombaso ntsha naka hateye woho wa mbikikɛ ohemba ɔmɔtshi. (Jakoba 1:5-8) Jehowa hatotohangwɛ ɔnɛ lêngo le sho bu la lomba kana ɔnɛ sho kɔlɔmbalɔ la mbetawɔ. Nde ayotokimanyiya dia sho mbeya yoho y’ɔlɔlɔ ya sala la ntondo k’ohemba wambotokomɛ ndo mbokikɛ. Lo wonya wasalaso wekelo aso w’onto ndamɛ kana weso lo nsanganya, sho mbeyaka mbohɔ avɛsa amɔtshi wayotokimanyiya dia mbikikɛ. Woho wayɔlɔngɔsɔla Nzambi awui dia tokimanyiya mbeyaka tɛnya kɛnɛ kahombaso sala. Nyuma ka Nzambi mbeyaka tɔlɔmbɔla. (Luka 11:13) Dia kondja ɛlɔlɔ wa ngasɔ, sho la dia mamema Nzambi l’ekambi ande nshi tshɛ.—Tukedi 18:1.
8 Jehowa toshaka lomba dia sho ndɔshana ehemba naka sho ‘nɔmba la mbetawɔ aha la mbidja tamu.’ Onto ladja tamu, “eko uku sukhu di’ashi a wuki, diasukuyama la diasutshasutshama la loheledi” aha l’onto ntêyi la ntondo. Koko, naka lonyuma laso lɔyɛkayɛka, kete ‘tatolongamɛke ndoko ɛngɔ oma le Jehowa.’ Nyɛsɔ ‘toshikimalake’ l’alɔmbɛlɔ aso kana l’awui akina wasalaso, ‘aha mbahâhɔka l’akambo.’ Lo dihole dia tota nɛ ko tota nɛ, nyɛsɔ tonge la mbetawɔ le Jehowa, Ɔnɛ lele Kiɔkɔ ya lomba.—Tukedi 3:5, 6.
Akanga a Weola la w’Ɛngɔnyi Kokaka Ngɛnangɛna
9 Wola kongaka ohemba ɔmɔtshi le so, tatohɛke ɔnɛ Akristo tshɛ kokaka ngɛnangɛna, oyadi akanga w’ɛngɔnyi kana ase wola mbewɔ. (Jakoba 1:9-11) La ntondo ka vɔ koma ambeki wa Yeso, suke l’Akristo w’akitami tshɛ kondjâla la mbo efula ya l’emunyi ndo ase andj’ɔnɛ kombaɔsaka la nɛmɔ. (1 Koreto 1:26) Koko vɔ wakakoke ngɛnangɛna oma lo ‘ɔngɛnɔngɛnɔ’ awɔ wambowasɔna oko ekitɔ wa Diolelo. (Romo 8:16, 17) Koko, wanɛ waki ɛngɔnyi ndo wakawalɛmiyaka, “wonywama” oko wewɔ ambeki wa Kristo nɛ dia anto wa l’andj’ɔnɛ wowaɔsa oko diangɔ di’anyanya. (Joani 7:47-52; 12:42, 43) Koko, oko weso ekambi wa Jehowa, sho tshɛ kokaka ngɛnangɛna nɛ dia ɔngɔnyi wa l’andja ɔnɛ l’ahole w’ɛnɛnɛ hawɛdimi kânga yema l’ɔngɔnyi aso wa lo nyuma. Ande lowando lele laso nɛ dia l’atei aso bu awui w’otako kana w’ɔnɛ kapanda ndeka shisha djɛndɛ lee!—Tukedi 10:22; Etsha 10:34, 35.
