Toshidiya Dɔkɔlɔkɔ Diaso Di’okristo Lo Lotshungɔ
‘Lɛnɛ ele nyuma ka Jehowa, lɛkɔ kele lotshungɔ.’ —2 KORETO 3:17.
ƐMƐNYI WA JEHOWA suyaka ɔnɛ ɔtɛmwɛlɔ awɔ wayotshikala pondjo. Omalɔkɔ, vɔ nongamɛka kambɛ Nzambi “lu [n]yuma la lu mete” pondjo pondjo. (Joani 4:23, 24) Oko wewɔ la lotshungɔ la sɔna kɛnɛ kalangawɔ, Akristo asɔ wakayakimɔ l’etondo awɔ le Jehowa Nzambi ndo oyango awɔ ele shidiya dɔkɔlɔkɔ diakawadje. Dia dishidiya, vɔ mbɛkamaka Dui dia Nzambi la nyuma kande k’ekila. Lam’atawashidiya dɔkɔlɔkɔ diawɔ di’Akristo l’otema ɔtɔi lo lotshungɔ lakawasha Nzambi, Ɛmɛnyi wa Jehowa nɛmiyaka “embuledi” wa mbolamatadi di’olimu wakambawɔ, ndo vɔ kambaka dimɛna l’ɛlɛmbɛ wa lɛɛta ndo la tɛdikɔ tokina tɔsawɔ. (Romo 13:1; Jakoba 1:25) Oko ɛnyɛlɔ, vɔ kambaka la la Société Watch Tower oko ehomɔ kana onyimpala awɔ la ntondo ka lɛɛta—tɔ kekɔ ehomɔ kɛmɔ l’atei wa nɛ diakambema lo wedja efula—dia mbakimanyiya woho wa vɔ kotsha olimu awɔ wa kimanyiya anyawɔ anto, djekoleko lo nyuma. Koko, Ɛmɛnyi wakayakimɔ le Nzambi, aha le tshunda dimɔ diatɛkɛtɛ le lɛɛta, ndo ndjakimɔ kawɔ le Jehowa kayotshikalaka pondjo pondjo.
2 Oko ekambi wamboyakimɔ le Nzambi, Ɛmɛnyi wa Jehowa wekɔ l’ɔkɛndɛ wa ndjela kɛnɛ kakawatɛ Yeso dia ‘mbetɛ anto wa lo wedja tshɛ ambeki, ndo mbâbatiza lo lokombo la Papa la l’Ɔna la la nyuma k’ekila, lo mbaetshaka.’ (Mateu 28:19, 20) Olimu ɔsɔ wayotetemala polo ndo l’ekomelo ka dikongɛ nɛ di’akambo, nɛ dia Yeso akate ate: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.” (Mateu 24:3, 14) Ɔnɔnyi tshɛ, taandjo t’ofundelo (imprimerie) taki la Société Watch Tower kâmɛ ndo atshunda akina wâmɛ lotshungɔ l’Ɛmɛnyi la ntondo ka lɛɛta tondjɛka Ɛmɛnyi wa Jehowa miliyɔ ya Bible, abuku, tobukubuku, la waa periodikɛ dia vɔ kambaka olimu awɔ w’esambishelo wa l’andja w’otondo. Koko atshunda asɔ wâmɛ Ɛmɛnyi le lɛɛta kimanyiyaka ekambi wa Nzambi efula dia vɔ shidiya dɔkɔlɔkɔ diawɔ le nde.
