Totombole Jehowa nɛ dia etsha ande wa mamba!
‘Anima ami ambotombola Jehowa . . . nɛ dia Ɔnɛ lele la wolo ambotshela akambo wa mamba.’—LUKA 1:46-49.
1. L’ɔtɛ w’akambo akɔna wa mamba wahombaso mɛtɛ tombola Jehowa?
JEHOWA sunganaka tombwama l’ɔtɛ w’akambo ande wa mamba. Lam’akakɔndɔlaka omvutshi Mɔsɛ woho wakatshungɔ ase Isariyɛlɛ oma l’Edjibito nde akate ate: “Nyu nyakenyi akambo tshe a waki wakatshi [Jehowa] lu ashu anyu.” (Euhwelu k’Elembe 11:1-7) Woho akɔ wamɛ, lam’akewoya ondjelo Ngabiriyɛlɛ eotwelo ka Yeso oma le Mariya osekaseka w’emuma, nde akate ate: ‘Anima ami wambotombola Jehowa . . . nɛ dia Ɔnɛ lele la wolo ambotshela akambo wa mamba.’ (Luka 1:46-49) Oko weso Ɛmɛnyi wa Jehowa, sho mbotombolaka l’ɔtɛ w’akambo wa diambo asɔ, ɛnyɛlɔ oko otshungwelo w’ase Isariyɛlɛ oma lo lɔhɔmbɔ l’Edjibito ndo woho wakatshɔma diemi di’Ɔnande la ngandji lo dihindo.
2. (a) Naa “sangwelo dia pondjo” diele la Nzambi lo kɛnɛ kendana l’akanga w’okitanyiya? (b) Kakɔna kakɛnyi Joani lo disɛnga dia Patɛmɔ?
2 Efula k’akambo wa mamba waki Jehowa mendanaka la ‘sangwelo diande dia pondjo’ dia tshɔkɔla anto wele l’okitanyiya oma lo tshimbo ya Mɛsiya ndo ya Diolelo diande. (Efeso 3:8-13) Sangwelo sɔ diakayashɔka yema yema etena kakakondja Joani, ɔpɔstɔlɔ w’osombe diɛsɛ dia menda lo ɛnɛlɔ oko onto lalengɛ lo lokuke lakadihɔ l’olongo. Nde akoke dui diele oko dia dimama diawotɛ ɔnɛ: “Umbeli lindu ndjukenya akambu waya ka ndja.” (Enyelo 4:1) Lam’akɔshi lowandji la Rɔma yɛdikɔ ya monda ko mbôtoma otsha lo disɛnga dia Patɛmɔ nɛ dia nde ‘akatɛkɛtaka dikambo dia Nzambi ndo akasambishaka awui wendana la Yeso,’ Joani akalongola ‘ɛnɛlɔ lo tshimbo ya Yeso Kristo.’ Kɛnɛ kakɛnyi ndo kakoke ɔpɔstɔlɔ ɔsɔ kakakɛnɛmɔla awui efula lo kɛnɛ kendana la sangwelo diaki Nzambi dia pondjo ndo diakeka eokelo ka dimɛna k’akambo wa lo nyuma ndo ekeketshelo kakaye la wonya le Akristo wa mɛtɛ tshɛ.—Enyelo 1:1, 9, 10.
