Tokimanyiya anto dia vɔ sukana oya le Jehowa
“Nduku untu laya le Papa, tshikima uma le mi.” —JOANI 14:6.
1. Didjango diakɔna diakayoshaka Yeso ambeki ande l’ɔkɔngɔ w’eolwelo kande, ndo etombelo akɔna wamboyala oma lo woho ɔnɛ wadikitanyiya Ɛmɛnyi wa Jehowa?
YESO KRISTO akasha ambeki ande didjango dia ‘mbetɛ anto wa wedja tshɛ ambeki, mbabatiza lo lokombo la Papa ndo l’Ɔna ndo la nyuma k’ekila.’ (Mateu 28:19) Lo ɛnɔnyi dikumi wetshi ɛnɛ, Ɛmɛnyi wa Jehowa wakakimanyiya anto ndekana miliyɔ shato dia vɔ ndja le Nzambi, ko l’ɔkɔngɔ wa tshanda mɔtshi, wakayâbatizaka dia mɛnya woho wambowoyâkimɔ dia ntsha lolango la Nzambi. Tekɔ mɛtɛ l’ɔngɛnɔngɛnɔ dia mbakimanyiya dia vɔ sukana le Nzambi!—Jakoba 4:8.
2. Kakɔna katomba kânga mbabatizama eyoyo efula?
2 Koko, lo wedja ɛmɔtshi wambobatizama ambeki efula w’eyoyo, ehamelo hɔtɔnganɛ la lofulo l’apandjudi wa Diolelo. Eelo mɛtɛ, sho pombaka mbadiaka ndo wanɛ wakavu, nɛ dia yɛdikɔ ya wanɛ wavɔ l’ɔnɔnyi yekɔ oko onto ɔtɔi lo lokama. Koko, lo ɛnɔnyi engana wetshi, anto kambe tsho wakatakɔ mboka l’ɔtɛ w’awui amɔtshi. Lande na na? Lo sawo nɛ la nɛ diayela, tayenda woho wakotɔma anto oya le Jehowa ndo ɛkɔkɔ ɛmɔtshi wayɔkɔka anto amɔtshi.
Oyango w’esambishelo kaso
3. (a) Woho akɔna wafɔna olimu wakalongola ambeki wa Kristo l’olimu w’ondjelo watawɔ l’Enyelo 14:6? (b) Naa yoho y’ɔlɔlɔ efula ya memula nsaki k’anto oya lo losango la Diolelo, ko ekakatanu akɔna watomba?
3 Lo ‘etena kɛnɛ k’ekomelo,’ ambeki wa Yeso wekɔ l’ɔkɛndɛ wa dianganya ‘ewo ka mɛtɛ’ kendana la “lukumu l’ololo lone la diulelu.” (Danyele 12:4; Mateu 24:14) Olimu awɔ fɔnaka la wɔnɛ w’ondjelo “[w]aki la lukumu l’ololo la pundju, lakandatelaka wa la kete, ndu wedja tshe ndu wauhu tshe ndu eteketa tshe, ndu antu tshe.” (Enyelo 14:6) L’andja ɔnɛ wambolola tɔɔ l’awui a weho la weho, esangɔ efula yoho yoleki dimɛna dia kotola yambalo y’anto oya lo Diolelo diaki Nzambi ele mbakimanyiya dia vɔ sukana le Jehowa lo mbaewoya elongamelo ka lɔsɛnɔ la pondjo lo nkɛtɛ kayoyala paradiso. Kânga mbele dui sɔ mbokɛmaka, wanɛ waya l’ɔnɔngɔ w’ekambi wa Nzambi paka l’oyango wa mbɔtɔ lo Paradiso hawoshikikɛ ekolo awɔ lo mboka ka mpika k’otsha lo lɔsɛnɔ.—Mateu 7:13, 14.
