Ɛmɛnyi wa Jehowa wekɔ lo tatshu otsha la ntondo l’eshikikelo ka wolo!

Alapɔlɔ w’oma lo losanganya la l’ɔnɔnyi

LO NSHI nyɛ yambolola awui wa tamu ndo wa diɔnyɔ, Ɛmɛnyi wa Jehowa wekɔ lo ndjatshikitanya l’anto akina oma mbetawɔ ka wolo kele lawɔ. Dikambo sɔ diakɛnama hwe ɔnɔnyi ɔnɛ lo losanganya la l’ɔnɔnyi lakɔtɔ Société Watch Tower lakasalema lo Mbalasa ka nsanganya ya weke k’Ɛmɛnyi wa Jehowa kele l’osomba wa Jersey, lo wodja wa New Jersey, Lushi la Samalo Ngɔndɔ ka Dikumi 7, 2000.a

L’ɛtɛkɛta ande wa mbɔtwɛlɔ, ɔnɔmbɔdi wa losanganya lɔsɔ, John Barr, ɔmɔtshi la lo Olui-Walɔmbɔla w’Ɛmɛnyi wa Jehowa, akate ate: “L’atei wa miliyara y’anto wa lo nkɛtɛ k’otondo, sho ato mbetawɔ dia Yeso Kristo, Ɔnaki Jehowa lalangande efula, ekɔ kakianɛ lâdiko wa kiti ka lowandji l’olongo ndo ekɔ lo mbolɛ l’atei w’atunyi ande.” Alapɔlɔ esamalo wa diambo w’oma l’ahole wotshikitanyi wa l’andja ɔnɛ wakɛnya mbetawɔ ka wolo kɛsɔ kele laso.

La Haïti: akambo wa mɛtɛ wa lo Bible wamboleka awui w’Ɛdiɛngɛ wolo

La Haïti, anto efula ndjashaka l’awui w’ɛdiɛngɛ. John Norman, ɔnɔmbɔdi wa Kɔmite ka filialɛ ka lɛkɔ akate ate: “Mbala efula, anto ndjadjaka l’ɔtɛmwɛlɔ w’ashidi welɛwɔ vaudou dia ndjakokɛ.” L’ɔkɔngɔ wa nde pembɔ lokolo l’aksida ɔmɔtshi kanga dɔka ɔmɔtshi akatatɛ monga la tamu. Nde akayambola ate: ‘Ngande wokoki dikambo nɛ komɛmi naka ɛdiɛngɛ mɛtɛ wekɔ lo nkokɛmi na?’ Ɛmɛnyi wa Jehowa wakawetsha akambo wa mɛtɛ ndo wakokimanyiya dia nde mpembola losambi la ɛdiɛngɛ, oko wambowokimanyiya anto akina efula dia sala dikambo sɔ. Kɛnɛ kɛnya dia ohamelo wayonga efula lo wodja wa Haïti ele woho ɔnɛ wele, lo Ngɔndɔ ka Nɛi 19, 2000, anto wakɔtɔ lo losanganya la Eohwelo ka nyɔi ka Kristo ndeka lofulo l’apandjudi wa Diolelo la lo wodja ɔsɔ mbala nyɛi.