3. Dikumanyi 24 diakɛnyi Joani lo ɛnɛlɔ diekɔ didjidji di’anto akɔna?
3 L’ekimanyielo ka lokuke lakadihɔ l’olongo lɔsɔ, Joani akɛnyi dikumanyi 24 wodjashi lo kiti ya waolelo ndo wɔlɔtshi alɛmbɔ wa koso oko waa nkumi ya dikanga. Vɔ wakakusama la ntondo ka Nzambi ndo wakate vate: “[Jehowa Nzambi k]asu le, we kukuki dia nungula lutumbu la kenemo la wulu, ne dia we kakatungi diango tshe. Dio diakatungama uma lu lulango laye.” (Enyelo 4:11) Dikumanyi sɔ wekɔ didjidji di’Akristo w’akitami w’esɔ tshɛ wakolwama otsha l’ahole wa lotombo wakâlake Nzambi. Vɔ tshutshuyamaka dia tombola Jehowa l’ɔtɛ w’elimu ande wa diambo w’etongelo. Sho lawɔ mongaka la diambo efula lam’ɛnaso ‘nkudu ka pondjo kaki Jehowa ndo Lonzambi lande.’ (Romo 1:20) Lo yɛdikɔ yatataleke mbeka dia mbeya Jehowa, mbatataleke mbishola ɛkɔkɔ watotshutshuya dia mbotombola l’ɔtɛ w’akambo ande wa diambo.
Tewoya etsha wa lotombo waki Jehowa!
4, 5. Sha bɛnyɛlɔ diɛnya woho wakatombola Davidi Jehowa.
4 Omembi w’esambo Davidi akatombola Nzambi l’ɔtɛ w’akambo Ande wa mamba. Ɛnyɛlɔ, Davidi akembe ate: “Nyimbilaki [Jehowa] ludjashi lu Siona esambu wa diandu, nyudianganyake lukumu la etsha andi w’ololo l’atei w’antu. [Jehowa] li, umbuki ketshi; enda sui diamumusuwa uma le wane watumpetshaka! We atumunyiyaka uma lu suku dia nyoi, dia dimi nkuntumbulaka lu asuku wa [“ana a wamato wa,”NW] Siona.” (Osambu 9:11, 13, 14) L’ɔkɔngɔ wa nde mbisha ɔnande Sɔlɔmɔna dikongelo (plans) diendana la wokelo wa tɛmpɛlɔ, Davidi akatshɔkɔla ndo akatombola Nzambi la ntondo k’olui tshɛ w’antu, akati ati: “[Jehowa] li, we kukanga wuki, wulu, lutumbu, elembielo, la nemo! . . . [Jehowa] li, we kukanga diulelu, we ambediama ladiku dia tshe! . . . Okone, we [Nzambi k]asu, kakiane shu tambukuka lusaka, tambandula lukumbu laye la lutumbu.”—1 Ekondo 29:10-13.
5 Afundelo tokeketshaka ndo tɔlɔmbaka mbala la mbala dia tombola Nzambi oko wakotombola Davidi. Dibuku di’Esambu ndola l’ɛtɛkɛta wa lotombo otsha le Nzambi, ndo suke la kahende ɔtɔi ka nkembo shɔ ya lotombo yakembama oma le Davidi. Nde akatombolaka ndo akokaka Jehowa losaka mbala la mbala. (Osambu 69:30) Ndo nto, oma ko nshi y’edjedja, wakakambaka l’esambo wakafunde Davidi ndo anto akina oma lo wolo wa nyuma k’ekila dia tombola Jehowa.
6. Naa ohomba wele l’Esambo wakasambiyama oma le nyuma k’ekila le so?
6 Esambo wekɔ ohomba efula le atɛmɔdi wa Jehowa! Sunganaka dia sho kana yimba l’ɛtɛkɛta w’amɛna wele l’Esambo etena kalangaso mbisha Nzambi losaka oma l’akambo wa diambo watosalɛnde. Ɛnyɛlɔ, lam’atotemɔka la pindju, sho mbeyaka tshutshuyama dia mbuta weho w’ɛtɛkɛta wele oko wɛnɛ wata ɔnɛ: “Eko ololo mbukaka [Jehowa] lusaka, ndu dia mandulaka lukumbu laye, we Khum’Ulungu, dia nsanyaka ngandji kaye ka shikaa la pindju, ndu kolamelu yaye l’utshu. . . [Jehowa] li, we atôngenyangenyaka la akambu aye! Layukutumbulaka ne dia elimu w’anya aye.” (Osambu 92:1-4) Lam’ekolaso wekamu ɔmɔtshi watoshimba dia sho pama lo nyuma sho mbeyaka tshutshuyama dia mɛnya ɔngɛnɔngɛnɔ aso ndo lowando laso lo dɔmbɛlɔ, oko wakatshe Davidi lam’akandembe ate: “Nyuyi, tuyimbeli [Jehowa] esambu l’ongenongeno! Tudjeli dive dia panda kasu dielu di’ongenongeno! Tutshu la ntundu kandi, tutuwuki lusaka, tuwimbeli esambu wa diandu l’ongenongeno!”—Osambu 95:1, 2.