4. Lo ndjela Yeso la ondjelo watafumbɔ l’atei w’olongo, naa oyango w’olimu aso w’esambishelo?
4 Yeso akate ate: “Lumu la pundju lone, eli [“wêke dia kêya, wɛ Nzambi ɔtɔi ka mɛtɛ,” NW] la Jesu Kristu, lakayatumi.” (Joani 17:3) Ondjelo watafumbɔ l’atei w’olongo ekɔ lo tewoya ‘lokumu l’ɔlɔlɔ la pondjo’ ndo ekɔ lo tatɛ wanɛ wodjashi lo nkɛtɛ ɔnɛ: ‘Nyoke Nzambi wɔma ndo nyôtombole, nɛ dia wonya w’elombwelo kande wambokoka, ndo nyɔtɛmɔlɛ Ɔnɛ lakatshe olongo la nkɛtɛ la ndjale ndo tɔkɔkɔ t’ashi.’ (Enyelo 14:7) Lâsɔ, oyango woleki woke w’esambishelo kaso ka lokumu l’ɔlɔlɔ ele kimanyiya anto dia vɔ sukana suke suke la Jehowa oma lo tshimbo ya Kristo Yeso.
Ɔkɛndɛ aso l’olimu wa Jehowa
5. Ɛtɛkɛta akɔna wakate Paulo la Yeso wɛnya ɔnɛ olimu wa Jehowa mbakambaso koko aha waso?
5 Lo mukanda wakandafundɛ asekande Akristo w’akitami, ɔpɔstɔlɔ Paulo ekɔ lo tɛkɛta dia ‘olimu wa diokanyelo’ ndo ekɔ lo mbuta ɔnɛ Nzambi ekɔ lo mbokana l’anto l’ekimanyielo k’olambo w’etshungwelo wakakimɔ Yeso Kristo. Paulo ate ‘ekɔ oko Nzambi tasɛngasɛngaka anto lo tshimbo yaso,’ ndo ‘tekɔ lo tasɛngasɛnga anto lo dihole dia Kristo shate: Nyokane la Nzambi.’ Kema ɔsɔ kanyi yasalanganya ndo etema aso? Oyadi akitami mbeso, ‘enyimpala wele lo dihole dia Kristo’ kana atomami mbeso, wanɛ wele l’elongamelo ka sɛna laa nkɛtɛ, hatohombe mbohɛ pondjo ɔnɛ olimu ɔnɛ kema waso, koko wa Jehowa. (2 Koreto 5:18-20) Nzambi mɛtɛ mbakotola anto ndo mbalakanya wanɛ waya le Kristo. Yeso akate ate: “Nduku untu leya ndja le mi, tshikima Papa lakantumi kûkutudi. Ku dimi layuwulula lushi l’ekumelu. Ambufundama lu afundelu w’amvutshi ati: Tshe wayetshama uma le [Jehowa]. Untu tshe latukaka ndu lateyaka aui uma le Papa, ndi atuyakaka le mi.”—Joani 6:44, 45.
6. Ngande wambotatɛ Jehowa sutshasutsha wedja la ntondo k’osutshesutshelo a woke, ndo waa na waya dia ndjoyanga eshamelo ka lo “luudu” lande l’ɔtɛmwɛlɔ l’etena kakɔ kâmɛ?
6 Ngande wakotola Jehowa anto ndo wâdihwɛnde ‘lokuke la mbetawɔ’ lo nshi y’ekomelo nyɛ na? (Etsha 14:27; 2 Timote 3:1) Yoho yoleki woke yatshande ele lo toma Ɛmɛnyi ande dia vɔ mbewoya nsango yande ya panda ndo ya dilanya diayangande mbisha andja ɔnɛ wa kɔlɔ. (Isaya 43:12; 61:1, 2) Esambishelo kɛsɔ ka l’andja w’otondo kekɔ lo didinya wedja—djembetelo y’elombwelo kaya suke la ndja, dia ndjɔwɛdjawɛdja wedja. L’etena kakɔ kɛnɛ, anto wele ‘oshinga wolo’ lo washo wa Nzambi wekɔ lo tondjama oma l’andja ɔnɛ ko wekɔ lo mombama lo ‘luudu’ l’ɔtɛmwɛlɔ wa mɛtɛ. Lo yoho shɔ mbakotsha Jehowa ɛtɛkɛta ande wa prɔfɛsiya wofundami lo Hangai ɔnɛ: “Dimi layusutshasutsha wedja tshe dia diango di’ushinga a wulu dia wedja tshe ndja. Ku dimi layuludia luudu lone la lutumbu.”—Hangai 2:6, 7; Enyelo 7:9, 15.
