Tatoyalake wanɛ woka awui ko mbohɛ
“Keli nyuyali atshi wa diui, aha ambuki atu, watuyadimbiyaka.”—JAKOBA 1:22.
1. Wodja w’Isariyɛlɛ waki la diɛsɛ dia mɛna ahindo akɔna?
“HAKOKE mbohamɛ,” ɔsɔ mbele ɛtɛkɛta wasungana dia nembetshiya ahindo wakasale Jehowa l’Edjibito wa lo nshi y’edjedja. Asui akɔ dikumi tshɛ waki mɛtɛ diambo efula. Asui asɔ wakayelana l’otshungwelo wa diambo efula wa wodja w’Isariyɛlɛ wakatenyanya Ndjale ka Bela kakakahanyema l’ahende. (Euhwelu k’Elembe 34:10-12) Otondoyala wɛ akɛnyi akambo asɔ la washo ayɛ tshike lo weho tshɛ totoyokoka pondjo mbohɛ Ɔnɛ lakâsale. Koko, omembi w’esambo akembe ate: “Vo [ase Isariyɛlɛ] wakuhela [Nzambi], Ushimbedi awo, lakatshaka akambu a waki lu Edjibitu, lakatshi elimu a waki lu kete ya Hama, la akambu wa mamba l’Uduwa a Tilili.”—Osambu 106:21, 22.
2. Kakɔna kɛnya dia lowando laki l’ase Isariyɛlɛ l’etsha wa nkudu waki Nzambi kotetemala l’etena k’otale?
2 L’ɔkɔngɔ wa vɔ tehɔ Ndjale ka Bela, ase Isariyɛlɛ ‘wakatatɛ mboka Jehowa wɔma ndo monga la mbetawɔ le Jehowa.’ (Etumbelu 14:31) Apami w’ase Isariyɛlɛ wakembɛ Jehowa osambo w’edjelo k’otshumba vɔ la Mɔsɛ, ndo Miriamɛ nde la wamato akina wakahome lɔsɛsɛ ndo wakanɔ wɛnyɛ. (Etumbelu 15:1, 20) Eelo, wodja waki Nzambi wakatshikala la diambo nɛ di’etsha waki Jehowa wa nkudu. Koko, lowando laki lawɔ otsha le Ɔnɛ lakasale etsha ɛsɔ kotetemala l’etena k’otale. Kombet’edja oma lâsɔ, efula ka l’atei awɔ wakonge la dionga diele oko wanɛ woka hemɔ ka mbohɛka akambo. Vɔ wakakome lo ngunɛngunɛ ndo nyangɛ Jehowa. Amɔtshi wakayasha l’ɔtɛmwɛlɔ wa dikishi ndo l’akambo wa mindo wa dieyanelo.—Walelu 14:27; 25:1-9.
Kakɔna kakoka tokonya dia mbohɛ?
3. L’ɔtɛ weso kema kokele, kakɔna kakokaso mbohɛ?
3 Woho waki ase Isariyɛlɛ komonga la lowando todjaka mɛtɛ l’okandokando. Koko, woho wa dikambo dia ngasɔ koka tokomɛ. Eelo mɛtɛ, sho kɔmɛna weho w’ahindo wakasale Nzambi asɔ. Koko, lo diɔtɔnganelo diasaso la Nzambi, hasambe mɛtɛ akambo amɔtshi wakete wahatakoke mbohɛ. Amɔtshi l’atei aso koka mbohɔ etena kakawetawɔ akambo wa mɛtɛ w’oma lo Bible. Tena dikina di’ɔngɛnɔngɛnɔ koka monga dɔmbɛlɔ diakiso dia ndjakimɔ le Jehowa ndo batismu kaso ka l’ashi oko Akristo wa mɛtɛ. Efula ka l’atei aso takɛnyi ekimanyielo ka Jehowa lo tena dikina dia lo lɔsɛnɔ laso. (Osambo 118:15) Ndo kɛnɛ koleki tshɛ ele, oma lo tshimbo ya nyɔi k’olambo kaki Ɔna Nzambi, Yeso Kristo, takakondja elongamelo ka panda. (Joani 3:16) Koko, l’ɔtɛ weso kema kokele, etena kongaso la nsaki ya kɔlɔ kana l’ekiyanu wa lo lɔsɛnɔ, sho lawɔ kokaka mbohɛ akambo w’ɔlɔlɔ wakatosalɛ Jehowa esadi eto.
