Sheke Yahakoke Akristo Momba!
“Dimi lakatela antu diui diami lu seke. . . . Dimi kumvuta nduku dikambu lu usheshe.”—JOANI 18:20.
LO EKADIMWELO ka Bible kelɛwɔ Les Saintes Écritures — Traduction du monde nouveau, my·steʹri·on, tshɛkɛta ya lo Grɛkɛ, kadimɔma mbala 25 ɔnɛ “sheke y’ekila” ndo mbala 3 ɔnɛ “ehekesa dikambo.” Sheke yelɛwɔ ɔnɛ ekila pombaka monga sheke y’ohomba efula mɛtɛ! Onto tshɛ lambokondja diɛsɛ dia mbeya sheke ya ngasɔ pombaka mɛna ɔnɛ wambowosha nɛmɔ dia woke, nɛ dia nde ambɔsama oko onto lasungana mbeya sheke yaki Nzambi Kaheme lâdiko di’andja w’otondo.
2 Diksiɔnɛrɛ diaki yɔnɛ Vine diɔmbɔla ɛtɛkɛta wa lo Bible (Expository Dictionary of Old and New Testament Words) shikikɛka ɔnɛ suke la tena tshɛ, “sheke y’ekila” mbaleka sungana la ntondo k’okadimwelo w’ɔnɛ “ehekesa dikambo.” Lo dikambo dia tshɛkɛta my·steʹri·on, diksiɔnɛrɛ diakɔ mbutaka ɔnɛ: “L’atei wa [Afundelo w’Akristo wa lo Grɛkɛ], tshɛkɛta shɔ hɛnya paka ehekesa dikambo lo mɛtɛ mɛtɛ koko yɔ mɛnyaka dikambo diahakoke onto mana fundo koko diɔ kokaka mbeyama naka Nzambi ambodishola, lo yoho yakandalɔngɔsɔla ndo l’etena kakandashikikɛ, paka le wanɛ wambɔmbɔ timba la Nyuma Kande. Ehekesa dikambo, lo mɛtɛ mɛtɛ, kɛdikɛdi ewo kɛmɔtshi koshami; lo Bible, tshɛkɛta shɔ nembetshiyaka dui dia mɛtɛ diamboshɔma. Diɔ diakɔ diele tshɛkɛta shɔ tanemaka mbala efula kâmɛ la tɔtɛkɛta tele oko ‘mbewoya,’ ‘sɛnɛkɔla,’ ‘mbishola,’ ‘sambisha,’ kana ‘mana fundo.’ ”
3 Olembetshiyelo ɔsɔ mɛnyaka otshikitanu wa mamba waki l’asa etshumanelo k’oyoyo k’Akristo vɔ l’elui w’ɛtɛmwɛlɔ waki la sɛlɛmɔnyi ya lo woshɛshɛ; elui akɔ w’ɛtɛmwɛlɔ wakafulanɛ hakoke l’eleko ka ntondo. Wanɛ wakawasalɛka sɛlɛmɔnyi dia mbaɔtshiya l’atei w’ɛtɛmwɛlɔ wa lo woshɛshɛ wakakelekamaka mbala efula lo dɔkɔlɔkɔ di’aha mbuta ndoko dui, dia vɔ nama wetshelo wa l’ɔtɛmwɛlɔ; koko Akristo komonga l’ɛse k’ɔlɛmbɛ wa ngasɔ ndoko lushi ɔtɔi. Paulo mɛtɛ akatɛkɛtaka dia ‘lomba la Nzambi lele lo sheke y’ekila,’ ndo nde akalielɛ ɔnɛ ‘lomba loshami,’ mbut’ate lomba lakashɛma le ‘emboledi wa lo dikongɛ di’akambo nɛ.’ Lɔ kombishɛma le Akristo, nɛ dia lɔ lakashɔma le wɔ lo tshimbo ya nyuma ka Nzambi dia vɔ liewoya lo sɛkɛ.—1 Koreto 2:7-12; ɛdika la Tukedi 1:20.