Ohetoheto lo mbilo ka woke ka la Corée

Lo wodja wa Corée, % 40 y’Ɛmɛnyi wa Jehowa wekɔ lo kamba olimu wa lo tena tshɛ. Milton Hamilton, ɔnɔmbɔdi wa Filialɛ ka lɛkɔ akate ate: “La lemba la woke l’apandjudi lɔnɛ, mbilo kaso kele l’anto ndekana miliyɔ 47 kindjakindjamaka tshɛ oko mbala ɔtɔi lo ngɔndɔ.” Lo tshumanelo di’ɔtɛkɛta w’akanga wa mpoke mamboleka mɛnama ohamelo. L’otshimbedi ɔmɔtshi w’ɔtɛkɛta w’akanga wa mpoke, wekɔ lo mbeka Bible l’anto 800. Lo yɛdikɔ ya l’atei atei opandjudi ɔtɔi ekɔ lo mbeka l’onto ɔtɔi Bible. Lonyangu ko, anangɛso w’ɛlɔngɔlɔngɔ wekɔ lo tetemala mbidjama lo nkanu l’ɔtɛ wa lomangemange lawɔ. Koko, kânga lɛnɛ ewɔ lo nkanu, Akristo wa kɔlamelo asɔ wekɔ lo nɛnyama, ndo wekɔ lo mbasha ɛkɛndɛ wahawakoke mbisha onto lavɔwɔ tshɔnda.

Kɛnɛ kambowosala lo menda ehamelo wa lo wodja wa Mexique

Lo wodja wa Mexique, apandjudi wa Diolelo 533 665 wakakimɔ alapɔlɔ awɔ w’olimu lo Ngɔndɔ k’Enanɛi 2000. Lofulo l’anto wakɔtɔ lo Eohwelo ndeka lofulo lɔsɔ mbala shato. Robert Tracy, ɔnɔmbɔdi wa Filialɛ ka lɛkɔ akate ate: “Oyango wele laso ɔnɔnyi ɔnɛ ele wa mbika Mbalasa ya Diolelo 240.” Nde akate nto ate: “Kânga sho kokaka lofulo la mbalasa lɔsɔ, tayonga paka l’ohomba wa mbalasa efula.”

Ɛlɔngɔlɔngɔ w’Ɛmɛnyi wa Jehowa wa lo wodja wa Mexique mbishaka ɛnyɛlɔ k’ɔlɔlɔ. Osasɛrdɔsɛ ɔmɔtshi w’oseka Mupɛ akate lo dikambo di’ɔlɔngɔlɔngɔ ɔmɔtshi ate: “Dimi nangaka monga kanga l’onto ɔtɔi lele oko nde l’atei w’anto wa lo parɔwasɛ kami. Dimi ngɛnangɛnaka ɛlɔngɔlɔngɔ wakinyu oma l’etete kawɔ ndo lo woho weyawɔ kamba la Bible. Vɔ sambishaka awui waki Nzambi kânga lam’ele nsɛnɔ yawɔ lo wâle.”

Kɔlamelo kânga l’atei w’efukutanu wa la Sierra Leone

Tatɛ oma lam’akatatɛ dia lasa ase wodja la Sierra Leone, lo Ngɔndɔ ka Nɛi 1991, nunu di’anto diakadiakema, wakahomɔ ndo wakahembɔma anya, ekolo kana tenyi dikina dia demba. Bill Cowan, ɔnɔmbɔdi wa Filialɛ wa lɛkɔ akate ate: “Ta ndo shɔkɔ yakonge la shɛngiya y’efula le anto. Efula ka wanɛ wakatonaka mpokamɛ losango laso, wolihokamɛ kakianɛ la yambalo y’efula. Anto woyaka oya lo Mbalasa yaso ya Diolelo dia ndjɔtɔ lo nsanganya aha la sho mbaeta. Mbala efula anto wemɛka anangɛso l’atei wa shinga dia mbâlɔmba dia vɔ mbeka la wɔ Bible.” Kânga mbele efukutanu watashile lo wodja, olimu w’esambishelo ka Diolelo wekɔ lo ntɔ elowa w’amɛna lɛkɔ.

