Tshika Shɛnɔdi Yakokoke
“Dikoka dia kana lomba diayokolama, shɛnɔdi yayokokokɛ.”—TOKEDI 2:11, NW.
JEHOWA nangaka wɛ monga la shɛnɔdi. Lande na na? Nɛ dia nde mbeyaka ɔnɛ shɛnɔdi yayokokokɛ oma lo wâle wa weho la weho. Tokedi 2:10-19 (NW) tatɛka l’ɛtɛkɛta ɛnɛ ɔnɛ: “Lam’ayɔtɔ lomba l’otema ayɛ, ndo lam’ayɔngɛnangɛna anima ayɛ ewo, dikoka dia kana lomba diayokolama, shɛnɔdi yayokokokɛ.” Yayokokokɛ oma lo na? Yayokokokɛ oma l’akambo wele oko “mboka ka kɔlɔ,” ndo oma le wanɛ watotakɔka mboka ya losembwe ndo wanɛ woludi la lokeso lo akambo awɔ tshɛ.
2 Ondo wɛ ekɔ lo mbohɔ ɔnɛ shɛnɔdi kɛdikɛdi dikoka diele la yimba dia yɔ mbeya tshikitanya dikambo la dikambo. Kanga shɛnɔdi mɛnaka otshikitanu wa l’asa tokanyi kana wa l’asa akambo, ndo nde ekɔ tshundju ya mamba. Sho wanɛ wele Akristo, sho ndekaka kombola monga la shɛnɔdi ya lo nyuma yotumbi oma l’ewo k’oshika ka Dui dia Nzambi. Lam’ekaso Afundelo, tekɔ oko wanɛ watshima difuku di’ave dia mbɔsa ave wakenga shɛnɔdi ya lo nyuma. Kɛnɛ kekaso kokaka tokimanyiya dia sho mbɔsa tɛdikɔ tangɛnyangɛnya Jehowa.
3 Lam’akambola Nzambi Sɔlɔmɔna, Nkumekanga k’Isariyɛlɛ, ɔtshɔkɔ walangande, nkumekanga kɛsɔ ka dikɛnda akate ate: “Umbisha, dimi ukambi aye, utema wa lutui wa nsambulaka wudja aye, la ewu ka ntshikitanya ololo la kolo.” Sɔlɔmɔna akalɔmbɛ dia vɔ mbosha shɛnɔdi, ko Jehowa akawoshayɔ lo yɛdikɔ yele ndoko onto lakonge layɔ. (1 Khumi ya Dikanga 3:9; 4:30) Dia sho kondja shɛnɔdi, ekɔ ohomba sho nɔmbaka Nzambi, ndo sho pombaka mbekaka Dui dia Nzambi l’ekimanyielo k’ekanda watotondjɛwɔ lo tshimbo y’“ɔhɔmbɔ wa kɔlamelo ndo wa kɛsɔ,” ekanda watɔmbɔla yimba lo nyuma. (Mateo 24:45-47, NW) Dikambo sɔ diayotokimanyiya dia sho monga la shɛnɔdi ya lo nyuma ndo ndjifudia ko ndjoyala ‘epalanga lo akoka wa mboka dikambo,’ ndo mbeya ‘tshikitanya [kana mɛna otshikitanu wa l’asa] ɔlɔlɔ la kɔlɔ.’—1 Koreto 14:20; Heberu 5:14.
Akambo Wele Ekɔ Ohomba Efula Onto Monga la Shɛnɔdi
4 Shɛnɔdi y’ɔlɔlɔ tokimanyiyaka dia sho ndjela ɛtɛkɛta ɛnɛ wa Yeso Kristo wata ɔnɛ: “Ntundu nyutayangi diulelu la ololo wa [Nzambi, NW], ku diango so tshe [dia l’emunyi] diayuyala dianyu.” (Mateu 6:33) Yeso akate nto ate: “Su diaye mbeli tala dia dimba diaye. Lam’eli su diaye [sɛnyu, NW], dimba diaye tshe diayulula too la usasi.” (Luka 11:34) Eelo, sso diekɔ tala lo yoho ya didjidji. Sso dia “sɛnyu” kɛdikɛdi sso dia pudipudi, diahatalana kânga yema ndo diɛna dimɛna. Naka tekɔ la sso dia ngasɔ, kete tayɛnya ɔnɛ tekɔ la shɛnɔdi ndo tayokoka kɛndakɛnda aha la takana lo nyuma.
