Onde wɛ ambɔtshiya akambo wa mɛtɛ l’otema ayɛ?

‘Nyoyakadimole lo mpiloya timba tanyu, woho wa nyu mpotɔ lolango laki Nzambi l’ɔlɔlɔ, letawɔma, ndo la kokele.’​—Romo 12:2.

1, 2. Lande na kele monga Okristo wa mɛtɛ kema dikambo dia tshitshɛ nshi nyɛ?

DIA monga Okristo wa mɛtɛ lo nshi y’ekomelo nyɛ, mbut’ate lo ‘tena [nɛ] dia pâ ndo dia wolo mbikikɛ’ kema dikambo dia tshitshɛ. (1 Timote 3:1) Koko lo mɛtɛ, di’onto ndjela ɛnyɛlɔ kaki Yeso nde pombaka mbidja andja ɔnɛ otshumba. (1 Joani 5:4) Tohɔ kɛnɛ kakate Yeso lo dikambo dia mboka k’Okristo, nde akate ate: “Nyoto lu suku dia tshitshe, ne dia suku dieli wuki, la mbuka keli wuki utsha l’elanyelu, antu efula watotoka loko. Ne dia suku dieli tshitshe, la mbuka keli tshitshe utsha lu lumu, antu atoi mbatukienaka.” Nde akate nto ate: “Naka untu nangaka ndjelami, ndi ayaseke, embe utamba andi [“w’asui,” NW] lushi la lushi, andjeli.”​—Mateu 7:13, 14; Luka 9:23.

² L’ɔkɔngɔ w’Okristo tana mboka ka tshitshɛ k’otsha lo lɔsɛnɔ, okakatanu wele la nde ele wa tetemala kɛndakɛnda lɔkɔ. Lande na kele kɛndakɛnda lo mboka ka tshitshɛ ekɔ dikambo dia wolo na? Nɛ dia ndjâkimɔ ndo batismu kaso todjaka l’atei w’anto anɛ wayanga Satana dia mbâtadja lo tolonga tande ta mayɛlɛ kana dia mbâkesa. (Efeso 6:11) Nde nembetɛka wɛɔdu aso ndo nyangaka dia kamba la wɔ l’oyango wa nde nanya lonyuma laso. Lam’ele nde akahembe dia kɔsha Yeso, onde sho koka nongamɛ dia nde ayototshika kii?​—Mateu 4:1-11.

Tolonga taki Satana ta mayɛlɛ

3. Ngande wakonɛ Satana tamu lo yimba yaki Eva?

³ Djonga mɔtshi yakamba la Satana ele, mbidja tamu lo timba taso. Nde mendaka wɛɔdu wele laso lo kɛnɛ kendana l’ɔlɔtɔ aso wa ta wa lo nyuma. Oma k’etatelo, nde akakambe la djonga shɔ dia minganyiya Eva, lo mombola ate: ‘Onde mɛtɛ kakanyotɛ Nzambi di’aha nyu ndɛ elowa w’oma l’otamba tshɛ wa l’ekambɔ kɛnɛ?’ (Etatelu 3:1) L’ɛtɛkɛta ekina, ekɔ oko Satana akataka ate: ‘Onde mɛtɛ Nzambi akakoke nyodjɛ woho w’ɔlɛmbɛ ɔsɔ? Kema nde akanyodime ɛngɔ kɛmɔtshi ka dimɛna efula? Lâsɔ, nda mɛtɛ Nzambi mbeyaka ɔnɛ lushi layonyɔlɛ olowa w’oma l’otamba ɔsɔ mbayodihɔ washo anyu ndo mbayonyonga oko Nzambi, lo mbeya tshikitanya ɔlɔlɔ la kɔlɔ!’ Satana akonɛ lɔtɔngɔ lɔmɔtshi la tamu lo wɔɔngɔ waki Eva ko akakongɛ dia lɔ tatɛ ntomba.​—Etatelu 3:5.

