Tɔsɛnɛ La “Yimba Y’ɔlɔlɔ” Nɛ Dia Ekomelo Kaya Suke
“Ekomelo k’akambo tshɛ kambosukana. Lâsɔ nyoyale la yimba y’ɔlɔlɔ.”—1 PETERO 4:7, NW.
ƐTƐKƐTA engo waki ɔpɔstɔlɔ Petero pombaka monga la shɛngiya ya wolo lo lɔsɛnɔ l’Akristo. Koko, Petero kombutɛ ambadi wa mukanda ande dia vɔ sokola ɛkɛndɛ awɔ wa lushi la lushi kana minya yimba oma l’ekiyanu wa lɔsɛnɔ; nde kombakeketsha dia vɔ mpahana la wɔma efula l’ɔtɛ w’ɔnɛ elanyelo kambosukana. Koko, nde akâkɔkɔmiya ate: “Nyoyale la yimba y’ɔlɔlɔ.” Monga la “yimba y’ɔlɔlɔ” kɛdikɛdi monga l’akoka wa mbɔsaka tɛdikɔ t’eshika, monga kanga tshundju, monga la shɛnɔdi, monga kanga yimba lo ɛtɛkɛta ndo lo ditshelo. Kɛdikɛdi, sho pombaka tshika Ɔtɛkɛta wa Nzambi dia vɔ mbahemɛ tokanyi taso la ditshelo diaso. (Romo 12:2) Lam’ele tekɔ lo sɛna “l’atei wa lɔlɔnga la kɔlɔ ndo la wɛngɛngɛ,” ekɔ ohomba sho monga la yimba y’ɔlɔlɔ dia sho mbewɔ ekakatanu wa lo lɔsɛnɔ.—Filipi 2:15, NW.
2 “Yimba y’ɔlɔlɔ” tokimanyiyaka nto dia sho ndjaɔsaka lo yoho yakoka ndo ya mɛtɛ mɛtɛ. (Tito 2:12; Romo 12:3) Dikambo sɔ diekɔ ohomba lo ndjela ɛtɛkɛta wofundami lo 2 Petero 3:9 ɔnɛ: ‘Jehowa bu ɔkɔkɛ dia kotsha daka diande, oko wafɔnya anto amɔtshi koko nde ekɔ la lotutsha oya le nyu dikambo nde halange kânga onto ɔmɔtshi nanyema, koko nde nangaka anto tshɛ ndjatshumoya oma lo kɔlɔ.’ Lembetɛ dia Jehowa ekɔ la lotutsha, aha paka otsha le wanɛ wele bu ambetawudi ato, koko ndo otsha “le nyu”—nyu ase etshumanelo k’Akristo. Lande na na? Nɛ dia ‘nde halange kânga onto ɔmɔtshi nanyema.’ Ondo amɔtshi waakahombe tshikitanya awui amɔtshi ndo sembola akambo amɔtshi lo lɔsɛnɔ lawɔ dia vɔ ndjosungana kondja losha la lɔsɛnɔ la pondjo. Lâsɔ nyɛsɔ tênde akambo amɔtshi wele ondo sho pombaka mbasembola lo lɔsɛnɔ laso.
“Yimba y’Ɔlɔlɔ” Lam’asaso l’Anto Akina
3 Luudu l’ase nkumbo pombaka monga oko ekombɔ ka wɔladi. Koko le anto amɔtshi, lɔ mongaka ‘luudu loludi l’ewanu.’ (Tukedi 17:1) Ko nkumbo kayɛ ngande? Onde ‘nkɛlɛ, ehangohango la ntɛngɔ’ bu lo luudu layɛ? (Efeso 4:31) Ko anayɛ ngande? Onde vɔ mɛnaka ɔnɛ vɔ nangemaka ndo mbɔsamaka la nɛmɔ? (Ɛdika la Luka 3:22.) Onde wɛ mbɔsaka wenya ɛmɔtshi dia mbalakanyaka ndo mbahokolaka? Onde wɛ ‘mbangolaka lo losembwe’ koko aha l’odudu ndo la nkɛlɛ? (2 Timote 3:16) Lam’ele ana wekɔ “ushasha uma le [Jehowa],” nde ndjashaka l’otema ɔtɔi lo akambo wasalɛwɔ ana.—Osambu 127:3.