4, 5. (a) Ngande watewola Jakɔba lo kɛnɛ kendana la wâle wa mongaka wanɛ woka awui ko mbohɛ? (b) Ngande wakokaso kamba l’ɛnyɛlɔ kaki Jakɔba k’onto ndo ka talatala?
4 Lo mukanda ande wakandafundɛ asekande Akristo, Jakɔba y’ɔnango Yeso akawaewola lo kɛnɛ kendana la wâle wa mongaka wanɛ woka awui ko mbohɛ. Nde akafunde ate: “Keli nyuyali atshi wa diui, aha ambuki atu, watuyadimbiyaka. Naka untu eko umbuki a diui, la haditshi, ndi eko uku untu lenda elundji kandi lu [talatala]. Ne dia lam’ayaendandi lu [talatala], ndi atumoka, kema edja ku ndi ambuhela didjidji diandi.” (Jakoba 1:22-24) Kakɔna kakalange Jakɔba mbuta l’ɛtɛkɛta ɛsɔ na?
5 Etena kemɔso la pindju, sho tongaka la mbekelo ka ndjaenda lo talatala dia menda lɛnɛ akokaso ndjalɔngɔsɔla. Lam’ayashaso l’elimu wotshikitanyi ndo wadjaso yimba l’akambo akina, sho totshikaka kanyiya lo kɛnɛ kakatɛnyi lo talatala. Kɛsɔ koka tokomɛ ndo lo yoho ya lo nyuma. Lam’akaso sso l’Ɔtɛkɛta waki Nzambi, sho koka mbɛdika kɛnɛ keso la kɛnɛ kalongamɛ Jehowa dia sho monga. Etena kɛsɔ mbayoteyaka wɛɔdu wele laso. Ewo kɛsɔ pombaka totshutshuya dia sala etshikitanu ɛmɔtshi lo kɛnɛ kendana la lonto laso. Koko, lam’akambaso elimu aso wa lushi la lushi ndo walɔshanaso l’ekakatanu aso, sho koka esadi eto tshika dia kanyiya akambo wa lo nyuma. (Mateu 5:3; Luka 21:34) Ekɔ oko tambohɛ akambo woludi la ngandji wasala Nzambi dikambo dia wahɔ aso. Naka kɛsɔ pombaka tokomɛ, kete sho koka nkɔ esadi eto lo nsaki ya kɔlɔ.
6. Ɔsɛndingwelo wa divɛsa diakɔna diakoka tokimanyiya di’aha sho mbohɛ ɔtɛkɛta waki Jehowa?
6 Lo mukanda ande wa ntondo wakandafundɛ ase Kɔrɛtɔ oma lo wolo wa nyuma, ɔpɔstɔlɔ Paulo mbutaka dikambo di’ase Isariyɛlɛ wakohɛ akambo l’oswe wa shɛnga. Oko wakakondja Akristo wa lo ntambe ka ntondo wahɔ oma l’ɛtɛkɛta waki Paulo, ovuswelo wa kɛnɛ kakandafunde koka tokimanyiya di’aha mbohɛ ɔtɛkɛta waki Jehowa. Ɔnkɔnɛ, nyɛsɔ tɔsɛndingole 1 Koreto 10:1-12.
