Ɛlɔngɔlɔngɔ la esekaseka, nyotombole Jehowa!
‘Ɛlɔngɔlɔngɔ la nyu wanɛ weke dimuma, nyotombole Jehowa oma la nkɛtɛ.’—OSAMBU 148:7, 12.
1, 2. a) Weho akɔna wa ɛlɛmbɛ weya ɛlɔngɔlɔngɔ la esekaseka dia vɔ mbadjɛka? b) Lande na kele ɛlɔngɔlɔngɔ la esekaseka hawohombe momalɛ ambutshi awɔ l’ɔtɛ wawadjɛwɔ ɛlɛmbɛ?
LO TSHƐ, ɛlɔngɔlɔngɔ la esekaseka mbeyaka la ɔlɔlɔ tshɛ kɛnɛ kewɔ bu la lotshungɔ la sala. Efula l’atei awɔ kokaka kotɛ esadi eto la ɛnɔnyi engana wayowotatɛ tenyanya etadimbo vɔamɛ, ntshɔ tolala wonya walangawɔ kana kondja lotshungɔ la kɛndjakɛndja mutuka. Tena dimɔtshi, ɔlɔngɔlɔngɔ kana osekaseka mbeyaka mɛna diele oko mbala efula, etena kalɔmbande kɛnɛ kakombolawɔ efula, vɔ mbokadimolaka ɔnɛ: “Tayonyomoyɔtɛkɛta dikambo sɔ etena kayoyokoma opalanga.”
2 Nyu ɛlɔngɔlɔngɔ la esekaseka, nyu mbeyaka dimɛna dia ambutshi anyu mɛnaka dia ekɔ dui dia lomba nyodjɛ ɛlɛmbɛ ɛsɔ, nɛ dia vɔ nangaka nyokokɛ lo awui amɔtshi. Lo mɛtɛ nyu mbeyaka ɔnɛ, Jehowa ngɛnangɛnaka dia nyu kitanyiya ambutshi anyu. (Kolosai 3:20) Lo menda ɛlɛmbɛ ɛsɔ tshɛ, shi nyu ndjaokaka oko lɔsɛnɔ lanyu latatatɛ? Onde vɔ nyodimaka akambo w’ɔlɔlɔ tshɛ ko nyokongiyɛka paka lam’ayonyokoma epalanga? Kema, aha ngasɔ! Ekɔ olimu ɔmɔtshi woleki ohomba wakambema ɛlɔ kɛnɛ wanyokongɛ. Onde nyu ɛlɔngɔlɔngɔ la esekaseka nyekɔ la lotshungɔ la kamba olimu ɔsɔ? Nyu kema tsho la lotshungɔ, koko Nzambi Kaheme lâdiko dia tshɛ ndamɛ kanyelɛ dia nyu kamba olimu ɔsɔ!
3. Naa olimu wa lânde walɔmba Jehowa akɛnda dia kamba, ndo ambola akɔna wayangaso sɛdingola kakianɛ?
3 Dia olimu akɔna watɛkɛtaso lanɛ? Enda ɛtɛkɛta wɔsami ɔtɛ aso wa sawo, wata ɔnɛ: ‘Ɛlɔngɔlɔngɔ la nyu wanɛ weke dimuma, epalanga la takunyakɛnda, nyotombole Jehowa oma la nkɛtɛ.’ (Osambu 148:7, 12) Lo ndjela divɛsa nɛ, nyekɔ la diɛsɛ dia woke, mbuta ate nyu kokaka tombola Jehowa. Oko wekenyu akɛnda, onde nyu kombolaka kamba olimu ɔsɔ? Efula kombolaka. Nyɛsɔ tɔsɛdingole ambola asato dia mɛna lande na kakombolanyu kamba olimu ɔsɔ. Ntondotondo, lande na kahombanyu tombola Jehowa? Ka hende, ngande wakokanyu mbotombola dimɛna? Ka sato, etena kakɔna kele ɔlɔlɔ tatɛ tombola Jehowa?