4 Kayotota lo dikambo di’omɛso kana wadiɛso na? “Dieli la waumi mbuka wadiewo ngandji uku wukawo alimba awo. Untu luka wadendi ngandji, ambuyauka ndame. Nduku untu lahetsha dimba diandi, keli ndi atudileshaka, atudilamaka, uku Kristu la ekelizia.” (Efeso 5:28, 29) Pami katondjanɛ ɛtɛkɛta wa lɔlɛngɔ, kayaetɛ oko nkum’ehangɔhangɔ ndo kahakane yimba ɔlɔlɔ mbidjaka wɔladi wa nkumbo kande lo wâle ndo fukutanyaka diokanelo diasande la Nzambi. (1 Petero 3:7) Kayotota lo dikambo dia amato wotshukami na? Ndo vɔ lawɔ pombaka ‘ndjakitshakitshaka la tshina dia waomɛwɔ oko le Nkumadiɔndjɔ.’ (Efeso 5:22) Naka wadi monaka nshi tshɛ dia ngɛnyangɛnya Nzambi, kete nde ayokoka minyaka asho oma lo dikɔmɔ di’omɛnde ko ndjâkitshakitshaka la tshina diande aha la mboka yɛnyi. Lo tena dimɔtshi, wadi mbeyaka mɛna ɔnɛ: pombaka dimi mbuta kanyi yele la mi. Lo dikambo dia omoto la kɔmi, Tukedi 31:26 mbutaka ɔnɛ: “Ndi atufulaka unyo andi l’aui wa yimba. Wetshelu wa memakana watuyalaka lu lulimi landi.” Naka nde mongaka ɔlɔlɔ otsha le omɛnde ndo mbɔlɛmiyaka, kete nde ayolama wɔladi wa lam’asande la Nzambi ndo ayokimanyiya nkumbo k’otondo dia tɔ monga l’ɔngɛnɔngɛnɔ.—Tukedi 14:1.
5 Ɔlɔngɔlɔngɔ, osekaseka, dionga diakɔna diele layɛ la ntondo k’ambutshi ayɛ na? Onde wɛ totondjaka ɛtɛkɛta wa lɔsɔkɔ ndo wa lɔsɛndji wetawɔma mbala efula le ase andja ɔnɛ? Onde wɛ kitanyiyaka ɔlɛmbɛ wa Bible wata ɔnɛ: “Ana, nyukitanyia ambutshi anyu le Khumadiondjo, osoku mbeli ololo. Olemia sho la nyo (oso keli olembe a ntundu weli la daka loko), dia we mpumo lukulu l’olo, la dia we ndjala la lulumbi la kete”?—Efeso 6:1-3.
6 Sho mɛnyaka nto ɔnɛ tekɔ la “yimba y’ɔlɔlɔ” ‘lam’ayangaso wɔladi ndo lam’atatawese wɔladi akɔ’ lam’asaso l’asekaso atɛmɔdi. (1 Petero 3:11) Ewanu la ekakatanu ɛmɔtshi tombaka mbala la mbala. (Jakoba 3:2) Ko naka tambetawɔ lohetsho fulanɛ lam’asaso, kete wɔladi wa l’etshumanelo k’otondo kokaka ndjofukutana. (Ngalatiya 5:15) Ɔnkɔnɛ, nyokandolake ekakatanu lam’asanyu esadi esadi; nyoyangake woho wa shidiya ekakatanu akɔ lo wɔladi.—Mateu 5:23-25; Efeso 4:26; Kolosai 3:13, 14.