“Sheke y’Ekila” Yambeyama
4 “Sheke y’ekila” yaki Jehowa ndekaka mendana la Yeso Kristo. Paulo akafunde ate: “[Jehowa] akatewuya [“sheke y’ekila ya,” NW] lulangu landi lakandasonola, dia ntukutshiya dikukelu di’enonyi, ne dia nsanganya diango tshe le Kristu, ndu dia l’ulungu, ndu diango dia la kete.” (Efeso 1:9, 10) Paulo akayolekaka mpotola otondo akɔ wa “sheke y’ekila” lam’akandayɛnyaka ohomba wa ‘ewo k’oshika ka sheke y’ekila yaki Nzambi, sheke yakɔ ko Kristo.’—Kolosai 2:2.
5 Koko aha lâsɔ ato mbokome dikambo, nɛ dia “sheke y’ekila” ekɔ sheke yele l’awui efula. Aha paka mbeya Yeso ɔnɛ nde mbele Lɔtɔngɔ la daka kana Mɛsiya ko pe; paka mbeya ndo ɔkɛndɛ wele lande l’atei wa kɛnɛ kakasangoya Nzambi. Lo sheke yakɔ mbele lowandji la l’olongo, kana Diolelo dia Mɛsiya waki Nzambi, nɛ dia Yeso akalembetshiya dui sɔ hwe lam’akandatɛ ambeki ande ate: “Nyu, wakanyosha losha la shihodia toseke t’ekila ta diolelo dia l’elongo, koko vɔ kolisha anto asɔ.”—Mateo 13:11, NW.
6 Etena k’otale kakahombe mbeta tatɛ oma lo mbala ka ntondo kakatɛkɛta Nzambi dia sangwelo diande dia mbika etshina ka Diolelo dia Mɛsiya polo ndo lo ekotshamelo ka “sheke y’ekila.” (Ɛnyɛlɔ 10:7, NW; Etatelu 3:15) Wɛdikelo wa Enyelo 10:7 la 11:15 mɛnyaka ɔnɛ l’etena kakahombe kotshama sheke shɔ mbakahombe ndo Diolelo dia Nzambi tatɛ mbolɛ. Ɛnɔnyi suke la 4000 wakete tatɛ oma lam’akalake Nzambi mbala ka ntondo l’Ɛdɛna dia mbela Diolelo polo ndo lam’akayɛnamaka Nkumekanga Kakasɔnama l’ɔnɔnyi wa 29 lo tena diaso nɛ. Ɛnɔnyi ekina 1885 wakayeta la ntondo ka Diolelo diakɔ sɔ ndjomɛ mbolɛ l’ɔnɔnyi wa 1914. Lo yoho shɔ mbakayashɔmaka “sheke y’ekila” yema yema l’edja k’ɛnɔnyi suke la 6000. (Enda lo lɛkɛ 30.) Lâsɔ mɛtɛ, Paulo komindja lam’akandatɛkɛta dia ‘woshwelo wa sheke y’ekila yakombama lo woshamu l’edja k’efula koko kakianɛ, yɔ yambotomba sɛkɛ ndo yambeyama.’—Romo 16:25-27; Efeso 3:4-11.
7 Otshikitanyi l’anto wele lɔsɛnɔ lawɔ haloviya, Jehowa hɛnaka pondjo ɔnɛ nshi yayanga nshila, ɔnkɔnɛ nde hasholaka toseke tande naka etena kakandashikikɛ katakoke. Dui sɔ pombaka toshimba di’aha sho nɛmba otema lam’ɛnaso ɔnɛ wembola ɛmɔtshi w’akambo wa lo Bible hawokadimwama nshi nyɛ lo yoho yatɔngɛnyangɛnya. Ndjâkitshakitsha kele l’ɔhɔmbɔ wa kɔlamelo ndo wa kɛsɔ, ɔnɛ lakawasha ɔkɛndɛ wa mbishaka nkumbo k’Akristo mbo ya ndɛ lo tena diasungana, mboshimbaka di’aha nde ndjâla la lotamanya ko monga oko onto lalanga mbeta la ntondo ka mutuka ndo tondjaka tokanyi tande lo akambo wahatɛnama hwe. Ɔhɔmbɔ ɔsɔ salaka tshɛ di’aha monga oko onto lasokoya akina dia mbetawɔ paka kɛnɛ katande keto. Nde bu la lotamanya koko mbohɔka Tukedi 4:18 nshi tshɛ ndo mbetawɔka ɔnɛ nde hakoke kadimola oseka dimbola tshɛ nshi nyɛ. Koko ekɔ ɔlɔ wa mamba dia mbeya ɔnɛ Jehowa, l’etena kakandashikikɛ ndamɛ ndo lo yoho yalangande, ayotetemala mbishola toseke tendana l’akambo wakandasangoya! Aha sho nɛmba otema la ntondo ka kɛnɛ kakalɔngɔsɔla Jehowa, ko nyanga dia mbeta la ntondo k’Ombishodi wa toseke wate kana akanga a dinginya. Ande ekeketshelo lo mbeya ɔnɛ ehomɔ kakamba la Jehowa nshi nyɛ hasale ngasɔ lee! Ehomɔ kakɔ kekɔ la kɔlamelo ndo la kɛsɔ.—Mateu 24:45; 1 Koreto 4:6.