Lande na tombola Jehowa?
4, 5. a) Lo ndjela Osambu 148, tekɔ la ntondo ka dikambo diakɔna dia diambo efula? b) Ngande wakoka ditongami diahakoke tɛkɛta ndo kana yimba tombola Jehowa?
4 Ɔkɔkɔ ɔmɔtshi w’oshika wa tombola Jehowa ele nde ekɔ Otungi. Osambu 148 mbikaka epole ɔsɛkɛ lo dikambo dia mɛtɛ sɔ. Ohokanyiya yema: Ngande wayoyaoka naka wɛ ambosukana la olui ɔmɔtshi w’anto wemba kâmɛ osambo ɔmɔtshi wa dimɛna efula ndo wananda asolo? Ko kayotota naka wɛ mbeyaka dia ɛtɛkɛta wa lo osambo ɔsɔ wekɔ mɛtɛ ndo ɔnɛ tokanyi tele lɔkɔ tekɔ ohomba, mbishaka ɔlɔ ndo keketshaka? Kema wɛ ayonga la nsaki ka mbeka ɛtɛkɛta w’osambo akɔ ko memba kâmɛ la wɔ? Efula l’atei aso wayosala ngasɔ. Eelo, Osambu 148 mɛnyaka dia wɛ lawɔ ekɔ la ntondo ka dikambo dia woho akɔ wâmɛ, koko dioleki tshɛ diambo. Osambo ɔsɔ tɛkɛtaka dia olui ɔmɔtshi wa woke w’anto wele vɔ tshɛ wekɔ lo tombola Jehowa kâmɛ. Koko, naka wɛ mbadia osambo ɔsɔ, kete wɛ ayɛna dui dimɔtshi dia lânde. Naa dui diakɔ?
5 Efula ka ditongami diatombola Nzambi diɔkɔndwami lo Osambu 148 hadiokoke tɛkɛta ndo kana yimba. Ɛnyɛlɔ, lɔkɔ sho mbadiaka ɔnɛ wonya, ngɔndɔ, tɔɔtɔ, longe l’ekama, lɔhɛlɛlɛ, akona ndo ekongo tombolaka Jehowa. Ngande wakoka ditongami sɔ diele kema la lɔsɛnɔ tombola Jehowa? (Osambu 148 Divɛsa 3, 8, 9) Lo mɛtɛ, ditongami sɔ salaka dikambo sɔ oko wasala esongo, ditongami dia lo ndjale ndo nyama. (Osambu 148 Divɛsa 7, 9, 10) Onde wɛ atendaka alangi w’amɛna watongaka la wonya etena katawɔtɔ kana menda woho watɔkɛndakɛndaka ngɔndɔ lo olongo woludi la tɔɔtɔ kana mbɔla la ɔngɛnɔngɛnɔ lam’ɛnayɛ nyama yakɛnya kana wɛ tshikalaka la diambo etena kendayɛ laanda lɔmɔtshi l’olangala efula? Etena kɛsɔ, wɛ ‘akoke’ osambo wa lotombo w’oma le etongelo. Kɛnɛ tshɛ kakasale Jehowa toholaka dia nde ekɔ Otungi kanga-wolo-tshɛ, ndo ɔnɛ ndoko onto ɔtɔi lo andja w’otondo lele la wolo w’efula, lomba ndo la ngandji ka ngasɔ oko nde.—Romo 1:20; Enyelo 4:11.
6, 7. a) Lo ndjela Osambu 148, ditongami diakɔna diele la yimba diatombola Jehowa? b) Bonde kahombaso tshutshuyama dia tombola Jehowa? Sha ɛnyɛlɔ.
