Diolelo Diaki Nzambi—Onde Wɛ Dimanaka Fundo?
“One lakukama lu kete y’ololo, eli one latukaka diui, latudishihudiaka.”—MATEU 13:23.
DIOLELO diaki Nzambi—onde wɛ ‘ambodimana fundo’? Tokanyi tele l’anto lo dikambo dia ‘diolelo dia l’olongo’ tambotshikitana efula l’edja ka deko la deko. Ɛlɔ kɛnɛ, ase ɛtɛmwɛlɔ efula fɔnyaka ɔnɛ Diolelo diekɔ ɛngɔ kɛmɔtshi kadja Nzambi l’otema w’onto wonya wakomande ombetawudi. Akina kanyiyaka ɔnɛ ɔsɔ ekɔ dihole dimɔtshi dia dimɛna diatshɔ anto w’ɛlɔlɔ l’ɔkɔngɔ wa nyɔi dia vɔ tokondja ɔngɛnɔngɛnɔ wa pondjo. Akina nto mbutaka ɔnɛ Nzambi akatshikɛ anto ɔkɛndɛ wa vɔ mbela Diolelo lanɛ la nkɛtɛ oma lo weolo wadjawɔ dia mbɔtshiya wetshelo la ditshelo di’Akristo yema yema l’atei w’akambo wa tshunda di’anto ndo wa pɔlitikɛ.
2 Koko Bible mɛnyaka hwe ɔnɛ Diolelo diaki Nzambi kema ɔlɔngɔswamelo ɔmɔtshi wa lanɛ la nkɛtɛ. Diɔ kema l’atei w’otema w’onto koyanga okadimwelo wa tshunda di’anto oko tshunda di’Akristo. Mɛtɛ, kanyi y’oshika lo kɛnɛ k’endana la Diolelo tshutshuyaka wanɛ wele la mbetawɔ lɔkɔ dia vɔ sala etshikitanu wa weke lo nsɛnɔ yawɔ. Koko, Diolelo dwamɛ diekɔ lowandji lakadjama l’olongo oma le Nzambi, lɔ mbayokotsha lolango la Nzambi, mbayonya etombelo w’oma lo pɛkato la nyɔi ndo mbayela akambo w’ɛlɔlɔ lanɛ la nkɛtɛ. Diolelo sɔ diambotatɛka mbolɛ l’olongo, ndo kem’edja nto, “dio diayulanya waulelu ako tshe [w’anto], diayâshila ushiki, ku dio diame diayushikikala pundju.”—Danyele 2:44; Enyelo 11:15; 12:10.
3 Ombewi ɔmɔtshi w’ɛkɔndɔ, yɔnɛ H. G. Wells, akafunde ate: “Wetshelo ɔsɔ wa Diolelo dia l’Olongo, wetshelo wa Yeso woleki ohomba ndo wahɔsama la nɛmɔ efula l’atei w’ɛtɛmwɛlɔ, ekɔ ɔtɔi ɔmɔtshi a l’atei a wetshelo wakaleke mbela etshikitanu a weke, wakananda etema w’anto, ndo wakatshikitanya tokanyi t’anto lo yɛdikɔ yahatasalemaka ndoko lushi.” Kam’akandatatɛ sala olimu ande, ɔtɛ a dui w’esambishelo kaki Yeso waki ɔnɛ: “Nyukadimuli etema, ne dia diulelu dia l’ulungu diaya suki.” (Mateu 4:17) Nde akikɔ lanɛ la nkɛtɛ oko Nkumekanga kakasɔnama, ndo ɔmɔtshi a l’atei w’ɛngɛnɔngɛnɔ woleki weke wakayala, nɛ dia l’etena kɛsɔ mbakatatɛ mboka ndjihwama le anto, aha paka dia vɔ kondja ɛtshɔkɔ eto wa Diolelo sɔ koko ndo dia vɔ mbolɛ kâmɛ la Yeso ndo monga ɛlɔmbɛdi lo Diolelo diakɔ!—Luka 22:28-30; Enyelo 1:6; 5:10.