“Yimba y’Ɔlɔlɔ” la Ɛkɛndɛ wa lo Nkumbo
7 Ɔpɔstɔlɔ Paulo akalake Akristo dia vɔ ‘sɛnaka la yimba y’ɔlɔlɔ.’ (Tito 2:12) Dikambo dia diambo ko, lo avɛsa wosukanyi la divɛsa diele la dako sɔ, Paulo ekɔ lo keketsha amato dia vɔ “nanga waumewo, la an’awo; ndu dia ndjala la [“yimba y’ɔlɔlɔ,” NW], la tukanyi ta pudipudi, ndu dia ntsha ulimu la wakawo.” (Tito 2:4, 5) Paulo akafunde awui asɔ l’ɔnɔnyi wa 61 kana wa 64 naka aha l’ɛnɔnyi wa l’asa ɛnɔnyi ɛsɔ ehende, ɛnɔnyi ɛmɔtshi eto la ntondo k’ekomelo ka dikongɛ di’akambo di’Ase Juda. Koko, akambo watosalaka anto lushi la lushi, ɛnyɛlɔ oko elimu wa lo luudu, wakikɔ ohomba. Ɔnkɔnɛ, oyadi omi kana wadi pombaka mongaka nshi tshɛ la kanyi y’ɔlɔlɔ ndo yasungana lo dikambo di’ɛkɛndɛ awɔ wa lo luudu, di’‘aha anto tɛkɛta kɔlɔ lo kɛnɛ kendana l’ɔtɛkɛta wa Nzambi.’ Papa kɛmɔtshi ka nkumbo akalɔmbɛ ɔngɛndangɛnda wakaye le nde dia nde mbokimwɛ nɛ dia nde akoke nsɔnyi lo menda woho ɔnɛ waki luudu lande. Nde akawotɛ ate luudu lekɔ kɔlɔ “nɛ dia lambokambaka olimu w’ombatshi mboka.” Ekɔ ɔlɔlɔ sho mbetawɔ ndjâhombia awui amɔtshi ko ndjasha l’olimu wa Diolelo, koko sho pombaka menda ɔlɔlɔ di’aha mbidja nsɛnɔ ya nkumbo yaso lo wâle.
8 Bible kɔkɔmiyaka ambutshi w’apami dia vɔ mbidja nkumbo yawɔ lo dihole dia ntondo, tɔ mbutaka ɔnɛ naka onto hakotsha ehomba wa nkumbo kande kete ‘nde ambotona mbetawɔ, ndo aya kɔlɔ ndeka ndo onto lele bu la mbetawɔ.’ (1 Timote 5:8) Yɛdikɔ y’ekondjelo tshikitana l’andja w’otondo, ndo nto, ekɔ ɔlɔlɔ kombola dia monga la mbo ya l’emunyi lo yɛdikɔ yokoki, aha emete emete. Ofundji wa Tukedi 30:8 akalɔmbɛ Nzambi ate: “Tumbeteki usi wula kana kanga ongonyi.” Koyanga mbediɔ ɔsɔku, ambutshi hawohombe minya yimba oma l’ehomba wa l’emunyi wele l’anawɔ. Ɛnyɛlɔ: onde ekɔ ɔlɔlɔ wɛ tshika nkumbo kayɛ aha la mbasha diangɔ diele ohomba lo lɔsɛnɔ ko wɛ ntshɔ dia tosala elimu wa teokrasi? Kema dikambo sɔ kokaka pindja asolo w’anayɛ? Lo wedi okina, Tukedi 24:27 mbutaka ɔnɛ: “Olongosole ulimu aye wa l’andja, utshi ulimu w’ekambo kaye. Ku l’okongo diku, kuyuhiki luudu laye.” Eelo mɛtɛ, bu kɔlɔ ndjâkiyanya dia kondja mbo ya l’emunyi, koko ekɔ ohomba wɛ ‘mbika luudu layɛ’—lo nyuma ndo lo mbaɛnyaka ngandji.
