Toyaɛkɛ le Nyuma ka Nzambi Lam’alɔshanaso l’Etshikitanu wa lo Lɔsɛnɔ

‘Sala la wolo ayɛ dia ndjakimɔ le Nzambi oko onto lambetawɔma.’​—2 TIMOTE 2:15.

1. Etshikitanu akɔna wakoka mbidja yonge yaso ya lo nyuma l’ohemba?

ANDJA wotodingi wekɔ lo tatshikitana. Tekɔ lo mɛna lo yoho ya diambo woho watahame siansɛ ndo awui wa tshulatshula kâmɛ ndo olanelo w’ɛlɛmbɛ wendana la lɔkɛwɔ l’ɔlɔlɔ. Oko wakatadiɛnyi lo sawo diakete, Akristo la dia shika tanga lo yimba y’andj’ɔnɛ yatona Nzambi. Oko watatshikitana andja, mbatatatshikitana sho lawɔ lo weho efula. Sho mongaka akɛnda ndo komaka epalanga. Sho koka shisha ɔngɔnyi, yonge yaso ya demba ndo onto ɔmɔtshi lalangaso efula kana monga nto l’ɔngɔnyi ndo la demba dia dimɛna. Hatokoke shimba di’etshikitanu ɛsɔ salema, ndo vɔ koka tela ekakatanu w’eyoyo ndo mbela etshikitanu wa mamba lo dikambo dia yonge yaso y’ɔlɔlɔ ya lo nyuma.

2. Lɔsɛnɔ laki Davidi lakonge l’etshikitanu akɔna?

² Anto yema tshitshɛ tsho ɛlɔ kɛnɛ mbahomana l’etshikitanu wa weke efula wa ngasɔ lo nsɛnɔ yawɔ oko Davidi di’ɔnaki Jɛse. Davidi laki kombeyamaka nshi yakinde ɔlɔngɔlɔngɔ w’olami w’ɛkɔkɔ akayongaka esadi eto la lokumu oko dihoka kana omvwedi a wodja. L’ɔkɔngɔ diko nde akayokomaka yekekɔ, mbut’ate akatatshanyemaka oko nyama oma le nkumekanga kɛmɔtshi kaki la kandjema. L’ɔkɔngɔ wa lâsɔ, Davidi akayokomaka nkumekanga ndo ombidji w’etshumba. Nde akakikɛ etombelo wa kɔlɔ wa pɛkato ka woke kakandasale. Mpokoso ndo diatɔnelo diakonge l’atei wa nkumbo kande. Nde akakondja lomombo, akakome osombe, ndo akɛnyi pâ la hemɔ yendana la lotshundu. Koko, kânga mbakonge lɔsɛnɔ lande l’etshikitanu efula, Davidi akayaɛkɛ tshɛ le Jehowa ndo le nyuma Kande. Nde akasale la wolo dia ndjakimɔ oko onto ‘lambetawɔma le Nzambi,’ ndo Nzambi akɔtshɔkɔla. (2 Timote 2:15) Kânga mbotshikitanyi ekakatanu aso la waki Davidi, sho kokaka kondja wetshelo oma lo yoho yakandasale akambo lo lɔsɛnɔ lande. Ɛnyɛlɔ kande kokaka tokimanyiya dia shihodia woho wakokaso tetemala kondja ekimanyielo ka nyuma ka Nzambi lam’atokomɛ etshikitanu lo lɔsɛnɔ laso.

Ndjakitshakitsha kaki la Davidi ekɔ ɛnyɛlɔ k’ɔlɔlɔ

3, 4. Ngande wele ɔlɔngɔlɔngɔ Davidi laki kombeyamaka, laki olami w’ɛkɔkɔ akayokomaka onto la lokumu efula lo wodja?