5 L’ɔtɛ wa vɔ namaka sso diawɔ nshi tshɛ dia diɔ monga sɛnyu, amɔtshi wakadingitanya nsɛnɔ yawɔ ndo nsɛnɔ y’anto akina lo awui w’okanda wɔnganya anto. Koko, sho pombaka mbohɔka ɔnɛ etshumanelo k’Akristo kekɔ ‘ɛkɔhɔ la osukɔ w’akambo wa mɛtɛ.’ (1 Timote 3:15) Oko dikundji dia luudu, etshumanelo k’Akristo sukɛka wetshelo wa mɛtɛ waki Nzambi, koko aha awui w’okanda wasala onto. Tshumanelo di’Ɛmɛnyi wa Jehowa kotongama dia monga ahole wakeketsha awui w’okanda, diangɔ di’okanda, kana elimu wasala anto dia kondja falanga. Aha sho ndjâka l’awui aso w’okanda lo Mbalasa ka Diolelo. Shɛnɔdi tokimanyiyaka dia sho mɛna ɔnɛ Mbalasa ya Diolelo, Wekelo wa Dibuku wa l’Etshumanelo, nsanganya ya weke ndo ya totshitshɛ y’Ɛmɛnyi wa Jehowa, ekɔ ahole kana tena diasangana Akristo ko sawolaka akambo wa lo nyuma. Naka tambɔsa diokanelo diasaso l’anangɛso ndo l’akadiyɛso wa lo nyuma oko diaaso dia salaka piblisite kana keketshaka awui w’okanda, shi kete ɔsɔ ayonga djembetelo yɛnya ɔnɛ hatɔshi akambo wa lo nyuma la nɛmɔ? Hatokoke mbɔsa diokanelo diasaso l’anto akina l’atei w’etshumanelo dia sho fudia ekondjelo kaso ka falanga.
6 Amɔtshi mbɔsaka waaso wahomanaso l’akambo wa teokrasi oko tena dia vɔ sondjaka ekanga, dɛngalɛnga, diangɔ diele la tovitaminɛ efula, diangɔ dia wokelo wa luudu, prɔgramɛ kana mbolo y’ɔrdinatɛrɛ, sala elimu wa tomanɛka nsango lo ahole wa tale, olimu wa nɔmbɔlaka amɛngɔdi, ndo awui akina efula. Ko tete nsanganya ya l’etshumanelo bu tena dia sho salaka piblisite ya weho ɛmɔtshi w’elimu wasala anto dia kondja falanga kana sondjaka diangɔ dimɔtshi di’okanda. Dui diatama lanɛ, sho kokaka dimana fundo naka sho mbohɔ ɔnɛ Yeso ‘akatshanya wanɛ tshɛ wakasondjaka ɛkɔkɔ la ngɔmbɛ oma lo tɛmpɛlɔ, nde akatshola falanga y’amengudi wa falanga ndo akasokola mɛsa awɔ. Ko nde akatɛ wanɛ wakasondjaka tokudumba ate: Nyonya diangɔ nɛ oma lanɛ! Nyotshike mbetɛ luudu la Papa luudu la mundaka okanda!’—Joani 2:15, 16.