9 Onde wɛ ambombaka diangɔ dimɔtshi diakoka ndjokimanyiya ase nkumbo kayɛ naka wɛ amboyovɔ nyɔi k’osondjo? Tukedi 13:22 mbutaka ɔnɛ: “Untu ololo atutshikelaka ekana andi ukito.” Lâdiko dia mbatshikɛ okitɔ wa ewo ka Jehowa ndo diokanelo lam’asawɔ la nde, ambutshi pombaka mbidja yimba dia kotshɛ anawɔ ehomba wa l’emunyi. Lo wedja efula, ewandji wa nkumbo wele la lomba salaka tshɛ dia momba tshenyi mɔtshi ya dikuta ndo funda mukanda w’okitɔ laka lɛɛta kana yema ya falanga lo tshunda dimɔtshi dia vɔ ndjokimanyiyaka ase nkumbo kande l’ɔkɔngɔ wa nyɔi kande. Sho mbeyaka ɔnɛ ekambi wa Nzambi hawohandwe oma lo “tena la akambo wa shashimoya.” (Undaki 9:11) Falanga ‘kokɛka’ onto, ndo naka nyu talɔngɔsɔdi akambo dimɛna dimɛna la ntondo kete nyayokoka mbewɔ ekakatanu. (Undaki 7:12) Lo wedja wele Lɛɛta hafutɛ anto falanga ya lopitadi ndo y’ekanga, amɔtshi mbeyaka mɛna ɔlɔlɔ dia momba tshenyi mɔtshi ya dikuta dia ndjâsakɛka lo hemɔ kana mbisha dɔkɔtɛlɛ falanga yakɔ ɔnɛ kele naka lamboyoka hemɔ ko nde ndjosakɛ lo falanga yakamawosha.a
10 Afundelo mbutaka nto ɔnɛ: ‘Aha ana mbahomba tshumanyɛka ambutshi diangɔ, koko ambutshi mbahomba tshumanyɛka anawɔ diangɔ.’ (2 Koreto 12:14) L’andja ɔnɛ, ambutshi efula mombɛka anawɔ falanga dia vɔ ndjowadja kalasa kana dia vɔ ndjotshukana ɔnɛ kele aha vɔ ndjɛ̂na pâ l’etatelo ka lɔsɛnɔ lawɔ l’opalanga. Onde wɛ ambokanyiyaka dia mombɛ ɔnayɛ diangɔ dia lo nyuma diayoyôkimanyiya lo nshi yayaye? Ohɔsa dia ɔnayɛ l’opalanga ekɔ lo kamba olimu w’ombatshi mboka. Kânga mbele ambatshi mboka hawohombe nɔmbaka kana nongamɛka di’anto akina mbakimanyiyaka la falanga, ambutshi wa ngandji mbeyaka mbɔsa tɛdikɔ dia ‘kahanaka la nde lo ndjela ehomba ande’ dia vɔ mbokimanyiya woho wa nde tetemala l’olimu w’ombatshi mboka.—Romo 12:13; 1 Samuele 2:18, 19; Filipi 4:14-18.
11 Monga la kanyi ya mɛtɛ mɛtɛ lo dikambo dia falanga hɛnya ɔnɛ wɛ bu la mbetawɔ ɔnɛ dikongɛ dia kɔlɔ diaki Satana diayanga komɛ. Ɔsɔ ekɔ dui dia ‘lomba’ ndo dia tshundju. (Tukedi 2:7; 3:21) Lushi lɔmɔtshi, Yeso akate ɔnɛ ‘ana wa dikongɛ di’akambo nɛ ndeka ana w’osase kɛsɔ’ lo yoho yanandawɔ falanga. (Luka 16:8) Diɔ diakɔ mɛtɛ diɛna amɔtshi ohomba ndjâlɔngɔsɔla lo woho wanandawɔ ekundji awɔ dia vɔ mbeya woho wa kotshaka ehomba wa nkumbo yawɔ dimɛna dimɛna.
“Yimba y’Ɔlɔlɔ” lo Woho Wɔsaso Kalasa
12 ‘Awui wa l’andja ɔnɛ wekɔ lo tatshikitana,’ ndo etshikitanu wa weke wekɔ lo salema l’akambo w’ekundji lowango lowango ndo anto wekɔ lo tahame esadi esadi l’akambo wa tshulatshula. (1 Koreto 7:31) Koko, Yeso akalakanya ambeki ande dia vɔ ndjaekiyaka l’akambo w’eyoyo. Lam’akandâtome mbala ka ntondo dia vɔ tasambishaka, nde akawatɛ ate: “Tanyudjaki paunyi, fesa, kuyanga ohotela lu atapa wa lu eya anyu. Tanyukimelaki tapa lu lokendo lanyu, kuyanga ekutu ehendi, kuyanga sabata, kuyanga danga, ne dia ukambi kukuki dia nkundja mbu yandi ya nde.” (Mateu 10:9, 10) Koko, mbala kekina l’ɔkɔngɔ diko, Yeso akayowatɛ ate: “One leli la tapa, adiose, ose ndu diutu.” (Luka 22:36) Kakɔna kakatshikitana na? Awui wa lo lɔsɛnɔ mbakatshikitana. Ase ɛtɛmwɛlɔ wakayoyala la lohetsho l’efula otsha le wɔ ndo vamɛ wakahombe tatɛ nyanga mbo ya vɔ ndjâsɛnya.