4 Kânga mbakoke elui w’anto “lokumu l’ololo la diulelu” lɔsɔ la dimɛna, yema tshitshɛ tsho mbakalietawɔ. Lo yɛdikɔ mɔtshi, efula kolietawɔ nɛ dia ewandji w’ɛtɛmwɛlɔ ‘wakadihɛka anto lokuke la diolelo dia l’olongo.’ Oma lo wetshelo awɔ wa kashi, vɔ ‘wakanya sapi k’ewo.’ Lam’ele anto efula kombetawɔ Yeso oko Mɛsiya la Nkumekanga kakasɔnama lo Diolelo diaki Nzambi, Yeso akawatɛ ate: “Wayunyokosola diulelu dia [Nzambi, NW], ku wayudisha wudja watotokaka elua adio.”—Mateu 4:23; 21:43; 23:13; Luka 11:52.
5 Lushi lɔmɔtshi, lam’akandetshaka olui a woke w’anto, lo ndjela mbekelo kande, Yeso akakambe la wɛɛla efula dia nde pemba olui w’anto ndo kakitola wanɛ waki kondjashaka l’otema ɔtɔi lo akambo wa Diolelo. Wɛɛla wa ntondo tɛkɛtaka dikambo di’ombuki a woho wakonɛ ntɔngɔ lo weoho ɛnɛi wa nkɛtɛ. Weoho esato wa ntondo wa nkɛtɛ komonga ɔlɔlɔ le nɔngɔ yakayatombaka, koko woho wa nkɛtɛ wa komelo waki “kete y’ololo” yakatondja elowa w’ɛlɔlɔ. Wɛɛla ɔsɔ wa mondo wakakomɛ la dako nɛ: “One leli la atui, uki.” (Mateu 13:1-9) Efula ka wanɛ waki lâwɔ wakokaka awui ande koko vɔ ‘kompokamɛ.’ Vɔ kondjala ndoko la shɛngiya mɔtshi l’etema awɔ, ndo vɔ kondjashaka mɛtɛ dia mbeya woho wafɔna ntɔngɔ yakonɛma l’ahole wotshikitanyi la Diolelo dia l’olongo. Vɔ wakakalola lawakawɔ dia tosala elimu awɔ wa lushi la lushi, ondo wakafɔnyaka ɔnɛ wɛɛla wa Yeso wekɔ paka toshimu t’amɛna toto tatɛ anto dia vɔ monga la lɔkɛwɔ l’ɔlɔlɔ. Ande ewo k’efula, diɛsɛ dia mamba, ndo waaso w’ɛlɔlɔ wakawahandja l’ɔtɛ wa lonyû lawɔ l’etema lee!
6 Yeso akatɛ ambeki ande ate: ‘Nyu, wambonyosha losha la shihodia toseke t’ekila ta diolelo dia l’olongo, koko vɔ kombasha.’ Nde akate nto lo ndjela kɛnɛ kakatatshi Isaya ate: “Ne dia etema w’antu ane wakayala wetshu, atui awo weko puki, ku vo wambudiha ashu awo, ne dia vo watukena l’ashu, watukuka l’atui awo, watukushihudia l’etema awo, watukukadimo ntu, dia dimi mbâkonoya. Keli ashu anyu weko la [ɔngɛnɔngɛnɔ, NW], ne dia vo menaka; ndu atui anyu, ne dia vo mbukaka.”—Sho mbɛnganyisha alɛta ango; Mateu 13:10-16; Mako 4:11-13.
Woho Wakokaso ‘Mana Diolelo Fundo’
7 Yeso akakɛnɛmɔla dikambo diakɔ sɔ. Diɔ mendanaka la ‘oshihodielo’ wa losango la Diolelo. Nde akatɛ ambeki ande lam’akiwɔ vamɛ ato ate: “Okone nyulungi kitshimudi ya wela wa umbuki a wuhu. Lam’uka untu diui dia diulelu, ku ndi [hadimane fundo, “NW”], ku kanga kolo atuyakaka, atunyaka kene kakawune l’utema andi.” Nde akatetemala nembetshiya ɔnɛ weoho ɛnɛi wa nkɛtɛ kɛdikɛdi etema a weoho la weoho, lɛnɛ akonɛma “diui dia diulelu.”—Mateu 13:18-23; Luka 8:9-15.
