Wembola W’oma Le Ambadi
“Tshoto y’Etangelo” ya Tshaka Fudu 1, 1995, yakaleke tɛkɛta dikambo dia ‘lɔlɔnga lɔnɛ,’ tshɛkɛta yofundami lo Mateu 24:34. Onde lâsɔ yema y’okandokando yekɔ dia mbeya kana mɛtɛ Diolelo diaki Nzambi diakatatɛ mbolɛ l’olongo l’ɔnɔnyi wa 1914?
Awui wakatama lo Tshoto y’Etangelo shɔ kombela ndoko otshikitanu lo wetshelo aso w’ohomba lo kɛnɛ kendana l’ɔnɔnyi wa 1914. Yeso akakɔndɔla djembetelo yahomba mɛnya ɔnɛ nde aya la lowandji lo Diolelo. Tekɔ la tolembetelo efula tɛnya ɔnɛ djembetelo shɔ yakandasha yakakotshama tatɛ oma lo 1914. Awui w’ata, ndjala ya kasha, elando, adidimu wa nkɛtɛ ndo tolembetelo tokina shikikɛka ɔnɛ Yeso akamɛ kamba olimu oko Nkumekanga ka Diolelo diaki Nzambi tatɛ oma l’ɔnɔnyi wa 1914. Dui sɔ mɛnyaka ɔnɛ tatɛ oma l’etena kɛsɔ, takashile mbɔtɔ lo nshi y’ekomelo ka dikongɛ di’akambo nɛ.
Ko kakɔna mɛtɛ kakalange Tshoto y’Etangelo tomanya fundo na? Yɔ yakatokimanyiya dia sho shihodia kɛnɛ kakalange Yeso mbuta lam’akandatɛkɛta tshɛkɛta ‘lɔlɔnga’ lo Mateu 24:34. Divɛsa sɔ mbutaka ɔnɛ: “Mete kanyutelami nti: Antu wa lolonga lone hawushila, tshikima akambu aso tshe wambushidiyama.” Yeso akandalange mbuta lo tshɛkɛta “lolonga,” oyadi lo nshi yande kana lo nshi yaso nyɛ na?
Avɛsa efula shikikɛka ɔnɛ Yeso kɔmbɔsa tshɛkɛta “lolonga” dia nde tɛkɛta dikambo dia djui mɔtshi y’anto ya tshitshɛ kana yotshikitanyi l’anto akina, dia mbuta paka dikambo di’ewandji w’Ase Juda ato kana di’ambeki ande wa kɔlamelo ato. Nde akakambe la tshɛkɛta “lolonga” dia nde manya elui w’Ase Juda waki kombêtawɔ. Diɛsɛ ko, anto amɔtshi wakakoke sala kɛnɛ kakatɛtɛ ɔpɔstɔlɔ Petero lushi la Pɛntɛkɔsta, mbut’ate kadimola etema ko ‘nshimbamɛ oma lo lɔlɔnga lɔnɛ la wɛngɛngɛ.’—Etsha 2:40.
Lo ɛtɛkɛta ɛsɔ, mbokɛmaka hwe dia Petero mɛtɛ koshikikɛ anto wele l’ɛnɔnyi ɛmɔtshi eto kana edja kɛmɔtshi k’etena; ndo nde kokakatanya ‘lɔlɔnga’ lakandatɛkɛta lɔsɔ la ɔnɔnyi ɔmɔtshi. Nde kombuta ɔnɛ anto pombaka nshimbamɛ oma lo lɔlɔnga lakotɔ l’ɔnɔnyi akɔ wâmɛ wakotɔ Yeso kana oma lo lɔlɔnga lakotɔ l’ɔnɔnyi wa 29 T.D. Petero akatɛkɛta dikambo di’Ase Juda wa l’etena kɛsɔ wanɛ waki komonga la mbetawɔ—amɔtshi ondo waki akɛnda ndo akina waki epalanga—, vɔ wakoke wetshelo wa Yeso, wakɛnyi kana wakoke ahindo ande, koko vɔ kombetawɔ ɔnɛ nde mbele Mɛsiya.