Sɔndjana Falanga Kana Ndjidja l’Okanda Ɔmɔtshi
7 Ekɔ ohomba sho monga la shɛnɔdi ndo la yewo lam’akanyiyaso dia mbisha onto falanga yaso dia nde toyikadimola ko ndjotokaloyayɔ la wahɔ. Onto ɔmɔtshi mbeyaka ndjokɔlɔmba sɔmbɔ dia falanga ko kosha alaka w’ɔnɛ: “Wɛ ayokondja falanga efula, ɔsɔ aha kashi kakotɛmi.” “Kɛdikɛdi, wɛ hatoshisha kânga pata. Falanga yayoyombisha yayokotɛ wahɔ efula mɛtɛ.” Paka wɛ menda ɔlɔlɔ naka onto okosha alaka wa ngasɔ. Onto la ngasɔ bu la yimba y’ɔlɔlɔ kana ekɔ kanga kashi, nɛ dia mbala efula, ɔsɔndjɛlɔ wa falanga la kanyi ya ndjokondja wahɔ kema dui diakokayɛ mbɛkɛ otema lɔkɔ dikambo wɛ heye diele la ntondo a mboka. Lo mɛtɛ, anto amɔtshi wele bu la nkum’otema k’ɔlɔlɔ ndjâka l’ɛtɛkɛta wa mpɛ oya le ase etshumanelo ko ndjowavaka. Dui sɔ tôholaka ‘amɔnyɔdi wa Nzambi’ wakayaɔtshiya la mayɛlɛ l’atei w’etshumanelo k’Akristo wa l’eleko ka ntondo ko ‘kadimola ɔlɔlɔ w’ɔtɛkɔya wa Nzambi dia vɔ mɛnya ɔnɛ awui w’otshatsha wasalawɔ bu kɔlɔ.’ Vɔ waki oko ave w’ɛsɔngɔ la tshina di’ashi wakoka mbatshatsha wanɛ wafunda ongunda ndo mbadiaka. (Jude 4, 12) Kɛnɛ katshutshuya wevi ɛsɔ tshikitana mɛtɛ la kɛnɛ kakatshutshuyaka ɛtɔlɔki ɛsɔ wa l’eleko ka ntondo, koko ndo vɔ lawɔ mɔngaka ase etshumanelo.
8 Koyanga Akristo amɔtshi waki komonga l’eyango wa kɔlɔ wakasha Akristo akina tokanyi lo dikambo dia woho ɔmɔtshi w’okanda wakawɛnaka ɔnɛ kokaka kondjɛ onto falanga efula, ko ndo vɔ, ndo wanɛ wakɔtɔ lo lokolo lawɔ, wakatubiya falanga yawɔ tshɛ. Etombelo wakayala oma lo dikambo sɔ ele efula k’anto wakashisha waɛsɛ awɔ l’atei w’etshumanelo. Naka wɛ ambɔsɔndja onto falanga yayɛ wate kele ngɔnɛ esadi eto ko wɛ amboyɛna ɔnɛ tete kesa nyɛ yambowokesaka, kete onto lâmɛ lokundjisha wahɔ ele ɔnɛ akɔ ongo lokokeshi dia kova; esadi eto kete nde ambodingɔ ko wɛ hayowɛna nto. Ngande wakoka shɛnɔdi tokimanyiya di’aha dikambo dia ngasɔ ndjotokomɛ na?
9 Monga la shɛnɔdi kɛdikɛdi monga l’akoka wa shihodia kɛnɛ kahɛnama ɔlɔlɔ. Shɛnɔdi yekɔ ohomba dia sho mbɛdikola awui watotɛwɔ lo kɛnɛ kendana la woho ɔmɔtshi w’okanda kana lo dikambo dia sɔndja onto falanga ko nde ndjotokaloyɛyɔ la wahɔ. Akristo mbɔsanaka oko anto wa mɛtɛ, ndo amɔtshi mbeyaka ndjokana ɔnɛ anangɛwɔ kana akadiyɛwɔ wa lo nyuma hawototosala woho w’okanda wakoka totubiya falanga y’anyawɔ ambetawudi. Koko, dui di’ɔnɛ omundji w’okanda ekɔ Okristo kema eshikikelo k’ɔnɛ nde ekɔ ombewi wa mamba w’akambo w’okanda; ndo woho wende Okristo hɛnya ɔnɛ okanda ande wayolowana.