³ Lam’akinde dikɛnda, Davidi komonga la lokumu efula kânga lo nkumbo kande hita. Lam’akaye omvutshi Samuɛlɛ la Bɛtɛlɛhɛma, she Davidi akawɛnya anande esambele l’atei w’anande enanɛi. Davidi, ɔnande la kose akatshikala dia namaka ɛkɔkɔ. Koko, Jehowa akasɔnɛ Davidi dia monga nkumekanga k’Isariyɛlɛ ka lo nshi yayaye. Davidi akelamɛ oma l’ekambɔ lɛnɛ akinde. Oma lâsɔ, ɔkɔndɔ wa lo Bible mbutaka ɔnɛ: “Samuele akose luseki l’iso, akakiteto l’atei w’anangu. Nyuma ka [Jehowa] kakahema Davidi umaka lushi lako.” (1 Samuele 16:12, 13) Davidi akayaɛkɛ le nyuma kɛsɔ lo lɔsɛnɔ lande l’otondo.

⁴ Aha la tshimbatshimba dikɛnda sɔ di’olami w’ɛkɔkɔ akayokomaka onto la lokumu efula lo wodja ande. Nde akelamɛ dia kambɛ nkumekanga ndo mbohomɛka mishiki. Nde akadiake Ngɔliata ɔndɔshi w’ata, dikongote dia pami dia djawudi diele kânga asɔlayi w’ase Isariyɛlɛ wa tomanamana wakokaka wɔma ndɔ la nde. Lam’akawɔsɔnɛ oko ɔnɔmbɔdi w’alembe, Davidi akadje ase Filistiya otshumba. Anto wakolange efula. Vɔ wakawembɛ esambo dia mbotombola. L’etatelo, ondaki ɔmɔtshi waki Nkumekanga Saulo akate lo dikambo diaki ɔlɔngɔlɔngɔ Davidi ɔnɛ nde ‘mbeyaka lɔsɛsɛ’ ndo ɔnɛ nde aki “pami ka wulu, kanga dihunga, ndu ondoshi wa ta. Ndi nteketaka ololo; ndi eko dimena efula.”​—1 Samuele 16:18; 17:23, 24, 45-51; 18:5-7.

5. Kakɔna kakakoke konya Davidi lotamanya, ko ngande weyaso dia nde kokoma kanga lotamanya?

⁵ Mɛnamaka dia Davidi aki, onto la lokumu, l’olangala, ɔlɔngɔlɔngɔ, laki la diewo di’ɔtɛkɛta, dia mishiki, dia ta ndo aki onto laketawɔmaka le Nzambi. Ndoko dui ɔtɔi l’atei w’awui asɔ tshɛ diakokonya lotamanya. Tende woho wakakadimola Davidi Nkumekanga Saulo, lakawosha ɔnande la womoto dia nde mbotshuka. La ndjakitshakitsha ka mɛtɛ, Davidi akate ate: “Kemi na? Ndu lumu lami kelo? Khumbu ka papa keli na lu Isariyele, dia dimi ndjala ukilu wa khum’ekanga?” (1 Samuele 18:18) Lam’akandalembetshiyaka divɛsa nɛ nomb’ewo kɛmɔtshi k’awui wa lo Bible akafunde ate: “Davidi akalange mbuta diaha l’ɔtɛ wa diewo diaki lande, kana wa dihole diaki lande lo tshunda ndo wa dioho diande mbakandakoke ndjasɛma ɔnɛ l’ɔtɛ w’awui asɔ mambondokoma okilo wa nkumekanga.”

6. Lande na kahombaso monga la ndjakitshakitsha?

⁶ Davidi aki la ndjakitshakitsha nɛ dia nde akeyaka dia l’oseka dikambo tshɛ Jehowa ndeka anto wele kema kokele la fwa. Davidi akâmbe woho wele Nzambi kanelaka anto. (Osambu 144:3) Davidi akeyaka nto dia lokumu tshɛ lakakokaka monga lande laki paka nɛ dia Jehowa akayakitshakitsha dia mbosukɛ, mbokokɛ, ndo mbokotshɛ ehomba ande. (Osambu 18:35) Ande wetshelo wa dimɛna efula le so! Diewo diaso, awui wasalaso lo lɔsɛnɔ ndo waɛsɛ aso hawohombe pondjo tokonya lotamanya. Ɔpɔstɔlɔ Paulo akafunde ate: “Engo kakona kele laye, kakiye kunungula? Keli naka we akakilungula, ukundi ayandulaye uku we ku[kil]ungula?” (1 Koreto 4:7) Dia kondja nyuma k’ekila kaki Nzambi ndo dia mbetawɔma le nde, sho la dia monga la ndjakitshakitsha ndo tetemala monga latɔ.​—Jakoba 4:6.

