“Diango di’ushinga a wulu” diekɔ lo ndola lo luudu la Jehowa

“Dimi [Jehowa] layusutshasutsha wedja tshe dia diango di’ushinga a wulu dia wedja tshe ndja. Ku dimi layuludia luudu lone la lutumbu.”​—HANGAI 2:7.

1. Lam’atomba dikambo dimɔtshi dia wanyandja, lande na katotokanyiyaka elangemi wakiso ntondo?

DIANGƆ diakɔna di’oshinga wolo diolodi lo luudu layɛ na? Onde wɛ ekɔ la mɛsa, nkɔsa, madimadi ndo diangɔ dikina dia lo luudu di’oshinga wolo, ndo ekɔ la ɔrdinatɛrɛ wotumbi nshi nyɛ, ndo mutuka w’oyoyo lo lokombo layɛ? Oyadi kânga wɛ ekɔ la diangɔ sɔ tshɛ, onde wɛ hatetawɔ ɔnɛ diangɔ dioleki oshinga wolo kana ohomba lo luudu layɛ ele anto: ase nkumbo kayɛ? Ohɔsa dia l’otsho ɔmɔtshi nganɛ ko nsolo ka dinga kambokemula oma lo djɔ. Luudu layɛ lekɔ lo nongola, ndo naka wɛ tshikala minitɛ efula lɔkɔ kete ndo wɛ nongola! Lende ayotshɔ yimba yayɛ ntondo? Lo diangatangata dia lo luudu? L’ɔrdinatɛrɛ ayɛ? Lo mutuka ayɛ? Shi wɛ ayokanyiya di’elangemi ayɛ ntondo? Eelo mɛtɛ, yimba yayɛ yayotshɔ ntondo le elangemi ayɛ, nɛ dia anto ndeka diangɔ nɛmɔ.

2. Naa woke woke w’etongelo ka Jehowa, ndo etongelo kakɔna kakalekaka Yeso ngɛnangɛna?

² Kakianɛ, ohokanyiya dikambo dia Jehowa Nzambi nde l’Ɔnande, Yeso Kristo. Jehowa mbele ‘Ɔnɛ lakatonge olongo la nkɛtɛ la ndjale ya weke ndo diangɔ tshɛ diele lɔkɔ.’ (Etsha 4:24) Ɔnande, ‘okambi wa kɔmba,’ mbaki ehomɔ kakakambe la Nde dia tonga diangɔ dikina nɛ tshɛ. (Tukedi 8:30, 31; Joani 1:3; Kolosai 1:15-17) Lo mɛtɛ, ndo Jehowa ndo Yeso mbɔsaka kɛnɛ tshɛ kakatongama la nɛmɔ efula. (Enda lo Etatelu 1:31.) Ko etongelo kakɔna koleki ohomba lo washo awɔ na: onde diangɔ kana anto? Lo dihole dia lomba lafɔnyawɔ l’onto, Yeso ekɔ lo mbuta ate: “Lakayala la ongenongeno ami kame l’antu,” kana, oko wofundamidiɔ lo ekadimwelo kaki William Beck, Yeso “akangɛnangɛnaka ditongami di’anto.”

3. Prɔfɛsiya kakɔna kakatondja Jehowa l’onyɔ wa Hangai?

³ Aha la taamu, Jehowa mbɔsaka anto la nɛmɔ di’efula. Djembetelo mɔtshi yɛnya dui sɔ tanemaka l’ɛtɛkɛta wa prɔfɛsiya wakandatɛkɛta l’ɔnɔnyi wa 520 N.T.D., l’onyɔ w’omvutshi Hangai. Jehowa akate ate: “Dimi layusutshasutsha wedja tshe dia diango di’ushinga a wulu dia wedja tshe ndja. Ku dimi layuludia luudu lone la lutumbu. . . . Lutumbu la l’okongo la luudu lone layuleka la ntundu wuki.”​—Hangai 2:7, 9.