3 Anto amɔ kokaka mbuta ɔnɛ woho wanyanya Ɛmɛnyi la Société Watch Tower—kana walekawɔ tɛkɛta dia “la Société”—mɛnyaka ɔnɛ vɔ kiɔsaka woho okina nto oleki kiɔsa oko onyimpala awɔ le lɛɛta. Onde vɔ hawokiɔshi oko ehomɔ kâheme lâdiko dia tshɛ l’akambo w’ɔtɛmwɛlɔ? Dibuku Les Témoins de Jéhovah : Prédicateurs du Royaume de Dieu mpotolaka dui sɔ lo nembetshiya ɔnɛ: “Lam’akataka Tshoto y’Etangelo [ya Ngɔndɔ ka Samalo 1, 1938 lo Angɛlɛ] dikambo dia “la Société,” yɔ kumbutaka dia ehomɔ katɛkɛtɛ Ɛmɛnyi le lɛɛta keto, koko yakataka dikambo di’olui w’Akristo w’akitami wakakengaka ehomɔ kakɔ kɛsɔ ndo woho wakawakambaka latɔ. Omalɔkɔ, tshɛkɛta shɔ yekɔ didjidji dia ɔhɔmbɔ wa kɔlamelo ndo wa kɛsɔ.”a (Mateu 24:45) Lo yoho shɔ mbakakambaka Ɛmɛnyi la tshɛkɛta “la Société.” Lo mɛtɛ, tshunda di’atɛkɛtɛ le lɛɛta tshikitana la “ɔhɔmbɔ wa kɔlamelo ndo wa kɛsɔ.” Vɔ tɔ̂ka longanda dia sɔna ɛnɔmbɔdi wa la Société Watch Tower koko, Ɛmɛnyi wakenga ‘ɔhɔmbɔ wa kɔlamelo’ komaka akitami l’ekimanyielo ka nyuma k’ekila kaki Jehowa.
4 Dia mbewɔ ɛkɔhɔtanya, Ɛmɛnyi wa Jehowa namaka nemi yawɔ. Lo dihole dia mbutaka ɔnɛ: “la Société mbetsha ɔnɛ,” Ɛmɛnyi efula ndekaka kamba la wetelo wele oko “Bible mbutaka ɔnɛ” kana, “dimi shihodiaka dia Bible mbata ɔnɛ.” Lo mbuta ngasɔ, vɔ mbikaka epole ɔsɛkɛ lo yɛdikɔ yakɔshi Ɔmɛnyi l’Ɔmɛnyi ya mbetawɔ wetshelo w’oma lo Bible ndo mbewɔka ditakataka di’ɔnɛ Ɛmɛnyi wa Jehowa kelekama l’awui wafundɛwɔ lo ɔtɛmwɛlɔ ɔmɔtshi wambâtɔma. Koko lo mɛtɛ, tatamake pondjo l’alako wendana la woho wakambaso l’ɛtɛkɛta (terminologies) ɛmɔtshi. Lâdiko wa lâsɔ, sho kokaka kamba l’ɛtɛkɛta ɛsɔ paka dia mbewɔ ɛkɔhɔtanya. Oko weso Akristo, sho pombaka monga la wɛdimo. Bible tɔkɔkɔmiyaka ‘di’aha sho mbidjana tamu l’ɛtɛkɛta.’ (2 Timote 2:14, 15) Afundelo tolakaka ɔnɛ: “Ndu nyu, naka nyu hanyoteketa [awui] wokawo esadi, ukundi wayeya antu akambu watanyu?”—1 Koreto 14:9.
Nyuma ka Nzambi Hâhatanyɛ Anto Dɛmbɛlɛmbɛ
5 Ɔpɔstɔlɔ Paulo akate ate: “Wulu wa ntsha akambu tshe weko, keli aha akambu tshe mbusunganyi.” Nde akate nto ate: “Wulu wa ntsha akambu tshe weko, keli aha akambu tshe mbatudia.” (1 Koreto 10:23) Lo mɛtɛ, Paulo kɔmɛnya ɔnɛ sunganaka sho ntsha akambo wasekɛ Dui dia Nzambi. Lo mbɛdika l’ɛlɛmbɛ 600 wakawasha Isariyɛlɛ w’edjedja, ɛlɛmbɛ wokɛma hwe walɔmbɔla Akristo wekɔ paka yema tshitshɛ tsho. Omalɔkɔ, awui efula mendanaka la nkum’otema k’onto l’onto. Onto lamboyakimɔ le Jehowa kondjaka lotshungɔ oma l’ɛlɔmbwɛlɔ ka nyuma ka Nzambi. Lam’ele nde tshikɛka akambo wa mɛtɛ dihole dia vɔ nɔmbɔla lɔsɛnɔ lande, Okristo wa ngasɔ ndjelaka nkum’otema kande kolowanyemi oma lo Bible ndo mbetawɔka Nzambi mbɔlɔmbɔla l’ekimanyielo ka nyuma kande k’ekila. Dui sɔ kimanyiyaka Okristo wamboyakimɔ le Nzambi dia nde shihodia ɛngɔ kakɔna ‘kayowokeketsha’ ndo ‘kayonga ohomba’ le nde ndo le anto akina. Nde mbeyaka ɔnɛ tɛdikɔ tɔsande tayendana la diokanelo diasande la Nzambi, ɔnɛ lambondoyakimɔ le nde.