6 Osambu 148 mɛnyaka nto dia ditongami diele la yimba tombolaka Jehowa. Lo Osambu 148 divɛsa 2, sho mɛnaka dia ‘alembe’ wa l’olongo waki Jehowa, wokengami la andjelo mbotombolaka. Lo divɛsa 11, anto wele la wolo ndo la lokumu, oko nkumi ya dikanga ndo toshushi nɔmbamaka dia vɔ lawɔ tombola Nzambi. Naka andjelo wele la wolo ngɛnangɛnaka dia tombola Jehowa, shi kete lâsɔ ekɔ ohomba efula le anto k’anto dia vɔ sala dui sɔ? Oma lâsɔ, Osambu 148 divɛsa 12 ndo 13, keketshaka ndo ɛlɔngɔlɔngɔ la esekaseka dia tombola Jehowa. Onde nyu kombolaka sala dui sɔ?
7 Tɔshi ɛnyɛlɔ. Naka wɛ ekɔ la ɔngɛnyi ayɛ ɔmɔtshi w’oshika wele la losha lɔmɔtshi la lânde lo awui wa tɔkɛnyɔ, wa disɛlasɛla kana wa mishiki, onde wɛ hɔtɛkɛta dikambo diande le nkumbo kayɛ ndo le angɛnyi ayɛ akina? Aha la tâmu wɛ ayosala dui sɔ. Eelo, naka sho mbeya awui tshɛ wambosala Jehowa, kete dui sɔ koka monga la shɛngiya ya woho akɔ wâmɛ le so. Ɛnyɛlɔ, Osambu 19:1, 2 mbutaka dia olongo woludi la tɔɔtɔ ‘watotondjaka ɛtɛkɛta.’ Ekɔ wolo sho tona mbewoya anto akina awui wendana la Nzambi kaso etena kakanyiyaso awui wa diambo wakasale Jehowa.
8, 9. L’ɔtɛ wa ɛkɔkɔ akɔna watɔlɔmba Jehowa dia sho mbotombola?
8 Ɔkɔkɔ okina wa diambo wa tombola Jehowa ele, nde tɔlɔmbaka dia sho sala dikambo sɔ. Lande na? Onde ekɔ nɛ dia nde kombolaka dia anto mbotombola? Kema. Mbala efula sho anto kombolaka vɔ totombola, koko Jehowa ekɔ lâdiko dia tshɛ otoleki sho. (Isaya 55:8) Nde ndjaeyaka dimɛna ndo mbeyaka waonga ande. (Isaya 45:5) Koko, nde tɔlɔmbaka dia sho mbotombola ndo nde ngɛnangɛnaka etena kasalaso dui sɔ. Lo ɛkɔkɔ akɔna na? L’ɔtɛ wa ɛkɔkɔ ehende. Ɔkɔkɔ wa ntondo, ele nde mbeyaka dia tekɔ l’ohomba wa mbotombola. Nde akatotonge la ehomba wa lo nyuma, mbuta ate ohomba wa tɛmɔla. (Mateu 5:3) Jehowa ngɛnangɛnaka etena kɛnande takotsha nsaki kɛsɔ, oko watɔngɛnangɛnaka ambutshi ayɛ dia kɛna alɛ diangɔ dia ndɛ, nɛ dia vɔ mbeyaka ɔnɛ ekɔ dikambo dia ɔlɔlɔ ayɛ.—Joani 4:34.
9 Ɔkɔkɔ wa hende ele, Jehowa mbeyaka dia anto akina nangaka toka tôtombola. Ɔpɔstɔlɔ Paulo akafundɛ ɔlɔngɔlɔngɔ Timɔtɛ ate: “Uyalamaki, ulamaki ndu wetshelu aye. Utetemalaki lu akambu aso. Ne dia lam’ayuyutsha osoku, we ayuyashimbela, ndu we ndu wane wuka aui aye.” (1 Timote 4:16) Lo mɛtɛ, etena ketshayɛ anto akina awui wendana la Jehowa Nzambi lo mbotombola, anto mbeyaka ndjeka dia mbeya Jehowa ndo vɔ. Ewo kɛsɔ koka mbakonya lo panda ka pondjo!—Joani 17:3.