4, 5. (a) Lande na kele hasungana mbuta ɔnɛ “diango di’ushinga a wulu” diatawɔ lanɛ kɛdikɛdi diangɔ dia dɛngalɛnga? (b) Oko le yɛ, “diango di’ushinga a wulu” kɛdikɛdi na, ndo lande na katayɛ ngasɔ?

⁴ Naa “diango di’ushinga a wulu” diakahombe ndola lo luudu la Jehowa ko mbela lotombo loleki tshɛ na? Onde lokema la diangatangata dia lo luudu kana dɛngalɛnga dia lo luudu? Onde paonyi, fɛsa la mbɔkɔ y’akɛsɔ? Dui sɔ totodiosungana. Ohɔ dia tɛmpɛlɔ ka ntondo, kakasapolama ɛnɔnyi oko nkama tshanu la ntondo ka nshi shɔ, aki luudu lakamane falanga ya yɛdikɔ ya waa miliyara ya dɔlara!a Mɛtɛ, Jehowa kokoka nongamɛ dia tɛmpɛlɔ kɛsɔ kakahikama oma le djui ya tshitshɛ y’ase Juda wakakalola oma lo lɔhɔmbɔ ndjoleka tɛmpɛlɔ ka Sɔlɔmɔna lo dɛngalɛnga!

⁵ Ko lâsɔ, waa na wele “diango di’ushinga a wulu” diahomba ndola lo luudu la Jehowa na? Mbokɛkama hwe dia ekɔ paka anto, dikambo kɛnɛ kaleka ngɛnyangɛnya otema wa Jehowa kema fɛsa kana paunyi, koko anto wokambɛ oma lo ngandji kawokawɔ. (Tukedi 27:11; 1 Koreto 10:26) Mɛtɛ, Jehowa mbɔsaka apami, wamato ndo ana wɔtɛmɔla lo yoho yetawɔnde la nɛmɔ di’efula. (Joani 4:23, 24) Vɔ mbele “diango di’ushinga a wulu,” ndo vɔ wekɔ la nɛmɔ di’efula lo washo wa Jehowa ndeka ndo dɛngalɛnga diaki lo tɛmpɛlɔ ka Sɔlɔmɔna.

6. Ohomba akɔna waki la tɛmpɛlɔ ka Nzambi k’edjedja?

⁶ Kânga mbakawalɔshamaka etshaka wenya, tɛmpɛlɔ akayoshila mbikama l’ɔnɔnyi wa 515 N.T.D. Edja ndo l’etena kakayokimɔma olambo wa Yeso, tɛmpɛlɔ ka la Jerusalɛma kakatshikala etshina k’ɔtɛmwɛlɔ wa pudipudi le efula ka “diango di’ushinga a wulu,” mbut’ate ase Juda wa lôtɔ la ambetawudi w’ase Wedja. Koko, tɛmpɛlɔ kaki didjidji di’ɛngɔ kɛmɔtshi koleki woke, oko wayangaso diɛna.

Ekotshamelo ka lo ntambe ka ntondo

7. (a) Tɛmpɛlɔ ka Nzambi k’edjedja ka la Jerusalɛma aki didjidji dia na? (b) Kɔndɔla kɛnɛ kakasalaka ɔlɔmbɛdi wa lâdiko Lushi l’Ekesanelo.

