Wɛ kokaka nama lɔkɛwɔ la pudipudi
“Ngandji ka [Nzambi] kene, dia shu nama elembe andi.”—1 JOANI 5:3.
1. Naa weho wa lɔkɛwɔ lotshikitanyi lele l’anto ɛlɔ kɛnɛ na?
AYA deko aha nɛ, omvutshi Malaki akasokoyama la nyuma ka Nzambi dia tɛkɛta dikambo di’etena kele otshikitanu w’efula wayonga lam’asa lɔkɛwɔ lele l’ekambi waki Nzambi la lɔnɛ lele l’anto wahakambɛ Nzambi. Omvutshi ɔsɔ akafunde ate: “Ku nyu nyayukalula ntu, nyayutshikitanya untu ololo la untu a kolo, one [“lakambɛ Nzambi la ɔnɛ lahatôkambɛka,” NW].” (Malaki 3:18) Prɔfɛsiya kɛsɔ kekɔ lo kotshama nshi nyɛ. Kitanyiya ɛlɛmbɛ waki Nzambi, mbidja ndo wɛnɛ watɔlɔmba dia monga la lɔkɛwɔ la pudipudi, ekɔ dui dia lomba ndo diasungana lo lɔsɛnɔ. Koko, hatongaka nshi tshɛ wɔdu dia sala dikambo sɔ. Diɔ diakɔ diakate Yeso ɔnɛ Akristo pombaka sala la wolo awɔ tshɛ dia kondja panda.—Luka 13:23, 24.
2. Naa tɔsɛngiya t’oma l’andja ɔnɛ tashimba anto amɔtshi dia nama lɔkɛwɔ la pudipudi?
2 Bonde kende kema wɔdu nama lɔkɛwɔ la pudipudi na? Ɔkɔkɔ ɔmɔtshi ele l’ɔtɛ wa tɔsɛngiya t’oma l’andja ɔnɛ. Wanɛ wasala diendenda mɛnyaka awui wa mindo wa dieyanelo oko ɛngɔ kɛmɔtshi kakotola anto, k’ɔngɛnɔngɛnɔ, ndo kasalema oma le epalanga w’anto, koko mbala efula anto mbohɛka etombelo wa kɔlɔ w’oma lo dikambo sɔ. (Efeso 4:17-19) Mbala efula, vɔ mɛnyaka weho w’awui wa dieyanelo asɔ lam’asa anto wele bu wadi l’omi. Lo waa filmɛ kana lo waa emisiɔ wa televiziɔ, vɔ mɛnyaka mbala efula awui wa dieyanelo wasalema lam’asa anto wahatshukanyi wotohomana paka lo shashimoya. Mbokɛmaka dia anto wasala weho wa dieyanelo dia ngasɔ hawodisale l’ɔngɛnɔngɛnɔ ndo la dilɛmiyɛlɔ. Anto efula wakatatɛ menda wa filmɛ ya ngasɔ oma ko tɔkɛndakɛnda tawɔ. Ndo nto, ekɔ tɔsɛngiya ta wolo t’oma le angɛnyi tatshutshuya anto dia ndjela lɔkɛwɔ la kɔlɔ l’anto wa nshi nyɛ, ndo mbala efula vɔ mbɔlaka kana tɛngaka wanɛ watona monga la lɔkɛwɔ la ngasɔ.—1 Petero 4:4.