7. (a) Akokaso mbuta lo kɛnɛ kendana l’efula k’esambo wakembama oma le Akristo? (b) Naa ɔkɔkɔ ɔmɔtshi watotshutshuya dia komaka la wonya lo sanganya ndo tshikalaka polo ndo l’ekomelo?
7 Mbala efula sho sanganyaka awui aso dia tombola Jehowa l’esambo lo nsanganya ya l’etshumanelo, ndo ya weke. Ekɔ dui di’ɔlɔlɔ dia efula k’esambo ɛsɔ mbɔsama oma lo tokanyi kana awui w’oma lo dibuku di’Esambu. Ande ɔngɛnɔngɛnɔ wele laso ɛlɔ kɛnɛ dia monga la dibuku diele l’esambo wakakongɛma dia tombolaka Jehowa lee! Membɛ Nzambi esambo wa lotombo ekɔ ɔkɔkɔ w’oshika watotshutshuya dia komaka la wonya lo nsanganya yaso ndo mbidjasɛ polo ndo l’ekomelo, ngasɔ mbayotosanganya dui diaso l’asekaso atɛmɔdi dia ntombola Jehowa la esambo ndo lo dɔmbɛlɔ.
“Nyotombole Yah!”
8. Kakɔna kalembetshiya tshɛkɛta “Aleluya” ndo mbala efula ngande wakadimɔmayɔ na?
8 Otombwelo wa Jehowa tanemaka lo tshɛkɛta “Aleluya,” yɔ yekɔ esangwelo wa etelo kɛmɔtshi ka lo Hɛbɛru kakadimwama suke la mbala tshɛ ɔnɛ: “Nyotombole Yah!” Ɛnyɛlɔ, l’Osambo 135:1-3 (NW), vɔ tɔlɔmbaka la wangasanu tshɛ ɔnɛ: “Nyotombole Yah! Nyotombole lokombo la Jehowa, nyôtombole, nyu ekambi wa Jehowa, nyu wanɛ wemadi lo luudu la Jehowa, l’asɛkɛ wa luudu la Nzambi kaso. Nyotombole Yah, nɛ dia Jehowa ekɔ ɔlɔlɔ. Nyembele lokombo lande esambo, nɛ dia lɔ lekɔ dimɛna.”
9. Kakɔna katotshutshuya dia tombola Jehowa?
9 Lam’asɛdingolaso elimu wa diambo w’etongelo waki Nzambi ndo akambo tshɛ watosalɛnde, sho tshutshuyamaka l’otema ɔtɔi dia mbotombola. Naka sho menda ahindo wakasale Jehowa lo wahɔ w’ekambi ande nshi yakete, kete etema aso wayototshutshuya dia mbotombola. Ndo lam’akanaso yimba lo alaka wendana l’akambo wa weke wayosala Jehowa nto, sho nyangaka toho ta mbotombola ndo mbândola.
10, 11. Ngande wele woho wakatatongama totshutshuyaka dia tombola Nzambi?
10 Woho wakatatongama totshutshuyaka dia tombola Yah. Davidi akembe ate: “Dimi layukukaka lusaka, ne dia lakatungama etungelu ka woma ndu mamba, elimu aye wele mamba, utema ami mbeyaka dikambu diako ololo.” (Osambu 139:14) Eelo, sho ‘takatongama lo yoho ya diambo’ ndo tekɔ la weshasha w’oshinga wolo, ɛnyɛlɔ: dikoka diaso dia mɛna, dia mboka, ndo dia kanyiya. Ɔnkɔnɛ, sho pombaka nɔmbɔla lɔsɛnɔ laso lo yoho yatombola Otungi aso. Paulo aki la tokanyi takɔ tamɛ lam’akandafunde ate: “Okone kana nyayole, kana nyayono, kana dikambu tshe diayunyutsha, nyutshi dia lutumbu la [Nzambi].”—1 Koreto 10:31.