6 Ɔmɛnyi wa Jehowa mɛnyaka ɔnɛ nde ambetawɔ akambo wa mɛtɛ nɔmbɔla lɔsɛnɔ lande lam’ashande kɔmatɛrɛ lo nsanganya y’Akristo. Ntondotondo, nde mbeyaka vusolaka paka kɛnɛ kofundami l’okanda wêkama. Koko l’ɔkɔngɔ diko, nde mbeyaka ndjotetemala polo ndo nde ndjosha kɔmatɛrɛ ya wetshelo w’oma lo Bible l’ɛtɛkɛta ande ndamɛ. Lo ntsha ngasɔ, nde ayɛnya ɔnɛ nde ekɔ lo tahame l’ekanelo ka lomba lo dihole dia vusolaka paka kɛnɛ kakati anto akina. Nɔnga ɛtɛkɛta ande dimɛna lo yimba ndo tɛkɛta awui w’eshika wendana l’akambo wa mɛtɛ oma k’ɛse otema ayowɔngɛnyangɛnya ndo ayowɛnya ɔnɛ nde amboshihodia awui akɔ lo yimba yande.—Undaki 12:10; ɛdika la Romo 14:5b.
7 Ngandji kokawɔ Nzambi la anyawɔ anto mbasɛngiya Ɛmɛnyi wa Jehowa dia sala ngasɔ. (Mateu 22:36-40) Mɛtɛ, vɔ tshɛ kimanɛ wolo l’atei a diwotɔ diawɔ dia l’andja w’otondo oma lo dimama dia ngandji kele oko ka Kristo. (Kolosai 3:14; 1 Petero 5:9) Koko, oko wewɔ la lotshungɔ la sɔna kɛnɛ kalangawɔ, onto l’onto akɔshi yɛdikɔ ya sambisha lokumu l’ɔlɔlɔ la Diolelo dia Nzambi, tshikala lomange l’akambo wa pɔlitikɛ, tona dikila, mbewɔ weho ɛmɔ wa tɔkɛnyɔ, ndo nɔmbwamaka l’ɛlɛmbɛ wa Bible lo lɔsɛnɔ lande. Ndoko lâtshutshuya dia mbɔsa tɛdikɔ tɔsɔ. Tɔ tele tɛdikɔ tendana la yoho ya lɔsɛnɔ lakasɔnɛ anto walanga koma Ɛmɛnyi la lolango lawɔ vamɛ la ntondo ka vɔ ndjokoma Akristo wamboyakimɔ le Nzambi.
Onde Ɛmɛnyi Wekɔ la Dikambo dia Mbikoya la Olui Walɔmbɔla?
8 Lo mɛtɛ, Bible mɛnyaka ɔnɛ Akristo wa mɛtɛ kambɛka Nzambi aha l’onto mbasokoya. Tɔ mbutaka ɔnɛ: ‘Jehowa ele nyuma, lɛnɛ ele nyuma ka Jehowa, lɛkɔ kele lotshungɔ.’ (2 Koreto 3:17) Ko ngande wɔtɔnɛ dui dia mɛtɛ sɔ la eongelo ka “ɔhɔmbɔ wa kɔlamelo ndo wa kɛsɔ” la Olui awɔ Walɔmbɔla na?—Mateo 24:45-47, NW.
9 Dia kadimola dimbola sɔ, sho la dia namaka lo timba taso didjango dia lo Bible diendana la lowandji. (1 Koreto 11:3) L’Efeso 5:21-24, Kristo mbɔsamaka oko ‘owandji w’etshumanelo,’ ɔnɛ lahombatɔ ‘ndjakitshakitsha’ la tshina diande. Ɛmɛnyi wa Jehowa mbeyaka ɔlɔlɔ ɔnɛ ɔhɔmbɔ wa kɔlamelo ndo wa kɛsɔ kengama l’anango Yeso wa lo nyuma. (Heberu 2:10-13) Olui w’ɔhɔmbɔ wa kɔlamelo ɔsɔ akasɔnama dia mbishaka ekambi a Nzambi ‘mbo ya ndɛ ya lo nyuma lo tena diasungana.’ L’etena k’ekomelo kɛnɛ, Kristo akakitsha ɔhɔmbɔ akɔ “ladiku dia antu wa luudu landi.” Omalɔkɔ, onto tshɛ layata ate Okristo mbende la dia mbɔlɛmiya lo menda dihole diele lande.