“Tanyuyasombweyaki”

7. Naa diaaso diakakondja Davidi dia ndjaka Nkumekanga Saulo?

⁷ Kânga mbele lokumu lakonge la Davidi kombokonya kanga lotamanya, lokumu lɔsɔ lakasha Nkumekanga Saulo ɔnɛ laki komonga nto la nyuma kaki Nzambi kandjema. Kânga mbaki Davidi kosala ndoko dikambo dia kɔlɔ, nde akalawɔ nɛ dia lɔsɛnɔ lande laki lo wâle ko akatodjasɛka l’oswe. Lo diaaso dimɔtshi, lam’akandatatshananaka la Davidi, Nkumekanga Saulo akatɔtɔka lo wôko ɔmɔtshi wa dive aha la nde mbeya dia Davidi l’anto ande wakɔlama lɔkɔ. Anto waki Davidi wakotshutshuya dia nde kamba la diaaso diakawɛnaka di’oko Nzambi mbowoshadiɔ dia nde ndjaka Saulo. Sho kokaka monga oko anto wawaɛna lo dihole dia wodjima sɔ watɛ Davidi lo hiɔtɛhiɔtɛ ɔnɛ: “Lushi lone, mbeli lushi lakakutela [Jehowa] ati: Enda, layukimo utunyi aye lu anya aye, dia we mbutshela uku alangaye.”​—1 Samuele 24:2-6.

8. Lande na kele Davidi akatone ndjasɔmbwɛya?

⁸ Davidi akatone ndjaka Nkumekanga Saulo. Lo monga la mbetawɔ ndo la lotutsha, nde akangɛnangɛna kitsha awui tshɛ l’anya wa Jehowa. L’ɔkɔngɔ wa nkumekanga tomba oma lo wôko, Davidi akawelɛ ndo akate ate: “[Jehowa] utu kayutusambula shu ahendi. Ndi kayukosomboya lu dikambu diami. Keli dimi halukahe lunya.” (1 Samuele 24:12) Kânga mbakandeyaka dia Saulo mbaki la kɔlɔ, Davidi kondjasɔmbwɛya; kana tɛkɛtɛ Saulo aha la dilɛmiɛlɔ kana tɛkɛta kɔlɔ lo lokombo lande. Lo waaso akina efula, Davidi kosala akambo la shɔmbɔya. Koko, nde akayaɛkɛ le Jehowa dia sembola akambo.​—1 Samuele 25:32-34; 26:10, 11.

9. Lande na kahatahombe ndjasɔmbwɛya naka tambohomana l’ɔlɔshamelo kana l’ɛhɛnyɔhɛnyɔ?

⁹ Oko Davidi, wɛ koka tanema la ntondo k’ekakatanu a wolo. Ondo wɛ ekɔ lo ndɔshama ndo ekɔ lo pɛnyahɛnyama oma le asekayɛ wa la kalasa, wa l’olimu, oma le ase nkumbo kayɛ, kana oma le anto akina wele bu layɛ mbetawɔ ɔtɔi. Toyasɔmbwɛyake. Kitsha tshɛ l’anya wa Jehowa, lɔmbakande nyuma kande k’ekila dia kokimanyiya. Ondo anto asɔ wahetawɔ wayotshikala la diambo oma lo lɔkɛwɔ layɛ l’ɔlɔlɔ ndo wayoyokoma ambetawudi. (1 Petero 3:1) Lo dui tshɛ diatomba, yashikikɛ dia Jehowa ekɔ lo mɛna okakatanu ayɛ ndo ayosala dui dimɔtshi lo kɛnɛ kendana l’okakatanu akɔ l’etena kakandashikikɛ. Ɔpɔstɔlɔ Paulo akafunde ate: “Anyasu wa ngandji, tanyuyasombweyaki; nyutshikeli kele ka [Nzambi] dihuli. Ne dia wakafundi vati: Somboya keli dikambu diami. Dimi layulemanya la wo, mbata Khumadiondjo.”​—Romo 12:19.