13 Popo ndo ɛlɔ kɛnɛ, ondo ambutshi pombaka mbidja yimba lo akambo wa nshi nyɛ wendana l’ekondjelo. Ɛnyɛlɔ: onde wɛ ekɔ lo ndjâlɔngɔsɔla woho ɔmɔtshi di’anayɛ mbɔtɔ kalasa k’ɔlɔlɔ? Oyango wa ntondo wa kalasa pombaka monga dia kimanyiya ɔlɔngɔlɔngɔ kana osekaseka woho wa nde kambɛ Jehowa dimɛna dimɛna. Kalasa koleki ohomba ele kalasa ka lo nyuma. (Isaya 54:13) Ambutshi ndjâkiyanyaka nto di’anawɔ monga l’akoka wa vamɛ kondjaka falanga ya ndjâsɛnya. Ɔnkɔnɛ, shaka anayɛ alako, kimanyiyakawɔ dia vɔ sɔna elakanyelo wa dimɛna ndo sawolaka la wɔ dia nyu menda kana ekɔ dimɛna vɔ mbɔtɔ kalasa ya lâdiko kana bu. Tɛdikɔ ta ngasɔ tekɔ ɔkɛndɛ wa nkumbo, ndo anto akina hawohombe mbatɛnda kana mbaɔnyɔla l’ɔtɛ wa tɛdikɔ tayɔsama. (Tukedi 22:6) Kayotota lo dikambo dia wanɛ wakɛnyi dimɛna mbidja anawɔ kalasa laa ngelo na?b Kânga mbele efula tondoyaka olimu ɔsɔ, amɔtshi mɛnaka olimu ɔsɔ wolo efula, ndeka ndo woho wakawakanyiyaka, ndo anawɔ pandjaka wetshelo w’ɔlɔlɔ. Ɔnkɔnɛ, naka wɛ ekɔ lo sangoya dia mbidja ɔnayɛ kalasa laa ngelo, kete enda kɛnɛ tshɛ kalɔmbama lo dikambo sɔ, enda lo mɛtɛ mɛtɛ kana wɛ ekɔ l’akoka wahombama ndo l’etete dia wɛ kotsha dikambo sɔ.—Luka 14:28.
‘Aha Nyanga Akambo a Wake’
14 Lam’ele ekomelo ka dikongɛ nɛ kataye, amɔtshi mbeyaka ndjoyanga diangɔ diashana andja ɔnɛ: elimu wa lokumu efula, ntumu yafutama anto falanga efula, ndo ɔngɔnyi. Tênde ɛnyɛlɔ ka Baruka, sekeletɛlɛ kaki Jeremiya. Nde akakawanaka ate: “Ndi fono kambuyala le mi li! [Jehowa] ambahe lunyangu ladiku dia kandji kami. Dimi lambuheko la akhumu, hatani mumuya.” (Jeremiya 45:3) Baruka akalɛmbɛ efula. Monga sekeletɛlɛ ka Jeremiya aki lotumu la wolo ndo la pâ lo yimba. (Jeremiya 36:14-26) Akɛnamaka di’oko pâ kɛsɔ hatokomɛ. Tɔ kakahombe tshikala edja k’ɛnɔnyi 18 la ntondo ka Jerusalɛma ndjolanyema.