10 Oyango w’owandji monga ele dia nama kâmɛ ndo kimanyiya dia “akambu tshe watshami la dimena ndu [“l’ɔnɔngɔ,” NW].” (1 Koreto 14:40) Dia mbewɔ ofukutanu l’eleko ka ntondo, Akristo amɔ w’akitami wa l’atei w’ɔhɔmbɔ wa kɔlamelo ndo wa kɛsɔ wakasɔnama oko onyimpala (représentant) kana ɔtɛkɛtshi w’olui awɔ w’otondo. Woho wakatalowanaka akambo akɛnya ɔnɛ: Jehowa aketawɔka ndo akatshɔkɔlaka ɛlɔmbwɛlɔ k’ɔhɔmbɔ ɔsɔ wa l’eleko ka ntondo. L’ɔngɛnɔngɛnɔ tshɛ, Akristo wa l’eleko ka ntondo waketawɔka ɛlɔngɔswɛlɔ kakɔ. Eelo mɛtɛ, vɔ waketawɔ ndo waki la lowando l’efula lo menda etombelo w’amɛna wakakondja ɔhɔmbɔ akɔ.—Etsha 15:1-32.
11 Ohomba w’ɛlɔngɔswɛlɔ ka ngasɔ wekekɔ ɛlɔ kɛnɛ. Ɛlɔ kɛnɛ, Olui Walɔmbɔla w’Ɛmɛnyi wa Jehowa kengama l’Akristo w’akitami dikumi, vɔ tshɛ wambotshindja ɛnɔnyi akumi l’ɔkɔngɔ lo menda akambo wamboweya l’olimu awɔ w’Akristo. Vɔ nɔmbɔlaka Ɛmɛnyi wa Jehowa lo yoho ya lo nyuma, oko wakasalaka olui walɔmbɔla wa l’eleko ka ntondo. (Etsha 16:4) Lo ndjela ɛnyɛlɔ k’Akristo wa l’eleko ka ntondo, Ɛmɛnyi wa Jehowa mendɛka le anangɛwɔ asɔ wambotshunda wɔɔngɔ wa l’Olui Walɔmbɔla l’ɔngɛnɔngɛnɔ tshɛ dia kondja ɛlɔmbwɛlɔ k’oma lo Bible l’akambo w’ɔtɛmwɛlɔ. Kânga mbele ase Olui Walɔmbɔla la anyawɔ Akristo wekɔ ɛhɔmbɔ wa Jehowa la wa Kristo, Bible tolakaka ɔnɛ: “Nyeetawɔke anɔmbɔdi waakinyu ndo nyaalɛmbɛɛke. Dikambo vɔ weekɔ lo nama [“anima anyu,” NW], ndo vɔ wayootokoya la [Nzambi] akambo akɔ. Endaka nyu mbaetawɔ, vɔ wayookoca lotumu laakiwɔ l’ɔngɛnɔngɛnɔ; ko endaka nyu hanyowaoke, kete vɔ wayoolokoca l’ocucumalo, kete ndooko ɛngɔ kayonyɛɛmba nkonja oma lɔkɔ.”—Ebreyo 13:17, Dyookaneelo dy’oyooyo.
12 Onde ɔkɛndɛ wa namaka anangɛwɔ wambokondja Olui Walɔmbɔla oma l’Afundelo mɛnyaka ɔnɛ Ɔmɛnyi wa Jehowa tshɛ pombaka mbikoya la wɔ lo ndjela etsha ande? Kema, kɛsɔ hɔtɔnganɛ l’ɛtɛkɛta ɛnɛ wa Paulo le Ase Rɔmɔ: “Ya we, ukundi alumbuyaye onanyo na? Ukundi w[ɔ]nyolaye onanyo na? Shu tshe tayemala l’elumbwelu la ntundu ka [Nzambi] . . . Shu tshe, untu l’untu, tayuyateketela le [Nzambi].”—Romo 14:10-12.