4. Naa tamu takoka anto amɔtshi monga latɔ ɛlɔ kɛnɛ?

⁴ Ngande wakamba Satana la djonga shɔ ɛlɔ kɛnɛ na? Naka sho minya yimba lo wadielo aso wa Bible, lo wekelo aso w’onto ndamɛ, lo dɔmbɛlɔ, lo olimu w’esambishelo ndo lo nsanganya yaso y’Akristo, kete tayotshikɛ tamu t’oma le anto akina dihole dia tɔ mbɔtɔ lo wɛɔngɔ aso. Oko ɛnyɛlɔ: “Ngande weyaso ɔnɛ akambo wa mɛtɛ wekaso ɛlɔ kɛnɛ wekɔ paka woho wakatalakanyisha Yeso?” “Onde nshi nyɛ mɛtɛ yekɔ nshi y’ekomelo? Kema sho anɛ tamboshila la mbɔtɔ lo ntambe ka 21.” “Onde tekɔ suke la Aramangɛdɔna kana tekekɔ etale?” Naka weho wa tamu ta ngasɔ tambɔtɔ lo wɛɔngɔ aso, ahombaso ntsha dia tinya na?

5, 6. Ahombaso sala naka tamu tambotomba na?

⁵ Jakɔba akasha dako dia dimɛna efula lam’akandafunde ate: “Naka omotshi ambuhumba [lo]mba, ndi alombe [Nzambi], katushaka antu tshe diango la lukahu, hâhangwela, ku ndi ayuwusha[l]o. Keli ndi alombe la mbetawo, aha la tamu, ne dia untu ladja tamu, eko uku sukhu di’ashi a wuki, diasukuyama la diasutshasutshama la loheledi. Untu uku takanaki ati: Layulungula engo uma le [Jehowa]; untu uku eko la etema ehendi, atahahoka lu akambu andi tshe.”​—Jakoba 1:5-8.

⁶ Lâsɔ, ahombaso ntsha na? Sho pombaka ‘tetemala la nɔmba Nzambi’ lo dɔmbɛlɔ dia nde tosha mbetawɔ la eokelo ndo dia nde keketsha welo wadjaso dia ntshaka wekelo w’onto ndamɛ lo kɛnɛ kendana la wembola kana tamu ta weho tshɛ. Sho kokaka nto nyanga ekimanyielo le wanɛ wele la mbetawɔ ka nge, ndo tatongake pondjo la tamu dia Jehowa ayotosha ekimanyielo keso l’ohomba. Jakɔba akate nto ate: “Okone nyukitanyiake aui wa [Nzambi]. Nyosemaneli le uhimbanyi, ku ndi ayunyulawo. Nyusukani le [Nzambi], ku ndi ayusukana le nyu.” Lo mɛtɛ, tamu tele laso tayoshila naka sho ndjasukanya la Nzambi oma lo wekelo ndo oma lo dɔmbɛlɔ.​—Jakoba 4:7, 8.

7, 8. Naa akambo amɔtshi wɛnya woho w’ɔtɛmwɛlɔ wakatalakanyisha Yeso ndo waa na wakotsha akambo akɔ?

⁷ Tɔshi, ɛnyɛlɔ ka wombola ɔnɛ: Ngande weyaso ɔnɛ sho mbatɛmɔla woho wakatalakanyisha Yeso na? Dikambo diakɔna diahombaso sɛdingola dia kadimola wombola ɔsɔ? Bible mɛnyaka dia Akristo w’eshika pombaka monga la ngandji ka mɛtɛ lam’asawɔ. (Joani 13:34, 35) Vɔ pombaka kidia lokombo laki Nzambi, Jehowa. (Isaya 12:4, 5; Mateu 6:9) Ndo vɔ pombaka mbeyanya lokombo lakɔ.​—Etumbelu 3:15; Joani 17:26.

⁸ Dikambo dikina diatokimanyiya dia mbeya ɔtɛmwɛlɔ wa mɛtɛ ko ɔlɛmiɛlɔ wa Bible, Ɔtɛkɛta waki Nzambi. Tɔ kekɔ tshɔyi ya dibuku yatosholɛ lonto laki Nzambi ndo asangwelo ande. (Joani 17:17; 2 Timote 3:16, 17) Lâdiko dia lâsɔ, Akristo wa mɛtɛ sambishaka ɔnɛ Diolelo diaki Nzambi mbele tshɔyi y’elongamelo yayela anto lɔsɛnɔ la pondjo lo paradiso ka laa nkɛtɛ. (Mako 13:10; Enyelo 21:1-4) Vɔ hawɔtɔ l’awui wa kɔlɔ wa pɔlitikɛ wa l’andja ɔnɛ ndo hawoyele yoho ya lɔsɛnɔ ya kɔlɔ y’andja ɔnɛ. (Joani 15:19; Jakoba 1:27; 4:4) Anto akɔna mɛtɛ wakotsha akambo asɔ nshi nyɛ na? Kɛnɛ keta mɛnyaka dia ekɔ paka okadimwelo ɔtɔi​—Ɛmɛnyi wa Jehowa.