11 Tayotsha akambo tshɛ dia lotombo la Jehowa naka sho mɛtɛ mbokaka ngandji. Yeso akate ate ɔlɛmbɛ wa ntondo ele: “Ulangi [Jehowa Nzambi k]aye l’[anima] aye tshe, la lumu laye tshe, la yimba yaye tshe, ndu la wulu aye tshe.” (Mako 12:30; Euhwelu k’Elembe 6:5) Sho pombaka mɛtɛ mboka Jehowa ngandji ndo mbotombola oko Otungi aso, ndo Kiɔkɔ ya ‘woshasha tshɛ w’ɔlɔlɔ ndo wa kokele.’ (Jakoba 1:17; Isaya 51:13; Etsha 17:28) Sunganaka mɛtɛ dia sho mbotombola nɛ dia akoka aso w’ekanelo ka yimba, akoka aso wa lo nyuma, wolo aso wa demba, mbut’ate waonga ndo akoka aso tshɛ ndja oma le Jehowa. Lâsɔ, oko wende Otungi, nde sunganaka nangema ndo nongola lotombo laso.
12. Ngande wayaokayɛ lo kɛnɛ kendana l’akambo wa mamba wa Jehowa ndo l’ɛtɛkɛta wa l’Osambo 40:5?
12 Akambo wa mamba waki Jehowa toshaka ɛkɔkɔ waheyama mbadia wa mbowoka ngandji ndo mbotombola! Davidi akembe ate: “We [Jehowa Nzambi k]ami, akambu wa mamba wakayatshi, la tukanyi takayakani lu dikambu diasu, weko efula; nduku ledimi la ye. Kuyanga layuhimba mbata, vo weko efula kaheyama mbala.” (Osambu 40:5) Davidi kokoka kɔndɔla elimu tshɛ wa diambo waki Jehowa, ndo sho lawɔ hatokoke sala dikambo sɔ. Koko hatohombe mbohɛ tombola Nzambi mbala tshɛ kayotɛnaka elimu wakinde wa diambo.
Etsha kakatanyema la sangwelo diaki Nzambi dia Pondjo
13. Woho akɔna wokakatanyi elongamelo kaso l’akambo wa mamba waki Nzambi?
13 Elongamelo kaso kendana la nshi yayaye kakatanyema l’akambo wa diambo ndo wa lotombo wendana la sangwelo dia pondjo diaki Nzambi. L’ɔkɔngɔ wa ɔtɔmbɔkwɛlɔ wakonge l’Ɛdɛna, Jehowa akasha prɔfɛsiya ka ntondo kele l’elongamelo. Lam’akandadjaka olui mananu, Nzambi akate ate: “Dimi layudja luhetshu l’asaye la umuntu, ndu l’asa tukanula taye la tukanula tandi. Ndi ayuko[minola] l’ote, ku we ayûlumata lu etshindji.” (Etatelu 3:15) Elongamelo le Lɔtɔngɔ laki womoto lakalakema kakatetemala monga l’etema w’akanga wa kɔlamelo l’ɔkɔngɔ wa Jehowa sala dikambo dimɔtshi dia diambo lam’akandashimbɛ Nɔa nde la nkumbo kande oma lo Mvula k’Elola kakamane anto wa kɔlɔ wa la nkɛtɛ oshiki. (2 Petero 2:5) Alaka wa prɔfɛsiya wakalongola apami waki la mbetawɔ, ɛnyɛlɔ oko Abarahama la Davidi akayoleka mbahotola yimba lo kɛnɛ kakahombe Jehowa ndjokotsha lo tshimbo ya Lɔtɔngɔ lɔsɔ.—Etatelu 22:15-18; 2 Samuele 7:12.