13 Ko onde, shi mɛtɛ, Ɔmɛnyi wa Jehowa tshɛ la dia kimɔ alapɔlɔ wa wenya wasambishande? Eelo, koko ɔkɔkɔ wakimɔwɔ wenya nembetshiyama dimɛna lo dibuku dimɔ diakatondja Ɛmɛnyi wa Jehowa, lɛnɛ âlaso ɔnɛ: “Antomami wakasangana laale Yeeso, ko vɔ mbɔɔkɔndwɛɛ kɛnɛ cɛɛ kakawace la kɛnɛ cɛɛ kakawatolakanya. (Marko 6:30, Dyookaneelo dy’oyooyo) Lam’akatahamaka olimu, awui l’ɛkɔndɔ w’akambo wa mamba wakakomɛ wanɛ wakasambishaka lokumu l’ɔlɔlɔ wakatshumanyema. . . . (Etsha 2:5-11, 41, 47; 6:7; 1:15; 4:4) . . . Ande ekeketshelo kakakondja ekambi w’Akristo wa kɔlamelo asɔ lam’akawoke alapɔlɔ wa kɛnɛ kakatâsalemaka lee! . . . Woho akɔ wâmɛ mbele, ɔlɔngɔswamelo waki Jehowa wa nshi nyɛ ntshaka tshɛ dia nama alapɔlɔ w’oshika w’olimu watakambema dia kotsha kɛnɛ kata Mateu 24:14.”
14 Olui Walɔmbɔla ekɔ yɛdikɔ yoludi la ngandji yakɔsama ndo ɛnyɛlɔ ka mbetawɔ kasunganaso mbokoya. (Filipi 3:17; Heberu 13:7) Lo mamema ndo lo ndjela Kristo oko ɛnyɛlɔ kawɔ, vɔ kitanyiyaka ɛtɛkɛta wa Paulo ɛnɛ: “Shu hatahamela mbetawo kanyu, keli teko ekimanyidi w’ongenongeno anyu, ne dia nyu nyambushikikala [oma] lu mbetawo kanyu.” (2 Koreto 1:24) Lo menda akambo wa tomba, Olui Walɔmbɔla kotolaka yambalo yaso l’ɛlɔlɔ wayotokondja naka sho ndjela alako wa Bible, vɔ toshaka alako lo woho wahombaso kitanyiyaka ɛlɛmbɛ l’awui wa lo Bible, têwolaka dikambo dia wâle walɛndalɛnda, ndo mbishaka ‘anyawɔ ekambi’ ekeketshelo kele ohomba le wɔ. Ngasɔ mbakotshande ɔkɛndɛ ande wa nɔmbɔla ndo kimanyiya anyawɔ ekambi dia vɔ nama ɔngɛnɔngɛnɔ awɔ, ndo mbaodia lo mbetawɔ dia vɔ tshikalaka nge.—1 Koreto 4:1, 2; Tito 1:7-9.
15 Naka Ɔmɛnyi ambɔsa tɛdikɔ tɔmɔ l’ekimanyielo k’alako w’oma lo Bible wawosha Olui Walɔmbɔla, nde mbaɔsaka la lolango lande ndamɛ nɛ dia wekelo ande wa Bible ambowetawoya ɔnɛ mboka k’ɔlɔlɔ kahombande mbidjɛ tɔ kɛnɛ mɛtɛ. Ɔmɛnyi wa Jehowa tshɛ sɛngiyamaka oma lo tshimbo ya Dui dia Nzambi dia nde kamba l’alako w’eshika w’oma l’Afundelo washa Olui Walɔmbɔla, eya ɔlɔlɔ ɔnɛ tɛdikɔ tɔsande mendanaka la diokanelo diasande ndamɛ la Nzambi, ɔnɛ lakandayakimɔ dia mbokambɛ.—1 Tesalonika 2:13.
Wele Ambeki ko ndo Asɔlayi
16 Ko naka tɛdikɔ tendana la lɔkɛwɔ l’onto l’onto ekɔ dui dia wenda ndamɛ, bonde katshanyema Ɛmɛnyi wa Jehowa oma l’etshumanelo na? Ndoko onto lakoka shikikɛ la lolango lande ndamɛ ɔnɛ kapanda kokaka mbitshanyema oma l’etshumanelo l’ɔtɛ wa pɛkato kɛmɔtshi kotshende. Koko lo ndjela Afundelo, vɔ ndjotshanyaka onto paka kana nde kotshe pɛkato ka woke, ɛnyɛlɔ oko nyɛ yoshidiwɔ lo Kɔrɛtɔ ka ntondo tshapita ya tanu, ko nde hayatshumuya. Omalɔkɔ, Okristo mbeyaka mbitshanyema oma l’etshumanelo paka kana nde ambonana kana ambotsha loseka, ko halange ekimanyielo ka lo nyuma k’oma le dikumanyi dioludi la ngandji. Lâdiko dia lâsɔ, aha Ɛmɛnyi wa Jehowa ato mbayela tshelo y’Akristo shɔ. Dibuku Encyclopédie de la Religion (lo Angɛlɛ) mbutaka ɔnɛ: “Tshunda tshɛ diekɔ la dikimɔ dia ndjakokɛ la ntondo k’anto amɔ wa lo tshunda diakɔ wahalange ndjela ɛlɛmbɛ adiɔ ndo wakoka fukutanya ɔlɔlɔ w’anto akina. Lo ndjela ɛlɔmbwɛlɔ k’ɔtɛmwɛlɔ, dikimɔ dia ngasɔ diokokeketshamaka oma lo dietawɔ di’ɔnɛ dilanya [dia mbitshanyema oma l’etshumanelo] diakondja onto lam’ahindolande ɛlɛmbɛ mendanaka la dihole di’ɔsande lo asho a Nzambi.”