Ahombaso ntsha naka tamu hatoshile?

9, 10. Ahombaso sala dia minya tamu tahashile na?

⁹ Kayotota naka shamɛ tambotanema la tamu na? Ahombaso ntsha lâsɔ na? Sɔlɔmɔna, Nkumekanga ka lomba kadimolaka ate: “On’ami, naka we ayulunga aui ami, ndu ayulama elembe ami; naka we ayuhuke tui lu [lo]mba, ndu ayediya utema aye lu [“shɛnɔdi,” NW], ee, lam’ayuyulelela yimba ndu lam’ayuyuwelela [“shɛnɔdi,” NW]; naka we ayukiyanga uku fesa, ndu ayukiyanga wulu uku eumbelu kushami, ku we ayulimbitela woma wa [Jehowa], [“ndo wɛ ayotana ewo k’oshika kaki Nzambi,” NW].”​—Tukedi 2:1-5.

¹⁰ Kema kanyi shɔ tambiyaka efula? Naka sho mbetawɔ mbidja yimba efula lo lomba laki Nzambi, kete toyokondja “ewo ka Nzambi k’oshika.” Eelo, sho kokaka kondja ewo kaki Nkumadiɔndjɔ ndo Nkum’olongo, naka sho mbetawɔ ɛtɛkɛta wakinde ndo mbaɔsa la nɛmɔ. Kɛsɔ nembetshiyaka dia sho pombaka mbɛlɛ otsha le Jehowa lo dɔmbɛlɔ ndo l’ekimanyielo ka wekelo w’onto ndamɛ. Awui kana diangɔ di’oshinga wolo di’oshami l’Ɔtɛkɛta ande kokaka minya tamu tshɛ tele laso ndo tokimanyiya dia mɛna osase w’akambo wa mɛtɛ.

11. Ngande wakonge okambi waki Elisha la tamu?

¹¹ Lo 2 Khumi ya Dikanga 6:11-18, sho tanaka ɛnyɛlɔ ka dimɛna efula kɛnya hwe woho wele, dɔmbɛlɔ diakakimanyiya okambi waki Nzambi ɔmɔtshi waki la wɔma ndo la tamu efula. Okambi waki Elisha komonga la shɛnɔdi ya lo nyuma. Nde kokoka shihodia dia nyemba y’alembe wa l’olongo yakikɔ lawɔ dia kimanyiya omvutshi waki Nzambi, lam’akodinge alembe w’ase Suriya. La wɔma tshɛ okambi waki Elisha akade kioko ate: “Yee! Khumemi, kayututsha na?” Ngande wakokadimola Elisha na? “Tukaki woma, ne dia wane weli la su, ndeka waku weli la wo efula.” Ko ngande wakahombe okambi ɔsɔ mbetawɔ lam’ele nde kokoka mɛna nyemba y’alembe wa l’olongo shɔ na?

12. (a) Ngande wakashile tamu taki okambi ɔsɔ na? (b) Woho akɔna wakokaso minya weho wa tamu tshɛ tokoki monga laso na?

¹² “Elisha akalombe ati: [Jehowa] li, lambukosengasenga nti: Udihuli ashu w’ukambi dia ndi mena. [Jehowa] akadihula ashu w’olongo ako, ku ashu andi wakadiho. Enyi ku ukungu wambulula to la falasa la pusupusu ya dja l’utshimba wa Elisha.” Lo ndjela dɔmbɛlɔ sɔ Jehowa akadihola washo w’okambi ɔsɔ dia nde mɛna alembe wa l’olongo wakakokɛka Elisha. Koko, sho hatohombe nongamɛ dia Nzambi tokimanyiya woho ɔsɔ ɛlɔ kɛnɛ. Tohɔ dia okambi waki omvutshi ɔsɔ komonga la Bible k’otondo dia nde mbeka woho wa keketsha mbetawɔ kande. Koko, sho tekɔ la Bible k’otondo ɛlɔ kɛnɛ. Naka sho kamba latɔ dimɛna, kete mbetawɔ kaso kayokeketshama woho akɔ wamɛ. Ɛnyɛlɔ, sho kokaka kana yimba l’ɛkɔndɔ tshɛ watɛkɛta dia woho wele Jehowa l’edjaselo kande ka l’olongo. Kɛsɔ ayoshidiya tamu tshɛ tokoki monga laso nɛ dia, tayoshikikɛ dia Jehowa ekɔ l’ɔlɔngɔswamelo ɔmɔtshi wa l’olongo wakokɛ ekambi ande l’olimu wa wetshelo wakambawɔ l’andja w’otondo ɛlɔ kɛnɛ.​—Isaya 6:1-4; Ezekiyele 1:4-28; Danyele 7:9, 10; Enyelo 4:1-11; 14:6, 7.