14. Kakɔna kaleka mɛnya dia Jehowa ekɔ onto lasala akambo wa mamba lo wahɔ w’anto?
14 Kɛnɛ kakaleke mɛnya dia Jehowa ekɔ onto lasala akambo wa diambo lo wahɔ w’anto kakasalema lam’akandakimɔ Ɔnande ɛtɔi lakandote, mbut’ate Lɔtɔngɔ lakalakema, Yeso Kristo oko olambo wa tshungo. (Joani 3:16; Etsha 2:29-36) Oma l’olambo wa tshungo mamboyaokanya anto la Nzambi. (Mateu 20:28; Romo 5:11) Jehowa akela anto wa ntondo wakayaokanya la nde oya l’etshumanelo k’Akristo, kakatema lo Pɛntɛkɔsta ka l’ɔnɔnyi 33 T.D. Oma l’ekimanyielo ka nyuma k’ekila, vɔ wakasambisha lokumu l’ɔlɔlɔ polo lo tokama ta nkɛtɛ lo mɛnya dia nyɔi ndo eolwelo ka Yeso ambodihola mboka dia anto wele l’okitanyiya kondja ɛtshɔkɔ lo ɛlɔmbwɛlɔ ka Diolelo diaki Nzambi dia l’olongo.
15. Ngande wasala Jehowa akambo wa diambo lo nshi yaso nyɛ?
15 Lo nshi yaso nyɛ, Jehowa akatshe lo yoho ya diambo efula dia tshumanya Akristo w’ekomelo w’akitami w’esɔ. Mpɛpɛ y’elanyelo yakatokokimamɛ dia atshikadi wa l’atei w’anto 144 000, wanɛ wayolɛ kamɛ la Kristo l’olongo mbidjama tolembetelo. (Enyelo 7:1-4; 20:6) Nzambi akashikikɛ woho w’Akristo w’akitami w’esɔ tshungɔ oma lo lɔhɔmbɔ la lo nyuma la “Babilona ka Wuki,” tshunda di’ɛtɛmwɛlɔ wa kashi tshɛ wa l’andja w’otondo. (Enyelo 17:1-5) Etshungwelo kɛsɔ kakasalema l’ɔnɔnyi wa 1919 ndo ekokelo kaki Nzambi kakawakondja oma k’etena kɛsɔ akasha atshikadi w’akitami w’esɔ diaaso dia sala dikambo diakɔna? Tɔ akawasha diaaso dia vɔ ngamula osase awɔ lo sambisha mbala k’ekomelo la ntondo ka Jehowa komiya andja ɔnɛ wa kɔlɔ waki Satana lo ‘fɔnu ka woke’ kayasukana esadi esadi.—Mateu 24:21; Danyele 12:3; Enyelo 7:14.
16. Etombelo akɔna wɛnama oma l’olimu w’esambishelo ka Diolelo wasalema nshi nyɛ l’andja w’otondo?
16 Ɛmɛnyi wa Jehowa w’akitami w’esɔ wekɔ lo ndjasha l’ohetoheto tshɛ l’olimu w’esambishelo ka Diolelo wakambema l’andja w’otondo. Diɛsɛ oma l’olimu ɔsɔ, lofulo ‘l’ɛkɔkɔ ekina’ wanɛ waya kakianɛ atɛmɔdi waki Jehowa lekɔ lo tatetemala mbidɛ. (Joani 10:16) Tekɔ l’ɔngɛnɔngɛnɔ nɛ dia akanga wa memakana wa la nkɛtɛ weke la diaaso dia sangana kamɛ la so dia tombola Jehowa. Wanɛ wetawɔ leeta l’ɔnɛ ‘yaka,’ wayoshimbamɛ lo fɔnu ka woke, wele l’elongamelo ka ndjotombolaka Jehowa pondjo pondjo.−Enyelo 22:17.