15 Jehowa akatɛ Baruka ate: “Kene kakamahiki, kayumuhandjula; la kene kakamune, kayumuhikula; kana mvuta ati: Wudja one tshe. We atuyayangelaka akambu a waki? Tâyangaki.” Baruka akayomɛ ndjɛkayɛka. Nde akayotatɛ ‘ndjâyangɛ akambo a waki,’ ondo nde akayomɛ nyanga ɔngɔnyi, lokumu, kana mbo ya l’emunyi dia nde ndjâkokɛ. Lam’ele Jehowa aki suke la ‘pikola ndo pandjola wodja w’otondo,’ ohomba akɔna mɛtɛ wa tayangaka diangɔ sɔ na? Diɔ diakɔ diakohola Jehowa Baruka dikambo nɛ diakôtshutshuya dia nde kana yimba ɔlɔlɔ: “Dimi lutsha mbela elanyelu le antu tshe, keli dimi layukusha lumu laye, uku engo ka dimbu le ye lu ahuli tshe wayuyutatshokaka.” Ekundji wa l’emunyi kondjotshikala l’ɔkɔngɔ w’elanyelo ka Jerusalɛma! Jehowa akôlake paka dia shimbɛ ‘anima andi oko ɛngɔ ka dimbo.’—Jeremiya 45:4, 5.
16 Baruka akoke woho wakawongola Jehowa ko lo ndjela daka dia Jehowa, Baruka akayokondja eko. (Jeremiya 43:6, 7) Ɔsɔ mɛtɛ ekɔ wetshelo wa woke efula le ekambi wa Jehowa wa nshi nyɛ! Ɔnɛ kema etena ka sho ‘ndjâyangɛ akambo a wake.’ Lande na kataso ngasɔ na? Nɛ dia ‘andja ɔnɛ wekɔ lo teete popo ndo kɛnɛ tshɛ kakombola anto lɔkɔ.’—1 Joani 2:17.
Yoho Yoleki Ɔlɔlɔ Yakokaso Kamba la Etena Kambotshikala
17 Lâsɔ ngande wakokaso kamba l’etena kɛnɛ kambotshikala lo yoho yoleki ɔlɔlɔ na? Ɔsa wetshelo oma lo kɛnɛ kakakomɛ omvutshi Jɔna. Nde “akatshu la Niniva . . . , akahangohango, akati ati: Nshi akumi anei tshu mbambutshikala dia Niniva nanyema.” Jɔna akâmbe woho w’anyanya lam’akandayɛna ɔnɛ Ase Niniva wamboka losango lande ko wambokadimola etema! Jehowa kondjolanya osomba ɔsɔ nto. Jɔna akandasale na? ‘Wɛ Jehowa le, lambokɔsɛngasɛnga dia wɛ minya lomu lami, nɛ dia ndeka ɔlɔlɔ dimi mvɔ la ntondo ka dimi tshikala la lɔsɛnɔ.’—Jona 3:3, 4; 4:3.
18 L’etena kɛsɔ, Jehowa akasha Jɔna wetshelo ɔmɔtshi w’ohomba efula. Nde “akatundja dimoke, akadilambia ladiku dia Jona, dia dio ndjala dedi l’ote andi, . . . Okone Jona akangenangena otekoya dia dimoke diako.” Koko, ɔngɛnɔngɛnɔ wa Jɔna aki paka wa lo tshenyi ya wonya tsho nɛ dia etombatomba kakɔ kakayɔlɛngɛ esadi eto. Jɔna ‘akadunganɛ la nkɛlɛ’ lo menda sui diande. Ko Jehowa akatɔtɔmiya otondo wa dikambo diaki la Nde, awotɛ ate: ‘Wɛ amboka nkandji lo dikambo dia dimɔkɛ . . . Lâsɔ ko dimi halakoke mboka nkandji lo dikambo dia Niniva, osomba wa woke, lɛnɛ ele anto ndekana nunu lokama l’akumi ahende, wanɛ waheye otshikitanu wa l’asa lonya lawɔ l’omi la la lɔmɔsɔ, aha la mbadia efula ka dongalonga?’—Jona 4:6, 7, 9-11.