8 ‘Ntɔngɔ’ yakonɛma l’ahole akɔ tshɛ yakikɔ amɛna, koko elowa wakalemanɛka la nkɛtɛ. Naka nkɛtɛ, mbuta ate otema w’onto, yaki oko mboka kadjɛdjɛwɔ wonya tshɛ ndo kambokeketala l’akambo efula wa l’emunyi, kete komonga wolo le ɔnɛ lakoke losango la Diolelo dia nde nyanga dia mbetshiya ewo k’anyanya ndo mbuta ɔnɛ etena ka ndjasha l’akambo wa Diolelo bu. Ntɔngɔ yakakalema yakɛmbama la ntondo ka yɔ mbidja edo. Ko kayotota naka lɔtɔngɔ lakonɛma l’otema wafɔna la nkɛtɛ y’ave na? Lɔtɔngɔ lakɔ lakakoke tomba, koko lɔ lotonga l’ekakatanu dia tɔtɔmiya edo alɔ etale lo nkɛtɛ woho wa lɔ ndɛ̂ka ndo shikikala. Le onto la ngasɔ, elongamelo ka nde ndjâla okambi wa Nzambi kakayala tɔfwɛfwɛ ta wolo, djekoleko lam’otoya ɛhɛnyɔhɛnyɔ woho w’anyanya, ndo onto akɔ otɔkɔ. Ndo nto, naka nkɛtɛ, mbuta ate otema, yakalole tɔ l’atɛndɛ, mbuta ate ekiyanu kana mposa k’okundji, kete lɔnɔngɔ la wɔduwɔdu la Diolelo lotosema. Lo ahole asɔ asato wa didjidji wa lo lɔsɛnɔ, ndoko elowa wa Diolelo wotɔtɔ.
9 Ko kayotota lo dikambo dia lɔtɔngɔ lakonɛma lo nkɛtɛ y’ɔlɔlɔ na? Yeso akakadimola ate: “One lakukama lu kete y’ololo, eli one [latokaka dui ndo latodimanaka fundo, “NW”]. Mete ndi atotokaka elua: emotshi lukama lukama, ekina akumi asamalu akumi asamalu, ekina akumi asatu akumi asatu.” (Mateu 13:23) Lam’ele vɔ ‘wakamane Diolelo fundo,’ vɔ wakatɔ elowa w’ɛlɔlɔ lo ndjela akoka w’onto l’onto.
Ɔkɛndɛ Ndjâka Kâmɛ la Ewo
10 L’ɔkɔngɔ wa nde mboka wɛɛla ekina esamalo dia nde nembetshiya akambo wotshikitanyi wa lo Diolelo, Yeso akambola ambeki ande ate: “Onde nyambomana akambo asɔ tshɛ fundo?” lam’akawakadimola vate: “Eelo,” nde akawatɛ ate: ‘Ɔnkɔnɛ, ombewi w’ɛlɛmbɛ tshɛ wakawetsha akambo wa diolelo dia l’olongo fɔnaka la kanga luudu latotondjaka diangɔ di’eyoyo la di’edjedja oma lo eombelo kande.’ Wetshelo wakasha Yeso ambeki ande akawaetɛ oko Akristo wambotshunda, wanɛ wakakokaka tondja lokema la mbo ya ndɛ ya lo nyuma yahashile oma lo ‘eombelo’ kawɔ. Efula ka mbo ya ndɛ shɔ mendanaka la Diolelo diaki Nzambi. Yeso akɛnya hwe ɔnɛ naka onto ‘ambomana Diolelo fundo’ kete nde ayokondja ndo ɔkɛndɛ, koko aha paka ɛtshɔkɔ eto. Nde akadjangɛ ambeki ande ate: “Okone nyutshu, nyete wedja tshe ambeki, . . . Nyuwaetshaki dia ntsha akambu tshe wamumunyutela. Nyulungi, dimi leko la nyu nshi tshe, edja ndu ekumelu k’andja.”—Mateu 13:51, 52, NW; Mat. 28:19, 20.