Sheke Yakashɔma Pombaka Mbewoyama!
8 Jehowa kombisholɛ Akristo “sheke [yande] y’ekila” ate kele wayiombe. Nde akawasholɛyɔ dia vɔ ndjieyanya le anto akina, lo ndjela didjango diakadjɛ Yeso ambeki ande tshɛ—koko aha paka ewandji w’ɛtɛmwɛlɔ eto: “[“Osase,” NW] wa la kete mbenyu. Haweyi mbishe usumba weli ladiku dia dikuna. Antu hawutohetshaka tala, ku dikitsha la tshina dia kidunda, keli watudikitshaka ladiku dia ekitshelu ka tala. Usasi adio atohetelaka antu tshe weli lu luudu. Okone usasi anyu ahete la ntundu ka antu, dia vo kaweyi etsha anyu w’ololo, kawutumbuli Shenyu le l’ulungu.”—Mateu 5:14-16; 28:19, 20.
9 Yeso komonga ndoko la tokanyi t’ɔtɔmbɔkwɛlɔ dia sala tshunda dimɔtshi di’ambeki dia lo woshamu dia salaka akambo wa lo woshɛshɛ. Lo dibuku diande dimɔtshi (Early Christianity and Society), Robert Grant akafunde kɛnɛ kendana l’awui wakatama oma le omamedi wa l’eleko ka hende welɛwɔ Justin Martyr dia nde mamɛ Akristo wa ntondo; ɛtɛkɛta akɔ v’ɛnɛ: “Otondoyala Akristo wekɔ atɔmbɔki, tshike vɔ wototshikala lo ahole wa woshamu dia vɔ kotsha eyango awɔ.” Ko ngande wakakoke Akristo “tshikala lo ahole wa woshamu” ko monga ndo oko “usumba weli ladiku dia dikuna” l’etena kakɔ kâmɛ na? Vɔ kompemba kânga yema dia mbishɛ osase awɔ la tshina dia kisaka! Diɔ diakɔ diele lɛɛta komonga ndoko l’ɔkɔkɔ wa mboka olimu awɔ wɔma. Ofundji akɔ akayota nto ate: “Vɔ wekɔ angɛnyi woleki dimɛna wakimanyiya nkumekanga dia mbidja wɔladi ndo mbidja awui tshɛ l’ɔnɔngɔ.”
10 Yeso konangaka ambeki ande ndjashɛshɛka ɔnɛ kele aha anto mbaeya ɔnɛ vɔ wekɔ ase olui wakelɛka anto ɔnɛ olui w’ambatɔmi. (Etsha 24:14; 28:22) Naka hatɔhɛtshisha osase aso nshi nyɛ kete tayonyangiya Kristo nde la She, ɔnɛ lele Ombishodi wa toseke, ndo dui sɔ hadiotototshika l’ɔngɛnɔngɛnɔ.