Olimu wa woke wa wokelo wekɔ lo kambema l’Afrique du Sud

Nshi nyɛ, ɛtshi ka nkɛtɛ kendama oma le Filialɛ ka l’Afrique du Sud kekɔ l’ohomba wa nunu dia Mbalasa ya Diolelo. Mbalasa nkama yamboshila la mbikama. John Kikot, ɔmɔtshi la l’atei wa kɔmite ka Filialɛ ka lɛkɔ akate ate l’ɔngɛnɔngɛnɔ tshɛ ate: “Lo dihole dia mbɔtɔka nsangaya lo langango kana l’ɛse k’esongo oko wakadiatshamaka ntondo, anangɛso wokoka sangana lo dihole dia pudipudi diele la didjaselo di’amɛna.” Kânga mbele Mbalasa ya Diolelo shɔ kema ya yaka yende, l’ahole weyɔ, yɔ mbadiemaka l’atei wa mvudu y’elangala. L’ahole amɔtshi, ɔnɔnyi ɔtɔi l’ɔkɔngɔ wa ekelo ka Mbalasa ka Diolelo, lofulo la wanɛ wakayaka lo nsanganya lakadɛ l’ahende.”

Lɔlɔnga l’oyoyo l’Ɛmɛnyi lo Ukraine

L’ɔnɔnyi w’olimu wa 2000, wodja ɔsɔ akakonya apandjudi 112 720. Apandjudi ndekana 50 000 wa l’atei awɔ wakeke mɛtɛ ka lo Bible l’ɛnɔnyi etanu wetshi ɛnɛ. John Didur, ɔnɔmbɔdi wa Filialɛ ka lɛkɔ akate ate: “Mɛtɛ, Jehowa ekɔ lo tshumanya lɔlɔnga l’oyoyo l’Ɛmɛnyi w’ɛlɔngɔlɔngɔ dia vɔ mbewɔnya lokombo lande! . . . Lo ɛnɔnyi ehende wetshi ɛnɛ, takakahɛ anto periodikɛ ndekana miliyɔ 50, lofulo lɛdimi la lofulo l’anto wa lo wodja. Ngɔndɔ tshɛ, lo yɛdikɔ ya l’atei atei sho nongolaka mikanda kinunu oma le anto wele la nsaki walɔmba dia mbeya akambo efula.”

Akambo akina w’ohomba efula wa lo losanganya

Daniel Sydlik, ɔtɔi ɔmɔtshi wa l’Olui-Walɔmbɔla, akasha dako dia lɔɔka efula. Sawo dimɔtshi diele l’ɔtɛ a dui ɔnɛ: “Olui-Walɔmbɔla Tshikitana la Tshunda Dimɔtshi Dietawɔma le Lɛɛta,” diatanema lo periodikɛ kɛnɛ, diekɔ l’akambo wakatama lo dako sɔ.

Theodore Jaracz, okina la l’Olui-Walɔmbɔla akasha dako diatshutshuya anto dia kana yimba diaki l’ɔtɛ ɔnɛ: “Emendji ndo Ekambi w’Olimu Wekɔ lo Sɔnama lo Ndjela Teokrasi.” Sawo dimɔtshi dia lo periodikɛ kɛnɛ diekɔ lo ntɛkɛta dikambo dia dako sɔ.

David Splane, ɔmɔtshi la l’Olui-Walɔmbɔla akasha nde lawɔ dako dia mamba lo losanganya lɔsɔ la l’ɔnɔnyi, dako diande diakendana la kɛnɛ kele lo divɛsa diaso dia l’ɔnɔnyi wa 2001. Divɛsa diakɔ mbɔsama oma l’ɛtɛkɛta waki ɔpɔstɔlɔ Paulo wata ɔnɛ: ‘Tonge kokele ndo la mbetawɔ ka nge lo kɛnɛ kendana la lolango tshɛ laki Nzambi.’ (Kolosai 4:12) Kɛsɔ mamboyashikikɛ Ɛmɛnyi wa Jehowa tshɛ dia sala lo sambisha la kɔlamelo tshɛ lokumu l’ɔlɔlɔ la Diolelo diaki Nzambi lo nkɛtɛ k’otondo.​—Mateu 24:14.

[Nɔtɛ ka l’ɛse ka dikatshi]