10 Jakɔba tokimanyiyaka dia sho mbeya ɔnɛ ɛngɔnyi wa l’andj’ɔnɛ kana awui a weke wakokaso sala lɔkɔ hawotaloya lɔsɛnɔ laso. Oko wele dimɛna dia dɛmbɔlɛmbɔ hoshimbɛ di’aha diɔ nɛngɛ la ‘yaanyi,’ woho akɔ mbele ɔngɔnyi w’onto hakoke taloya lɔsɛnɔ lande. (Osambu 49:6-9; Mateu 6:27) Nde kokaka mvɔ etena katandayele ‘yoho yande ya lɔsɛnɔ’ dia ndjâla l’ɔngɔnyi. Lâsɔ, kɛnɛ kele ohomba ele monga ‘ɔngɔnyi le Nzambi’ ndo sala la wolo tshɛ dia pamia wahɔ wa Diolelo.—Luka 12:13-21; Mateu 6:33; 1 Timote 6:17-19.
Wanɛ Watetemala l’Ehemba Wekɔ l’Ɔngɛnɔngɛnɔ
11 Oyadi tekɔ ɔngɔnyi kana wola, sho kokaka monga l’ɔngɛnɔngɛnɔ naka tayokikɛ ehemba watokomɛ. (Jakoba 1:12-15) Naka sho mbikikɛ ehemba wa ngasɔ la kɔlamelo tshɛ, kete sho mbeyaka monga l’ɔngɛnɔngɛnɔ, nɛ dia ɔngɛnɔngɛnɔ ndjâka oma lo sala kɛnɛ kele ɔlɔlɔ lo washo wa Nzambi. Lo kukutɛ mbetawɔ kawɔ polo ndo lo nyɔi, Akristo wotwe le nyuma nongolaka “dembo dia kusu dia lumu,” mbut’ate tɔsɛna l’olongo aha la mvɔ. (Enyelo 2:10; 1 Koreto 15:50) Naka tekɔ l’elongamelo ka kondja lɔsɛnɔ la la nkɛtɛ ndo naka sho ndjaɛkɛka le Nzambi, kete sho kokaka nongamɛ ɔnɛ lo nshi yayaye tayonga la lɔsɛnɔ la pondjo lo paradiso ka la nkɛtɛ. (Luka 23:43; Romo 6:23) Jehowa ekɔ kanga ɔlɔlɔ le anto tshɛ wawetawɔ!
12 Onde mɛtɛ Jehowa ndamɛ kokaka tohemba l’asui oka? Kema, totake ɔnɛ: “Dimi lambuhimbama uma le [Nzambi].” Jehowa hatohembe dia tɔɔnga ɔnɛ kele tosale pɛkato koko nde tokimanyiyaka ndo toshaka wolo wahombama dia sho mbikikɛ ehemba naka sho shikikala nge lo mbetawɔ. (Filipi 4:13) Nzambi ekɔ ekila, ɔnkɔnɛ nde hatokonya l’awui wahomba tɛtɔla wolo aso dia sho sala awui wa kɔlɔ. Naka shamɛ tamboyasanya l’akambo watona Nzambi ndo wahokana l’Afundelo ko tambosala pɛkato kɛmɔ, kete aha sho mbosha ɛkɔmɔ, “ne dia [Nzambi] hahimbama la akambu wa kolo, ku ndi hahimbi untu.” Kânga mbakoka Jehowa mbetawɔ ɔnɛ ohemba ɔmɔtshi watokome dia tongola lo ɔlɔlɔ aso, nde hatohembe la kanyi ya kɔlɔ. (Heberu 12:7-11) Satana mbeyaka tohemba dia sho sala kɔlɔ, koko Nzambi kokaka totshungola oma le kanga kɔlɔ ɔsɔ.—Mateu 6:13.
13 Sho la dia nɔmbaka efula nɛ dia dui dimɔtshi kokaka tosokoya dia sho ndjâla la saki ka kɔlɔ kakoka ndjotokonya lo pɛkato. Jakɔba ate: “Untu l’untu atuhimbamaka lam’akutwamandi ndu lam’ahimbamandi la saki kandi ndame ka kolo.” Tatoshake Nzambi ɛkɔmɔ wonya wasalaso pɛkato naka shamɛ mbakatshike otema aso dia vɔ kanaka awui wa kɔlɔ. Naka hatotshanyisha saki ka kɔlɔ, ‘kete tɔ mbeyaka pama’ l’otema, ko tɔ ‘ndjota pɛkato.’ Ko lam’atsha onto pɛkato, tɔ “kayuta nyoi.” Aha la tamu, sho la dia namaka etema aso dia shika tanga la ntondo ka tɔsɛngiya ta sala pɛkato. (Tukedi 4:23) Wakahɛmɔla Kɛna ɔnɛ nde aya suke la ntsha pɛkato, koko nde koshika tanga. (Etatelu 4:4-8) Ayototsha naka tambomɛ ndjela mboka ka kɔlɔ kahɔtɔnganɛ l’afundelo na? Mɛtɛ, tayɔngɛnangɛna lam’ayosala dikumanyi di’Akristo wolo dia tongola woho w’aha sho salɛ Nzambi pɛkato.—Ngalatiya 6:1.