11 Jehowa ‘halange kânga onto akɔna nanyema koko nde nangaka anto tshɛ kadimola otema.’ (2 Petero 3:9; Ezekiyele 18:23; 33:11; Etsha 17:30) Di’anto wele la ndjatshumoya kondja edimanyielo ka pɛkato yawɔ, vɔ pombaka monga la mbetawɔ lo olambo w’etshungwelo wakakimɔ Yeso Kristo, ɔnɛ lakayakimɔ ndamɛ oko tshungo lo dikambo di’anto tshɛ—aha paka di’amɔtshi ato—dia kele ‘onto tshɛ lele la mbetawɔ le nde atolanyemake koko akondja lɔsɛnɔ la pondjo.’ (Joani 3:16) Ekɔ ohomba efula kimanyiya anto dia vɔ ntsha kɛnɛ kahombama dia vɔ ndjosungana mbɔsama oko ɛkɔkɔ, koko aha oko mbudi, lo elombwelo kayaye.—Mateu 25:31-46.
12 Ɔtɛmwɛlɔ wa mɛtɛ w’Akristo hahombe mombama lo woshɛshɛ; vɔ pombaka ndjaeyanya le anto lo woho tshɛ wakoka. Yeso ndamɛ akatotshikɛ ɛnyɛlɔ k’ɔlɔlɔ. Lam’akawombola ɔlɔmbɛdi wa lâdiko dikambo di’ambeki ande la dia wetshelo ande, nde akate ate: “Dimi lakatela antu diui diami lu seke. Dimi laketshaka antu nshi tshe lu temwelo ndu lu etemwelo ka wuki lene atusanganaka asi Juda tshe. Dimi kumvuta nduku dikambu lu usheshe.” (Joani 18:19, 20) Lo menda ɛnyɛlɔ kɛsɔ, onde onto loka Nzambi wɔma ekɔ l’ɔkɔkɔ ɔmɔtshi wa nde momba losango lakate Nzambi ɔnɛ lɔ pombaka mbewoyama lo sɛkɛ? Akɔna akoka monga la dihonga dia mbishɛ ‘sapi k’ewo’ katɔla otsha lo lɔsɛnɔ la pondjo na? Naka onto sala ngasɔ, kete nde ayoyala oko ase ɛtɛmwɛlɔ wa dungi pende waki l’eleko ka ntondo.—Luka 11:52; Joani 17:3.
13 Nyɛsɔ tosale tshɛ di’aha kânga onto ɔtɔi mbuta lushi lɔmɔtshi ɔnɛ sho Ɛmɛnyi wa Jehowa takalame losango la Diolelo dia Nzambi lo woshamu! Oyadi vɔ mbetawɔ losango lakɔ kana bu, anto la dia mbeya ɔnɛ lɔ lakasambishama. (Ɛdika la Ezekiyele 2:5; 33:33.) Lâsɔ nyɛsɔ tɔsake diaaso tshɛ diakondjaso dia mbewoya anto tshɛ losango la mɛtɛ, oyadi lende ayotohomana la wɔ.
Wambodja Satana Tɔɔdi lo Manga
14 Lo ahole efula, wekɔ lo taleke tɛkɛta efula lo dikambo di’Ɛmɛnyi wa Jehowa lo tita nsango. Oko wakawasalɛka Akristo wa ntondo, esangɔ efula vɔ tɛkɛtaka awui wa kɔlɔ lo lokombo lawɔ ndo vɔ mbaɔsaka oko olui w’ɔtɛmwɛlɔ wa kɔlɔ ndo oko tshunda dimɔtshi dia lo woshɛshɛ. (Etsha 28:22) Onde woho wasambishaso lo sɛkɛ mbeyaka ndjoleka tela ɔhɛnyɔhɛnyɔ oma le anto? Lo mɛtɛ, naka sho ndjatambiya l’atei w’ewanu wa tshanana kete tayonga oko akanga a dinginya ndo oko wanɛ wahayele dako dia Yeso. (Tukedi 26:17; Mateu 10:16) Koko, olimu ɔnɛ w’ohomba efula wa sambisha Diolelo ndo kimanyiya anto dia vɔ ndowanya nsɛnɔ yawɔ hawohombe mbishɛma. Olimu akɔ tombolaka Jehowa, mbodiyaka lâdiko, ndo kotolaka yambalo y’anto oya le nde ndo oya lo Diolelo diande diambotatɛka mbolɛ. Lo yɛdikɔ mɔtshi, anto efula wekɔ lo mbetawɔ akambo wa mɛtɛ wa lo Bible nshi nyɛ l’Erɔpɛ wa l’Ehotwelo la lo wedja ɛmɔtshi wa l’Afrika nɛ dia akambo wa mɛtɛ wôkoka sambishama lɛkɔ nshi nyɛ lo sɛkɛ lo yɛdikɔ yoleki ɔnkɔnɛ wakidiɔ lo nshi ya ntondo.