Tewɔ tolonga taki Satana!

13. Lo yoho yakɔna yahemba Satana dia tɔtɛwɔla di’aha sho tetemala kukutɛ akambo wa mɛtɛ?

¹³ Naa weho ekina wa tolonga takamba Satana latɔ dia nanya lonyuma laso ndo tɔtɛwɔla di’aha sho tetemala kukutɛ akambo wa mɛtɛ na? Yoho mɔtshi ele akambo wa mindo lo weho akɔ tshɛ wɛnamawɔ. L’andja ɔnɛ wamboleka anto ndjasha l’awui wa dieyanelo, wele (welɛka awui wa mindo) ɔnɛ wɛnyanyelo wa ngandji wa lo tshanda mɔtshi ndo aya ndjaka anto ahende pomana ko mbeyana otsho ɔtɔi (tshu hoto) ko kakitɔna la wedi a pindju, weho w’akambo asɔ mbasalema lushi la lushi l’atei wa lɔlɔnga lɔnɛ lele l’oyango wa paka ndjangɛnyangɛnya lo weho tshɛ, oyadi awui wa kɔlɔ wakoka ndjotomba l’ɔkɔngɔ. Waa filmɛ, televiziɔ ndo waa video ekɔ lo keketsha yoho ya lɔsɛnɔ shɔ. Awui wa sɔnyi mbalekawɔ mɛnya lo tita sango, djekoleko lo Internet. Ehemba wekɔ lo kongɛ wanɛ wele l’omposa mposa wa mbeya oseka dikambo tshɛ dieta.​—1 Tesalonika 4:3-5; Jakoba 1:13-15.

14. Bonde kakayotala Akristo amɔtshi lo tolonga ta Satana?

¹⁴ Akristo amɔtshi waketawɔ di’omposa mposa awɔ wa mbeya oseka dikambo tshɛ dieta mbawawahemɛ polo ndo lo ndanya tomba ndo etema awɔ lo menda waa filmɛ kana mishiki wɛnyawɔ anto etakataka kana awui wa mindo. Wakayoyatadja vamɛ lo djonga yaki Satana. Mbala efula wanɛ wasala akambo asɔ ndjɔkɔka lo nyuma. Weho w’anto asɔ kombetawɔ dia tshikala “uku ana w’ashashi [lo kɛnɛ kendana l’akambo wa] kolo.” Ndo vɔ hawokome ‘epalanga lo kɛnɛ kendana l’akoka w’ekanelo ka yimba.’ (1 Koreto 14:20) Ɔnɔnyi tshɛ nunu di’anto wekɔ lo pomɔ mpokoso l’ɔtɛ wahawalɛnya atɔndɔ la wadjango wele l’Ɔtɛkɛta waki Nzambi. Vɔ wakohɛ ndɔta ndo tshikala la “eloto [awɔ] tshe wa ta [w’oma le Nzambi].”​—Efeso 6:10-13; Kolosai 3:5-10; 1 Timote 1:18, 19.

Okundji wele laso

15. Lande na kokoki anto amɔtshi mɛna wolo dia mbɔsa sango diawɔ dia lo nyuma la nɛmɔ?

¹⁵ Yeso akate ate: “Nyu nyayeya akambu wa mete, ku akambu wa mete wayunyutshungula.” (Joani 8:32) Ɛmɛnyi wa Jehowa efula wakatshe la wolo dia tshika yoho yawɔ ya lɔsɛnɔ y’edjedja ndo dia tomba oma l’ɛtɛmwɛlɔ wakiwɔ ntondo. Diakɔ diele, vɔ kokaka ngɛnangɛna yoho yambatshungola akambo wa mɛtɛ. Lo wedi okina, ɛlɔngɔlɔngɔ ɛmɔtshi wakodiama oma le ambutshi w’Akristo koka mɛna wolo dia mbɔsa sango diawɔ dia lo nyuma la nɛmɔ. Ndoko lushi lambowonga l’ɔtɛmwɛlɔ ɔmɔtshi wa kashi kana ndjatambiya l’andja ɔnɛ wayasha paka l’eyango w’ɛngɛnɔngɛnɔ wa tshambandeko, lo dinɔnɔ dia wolo, kana l’awui wa mindo. Diɔ diakɔ diakokawɔ pekɔ dia mɛna otshikitanu w’efula wele lam’asa paradiso kaso ka lo nyuma la andja ɔnɛ wa kɔlɔ waki Satana. Amɔtshi kokaka ndjetawɔ dia pemba kana ndɛta woho wele akambo wa lɔlɛngɔ wa l’andja ɔnɛ wewɔ watalonganɛka ndoko lushi dia vɔ menda kɛnɛ kafɔnyawɔ ɔnɛ wambokishisha!​—1 Joani 2:15-17; Enyelo 18:1-5.