10 Akristo amɔtshi nyangaka sɔmbɔ le anyawɔ ambetawudi dia vɔ munda okanda ɔmɔtshi nɛ dia société ya lokumu yasɔndjana falanga hayetawɔ kânga yema dia mbasha falanga nɛ dia vɔ haweye kana wayotɔkɔ l’okanda awɔ kana kema. Amɔtshi ndjakesaka ɔnɛ naka wɛ mbidja falanga yayɛ lo bankɛ kana sɔndja onto dia nde ndjokokaloyayɔ la wahɔ, kete wɛ ayɔngɔna esadi eto aha la mɛna pâ, mbala mɔtshi ko wɛ ayokamba olimu yema tshitshɛ tsho kana hatokamba kânga yema. Amɔtshi kotɔmaka dia ntsha dikambo sɔ l’ɔtɛ wa lokumu lele lɔkɔ, ko falanga yakawombe dia ndjâkimanyiyaka lo lɔsɛnɔ lawɔ ndjêtaka olongo swa! Okristo ɔmɔtshi akadje falanga ya mamba lo bankɛ ate kele kandjoyiɔshi la wahɔ wa % 25 l’ɔkɔngɔ wa mingu hiende tsho. Société kakanga bankɛ kakandadje falanga kakayosapolaka le Lɛɛta ɔnɛ lambɔkɔ, ko ɔnangɛsɔ ɔsɔ akashisha falanga shɔ tshɛ! Ɛnyɛlɔ kekina, ɔlɔngɔ ɔmɔtshi wasala olimu wa sombaka bɛtshi dia nkɛtɛ dia mbika mvudu y’eyoyo akaye le ase etshumanelo ko akasɔmbɛ lokema la falanga. Nde akâlake dia mbakaloyayɔ la wahɔ wa mamba; koko nde akayɔkɔ l’okanda ande ko falanga shɔ tshɛ yakatshu otshɔtshɔ.
Naka Falanga y’Okanda Yambotubiyama
11 Ɔkwɛlɔ w’okanda mbelaka okiyanu wa mamba le Akristo, ndo amɔtshi wakayatambiya tshavu lo woho ɔmɔtshi w’okanda aha la kana yimba wakayoshisha lonyuma lawɔ. Lam’ele vɔ hawotetawɔka shɛnɔdi mbalɔmbɔla, vɔ ndjoyalaka la lɔkɔnyɔ la mamba l’otema ndo ndjotshikalaka la tokumbɛkumbɛ. Anto efula wambotala lo djonga ya lohehe l’okundji. Paulo akafunde ate: ‘Lohehe latodimɔmake kânga yema l’atei anyu, oko wasunganadiɔ le ekilami.’ (Efeso 5:3) Nde akatewola nto ate: “Wane wakomiya ndjala engonyi, wayoko lu uhimba la lu djunga ndu lu saki ya dinginya yatutshelaka antu kolo, yayuditsha antu lu elanyelu la eshishwelu. Ne dia [ngandji, NW] ka ukundji eko udiu a wehu tshe w’akambu wa kolo. Amotshi waka[ki]yangi, waketola uma lu mbuka ka mbetawo, wakayatshatsha la nyangu ya wulu efula.”—1 Timote 6:9, 10.
12 Naka Okristo aya la ngandji ka falanga, kete nde ayoyâsalɛ kɔlɔ ka mamba lo nyuma. Afarisɛ waki anangi wa falanga, ndo ngandji ka falanga ekɔ nto dionga dimɔtshi diele l’anto efula lo nshi y’ekomelo nyɛ. (Luka 16:14; 2 Timote 3:1, 2) Koko, yoho ya lɔsɛnɔ y’Okristo ‘hahombe monga la ngandji ka falanga.’ (Heberu 13:5) Eelo, Okristo kokaka kamba l’ɔnango l’awui w’okanda kana munda okanda ɔmɔtshi kâmɛ. Ko naka wambosala ɔsɔku, kete hawokoke mbidja awui w’etshumanelo l’atei w’akambo wasawolawɔ kana wôkanawɔ. Ndo paka mbohɔka ɔnɛ: Oyadi kânga l’asa onto l’ɔnango la lo nyuma, nyofundake diokanelo dianyu di’awui w’okanda lofunda. Lo dikambo sɔ, sawo dimɔtshi diele l’ɔtɛ a dui ɔnɛ: “Nyodifunde Lofunda!” diekɔ ohomba efula, diɔ diakatombe lo Réveillez-vous ! wa Yitshu 8, 1983, lo lɛkɛ 13 polo 15.