‘Nyolonge ohokwelo’

10. Ngande wakakɔ Davidi lo pɛkato, ndo ngande wakandayange dia kishɛ?

¹⁰ Ɛnɔnyi efula wakete. Davidi akakome nkumekanga kakalangemaka ndo kaki la lokumu efula. Kɔlamelo y’efula yaki lande, ndo esambo w’amɛna efula wakandafunde dia lotombo la Jehowa, mbeyaka mɛnya esadi eto dia nde aki onto laki kokokaka pondjo sala pɛkato ka woke. Koko, nde akasale pɛkato ka woke. Lushi lɔmɔtshi, lo sambe kande ka luudu, nkumekanga akɛnyi womoto ɔmɔtshi l’olangala ɔ̂ka ndamɛmɛ. Nde akambola dia mbeya aki womoto ɔsɔ. Lam’akandeye dia womoto ɔsɔ aki Batɛshɛba ndo ɔnɛ omɛnde Uriya akatshu lo ta, Davidi akatome dui dia vɔ mbela womoto ɔsɔ ko nde akeyana la nde. L’ɔkɔngɔ diko, nde akɛnyi dia womoto ɔsɔ aya la diemi. Ande sɔnyi naka dui sɔ tomba sɛkɛ! L’Ɛlɛmbɛ wa Mɔsɛ onto lasala loseka kana monanyi akahombaka ndjakema. Ondo nkumekanga akafɔnya dia pɛkato kɛsɔ kakakoke mbishɛma. Ɔnkɔnɛ, nde akatome dui le alembe dia vɔ kaloya Uriya oya la Jerusalɛma. Davidi akalongamɛka di’Uriya ayoyetsha otsho w’otondo nde la Batɛshɛba, koko dui sɔ kosalema. Lam’akandɛnyi dia hayeyama, Davidi akakaloya Uriya otsha lo ta la mukanda otsha le Jɔaba, owandji w’alembe. Mukanda ɔsɔ wakɛnyaka dia paka mbetsha Uriya lo dihole dioleki ta wolo diakandahombe mvɔ. Jɔaba akakitanyia ɔlɛmbɛ ɔsɔ, ko Uriya akadiakema. L’ɔkɔngɔ wa Batɛshɛba shidiya awui wendana la nyɔi k’omɛnde, Davidi akawɔshi dia nde monga wadɛnde.​—2 Samuele 11:1-27.

11. Dui diakɔna diakatɛ Natana Davidi, ndo kakɔna kakasale Davidi?

¹¹ Mɛnamaka di’oko Davidi akatondoya lo welo wakandadje dia mbishɛ pɛkato, kânga mbakandahombe mbeya dia dikambo sɔ tshɛ diaki otakataka la ntondo ka Jehowa. (Heberu 4:13) Ngɔndɔ efula yakete, ndo ɔna akayotɔ. Oma lâsɔ, l’ɛlɔmbwɛlɔ ka Nzambi, omvutshi Natana akatshu le Davidi. Omvutshi ɔsɔ akasha Davidi ɛnyɛlɔ ka kanga ɔngɔnyi ɔmɔtshi laki l’ɛkɔkɔ efula lakɔshi ndo lakadiake yana y’ɔkɔkɔ yakalangemaka efula yaki kanga wola. Ɔkɔndɔ ɔsɔ wakayotshutshuyaka Davidi dia kamba la losembwe aha la mbeya kɛnɛ kaki l’edia k’ɔkɔndɔ akɔ. Davidi akasambola dikambo sɔ esadi eto la losembwe lo mɛnya dia kanga ɔngɔnyi ɔsɔ aki l’onongo. La kɛlɛ tshɛ, nde akatɛ Natana ate: “Pami kakatshi dikambu so [pombaka] ndjakema!”​—2 Samuele 12:1-6.