3. Naa ɛkɔkɔ ɛmɔtshi watshutshuya anto efula wa l’andja ɔnɛ dia ndjatambiya l’awui wa mindo?
3 Ekɔ nto wolo nama lɔkɛwɔ la pudipudi l’ɔtɛ wa tɔsɛngiya t’oma l’etei kaso k’otema. Jehowa akatonge anto la nsaki ka dieyanelo, ndo nsaki kakɔ kokaka monga wolo efula. Nsaki ndjaka oma lo kɛnɛ kakanyiyaso, ndo awui wa mindo wekɔ la losambi la kɛnɛ tshɛ kahɔtɔnɛ la tokanyi taki Jehowa. (Jakoba 1:14, 15) Oko ɛnyɛlɔ, lo ndjela alapɔlɔ ɔmɔtshi weke katomba lo jurunalɛ yelɛwɔ British Medical Journal, l’atei w’anto wakayakimɔ l’awui wa dieyanelo mbala ka ntondo, efula wakasale dikambo sɔ paka la kanyi ya mbeya tsho nganɛ wonga dieyanelo. Akina wakafɔnyaka ɔnɛ lam’ele anto efula wa lo lɔlɔnga lawɔ wakasalaka awui wa dieyanelo, lâsɔ vɔ lawɔ waketawɔ shisha emuma kawɔ. Akina nto wakate dia vɔ wakayongaka la mposa k’efula k’akambo asɔ oma lo tokanyi tawɔ kana wakayoyakimɔka lo dieyanelo nɛ dia “wakadjɔ yema ya wanu.” Naka sho nangaka ngɛnyangɛnya Nzambi, kete hatohombe kanyiya oko anto asɔ. Ko weho akɔna wa tokanyi tayotokimanyiya dia sho nama lɔkɛwɔ la pudipudi na?
Tonge la mbetawɔ ka wolo
4. Dia nama lɔkɛwɔ la pudipudi, ahombaso sala?
4 Dia sho nama lɔkɛwɔ la pudipudi, sho la dia mbeya ɔnɛ monga la yoho ya lɔkɛwɔ la ngasɔ ekɔ dikambo di’ɔlɔlɔ. Dikambo sɔ mbɔtɔnɛka la kɛnɛ kakafundɛ ɔpɔstɔlɔ Paulo Akristo wa la Rɔma ate: “Nyuhilwami lu yimba y’uyuyu, kanyeyi okone weli lulangu la [Nzambi], l’ololo latôngenyangenyaka, ndu l’uluwanyi.” (Romo 12:2) Mbeya ɔnɛ monga la lɔkɛwɔ la pudipudi ekɔ dikambo di’ɔlɔlɔ halembetshiya tsho mbeya ɔnɛ Ɔtɛkɛta waki Nzambi tonaka awui wa mindo. Dikambo sɔ nɔmbaka di’onto shihodia ɛkɔkɔ wɛnya di’awui wa mindo asɔ wekɔ kɔlɔ ndo shihodia ɛlɔlɔ wakondjaso lo ndawɔ awui akɔ. Takasɛdingola ɛkɔkɔ ɛmɔtshi lo sawo dia mbala ketshi.
5. Ntondotondo, bonde kahomba Akristo nama lɔkɛwɔ la pudipudi?
5 Lo mɛtɛ, ɛkɔkɔ woleki tshutshuya Akristo dia mbewɔ awui wa mindo wa dieyanelo, ndja oma lo diɔtɔnganelo diele lam’asawɔ la Nzambi. Takeke dia nde mbeyaka kɛnɛ koleki ɔlɔlɔ le so. Ngandji kawokaso ayotokimanyiya dia mpetsha kɛnɛ kele kɔlɔ. (Osambu 97:10) Nzambi kele Okahi wa ‘losha ndo mbɔya tshɛ k’ɔlɔlɔ.’ (Jakoba 1:17) Nde tolangaka. Lam’awongaso l’okitanyiya le nde, sho mɛnyaka dia sho mbôkaka ngandji ndo ngɛnangɛnaka kɛnɛ tshɛ kamondotosalɛ. (1 Joani 5:3) Hatokombola pondjo mbisha Jehowa sɔnyi ndo pâ l’asolo lo sekola ɛlɛmbɛ wakinde wosembwe. (Osambu 78:41) Hatokombola sala akambo wayoyokonya anto dia tɛkɛta kɔlɔ dikambo di’ɔtɛmwɛlɔ ande w’ekila ndo w’osembwe. (Tito 2:5; 2 Petero 2:2) Lo nama lɔkɛwɔ laso la pudipudi, sho ngɛnyangɛnyaka Nkum’Olongo.—Tukedi 27:11.