16. (a) Wembola akɔna wahombaso ndjambola shamɛ? (b) Kakɔna katolakanyawɔ ndo katokeketshawɔ dia ntsha na?

¹⁶ Onde ekɔ mɛtɛ ohomba wa mbidja mpita yaso lo dja l’oyango wɔnɛ teye kandji ndo pâ katomba oma lo dikambo sɔ? Onde hatokoke kondja wetshelo oma lo mpokoso yakakomɛ anto akina? Onde tekɔ l’ohomba wa kalola nto otsha lo “loteke” la l’andja ɔnɛ dia tenda kana takashisha ɛngɔ kɛmɔtshi? (2 Petero 2:20-22) Petero akohola Akristo wa lo ntambe ka ntondo wanɛ waki ntondo l’andja ɔnɛ waki Satana ate: “Ne dia nshi yakanyayelaka saki y’asi wedja yakakuki, lam’akanyakendakendaka lu akambu wa kolo, la songu ya munanyi, la dinwelo dia wanu, la engenongeno wa kolo, la mindju yakanyadjoka wanu, la ditemwelo dia dikishi dia wononyi.” Lo mɛtɛ, sho kema l’ohomba wa ndɛta “akambu wa kolo” wa l’andja ɔnɛ dia mɛna nganɛ wakokawɔ ndanya lɔsɛnɔ laso. (1 Petero 4:3, 4) Lo dihole dia sala ɔsɔku, wekɔ lo tolakanya ɛlɛmbɛ waki Jehowa wa lâdiko wendana la lɔkɛwɔ l’ɔlɔlɔ lo Mbalasa ka Diolelo, ahole watetshawɔ awui w’oma lo Bible. Ndo, sho keketshamaka dia kamba l’akoka aso w’ekanelo ka yimba dia mɛnya anto ɔnɛ sho mbosuke akambo wa mɛtɛ ndo ɔnɛ tambodja akambo akɔ wa mɛtɛ l’atei w’etema aso.​—Jashua 1:8; Romo 12:1, 2; 2 Timote 3:14-17.

Sho kema Akristo wa l’Ɛlɔmɔ

17. Ngande wakokaso monga Ɛmɛnyi wa Jehowa w’eshika?

¹⁷ Naka tambodja akambo wa mɛtɛ l’etema aso, kete tayonaka woho wa mbewoya anto akina akambo akɔ l’oseka diaaso tshɛ di’ɔlɔlɔ diayotokondja. Kɛsɔ halange mbuta ɔnɛ tayoyanga dia sambisha anto wahangɛnangɛna akambo akɔ la wolo. (Mateu 7:6) Diakɔ diele, hatohombe mboka sɔnyi dia ndjaeyanya oko Ɛmɛnyi wa Jehowa. Naka onto ambɛnya mposa kande lo mboka wombola w’oshika kana lo mbetawɔ dibuku dialembetshiya awui wa Bible, kete tayonga suke ndo tayoyalɔngɔsɔla dia mbewoya elongamelo kaso. Mbokɛmaka dia dikambo sɔ nɔmbaka dia sho mongaka wonya tshɛ la weho ɛmɔtshi w’abuku oyadi lo dihole diakɔna di’eso​—la ngelo, l’olimu, la kalasa, lo makashinyi, kana l’ahole wa tɔkɛnyɔ.​—1 Petero 3:15.