12. Elomboyelo kakɔna kakela Jehowa Davidi?

¹² Natana akôkaloya dui ati: “We keli untu ako!” Davidi akayalombosha ndamɛ. Aha la tâmu, lonyangu laki Davidi lakawela sɔnyi ndo ɔkɛyi w’efula. Nde akandama la lɔkɔnyɔ l’otema etena kakakɔndɔlaka Natana elombwelo kaki Jehowa kakinde kokoka mbewɔ. Ndoko dui di’ekeketshelo ɔtɔi diakandatondja. Davidi akɔnyɔla ɔtɛkɛta waki Jehowa lo sala kɛnɛ kaki kɔlɔ. Onde nde kondjaka Uriya la yɔɔmbɔ y’otunyi? Yɔɔmbɔ hayomɔki pondjo oma lo luudu laki Davidi. Onde nde kɔmbɔsa wad’aki Uriya lo woshɛshɛ? Dikambo dia kɔlɔ dia ngasɔ diakahombe mbokomɛ, aha lo woshɛshɛ, koko lo sɛkɛ. 2 Samuele​—12:7-12.

13. Ngande wakɔshi Davidi ohokwelo wa Jehowa?

¹³ Dui di’ɔlɔlɔ diakokaso mbuta lo dikambo diaki Davidi, ele nde komanguna onongo ande. Nde kombudunganɛ la kɛlɛ otsha le omvutshi Natana. Nde kopangwɛ akina kana nyanga yɛkɛ ɛnɛndɛ lo kɛnɛ kakandasale. Lam’akandatshe pɛkato, Davidi akayetawɔ lo mbuta ate: “Dimi lakatshela [Jehowa] kolo.” (2 Samuele 12:13) Osambu 51 mɛnyaka ɔkɛyi waki lande dikambo di’onongo ande ndo ndjatshumoya kande k’efula. Nde akalɔmbɛ Jehowa ate: “Tumbitshanyaki etali uma la ntundu kaye, tunyaki nyuma k’ololo kaye uma le mi.” Nde aki la mbetawɔ dia Jehowa, lo kɛtshi kande, hatɔnyɔlaka “sulu diambate kana utema wa ndjakitshakitsha” w’ɔnɛ lotshe pɛkato. (Osambu 51:11, 17) Davidi akatetemala ndjaɛkɛ le nyuma ka Nzambi. Kânga mbele Jehowa kokokɛ Davidi oma l’etombelo wa kɔlɔ wa pɛkato kande, nde akôdimanyiya.

14. Ngande wahombaso mbɔsa ohokwelo wa Jehowa?

¹⁴ Sho tshɛ kema kokele, ndo sho tshɛ salaka pɛkato. (Romo 3:23) Tena dimɔtshi sho kokaka sala pɛkato ka woke, oko Davidi. Oko wahokola ombutshi wa ngandji anande, Jehowa mpokolaka wanɛ wayanga dia mbokambɛ. Koko, kânga mbele ohokwelo wekɔ ohomba, kema dikambo dia wɔdu dia mbêtawɔ. Kele mbala mɔtshi mbetawɔ ohokwelo ekɔ “fono.” (Heberu 12:​6, 11) Koko, naka sho ‘mbetawɔ ohokwelo,’ kete tayokana la Jehowa. (Tukedi 8:33) Dia sho tetemala kondja ɛtshɔkɔ w’oma le nyuma ka Jehowa, sho la dia mbetawɔ wongwelo ndo nyanga dia mbetawɔma le Nzambi.

