Tônge La Yambalo Ndo L’etete!
‘Nyosungukalake, nɛ dia hanyeye lushi kânga wonya.’—MATEU 25:13.
1. Kakɔna kakalongamɛka ɔpɔstɔlɔ Joani?
LO SAWO di’ekomelo dia lo Bible, Yeso akalake ate: “Ee, layuya esadi!” Ɔpɔstɔlɔ ande Joani akakadimola ate: “Ayali osoku! Khumadiondjo Jesu, uyi!” Ɔpɔstɔlɔ ɔsɔ kombidja tamu ɔnɛ Yeso hoya. Joani aki l’atei w’apɔstɔlɔ wakambola Yeso ɔnɛ: ‘Etena kakɔna kayoyala akambo asɔ, ndo ayoyala djembetelo yakɔna ya wôngelo ayɛ [lo Grɛkɛ, pa·rou·siʹa] ndo y’ekomelo ka dikongɛ nɛ di’akambo?’ Lo mɛtɛ, Joani akalongamɛka wôngelo waki Yeso l’eshikikelo tshɛ.—Enyelo 22:20; Mateu 24:3.
2. Ɛtɛmwɛlɔ efula atshawɔ lo kɛnɛ kendana la wôngelo wa Yeso?
2 Tɔtɔi toto mbele la mbetawɔ ka ngasɔ ɛlɔ kɛnɛ. Ɛtɛmwɛlɔ efula wekɔ lo ndakanya dikambo dia ‘oyelo,’ wa Yeso, koko l’atei w’anto awɔ, amɔtshi ato mbalongamɛ oyelo ɔsɔ. Vɔ sɛnaka oko alangawɔ. Dibuku The Parousia in the New Testament mbutaka ɔnɛ: “Elongamelo ka Parousia kekɔ paka la shɛngiya ya tshitshɛ tsho lo nsɛnɔ, lo tokanyi ndo l’olimu w’ase ɛtɛmwɛlɔ. . . . Ohetoheto w’efula wahomba monga l’ɛtɛmwɛlɔ dia ndjatshumuya ndo sambisha evanjiliɔ ambɔla yɔ, kana kema nto.” Koko, aha le anto tshɛ!
3. (a) Woho akɔna wɔsa Akristo mɛtɛ pa·rou·siʹa? (b) Lo yoho ya lânde, kakɔna kangaso sɛdingola kakianɛ?
3 Ambeki wa mɛtɛ wa Yeso wekɔ lo kongɛ l’asolo walomɔlomɔ ekomelo ka dikongɛ nɛ di’akambo dia kɔlɔ. Etena kɛnɛ keso lo kongɛ ekomelo kakɔ la kɔlamelo tshɛ, sho pombaka ndjalɔngɔsɔla l’akambo tshɛ wendana la wôngelo wa Yeso ndo nsɛnaka lo yoho yɔtɔnɛ la wôngelo akɔ. Kɛsɔ mbayotokimanyiya dia sho ‘tetemala polo l’ekomelo ndo shimbamela.’ (Mateu 24:13) Lo kɛnɛ kendana la pɔlɔfɛsi ka lo Mateu tshapita 24 la 25, Yeso akasha dako di’ɔlɔlɔ diakokaso kamba ladiɔ, dia kondja wahɔ wa pondjo. Tshapita 25 yekɔ la wɛla wele ondo wɛ mbeyaka, mbidja ndo wɔnɛ w’esekaseka dikumi wa dimuma (wa totshundju la wa dinginya) ndo wɛla wa talata. (Mateu 25:1-30) Ngande wakokaso kondja wahɔ oma lo wɛla ɛsɔ na?
Tonge la Yambalo, oko Esekaseka Etanu wa Dimuma!