13 Tukedi 22:7 totɛka ɔnɛ: ‘Ɔsɔmbi ekɔ ose olimu waki ɔnɛ lasɔndjana.’ Esangɔ efula, ndjaetɛ woho ɔsɔ oko ose olimu w’ɔnanyɔ kana mbetɛ ɔnanyɔ oko ose olimu wakiyɛ kema dui dia kanga lomba. Naka onto ɔmɔtshi ambokɔlɔmba sɔmbɔ dia falanga dia nde munda okanda, ayoleka ɔlɔlɔ wɛ menda kana nde ekɔ l’akoka wa ndjɔngɛla falanga shɔ. Onde nde ekɔ onto lakotsha ɛtɛkɛta ande ndo lakokayɛ mbɛkɛ otema ayɛ le nde? Lo mɛtɛ, sho pombaka mbeya ɔnɛ naka tambɔsɔndja onto falanga kete sho kokaka ndjoyishisha tshɛ, nɛ dia anto efula nkɔka l’ekanda wandawɔ. Diokanelo dia lofunda to kema eshikikelo k’ɔnɛ nde hatɔkɔ l’okanda wandande. Ndo nto, kanga yewo hasɔndjana falanga efula lo yɛdikɔ yahandakoke mbetawɔ shisha.
14 Ekɔ ohomba sho monga la shɛnɔdi naka tambɔsɔndja onyaso Okristo falanga dia nde munda okanda ko nde ambotoyitubiya, aha la lokeso lɔmɔtshi monga. Naka ɔkwɛlɔ w’okanda ɔsɔ kema munga kaki onyaso ombetawudi lakasɔmbɛ falanga yaso, onde kokaka sho mbuta ɔnɛ nde akatotshundja? Kema, nɛ dia la lolango laso shamɛ mbakatetawɔ mbɔsɔndja falanga shɔ, ndo ondo takalɛkaka yema ya wahɔ oma lo falanga yakɔ, ndo ndoko lokeso losadimi. Lam’ele ndoko lokeso losadimi, sho bu ndoko l’ɔkɔkɔ wa ntshɔ le Lɛɛta ko tofunda ɔnɛ lakasɔmbɛ falanga yaso. Wahɔ akɔna mɛtɛ wayoyokondja lo ntɔla ɔnanyɔ lo tuminadi, nde onto akana la losembwe, naka nde ambokita tatala nɛ dia okanda wambondondaka la tokanyi t’ɛlɔlɔ wambɔkɔ na?—1 Koreto 6:1.
15 Tena dimɔtshi, amundji w’ekanda nkɔka ko nyangaka ekokelo lo sapola la ntondo ka Lɛɛta ɔnɛ lambɔkɔ. Lam’ele Akristo hawosungana minya yimba oma l’abasa wɔsawɔ, amɔtshi mbokaka dia nkum’etema yawɔ mbatshutshuyaka dia paka vɔ futa abasa wakawɔshi naka wanɛ wakâsɔndjawɔ wayetawɔ vɔ mbangɛlɛ, oyadi kânga l’ɔkɔngɔ wa Lɛɛta mbatshungola oma l’abasa amɔtshi. Ko kayotota naka ɔnɛ lakasɔmbɛ falanga ambototubiya falanga y’ɔnango l’okanda ande koko ekɔ lo sɛna lɔsɛnɔ lele oko la kanga ɔngɔnyi l’ɔkɔngɔ wa nde totɛ Lɛɛta ɔnɛ lambɔkɔ na? Kana, kayotota naka, l’ɔkɔngɔ wa nde tosapola le Lɛɛta ɔnɛ lambɔkɔ, onto akɔ lakasɔmbɛ falanga yaso amboyokondja falanga yakoka mbokimanyiya dia nde futa abasa wakandɔshi koko hadje yimba dia ngɛla falanga yakandasɔmbɛ le ɔnango na? L’etena kɛsɔ, hatokoke mbetawɔ di’onto ɔsɔ ekɔ la waonga walɔmbama dia nde kondja ɔkɛndɛ ɔmɔtshi l’atei w’etshumanelo.—1 Timote 3:3, 8; enda lo Tshoto y’Etangelo ya Lovula 15, 1994, lo lɛkɛ 30-31 (lo Falase).