10. Lande na katshutshuyamaso dia tombola Nzambi kaso?
10 Koko, tekɔ la ɔkɔkɔ okina wa tombola Jehowa. Ohɔ ɛnyɛlɔ ka ɔngɛnyi ayɛ wele la losha la lânde wakatatɛkɛtshi. Naka wɛ amboka anto akina wata awui wa kashi lo lokombo lande ndo walanga nanya lokumu lande, shi wɛ ayoleka tshutshuyama dia mbotombola? Lo mɛtɛ, anto efula mamatanyiyɛka Jehowa akambo. (Joani 8:44; Enyelo 12:9) Ɔnkɔnɛ, wanɛ wolanga tshutshuyamaka dia mbewoya anto kɛnɛ kele mɛtɛ lo lokombo lande, lo mɛnya ɔnɛ awui wata anto lo lokombo lande wekɔ kashi. Onde wɛ halange mɛnya ngandji ndo lowando layɛ le Jehowa ndo mɛnya dia wɛ mbolangaka oko wende Owandji ayɛ koko aha Satana otunyi ande a woke? Wɛ koka mɛnya awui asɔ tshɛ lo tombola Jehowa. Dimbola diayela diɔ nɛ: Ngande wakokayɛ mbôtombola?
Woho wakatombola ɛlɔngɔlɔngɔ la esekaseka ɛmɔtshi Jehowa
11. Naa bɛnyɛlɔ dia lo Bible diɛnya dia ana w’akɛnda kokaka tombola Jehowa lo yoho ya dimɛna efula?
11 Bible mɛnyaka dia tena efula ana w’akɛnda tombolaka Jehowa lo yoho ya dimɛna efula. Tekɔ la ɛnyɛlɔ ka yana ya yimato ya lo wodja wa Isariyɛlɛ yakatɔlama lo fumbe lo wodja wa Suriya. La dihonga tshɛ, nde akasambisha nkumɛnde ka womoto awui wakendanaka la Elidja, ɔprɔfɛta waki Jehowa. Ɛtɛkɛta ande akakonya dia dihindo dimɔ salema ndo dihindo sɔ diakonge tshondotondo y’esambishelo ka wolo. (2 Khumi ya Dikanga 5:1-17) Yeso nde lawɔ akasambisha la dihonga tshɛ etena kakinde eke dikɛnda. Lo awui tshɛ wofundami lo Afundelo wakasalema lo dikɛnda diande, Jehowa akasɔnɛ ɔtɔi. Lam’akinde la ɛnɔnyi 12, Yeso akokaka ewandji wa ɛtɛmwɛlɔ ambola lo tɛmpɛlɔ ka la Jerusalɛma la dihonga tshɛ ndo akâtshike enyɔ hwɛ lo menda eokelo kaki lande ka mboka yaki Jehowa.—Luka 2:46-49.
12, 13. a) Kakɔna kakasale Yeso lo tɛmpɛlɔ yema la ntondo ka nyɔi kande, ndo dui sɔ diaki la etombelo akɔna le anto waki lawɔ? b) Kakɔna kakakanyiya Yeso lo kɛnɛ kendana la ɛtɛkɛta wa lotombo wakatombaka oma l’enyɔ wa ana w’apami?