4. Naa dikambo dioleki ohomba lo wɛla w’esekaseka wa dimuma?
4 Ondo ayonga dimɛna wɛ nyomadia wɛla w’esekaseka wa dimuma, wele lo Mateu 25:1-13. Dikambo sɔ diakete lo diwala dimɔtshi dia woke dia la Juda, lɛnɛ ele otshuki ambotshɔ le okilande dia tɔsa wadɛnde oya lakande (kana oya lo luudu la she). Lɔkɛndɔ la ngasɔ tongaka ndo l’edimba ndo l’eyaka, ndo hateyamaka shikaa etena kahombawɔ koma. Lo wɛla ɔsɔ, esekaseka dikumi wa dimuma wekɔ lo kongɛ oyelo w’otshuki polo ndo la kati k’otsho. Esekaseka etanu wa dinginya kombela esɔ efula dikambo di’atala awɔ ko wakayotombaka dia tosomba esɔ kekina. Etanu wa totshundju wakaye l’esɔ efula woho wa vɔ ndjolodjaka atala etena kewɔ lo kongɛ otshuki naka esɔ kamboshila. Paka esekaseka etanu ɛsɔ mbaki suke lam’akaye otshuki. Omalɔkɔ, paka vɔ ato mbakakondja lotshungɔ la mbɔtɔ lo dambo. Lam’akakawola esekaseka etanu wa dinginya, vɔ wakayombaka difu dia womamba ndo kokondja lutshungɔ la mbɔtɔ.
5. Avɛsa akɔna watongamwɛ osase lo kɛnɛ kendana la kitshimudi ya wɛla w’esekaseka wa dimuma?
5 Akambo efula wa lo wɛla ɔnɛ kokaka mbɔsama lo yoho ya didjidji. Oko ɛnyɛlɔ, Afundelo tɛkɛtaka dia Yeso oko otshuki. (Joani 3:28-30) Yeso akayɔshi ndamɛ oko ɔnaki nkumekanga ɔnɛ lakawalɔngɔsɔlɛka dambo. (Mateu 22:1-14) Ndo Bible mbɛdikaka Kristo la omi. (Efeso 5:23) Dihole tshɛ diatɛkɛtawɔ di’Akristo w’akitami oko ‘wadi’ a Kristo, wɛla hadimola wadi. (Joani 3:29; Enyelo 19:7; 21:2, 9) Koko, vɔ tɛkɛtaka di’esekaseka dikumi wa dimuma ndo akitami mbɔsamaka ahole tshɛ oko osekaseka wambolakema dia tshukama la Kristo.—2 Koreto 11:2.a
6. Dako diakɔna diakasha Yeso lam’akandakumiya la wɛla w’esekaseka wa dimuma?
6 Lâdiko di’elembetshiyelo ndo wakotshawɔ pɔlɔfɛsi, ekɔ nto awui akina w’ohomba efula wakokaso mbeka lo wɛla ɔsɔ. Oko ɛnyɛlɔ, Yeso akakumiya wɛla akɔ l’ɛtɛkɛta ɛnɛ: ‘Nyosungukalake nɛ dia hanyeye lushi kânga wonya.’ Omalɔkɔ, wɛla ɔsɔ mɛnyaka ohomba wa sho tshɛ monga la yambalo, ndo mangemɛka etena kayanga komɛ dikongɛ nɛ di’akambo. Ekomelo kɛsɔ kayoya mɛtɛ, kânga mbahateye lushi shikaa. Lo dikambo sɔ, tênde dionga diaki la elui ehende wa esekaseka wa dimuma.
7. Lo yoho yakɔna yakɛnya esekaseka etanu wa dimuma wa lo wɛla ɔnɛ wekɔ dinginya na?
7 Yeso akate ate: ‘Atanu l’atei awɔ waki dinginya.’ Onde nde akate ngasɔ nɛ dia vɔ kombetawɔ ɔnɛ otshuki ayoya? Onde vɔ wakayasha l’ɛngɛnɔngɛnɔ awɔ? Ko kana onde vɔ wakakesama? Kema aha ɔsɔku. Yeso akate ate esekaseka etanu ɛsɔ ‘wakatshu dia tohomana l’otshuki.’ Vɔ wakeyaka ɔnɛ nde ekɔ lo ndjaye, ndo vɔ wakakombola mbokongɛ, kana ndjosala la nde ‘dambo dia diwala.’ Ko onde vɔ wakayalɔngɔsɔla dimɛna oka? Vɔ wakokongɛ tshanda mɔtshi, mbut’ate polo la ‘midi k’otsho,’ koko vɔ kondjalɔngɔsɔla dia kongɛ wonya tshɛ wayondoya—oyadi kɔ̂lɔmɔ kana l’ɔkɔngɔ w’efula.