Ko Naka Wambotova lo Mayɛlɛ?
16 Shɛnɔdi tokimanyiyaka dia sho mbeya ɔnɛ aha lɛkɛ tshɛ ladjɛ falanga mbayoyokondja wahɔ. Ko ayotosala naka wambotova lo mayɛlɛ na? Mbuva onto lo mayɛlɛ kɛdikɛdi “mbodimbiya l’okonda, mbokesa la mayɛlɛ tshɛ, kana mengesola dikambo dia mɛtɛ l’oyango wa mbotshutshuya dia nde kimɔ ɛngɔ kande kɛmɔtshi k’ohomba kana mbotshutshuya dia nde tshika dikambo dimɔtshi diende la lowandji lâdikɔ diadiɔ.” Yeso Kristo akalembetshiya kɛnɛ kakoka onto sala naka nde ambɛna ate onyami Okristo ambotshundja ko ambombiva. Lo ndjela Mateu 18:15-17, Yeso akate ate: “Naka unyaye ayukutshela kolo, kutshu, kutuwenya munga kandi, we la ndi atu. Naka ndi ayukukela, we ayekesanela la ndi. Keli naka ndi hakukela, kutshu la untu otoi kana ahendi. Okone aui tshe wayushikikala l’enyo w’emenyi ehendi kana esatu. Naka ndi hawaukela, ututeli ekelizia. Naka ndi hukela ndu ekelizia, ndi ayali uku usi wudja le ye, la uku ulungudi w’elambu.” Wɛɛla wakayota Yeso l’ɔkɔngɔ w’ɛtɛkɛta ɛsɔ mɛnyaka ɔnɛ nde akakanyiyaka ndo dikambo dia pɛkato yendana l’awui wa falanga, ndo pɛkato ka tshundja onto ko mbova l’atei ayɔ.—Mateu 18:23-35.
17 Lo mɛtɛ, l’awui w’okanda, ndoko lɛnɛ etawɔ Bible di’onto sala kɛnɛ kofundami lo Mateu 18:15-17 naka ndoko djembetelo kana vuyiwuyi mɔtshi yɛnya ɔnɛ onto ambokotshundja ko ambokova. Ko lâsɔ, ayotosala naka ɔnɛ layata ate Okristo mbende ambototshundja ko ambova diangɔ diaso mɛtɛ na? Shɛnɔdi yayotokokɛ di’aha sho sala kɛnɛ kakoka ndjolanya lokumu l’etshumanelo. Paulo akalake anyande Akristo dia vɔ mbetawɔ anto mbasalɛ kɔlɔ koyanga mbadimbiya kana mbava l’ɔtɛ w’onto ntɔla ɔnango lo tuminadi.—1 Koreto 6:7.
18 Anangɛso l’akadiyɛso w’eshika hawoludi la ‘lokeso ndo l’akambo w’osehe,’ oko kanga dɔka lakawelɛka Bara-Yeso. (Etsha 13:6-12) Ɔnkɔnɛ, sho pombaka mɛnya shɛnɔdi yaso lo sɛkɛ naka falanga yambotubiyama l’okanda wandaso kâmɛ l’anyaso ambetawudi. Naka tekɔ lo sangoya dia tofunda ɔnangɛso laka Lɛɛta, kete sho pombaka kanyiya etombelo wakoka dui sɔ monga lawɔ le so shamɛ, le onto akɔ kana anto akɔ wanda laso okanda kâmɛ, le etshumanelo, ndo le wanɛ wele l’andja w’etshumanelo. Ko naka shate paka nde futa, kete sho mbeyaka shisha wenya aso efula, wolo aso ndo diangɔ dikina. Dui sɔ mbeyaka ngɔnya paka atɛkɛtɛdi ato (avocats) la ambewi akina w’akambo wa tuminadi. Lonyangu ko, Akristo amɔtshi waketawɔ shisha waɛsɛ awɔ wa lo teokrasi nɛ dia wakayatambiya tshavu l’akambo asɔ. Satana mbokaka ɔlɔ wa mamba lam’ɛnande ɔnɛ tambotakɔ mboka lo yoho shɔ; koko hatolange mbɔngɛnyangɛnya, sho nangaka ngɛnyangɛnya otema wa Jehowa. (Tukedi 27:11) Lo wedi okina, naka sho mbetawɔ shisha, kete hatotonga la kandji l’asolo ndo nto, ndo sho, ndo dikumanyi dia l’etshumanelo, hatotoshisha wenya aso efula. Naka sho sala ngasɔ, kete mɛtɛ tayolama wɔladi wa l’etshumanelo ndo dui sɔ diayotokimanyiya dia sho tetemala nyangaka Diolelo ntondo.