12 Lam’akandakome opalanga, Yeso akakeketsha ana w’akɛnda dia tombola Jehowa. Ɛnyɛlɔ, nshi ngana tsho la ntondo ka nyɔi kande, Yeso aketsha wenya ɛmɔtshi lo tɛmpɛlɔ ka la Jerusalɛma. Bible mbutaka dia lɛkɔ, nde akasale ‘akambo wa diambo efula.’ Nde akatshanya wanɛ wakakonya dihole di’ekila sɔ woko wa wevi. Nde akakɔnɔla akanga a totshungu ndo akanga wa tshumbe. Oseka onto tshɛ laki lɛkɔ, djekoleko ewandji wa ɛtɛmwɛlɔ, wakahombe tshutshuyama dia tombola Jehowa ndo Mɛsiya w’Ɔnande. Lonyangu ko, anto efula wa lo nshi shɔ kombotombola ngasɔ. Vɔ wakeyaka dia Yeso akatomama oma le Nzambi, koko vɔ wakokaka ewandji wa ɛtɛmwɛlɔ wɔma. Koko, olui ɔmɔtshi w’anto wakatɛkɛta la dihonga tshɛ. Onde wɛ mbeyaka waa na wakiwɔ? Bible mbutaka ɔnɛ: “Keli lam’akenyi elombedi la afundji akambu wa mamba wakandatshi [Yeso] ndu akenda wahangohango lu etemwelo vati: Hosana le Kanula ya Davidi! vo wakuki yenyi. Ku vo wakawumbula vati: We mbukaka okone wata akenda aso?”—Mateu 21:15, 16; Joani 12:42.
13 Ɛlɔmbɛdi ɛsɔ wakalongamɛka dia Yeso shimba ana w’apami wakôtombolaka asɔ. Onde nde akashimbe? Kema! Yeso akatɛ ɛlɔmbɛdi ɛsɔ ɔnɛ: ‘Eelo. Onde nyu nyatalaka ndoko lushi ɔnɛ: Wɛ akatondja lotombo oma l’enyɔ w’ana w’akɛnda ndo w’ana walɔma?’ Mbokɛmaka hwe dia Yeso la She wakangɛnangɛna la lotombo laki ana wa apami asɔ. Anasɔ wakasale kɛnɛ kakahombe epalanga tshɛ waki lawɔ sala. Sho kokaka mboka hwe kɛnɛ kaki lo timba taki ana w’akɛnda asɔ. Vɔ wakɛnyi pami kɛsɔ asala akambo wa diambo, atɛkɛta la dihonga ndo la mbetawɔ ndo ɛnya ngandji k’efula kaki lande otsha le Nzambi ndo otsha le wodja ande. Nde aki Mɛsiya ‘Ɔnaki Davidi’ lakalakema, lo ndjela ɛtɛkɛta ande ndamɛ. Mbetawɔ ka anasɔ kakafutama, mbuta ate vɔ wakakondja diɛsɛ dia kotsha prɔfɛsiya kɛmɔtshi.—Osambu 8:2.
14. Ngande wele weshasha wele la ɛlɔngɔlɔngɔ la esekaseka mbakimanyiyaka dia tombola Nzambi?
14 Kakɔna kakokaso mbeka oma lo bɛnyɛlɔ sɔ na? Ana w’akɛnda kokaka tombola Jehowa lo yoho ya dimɛna efula. Mbala efula, vɔ waki la diɛsɛ dia mbetshama akambo wa mɛtɛ lo yoho yokɛma hwe ndo ya wɔdu ndo dia mɛnya mbetawɔ la ohetoheto awɔ. Vɔ wekɔ nto la woshasha wɔtɛkɛtshiwɔ lo Tukedi 20:29 ɔnɛ: “Wulu w’elongo w’apami mbeli lutumbu lawo.” Eelo, nyu ɛlɔngɔlɔngɔ la esekaseka nyekɔ la wolo, mbuta ate la akoka wa mɛtɛ wa tombola Jehowa. Lo yoho ya lânde, ngande wakokanyu kamba la weshasha ɛsɔ lo yoho ya dimɛna?
Ngande wakokanyu tombola Jehowa?