19 Jɔna mɛtɛ akayakanɛka paka ndamɛ oto! Nde akakoke mboka nkandji l’asolo lo dikambo di’etombatomba, koko nde kombokaka Ase Niniva kɛtshi kânga yema tshitshɛ—vɔ anto wele, lo yoho ya lo nyuma, ‘kombeyaka otshikitanu wa l’asa lonya lawɔ l’omi la lonya lawɔ la lɔmɔsɔ.’ Popo ndo sho lawɔ mbeyaka kombola di’andja ɔnɛ wa kɔlɔ nanyema, ndo dui sɔ bu kɔlɔ! (2 Tesalonika 1:8) Koko, lam’akongɛso elanyelo kɛsɔ, sho tekɔ l’ɔkɛndɛ wa kimanyiya akanga w’etema wa losembwe, wanɛ wele, lo yoho ya lo nyuma, vɔ ‘haweye tshikitanya lonya lawɔ l’omi la lonya lawɔ la lɔmɔsɔ.’ (Mateu 9:36; Romo 10:13-15) Onde wɛ ayɔsa tshenyi ya wonya ya tshitshɛ nyɛ yambotshikala dia wɛ kimanyiya anto efula dia vɔ kondja ewo ka Jehowa k’ohomba efula? Olimu akɔna wakoka onto kondja l’andja ɔnɛ ko mbɛdima l’ɔngɛnɔngɛnɔ wa kimanyiya onto dia nde kondja lɔsɛnɔ na?
Totetemale Sɛna la “Yimba y’Ɔlɔlɔ”
20 Lam’ele andja ɔnɛ wa Satana wekɔ lo tatshu tsho otsha l’elanyelo, ekakatanu w’eyoyo wayotokomɛ mɛtɛ. Timote ka Hende 3:13 mbutaka ɔnɛ: ‘Anto wa kɔlɔ la akanga wa lokeso wayɔtɛkɔya monga kɔlɔ.’ Koko aha sho ‘kɔmɔ ndo nɛmba otema.’ (Heberu 12:3) Ɛkama Jehowa dia nde kosha wolo. (Filipi 4:13) Eka woho wa wɛ mbekesanɛka l’akambo w’eyoyo, dia wɛ ndjaekesanyiya l’awui wa pâ watatɛkɔnya, lo dihole dia wɛ kanyiyaka paka akambo wa lo nshi yakete. (Undaki 7:10) Onga kanga tshundju, yelaka alako watosha “ɔhɔmbɔ wa kɔlamelo ndo wa kɛsɔ.”—Mateo 24:45-47, NW.
21 Sho hateye nshi ngana yambotshikala. Koko, sho kokaka mbuta l’eshikikelo tshɛ ɔnɛ “ekomelo k’akambo tshɛ kambosukana.” Edja ndo lam’okoya ekomelo kɛsɔ, nyɛsɔ tɔsɛnake la “yimba y’ɔlɔlɔ” lam’asaso l’anyaso anto, lo yoho yakokɛso nkumbo yaso, ndo l’ɛkɛndɛ aso wa l’emunyi. Naka sho ntshaka ngasɔ, kete sho tshɛ kokaka monga l’eshikikelo ɔnɛ tayoyotanema oko anto ‘waha la vadi, waha l’onongo ndo wele la wɔladi.’—2 Petero 3:14.
[Footnotes]
a Ɛnyɛlɔ oko lo wodja w’États-Unis, anto efula mbokanaka la société mɔtshi dia ndjâfutɛka falanga ya lopitadi, kânga mbele société shɔ mbadjɛka oshinga wolo. Nkumbo mɔtshi y’Ɛmɛnyi wa Jehowa mɛnaka ɔnɛ adɔkɔtɛlɛ amɔtshi ndekaka mbetawɔ sakɛ onto l’ekanga ekina aha la mbodja dikila naka nkumbo yakɔ wambowofutaka falanga la ntondo dia nde mbasakɛka. Enganga efula mbetawɔka nongola lofulo la falanga yakawashikikɛ lo yɛdikɔ yokitshikitshi, lofulo la falanga letawɔma lo esakelo k’etenyi kana l’esakelo kafuta lɛɛta.
b Naka onto ate mbidje ana kalasa laa ngelo, kete ɔsɔ dikambo diawenda ndamɛ. Enda lo sawo diele l’ɔtɛ a dui ɔnɛ: “Kalasa ka laa Ngelo: Onde Wɛ Kokaka Mbidja Ɔnayɛ Lɔkɔ,” sawo sɔ diakatombe lo Réveillez-vous ! wa Ngɔndɔ ka Nɛi 8, 1993.