Shɛnɔdi la Tɛdikɔ Tɔsaso
19 Mbɔsa tɛdikɔ lo akambo wa falanga kana w’okanda bu tɔkɛnyɔ. Koko shɛnɔdi ya lo nyuma kokaka tokimanyiya dia sho mbɛdikola akambo dimɛna dimɛna ko mbɔsa tɛdikɔ t’eshika. Ndo nto, naka sho ndjaɛkɛka le Jehowa lo dɔmbɛlɔ, kete tayokoka kondja “wɔladi a Nzambi.” (Filipi 4:6, 7, NW) Wɔladi a Nzambi kɛdikɛdi eongelo ka yɔɔyɔ ndo lotui ki lakondja onto oma lo diokanelo di’oshika diele lam’asande la Jehowa. Wɔladi ɔsɔ mɛtɛ kokaka tokimanyiya di’aha sho ndjɛkayɛka l’etena kahombaso mbɔsa tɛdikɔ ta wolo.
20 Nyɛsɔ tɔ̂shi tɛdikɔ ta wolo di’aha tshika ewanu w’akambo w’okanda fukutanya wɔladi aso kana wɔladi wele l’atei w’etshumanelo. Ekɔ ohomba sho mbohɔka ɔnɛ etshumanelo k’Akristo kakalɔngɔswama dia tokimanyiyaka lo nyuma, koko tɔ bu ɛsɛlɔ k’akambo w’okanda. Aha mbidja awui w’etshumanelo l’atei w’akambo w’okanda kânga lushi ɔtɔi. Pombaka sho monga la shɛnɔdi ndo la yewo lam’atatɛso munda okanda kana mbidja falanga lo lɛkɛ lɔmɔtshi dia yɔ mbota. Paka sho mbidjaka awui w’okanda lo dihole diɛdimi la wɔ, lo nyangaka wahɔ wa Diolelo ntondo. Naka tambɔkɔ l’okanda wandaso kâmɛ l’anangɛso kana l’akadiyɛso, kete toyatshutshuya dia sala kɛnɛ koleki ɔlɔlɔ le anto tshɛ.
21 L’ɔtɛ wa sho tamanya ndjâkiyanya lo akambo wa falanga ko minya yimba oma l’akambo w’ohomba, nyɛsɔ sho tshɛ tɛdiya etema aso otsha lo shɛnɔdi, tɔlɔmbake Nzambi dia nde tɔlɔmbɔla, ndo totetemalake mbidja awui wa Diolelo lo dihole dia ntondo. Lo ndjela dɔmbɛlɔ dia Paulo, ‘ngandji kaso kalole l’ewo k’oshika ndo la shɛnɔdi ya tshɛ dia sho monga l’akoka wa menda akambo woleki ohomba ndo aha takanya kânga onto ɔtɔi’ kana ndjâtakanya shamɛ. Etena kɛnɛ kodjashi Kristo Nkumekanga l’okudi ande wa l’olongo, nyɛsɔ tɛnya shɛnɔdi yaso ya lo nyuma lo akambo tshɛ wa lo lɔsɛnɔ. Ndo ‘tolodiame l’elowa wa losembwe, waya oma le Yeso Kristo, lo lotombo ndo lo lowando la Nzambi kaso,’ Nkumadiɔndjɔ Jehowa, Omboledi w’andja w’otondo.—Filipi 1:9-11.