15. Kakɔna kahomba totshutshuya dia tombola Jehowa la ohetoheto?
15 Tombola lo yoho ya dimɛna ndjaka oma lo otema. Nyu hanyokokaki pondjo tombola Jehowa dimɛna, naka nyekɔ lo sala dui sɔ paka nɛ dia anto akina nangaka dianyu disala. Ohɔ dia, didjango dioleki wadjango tshɛ woke ekɔ nɛ diata ɔnɛ: “Olange Jehowa Nzambi kayɛ la otema ayɛ tshɛ, la anima tshɛ ndo la yimba yayɛ tshɛ.” (Mateu 22:37, NW) Onde nyambeya Jehowa dimɛna oma lo wekelo anyu w’onto ndamɛ wa Ɔtɛkɛta ande? Etombelo w’ɛlɔlɔ waya oma lo wekelo wa ngasɔ ele dui sɔ konyaka onto dia mboka Jehowa ngandji. Yoho ya dimɛna ya mɛnya ngandji kɛsɔ ele lo mbotombola. Naka onto ekɔ la oyango wɛnama hwe ndo wa shikaa, kete dui sɔ mɛnyaka dia nde ekɔ suke dia tombola Jehowa la wangasanu tshɛ.
16, 17. Ohomba akɔna wele la lɔkɛwɔ lo kɛnɛ kendana la tombola Jehowa? Sha ɛnyɛlɔ.
16 Kakianɛ, la ntondo ka kânga wɛ sɛdingola kɛnɛ kayoyota, sɛdingola woho wayoyosala. Otondonga yana ya yimato ya lo nshi ya Elidja aki la dionga dia lɔsɛndji, diaha la dilɛmiɛlɔ kana dia lokeso, onde nyu fɔnyaka dia ase Suriya wakawonde wotohokamɛ kɛnɛ kakandawatɛ lo dikambo dia ɔprɔfɛta wa Jehowa? Ondo totowosala dui sɔ. Woho akɔ wâmɛ mbele, anto wayɔngɛnangɛna nyohokamɛ naka vɔ mɛnaka dia nyekɔ la dilɛmiɛlɔ, la losembwe ndo la loshilambo. (Romo 2:21) Tɔshi ɛnyɛlɔ kɛmɔtshi.
17 Yana mɔtshi ya yimato yaki la ɛnɔnyi 11 ya lo wodja wa Portugal akatshutshuyama la kalasa dia sala fɛtɛ yaki kɔmbɔtɔnɛka la nkum’otema kande kaketshama oma lo Bible. La dilɛmiɛlɔ tshɛ, nde akalembetshiya ombetsha ande lande na kakandatonaka sala fɛtɛ shɔ, koko ombetsha ande akawoshaka sɔnyi. Ombetsha akawoshaka sɔnyi mbala ko mbala lo sɔka ɔtɛmwɛlɔ ande. Koko, osekaseka ɔsɔ akatetemala monga la dilɛmiɛlɔ. Ɛnɔnyi efula l’ɔkɔngɔ, kadiyɛsɔ k’osekaseka kɛsɔ akayokomaka ombatshi mboka wa pondjo, mbuta ate okambi wa lo tena tshɛ. Lo losanganya lɔmɔtshi, nde akendaka wanɛ wakalongolaka batismu ndo nde akeye onto ɔmɔtshi l’atei awɔ. Onto ɔsɔ aki ɔnɛ laki ombetsha ande! L’ɔkɔngɔ wa vɔ kumbatanɛ la asɔyi lo washo, mama k’opalanga kɛsɔ akatɛ osekaseka ɔsɔ dia nde kombohɛ pondjo dionga diande dioludi la dilɛmiɛlɔ. Kadiyɛsɔ kekina ka Ɔmɛnyi wa Jehowa akawembola, ko ombetsha ɔsɔ akɔkɔndɔlɛ dikambo dia dionga diaki ombeki ande ɔmɔtshi w’edjedja. Etombelo waki la dui sɔ ele wekelo wa Bible wakatatɛ ndo mama kɛsɔ aketawɔ akambo wa mɛtɛ. Eelo, dionga diayɛ koka monga yoho yoleki dimɛna ya tombola Jehowa!