Nunu di’anto diekɔ lo tshumana l’ɔtɛmwɛlɔ wa mɛtɛ
17. (a) Woho akɔna wasala Jehowa akambo wa mamba lo kɛnɛ kendana l’olimu aso w’esambishelo? (b) Ngande wakotshama Zekariya 8:23?
17 Jehowa ekɔ lo sala kakianɛ akambo wa weke ndo wasungana tombwama wendana l’olimu aso w’esambishelo. (Mako 13:10) Lo ɛnɔnyi wêke ka mbeta ɛnɛ, nde ‘mala dihola nkuke yatosaka yasha anto diaaso dia kamba olimu.’ (1 Koreto 16:9) Kɛsɔ mbakakimanyiya dia lokumu l’ɔlɔlɔ sambishama lo bɛtshi dia nkɛtɛ dia weke efula lɛnɛ akatonaka atunyi w’akambo wa mɛtɛ la wolo tshɛ dia lɔ sambishama. Efula ka wanɛ wakasɛnaka lo wodjima wa lo nyuma wetawɔ kakianɛ lo leeta la vɔ ndja ndjɔtɛmɔla Jehowa. Vɔ wekɔ lo kotsha ɛtɛkɛta ɛnɛ wa prɔfɛsiya: “[Jehowa] kanga lulimbilimbi kata ati: Lu nshi sho, antu dikumi w’uma l’eteketa tshe wa wedja wayukimela usi Juda otoi l’uhimbu wa dihondo diandi, wata vati: Shu tayutsho kame la nyu, ne dia shu takuki lukumu ati: [Nzambi] eko la nyu.” (Zekariya 8:23) “Antu” asɔ wakate anto dikumi ɔnɛ tayotshɔ lanyu wekɔ ase Juda wa lo nyuma, atshikadi w’Akristo wakitami w’esɔ wa lo nshi yaso nyɛ. Lam’ele shifidi dikumi nembetshiyaka kɛnɛ kele kokele l’akambo wa la nkɛtɛ, “antu dikumi” wekɔ “ului a wuki” wambotshumanyema kamɛ la “Isariyele wa[ki Nzambi]” ndo vɔ tshɛ waya “ului otoi.” (Enyelo 7:9, 10; Ngalatiya 6:16) Ekɔ ɔngɛnɔngɛnɔ dia mɛna woho wele ɛlɔ kɛnɛ anto efula wambotshumana kamɛ dia kamba olimu w’ekila oko atɛmɔdi wa Jehowa Nzambi!
18, 19. Kakɔna kɛnya dia Jehowa ekɔ lo tshɔkɔla olimu w’esambishelo?
18 Tekɔ lo ngɛnangɛna dia anto nunu akumi, mbut’ate nkama ya nunu mɛtɛ wekɔ lo mpongomɔ oya l’ɔtɛmwɛlɔ wa mɛtɛ lo wedja wele ɔtɛmwɛlɔ wa kashi wakake edio ko akɛnamaka di’oko anto hawokokaki mbetawɔ pondjo lokumu l’ɔlɔlɔ. Tênde lo Annuaire des Témoins de Jéhovah wêke katomba kele tadia lofulo la wedja lele l’apandjudi wa Diolelo tatɛ oma lo 100 000 polo ndo suke la 1 000 000. Dikambo nɛ mɛnyaka dia Jehowa ekɔ lo tshɔkɔla olimu w’esambishelo ka Diolelo.—Tukedi 10:22.