8. Ko ngande wakɛnya esekaseka ekina etanu wa dimuma wa lo wɛla ɔnɛ wekɔ tɔkɛsɔ na?
8 Atanu akina, wanɛ wakelɛ Yeso ɔnɛ tɔkɛsɔ, wakɛmbɛ ndo vɔ lawɔ atala wahɛta, dia ndjokongɛ oyelo w’otshuki. Vɔ lawɔ wakahombe mbokongɛ, koko, vɔ waki mɛtɛ ‘tɔkɛsɔ.’ Tshɛkɛta ya lo Grɛkɛ yokadimwami ɔnɛ ‘kɛsɔ’ kokaka mbɔtɔnganɛ nto la monga la “yewo, la yambalo, ndo l’ekanelo ka lomba ka dimɛna.” Esekaseka etanu ɛsɔ wakɛnya ɔnɛ wekɔ tɔkɛsɔ lo momba yema y’esɔ dia ndjolondjaka atala awɔ, naka tɔ kamboshila. Omalɔkɔ, lam’ele wakakongɛka otshuki, vɔ konanga kaha esɔ kawɔ. Vɔ kotsha kɔlɔ lo woho wakawonge la yambalo ya ngasɔ. Vɔ kotapɔ ndoko dihole ndo wakayalɔngɔsɔla dimɛna dikambo di’oyelo w’otshuki. Wanɛ ‘waki suke, wakɔtɔ la nde lo dambo dia diwala; ko lokuke lakadihama.’
9, 10. Na dikambo diahombaso kimɛ lo wɛla ɔsɔ w’esekaseka wa dimuma ndo naa wembola wahombaso ndjambola?
9 Lanɛ, Yeso kombetshaka anto lɔkɛwɔ lahomba monga awɔ lo dambo dia diwala, kana mbalakanya woho wahombawɔ mbishana w’eshasha. Kɛnɛ kakandalange mbuta tɔ kɛnɛ: ‘Nyosungukale, nɛ dia hanyeye lushi kânga wonya.’ Yambola wate: ‘Onde lâmbalɛkɔ mɛtɛ lo kɛnɛ kendana la wôngelo waki Yeso?’ Sho mbetawɔka dia wonya ɔnɛ Yeso ôlɛ l’olongo, ko ngande wayashaso etena keyaso ɔnɛ mɛtɛ ‘kem’edja nto Ɔn’onto anga ndja lo wange wa l’olongo la nkudu ndo la lotombo tshɛ’ na? (Mateu 24:30) Lam’akaye esekaseka wa dimuma dia ndjohomana l’otshuki, lâsɔ ko nde atonge suke la ndja, koko, paka ‘midi k’otsho,’ aya kâkoka mbakandayongaka suke la ndja. Woho akɔ wamɛ mbele, oyelo w’Ɔn’onto dia ndjolanya dikongɛ nɛ di’akambo dia kɔlɔ diamboleka sukana oleki l’etena kakatamɛ nongamɛ oyelo ande. (Romo 13:11-14) Onde tatetemalakɔ mambâlɛ, djekoleko oko wamboleka sukana etena kakɔ?
10 Dia kitanyiya didjango diata ɔnɛ ‘nyotetemale sungukala,’ pombaka tetemala monga la yambalo. Esɔ k’esekaseka etanu akashile ko vɔ ndjotomba dia tosomba kekina. Ɛlɔ kɛnɛ, Okristo mbeyaka ndjekɔ lomba woho akɔ wamɛ, ko ndjotshika ndjalɔngɔsɔla dimɛna lo kɛnɛ kendana l’oyelo wa diambo waki Yeso. Dikambo sɔ diakakomɛ Akristo amɔtshi wa l’eleko ka ntondo. Ndo diɔ kokaka komɛ amɔtshi ɛlɔ kɛnɛ. Ɔnkɔnɛ, toyambole shamɛ ɔnɛ: ‘Onde diɔ diambokomɛ?’—1 Tesalonika 5:6-8; Heberu 2:1; 3:12; 12:3; Enyelo 16:15.
Tônge l’Etete nɛ dia Ekomelo Kaya Suke
11. Naa wɛla wakayoshaka Yeso, ndo wɛla akɔna wafɔna la wɔ?
11 Lo wɛla ande wayela, Yeso kɔkɔmiyaka ambeki ande dia monga tsho la yambalo. L’ɔkɔngɔ wa nde tɛkɛta di’esekaseka wa totshundju la wa dinginya, nde akayɔkɔndɔla wɛla wa talata. (Adia Mateu 25:14-30.) L’akambo efula, wɛla ɔsɔ fɔnaka la wɛla ande wa ntondo wa mina, wɛla wakasha Yeso nɛ dia anto efula ‘wakakanaka ɔnɛ diolelo diaki Nzambi diayanga mbolɛ kakianɛ.’—Luka 19:11-27.