[Study Questions]
1. Shɛnɔdi kokaka tokokɛ oma lo na?
2. Shɛnɔdi kɛdikɛdi na? Naa yoho ya shɛnɔdi yaleka Akristo kombola?
3. Ngande wakokaso kondja shɛnɔdi ya lo nyuma?
4. Monga la sso diele “sɛnyu” kɛdikɛdi na? Ngande wakoka sso dia ngasɔ tokimanyiya?
5. Lo akambo w’okanda, kakɔna kahombaso mbohɔka lo dikambo di’oyango wakatongama etshumanelo k’Akristo?
6. Bonde kahatahombe sala piblisite y’elimu wakamba anto dia kondja falanga kana sondja diangɔ di’okanda l’atei a nsanganya ya l’etshumanelo?
7. Bonde kele ekɔ ohomba monga la shɛnɔdi ndo la yewo naka wɛ ekɔ lo nanga sɔndjana falanga yayɛ dia vɔ toyikadimola ko ndjokokaloyɛyɔ la wahɔ?
8. Awui akɔna watomba oma lo weho ɛmɔtshi w’okanda wɛna anto ɔnɛ kokaka mbakondjɛ wahɔ?
9. Lande na kele ekɔ ohomba monga la shɛnɔdi dia wɛ mbɛdikola awui watawɔ lo dikambo dia woho ɔmɔtshi w’okanda kana di’ɔsɔndjanelo wa falanga?
10. Bonde katoyangaka Akristo amɔtshi sɔmbɔ le anyawɔ ambetawudi dia vɔ munda okanda, ndo kakɔna kakoka ndjotomba l’okanda wa ngasɔ?
11. Dako diakɔna diakatosha Paulo lo dikambo dia lohehe ndo dia ngandji ka falanga?
12. Naka Akristo wekɔ lo munda okanda kâmɛ, kakɔna kahombawɔ mbohɔka nshi tshɛ?
13. Ngande wakokayɛ mbɔtɔnganyiya divɛsa dia Tukedi 22:7 la akambo w’okanda?
14. Bonde kahombaso mɛnya shɛnɔdi yaso lo sɛkɛ naka takasɔndja onyaso Okristo falanga dia nde munda la yɔ okanda ko nde ambɔkɔ na?
15. Akambo akɔna wahombaso menda naka onto ambotɛ Lɛɛta ɔnɛ lambɔkɔ l’okanda wamomosalaka?
16. Kakɔna kakokaso sala naka tambɛna ɔnɛ wambototshundja lo awui w’okanda ko wambotova?
17, 18. Ngande wakoka shɛnɔdi tokokɛ naka ɔnɛ layata ate Okristo mbende ambototshundja ko ambotova na?
19. Ngande wakoka shɛnɔdi ya lo nyuma la dɔmbɛlɔ tokimanyiya l’etena kahombaso mbɔsa tɛdikɔ ta wolo?
20. Tɛdikɔ takɔna tahombaso mbɔsa lo kɛnɛ kendana l’akambo w’okanda ndo l’etshumanelo?
21. Ngande wakokaso kamba la shɛnɔdi ndo ndjela kɛnɛ katawɔ lo Filipi 1:9-11?
[Caption]
[Questions]
[Caption on page 16]
[Caption on page 16]
Shɛnɔdi yayotokokɛ dia sho ndjela dako dia Yeso diatotɛ dia tetemala nyanga Diolelo ntondo
[Caption on page 18]
[Caption on page 18]
Nshi tshɛ, nyofundake diokanelo di’akambo w’okanda lofunda
[Caption on page 19]
[Review on page 19]
Ngande Wayoyokadimola?
◻ Shɛnɔdi kɛdikɛdi na?
◻ Bonde kele ekɔ ohomba efula sho monga la shɛnɔdi lo akambo w’okanda watosalaka Akristo lam’asawɔ?
◻ Ngande wakoka shɛnɔdi tokimanyiya naka tambɛna ɔnɛ onyaso ombetawudi ambototshundja ko ambova diangɔ diaso?
◻ Naa ohomba wa shɛnɔdi lo tɛdikɔ tɔsaso?