⁷ Tɛmpɛlɔ ka la Jerusalɛma akɛnyaka didjidji di’ɔlɔngɔswamelo woleki woke wendana l’ɔtɛmwɛlɔ. Tɔ kakɛnyaka didjidji dia tɛmpɛlɔ kaki Nzambi ka lo nyuma, lɛnɛ ele Jehowa akashikikɛ Yeso oko Ɔlɔmbɛdi wa Lâdiko l’ɔnɔnyi wa 29 T.D. (Heberu 5:4-10; 9:11, 12) Tênde woho wafɔna ɛkɛndɛ w’ɔlɔmbɛdi wa lâdiko wa l’Isariyɛlɛ la kɛnɛ kakasale Yeso. Ɔnɔnyi tshɛ, lo Lushi l’Ekesanelo, ɔlɔmbɛdi wa lâdiko akayaka l’elambwelo ka lo sɛkɛ dia tɛmpɛlɔ ko ndjolambola ngɔmbɛ dia ngɛla pɛkato y’ɛlɔmbɛdi. L’ɔkɔngɔ diko, nde akɔtɔka lo tɛmpɛlɔ la dikila dia ngɔmbɛ; nde aketaka la wedi wa nkuke yakakakitolaka sɛkɛ la Dihole di’Ekila ndo akatenyanyaka dihɔndɔ diakakakitolaka Dihole di’Ekila la Dihole Dioleki Ekila. Naka nde ambokoma lo Dihole Dioleki Ekila, ɔlɔmbɛdi wa lâdiko akamɔngaka dikila la ntondo k’ɔshɛtɛ wa sheke. Oma lâsɔ, nde akɔsaka mbudi, akasalaka woho akɔ wâmɛ, ko kilambola dia ngɛla pɛkato ya waoho 12 w’Isariyɛlɛ waha ɛlɔmbɛdi. (Akambu w’Asi Lewi 16:5-15) Etshelo kɛsɔ ngande wɔtɔnɛtɔ la tɛmpɛlɔ ka Nzambi ka lo nyuma na?

8. (a) Lo yoho yakɔna yakalambɔma Yeso l’etatelo k’ɔnɔnyi wa 29 lo nshi yaso nyɛ? (b) Naa diokanelo dia lânde diaki la Yeso nde la Jehowa lo nshi yakandasalaka olimu ande wa laa nkɛtɛ?

⁸ Lo mɛtɛ, Yeso akalambɔma l’elambwelo ka lolango la Nzambi lam’akandabatizama ko kitama nyuma k’ekila kaki Nzambi l’ɔnɔnyi wa 29 T.D. (Luka 3:21, 22) Dikambo sɔ mɛtɛ mbakayala etatelo ka lɔsɛnɔ la Yeso l’olambo lakaviya ɛnɔnyi esato l’etenyi. (Heberu 10:5-10) L’etena kɛsɔ, Yeso akokanaka la Nzambi oko ɔnande lambotɔ lo nyuma. Eongelo kɛsɔ ka lânde kaki la Yeso lam’asande la She lele l’olongo kokokaka mbokɛma dimɛna le anto. Tɔ kaki wate kana okombɔ ɔmɔtshi wakadihe washo awɔ wa yimba di’aha vɔ mana akambo fundo, woho ɔnɛ wakakombamaka Dihole di’Ekila l’okombɔ wa mɛtɛ mɛtɛ di’aha diɔ mɛnama le wanɛ waki lo sɛkɛ dia tabɛrnakɛlɛ.​—Etumbelu 40:28.

9. Lande na kele Yeso kokoka mbɔtɔ l’olongo oko onto, ndo ngande wakayokandɔma dikambo sɔ?

⁹ Kânga mbakinde Ɔna Nzambi lakakitama nyuma, Yeso kokoka monga la lɔsɛnɔ l’olongo lam’akinde oko onto. Lande na na? Dikambo emunyi la dikila hawokoke kita Diolelo dia Nzambi dia l’olongo. (1 Koreto 15:44, 50) Lam’ele demba di’emunyi diaki Yeso diaki oko bariyɛlɛ, diɔ diakɛnyamaka lo didjidji oko okombɔ wakakakitolaka Dihole di’Ekila la Dihole Dioleki Ekila lo tɛmpɛlɔ ka Nzambi k’edjedja. (Heberu 10:20) Koko, nshi shato l’ɔkɔngɔ wa nyɔi kande, Nzambi akayolola Yeso oko etongami ka lo nyuma. (1 Petero 3:18, NW) Lâsɔ mbakandakoke mbɔtɔ lo Dihole Dioleki Ekila dia lo tɛmpɛlɔ ka Nzambi ka lo nyuma, mbut’ate l’otondo w’olongo. Kɛsɔ mɛtɛ mbakasalema. Paulo akafunde ate: “Kristo kɔmbɔtɔ lo dihole di’ekila diakahikama l’anya w’anto [mbokɛmaka dia nde akatɛkɛta dia Dihole Dioleki Ekila], diele paka ɛfɔnɛlɔ ka kɛnɛ kele mɛtɛ, koko akɔtɔ l’olongo dia nde mɛnama la ntondo ka Nzambi lo dikambo diaso.”​—Hɛbɛru 9:24, NW.