12. Dikambo diakɔna di’ohomba efula diakokaso kimɛ oma lo wɛla wa talata?
12 Lo wɛla wa talata, Yeso akatɛkɛta dia pami kaki, la ntondo ka nde ntshɔ otsha lo wodja w’etale, akete ekambi ande esato. Nde akasha ɔmɔtshi talata tshanu, okina hiende, ndo w’ekomelo ɔtɔi—nde akawasha ‘onto l’onto lo ndjela akoka ande.’ Ondo, ɔsɔ aki talata ka paunyi, aki oko difuto di’ɛnɔnyi 14 w’olimu w’okambi wa dikambɔ, ɔsɔ mɛtɛ aki falanga efula! Lam’akakawola pami kɛsɔ, nde akakoya l’ekambi ande dia mbeya kɛnɛ kakawatshe lo ‘etena k’otale’ kakandɛngɔla. Ekambi ehende wa ntondo wakafundia kɛnɛ kakawalongola l’ahende. Nde akawatɛ ate: ‘nyakakambe dimɛna,’ ndo akâlake dia mbasha ɛkɛndɛ wa weke, ndo akakumiya ate: ‘Nyɔtɔ l’ɔngɛnɔngɛnɔ wa nkumɛnyu.’ Lo mbuta ɔnɛ nkumɛnde ekɔ kanga ngala, ɔnɛ lakalongola talata ɔtɔi kokamba lalɔ olimu dia kondja wahɔ ɔmɔtshi. Nde akashɛ falanga shɔ, kôtodja kânga lo bankɛ dia ndjokondja wahɔ ɔmɔtshi. Owandji ande akawete ɔnɛ ‘okambi wa kɔlɔ ndo wa nɛndɛ’ nɛ dia nde kondjakiyanyaka dia wahɔ w’owandji ande. Ɔnkɔnɛ, wakɔhɔtɔla lotalata, wakotondja l’andja lɛnɛ ‘akinde la dia tolela ndo kakatanya wanyu.’
13. Lo yoho yakɔna yaki Yeso oko owandji wa lo wɛla ɔsɔ na?
13 Sho kokaka mpotɔ wɛla ɔsɔ nto lo yoho ya didjidji. Oko ɛnyɛlɔ, Yeso ɔnɛ lakɔsama oko pami kɛsɔ kakatshu lo wodja w’etale, akahombe tshika ambeki ande ko ntshɔ l’olongo, ko tokongɛ edja ndo ambolongola lowandji oko nkumekanga.b (Osambu 110:1-4; Etsha 2:34-36; Romo 8:34; Heberu 10:12, 13) Lanɛ nto, sho tshɛ kokaka kondja wetshelo wa woke wahombaso kamba lawɔ lo nsɛnɔ yaso. Naa wetshelo akɔ na?
14. Wɛla wa talata mbikaka epole ɔsɛkɛ l’ohomba w’ɛngɔ kakɔna?
14 Oyadi elongamelo kaso ele ka monga la lɔsɛnɔ laha l’ekomelo l’olongo kana monga la lɔsɛnɔ la pondjo la nkɛtɛ mbele laso, wɛla wa Yeso mɛnyaka ɔnɛ sho pombaka ndjasha tshɛ l’elimu w’Akristo. Lo mɛtɛ, kɛnɛ katetsha wɛla ɔsɔ lo tshena pe ele sho pombaka monga l’etete. Apɔstɔlɔ wakasha ɛnyɛlɔ lo dikambo sɔ oma ko Pɛntɛkɔsta ka l’ɔnɔnyi 33 T.D. polo nd’ɛlɔ. Sho mbadiaka ɔnɛ: “[Petero] akawatela aui akina efula, akâlaki ati: Nyuyashimbeli uma lu lolonga la kolo lone!” (Etsha 2:40-42) Ande wahɔ w’efula wakandakondja oma lo weolo wakandadje lee! Ndo wanɛ wakayosanganaka l’apɔstɔlɔ l’olimu w’Akristo w’esambishelo mbaki l’etete, ndo lokumu l’ɔlɔlɔ ‘lakahame l’andja w’otondo.’—Kolosai 1:3-6, 23; 1 Koreto 3:5-9.