11 Oko wakandadilake, Yeso atetemalakɔ monga kâmɛ l’ambeki ande wa mɛtɛ polo ndo lo nshi yaso nyɛ. Lo nshi nyɛ y’ekomelo, nde ekɔ lo tâmanya akambo fundo yema yema, ndo akawasha ɔkɛndɛ wa vɔ kamba la osase wa mɛtɛ wataleke ngamɔ tsho. (Luka 19:11-15, 26) L’ɔnɔnyi 1914, akambo wa Diolelo wakatatɛ salema esadi esadi ndo lo yoho ya diambo. L’ɔnɔnyi ɔsɔ, aha paka ‘eotwelo’ keto ka Diolelo diakongɛso aya edja efula kakayala koko “nshi y’ekomelo ya dikongɛ di’akambo nɛ” yakatatɛ. (Enyelo 11:15; 12:5, 10; Danyele 7:13, 14, 27) Akristo wa mɛtɛ, wanɛ wahotɔ kitshimudi y’akambo wasalema nshi nyɛ, wekɔ lo nɔmbɔla olimu w’esambishelo ka Diolelo ndo wa mbetsha anto, olimu woleki woke l’ɔkɔndɔ wa lɔsɛnɔ l’anto. Yeso akalake dikambo sɔ lam’akandatatshi ate: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.”—Mateu 24:14.
12 Olimu ɔsɔ wa woke w’esambishelo ka Diolelo wambokoma lo wedja ndekana 230. Lofulo l’ambeki wa mɛtɛ suke la miliyɔ tshanu wambotatɛka kamba olimu ɔsɔ, ndo akina nto wekɔ lo tatshumanyema. Koko naka sho mbɛdika lofulo l’ambeki la lɔnɛ l’anto 5 600 000 000 wa lo nkɛtɛ k’otondo, kete mɛnamaka ɔnɛ anto efula, oko lo nshi ya Yeso, ‘hawomane Diolelo fundo.’ Oko wakadiatama, anto efula mbutaka la diɔnyɔ tshɛ vate: “Daka dia eyelu kandi, lend’edio?” (2 Petero 3:3, 4) Wâle wakoka tokomɛ, sho Akristo, ele dionga di’anto wa l’andja ɔnɛ wayangɛnyangɛnya aha la mbidja yimba l’akambo w’anto akina, wanɛ wadja tamu, ndo wele la mposa k’okundji kokaka ndjotɔsɛngiya yema yema lo woho wɔsaso waɛsɛ wa Diolelo. Lam’ele ase andja ɔnɛ todinga, sho kokaka ndjosangola lɔkɛwɔ ndo ditshelo diawɔ esadi eto. Mɛtɛ, ekɔ ohomba efula dia sho ‘mana Diolelo diaki Nzambi fundo’ ndo dimamema ma ma!
Toyasɛdingolake lo Kɛnɛ k’Endana la Diolelo
13 Yeso akate lo dikambo di’etena ka dinela kasɛnaso kɛnɛ ate: “On’a untu ayutuma andjelo andi, wayosonola diango tshe diatakanya antu la tshe watutshaka kolo uma lu diulelu diandi, . . . Ku antu w’ololo wayoheta uku unya lu diulelu dia Shewo. One leli la atui, uki.” (Mateu 13:41, 43) Onde wɛ ekɔ lo tetemala ‘mpokamɛ’ didjango diatotɛ dia sambisha Diolelo la mbetɛ anto ambeki ndo ekɔ lo dikitanyiya? Ohɔ dia, “One lakukama lu kete y’ololo” ‘akoke dui ko akadimane fundo’ ndo akatɔ elowa w’ɛlɔlɔ.—Mateu 13:23.