6. Lo yoho yakɔna yatokimanyiya lɔkɛwɔ la pudipudi dia mbewoya anto akina ɛlɛmbɛ aso wendana la lɔkɛwɔ la pudipudi?
6 Tayokondja ekokelo naka sho mbɔsa yɛdikɔ ya nama lɔkɛwɔ laso pudipudi, ndo naka sho mbewoya anto akina yɛdikɔ yambotɔsa shɔ. Anto weye dia wɛ ekɔ okambi waki Jehowa Nzambi ndo ɔnɛ wɛ amboyashikikɛ dia ndjela ɛlɛmbɛ wakinde wa lâdiko. Ɔsɔ ekɔ lo wahɔ wa lɔsɛnɔ layɛ, wa demba diayɛ, ndo w’ɔsɔnwɛlɔ ayɛ. Dikambo diakɔna diele lo wâle na? Diɔtɔnganelo di’ɔlɔlɔ diele lam’asayɛ la Shɔ lele l’olongo. Ɛnya hwe dia wɛ hakokaki pondjo mengɔnya kɔlamelo yakiyɛ l’oseka ɛngɔ tshɛ. Ngɛnangɛna dia ndjala onyimpala waki Nzambi lo kitanyiya wadjango wakinde. (Osambu 64:10) Tokake sɔnyi pondjo dia sawola l’anto akina akambo wendana la lɔkɛwɔ l’ɔlɔlɔ wetawɔyɛ. Tɛkɛta akambo asɔ la dihonga kokaka kokeketsha, kokokɛ, ndo keketsha anto akina dia ndjela ɛnyɛlɔ kakiyɛ.—1 Timote 4:12.
7. Ngande wakokaso kukutɛ yɛdikɔ yaso ya tetemala nama lɔkɛwɔ la pudipudi?
7 L’ɔkɔngɔ wa sho mbɔsa yɛdikɔ ya ndjela ɛlɛmbɛ wa lâdiko wendana la lɔkɛwɔ ndo wa mbeyanya yɛdikɔ yakɔ le anto akina, sho la dia ndjashikikɛ dia tetemala la nɛnya yɛdikɔ yakiso. Yoho mɔtshi yakokaso sala dikambo sɔ ele monga la yewo wonya wasɔnaso angɛnyi. Bible mbutaka dia “one latengolaka kame la akanga a yimba, atuyalaka kanga yimba.” Naka wɛ mbekesanɛ la wanɛ wayela ɛlɛmbɛ w’ɔlɔlɔ wendana la lɔkɛwɔ oko wɛ, kete vɔ wayokokeketsha. Divɛsa sɔ mbutaka nto ɔnɛ: “Keli one latekesanelaka la akanga a dinginya, atuhumoka lukulu l’engeno.” (Tukedi 13:20) Sala la wolo tshɛ dia mbewɔ anto wakoka ndjɔtɛwɔla yɛdikɔ yakiyɛ.—1 Koreto 15:33.
8. (a) Bonde kahombaso ndesha wɛɔngɔ aso l’akambo w’ɔlɔlɔ? (b) Kakɔna kahombaso mbewɔ?