Nzambi Mbele Kiɔkɔ ya Diangɔ di’Ɛlɔlɔ
14 Tatohɛke dia Jehowa mbele Kiɔkɔ, aha y’ehemba, koko ya diangɔ di’ɛlɔlɔ. (Jakoba 1:16-18) Jakɔba mbelɛka anyande ambetawudi ɔnɛ ‘analengo wa ngandji’ ndo mɛnyaka ɔnɛ Nzambi mbele Ombishi wa ‘losha tshɛ l’ɔlɔlɔ ndo la kokele.’ Weshasha tshɛ waki Jehowa wa lo nyuma ndo wa l’emunyi wekɔ ‘kokele,’ ndok’ema kahombama lɔkɔ. Vɔ ndjâka “uma l’ulungu,” oma l’elongo lɛnɛ adjasɛ Nzambi. (1 Khumi ya Dikanga 8:39) Jehowa mbele “Ontungi w’esase wa l’olongo”—wonya, ngɔndɔ la tɔɔtɔ. Nde toshaka nto osase wa lo nyuma la akambo wa mɛtɛ. (Osambu 43:3; Jeremiya 31:35; 2 Koreto 4:6) Otshikitanyi la wonya watengesola alɛdi lam’atawakadimɔ ndo wakomawɔ l’otshimba ndjɔdi paka la midi, Nzambi, hakadimɔ pondjo lo mbisha anto kɛnɛ kele ɔlɔlɔ le wɔ. Nde ayotosha dihomɔ diahombaso dia sho mbikikɛ ehemba naka sho tetemala ndɛ mbo ya lo nyuma yatoshande oma lo tshimbo ya Dui diande ndo ya “ɔhɔmbɔ wa kɔlamelo ndo wa kɛsɔ.”—Mateo 24:45, NW.
15 Naa losha laki Nzambi loleki woke na? Ele eotwelo k’ana wa lo nyuma oma lo tshimbo ya nyuma k’ekila, ana wakamba kâmɛ la lokumu l’ɔlɔlɔ, kana “diui dia mete.” Wanɛ wotɔ lo nyuma wekɔ “elua wa ntundu,” wakasɔnama oma l’atei w’anto dia vɔ tonga “diulelu la elombedi” l’olongo. (Enyelo 5:10; Efeso 1:13, 14) Ondo Jakɔba akakanyiyaka dikambo di’ɔlɔnga wa nɔnɔ wakawalambolaka lo ngɔndɔ ka Nizana 16, lushi lakôlɔ Yeso, ndo di’olambo w’ekama ehende wa mapa wakalambɔma lushi la Pɛntɛkɔsta, lam’akalole ambeki la nyuma k’ekila. (Akambu w’Asi Lewi 23:4-11, 15-17) Lo yoho shɔ, Yeso akahombe ndjâla olowa wa ntondo ko ekitɔ wayolɛ kâmɛ la nde ndjâla ‘elowa ɛmɔtshi wa ntondo.’ Kayotota naka tekɔ l’elongamelo ka lɔsɛnɔ la laa nkɛtɛ na? Eelo, naka sho mbohɔ di’elongamelo kaso ka lɔsɛnɔ la la nkɛtɛ, kete tayokimanyiyama dia kukutɛ mbetawɔ kaso le Ombishi wa ‘losha tshɛ l’ɔlɔlɔ,’ lakalɔngɔsɔla di’anto kondja lɔsɛnɔ la pondjo l’ɛlɔmbwɛlɔ ka Diolelo.