7. Ngande wadihola Jehowa etema w’anto ndo wakotolande anto oya le nde ndo oya le Ɔnande?
7 Jehowa ekɔ lo ndjihola etema w’anto asɔ wawoka wɔma, “diangɔ dioleki amɛna dia wedja tshɛ,” dia vɔ mbeya ‘mbidja yimba lo awui watɛkɛta’ Ɛmɛnyi ande. (Hangai 2:7, Jewish Publication Society; Etsha 16:14) Oko akandasalaka l’eleko ka ntondo, Jehowa kambaka l’andjelo tena dimɔtshi dia nɔmbɔla Ɛmɛnyi ande otsha le anto w’etema ɔlɔlɔ, wanɛ wôlelɛ dia nde mbakimanyiya. (Etsha 8:26-31) Etena keka anto awui wendana la tɛdikɔ t’amɛna efula takawaɔsɛ Nzambi lo tshimbo y’Ɔnande, Yeso Kristo, vɔ kotɔmaka oya le Jehowa oma lo ngandji kande. (1 Joani 4:9, 10) Eelo mɛtɛ, Nzambi kotolaka anto oya le nde ndo oya le Ɔnande oma ‘l’ɔlɔlɔ ande w’otema,’ kana “ngandji ka kɔlamelo.”—Jeremiya 31:3, diewoyelo dia l’ɛse ka dikatshi (NW).
Jehowa ekɔ lo kotola waa na?
8. Jehowa kotolaka anto a woho akɔna?
8 Jehowa kotolaka wanɛ wôyanga oya le nde ndo oya le Ɔnande. (Etsha 17:27) L’atei w’anto asɔ mbele ndo wanɛ ‘wakuma akumu ndo walela l’ɔtɛ w’akambo tshɛ wa wɔnɔnyi watshama’ l’atei a Lokristokristo ndo l’andja w’otondo. (Ezekiyele 9:4) Vɔ ‘mbeyaka dia vɔ wekɔ ase wola lo nyuma.’ (Mateu 5:3) Vɔ mɛtɛ wekɔ ‘akanga a ndjâkitshakitsha wa laa nkɛtɛ,’ wanɛ wayodjasɛ pondjo pondjo lo paradiso ka laa nkɛtɛ.—Zefaniya 2:3.
9. Ngande wakoka Jehowa mɛna kana anto ‘wamboyalɔngɔsɔla dia lɔsɛnɔ la pondjo,’ ndo ngande wâkotolande?
9 Jehowa kokaka mbadia kɛnɛ kele l’otema w’onto. Nkumekanga Davidi akatɛ ɔnande Sɔlɔmɔna ate: “[Jehowa] atukembaka etema tshe, atulimbitelaka dikanyiakanyia dia tukanyi. Naka we ayûyanga, ndi ayuyakimo dia we mbutana.” (1 Ekondo 28:9) Lo ndjela woho wele otema w’onto la yimba yande, kana dionga diande dioleki, Jehowa kokaka mɛna kana onto akɔ ayetawɔ tɛdikɔ takandɔshi dia dimanyiya anto pɛkato yawɔ ndo mbasha elongamelo ka lɔsɛnɔ la pondjo l’andja w’oyoyo waki Nzambi. (2 Petero 3:13) L’ekimanyielo k’Ɔtɛkɛta ande wasambishama ndo walakanyema oma le Ɛmɛnyi ande, Jehowa ekɔ lo kotola ‘wanɛ tshɛ wamboyalɔngɔsɔla dia lɔsɛnɔ la pondjo,’ oya le nde ndo oya le Ɔnande, ndo anto asɔ ‘ndjoyalaka ambetawudi.’—Etsha 13:48.
10. Kakɔna kɛnya ɔnɛ woho wakotola Jehowa anto amɔtshi ko tshikaka akina hɛnya ɔnɛ nde ambotakongɛki nsɛnɔ y’amɔtshi la ntondo?