8 Lâdiko wa lâsɔ, sho pombaka ndeshaka wɛɔngɔ kana timba takiso akambo wele mɛtɛ, wele la kɛnɛmɔ, wosembwe, wele pudipudi, wele amɛna, ndo wele la lokumu l’ɔlɔlɔ. (Filipi 4:8) Sho salaka dikambo sɔ lo sɔnaka kɛnɛ kendaso, kadiaso ndo mishiki wahokamɛso. Mbuta ɔnɛ ekanda wele l’awui wa mindo bu la shɛngiya ya kɔlɔ le onto ekɔ oko onto lata ɔnɛ ekanda wele l’awui wa pudipudi kana w’amɛna bu la shɛngiya y’ɔlɔlɔ le onto. Tatohɛke dia kema wolo di’anto wele kema kokele nkɔ esadi eto l’awui wa mindo. Ɔnkɔnɛ, abuku, tojurunalɛ, waa filmɛ, ndo mishiki wakeketsha awui wa dieyanelo ndjokonyaka onto dia monga la nsaki ya kɔlɔ, ndo l’ɔkɔngɔ diko nsaki ya kɔlɔ shɔ mbeyaka ndjôkonya lo pɛkato. Dia nama lɔkɛwɔ la pudipudi, sho pombaka ndodja wɛɔngɔ kana timba taso la lomba l’oma le Nzambi.—Jakoba 3:17.
Atako wakonya onto l’awui wa mindo
9-11. Oko wakadikɔndɔla Sɔlɔmɔna, atako akɔna wakayokonya ɔlɔngɔ ɔmɔtshi dia nkɔ yema yema otsha l’awui wa mindo?
9 Mbala efula, ekɔ atako kana akambo amɔtshi weyama wakonya onto l’awui wa mindo. Kama wasala onto tako dia ntondo, mongaka wolo efula nde kawola oya l’ɔkɔngɔ. Tende nganɛ wɔkɔndwami dikambo sɔ lo Tukedi 7:6-23. Sɔlɔmɔna ambɛna ‘ɔlɔngɔ ɔmɔtshi wa pami wele bu la yimba,’ kana wele bu la tokanyi t’ɔlɔlɔ. Ɔlɔngɔ a pami ɔsɔ ekɔ lo “[t]eti l’osese lu leke lutsha laka umuntu [kanga loseka]. . . . Utsha lu luudu landi la tushu ta shimba, la dikolo dia yoo.” Lanɛ mbele munga kande ka ntondo. La tosho ta shimba, “utema” ande wambɔlɔmbɔla, aha otsha lo mboka kekina, koko otsha lo mboka keyande ɔnɛ womoto kanga loseka totanemaka lɛkɔ.
10 Sho mbadiaka nto ɔnɛ: “Enda, umuntu omotshi akahumana la ndi, akalote ahondo wa luseka, la utema wa lukesu la wulu.” Wony’ɔnɛ, ɔlɔng’ɔsɔ ambowɛna! Nde akakoke mbika dikudumba ko kawola otsha la ngelo, koko lam’ele nde ekɔ wɔdu lo kɛnɛ kendana la lɔkɛwɔ la pudipudi, wony’ɔnɛ aya ponda mbɔtɔ lo yisho ya tɛdi dia nde sala dikambo sɔ. Womoto akɔ ambokumbatɛ ndo ambowoka ɛlɔmɔ. L’ɔkɔngɔ wa nde mbetawɔ nde mboka ɛlɔmɔ, ɔlɔngɔ ɔsɔ ambotatɛ pokamɛ ɛtɛkɛta ande wa lokeso w’ɔnɛ: “Diaki la mi dia nambula elambu [wa diokanelo], lambushidiya dokoloko diami elo.” Lo elambo wa diokanelo wakalambolaka, nyama, shima, esɔ, ndo wanu. (Akambu w’Asi Lewi 19:5, 6; 22:21; Walelu 15:8-10) Lo tɛkɛta dikambo dia diangɔ sɔ, ondo nde nangaka mɛnya dia nde ekɔ onto lele la lonyuma l’ɔlɔlɔ, ndo l’etena kakɔ kâmɛ, nde akokiyaka ɔlɔngɔ ɔsɔ dia diangɔ efula di’amɛna dia ndɛ ndo dia nɔ diekɔ lo luudu lande. Nde ambɔ̂sɛngasɛnga ate: “Yaka, tulutshanya ngandji edja ndu pindju, tongenyangenya[ne] la saki ka dimba.”