Onga ‘Otshi wa Dui’
16 Oyadi kânga mbetawɔ kaso kekɔ lo pembama wonya watɛkɛtaso ɔsɔ kana bu, sho la dia monga “atshi wa diui.” (Jakoba 1:19-25) Sho la dia monga ‘suke dia mpokamɛ’ Dui dia Nzambi, ndjâla anto wadikitanyiya. (Joani 8:47) Lo wedi okina, nyɛsɔ tonge ‘ɔkɔkɛ lo tɛkɛta,’ ndo wanɛ wɛdikola ɔlɔlɔ awui wahombawɔ tondja. (Tukedi 15:28; 16:23) Ondo Jakɔba ekɔ lo tɔhɛmɔla di’aha sho mbutaka esadi eto ɔnɛ Nzambi mbatotomɛ ehemba. Wambotolaka nto di’aha sho ndjalaka “esadi etoo ko momala nkɛlɛ; dikambo onto lele la nkɛlɛ, hatshe kɛnɛ kele dimɛna lo washo wa [Nzambi].” Naka kɛnɛ kotshi onto ɔmɔtshi ambokomadja, ‘kikɛ’ di’aha wɛ ndjôkadimola ɔtɛkɛta wa lɔlɛngɔ esadi eto. (Efeso 4:26, 27) Yimba y’ɛkɛlɛkɛlɛ yakoka tela ekakatanu ndo ndjodja anangɛso l’ehemba hatokimanyiya sho wanɛ wele la mbetawɔ le Nzambi kaso ka losembwe dia sho sala kɛnɛ katɔlɔmbande. Lâdiko dia lâsɔ, naka tekɔ la ‘shɛnɔdi y’efula,’ kete ‘hatotoka kɛlɛ esadi’ ndo anangɛso l’akadiyɛso wayotɔ̂tɔka lo demba.—Tukedi 14:29.
17 Lo mɛtɛ, sho hatolange mbisana la “akambu wa sonyi la wa kolo”—dui tshɛ diele nyɛtɛtɛ lo washo a Nzambi ndo diakoka tɔtɔmbɔsha. Nto, sho la dia ‘minya awui wa mindo tshɛ.’ Toyaɛdia sho tshɛ oma l’etsha aso wa mindo kana lɔkɛwɔ laso la kɔlɔ. (2 Koreto 7:1; 1 Petero 1:14-16; 1 Joani 1:9) Minya kɔlɔ oma l’otema la lo yimba tokimanyiyaka dia sho ‘mbetawɔ l’okitshakitsha tshɛ dui dia mɛtɛ dionɛwɔ lɔkɔ.’ (Etsha 17:11, 12) Oyadi edja kakɔna tshɛ kayaso Okristo, totetemale mbetawɔ di’akambo wa mɛtɛ w’oma l’Afundelo monɛma l’etema aso. Lande na? Nɛ dia, oma lo nyuma ka Nzambi, dui diônɛmi tondjaka “untu uyuyu” lakoka kondja panda.—Efeso 4:20-24.
18 Ngande ayotɛnya ɔnɛ dui dia Nzambi mbatɔlɔmbɔla na? Ele lo mbetawɔ monga “atshi wa diui, aha ambuki atu.” (Luka 11:28) “Atshi” wekɔ la mbetawɔ kele l’etsha wele oko: monga l’ohetoheto l’olimu aso w’Okristo w’esambishelo ndo mbɔtɔka mbala tshɛ lo nsanganya y’ekambi a Nzambi. (Romo 10:14, 15; Heberu 10:24, 25) Onto lôka paka dui to “eko uku untu lenda elundji kandi lu lulindu.” Nde ndjaɛnaka, ko kam’amɔnde kete nde ambohɛ esadi eto kɛnɛ kahombande sala dia nɔngɔsɔla ɛnamelo kande. Oko weso “atshi wa diui” sho mbekaka la yambalo tshɛ ndo kitanyiyaka ‘ɔlɛmbɛ wa kokele’ waki Nzambi, wele ndo l’awui akina tshɛ watɔlɔmbande. Lotshungɔ lele la so tshikitana la lɔhɔmbɔ la pɛkato la nyɔi, nɛ dia lɔ tɔtɔlaka otsha lo lɔsɛnɔ. Omalɔkɔ, nyɛsɔ ‘totetemale lo ɔlɛmbɛ wa kokele,’ talama ndo tasɛdingola ɔlɛmbɛ akɔ lo nna ndo lo nna. Ohokanyiya yema! Oko weso ‘atshi wa dui koko aha wanɛ wadiohɛ,’ sho kondjaka ɔngɛnɔngɛnɔ nɛ dia Nzambi tetawɔka.—Osambu 19:7-11.