10. Yeso akandasale lam’akandakalola l’olongo?

¹⁰ L’olongo, Yeso ‘akamɔngɛ dikila’ di’olambo ande lo mbisha Jehowa nɛmɔ di’etshungwelo dia dikila diande dia lɔsɛnɔ. Koko, aha lâsɔ ato mbakandakomɛ. Yema la ntondo ka nyɔi kande, nde akatɛ ambeki ande ate: “Dimi lambutsho dia ntunyolongoswela dihuli. Naka dimi lambutsho dia ntunyolongoswela dihuli, dimi layukalula la ndjunyulungula, dia nyu ndjala lene ayumuyala.” (Joani 14:2, 3) Ɔnkɔnɛ, lam’akandɔtɔ lo Dihole Dioleki Ekila, l’olongo, Yeso akadiholɛ anto akina mboka dia vɔ mboyela. (Heberu 6:19, 20) Anto asɔ, wele lofulo lawɔ komɛ lo 144 000, wayokamba olimu oko ɛlɔmbɛdi wa l’ɛse lo tɛmpɛlɔ kaki Nzambi ka lo nyuma. (Enyelo 7:4; 14:1; 20:6) Oko wakɔsaka ɔlɔmbɛdi wa lâdiko wa l’Isariyɛlɛ dikila dia ngɔmbɛ ntondo ko mbɔtɔ ladiɔ lo Dihole Dioleki Ekila dia ngɛla pɛkato y’ɛlɔmbɛdi, nɛmɔ dia dikila dia Yeso diakatshulɔ diakayala ntondo la wahɔ le ɛlɔmbɛdi ɛsɔ wahɔnyi la nde 144 000.b

“Diango di’ushinga a wulu” dia nshi nyɛ

11. Ɔlɔmbɛdi wa lâdiko wa l’Isariyɛlɛ akalambolaka mbudi lo dikambo dia waa na, ndo dui sɔ aki didjidji dia na?

¹¹ Mɛnamaka dia l’ɔnɔnyi wa 1935 mbakakomɛ otshumanyelo w’akitami w’esɔ.c Koko, Jehowa kokomɛ tombola luudu lande. “Diango di’ushinga a wulu” diakahombe ndjɔtɔ lɔkɔ. Ohɔ dia ɔlɔmbɛdi wa lâdiko wa l’Isariyɛlɛ akalambolaka nyama hiende: ngɔmbɛ lo dikambo dia pɛkato y’ɛlɔmbɛdi ndo mbudi lo dikambo dia pɛkato ya waoho waha ɛlɔmbɛdi. Lam’ele ɛlɔmbɛdi waki didjidji di’akitami w’esɔ wanɛ wahomba monga kâmɛ la Yeso lo Diolelo dia l’olongo, lâsɔ ko waoho waha ɛlɔmbɛdi waki didjidji dia na? Okadimwelo wekɔ l’ɛtɛkɛta wa Yeso wofundami lo Joani 10:16 ɔnɛ: “Dimi leko la ekoko ekina waha lu lukumbu lone. Dieli la mi dia mbêla ndu vo. Vo wayuka diui diami, wayuyala ului otoi ndu ulami otoi.” Ɔnkɔnɛ, dikila dia Yeso diakatshulɔ diekɔ la wahɔ le elui ehende w’anto: ntondotondo, Akristo wele l’elongamelo ka mbolɛ kâmɛ la Yeso l’olongo ndo, olui wa hende, wanɛ walongamɛ sɛna pondjo pondjo lo nkɛtɛ kayokadimɔ paradiso. Mɛnamaka hwe dia olui ɔsɔ wa hende mbolembetshiyami oko “diango di’ushinga a wulu” dia lo prɔfɛsiya ka Hangai.​—Mika 4:1, 2; 1 Joani 2:1, 2.