Totone nsaki ya l’andja ɔnɛ
7. Naa djembetelo y’oshika ya ngandji ka Jehowa yakɛnyi ase Isariyɛlɛ?
7 Kɛnɛ kata Paulo lo dikambo di’ase Isariyɛlɛ ekɔ oko ɔhɛmwɛlɔ le Akristo. L’etenyi kɛmɔtshi Paulo akafunde ate: “Anyasu, dimi nangaka nyu mbeya nyati: Watshesu tshe waki la tshina dia dingi, vo tshe waketi l’atei w’uduwa. Vo tshe wakabatizama le Mose lu dingi la l’uduwa. (1 Koreto 10:1-4) Wodja w’Isariyɛlɛ wa lo nshi ya Mɔsɛ wakɛnyi bɛnyɛlɔ dia weke efula dia nkudu kaki Nzambi, mbidja ndo okama wa dinge waki Nzambi wa lo dihindo wakatawalɔmbɔlaka la yanyi ndo wakakimanyiya dia pandɔ lam’akawatehɔ Ndjale ka Bela. (Etumbelu 13:21; 14:21, 22) Eelo, ase Isariyɛlɛ asɔ mɛtɛ wakɛnyi djembetelo y’oshika ya ngandji kaki Jehowa oya le wɔ.
8. Etombelo akɔna wakonge oma lo woho wakohɛ ase Isariyɛlɛ akambo wa lo nyuma?
8 Paulo ambotetemala ate: “Keli [Nzambi] kongenangena le amotshi wuleki efula, ne dia vo wakalembiama l’usui.” (1 Koreto 10:5) Ande kandji mɛtɛ! Efula k’ase Isariyɛlɛ wakatombe oma l’Edjibito wakayɛnya vamɛ dia hawokoke mbɔtɔ lo Nkɛtɛ ya Daka. Oko wakiwɔ kombetawɔma nto oma le Nzambi l’ɔtɛ wakawashisha mbetawɔ, vɔ wakavu l’oswe wa shɛnga. (Heberu 3:16-19) Wetshelo akɔna wakokaso kondja oma lo dikambo sɔ na? Paulo mbutaka ate: “Akambu aso wakayala le su dia ntewula, daha shu ndjala la saki y’akambu wa kolo uku akiwo la saki.”—1 Koreto 10:6.
9. Weshasha akɔna wakasha Jehowa wodja ande ndo ngande wakasale Isariyɛlɛ?
9 Ase Isariyɛlɛ waki l’akambo efula wakakoke mbakimanyiya dia vɔ tetemala la shikikɛ yimba yawɔ l’akambo wa lo nyuma lam’akiwɔ l’oswe wa shɛnga. Vɔ wakadje la Jehowa sheke ndo wakakome wodja wakayakimɔ le nde. Lâdiko wa lâsɔ, wakawasha dioho di’ɛlɔmbɛdi, tabɛrnakɛlɛ oko etshina ka dihole di’ɔtɛmwɛlɔ, ndo ɔlɔngɔswɛlɔ wa nambolaka Jehowa elambo. Koko, l’ɔtɛ wa ngɛnangɛna la weshasha wa lo nyuma ɛsɔ, vɔ wakonge la lɔhɛndɛ lo kɛnɛ kakawasha Nzambi.—Walelu 11:4-6.
10. Lande na kahatahombe mbohɛ Nzambi?
10 Otshikitanyi l’ase Isariyɛlɛ wa l’oswe wa shɛnga, ekambi waki Jehowa wa nshi nyɛ wekɔ lo mbetawɔma le Nzambi. Ɔnkɔnɛ, ekɔ ohomba efula le ɔm’ɔmɔ wa l’atei aso, di’aha mbohɛ Nzambi. Naka sho sala ngasɔ, kete tayokimanyiyama dia tona nsaki ya kɔlɔ yakoka ndjotokonya ko hatoyɛna awui lo yoho ya lo nyuma. Sho pombaka mbɔsa yɛdikɔ ya “ntuna akambu wa dionyo la saki y’akambu wa la kete, dia shu ndjala la nyumu ya ki, y’uluwanyi ndu y’ololo la kete nye.” (Tito 2:12) Wanɛ wele l’atei aso wakonge oma ko tɔkɛndakɛnda tawɔ l’etshumanelo k’Akristo hawohombe fɔnya pondjo di’oko wekɔ lo shisha ɛngɔ kɛmɔtshi ka dimɛna. Naka taya la weho wa tokanyi ta ngasɔ lo timba taso, kete ekɔ ɔlɔlɔ sho mbohɔ Jehowa ndo ɛtshɔkɔ wamondotombɛ.—Heberu 12:2, 3.