11 Kema wolo sho mbeya lɛnɛ akawayokomaka. “Ndi a[mb]ûkutula l’aui w’oselo.” Ɔlɔngɔ ɔsɔ amboyela otsha lo luudu lande “uku ngombe katatshu utsha l’ediakelu” ndu “uku fudu kayanga ndjatambiya l’otei.” Sɔlɔmɔna ambokomiya l’ɛtɛkɛta ɛnɛ wa kana yimba ate: ‘Nde kombeya dia anima wakinde mbaki lo wâle.’ Anima wakinde, kana lɔsɛnɔ lande, akendanaka la dikambo sɔ nɛ dia “[Nzambi] ayulumbuya akanga a munanyi la luseka.” (Heberu 13:4) Ɔsɔ mɛtɛ ekɔ wetshelo w’ohomba efula oyadi le apami kana wamato! Hatohombe takula kânga nna dia ntondo lo mboka keyaso ɔnɛ Nzambi ayoyotoka ɔkɔngɔ naka sho mbɔtɔ lɔkɔ.
12. (a) Etelo k’ɔnɛ aki l’‘ohomba wa yimba’ alembetshiyatɔ? (b) Ngande wakokaso keketsha lɔkɛwɔ lakiso?
12 Teye dia ɔlɔngɔ a pami wa l’ɔkɔndɔ ɔsɔ ‘komonga la yimba.’ Etelo kɛsɔ tɛnyaka dia tokanyi tande, mposa yande, ngandji kande, nsaki yande, ndo eyango wakinde wa lo lɔsɛnɔ kɔmbɔtɔnɛka la kɛnɛ ketawɔ Nzambi. Wɔdu wakinde lo kɛnɛ kendana la lɔkɛwɔ la pudipudi akayowelaka etombelo wa lonyangu. Lo “nshi y’ekumelo,” nyɛ ya pâ, dia monga la lɔkɛwɔ la pudipudi pombaka sala la wolo. (2 Timote 3:1) Nzambi ekɔ lo tosha kɛnɛ kahomba tokimanyiya. Nde toshaka nsanganya ya l’etshumanelo k’Akristo dia tokeketsha woho wa sho mbɔtɔ lo mboka kosembwe ndo dia tohomanya kâmɛ l’anto akina wele laso oyango wamɛ. (Heberu 10:24, 25) Tekɔ nto la dikumanyi dia l’etshumanelo diatolama ndo diatetsha mboka y’akambo wosembwe. (Efeso 4:11, 12) Tekɔ la Bible, Ɔtɛkɛta waki Nzambi, dia tolaka ndo dia tɔlɔmbɔla. (2 Timote 3:16) Ndo, wonya tshɛ, tekɔ la diaaso dia nɔmba Nzambi nyuma kande dia tokimanyiya.—Mateu 26:41.
Wetshelo wakondjaso oma lo pɛkato yakasale Davidi
13, 14. Ngande wakayokomaka Nkumekanga Davidi lo sala pɛkato ka woke?
13 Dikambo dia lonyangu ko, kânga ekambi ɛmɔtshi waki Nzambi wakashaka ɛnyɛlɔ ka dimɛna efula wakayɔkɔka l’awui wa mindo wa dieyanelo. Ɔmɔtshi l’atei w’anto asɔ ko Nkumekanga Davidi, ɔnɛ lakakambɛ Jehowa la kɔlamelo tshɛ l’edja k’ɛnɔnyi akumi. Aha la tamu, nde mɛtɛ akokaka Nzambi ngandji efula. Koko, nde akayɔkɔka lo pɛkato. Oko wakidiɔ lo dikambo di’ɔlɔngɔ a pami wakatɛkɛta Sɔlɔmɔna dikambo diande, aki atako amɔtshi wakatakola Davidi wakayokonyaka lo pɛkato.