19 Oko weso ekambi wa Jehowa, tekɔ lo tombola Shɛso lele l’olongo ndo tekɔ lo mbowandola lo woho wambondotosha oyango w’oshika lo lɔsɛnɔ wa kamba olimu ande washa ɔngɛnɔngɛnɔ, ndo wambondotosha elongamelo k’ɔlɔlɔ lo kɛnɛ kendana la nshi yayaye. Tekɔ lo nongamɛ l’asolo walomɔlomɔ ekotshamelo k’alaka tshɛ waki Nzambi ndo tamboyashikikɛ dia ‘ndjalama lo ngandji ka Nzambi, aha la mbohɛ lɔsɛnɔ la pondjo.’ (Jude 20, 21) Tekɔ l’ɔngɛnɔngɛnɔ dia mɛna dia lemba la woke latombola Nzambi laya l’anto ɛlɔ kɛnɛ oko 6 000 000! Oma l’ɛtshɔkɔ waki Jehowa, atshikadi w’akitami w’esɔ kamɛ l’ɛkɔkɔ ekina w’asekawɔ wambotshumana lo tshumanelo oko 91 000 lo wedja 235. Sho tshɛ tekɔ lo ndeshama dimɛna lo nyuma oma lo weolo wahahekɔ mbidja ‘ɔhɔmbɔ wa kɔlamelo ndo wa kɛsɔ.’ (Mateu 24:45) Ɔlɔngɔswamelo wa teokrasi watahame tsho, wekɔ lo nɔmbɔla la ngandji tshɛ, elimu wendana la Diolelo l’ekimanyielo ka filialɛ 110 y’Ɛmɛnyi wa Jehowa. Tekɔ lo mandola woho wakadihola Jehowa etema w’ekambi ande dia vɔ ‘mbɔtɛmɔla la diangɔ diawɔ di’oshinga wolo.’ (Tukedi 3:9, 10) Diakɔ diele, olimu aso w’esambishelo wakambema l’andja w’otondo wekɔ lo tatetemala, ɛprimɛri, Bɛtɛlɛ, ndo mvudu ya waa misiɔnɛrɛ ndo Mbalasa ya Diolelo la ya Nsanganya ya Weke yekɔ lo mbikama lo ndjela ehomba.
20. Woho akɔna wele kana yimba l’akambo wa mamba ndo wasungana tombwama waki Jehowa mongaka la shɛngiya leso?
20 Ekɔ wolo sho shila akambo wa diambo ndo wasungana tombwama waki Shɛso lele l’olongo. Lâsɔ, akɔna l’atei w’anto wele l’etema w’ɔlɔlɔ akoka tona dia sanganya dui diande kâmɛ la lemba l’atɛmɔdi wa Jehowa na? Ndoko mɛtɛ lakoka tona! Lâsɔ anto tshɛ wele la ngandji le Nzambi wade tokoko l’ɔngɛnɔngɛnɔ tshɛ vate: “Nyûtumbuli [Jehowa]! nyûtumbuli [Jehowa] oma la diko di’ulungu! nyûtumbuli lu ahuli wa ladiku! Nyûtumbuli, nyu andjelo. . . elongolongo w’apami la esekaseka w’amatu ntu, esumbi la ana wa tutshitshe. Vo tshe watumbuli lukumbu la [Jehowa]! ne dia lukumbu lande lutu mbeli ladiku. Lutumbu landi leko la diku dia kete ndu ladiku di’ulungu.” (Osambu 148:1, 2, 12, 13) Eelo, nyɛsɔ totombole Jehowa, Nzambi kasala akambo wa diambo, tatɛ oma ko kakianɛ ndo pondjo pondjo!
Ngande wayoyokadimola?
• Naa akambo amɔtshi wa diambo waki Jehowa wasungana tombwama?
• Kakɔna kakotshutshuya dia tombola Jehowa?
• Ngande wokakatanyemi elongamelo kaso l’akambo wa mamba waki Nzambi na?
• Ngande wasala Jehowa akambo wa mamba wasungana tombwama lo kɛnɛ k’endana l’olimu w’esambishilo ka Diolelo?
[Osato wa lo lɛkɛ 8]
Onde wɛ tombolaka Jehowa l’otema ɔtɔi l’esambo?
[Esato wa lo lɛkɛ 11]
Tekɔ l’ɔngɛnɔngɛnɔ nɛ dia akanga wa memakana wêke la diaaso dia sangana kamɛ la so dia tombola Jehowa