Tokitanyiya Jehowa l’awui tshɛ
11, 12. Ngande wakoka onto ndjokoma ɔtɛmɔdi wa dikishi aha la nde tɛmɔla ekishi ka lɔsɛla?
11 Paulo ambotewola nto ate: “Tanyuyalaki atemodi wa dikishi uku aki amotshi; uku ambufundama ati: Antu wakadjase ne dia nde la no, wakunela ne dia nkenya.” (1 Koreto 10:7) Paulo ekɔ lo mbuta di’etena kakatshutshuya ase Isariyɛlɛ Arɔna dia nde mbasalɛ yana ya ngɔmbɛ ya paunyi. (Etumbelu 32:1-4) Kânga mbele ekɔ wolo dia sho tɛmɔla dikishi lo yoho ya ngasɔ, sho kokaka koma atɛmɔdi wa dikishi naka sho mbetawɔ dia nsaki yaso ya kɔlɔ tofukutanya dia tɛmɔla Jehowa l’anima aso tshɛ.—Kolosai 3:5.
12 L’etena kekina, Paulo akafunde dikambo di’anto amɔtshi wakaleke ndjakiyanya dikambo dia lomombo la l’emunyi lo dihole di’akambo wa lo nyuma. Lo dikambo dia wanɛ “watokendakendaka uku . . . atunyi wa utamba [w’asui] wa Kristu,” nde akafunde ate: “Ekumelu kawo eko elanyelu, etemolatemola kawo eli dikundju [“diawɔ,”NW].” (Filipi 3:18, 19) Ɛngɔ kakawatɛmɔlaka komonga ekishi kakawasɛlɛ. Aki nsaki kawɔ ka lomombo la l’emunyi. Aha nsaki tshɛ mbele kɔlɔ. Jehowa akatotonge l’ehomba wa l’emunyi ndo la dikoka dia ngɛnangɛna lo weho efula. Koko, lo mɛtɛ, wanɛ wetsha oweso w’ɛngɛnɔngɛnɔ la ntondo ka diɔtɔnganelo diasawɔ la Nzambi komaka atɛmɔdi wa dikishi.—2 Timote 3:1-5.
13. Wetshelo akɔna wakokaso kondja oma l’ɔkɔndɔ wa yana ya ngɔmbɛ ya paunyi?
13 L’ɔkɔngɔ wa vɔ tomba oma l’Edjibito, ase Isariyɛlɛ wakasale yana ya ngɔmbɛ ya paunyi dia ndjitɛmɔla. Lâdiko di’ɔhɛmwɛlɔ wendana l’ɔtɛmwɛlɔ wa dikishi, wetshelo okina w’ohomba wekɔ l’ɔkɔndɔ ɔnɛ. Ase Isariyɛlɛ wakɔnyɔla ɛlɔmbwɛlɔ k’oshika k’oma le Jehowa. (Etumbelu 20:4-6) Koko, oyango awɔ komonga wa tona Jehowa oko Nzambi kawɔ. Vɔ wakalambola yana ya ngɔmbɛ ya paunyi yakawasale elambo ndo wakɔlɛ etena kɛsɔ ɔnɛ “lushi la wuki la [Jehowa].” Lo woho ɔmɔtshi vɔ wakayakesaka vamɛ lo fɔnya ɔnɛ Nzambi hodja yimba l’ohedia awɔ. Ɔsɔ aki tshondo ya lɔtɛngɔ le Jehowa ndo dikambo sɔ diakawotsha nkɛlɛ k’efula.—Etumbelu 32:5, 7, 7-10; Osambu 106:19, 20.