12. Ngande wakotɔma “diango [efula] di’ushinga a wulu” oya lo luudu la Nzambi ɛlɔ kɛnɛ?

¹² “Diango di’ushinga a wulu” sɔ diekɔ lo pongomɔ tsho dia ndodja luudu la Jehowa. Lo ɛnɔnyi ɛnɛ, eshimbamelo k’olimu kakashile l’Erɔpɛ wa l’Ehotwelo ka wonya, lo wedja ɛmɔtshi wa l’Afrika, ndo lo wedja ekina, ko lokumu l’ɔlɔlɔ la Diolelo dia Nzambi diakatatɛ mbolɛ lambokondja diaaso dia pama lo bɛtshi dia nkɛtɛ diele polo ndo ɛlɔ kɛnɛ diatanandema l’esambishelo. Lam’aya anto wele la nɛmɔ efula lo washo wa Nzambi oya lo tɛmpɛlɔ kande, ndo vɔ lawɔ ntshaka tshɛ dia mbetɛ anto akina ambeki, dia kitanyiya didjango dia Yeso. (Mateu 28:19, 20) Lam’atawasale olimu ɔsɔ, vɔ pomanaka l’anto efula, oyadi akɛnda kana dikumanyi, wanɛ wele l’akoka wa monga “diango di’ushinga a wulu” diayolodja luudu la Jehowa la lotombo. Nyɛsɔ tênde bɛnyɛlɔ dingana to diɛnya woho wasalema dikambo sɔ.

13. Ngande wakɛnya yana ya yimato mɔtshi ya la Bolivie ohetoheto ande lo dianganya losango la Diolelo?

¹³ Lo wodja wa Bolivie, yana ya yimato mɔtshi y’ɛnɔnyi etanu yakodiama oma le ambutshi wele Ɛmɛnyi wa Jehowa akalɔmbɛ ombetsha ande wa kalasa dikimɔ dia nde mbetsha kalasa lomingu lakaye omendji w’otshimbedi dia ndjenda etshumanelo kawɔ. Lande na na? Nde akalange sambisha nshi tshɛ ya lomingu lakɔ la lânde. Ambutshi ande wakâmbe dui sɔ, koko vɔ waki l’ɔngɛnɔngɛnɔ lo menda yimba ya ngasɔ ya dimɛna yaki l’ɔnawɔ. Kakianɛ, yana ya yimato shɔ ekɔ lo mbeka Bible l’anto atanu, ndo ambeki ande amɔtshi mbɔtɔka nsanganya y’Akristo. Nde akaye ndo l’ombetsha ande wa kalasa oya lo Mbalasa ka Diolelo. Ondo l’edjedja ka wonya, ambeki ande amɔtshi wa Bible wayoyoyala “diango di’ushinga a wulu” diayoyolodia luudu la Jehowa la lotombo.

14. Lo wodja wa Corée, kadiyɛso ngande wakandayokondja etombelo w’ɛlɔlɔ oma l’etete kande ka sambisha onto ɔmɔtshi lakɛnamaka oko kondjashaka?

¹⁴ Lam’akandakongaka kawolo lo garɛ, Okristo ɔmɔtshi wa womoto wa la Corée akaye suke l’ombeki ɔmɔtshi wakahokamɛka mishiki l’aradiyo ande wa tshitshɛ wa l’atuyi. Nde akawombola ate: “Onde wɛ ekɔ lo ɔtɛmwɛlɔ ɔmɔtshi?” Ombeki ɔsɔ mbôkadimolande ate: “Halangɛnangɛna ndoko ɔtɛmwɛlɔ ɔtɔi.” Kadiyɛso kɔkɔmɔ otema. Nde akawotɛ nto ate: “L’edjedja ka wonya, onto ndjolangaka sɔnɔla ɔtɛmwɛlɔ ɔmɔtshi. Koko naka nde bu l’ewo k’akambo w’ɛtɛmwɛlɔ, kete nde mbeyaka ndjɔsɔnɔla ɔtɛmwɛlɔ wa kɔlɔ.” Elongi k’ombeki ɔsɔ kakakadimɔ ko nde akamɛ pokamɛ kadiyɛso dimɛna dimɛna. Kadiyɛso akawosha dibuku Y a-t-il un Créateur qui se soucie de vous ? ko akawotɛ ɔnɛ dibuku nɛ diayokokimanyiya efula lam’ayokoka etena ka wɛ sɔnɔla ɔtɛmwɛlɔ ɔmɔtshi. Nde akalongola dibuku aha la mengenga. Lomingu layela, nde akatatɛ mbeka Bible nde l’Ɛmɛnyi wa Jehowa, ndo ɛlɔ kɛnɛ, nde ɔtɔka nsanganya tshɛ ya l’etshumanelo.