15. Lo yoho yakɔna ya lânde yahombaso kamba l’awui w’ohomba wa lo wɛla wa talata?
15 Ohɔ di’awui watama suke la wɛla ɔsɔ, ele pɔlɔfɛsi kendana la wôngelo wa Yeso. Tekɔ l’eshikikelo k’efula ɔnɛ pa·rou·siʹa kaki Yeso kekɔ lo tatetemala ndo kem’edja tɔ kayanga koma lo kondoko yatɔ. Ohɔ losambi lakɛnya Yeso lele lam’asa ‘ekomelo’ la olimu wahomba Akristo kamba: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.” (Mateu 24:14) Lo ndjela dikambo sɔ, okambi a woho akɔna we so? Yambola wate: ‘Onde ekɔ ɔkɔkɔ ɔmɔtshi wakokami mbisha wɛnya ɔnɛ dimi lekɔ oko okambi wakashɛ kɛnɛ kakawawosha, ondo lo ndjasha paka l’akambo ande hita? Ko onde mɛnamaka dia lekɔ oko ekambi w’ɔlɔlɔ ndo wa kɔlamelo? Onde dimi ndjashaka tshɛ dia fudia wahɔ w’Owandji ami lo diaaso tshɛ diakondjami?’
Tônge la Yambalo ndo l’Etete lo Nshi ya Wôngelo Ande
16. Kakɔna kamboyeka lo wɛla ehende wambotɔsɛdingola ɛnɛ?
16 Eelo, lâdiko dia sho mpotɔ awui asɔ lo yoho ya didjidji ndo ya pɔlɔfɛsi, wɛla ɛsɔ ehende tokeketshaka lo yoho yɛnama oma l’ɛtɛkɛta wakate Yeso ndamɛ. Losango lande lɔ lɔnɛ: Nyonge la yambalo, l’etete, djekoleko etena kɛnɛ kambɛnama djembetelo ya pa·rou·siʹa kaki Yeso. Onde mɛtɛ tâmbalɛkɔ ndo tekɔ l’etete?
17, 18. Kakɔna kakatolake Jakɔba lo kɛnɛ kendana la wôngelo wa Yeso?
17 Jakɔba y’ɔnango Yeso komonga l’Okongo w’Ewele dia mboka pɔlɔfɛsi kakinde; koko, l’ɔkɔngɔ diko, nde akayokieyaka ndo nde akayoshihodiaka ohomba atɔ. Nde akafunde ate: “Anyasu, nyutetemali, edja ndu lam’ayuya Khumadiondjo. Enda, ukambi ekambo atukongelaka dinela di’ololo dia diango diakandune lu kete. Ndi atutetemalaka edja ndu lam’ayolo mvula ka ntundu la ka l’okongo. Ndu nyu nyutetemali, nyushikike etema anyu, ne dia eyelu ka Khumadiondjo aya suke.”—Jakoba 5:7, 8. (Sho mbɛnganyisha alɛta ango.)
18 Lo mbashikikɛ ɔnɛ Nzambi ayolombosha wanɛ waheye kamba l’ekundji awɔ, Jakɔba ambɔkɔkɔmiya Akristo dia monga la solo dia lotutsha etena kɛnɛ kakongɛwɔ dia Jehowa mbekɛ lonya lande. Okristo waha la solo dia lotutsha kokaka ndjɛna di’oko nde ekɔ la lotshungɔ la nɔngɔsɔla kɔlɔ kambotshama. Aha ngasɔ mbahombaso ntsha nɛ dia etena k’elombwelo kekɔ lo ndjaye mɛtɛ. Ɛnyɛlɔ k’okambi wa dikambɔ mɛnyaka dikambo sɔ, oko wakadilembetshiya Jakɔba.