Tatongake Paka Atɛmɔdi wa l’Emunyi
19 Naka sho nangaka Nzambi têtawɔ, kete tohɔke ɔnɛ, ɔtɛmwɛlɔ wa mɛtɛ bu dui diahombaso mɛnyaka l’ɛlɔmɔ oto. (Jakoba 1:26, 27) Sho kokaka kanyiya ɔnɛ Jehowa tetawɔka nɛ dia ‘tekɔ atɛmɔdi’ ande, tete le kɛnɛ kele ohomba ele nganɛ watɔsande ndamɛ. (1 Koreto 4:4) Dui dimɔtshi dia kɔlɔ ele kana ‘hatombe lolemi laso.’ Sho kokaka ndjakesa naka sho kanyiyaka ɔnɛ Nzambi mbetawɔka ɔtɛmwɛlɔ aso etena kamamatanyiɛso anyaso awui, kâtɛndaso kana kataso awui wa kashi, kana kahatombe lolemi laso dimɛna. (Akambu w’Asi Lewi 19:16; Efeso 4:25) Mɛtɛ, sho hatolange “otemwelo” aso monga “anyanya” ko Nzambi mbotona lo weho akɔna tshɛ.
20 Kânga mbahatshi Jakɔba kiambokiambo tshɛ yendana l’ɔtɛmwɛlɔ wa pudipudi, nde mbutaka ɔnɛ vɔ la dia ‘kimanyiya ana wa tshike la waadi waki edo lo fɔnu yawɔ.’ (Ngalatiya 2:10; 6:10; 1 Joani 3:18) Etshumanelo k’Akristo ndjashaka lo yoho ya lânde dia kotsha ehomba wa wadi waki edo. (Etsha 6:1-6; 1 Timote 5:8-10) Lam’ele Nzambi mbele Okokedi a waadi waki edo l’ana wa tshike, nyɛsɔ tokambe kâmɛ la Nde lo salaka la wolo aso tshɛ dia mbakimanyiya lo nyuma la l’emunyi. (Euhwelu k’Elembe 10:17, 18) Ɔtɛmwɛlɔ wa pudipudi nɔmbaka onto nto dia nde “njaomba dyaha monga kaanga la vadi yakɔna oma l’akambo wa l’andja anɛ,” mbut’ate tshunda di’anto wa kɔlɔ dialɔmbɔma oma le Satana. (Joani 17:16; 1 Joani 5:19) Lâsɔ, nyɛsɔ toyaombake di’aha ndjasanya la lɔkɛwɔ l’ase andja ɔnɛ wahalɛnya ɛlɛmbɛ a Nzambi dia sho tombolaka Jehowa ko tayongaka ohomba l’olimu ande.—2 Timote 2:20-22.
21 Dako diakatosha Jakɔba di’omiso la sɛdingola diayotokimanyiya dia sho mbikikɛ ehemba ndo kukutɛ mbetawɔ kaso. Diɔ la dia tosokoya dia sho ndeka mandola Ombishi woludi la ngandji, ɔnɛ latosha weshasha w’ɔlɔlɔ. Nto, ɛtɛkɛta wa Jakɔba tokimanyiyaka dia sho mɛnyaka oma l’etsha aso ɔnɛ l’ɔtɛmwɛlɔ wa pudipudi mbeso. Dui diakɔna dikina nto diakotolande yambalo yaso na? Wanya akɔna akina wahombaso takula dia mɛnya ɔnɛ tekɔ la mbetawɔ ka mɛtɛ le Jehowa na?