14 Lam’asalaso wekelo w’onto ndamɛ ndo lam’ɔtɔso lo nsanganya y’Akristo, sho pombaka ‘mbɛdiya etema aso otsha l’ɛsɛdingwelo.’ (Tukedi 2:1-4) Etena kashawɔ alako lo kɛnɛ k’endana la lɔkɛwɔ laso, ɔlɔtɔ aso, mishiki wahokamɛso, ndo tɔkɛnyɔ takɛnyaso, sho pombaka tshika dako diakɔ dia diɔ nyɔngɔmɛ polo ndo la tshina di’otema aso ndo totshutshuya dia sho sala etshikitanu tshɛ wahombama. Tatongunangunake lo dikambo sɔ, kana mbetshiya ewo, kana tona dikitanyiya l’okonda. Naka Diolelo diekɔ dikambo dia mɛtɛ lo nsɛnɔ yaso, kete tayoyaɔtɔnganyiyaka nshi tshɛ la ɛlɛmbɛ adiɔ ndo tayodisambishaka l’ohetoheto tshɛ. Yeso akate ate: “Aha untu tshe latumbetaka ati: Khumadiondjo, Khumadiondjo, kayoto lu diulelu dia l’ulungu. Keli paka one latutshaka lulangu la Papa leli l’ulungu.”—Mateu 7:21-23.
15 Onto tshɛ ekɔ la saki ka ndjakiyanya dia kondja mbo ya ndɛ yahombama, ahɔndɔ ndo luudu la mbidjasɛ, koko Yeso akate ate: “Keli ntundu nyutayangi diulelu la [losembwe lande, NW], ku diango so tshe diayuyala dianyu.” (Mateu 6:33, 34) Lam’asalayɛ ekongelo k’akambo wahombayɛ salaka ntondo, dja Diolelo lo dihole dia ntondo lo lɔsɛnɔ layɛ. Tohokosanyake lɔsɛnɔ layɛ, ɔngɛnangɛnake la kɛnɛ kele ohomba. Naka wɛ ndodja lɔsɛnɔ layɛ l’awui ndo la diangɔ diele kema ohomba, ondo lo mbetshiyaka ewo ɔnɛ ndoko kɔlɔ kende naka onto sala ɔsɔku lam’ele diangɔ sɔ ndoko kɔlɔ diediɔ, kete wɛ ayonga oko kanga enginya. Kânga mbakokadiɔ monga ɔsɔku, kakɔna kayosala diangɔ dia ngasɔ diele kema ohomba lo ekongelo kaso ka wekelo w’onto ndamɛ, lo wɔtwɛlɔ aso wa lo nsanganya, ndo l’otombelo aso l’olimu w’esambishelo na? Yeso akate ɔnɛ Diolelo fɔnaka la omundji w’okanda wakashola “lowoko l’ushinga wulu, [ko] ndi akatusundja kene tshe kaki landi, akalusumbi.” (Mateu 13:45, 46) Ɔsɔku mbahombaso kanyiyaka lo dikambo dia Diolelo diaki Nzambi. Sho pombaka mbokoya Paulo, koko aha Dɛmasi lakatshike olimu ‘l’ɔtɛ wa ngandji kakandokaka akambo wa l’andja ɔnɛ.’—2 Timote 4:10, 18; Mateu 19:23, 24; Filipi 3:7, 8, 13, 14; 1 Timote 6:9, 10, 17-19.
‘Anto wa Kɔlɔ Hawotokita Diolelo Diaki Nzambi’
16 Lam’akanyaka etshumanelo ka la Kɔrɛtɔ asho oma l’akambo wa mindo wakasalemaka l’atei atɔ, Paulo akâhonwɛ ate: “Nyu hanyeyi nyati: Antu wa kolo hawukiti diulelu dia [Nzambi, NW]? Tanyuyadimbiyaki: atshi w’akambu wa sonyi, kuyanga atemodi wa dikishi, kuyanga amunanyi, kuyanga akanga a nende, kuyanga [pami kateyanaka la onyande pami, NW], kuyanga evi, kuyanga akanga w’ekomiya, kuyanga ambidjoki a wanu, kuyanga atenganyi, kuyanga apotwanyi, vo tshe [hawotokita diolelo diaki Nzambi, NW].” (1 Koreto 6:9, 10) Naka sho ‘mana Diolelo diaki Nzambi fundo,’ kete hatotoyakesaka la kanyi y’ɔnɛ Jehowa ayototshika dia sho salaka akambo wa mindo naka nde ekɔ lo tɛ̂na takamba olimu w’Okristo. Akambo wa mindo hawokoke tanema kânga yema l’atei aso. (Efeso 5:3-5) Onde wɛ ekɔ lo mɛna dia tokanyi tɔmɔtshi la ditshelo dia kɔlɔ dia l’andja ɔnɛ diambomɛ sɔsɔmɛ lo lɔsɛnɔ layɛ? Nyadiɔ oma lo lɔsɛnɔ layɛ kam’atɛkɛtaso anɛ! Diolelo diekɔ ɛngɔ koleki tshɛ ohomba, ko wate dishisha l’ɔtɛ w’akambo wa ngasɔ!—Mako 9:47.