10 Onde woho wakotola Jehowa anto amɔtshi ko tshikaka akina mɛnyaka ɔnɛ nde ambotakongɛki nsɛnɔ y’anto amɔtshi la ntondo? Kema! Okotwamelo w’anto oma le Nzambi nemanɛka la kɛnɛ kakombola otema w’onto l’onto. Nde nɛmiyaka lotshungɔ lawɔ l’onto ntsha kɛnɛ kalangande. Jehowa ambokitsha anto nshi nyɛ la ntondo ka mboka hiende dia vɔ nsɔna kɛmɔtshi, oko ɔnkɔnɛ wakandasale l’Ase Isariyɛlɛ ambeta oko ɛnɔnyi 3000, lam’akate Mɔsɛ ate: “Dimi lambukitsha lumu la ololo, nyoi la kolo la ntundu kanyu elo. . . . Dimi lambeta ulungu la kete emenyi lu dikambu dianyu elo nti: Dimi lambukitsha lumu la nyoi, otshoko la mananu la ntundu kanyu. Okone nyosonole lumu, dia nyu la an’anyu ndjala la lulumbi, lu mbuka [Jehowa Nzambi kanyu], ngandji, lu nkitanyia diui diandi ndu lu mbumamema. Ne dia uma lu dikambu ne, mbayunyukundja lumu la lulumbi.”—Euhwelu k’Elembe 30:15-20.
11. Ngande wakahombe Ase Isariyɛlɛ sɔnɔla lɔsɛnɔ?
11 Lembetɛ dia Ase Isariyɛlɛ wakahombe sɔna lɔsɛnɔ ‘lo mbokaka Jehowa ngandji, lo mpokamɛka doyi diande, ndo lo mbomamemaka.’ Ɛtɛkɛta ɛsɔ wakatɛkɛtama lâsɔ ko Ase Isariyɛlɛ watɔshi Nkɛtɛ ya Daka. Vɔ wakemala l’Oswe wa Mɔaba, wayalɔngɔsɔla dia tenyanya Ɔkɛdi wa Jɔrɔdana ko mbɔtɔ lo Kanana. Kânga mbele komonga ndoko kɔlɔ vɔ mbidja tokanyi tawɔ lo nkɛtɛ ‘k’ɔlɔlɔ ndo ka woke,’ nkɛtɛ ‘koludi l’awɛlɛ ndo l’osanga,’ kakiwɔ suke la kondja, ekotshamelo k’awui tshɛ wakawakombolaka akalemanɛka la vɔ mboka Jehowa ngandji, mpokamɛ doyi diande ndo mbomamema. (Etumbelu 3:8) Mɔsɛ akɛnya dikambo sɔ hwe lam’akandate ate: ‘Naka nyayohokamɛka adjango wa Jehowa Nzambi kanyu, wanyodjangelami ɛlɔ kɛnɛ, dia mboka Jehowa Nzambi kanyu ngandji, kɛndakɛnda lo mboka yande ndo nama ɛlɛmbɛ ande, awui ande la tɛdikɔ tande, lâsɔ kete nyayotshikala la lɔsɛnɔ, nyayofulanɛ, ndo Jehowa Nzambi kanyu ayohomba nyɔtshɔkɔla lo nkɛtɛ yayanganyu nkita.’—Euhwelu k’Elembe 30:16.
12. Ɛnyɛlɔ k’Ase Isariyɛlɛ pombaka tosha wetshelo akɔna lo kɛnɛ kendana l’olimu aso w’esambishelo ndo wa wetshelo?
12 Onde akambo asɔ hawotosha wetshelo ɔmɔtshi lo kɛnɛ kendana l’olimu aso w’esambishelo ndo wa wetshelo l’etena kɛnɛ k’ekomelo? Tekɔ lo kanyiya dikambo dia Paradiso kayaye lanɛ laa nkɛtɛ ndo sho tasanyɛka anto dikambo diatɔ l’olimu aso w’esambishelo. Koko, oyadi shamɛ kana anto wetɛso ambeki, hatotɛna ekotshamelo ka daka sɔ naka sho kana vɔ kambɛka Nzambi olimu paka l’oyango wa ndjakondjiyɛ wahɔ. Oko Ase Isariyɛlɛ, sho la wanɛ walakanyaso pombaka mbeka dia ‘mboka Jehowa ngandji, mpokamɛ doyi diande ndo mbomamema.’ Naka sho mbohɔka dui sɔ lam’atatasale olimu aso, kete lâsɔ mɛtɛ tayokambaka kâmɛ la Nzambi l’olimu wa kotolaka anto oya le nde.