17 Ɛmɛnyi wa Jehowa wekɔ ambeki wa Bible. (Jashua 1:8; Osambu 1:2; Etsha 17:11) Sho kokaka mbɛdika ekongelo ka wetshelo wa Bible kasha Olui Walɔmbɔla la kɛnɛ kele l’adikitɛlɛ amɔ wa lo wa kalasa. Kânga mbele aha adikitɛlɛ mbakanga awui wetshawɔ ana lo kalasa, vɔ shikikɛka ekongelo kɛmɔ, mɛnyaka nganɛ wayetshama ana, ndo mbishaka ɛlɔmbwɛlɔ ka ndjela. Naka wambonda ombeki ahindola ɛlɛmbɛ wa Kalasa, ɛ̂nya anyande ambeki pâ, kana ekɔ lo mbidja kalasa kawɔ lo sɔnyi, kete vɔ mbeyaka mbotshanya. Ewandji wa kalasa wekɔ la dikimɔ dia mbɔsa tɛdikɔ tɔmɔ di’ɔlɔlɔ w’ambeki tshɛ.
18 Lâdiko dia ndjâla ambeki, Ɛmɛnyi wa Jehowa wekɔ asɔlayi wa Yeso Kristo, wakalakanyema dia ‘ndɔ ta di’ɔlɔlɔ dia mbetawɔ.’ (1 Timote 6:12; 2 Timote 2:3) Lo mɛtɛ, naka onto tetemala la lɔkɛwɔ lande lahasungana le dembe di’Okristo, kete Nzambi mbeyaka mbotona. Lam’ele onto akotɔ la lotshungɔ la sɔna kɛnɛ kalangande, ɔsɔlayi w’Okristo kokoka mbɔsa yɛdikɔ woho walangande, koko etombelo wa yɛdikɔ yande wayonga l’ɔtɛ ande ndamɛ. Paulo ekɔ la shadiya ya mbuta ɔnɛ: “Nduku dimbi dieya ndjadingitanya lu akambu [“w’okanda wa lo lɔsɛnɔ,” NW], ne dia ndi ayanga ngenyangenya lakawudji lu dimbi. Naka untu ambedika wulu andi lu tokenyo, ndi hose dembo dia kusu dia lutumbu, tshikima ndi ambukitanyia elembe wa tokenyo.” (2 Timote 2:4, 5) Akristo wambotshunda wɔɔngɔ, mbidja ndo ase Olui Walɔmbɔla, ndjelaka ɛlɔmbwɛlɔ k’Owandji awɔ, Yeso Kristo lo nna ndo lo nna, walama “elembe” dia vɔ kondja dɛmbɔ dia koso dia lɔsɛnɔ la pondjo.—Joani 17:3; Enyelo 2:10.
19 Onde aha tamboka mɛtɛ lâsɔ ɔnɛ Ɛmɛnyi wa Jehowa wekɔ ekambi wa Nzambi koko aha ɛhɔmbɔ w’anto? Lam’ele Akristo wamboyakimɔ le Nzambi wekɔ la lotshungɔ lakawakondja oma le Kristo, vɔ mbetawɔka nɔmbwama la nyuma ka Nzambi ndo la Dui diande lo nsɛnɔ yawɔ lam’akambawɔ lo kâmɛ vɔ l’anangɛwɔ lo etshumanelo kaki Nzambi. (Osambu 133:1) Tolembetelo tambotokondja oma l’awui asɔ tamboshidiya tamu tshɛ lo dikambo dia kiɔkɔ ya wolo awɔ. Vɔ kokaka memba kâmɛ l’omembi w’esambu ɔnɛ: “[Jehowa] keli wulu ami la engawu kami. Utema ami atekamaka le ndi, ku dimi latukimanyiamaka. Diako mbatongenangenaka utema ami. Dimi layuwandulaka l’esambu ami.”—Osambu 28:7.