15. Ngande watatɛ yana mɔtshi ya yimato ya lo wodja wa Japon mbeka l’anto Bible, ndo ngande wambondokondja difuto oma lo wolo wadjande?

¹⁵ Lo wodja wa Japon, Megumi, yana ya yimato y’ɛnɔnyi 12, mbɔsaka kalasa kawɔ oko ekambɔ k’ɛtɛtɔ dia sambishaka ndo ndakanyaka awui wa Nzambi. Nde akakoke ndo tatɛ mbeka Bible l’anto efula. Kakɔna katosalaka Megumi na? Lam’ele nde mbadiaka Bible kana nɔngɔsɔlaka nsanganya wonya w’ereke, mbala efula asekande mombolaka kɛnɛ kasalande. Amɔtshi mumbolaka Megumi bonde kahandasale akambo amɔtshi watshama la kalasa. Megumi kadimolaka wembola awɔ ndo mbatɛka ɔnɛ Nzambi ekɔ la lokombo. Esangɔ efula, dui sɔ memulaka mposa ka wanɛ wawohokamɛ. Lâsɔ ko nde mbalɔmba dia vɔ mbeka Bible. Ɛlɔ kɛnɛ, Megumi ekɔ l’ambeki 20 wa Bible​—18 l’atei awɔ wekɔ asekande wa la kalasa.

16. Ɔnangɛso ɔmɔtshi la la Caméroun ngande wakandakoke tatɛ mbeka l’anto amɔtshi Bible l’atei w’olui a wanɛ wakɔsɔkaka?

¹⁶ Lo wodja wa Caméroun, olui ɔmɔtshi w’anto wakakambaka lo dihole dimɔtshi wakelɛ ɔnangɛso ɔmɔtshi lakatakahɛka ambetshi a mboka ekanda watɛkɛta awui wa Bible. Vɔ wakalange mbɔsɔka ko wakawombola ɔnɛ: lande na kahayetawɔ Losato l’Osanto, lowenga la dja kana ɔnɛ anima havu? Ɔnangɛso akâkadimola l’ekimanyielo ka Bible. Kakɔna kakayotombaka na? Asato oma l’atei w’anto asɔ waketawɔ mbeka Bible. Ɔmɔtshi a l’atei w’asato asɔ, lelɛwɔ Danyɛlɛ, akamɛ mbɔtɔ lo nsanganya ndo akalanya diangɔ diande tshɛ diakendanaka l’ɔtɛmwɛlɔ w’ɛdiɛngɛ. (Enyelo 21:8) La ntondo ka ndo ɔnɔnyi koka, nde akabatizama.

17. Mayɛlɛ akɔna wakasale anangɛso amɔtshi wa la El Salvador dia vɔ sambisha pami kɛmɔtshi kaki konangaka mboka losango la Diolelo?