Ekambi wakamba kâmɛ la Nzambi
13, 14. (a) Lo ndjela 1 Koreto 3:5-9, ngande wayalaso ekambi wakamba kâmɛ la Nzambi? (b) Akɔna ahombaso mbishaka lotombo l’ɔtɛ w’ehamelo tshɛ kasalema ndo lande na?
13 Paulo akalembetshiya woho wakambaso kâmɛ la Nzambi oma l’ɛnyɛlɔ k’olimu w’ekambɔ. Nde akafunde ate: “Akona eli Apolo? Akona eli Paulu? Ekambi mbewo, nyu nyaketawo dikambu diawo uku akawasha Khumadiondjo wulu untu l’untu. Dimi lakune, Apolo akatela ashi, keli [Nzambi] akatosha diango. Okone ndu one lakune, ndu one lakatela ashi, kema la dikambu, paka [Nzambi] latotoshaka diango. One latuneka, ndu one latutelaka ashi, weko kame, keli untu l’untu ayulungula difutu uku ulimu andi. Ne dia shu teko ekambi kame la [Nzambi], nyu nyeko ekambo ka [Nzambi].”—1 Koreto 3:5-9.
14 Lam’ele tekɔ ekambi wakamba kâmɛ la Nzambi, sho pombaka monɛ ‘ɔtɛkɛta wa diolelo’ la kɔlamelo l’etema w’anto, oma lâsɔ ko mbutɛ ashi lo nsaki kambɛnya onto lo tayalɔngɔsɔlaki dimɛna dimɛna lam’akalolaso dia towaenda ndo lam’ekaso la wɔ Bible. Naka nkɛtɛ, mbut’ate otema, wekɔ ɔlɔlɔ, kete Jehowa ayokotsha ɔkɛndɛ ande lo mbodia lɔtɔngɔ l’akambo wa mɛtɛ wa lo Bible dia lɔ koma otamba watɔ elowa. (Mateu 13:19, 23) Nde ayokotola onto oya le nde ndo oya le Ɔnande. Ɔnkɔnɛ, lo menda akambo tshɛ, tayota ɔnɛ ehamelo tshɛ ka lofulo l’apandjudi wa Diolelo ndja oma l’olimu watsha Jehowa l’etema w’anto, lam’odjande ntɔngɔ y’akambo wa mɛtɛ ndo wakotolande anto wa ngasɔ oya le nde ndo oya le Ɔnande.
Olimu w’ohikelo wayoshikikala
15. Ɛnyɛlɔ kakɔna kakasha Paulo dia mɛnya woho wakimanyiyaso akina dia vɔ pamia mbetawɔ l’etema awɔ?
15 Koyanga mbangɛnangɛnaso lo menda woho ɔnɛ watahame lofulo l’anto, sho mɛtɛ nangaka mɛna anto watetemala mboka Jehowa ngandji, mpokamɛ doyi diande ndo mbomamema. Asolo aso ndɔka dikila to lam’ɛnaso amɔtshi wɔla yɔɔ ndo watakɔ mboka. Onde sho kokaka ntsha woho ɔmɔtshi dia shimba dikambo sɔ? Lo ɛnyɛlɔ kekina, Paulo ekɔ lo mɛnya woho wakokaso kimanyiya akina dia vɔ pamia mbetawɔ l’etema awɔ. Nde ate: “Untu heyi mpika tshina dikina, paka tshina diakahikama; dio dieli Jesu Kristu. Keli naka untu ayuhika paunyi la fesa, la mboko y’ave ya ushinga a wulu, la etamba, la adiyu, la nengese, ladiku dia tshina diako—ulimu wa untu l’untu wayenama, ne dia lushi la dienyanyu di’elimu lu dja layuyala; dja [ywamɛ] yayuhimba ulimu w’untu l’untu okone wewo.”—1 Koreto 3:11-13.
16. (a) Ngande wotshikitanyi bɛnyɛlɔ pende diakasha Paulo lo kɛnɛ kendana l’oyango w’ɛnyɛlɔ l’ɛnyɛlɔ? (b) Ngande wakoka olimu aso w’ohikelo monga anyanya ndo nongola lo dja?