14 L’etena kɛsɔ, ondo Davidi aki l’ɛnɔnyi 50 l’ɛmɔtshi. Oma lo sambe kande ka luudu, nde akɛnyi womoto l’olangala, Batɛshɛba ɔ̂ka ndâmɛmɛ. Nde akambola akambo wendana la womoto ɔsɔ ko nde akayeyaka akinde. Nde akayeya dia Uriya w’omɛnde akatomama la Rabba, osomba ɔmɔtshi w’ase Amɔna lo ta. Davidi akatumi dui dia vɔ mbela womoto ɔsɔ lo mbalasa kande ko nde akayeyanaka la nde. L’ɔkɔngɔ diko, akambo wakayokomaka wolo—Davidi akayoshaka womoto ɔsɔ diemi. L’elongamelo ɔnɛ Uriya ayoyetsha otsho w’otondo nde la wadɛnde, Davidi akatome dui dia vɔ mbêta oma lo ta lɛnɛ akinde. Lo yoho shɔ, Uriya ohoyonga oko She aki ɔna lohota Batɛshɛba. Koko Uriya kotshɔ dia tetama lakande. Lam’akandɛnyi dia hayeyama woho wa mbishɛ pɛkato kande, Davidi akakaloya Uriya otsha la Rabba ndo akawosha mukanda otsha le owandji w’alembe, lo mukanda akɔ nde akadjanga dia vɔ mbetsha Uriya paka lo dihole diahandahombe kalola la lɔsɛnɔ. Ɔnkɔnɛ, Uriya akashisha lɔsɛnɔ lande, ko Davidi akatshuke wadi aki odo ɔsɔ la ntondo k’anto tshɛ ndjeya ɔnɛ nde aya la diemi.—2 Samuele 11:1-27.
15. (a) Ngande wakayotombaka pɛkato kaki Davidi sɛkɛ? (b) Ngande wakatshe Davidi lam’akaye Natana la yewo tshɛ dia ndjowɛnya munga kande na?
15 Mɛnamaka di’oko Davidi akatondoya lo welo wakandadje dia mbishɛ pɛkato kande. Ngɔndɔ efula yakete. Womoto ɔsɔ akayotaka ɔna pami. Naka Davidi akohɔka dikambo sɔ lam’akandafundaka Osambu 32, kete lo mɛtɛ nkum’otema kande kakɔlɔshaka ta to. (Osambu 32:3-5) Koko, pɛkato kɛsɔ kombishɛma la ntondo kaki Nzambi. Bible mbutaka ɔnɛ: “Dikambu diakatshi Davidi kongenyangenya [Jehowa].” (2 Samuele 11:27) Jehowa akatome omvutshi Natana, ɔnɛ lakatɔkɛnɛmɔlɛka Davidi la yewo tshɛ kɛnɛ kakandatshe. Davidi akasuya pɛkato kande mbala kakɔ ɔtɔi ndo akalɔmbɛ Jehowa edimanyielo. Ndjatshumoya kande ka l’otema ɔtɔi akayowokanyaka la Nzambi nto. (2 Samuele 12:1-13) Davidi kotona lohango lakawawosha. Nde akakɛnɛmɔla woho wa dionga diakɔndɔlawɔ l’Osambu 141:5 ɔnɛ: “Untu ololo ankomole, laso kawo; ndi ampangweli, ku laso ndjalaka uku iso l’ote ami. Ote ami tatunaki.”
16. Ɔhɛmwɛlɔ ndo dako diakɔna diakasha Sɔlɔmɔna lo kɛnɛ kendana la osekwelo w’ɛlɛmbɛ?