[Footnote]
a Lam’ayonyeka sawo dia wekelo nɛ ndo akina ahende wayela l’onto ndamɛ kana lo nkumbo, nyayokondja wahɔ lo yoho ya lânde naka nyu mbala oseka divɛsa tshɛ dioshidiwɔ oma lo mukanda wa Jakɔba wakeketsha mbetawɔ kaso.
[Study Questions]
1. Ekambi wa Jehowa mbokambɛka la mbetawɔ ndo ‘l’otema w’ɔngɛnɔngɛnɔ’ kânga la ntondo ka dui diakɔna na?
2. Kakɔna keyaso lo dikambo di’ofundji wa mukanda wa Jakɔba?
3. Naa ekakatanu ɛmɔtshi wakahomanaka l’Akristo wa l’eleko ka ntondo, ndo ngande wakokaso kondja wahɔ w’efula oma lo dibuku dia Jakɔba na?
4. Ngande wahombaso mbɔsaka ehemba?
5. Ehemba wa ngande wokuki tokomɛ, ndo kakɔna katomba etena kâtondoyaso na?
6. Ngande ‘walowanya etetemalo olimu awɔ,’ ndo akambo akɔna w’ohomba weso la dia ndjela lam’eso l’ehemba?
7. Ekimanyielo kakɔna kakokaso kondja dia mbikikɛ ehemba na?
8. Bonde kahalongola kanga tamu koyanga ɛngɔ ɔtɔi oma le Jehowa?
9. Oko weso atɛmɔdi wa Jehowa, bonde kahombaso ngɛnangɛnaka?
10. Ngande wahomba Okristo mbɔsa ɔngɔnyi wa l’emunyi na?
11. Elongamelo kakɔna kele la wanɛ wahashisha mbetawɔ kawɔ la ntondo k’ehemba?
12. Lam’ɛnaso fɔnu, bonde kahatahombe mbuta ɔnɛ: “Dimi lambuhimbama uma le [Nzambi]”?
13. Kakɔna kakoka tokomɛ naka hatonyisha nsaki ya kɔlɔ na?
14. Lo na akokaso mbuta ɔnɛ weshasha wa Nzambi wekɔ ‘kokele’ na?
15. Naa woshasha ɔmɔtshi waki Jehowa woleki woke?
16. Bonde kahombaso monga ‘suke dia mpokamɛ, ɔkɔkɛ dia tɛkɛta ndo aha mboka kɛlɛ esadi’?
17. Kakɔna katomba lam’anyaso kɔlɔ oma l’otema la oma lo yimba yaso na?
18. Ngande watshikitana onto lahokamɛ dui to la ɔnɛ lahokamɛ ndo ladisala na?
19, 20. (a) Lo ndjela Jakoba 1:26, 27, ɔtɛmwɛlɔ wa pudipudi atɔlɔmbawɔ na? (b) Naa awui amɔtshi wasala ɔtɛmwɛlɔ waha la vadi?
21. Lo menda kɛnɛ kofundami lo mukanda waki Jakɔba, naa wembola ekina wahombaso sɛdingola?
[Caption]
[Footnotes]
[Caption]
[Questions]
[Caption on page 5]
[Picture caption on page 5]
Lam’eyɛ l’ehemba, kôngake la mbetawɔ lo wolo wele la Jehowa wa mboka alɔmbɛlɔ
[Caption on page 7]
[Picture caption on page 7]
“Atshi wa diui” wekɔ lo sambisha Diolelo dia Nzambi l’andja w’otondo
[Caption on page 7]
[Review on page 7]
Ngande Wayoyokadimola?
◻ Kakɔna kayotokimanyiya dia sho mbikikɛ ehemba?
◻ Bonde kahomba Akristo ngɛnangɛna kânga lam’ewɔ l’ehemba?
◻ Ngande wakokaso ndjâla atshi wa dui na?
◻ Kakɔna kahomba ɔtɛmwɛlɔ wa pudipudi kotsha na?