Ngasɔ mɛtɛ mbakɔsaka Petero tshɛkɛta ‘lɔlɔnga’ yakate Yeso lam’akinde kâmɛ la nde ndo l’apɔstɔlɔ akina asato lo Dikona di’Ɔlivɛ. Lo ndjela ɛtɛkɛta wa Yeso wa pɔlɔfɛsi, Ase Juda wa l’etena kɛsɔ—mbut’ate wanɛ wakasɛnaka lo nshi ya Yeso—waki suke la mɛna kana mboka akambo w’ata, adidimu wa nkɛtɛ, ndjala ya kasha, ndo tolembetelo tokina takɛnyaka ɔnɛ ekomelo ka dikongɛ di’Ase Juda kaya suke. Lɔlɔnga lɔsɔ mɛtɛ kombeta la ntondo k’ekomelo ndja l’ɔnɔnyi wa 70 T.D.—Mateu 24:3-14, 34.
Koko, sho tshɛ pombaka nsuya ɔnɛ sho kɔmbɔsaka ɛtɛkɛta wa Yeso ɛsɔ lo yoho shɔ. Anto wele bu kokele sumɔsumɔka dia shikikɛ etena kayoya ekomelo. Ohɔ dia kânga apɔstɔlɔ waki la tokanyi ta ngasɔ; wakambola Yeso vate: ‘Nkumadiɔndjɔ, onde etena kɛnɛ kayoyokaloyɛ Isariyɛlɛ diolelo?’—Etsha 1:6.
Oko wakiwɔ la tokanyi ta woho ɔsɔ totumbi oma l’otema wosembwe, ekambi wa Nzambi wa lo nshi yaso nyɛ wakayatshutshuya dia mbɔsa kɛnɛ kakate Yeso lo dikambo dia ‘lɔlɔnga’ ko tondja awui amɔtshi wokɛma hwe wakoka mbakimanyiya dia vɔ kamba akumi tatɛ oma lo 1914 ko mbeya etena shikaa kayoya ekomelo. Ɛnyɛlɔ, wakakanyiyaka ɔnɛ lɔlɔnga ɔtɔi kokaka sɛna ɛnɔnyi 70 kana 80, ndo anto wa lo lɔlɔnga lakɔ pombaka monga epalanga w’anto wakoka shihodia kitshimudi ya ta dia ntondo di’andja w’otondo ndo akambo akina; lâsɔ sho kokaka kamba akumi ko mbeya ɔnɛ ambotshikala oko ɛnɔnyi engana eto kete ekomelo kamboya.
Tokanyi ta ngasɔ, koyanga mbakitɔ komonga l’eyango wa kɔlɔ, onde tɔ mbɔtɔnɛka la dako diakayosha Yeso l’ɔkɔngɔ diko? Yeso akate ate: ‘Ndoko onto leya lushi lakɔ kana wonya akɔ, oyadi andjelo wa l’olongo, kana Ɔna, paka Papa ndamɛ. . . . Lâsɔ tanyolalake djɔ, dikambo hanyeye lushi layoya Nkumɛnyu.’—Mateu 24:36-42.
Ɔnkɔnɛ, awui wɔtɛkɛtami nshi nyɛ lo Tshoto y’Etangelo lo dikambo dia ‘lɔlɔnga lɔnɛ’ kotshikitanya eokelo kaso ka kɛnɛ kakasalema l’ɔnɔnyi wa 1914. Awui asɔ wakatokimanyiya dia sho ndeka shihodia woho wakɔshi Yeso tshɛkɛta ‘lɔlɔnga,’ ndo dia sho mɛna ɔnɛ tshɛkɛta yande shɔ hatosha ndoko ɔkɔkɔ wa sho kamba akumi wa tena—tatɛ mbadia oma lo 1914—ko mbeya ɛnɔnyi engana wambotshikala dia ekomelo ndja.