17 Ambeki wa Yeso wakawombola vate: “Akona uleki wuki lu diulelu dia l’ulungu?” Yeso akâkadimola lam’akandɔshi kiɛndakɛnda ko nde ndjiemɛ l’atei awɔ, awatɛ ate: “Mete kanyutelami nti: Nyu hanyeyi mboto lu diulelu dia l’ulungu, tshikima nyu nyambukadimula etema, ndu nyambuyala uku tokendakenda. Okone untu tshe layakitshakitsha uku kiendakenda nye, ndi kuleki wuki lu diulelu dia l’ulungu.” (Mateu 18:1-6) Akanga wa lotamanya, w’awui wolo, wahadje akina yimba, ndo wɔnyɔla ɛlɛmbɛ, hawotɔtɔ lo Diolelo diaki Nzambi ndo vɔ hawotoyala ambolami wa Diolelo diakɔ sɔ. Onde ngandji kokayɛ ananyɔ, ndjakitshakitsha kayɛ, wɔma wokayɛ Nzambi, kotshutshuyaka di’aha wɛ takanya anto akina oma lo lɔkɛwɔ layɛ? Onde wɛ kɔkɔmalaka lo “akambo weyɛ la lotshungɔ la sala” oyadi kɔlɔ kakɔna kakoka dionga la lɔkɛwɔ lɔsɔ salɛ anto akina?—Romo 14:13, 17.
18 Jehowa, Shɛso lele l’olongo, ayanga kadimola dɔmbɛlɔ nɛ di’oma ka tshina di’otema: “Diulelu diaye diayi. Lulangu laye latshami la kete uku atshamalo l’ulungu.” Kem’edja nto, Yeso Kristo, Nkumekanga kôlɛ, ayoya dia ndjodjasɛ lo kiti kande ka diolelo dia ndjolomboya anto, dia ndjokakitola “ekoko” la “mbudi.” L’etena kɛsɔ kakashikikɛma, “Khum’ekanga ayutela wane weli lu lunya landi la pami ati: Nyuyi, nyu etshokwami wa Papa, nyukiti diulelu diakawanyolongoswela umaka etatelu k’andja.” Wa mbudi ‘wayotshɔ otsha l’elanyelo ka pondjo, koko anto w’ɛlɔlɔ otsha lo lɔsɛnɔ la pondjo.’ (Mateu 6:10; 25:31-34, 46) “Fɔnu ka woke” kayonya dikongɛ nɛ di’edjedja kâmɛ la wanɛ tshɛ wahalange ‘mana Diolelo fundo.’ Koko miliyɔ ya wanɛ wayoka lo “fɔnu ka woke” ndo miliyara ya wanɛ wayolɔ wayokita ɛtshɔkɔ wa Diolelo pondjo pondjo lo nkɛtɛ kɛnɛ kayokadimɔ Paradiso. (Enyelo 7:14) Diolelo diekɔ lowandji l’oyoyo la nkɛtɛ kɛnɛ, lɔ lekɔ lo mbolɛ oma l’olongo. Lɔ layokotsha sangwelo dia Jehowa tshɛ di’endana la nkɛtɛ ndo l’anto, dia kidia lokombo lande loleki ekila. Shi ɔsɔ ekɔ sango diakokaso kamba olimu dia dikondja, diakokaso mbetawɔ shisha tshɛ dia dikondja, ndo dikonga? Le so, ‘mana Diolelo fundo’ kɛdikɛdi sala ɔsɔku!