18. Kakɔna kahomba ɔlɔngɔlɔngɔ kana osekaseka sala naka nde mengengaka dia tatɛ sawola la anto akina lo kɛnɛ kendana la Bible ndo la Jehowa Nzambi?
18 Onde mbala mɔtshi wɛ tɛnaka wolo tatɛ sawola la anto dikambo dia mbetawɔ kayɛ la kalasa? Ɛlɔngɔlɔngɔ la esekaseka efula mbokaka wolo sala dikambo sɔ. Koko, wɛ kokaka nɔngɔsɔla dikambo dimɔtshi diakoka anto akina ndjokombola lo kɛnɛ kendana la mbetawɔ kayɛ. Ɛnyɛlɔ, naka ndoko ɔlɛmbɛ lande na kahayatɔlɛ ekanda walembetshiya Bible ndo mbadiaka ekanda akɔ lo wonya wa diomuyelo kana lo wenya ekina wakokayɛ sala dui sɔ? Asekayɛ ambeki mbeyaka ndjokombola lo kɛnɛ kendana la awui weyɛ lo mbadia. Etena kakadimolayɛ ndo kawatɛyɛ kɛnɛ kokɔngɛnyingɛnyisha lo sawo kana lo okanda weyɛ lo mbadia, wɛ mbeyaka ndjokashimɔ ko sawo dia dimɛna efula diambotatɛ. Tohɛke mbaoka ambola dia mbeya kɛnɛ ketawɔ asekayɛ ambeki. La dilɛmiɛlɔ tshɛ, hokamɛ ndo kahana lawɔ kɛnɛ kamboyeka oma lo Bible. Oko wɛnya awui wele lo lɛkɛ 29, ɛlɔngɔlɔngɔ la esekaseka efula tombolaka Nzambi la kalasa. Dui sɔ mbashaka ɔngɛnɔngɛnɔ w’efula ndo kimanyiyaka anto efula dia mbeya Jehowa.
19. Ngande wakoka ɛlɔngɔlɔngɔ la esekaseka ndeka kondja etombelo w’ɔlɔlɔ lo esambishelo ka soko la soko?
19 Esambishelo ka lo soko la soko ekɔ yoho ya dimɛna efula ya tombola Jehowa. Naka nyu nyatatatɛ sala olimu ɔsɔ, lande na kahanyayadjɛ oyango ɔsɔ? Naka nyekɔ lo sala olimu ɔsɔ kakianɛ, naa eyango ekina wakokanyu ndjadjɛ? Ɛnyɛlɔ, lo dihole dia mbutaka tsho awui wâmɛ lo soko tshɛ, nyoyange toho ta ndjalowanya lo mumbola ambutshi anyu kana anto akina wambohokɔ akambo dia nyosha alako w’ohomba efula. Nyeke woho wa ndeka kamba la Bible dia salaka waendelo w’eyoyo w’amɛna efula ndo tatɛ wekelo wa Bible. (1 Timote 4:15) Naka nyu tombola Jehowa lo toho tɔsɔ, kete nyayoleka monga la etombelo w’ɛlɔlɔ ndo nyayoleka ngɛnangɛna olimu anyu w’esambishelo.
Etena kakɔna kahombanyu tatɛ tombola Jehowa?