[Study Questions]
1 Monga la “yimba y’ɔlɔlɔ” kɛdikɛdi na?
2. Wahɔ akɔna wakondja Akristo nshi nyɛ oma lo lotutsha laki Jehowa?
3. Wembola akɔna wakoka ambutshi ndjambola lo dikambo di’anawɔ?
4. (a) Kakɔna kakoka ndjotomba naka omi mongaka ngala otsha le wadiɛnde? (b) Ngande wakoka amato wotshukami keketsha wɔladi lam’asawɔ la Nzambi ndo ɔngɛnɔngɛnɔ wa nkumbo k’otondo?
5. Bonde kahomba ɛlɔngɔlɔngɔ l’esekaseka ndjela alako wa lo Bible lo kɛnɛ kendana la dionga diawɔ otsha le ambutshi awɔ?
6. Ngande wakokaso nyanga wɔladi lam’asaso l’anyaso ambetawudi?
7. (a) Ngande wakatokeketsha Paulo dia sho monga la “yimba y’ɔlɔlɔ” lo akambo watosalaka anto lushi la lushi? (b) Akristo wele la wadi ndo la waomi ngande wahombawɔ mbɔsaka ɛkɛndɛ wa lo nkumbo?
8. Ngande wakoka ewandji wa nkumbo kotshaka ehomba wa nkumbo yawɔ lo yoho yasungana?
9. Lande na kele ekɔ dui dia lomba di’ewandji wa nkumbo mbohɔka ɔnɛ vɔ mbeyaka ndjovɔ kana ndjotata hemɔ la shashimoya?
10. Ngande wakoka ambutshi w’Akristo ‘mombɛ’ anawɔ diangɔ?
11. Onde monga la kanyi ya mɛtɛ mɛtɛ lo kɛnɛ kendana la falanga mɛnyaka ɔnɛ onto bu la mbetawɔ? Lembetshiya.
12. Ngande wakalakanya Yeso ambeki ande dia vɔ mbekesanɛka l’akambo w’eyoyo wa lo lɔsɛnɔ?
13. Naa oyango wa ntondo wa kalasa, ndo ngande wakoka ambutshi kimanyiya anawɔ lo dikambo sɔ?
14, 15. (a) Ngande wakayɛngɛnga Baruka lo nyuma? (b) Bonde kataso ɔnɛ nde aki oko enginya lo ‘tayangaka akambo a wake’?
16. Wetshelo akɔna wakoka ekambi wa Jehowa wa nshi nyɛ mbɔsa oma l’ɛnyɛlɔ kaki Baruka?
17, 18. (a) Jɔna akandasale lam’akakadimola Ase Niniva otema? (b) Wetshelo akɔna wakakondja Jɔna oma le Jehowa?
19. Naa tokanyi ta lokaki tahombaso mbewɔ?
20, 21. (a) Naa weho ɛmɔtshi wayotokoka mɛnya ‘yimba yaso y’ɔlɔlɔ’ lo nshi y’otsha la ntondo? (b) Ɛtshɔkɔ akɔna wayotokondja naka sho sɛnaka la “yimba y’ɔlɔlɔ”?
[Caption]
[Footnotes]
[Caption]
[Questions]
[Caption on page 9]
[Caption on page 9]
Naka wadi l’omi sɔkishanaka lam’asawɔ, kete vɔ fukutanyaka diokanelo diasawɔ la Jehowa
[Caption on page 11]
[Caption on page 11]
Ambutshi pombaka ndjasha lo dikambo dia kalasa k’anawɔ
[Caption on page 13]
[Review on page 13]
Awui Walangaso Mbohola
◻ Ngande wakokaso mɛnya ɔnɛ tekɔ la “yimba y’ɔlɔlɔ” lam’asaso l’ase nkumbo kaso ndo l’anyaso akina?
◻ Ngande wakokaso kotshaka ɛkɛndɛ aso wa lo nkumbo lo yoho yasungana?
◻ Bonde kahomba ambutshi ndjasha lo dikambo dia kalasa k’anawɔ?
◻ Wetshelo akɔna wakondjaso oma l’ɛnyɛlɔ ka Baruka la ka Jɔna?