[Study Questions]
1. Naa tokanyi tɔmɔtshi tele l’anto efula lo dikambo dia ‘diolelo dia l’olongo’?
2. Lo ndjela Bible, Diolelo diaki Nzambi kɛdikɛdi na, ndo kakɔna kayodiosala?
3. Mboka kakɔna kakadihwama le anto l’etena kakamɛ Yeso sala olimu ande?
4. L’eleko ka ntondo, kakɔna kakasale elui w’anto lam’akawoke “lokumu l’ololo la diulelu,” ndo kakɔna kakayâkomɛ?
5. Ngande wakɛnya efula ka wanɛ wakokaka wɛɛla wa Yeso ɔnɛ vɔ kombashihodiaka?
6. Lande na kele losha la shihodia ‘toseke t’ekila ta diolelo’ lakashama paka le ambeki wa Yeso ato?
7. Lande na kele ekɔ ohomba ‘mana Diolelo fundo’?
8. Kakɔna kakasekɛ ‘ntɔngɔ’ yakakɔ lo weoho esato wa ntondo wa nkɛtɛ dia yɔ ntɔ elowa?
9. Lande na kakatɔ lɔtɔngɔ lakonɛma lo nkɛtɛ y’ɔlɔlɔ elowa?
10. (a) Woho akɔna wakɛnya Yeso ɔnɛ onto ‘lamana Diolelo fundo’ kondjaka ɛtshɔkɔ la ɔkɛndɛ? (b) Onde didjango dia Yeso dia ntshɔ dia teetɛ anto ambeki diakashama paka le ambeki wa l’eleko ka ntondo ato?
11. Akambo akɔna w’endana la Diolelo wakasalema lam’akakoke ɔnɔnyi 1914?
12. (a) Etombelo akɔna wamboyala oma l’olimu a woke w’esambishelo ka Diolelo kasalema ɛlɔ kɛnɛ? (b) Wâle akɔna wakoka komɛ Akristo l’andja ɔnɛ woludi l’akanga a tamu?
13. Lo kɛnɛ k’endana l’ɔkɛndɛ wa sambisha lokumu l’ɔlɔlɔ la Diolelo, woho akɔna wakokaso ndjasɛdingola dia mbeya kana tekɔ lo ‘mboka’ ndo tekɔ lo mana fundo?
14. Etena katoshawɔ dako dimɔtshi, woho akɔna wakokaso mɛnya ɔnɛ ‘tambodimana fundo’?
15. Lande na kele ekɔ ohomba dia ‘nyanga Diolelo diaki Nzambi ntondo la losembwe lande’?
16. Woho akɔna wakimanyiyamaso dia mbewɔ lɔkɛwɔ la kɔlɔ naka ‘tambomana Diolelo diaki Nzambi fundo’?
17. Woho akɔna wayotokimanyiya lowando lele laso lo dikambo dia Diolelo diaki Nzambi dia sho monga la ndjakitshakitsha ndo tshika akambo tshɛ wakoka takanya anto akina?
18. Kakɔna kayokomɛ anto wele l’okitanyiya lam’ayosala Diolelo diaki Nzambi dia lolango Lande ntshama “la kete uku atshamalo l’ulungu”?
[Caption]
[Wembola]
[Caption on page 22]
[Diombwɛlo di’osato wa lo lɛkɛ 22]
Ambeki wa Yeso ‘wakamane Diolelo fundo’ ndo wakatɔ elowa w’ɛlɔlɔ
[Caption on page 25]
Okonde Ayôkadimola Na?
◻ Diolelo diaki Nzambi kɛdikɛdi na?
◻ Lande na kele anto efula wakokaka awui wa Yeso ‘komanaka Diolelo fundo’?
◻ Woho akɔna wakondja onto ‘lamana Diolelo fundo’ ɛtshɔkɔ la ɔkɛndɛ?
◻ Kakɔna kɛnya ɔnɛ ‘tambomana Diolelo fundo’ lo kɛnɛ k’endana l’olimu w’esambishelo?
◻ Woho akɔna wakokaso mɛnya oma lo lɔkɛwɔ laso ɔnɛ ‘tamboshihodia’ alako watoshawɔ?