14, 15. (a) Lande na kaki ase Isariyɛlɛ kokoka monga la yɛkɛ nɛndɛ ya koma wanɛ woka tsho ko mbohɛ? (b) Naka hatolange monga wanɛ woka tsho ko mbohɛ, ayotohomba sala la wadjango waki Jehowa?
14 Ekɔ wolo di’Ɔmɛnyi wa Jehowa nsangana kamɛ l’ɔtɛmwɛlɔ wa kashi. Koko, kânga mbewɔ l’atei w’etshumanelo, amɔtshi koka tona ɛlɔmbwɛlɔ ka Jehowa lo toho tokina. Wodja w’Isariyɛlɛ komonga ndoko la yɛkɛ nɛndɛ ya koma wanɛ woka awui ko mbohɛ. Vɔ wakoke Ɛlɛmbɛ Dikumi ndo wakikɔ etena kakawasha Mɔsɛ didjango diaki Nzambi diata ate: “Tanyuyatshelaki ditemolatemola dia fesa, dia dio ndjala kame la mi, kuyanga ndjatshela ditemolatemola dia paunyi.” (Etumbelu 20:18, 22, 23) Koko, ase Isariyɛlɛ wakatɛmɔla yana ya ngɔmbɛ ya paunyi.
15 Sho lawɔ hatokoke nyanga yɛkɛ nɛndɛ ya mbisha naka sho monga wanɛ woka awui ko mbohɛ. Tekɔ l’ɛlɔmbwɛlɔ k’oma le Nzambi kendana l’awui efula wa lo lɔsɛnɔ l’atei w’Afundelo. Oko ɛnyɛlɔ, Ɔtɛkɛta waki Jehowa mɛnyaka hwe dia tshelo ya sɔmba dibasa ko hasɔmbɔla yekɔ kɔlɔ. (Osambu 37:21) Ana nɔmbamaka dia monga l’okitanyiya le ambutshi awɔ, ndo ambutshi w’apami nɔmbamaka dia mbodia anawɔ lo “elembe la lu wetshelu wa [Jehowa].” (Efeso 6:1-4) Akristo w’enyemba nɔmbamaka dia tshukana ‘paka lo Nkumadiɔndjɔ,’ ndo vɔ mbutɛka ekambi waki Nzambi wambotshukana ɔnɛ: “Diwala dialemiami le antu tshe, dia antu tawunanaki, ne dia [Nzambi] ayulumbuya akanga a munanyi la luseka.” (1 Koreto 7:39; Heberu 13:4) Naka hatolange monga wanɛ woka awui ko mbohɛ, kete tayɔsa alako anɛ ndo akina woye oma le Nzambi la nɛmɔ di’efula ndo tayowakitanyiya.
16. Kakɔna kakakomɛ wanɛ wakatɛmɔla yana ya ngɔmbɛ ya paunyi?
16 Jehowa kombetawɔ woho wakasale ase Isariyɛlɛ dia mbɔtɛmɔla lo yoho yalangawɔ. Diɔ diakɔ, diakadiakema anto 3000, ondo lo woho wakawaleke tshutshuya anto lo tshelo shɔ y’ɔtɔmbɔkwɛlɔ ya tɛmɔla yana ya ngɔmbɛ ya paunyi. Atshi wa kɔlɔ akina wakadiɛnɛ l’asui w’oma le Jehowa. (Etumbelu 32:28, 35) Ande wetshelo wa dimɛna le anto tshɛ wadia Ɔtɛkɛta waki Nzambi koko sɔnaka vamɛ kɛnɛ kalangawɔ kitanyiya lee!