15 Ekɔ mɛtɛ di’anto mɛnaka woho ɔnɛ wasambisha Ɛmɛnyi wa Jehowa lo sɛkɛ, vɔ mɛnaka nto ndo paradiso kawɔ ka lo nyuma la ɔngɔnyi wele lawɔ—oyadi lo lofulo l’anto kana lo mbo ya l’emunyi. Akambo asɔ mɛtɛ kotolaka akanga w’etema w’ɛlɔlɔ oya l’atei aso koko mbeyaka nomialomia ndo lohetsho lele l’atunyi aso. (2 Koreto 2:14-17) Edja l’edja, ɔngɔnyi ɔsɔ mɛtɛ mbeyaka ndjotshutshuya alembe waki Satana dia vɔ mbɔtwɛ ekambi wa Nzambi ko mbalɔsha.
16 Onde ɔsɔ ekɔ dui diahomba tokiyanya? Lo ndjela pɔlɔfɛsi ka Jehowa kofundami lo Ezekiyele tshapita 38, dui sɔ hadiohombe tokiyanya. Pɔlɔfɛsi kakɔ mbutaka ɔnɛ Ngɔngɔ ka la Mangɔngɔ, mbut’ate Satana Diabolo tatɛ oma lam’akawawokadja oya lanɛ la nkɛtɛ l’ɔkɔngɔ wa Diolelo tatɛ mbolɛ l’ɔnɔnyi wa 1914, ayɔtwɛ ekambi wa Nzambi dia nde mbalɔsha. (Enyelo 12:7-9) Jehowa ekɔ lo mbutɛ Ngɔngɔ ate: “We ayuta wati: Dimi layumbela lu ngelu yaha la kumbu ya peli. Dimi layutsho le wane weli la mumuya, wudjashi la lutui tshitshi, le wane tshe waha adjaselu awo la peli, ndu waha la tukengeti kuyanga kuki. Dimi layutsho dia ntosa diango dia dimbu, ndu dia ntosa diango dia lohotola. Dimi layukadimula lunya lami dia ntolosha ahuli wakalanyema wambulala antu kakiane, ndu dia ntolosha antu wakasanganyema uma lu wedja, wakakundja dungalunga la diango, wudjashi k’atei a kete.” (Ezekiyele 38:11, 12) Koko, divɛsa 4 mɛnyaka ɔnɛ ekambi wa Nzambi hawohombe mboka ta sɔ wɔma nɛ dia Jehowa ndamɛ mbayodihɔhɔla. Ko lande na kayetawɔ Nzambi—ndo kayondɔhɔhɔla—ta dia ngasɔ diayowɔlɔsha ekambi ande na? Lo divɛsa 23, Jehowa totɛka ɔnɛ: “Dimi layenya wedja efula wuki ami la ekila kami. Dimi layuyaenya le wo, ku vo [“wayohomba mbeya ɔnɛ dimi kele Jehowa,” NW].”
17 Ɔnkɔnɛ, lo dihole dia vɔ mboka ta sɔ diayoya oma le Ngɔngɔ wɔma, ekambi wa Jehowa kongɛka etena kɛsɔ l’ɔngɛnɔngɛnɔ dia vɔ mɛna ekotshamelo kekina ka pɔlɔfɛsi ya lo Bible. Ekɔ ɔlɔ wa mamba mɛtɛ dia mbeya ɔnɛ lam’angɔnyande ndo watshɔkɔlande ɔlɔngɔswamelo ande wɛnama, Jehowa ekɔ lo mbidja tɔɔdi lo manga ya Satana ndo ekɔ lo mbokotola nde l’alembe ande dia nde ndjowadja otshumba!—Ezekiyele 38:4.