¹⁷ Lo wodja wa El Salvador, pami kɛmɔtshi akatshungɛka mfɔ kande ka djawudi efula la soko mbala tshɛ kakandɛnaka Ɛmɛnyi wa Jehowa waya suke. Nde akakongaka edja ndo Ɛmɛnyi wa Jehowa wambeta ko nde ndjɔtshiya mfɔ kande lo luudu. Ɔnkɔnɛ, anangɛso kokokaka sawola la pami kɛsɔ kânga lushi ɔtɔi. Koko lushi lɔmɔtshi, vɔ wakahembe shambo kina. Oko akaweyaka ɔnɛ pami kakɔ ayokoka mboka kɛnɛ katɛkɛtawɔ, vɔ wakate vate mbala kɛnɛ paka sho sambisha mfɔ. Vɔ wakasukana otsha lo luudu, wakasha mfɔ mɔyɔ ko wakate vate: tekɔ l’ɔngɛnɔngɛnɔ wa mamba dia kondja diaaso dia sawola la yɛ. Vɔ wakatɛkɛta dia etena kayonga paradiso laa nkɛtɛ, etena kahoka ndoko onto nkɛlɛ​—ndo kahatonga nyama todjawudi nto. Oma lâsɔ ko vɔ mbutɛ mfɔ la loshilambo tshɛ vate: kotshikale la wolo, ko vɔ nkimɛ lɔkɛndɔ. La diambo di’efula, akawɛnyi nganɛ ko pami kakɔ ambotomba oma lo luudu ko nde la wɔ ate: nyokimwe lo woho wakimi kombishaka Ɛmɛnyi wa Jehowa diaaso dia vɔ sawola la mi. Nde akɔshi periodikɛ ndo wakatatɛ mbeka la nde Bible. Ɛlɔ kɛnɛ, pami kɛsɔ aya ɔnangɛso​—nde aya ɔmɔtshi a l’atei wa “diango di’ushinga a wulu”!

“Tanyukaki woma”

18. Ekakatanu akɔna wele l’Akristo efula, ndo ngande wɔsa Jehowa atɛmɔdi ande?

¹⁸ Onde ndo wɛ mbakamba olimu w’ohomba efula wa sambisha Diolelo ndo mbetɛ anto ambeki? Naka eelo, kete wɛ mɛtɛ ekɔ la diɛsɛ dia woke. Oma l’olimu ɔnɛ mɛtɛ mbakotola Jehowa “diango di’ushinga a wulu” oya lo luudu lande. (Joani 6:44) Mɛtɛ, tena dimɔtshi wɛ mbeyaka nɛmba yema kana nkɔmɔ otema. Mbala mɔtshi, amɔtshi​—oyadi kânga l’atei w’ekambi wa Jehowa wa kɔlamelo​—ndjɛnaka pâ dikambo vɔ ndjoyaokaka di’oko vɔ bu ohomba. Koko, tohekɔke! Jehowa mbɔsaka ɔtɛmɔdi ande tshɛ oko ɛngɔ ka dimɛna efula, ndo nde kombolaka efula dia wɛ kondja panda.​—2 Petero 3:9.

19. Ngande wakakeketsha Jehowa ekambi ande lo tshimbo ya Hangai, ndo ɛtɛkɛta ɛsɔ ngande wakokawɔ tokeketsha?

¹⁹ Lam’akɔmɔso otema, oyadi l’ɔtɛ wa woho walɔshamaso kana l’ɔtɛ w’awui akina wahatɔngɛnyangɛnya, ɛtɛkɛta wa Jehowa ɛnɛ wakandatɛ ase Juda wakakalola oya lo wodja awɔ kokaka tokeketsha. Lo Hangai 2:4-6, sho mbadiaka ɔnɛ: “Keli kakiane, ukikitali, we Zerubabele, mbata [Jehowa]. Ukikitali, we Jashua, on’a Jehozadaka, olombedi a ladiku, ndu nyu antu tshe wa lu kete, nyukikitali. Nyukambi ulimu, ne dia dimi leko la nyu, mbata [Jehowa] Kanga lulimbilimbi. Uku diui diakamadji la nyu sheki lam’akanyatumbi uma l’Edjibitu, ndu [n]yuma kami keko l’atei anyu, tanyukaki woma. Ne dia [Jehowa] Kanga lulimbilimbi kata ati: Etena otoi kambutshikala, etena ka tshitshe, ku dimi layusutshasutsha ulungu la kete, ashi a waki la kete y’ufumbu.” Tolembete dia Jehowa hakomɛ paka lo tokeketsha dia sho keketala koko toshaka ndo kɛnɛ katokimanyiya dia sho kondja wolo. Lo yoho yakɔna na? Lembetɛ ɛtɛkɛta ɛnɛ w’ekeketshelo: “Dimi leko la nyu.” Mbeya ɔnɛ oyadi wekamu akɔna tshɛ wayohomana la so, Jehowa ekɔ kâmɛ la so, ekɔ mɛtɛ dui diakeketsha mbetawɔ!​—Romo 8:31.