Tatokitshake elongamelo l’ɛngɔnyi wele kema shikaa

15. (a) Lo weho akɔna wakamba anto amɔtshi l’ɛngɔnyi awɔ? (b) Ngande wakakombola Davidi kamba l’ɛngɔnyi ande?

¹⁵ Ndoko kɛnya ɔnɛ Davidi aki la dihole dimɔtshi dia lâdiko kana ɔnɛ nkumbo kande kaki l’ɔngɔnyi. Koko, lo lowandji lande, Davidi akonge ɔngɔnyi w’efula. Oko wadieyayɛ, efula ka wanɛ wayamɔtshɛ ɛngɔnyi, nyangaka la lokaki tshɛ dia fudia ɛngɔnyi akɔ. Akina kambaka l’ɛngɔnyi awɔ dia ndjatombola. (Mateu 6:2) Davidi akakambe l’ɔngɔnyi ande lo yoho yotshikitanyi. Nde akakombola tombola Jehowa. Davidi akewoya Natana mposa kande ka mbikɛ Jehowa tɛmpɛlɔ dikambo di’ɔshɛtɛ wa sheke, waki la Jerusalɛma “lu luudu la dipɛma.” Jehowa akangɛnangɛna tokanyi taki Davidi koko oma lo tshimbo ya Natana nde akawotɛ di’ɔnande Sɔlɔmɔna mbayoyoka tɛmpɛlɔ kɛsɔ.​—2 Samuele 7:1, 2, 12, 13.

16. Ɛlɔngɔswɛlɔ akɔna wakasale Davidi dia wokelo wa tɛmpɛlɔ?

¹⁶ Davidi akatshumanya diangɔ diakawahombe kamba la diɔ dikambo di’ohikelo ɔsɔ wa woke. Davidi akatɛ Sɔlɔmɔna ate: “Lambolongoswela luudu la [Jehowa] talata ya paunyi nunu lukama, la talata ya fesa miliyona otoi, la efula ka ehotela, la ka mbulu kaheyama mbedika; ne dia yo yeko efula. Dimi lakalongosola ndu etamba l’ave, we kuyukutsha.” Oma l’ɔngɔnyi ande hita, nde akakimɔ talata ya paunyi 3 000 ndo talata ya fesa 7 000.a (1 Ekondo 22:14; 29:​3, 4) Davidi kokimɔ diangɔ sɔ dia mɛnya dia nde kele kanga lokaho koko nde akɛnya mbetawɔ ndo ndjakimɔ kande le Jehowa Nzambi. Lo mbeya Kiɔkɔ y’ɔngɔnyi ande, nde akatɛ Jehowa ate: “Uma l’anya aye katutulungulaka kene kakulambulasu.” (1 Ekondo 29:14) Lokaho laki la Davidi akotshutshuya dia sala kɛnɛ tshɛ kakandakokaka sala dia pamia ɔtɛmwɛlɔ wa pudipudi.