19. Naa woho wa solo dia lotutsha diakahombe monga l’okambi a dikambɔ wa l’Isariyɛlɛ?
19 Ose Isariyɛlɛ lele okambi wa dikambɔ ndo lakonɛ lɔtɔngɔ akahombaka konga, ntondo dia lɔ tomba, l’ɔkɔngɔ diko lɔ ndjola ko l’ekomelo nde ndjona. (Luka 8:5-8; Joani 4:35) Fɔnyamaka dia lo ngɔndɔ shɔ yakinde lo kongɛ, nde akakoke monga la yema y’ekiyanu. Onde mvula yâlɔhɔki yayɔlɔ ndo tondja diangɔ diakonɛma? Ko kayotota di’amvula wayɔlɔka l’ɔkɔngɔ? Onde tomombolenge kana mvula ka ngembe kokaka ndjodiaka tomba tomba diakɔ? (Ɛdika la Joele 1:4; 2:23-25.) Koko, ladiko dia lâsɔ, okambi a dikambɔ w’Ose Isariyɛlɛ akakokaka ndjaɛkɛ le Jehowa ndo lo nshi yakandashikikɛ dia ndɔsha avula. (Euhwelu k’Elembe 11:14; Jeremiya 5:24) Solo dia lotutsha diele l’okambi a dikambɔ kokaka pamia kana keketsha elongamelo kande. La mbetawɔ tshɛ, nde mbeyaka dia kɛnɛ kende lo kongɛ kayoya. Tɔ mɛtɛ kayokotshama!
20. Ngande wakokaso mɛnya solo dia lotutsha lo ndjela dako dia Jakɔba?
20 Kânga mbele okambi a dikambɔ kokaka mbeya etena kayonga dinela, Akristo wa l’eleko ka ntondo kôkoka kamba akumi dia mbeya lushi layonga wôngelo wa Yeso. Vɔ wakayeyaka mɛtɛ ɔnɛ wôngelo akɔ wayonga. Jakɔba akafunde ate: ‘wôngelo [lo Grɛkɛ, pa·rou·siʹa] wa Nkumadiɔndjɔ waya suke.’ L’etena kakafunde Jakɔba ɛtɛkɛta ɛnɛ, ko djembetelo ya wôngelo wa Kristo yataleke mɛnama l’andja w’otondo. Koko ɛlɔ kɛnɛ yɔ yambɛnama! Ko lâsɔ, ngande wahombaso ndjaoka l’etena kɛnɛ? Djembetelo shɔ yambɛnama ɛlɔ kɛnɛ. Tekɔ lo ndjiɛna. Sho kokaka mbuta l’eshikikelo tshɛ ɔnɛ ‘Tambɛna nganɛ wakotshama djembetelo.’ Sho kokaka mbuta l’eshikikelo tshɛ ɔnɛ: ‘Wôngelo wa Nkumadiondjɔ wambokotshama, ndo waya kakoma lo kondoko.’
21. Kakɔna kahombaso ndjashikikɛ dia ntsha?
21 Lam’ele wôngelo wa Nkumadiɔndjɔ waya suke, tekɔ l’ɛkɔkɔ w’eshika wa mbidja wetshelo wambotokondja oma lo wɛla ɛsɔ ehende wa Yeso l’etema aso ndo kamba lawɔ. Nde akate ate: ‘Nyosungukale, nɛ dia hanyeye lushi kânga wonya.’ (Mateu 25:13) Etena ka monga l’ohetoheto l’olimu aso w’Akristo tɔ kɛnɛ. Lo lɔsɛnɔ laso la lushi la lushi, tɛnya dia tamboshihodia kanyi ya Yeso. Nyɛsɔ tônge la yambalo! Ndo tônge l’etete!
[Footnotes]
a Lo dikambo di’awui efula wakatama dia wɛla ɔsɔ, enda lo Le Royaume millénaire de Dieu s’est approché, lɛkɛ 169-211, dibuku diakatondja Watchtower Bible and Tract Society of New York, Inc.
b Enda lo dibuku Le Royaume millénaire de Dieu s’est approché, lɛkɛ 212-56.
[Caption]
[Footnotes]
[Caption]
[Questions]
[Caption on page 31]
[Caption on page 31]
Wetshelo akɔna wamboyokondja oma lo wɛla w’esekaseka wa dimuma ndo wa talata na?
[Caption on page 31]
[Review on page 31]
Onde Wɛ Akohɔ?
◻ Naa dikambo dioleki ohomba diamboyeka oma lo wɛla w’esekaseka wa totshundju ndo wa dinginya?
◻ Lo tshimbo ya wɛla wa talata, naa dako di’ohomba efula diambokosha Yeso?
◻ Lo yoho yakɔna yendana lotutsha layɛ la pa·rou·siʹa oko lotutsha laki l’okambi a dikambɔ wa l’Isariyɛlɛ?
◻ Lande na kele etena kɛnɛ amboleka etena ka wolo efula lo lɔsɛnɔ na?