[Footnote]
a Dibuku diakatondja Watchtower Bible and Tract Society of New York, Inc. lo 1993.
[Study Questions]
1. Le na akayakimɔ Ɛmɛnyi wa Jehowa, ndo lande na kakambawɔ la atshunda wawâmɛ le lɛɛta?
2. Bonde kândola Ɛmɛnyi wa Jehowa la Société Watch Tower l’atshunda akina wâtɛkɛtɛ le lɛɛta?
3. Lo yoho yakɔna yakakambaka Ɛmɛnyi wa Jehowa la tshɛkɛta “la Société” lo nshi ya ntondo?
4. (a) Dia mbewɔ ɛkɔhɔtanya, ngande watɛkɛta Ɛmɛnyi wa Jehowa efula na? (b) Bonde kahombaso monga la wɛdimo lo dikambo di’ɛtɛkɛta ɛmɔtshi?
5. Ngande wahombaso shihodia 1 Koreto 10:23?
6. Ngande wakokaso mɛnya lo nsanganya y’Akristo ɔnɛ akambo wa mɛtɛ mbalɔmbɔla nsɛnɔ yaso?
7. Tɛdikɔ takɔna tɔsa ekambi wa Jehowa aha l’onto mbatshutshuya?
8. Naa dimbola diahomba nembetshiyama?
9, 10. (a) Ngande wayelawɔ awui wa lowandji l’etshumanelo k’Akristo? (b) Lo na aki ohomba wa lowandji monga l’atei w’etshumanelo k’Akristo ka l’eleko ka ntondo na?
11. Ngande wahombaso mbɔsaka Olui Walɔmbɔla wa nshi nyɛ?
12. Okristo tshɛ la dia mbikoya l’onto akɔna?
13. Bonde kakimɔ Ɛmɛnyi wa Jehowa alapɔlɔ w’olimu awɔ w’esambishelo?
14, 15. (a) Ngande wendana 2 Koreto 1:24 la Olui Walɔmbɔla na? (b) Lo ndjela alako akɔna wahomba Akristo mbɔsa tɛdikɔ tawɔ vamɛ, ndo ahombawɔ mbohɔka?
16. Kânga mbele tɛdikɔ tɔsa onto lo dikambo dia lɔkɛwɔ lande mbowendaka paka ndamɛ, bonde katshanyema anto amɔtshi oma l’etshumanelo na?
17, 18. Ngande wakokaso mɛnya ɔnɛ kema kɔlɔ mbitshanya onto oma l’etshumanelo lo ndjela ɛnyɛlɔ (a) ka woho walɔmbwama kalasa? (b) k’ɔlɔngɔswamelo w’asɔlayi?
19. L’ɔkɔngɔ wa sho sɛdingola dikambo dia ndjakimɔ k’Okristo, dui diakɔna diambotomana fundo?
[Caption]
[Footnotes]
[Caption]
[Questions]
[Caption on page 16]
[Caption on page 16]
Olui walɔmbɔla wa l’eleko ka ntondo akakokɛka kâmɛ ka wetshelo
[Caption on page 19]
[Caption on page 19]
Ɛmɛnyi wa Jehowa wa l’andja w’otondo wangɛnangɛnakɔ la lotshungɔ l’oma le Kristo
[Caption on page 20]
[Review on page 20]
Ngande Wayoyokadimola?
◻ Ngande wakimanyiama Ɛmɛnyi wa Jehowa oma le la Société Watch Tower la atshunda akina wâtɛkɛtɛ le lɛɛta?
◻ Ɛlɔlɔ akɔna wakondja Akristo oma l’olimu wakamba Olui Walɔmbɔla w’Ɛmɛnyi wa Jehowa?
◻ Bonde kakimɔ ekambi wa Jehowa alapɔlɔ w’olimu awɔ w’esambishelo?
◻ L’etena kakɔna kakoka mbitshanyema Okristo wamboyakimɔ le Nzambi oma l’etshumanelo na?