“Nyulawo munanyi”
17. Dikambo diakɔna diakete diatama lo 1 Koreto 10:8?
17 Paulo mɛnyaka yoho mɔtshi yakoka nsaki ya demba fukutanya woho wɛnaso akambo lo yoho ya lo nyuma lam’atande ate: “Tunanaki uku akatshi amotshi, ku wakavu [nunu akumi ahende la satu ] lushi lame.” (1 Koreto 10:8) Lanɛ Paulo ekɔ lo mbuta kɛnɛ kakete l’Okidi wa Mɔaba l’ekomelo k’ɛnɔnyi 40 waketsha ase Isariyɛlɛ l’oswe wa shɛnga. Etena kɛsɔ ko ase Isariyɛlɛ waki ma la nɛndja ɛtshi ka nkɛtɛ ka lo lɛkɛ la ɛstɛ ka Jɔrɔdana oma l’ekimanyielo ka Jehowa, koko efula ka l’atei awɔ wakohɛ tshɛ ndo komonga la lowando lo kɛnɛ kakandasalɛ. Lam’akiwɔ nsuke la mbɔtɔ lo Nkɛtɛ ya Daka, vɔ wakayatambiya l’akambo wa mindo wa dieyanelo ndo l’ɔtɛmwɛlɔ wa mindo wa Bala-Pɛɔrɛ. Anto oko 24 000 ndo l’atei wa lofulo lɔsɔ mbaki ndo anto 1 000 wakatshutshuya anyawɔ l’awui asɔ wa kɔlɔ.—Walelu 25:9.
18. Woho akɔna wa dionga diakoka konya onto l’akambo wa mindo wa dieyanelo?
18 Ekambi waki Jehowa mbeyamaka ɛlɔ kɛnɛ oma lo lɔkɛwɔ lawɔ la dimɛna efula. Koko etena kahembamawɔ l’akambo wa mindo wa dieyanelo, Akristo amɔtshi tokomaka dia mbohɛ Nzambi ndo wadjango ande. Vɔ tokomaka wanɛ woka awui ko mbohɛ. L’etatelo, sho mbeyaka pembama, koko aha dia sala monanyi. Mbeyaka monga nsaki ka menda alɛdi w’awui wa mindo, tɔkɛnyɔ ta kɔlɔ ta l’alemba kana mbishana shambi, kana monga la lɔngɛnyi l’efula l’anto wele kema la lɔkɛwɔ la dimɛna. Akambo asɔ tshɛ wakakonya Akristo lo pɛkato.—1 Koreto 15:33; Jakoba 4:4.
19. Dako diakɔna dia l’Afundelo diatokimanyiya dia ‘ndawɔ monanyi’?
19 Naka tambohembama dia monga la dionga dia mindo, hatohombe mbohɛ Jehowa. Koko, sho pombaka ndjela waohwelo wele l’Ɔtɛkɛta ande. (Osambu 119:1, 2) Oko weso Akristo, efula ka l’atei aso salaka la wolo dia monga la lɔkɛwɔ la pudipudi, koko sala kɛnɛ kele ɔlɔlɔ lo washo waki Nzambi nɔmbaka dia tetemala mbidja welo. (1 Koreto 9:27) Paulo akafundɛ Akristo wa la Rɔma ate: “Lukumu l’ukitanyia anyu lambudiangana le antu tshe. Okone dimi ndjalaka la ongenongeno too lu dikambu dianyu. Keli dimi nangaka nyu ndjala akanga a yimba lu akambu w’ololo, la akanga a dinginya lu akambu wa kolo.” (Romo 16:19) Oko wakadiakema ase Isariyɛlɛ 24 000 l’ɔtɛ wa pɛkato yawɔ, akanga wa monanyi ndo atshi wa kɔlɔ akina wotsha mɛna elombwelo kaki Jehowa kem’edja. (Efeso 5:3-6) Lâsɔ lo dihole dia monga wanɛ woka awui ko mbohɛ, sho pombaka tetemala la ‘ndawɔ monanyi.’—1 Koreto 6:18.