Nshi Nyɛ Mbamboleka Tshɛ!
18 Lo nshi yaso nyɛ, Ɛmɛnyi wa Jehowa mbewoyaka anto tokanyi tawɔ totumbi oma lo Bible lo sɛkɛ, oyadi kânga mbahatetawɔka anto efula dikambo sɔ. Aya ɛnɔnyi akumi efula wewɔ lo mbewola anto oma lo wâle w’ɔnwɛlɔ wa mfɔka, wa didjoyadjoya, wa dipanda lo diodielo di’ana, w’etombelo wa kɔlɔ w’oma lo diendenda dioludi l’awui a dieyanelo ndo wa ngala, ndo wâle wakoka tomba oma lo wodjelo wa dikila. Vɔ mɛnyaka nto ɔnɛ olakanyelo w’ɔnɛ diangɔ tshɛ diakahilɔ lohilɔ koko kotongama ekɔ olakanyelo wayalɔsha vamɛ. Ɛlɔ kɛnɛ, efula k’anto wekɔ lo mbuta ɔnɛ: “Ɛmɛnyi wa Jehowa wekɔ lo mbuta mɛtɛ.” Otondoyala hatewoya anto tokanyi taso lo sɛkɛ, aha la mbashɛ ndoko dui, tshike vɔ totowokoka mbuta ngasɔ. Ndo nto, aha wɛ mbohɛ ɔnɛ lam’atawɔ ngasɔ, vɔ wekɔ lo ndjasukana dia ndjokoma lo mbuta ɔnɛ: “Satana, wɛ ekɔ kanga kashi; lo menda tshɛ, Jehowa mbele kanga mɛtɛ.” Ɔsɔ mɛtɛ ekɔ dui diatotshutshuya efula dia sho tetemala la ndjela ɛnyɛlɔ ka Yeso, lo mbewoyaka anto dui dia mɛtɛ lo sɛkɛ!—Tukedi 27:11.
19 Aha ɛlɔ la lui mbamboshihodia ekambi wa Jehowa ɔkɛndɛ wele lawɔ lo dikambo sɔ. Lo losanganya la woke l’ohomba efula lakawɔtɔ l’ɔnɔnyi wa 1922, Joseph Rutherford, ɔnɛ laki owandji wa la Société Watch Tower l’etena kɛsɔ, akasalanganya etema w’ampokami ande lam’akandawatɛ ate: “Nyoyale anto wayalɔmbɔ, nyendake ɔlɔlɔ, nyokalangane, ndo nyoyale la dihonga. Nyoyale ɛmɛnyi wa Nkumadiɔndjɔ wa kɔlamelo ndo wa mɛtɛ. Nyɛsɔ otsha la ntondo lo ta nɛ polo ndo lam’ayoyala hiolehole tshɛ ya Babilɔna ka Woke tɔngɔ to. Nyewoya losango lo ahole tshɛ. Andja ɔnɛ pombaka mbeya ɔnɛ Jehowa mbele Nzambi ndo ɔnɛ Yeso Kristo mbele Nkumekanga ka wa nkumi ya dikanga ndo Nkumi ka wa nkumi. Ɔnɛ ekɔ lushi loleki nshi kina tshɛ woke. He nyende! Nkumekanga ambahema lo lowandji! Nyu mbele wanɛ watakokola lokumu lande. Lâsɔ nyewoya, nyewoya, nyewoya awui wa Nkumekanga la diolelo diande.”
20 Ɛtɛkɛta ɛsɔ mɛtɛ waki ohomba efula l’ɔnɔnyi wa 1922, koko vɔ wamboleka monga ohomba efula ɛlɔ kɛnɛ, l’ɔkɔngɔ w’ɛnɔnyi 75, lo nshi nyɛ yamboleka sukana etena kayotomba Kristo sɛkɛ oko Shushi la Ɔsɔmbɔyishi. Losango lɔsɔ la Diolelo dia Jehowa diambotatɛka mbolɛ ndo paradiso ka lo nyuma kele l’ekambi wa Nzambi lekɔ “sheke y’ekila” ya woke efula yahakoke mombama. Oko wakadite Yeso ndamɛ lo yoho yokɛma hwe, ambeki ande pombaka, l’ekimanyielo ka nyuma k’ekila, monga ɛmɛnyi ‘polo ndo lo tokoma ta nkɛtɛ’ dia tewoyaka dihole dia woke diele lande l’atei wa sangwelo dia Jehowa dia pondjo. (Etsha 1:8; Efeso 3:8-12) Lo mɛtɛ, oko weso ekambi wa Jehowa, Nzambi kashola toseke, sho hatokoke momba sheke shɔ!