16 Lo ɛnyɛlɔ kaki Paulo k’ekambɔ, di’ɛngɔ mbola, pombaka ɔnɛ lakionɛ kionɛ l’otema ɔtɔi, kitɛka ashi mbala la mbala, ndo Nzambi kitshɔkɔla. Ɛnyɛlɔ kekina kakasha ɔpɔstɔlɔ Paulo tɔtɔmiyaka ɔkɛndɛ w’Okristo lo kɛnɛ kayoyalaka olimu ande w’ohikelo. Onde nde akake lâdiko di’etshina ka shikaa la diangɔ di’amɛna? Paulo ekɔ lo tewola ate: “Untu l’untu endi okone ahikandi.” (1 Koreto 3:10) Naka tambemula nsaki k’onto lo mbotɛ di’elongamelo ka lɔsɛnɔ la pondjo lo Paradiso, onde sho memalaka la wetshelo aso paka lo ewo k’atshina w’akambo w’Afundelo ko tɛtɛ paka awui wahombande ntsha dia kondja lɔsɛnɔ la pondjo? Onde wetshelo aso kokaka komɛ paka lo dui diele oko ɔnɛ: ‘Naka wɛ nangaka sɛna pondjo lo Paradiso, wɛ pombaka mbekaka, mbɔtɔka nsanganya ndo sambishaka’? Naka ɔsɔku mbatshaso, kete hatohike mbetawɔ k’onto lâdiko di’etshina ka wolo, ndo kɛnɛ kahikaso mbeyaka ndjolongola lo dja y’ehemba kana ndjolana l’ɔkɔngɔ wa nshi kambe. Naka sho nyangaka dia kotola anto oya le Jehowa paka lo mbatɛka di’elongamelo ka sɛna lo Paradiso l’ɔtɛ w’ɛnɔnyi engana eto wetshaso lo mbokambɛ, kete tekɔ oko wanɛ waka ‘l’esongo, l’adiyo ndo la sɔdu.’
Tohike ngandji ka Nzambi la Kristo
17, 18. (a) Kakɔna kahombama dia mbetawɔ k’onto tshikala pondjo? (b) Ngande wakokaso kimanyiya onto dia nde mbidjasha Kristo l’otema ande?
17 Dia mbetawɔ tshikala pondjo, tɔ pombaka mbikama lâdiko dia diokanelo diasa onto nde la Jehowa Nzambi lo tshimbo ya Yeso Kristo. Lam’ele sho bu kokele, tayokoka monga la diokanelo dia ngasɔ dia wɔladi l’asaso la Nzambi paka lo tshimbo y’Ɔnande. (Romo 5:10) Ohɔ dia Yeso akate ate: “Nduku untu laya le Papa, tshikima uma le mi.” Dia kimanyiya akina woho wa vɔ mbika mbetawɔ, “untu heyi mpika tshina dikina, paka tshina diakahikama; dio dieli Jesu Kristu.” Kakɔna kahombama dia ntsha dui sɔ na?—Joani 14:6; 1 Koreto 3:11.
18 Mbika lâdiko dia Kristo oko etshina kɛdikɛdi ndakanya lo yoho yakoka ombeki wa Bible monga la ngandji k’ɔtɛkɔya ka Yeso oma l’ewo k’efula k’ɔkɛndɛ Ande w’Otshungodi, Ɔtɛ w’etshumanelo, Ɔlɔmbɛdi wa Lâdiko woludi la ngandji ndo Nkumekanga kalɔmbɔla. (Danyele 7:13, 14; Mateu 20:28; Kolosai 1:18-20; Heberu 4:14-16) Kɛdikɛdi ntsha tshɛ dia Yeso monga onto la mɛtɛ le wɔ, ndo ndjâla wate kana onto lambodjasɛ l’atei w’etema awɔ. Alɔmbɛlɔ walɔmbaso lo dikambo diawɔ pombaka monga oko alɔmbɛlɔ anɛ wakasalaka Paulo lo dikambo di’Akristo wa l’Ɛfɛsɔ. Nde akafunde ate: ‘Lamboka adwe la ntondo ka Shɛso, . . . dia nde mbetawɔ . . . mbidjasha Kristo la ngandji l’etema anyu oma lo mbetawɔ kanyu; dia nyu mbika edio ndo shikikala lâdiko di’etshina.’—Efeso 3:14-17.
19. Kakɔna kayotomba naka sho mbika ngandji ka Kristo l’atei w’etema w’ambeki aso wa Bible, ndo kakɔna kahombaso mbaetsha?