16 Ondo Sɔlɔmɔna, ɔnɛ laki ɔna lahende laki Davidi lakandote nde la Batɛshɛba, akakane yimba lo dikambo sɔ dia lonyangu diakakomɛ she lo lɔsɛnɔ lande. Nde akayofundaka l’ɔkɔngɔ ate: “One latusheka kolo yandi, hatongonaka. Keli one latushulaka ndu latosekaka kolo yandi, ayukama ketshi.” (Tukedi 28:13) Naka tambotsha pɛkato ka woke, kete sho pombaka kitanyiya dako ndo ɔhɛmwɛlɔ ɔsɔ w’oma le Nzambi. Sho pombaka mbisholɛ Jehowa pɛkato kakɔ ndo mɛnana la dikumanyi dia l’etshumanelo dia vɔ tokimanyiya. Ɔkɛndɛ ɔmɔtshi wa woke wele la dikumanyi ele kimanyiya wanɛ wambotsha kɔlɔ dia nɔngɔsɔla dikambo sɔ.—Jakoba 5:14, 15.
Tokikɛ etombelo w’oma lo pɛkato
17. Kânga mbatodimanyiyɛ Jehowa pɛkato, oma l’etombelo akɔna wahandatokokɛ?
17 Jehowa akadimanyiyɛ Davidi pɛkato yande. Lande na? Nɛ dia Davidi aki kanga kɔlamelo, nde akokaka anto akina kɛtshi, ndo akayatshumoya l’otema ɔtɔi. Koko, Davidi kokokamɛ oma l’etombelo wa kɔlɔ w’oma lo pɛkato yande. (2 Samuele 12:9-14) Ngasɔ mbediɔ ndo ɛlɔ kɛnɛ. Kânga mbele Jehowa hela wanɛ wayatshumoya mpokoso, nde hâkokɛ oma l’etombelo wa lonyangu waya oma lo pɛkato yakiwɔ. (Ngalatiya 6:7) L’atei w’etombelo waya oma l’awui wa mindo wa dieyanelo, sho mbeyaka shila odiakelo wa diwala, waemi waha la lolango, hemɔ yasambemɛ oma l’awui wa dieyanelo, ndo oshishelo wa nɛmɔ ndo wa lokumu lele l’onto.
18. (a) Paulo akandatɛ etshumanelo ka la Kɔrɛtɔ dia sala lo kɛnɛ kendana l’awui wa kɔlɔ efula wa dieyanelo wakasalema lɔkɔ? (b) Ngande wɛnya Jehowa ngandji ndo kɛtshi kande otsha le atshi wa pɛkato?
18 Naka tambotsha kɔlɔ kɛmɔtshi ka woke, kema wolo sho kɔmɔ otema lam’asowaso l’etombelo wa kɔlɔ w’oma lo munga yakatatshe. Koko, tatetawɔke dia kanga dikambo ɔtɔi toshimba dia sho ndjatshumoya ndo dia nɔngɔsɔla diɔtɔnganelo diasaso la Nzambi nto. Lo ntambe ka ntondo, Paulo akafundɛ Akristo wa la Kɔrɛtɔ dia vɔ mbitshanya oma l’atei w’ethumanelo pami kɛmɔtshi kakasalaka awui wa monanyi wa lam’asa wanɛ wôtɔ. (1 Koreto 5:1, 13) L’ɔkɔngɔ wa pami kɛsɔ ndjatshumoya l’otema ɔtɔi, Paulo akayotɛka etshumanelo ate: “Okone ololo nyu mbudimanyia kolo yandi la mbukikitsha . . . [ndo] nyushikike ngandji kanyu le ndi.” (2 Koreto 2:5-8) Lo dako sɔ diakasambiyama oma lo wolo wa nyuma k’ekila, sho mɛnaka ngandji ndo kɛtshi kaki Jehowa otsha le atshi wa pɛkato wayatshumoya. Andjelo wa l’olongo ngɛnangɛnaka lam’ayatshumoya otshi wa pɛkato.—Luka 15:10.