[Study Questions]
1, 2. Tshɛkɛta ya lo Grɛkɛ yelɛwɔ my·steʹri·on yekɔ la kitshimudi yakɔna lo Afundelo?
3. Ngande wakatshikitana etshumanelo k’Akristo wa l’eleko ka ntondo l’elui ɛmɔtshi w’ɛtɛmwɛlɔ waki la sɛlɛmɔnyi ya lo woshɛshɛ?
4. “Sheke y’ekila” ndekaka mendana l’onto akɔna, ndo woho akɔna?
5. Kakɔna kele lo “sheke y’ekila”?
6. (a) Bonde kele bu kɔlɔ sho mbuta ɔnɛ “sheke y’ekila” ‘yakombama l’edja k’efula’? (b) Ngande wakayashɔmaka sheke shɔ yema yema?
7. Bonde kakokaso mbɛkɛ etema aso tshɛ le ɔhɔmbɔ wa kɔlamelo ndo wa kɛsɔ?
8. Ngande weyaso ɔnɛ “sheke y’ekila” pombaka mbeyama le anto akina?
9. Kakɔna kɛnya ɔnɛ Yeso komonga ɔtɔmbɔki wakayangaka mbela otshikitanu lo wodja, oko wata anto amɔtshi?
10. Bonde kahahombe Akristo ndjashɛshɛ ɔnɛ kele aha anto mbaeya?
11, 12. (a) Lande na kalanga Jehowa ɔtɛmwɛlɔ w’Akristo mbewoyama le anto akina? (b) Ngande wakatotshikɛ Yeso ɛnyɛlɔ k’ɔlɔlɔ?
13. Lande na kahombaso sambishaka lo diaaso tshɛ diakondjaso?
14. Lande na kahatahombe mengenga dia mbewoya ɔtɛmwɛlɔ aso lo sɛkɛ?
15, 16. (a) Kakɔna kasalema oma lo woho ɔnɛ wasambishaso lo sɛkɛ ndo oma l’ɔngɔnyi aso wa lo nyuma? Onde dui sɔ kokaka tokiyanya? (b) Lande na kadja Jehowa tɔɔdi lo manga ya Satana?
17. Ngande wahombaso mbɔsa ta diayanga ndja oma le Ngɔngɔ?
18. (a) Kakɔna kambomɛ efula k’anto mɛna nshi nyɛ, ndo lande na? (b) Ngande wakeketshamaso lo menda etombelo w’ɛlɔlɔ w’oma l’olimu w’esambishelo ka Diolelo?
19, 20. (a) Tɛdikɔ takɔna takɔshi ekambi wa Jehowa lo 1922? Onde ɛtɛkɛta ɛsɔ wekɔ ohomba polo ndo nshi nyɛ? (b) Ngande wahombaso mbɔsaka “sheke y’ekila” yaki Jehowa?
[Caption]
[Questions]
[Caption on page 29]
[Caption on page 29]
Lo ndjela ɛnyɛlɔ ka Yeso lele Ɔnɔmbɔdi awɔ, Ɛmɛnyi wa Jehowa mbewoyaka Diolelo dia Jehowa lo sɛkɛ
[Caption on page 31]
[Review on page 31]
Ngande Wayoyokadimola?
◻ “Sheke y’ekila” kɛdikɛdi na?
◻ Ngande weyaso ɔnɛ sheke shɔ pombaka mbewoyama lo sɛkɛ?
◻ Kakɔna kayɔhɔhɔla ta diayɔlɔsha Ngɔngɔ ekambi wa Jehowa, ndo ngande wahombaso mbɔsa ta sɔ?
◻ Tɛdikɔ takɔna tahomba ɔm’ɔmɔ a l’atei aso mbɔsa?