19 Naka sho mbika lo yoho yakoka ngandji ka Kristo pama l’etema w’ambeki aso wa Bible, kete lo weho akɔ tshɛ ngandji ka Jehowa Nzambi kayohikama. Ngandji ka Yeso, tokanyi ta l’otema ande ndo kɛtshi kande ekɔ ɛnyɛlɔ ka kokele ka waonga wa Jehowa. (Mateu 11:28-30; Mako 6:30-34; Joani 15:13, 14; Kolosai 1:15; Heberu 1:3) Di’anto ndjêya Jehowa ndo ndjowoka ngandji, vɔ pombaka têyi Yeso ndo mbôka ngandji.a (1 Joani 4:14, 16, 19) Sho pombaka ndakanya ambeki wa Bible ɔnɛ Jehowa mbakatome Kristo dia ntsha akambo tshɛ wakandasalɛ anto ndo ɔnɛ lâsɔ sho pombaka mboshaka losaka, mbotombolaka ndo mbɔtɛmɔlaka oko ‘Nzambi ka panda kaso.’—Osambu 68:19, 20; Isaya 12:2-5; Joani 3:16; 5:19.
20. (a) Ngande wakokaso kimanyiya anto dia vɔ sukana oya le Nzambi ndo oya le Ɔnande? (b) Kakɔna kayotɔsɛdingola lo sawo diayela?
20 Oko weso ekambi wakamba kâmɛ la Nzambi, nyɛsɔ tokimanyiya anto dia vɔ sukana oya le nde ndo oya le Ɔnande: tâkimanyiyake dia vɔ pamia ngandji la mbetawɔ l’etema awɔ. Lâsɔ mbayoyala Jehowa onto la mɛtɛ le wɔ. (Joani 7:28) Oma lo tshimbo ya Kristo, vɔ wayokoka monga la diokanelo di’ɔlɔlɔ l’asawɔ la Nzambi, wayowoka ngandji ndo wayowomamema. Vɔ hawotɛdika wenya l’olimu wakambawɔ la ngandji, ndo wayɛnya mbetawɔ kawɔ k’ɔnɛ alaka w’amɛna efula waki Jehowa wayokotshama l’etena kakashikikɛma. (Delu dia Jeremiya 3:24-26; Heberu 11:6) Koko, lam’akimanyiyaso akina dia vɔ pamia mbetawɔ, elongamelo la ngandji l’etema awɔ, sho pombaka mbika mbetawɔ kaso hita dia vɔ monga oko masuwa wa nge wakoka shika tanga la ntondo ka mpɛpɛ ya wolo. Tayɔsɛdingola dikambo sɔ lo sawo diayela.
[Footnote]
a Ehomɔ k’ɔlɔlɔ efula kakoka tokimanyiya dia sho mbeya Yeso dimɛna ko ndjêya Jehowa, She, lo tshimbo yande, ele dibuku dia Onto Loleki Woke lo Tena Tshɛ diakatondjama oma le Watch Tower Bible and Tract Society of Pennsylvania.
[Caption]
[Footnote]
[Caption]
Ovuswelo
◻ Esangɔ efula, ngande wemulaso nsaki k’anto oya lo losango la Diolelo, ko wâle akɔna wele lo dikambo sɔ?
◻ Jehowa kotolaka anto a woho akɔna oya le nde ndo oya le Ɔnande?
◻ Wɔtwɛlɔ w’Isariyɛlɛ lo Nkɛtɛ ya Daka akalemanɛka la dikambo diakɔna, ndo wetshelo akɔna wakokaso kondja oma lo dikambo sɔ?
◻ Ɔkɛndɛ akɔna wele la so lo kimanyiya anto dia vɔ sukana oya le Jehowa ndo oya le Ɔnande?
[Caption]
[Study Questions]
[Caption on page 10]
[Picture on page 10]
Koyanga mbashaso anto elongamelo ka lɔsɛnɔ la pondjo lo Paradiso, oyango aso woleki woke ele mbakotola oya le Jehowa
[Caption on page 13]
[Picture on page 13]
Waembwelo aso w’eyoyo kokaka monga amɛna efula naka sho ndjâlɔngɔsɔla ɔlɔlɔ