18. Wahɔ akɔna wokokiso kondja lo ndjaeyanya oko Akristo?

¹⁸ Lam’ayaɛnyaso dimɛna oko Akristo, sho ndjakeketshaka dia ndɔshana la tolonga ta mayɛlɛ taki Satana. Lam’alɔngɔsɔlawɔ fɛtɛ kɛmɔtshi ka lushi la eotwelo, ka Nɔɛlɛ kana tɔkɛnyɔ tɔmɔtshi ta falanga, asekaso wa l’olimu totaka mbala efula ɔnɛ: “Tanyowodjɛke londjo. Nde ekɔ Ɔmɛnyi wa Jehowa.” L’ɔkɔkɔ akɔ wamɛ, anto kokaka mbewɔ dia tɛkɛta awui w’ɛsɛndji la ntondo kaso. Ɔnkɔnɛ, lo ndjaeyanya le anto akina, oko Okristo, sho kondjaka wahɔ efula lo lɔsɛnɔ laso, oko wakadishikikɛ ɔpɔstɔlɔ Petero ate: “Untu akona ayunyutshela kolo, naka nyu la saki ka ntsha akambu w’ololo? Keli naka nyu nyayusuwa di’akambu w’ololo, nyu nyayotshokwama.”​—1 Petero 3:13, 14.

19. Ngande weyaso dia tambɔnyɔngɔmɛ etale lo nshi y’ekomelo?

¹⁹ Wahɔ okina wakondjaso lo mbidja akambo wa mɛtɛ l’etema aso ele, tayoyonga l’eshikikelo k’ɔnɛ tekɔ lo sɛna mɛtɛ lo nshi y’ekomelo ka dikongɛ nɛ di’akambo. Tayeya dia prɔfɛsiya efula ya lo Bible yambokoma lo kondoko yayɔ l’etena kaso kɛnɛ.a Akambo watewola Paulo w’ɔnɛ “lu nshi y’ekumelu, tena dia wulu diayuyala” wakashikikɛma oma l’akambo wa wɔnɔnyi wakasalema lo ntambe ketshi. (2 Timote 3:1-5; Mako 13:3-37) Sawo dimɔtshi dieke katomba lo jurunalɛ mɔtshi diatɛkɛta dia ntambe ka 20 diaki l’ɔtɛ a dui ɔnɛ: “Tayokiohɔka oko Ntambe k’Akambo w’Otshatsha.” Sawo sɔ diakate ɔnɛ: “Ɔnɔnyi wa 1999 wakonge ɔnɔnyi wakaleke anto ndjakana l’etenyi ka hende ka ntambe kɛnɛ mbakaleke anto ndjakana.”

20. Ɔnɛ ekɔ etena ka sala na?

²⁰ Ɔnɛ kema etena ka sho ndjɛkayɛka. Ɛtshɔkɔ wa Jehowa mɛnamaka hwe oma l’olimu woleki woke w’olakanyelo wa Bible wasalema l’andja w’otondo oko ɔmɛnyi le wedja tshɛ lo yoho yahatasalemaka. (Mateu 24:14) Dja akambo wa mɛtɛ l’otema ayɛ ndo ewoyawɔ le anto akina. Nshi yayɛ ya pondjo yayaye nemanɛka la kɛnɛ kasalayɛ kakianɛ. Naka wɛ tɛwɔla anya, kete wɛ hokondja ɛtshɔkɔ waki Jehowa. (Luka 9:62) Diakɔ mbele, ɔnɛ ekɔ etena ka ‘tetemala, shikimala ndo tamanya ntsha olimu wa Nkumadiɔndjɔ nyeya ɔnɛ pâ kanyu le Nkumadiɔndjɔ kema anyanya.’​—1 Koreto 15:58.

[Nɔtɛ ka l’ɛse ka dikatshi]

Onde wɛ akohɔ?

• Ngande wakokaso minya tamu?

• Wetshelo akɔna wakondjaso oma l’ɛnyɛlɔ kaki okambi w’Elisha?

• Weho akɔna w’ehemba wendana la lɔkɛwɔ wahombaso ndjalamaka wonya tshɛ?

• Lande na kahombaso ndjaeyanya hwe dia tekɔ Ɛmɛnyi wa Jehowa?

[Esato wa lo lɛkɛ 19]

Wekelo wa Bible wa mbala la mbala ndo dɔmbɛlɔ koka tokimanyiya dia minya tamu

[Osato wa lo lɛkɛ 20]

Tamu taki okambi w’Elisha takashile diɛsɛ oma lo ɛnɛlɔ

[Osato wa lo lɛkɛ 21]

Vɔ tolakanyaka ɛlɛmbɛ wa lâdiko waki Jehowa wendana la lɔkɛwɔ l’ɔlɔlɔ lo Mbalasa ka Diolelo ɛnyɛlɔ lo kɛnɛ ka lo wodja wa Bénin