17. Ngande wendana dako dia lo 1 Timote 6:17-19 l’akanga w’ɛngɔnyi ndo l’ase wola?

¹⁷ Woho akɔ wâmɛ, nyɛsɔ tokambe la diangɔ diaso dia l’emunyi dia sala kɛnɛ kele ɔlɔlɔ. L’ɔtɛ wa ndjela yoho ya lɔsɛnɔ yoludi la mposa ka lomombo la l’emunyi, ekɔ ɔlɔlɔ efula nyanga dia mbetawɔma le Nzambi, ɔsɔ kele mboka ka lomba la mɛtɛ ndo k’ɔngɛnɔngɛnɔ wa mɛtɛ. Paulo akafunde ate: ‘Tɛtɛ akanga w’ɛngɔnyi wa l’andja ɔnɛ diaha vɔ ndjala la lotamanya; tɛ̂wɔ diaha vɔ mbahɛ asolo wâkiwɔ l’ekundji ɛnɛ wahangana la mbeta, koko waahɛ asolo wakiwɔ le Nzambi latosha diangɔ tshɛ emete emete dia sho ngɛnangɛna. Tɛtɛ̂wɔ dia vɔ tsha kɛnɛ kele ɔlɔlɔ, dia vɔ ndjala akanga w’ɛngɔnyi lo tsha akambo w’ɛlɔlɔ, dia vɔ ndjala la lokaho ndo ndjala anto wahakɔhɛ kahana l’anto akina kɛnɛ kewɔ latɔ. Ɔnkɔnɛ vɔ wekɔ lo tshumanya okundji w’ɔlɔlɔ ndo wa shikaa dia nshi yokoya, lâwɔ vɔ wayokoka la nongola lɔsɛnɔ la mɛtɛ.’ (1 Timote 6:17-19) Oyadi tekɔ l’ɛngɔnyi kana bu, nyɛsɔ toyaɛkɛ le nyuma ka Nzambi ndo toyele yoho ya lɔsɛnɔ layotetɛ ‘ɛngɔnyi lo washo wa Nzambi.’ (Luka 12:21) Ndoko kɛnɛ koleki mbetawɔma oma le Shɛso ka ngandji lele l’olongo.

Yakimɔ le Nzambi oko onto lambetawɔma

18. Lo yoho yakɔna yakatshikɛ Davidi Akristo ɛnyɛlɔ k’ɔlɔlɔ?

¹⁸ Lo lɔsɛnɔ lande l’otondo Davidi aketawɔmaka le Jehowa. L’osambo, nde akate la dui dia wolo ate: “[Nzambi] li, umbuki ketshi, umbuki ketshi! Ne dia lumu lami latuyangaka eshamelu le ye.” (Osambu 57:⁠1) Ndjaɛkɛ kande le Jehowa komonga anyanya. Davidi akatshunde, “akunduya andja.” (1 Ekondo 23:1) Kânga mbakasale Davidi munga ya weke, nde mbohɔmaka oko ɔmɛnyi wa Nzambi ɔmɔtshi wakɛnya mbetawɔ ka shikaa.​—Heberu 11:2.

19. Ngande wakokaso ndjakimɔ le Nzambi oko anto wambetawɔma?

¹⁹ Lam’ahomanayɛ l’etshikitanu lo lɔsɛnɔ, ohɔ dia woho wakasukɛ, wakakeketsha, wakangola Jehowa Davidi, mbakokande sala lo dikambo diayɛ. L’ɛnyɛlɔ kaki Davidi, ɔpɔstɔlɔ Paulo nde lawɔ akahomana l’etshikitanu efula lo lɔsɛnɔ. Koko, nde lawɔ akatshikala la kɔlamelo lo ndjaɛkɛ le nyuma ka Nzambi. Nde akafunde ate: “Dimi mbeyaka ntsha akambu tshe la wulu wa one latunkikitshaka.” (Filipi 4:12, 13) Naka sho ndjaɛkɛ le Jehowa, kete nde ayotokimanyiya dia tondoya. Nde nangaka sho tondoya. Naka sho mbohokamɛ ndo ndjasukanya le nde, kete nde ayotosha wolo wa sala lolango lande. Ndo naka sho tetemala ndjaɛkɛ le nyuma ka Nzambi, kete sho tayokoka ‘ndjakimɔ le nde oko anto wambetawɔma’ kakianɛ ndo pondjo la pondjo.​—2 Timote 2:15.

[Nɔtɛ ka l’ɛse ka dikatshi]

Ngande Wayoyokadimola?

• Lande na kahatahombe monga la lotamanya?

• Lande na kahatahombe ndjasɔmbwɛya?

• Kanyi yakɔna yahomba monga laso lo dikambo di’ohokwelo?

• Bonde kahombaso ndjaɛkɛ le Nzambi koko aha l’ɛngɔnyi?

[Osato wa lo lɛkɛ 28]

Davidi akayaɛkɛ le nyuma ka Nzambi ndo aketawɔma le Nzambi. Onde we salaka ngasɔ?

[Osato wa lo lɛkɛ 30]

“Uma l’anya aye katutulungulaka kene kakulambulasu”