20. Lande na kele ɛlɔngɔlɔngɔ la esekaseka hawohombe ndjaoka di’oko weke akɛnda efula dia tombola Jehowa?
20 Lo ambola asato wa lo sawo diaso nɛ, okadimwelo wa dimbola dia sato ekɔ wɔdu efula. Nyende okadimwelo wokɛma hwe washa Bible: “Okone uhoki utungi aye lu nshi yaye y’olongo a pami.” (Undaki 12:1) Eelo, nyu pombaka tatɛ tombola Jehowa kakianɛ. Efula mbutaka esadi eto ɔnɛ: “Dimi leke dikɛnda efula dia tombola Jehowa. Dimi latahokɔ awui. Dimi pombaka kongɛ polo etena kayomokoma opalanga.” Nyu bu anto wa ntondo wa ndjaoka ngasɔ. Ɛnyɛlɔ ɔlɔngɔlɔngɔ Jeremiya, akatɛ Jehowa ate: “Hayii! Khumadiondjo [Jehowa], we henyi, dimi haleyi nteketa, ne dia dimi leki dikenda.” Jehowa akoshikikɛ dia nde komonga ndoko la ɔkɔkɔ ɔtɔi wa mboka wɔma. (Jeremiya 1:6, 7) Woho akɔ wâmɛ mbele, sho kema la ɔkɔkɔ wa mboka wɔma dia tombola Jehowa. Ndoko mpokoso kakoka tokomɛ kele Jehowa heye nɔngɔsɔla.—Osambu 118:6.
21, 22. Lande na kɛdikama ɛlɔngɔlɔngɔ la esekaseka watombola Jehowa la apɔpɔ wa lônge, ndo lande na kele wɛdikelo ɔsɔ keketshaka?
21 Ɛlɔngɔlɔngɔ la esekaseka lee, tambonyokeketsha shate: Tanyengengake dia tombola Jehowa! Etena kêkenyu akɛnda kɛnɛ mboleki dimɛna nyu tatɛ sala olimu woleki ohomba wasalema ɛlɔ kɛnɛ lo nkɛtɛ. Naka nyu sala ngasɔ, kete nyayokoma anto amɔtshi wa l’atei wa nkumbo ka lo andja w’otondo ka wanɛ watombola Jehowa. Jehowa ngɛnangɛnaka dia ndo nyu lawɔ tanema lo nkumbo kɛsɔ. Ohonyenda ɛtɛkɛta ɛnɛ wakasambiyama waki omembi w’esambo wakandatɛ Jehowa ate: “Lu lushi layuyuyala khum’ekanga, wudja aye wayuyakimo l’ongenongeno, uku alimbi aye wolotshi eloto w’ekila. Ku wulu aye wayuyalaka la kesekese uku lopopo.”—Osambu 110:3.
22 Shi apɔpɔ wa wɛma fifɔ wa lônge watɔkɔka la pindju wekɔ amɛna efula lo washo? Vɔ mbotutadjaka, ngaimaka ndo wekɔ mɛtɛ efula kaheyama mbadia. Ngasɔ mbanyɔsa Jehowa, nyu ɛlɔngɔlɔngɔ la esekaseka wawotombola la kɔlamelo tshɛ lo tena dia wolo nɛ. Mbokɛmaka hwe, dia ɔsɔnwɛlɔ anyu wa tombola Jehowa ngɛnyangɛnyaka otema ande. (Tukedi 27:11) Nyu ɛlɔngɔlɔngɔ la esekaseka, nyotshe tshɛ dia tombola Jehowa!
Ngande wayoyokadimola?
• Naa ɛkɔkɔ ɛmɔtshi w’ohomba wa tombola Jehowa?
• Bɛnyɛlɔ diakɔna dia lo Bible diɛnya dia akɛnda koka tombola Jehowa lo yoho ya dimɛna efula?
• Ngande wakoka ɛlɔngɔlɔngɔ la esekaseka tombola Jehowa ɛlɔ kɛnɛ?
• Etena kakɔna kahomba ɛlɔngɔlɔngɔ la esekaseka tatɛ tombola Jehowa, ndo lande na?
[Esato wa lo lɛkɛ 18]
Naka ɔngɛnyi ayɛ ɔmɔtshi ekɔ la losha lɔmɔtshi, onde wɛ hatɔtɛkɛta dikambo diande le anto akina?
[Osato wa lo lɛkɛ 21]
Naka wɛ nangaka ndowanya olimu ayɛ wa esambishelo, kete mbola Ɔmɛnyi ɔmɔtshi wambohokɔ akambo dia kolakanya