Onde Anto Waakakɔnɔ Lo Dihindo Polo ndo Nshi Nyɛ?

“ETAWƆ Yeso kele ɔnkɔnɔ!” Oma l’ɛtɛkɛta wa ngasɔ, Alexandre, ose Ɛkɛlɛsiya w’Evanjiliyɔ (Église évangélique), akayetawɔka ate naka dimi nɔ ekanga dia hemɔ kami shila, kete layɛnya dia dimi bu la mbetawɔ. Nde akayetawɔka ɔnɛ mbetawɔ kande keto kayowosha ɛkɔnwɛlɔ kênde l’ohomba. Benedita, ondjashi wa laka Mupɛ, akangɛnangɛna woho w’anyanya lam’akandoke ɔnɛ ahindo wa kɔnɔlaka hemɔ y’anto wekɔ lo salema lo tɛmpɛlɔ k’Aparecida do Norte, l’osomba wa São Paulo, lo wodja wa Brésil. Benedita akakambe l’ɛtɛkɛta ɛmɔtshi wa maji wakôlakanya enondo wa nyango la omoto ko nde akalɔmbɛ Nyangɛso ka l’Aparecida, Atowanyi w’Osanto, ndo “asanto” akina dia nde kondja wolo wa kɔnɔlaka ase hemɔ.

Mɛnamaka dia kânga ndo nshi nyɛ yayanga komɛ eleko kɛnɛ ka 20, anto efula wekɔ la mbetawɔ lo ɛkɔnwɛlɔ ka lo dihindo​—⁠ko lande na ketawɔwɔ na? Ondo anto amɔtshi pindaka asolo lam’ɛnawɔ ɔnɛ adɔkɔtɛlɛ hawokoke shidiya hemɔ, kandji, ndo asui w’elangemi awɔ, djekoleko w’anawɔ. Wanɛ washinda l’elando wahakɔnɔ esadi mbeyaka ndjɛ̂na ɔnɛ lam’ele ekanga w’asungu wamboleka oshinga wolo, ndoko kɔlɔ nyanga ɛkɔnwɛlɔ k’oma lo mbetawɔ. Lo televiziɔ, anto amɔtshi mɛnaka ɛtɛmwɛlɔ wa weho la weho la anto efula wata dia vɔ kɔnɔlaka SIDA, efukutanu wa lo yimba, kansɛrɛ, dadi, hemɔ ka dikila mbudɛka, ndo elando ekina efula. Oyadi vɔ wekɔ la mbetawɔ lo awui wa ngasɔ watawɔ kana bu, vɔ mbeyaka ndjotshɔ le anto asɔ l’ɔkɔngɔ dia toyanga ekimanyielo, naka wambohemba weho ekina tshɛ ko ndoko di’ɔlɔ diotumbi. Koko akina, wanɛ wafɔnya ɔnɛ hemɔ yawɔ ndja oma le ɛdiɛngɛ, mbeyaka ndjokana ɔnɛ ekanga w’asungu bu la wolo wa mbakimanyiya.

Lo wedi okina, ekɔ anto amɔtshi wahokana kânga yema la kanyi y’ɔnɛ anto kokaka nkɔnɔ oma le “asanto” wakavu kana oma le ankɔnɔdi wasɛna, ndo vɔ mbutaka ɔnɛ ɔsɔ ekɔ kanyi ya kɔlɔ efula. Lo ndjela jurunalɛ yelɛwɔ Jornal da Tarde, yɔnɛ Dráusio Varella, ombewi w’akambo wa malanga, mɛnaka ɔnɛ “mbetawɔ k’akanga a dinginya ndo ka wanɛ wele la pâ k’efula mbɔsaka nsɔnyi” lo kanyi shɔ y’ɔnɛ ɛkɔnwɛlɔ ka lo dihindo kayosalema. Nde akayota nto ate: “L’ɔtɛ w’akanga a lokeso asɔ, anto efula ndjâhɛka lokanyi lo ahindo ko ndjotshikaka ndo ekanga w’asungu wa wolo efula.” Ansiklopedi ɔmɔtshi (The New Encyclopædia Britannica) nembetshiyaka ɔnɛ: “Lo nshi ya ntondo, ɛkɔnwɛlɔ ka lo dihindo kakasalemaka lo ahole w’ekila ndo lo sɛlɛmɔnyi ya l’ɛtɛmwɛlɔ; ambewi w’akambo w’enganga sumɔsumɔka dia mbuta ɔnɛ ɛkɔnwɛlɔ ka ngasɔ tshɛ kakasalemaka oma lo shambo ya sɛngiyaka dionga la ditshelo di’onto l’ɔkɔngɔ wa mbohahola yimba, ko ndjâka awui tshɛ wahombama wambokoka kete onto ndjɔkɔnɔ.” Koko, anto efula mbetawɔka polo ndo nshi nyɛ ɔnɛ hemɔ yawɔ mɛtɛ yakakɔnɔ lo dihindo. Le wɔ, vɔ mɛnaka ɔnɛ ɛkɔnwɛlɔ kakasalema mɛtɛ!

Ambewi wa Bible mbeyaka ɔnɛ Yeso Kristo akakɔnɔlaka ase hemɔ lo tena efula; nde akasalaka ahindo asɔ oma lo ‘wolo wa Nzambi.’ (Luka 9:​42, 43) Diɔ diakɔ diakokawɔ ndjambola ɔnɛ: ‘Onde wolo wa Nzambi wekɔ lo tetemala ntsha olimu ndo wekɔ lo kɔnɔla anto lo dihindo polo ndo ɛlɔ kɛnɛ?’ Naka eelo, ko lande na kele anto pembaka dia kɔnɔla hemɔ y’anto akina koko kitaka tatala na? Onde nɛ dia ɔkɔnyi bu la mbetawɔ efula kana nɛ dia nde hakimwe weshasha efula? Onde ekɔ ɔlɔlɔ Okristo nyanga ɛkɔnwɛlɔ ka lo dihindo l’etena kênde la hemɔ kɛmɔtshi ka kandji kana kahakɔnɔ? Onde weho w’ahindo wakasalaka Yeso dia kɔnɔla hemɔ, aha la mpekɔ kânga hemɔ ɔtɔi, wokosalema nto ondo? Wɛ kokaka kondja ekadimwelo wa wembola ɛsɔ w’ohomba efula lo sawo diayela.