20. Lo yoho yakɔna yele lotombo loleki tshɛ lekɔ lo ndola lo luudu la Jehowa nshi nyɛ?

²⁰ Jehowa mɛtɛ akɛnya dia nde ekɔ kâmɛ l’anto ande. Nde mɛtɛ ekɔ lo ntsha kɛnɛ kakandate l’onyɔ w’omvutshi Hangai ate: “Lutumbu la l’okongo la luudu lone layuleka la ntundu wuki . . . Ndu lu dihuli ne, kayumukimo ki.” (Hangai 2:9) Eelo mɛtɛ, lotombo loleki woke ɛlɔ kɛnɛ tanemaka lo tɛmpɛlɔ ka Jehowa ka lo nyuma. Eolo, anto nunu nkama wekɔ lo pongomɔ l’ɔtɛmwɛlɔ wa mɛtɛ ɔnɔnyi tshɛ. Anto asɔ wekɔ lo ndeshama dimɛna lo nyuma, ndo oyadi kânga l’andja ɔnɛ w’osukusuku, vɔ wekɔ la wɔladi wele paka wɔladi wa l’andja w’oyoyo waki Nzambi mbayoleka wɔsɔ.​—Isaya 9:6, 7; Luka 12:42.

21. Ahombaso ndjâkeketsha dia ntsha?

²¹ Jehowa ayosutshasutsha wedja l’Aramangɛdɔna lo nshi yayaye. (Enyelo 16:14, 16) Lâsɔ nyɛsɔ tokambe la etena kambotshikala dia nyomoshimbɛ nsɛnɔ y’anto akina efula. Tokeketale ndo toyaɛkɛ tshɛ le Jehowa. Toyakeketsha dia tetemala tɛmɔlaka Jehowa lo tɛmpɛlɔ kande ka woke ka lo nyuma, ndo kilodjaka tsho la “diango di’ushinga a wulu” edja ndo lam’ayondota ɔnɛ olimu aso wamboshila.

[Nɔtɛ ya l’ɛse ka dikatshi]

Onde wɛ mbohɔka?

• Lo washo wa Jehowa, ele ohomba efula ndeka ndo diangɔ dia l’emunyi?

• Dikila dia Yeso diakatshulɔ diekɔ la wahɔ le elui akɔna ehende w’anto?

• Waa na wele “diango di’ushinga a wulu” diakahombe ndodja luudu la Jehowa la lotombo?

• Kakɔna kɛnya ɔnɛ prɔfɛsiya ka Hangai kekɔ lo kotshama ɛlɔ kɛnɛ?

[Diagramɛ dia lo lɛkɛ 10]

(Dia mbeya awui tshɛ enda l’okanda)

Onde wɛ mbeyaka kitshimudi ya didjidji ya tɛmpɛlɔ ka Jehowa k’edjedja?

Dihole Dioleki Ekila

Okombɔ

Dihole di’Ekila

Mbalasa

Elambwelo

Sɛkɛ

[Osato wa lo lɛkɛ 9]

Ɔlɔmbɛdi wa lâdiko akalambolaka ngɔmbɛ lo dikambo dia pɛkato y’ɛlɔmbɛdi ndo mbudi dia pɛkato ya waoho waha ɛlɔmbɛdi

[Osato wa lo lɛkɛ 12]

Olimu wa sambisha Diolelo l’andja w’otondo wekɔ lo kotola lokema l’anto oya lo luudu la Jehowa