19. Ndjakiyanya efula lo kɛnɛ kendana la munga kɛmɔtshi kakatasale kokaka tela ɛlɔlɔ akɔna?
19 Kânga mbanyangaso lo dikambo dimɔtshi dia kɔlɔ diakatatshe, lonyangu lakɔ kokaka tokimanyiya dia ‘ndjalama di’aha sho ndjokawola nto lo dikambo diakɔ diakoka tosha otema kandji.’ (Jobo 36:21) Lo mɛtɛ, etombelo wa kɔlɔ w’oma lo pɛkato pombaka toshimba di’aha sho nyomɔkɔ nto lo pɛkato kakɔ. Ndo nto, Davidi akakambe la mpokoso yakokomɛ l’ɔtɛ wa pɛkato yakandatshe dia ndaka anto akina. Nde akate ate: “Dimi layetshaka akanga w’ehedia mbuka yaye, la antu wa kolo wayukalula le ye.”—Osambu 51:13.
Kambɛ Jehowa mbelaka ɔngɛnɔngɛnɔ
20. Ɛlɔlɔ akɔna wakondjaso lo kitanyiya ɛlɛmbɛ waki Nzambi wa losembwe?
20 Yeso akate ate: “Wane watuhukamaka diui dia [Nzambi], la watudikitanyiaka, mbeli [l’ɔngɛnɔngɛnɔ]!” (Luka 11:28) Kitanyiya ɛlɛmbɛ waki Nzambi wosembwe mbelaka ɔngɛnɔngɛnɔ oma ko kakianɛ polo ndo lo nshi yayaye yaha l’ekomelo. Naka sho tekɔ lo nama lɔkɛwɔ la pudipudi, kete sho kokaka tetemala lo mboka kɛsɔ lo ngɛnangɛna la tɛdikɔ tshɛ tɔsa Jehowa dia tokimanyiya. Naka tambɔkɔ l’awui wa mindo, kete toyakeketsha lo mbeya ɔnɛ Jehowa ekɔ suke dia dimanyiyɛ wanɛ wayatshumoya l’otema ɔtɔi, ndo toyashikikɛ di’aha nkɔ nto pondjo lo pɛkato kakɔ.—Isaya 55:7.
21. Dako diakɔna diaki ɔpɔstɔlɔ Petero diele naka sho kamba ladiɔ, kete diɔ kokaka tokimanyiya dia nama lɔkɛwɔ la pudipudi?
21 Kem’edja, andja ɔnɛ wa kɔlɔ wayeta, kâmɛ ndo waonga la ditshelo diakiwɔ tshɛ dia mindo. Naka sho nama lɔkɛwɔ lakiso la pudipudi, kete tayokondja ɛlɔlɔ efula oma ko kakianɛ ndo pondjo pondjo. Ɔpɔstɔlɔ Petero akafunde ate: “Okone, elangimi ami, ne dia nyu nyambulungamela akambu ane, nyutetemali dia nyu ntanema la ki, aha la vadi, aha la unungu lu ashu andi . . . Ne dia nyu nyambeyaka akambu ane ntundu, nyewo, nyutukunganela lu wetshelu w’antu wa kolo, nyu nyatukoko lu eshikikalu kanyu.”—2 Petero 3:14, 17.
Onde wɛ kokaka nembetshiya?
• Bonde kakokande monga wolo nama lɔkɛwɔ la pudipudi na?
• Naa toho tɔmɔtshi takokaso sukɛ yɛdikɔ yakiso ya ndjela ɛlɛmbɛ wa lâdiko wendana la lɔkɛwɔ na?
• Wetshelo akɔna wakokaso kondja oma lo pɛkato kakatshe ɔlɔngɔ a pami watɛkɛta Sɔlɔmɔna dikambo diande na?
• Ɛnyɛlɔ kaki Davidi toshaka wetshelo akɔna lo kɛnɛ kendana la ndjatshumoya?
[Osato wa lo lɛkɛ 25]
Mbewoya anto akina woho wɔsayɛ ɛlɛmbɛ wendana la lɔkɛwɔ la pudipudi ekɔ tshondo y’ekokelo
[Esato wa lo lɛkɛ 29]
Jehowa akadimanyɛ Davidi pɛkato yande, nɛ dia nde akayatshumoya l’otema ɔtɔi