[Caption on page 30]
[Box on page 30]
“SHEKE Y’EKILA” YAMBOSHƆMA YEMA YEMA
◻ L’ɔkɔngɔ wa 4026 N.T.D.: Nzambi ambolaka dia tondja Lɔtɔngɔ lɔmɔtshi lahomba ndjolanya Satana.—Etatelu 3:15
◻ 1943 N.T.D.: Nzambi ambodja sheke nde l’Abarahama, ndo ambôlaka ɔnɛ Lɔtɔngɔ ayotomba lo tshimbo yande.—Etatelu 12:1-7
◻ 1918 N.T.D.: Eotwelo k’Isaka oko okitɔ wa sheke.—Etatelu 17:19; 21:1-5
◻ Otsha lo 1761 N.T.D.: Jehowa amboshikikɛ ɔnɛ Lɔtɔngɔ lakɔ ayoya lo tshimbo ya Jakɔbɔ, ɔn’aki Isaka.—Etatelu 28:10-15
◻ 1711 N.T.D.: Jakɔbɔ ambɛnya ɔnɛ Lɔtɔngɔ lakɔ ayoya lo tshimbo y’ɔnande Juda.—Etatelu 49:10
◻ 1070-1038 N.T.D.: Wambotɛ Nkumekanga Davidi ɔnɛ Lɔtɔngɔ lakɔ ayonga kanula yande ndo ayolɛ pondjo pondjo oko Nkumekanga.—2 Samuele 7:13-16; Osambu 89:35, 36
◻ 29-33 T.D.: Yeso ambeyama ɔnɛ nde kele Lɔtɔngɔ lakɔ, mbut’ate Mɛsiya, shushi ya lo nshi yayaye, ndo Nkumekanga Kakasɔnama.—Joani 1:17; 4:25, 26; Etsha 10:42, 43; 2 Koreto 1:20; 1 Timote 3:16
◻ Yeso ambɛnya ɔnɛ nde ayonga l’anto amɔtshi wayolɛ kâmɛ la nde oko ewandji la toshushi; nde ambɛnya nto ɔnɛ Diolelo dia l’olongo diayonga l’ambolami lanɛ la nkɛtɛ, ndo ɔnɛ ambeki ande tshɛ pombaka monga esambisha wa Diolelo.—Mateu 5:3-5; 6:10; 28:19, 20; Luka 10:1-9; 12:32; 22:29, 30; Joani 10:16; 14:2, 3
◻ Yeso ambɛnya ɔnɛ Diolelo diayotatɛ mbolɛ l’etena kɛmɔtshi kakashikikɛma, lo ndjela akambo wasalema l’andja ɔnɛ.—Mateu 24:3-22; Luka 21:24
◻ 36 T.D.: Petero ambeya ɔnɛ ndo wanɛ waha Ase Juda wayonga ekitɔ kâmɛ la wɔ lo Diolelo.—Etsha 10:30-48
◻ 55 T.D.: Paulo ambolembetshiya ɔnɛ lo nshi ya wôngelo wa Kristo, ekitɔ wa Diolelo wayolɔ la demba diahahɔndɛ dia vɔ tɔsɛnaka pondjo pondjo.—1 Koreto 15:51-54
◻ 96 T.D.: Yeso, ɔnɛ lamboshilaka tatɛ la mbolɛ lâdiko di’ambeki ande w’akitami, ambɛnya ɔnɛ lofulo lawɔ la komelo layonga anto 144000.—Efeso 5:32; Kolosai 1:13-20; Enyelo 1:1; 14:1-3
◻ 1879 T.D.: La Tour de Sion ambɛnya ɔnɛ ɔnɔnyi wa 1914 ekɔ ɔnɔnyi w’ohomba efula lo ekotshamelo ka “sheke y’ekila” yaki Nzambi
◻ 1925 T.D.: Tshoto y’Etangelo (l’Angɛlɛ) ambolembetshiya ɔnɛ Diolelo diakotɔ lo 1914; “sheke y’ekila” yendana la Diolelo diakɔ pombaka mbewoyama lo sɛkɛ.—Enyelo 12:1-5, 10, 17