Tandolake nshi tshɛ kɛnɛ katosha Jehowa
20. Ngande wakadje ase Isariyɛlɛ Jehowa l’ohemba ndo etombelo akɔna wakonge?
20 Efula k’Akristo watakɔka l’awui wa mindo wa dieyanelo. Koko, sho pombaka menda ɔlɔlɔ di’aha ndjoyatambiya lo dionga diakonya l’engunungu, diokoki ndjotokonya di’aha sho mbetawɔma le Nzambi. Paulo tewolaka ate: “Tatuhimbaki [Jehowa] uku akatshi amotshi, ku wakavu l’elui. Ntu, tatungunangunaki uku akangunanguna amotshi, ku wakavu l’anya w’Unanyishi.” (1 Koreto 10:9, 10) Ase Isariyɛlɛ wakangunɛngunɛ Mɔsɛ nde l’Arɔna, eelo ndo Nzambi ndamɛ mɛtɛ mbakawangunɛngunɛ, lo mɔnyɔla mana yakandawashaka lo dihindo. (Walelu 16:41; 21:5) Onde Jehowa komomala efula di’engunungunu awɔ oko lo dikambo dia monanyi? Ɔkɔndɔ wa lo Bible mɛnyaka dia efula ka wanɛ wakangunangunaka wakadiakema oma le elui. (Walelu 21:6) Mbala ka ntondo, ndekana 14 700 y’anto wakatɔmbɔkɔ lo ngunanguna wakadiakema. (Walelu 16:49) Ɔnkɔnɛ, aha sho mbidja ekikelo ka Jehowa l’ohemba lo monga la lɔhɛndɛ lo kɛnɛ katoshande.
21. (a) Dako diakɔna diakatshutshuyama Paulo oma lo wolo wa nyuma dia funda? (b) Lo ndjela Jakoba 1:25, ngande wakokaso monga mɛtɛ l’ɔngɛnɔngɛnɔ?
21 Lam’afundɛnde asekande Akristo, Paulo ambokomiya la nshila akambo wakandawaewolaka lo kɔkɔmiya ate: “Akambu aso wakayala le wo dia mbaewula. Vo wambufundama dia ntewula l’ekumelu ka tena diaya le su. Onkone untu lakana ati: Dimi lambemala, ewo, atukoko.” (1 Koreto 10:11, 12) L’ɛnyɛlɔ k’ase Isariyɛlɛ, sho tambolongola ɛtshɔkɔ efula oma le Jehowa. Koko, otshikitanyi la wɔ, tatohɛke pondjo kana monga la lɔhɛndɛ l’akambo w’amɛna watosalɛ Nzambi. Etena kahɛnyahɛnyamaso l’ekiyanu wa lo lɔsɛnɔ, tokane yimba l’alaka wa diambo wele l’Ɔtɛkɛta waki Nzambi. Tohɔ diɔtɔnganelo di’oshinga wolo diele lam’asaso la Jehowa ndo totetemale la kamba olimu w’esambishelo ka Diolelo wakawatosha. (Mateu 24:14; 28:19, 20) Sala yoho shɔ mɛtɛ ayotela ɔngɛnɔngɛnɔ wa mɛtɛ nɛ dia Afundelo ndakaka ɔnɛ: “Keli lenda elembe w’ololo wa ndjadjasela, ndu latetemala loko, aha umbuki a diui ladiuhela, keli utshi a diui mbendi. Untu ako ayotshokwama lu etsha andi.”—Jakoba 1:25.
Ngande wayoyokadimola?
• Kakɔna kakoka tokonya wanɛ woka awui ko mbohɛ?
• Lande na kele ekɔ ohomba kitanyiya Nzambi l’akambo tshɛ?
• Ngande wakokaso ‘ndawɔ monanyi’?
• Ngande wahomba monga dionga diaso lo kɛnɛ kendana la kɛnɛ katosha Jehowa?
[Osato wa lo lɛkɛ 11]
Ase Isariyɛlɛ wakohɛ etsha wa wolo wakasale Jehowa dia wahɔ wakiwɔ
[Osato wa lo lɛkɛ 12]
Ekambi wa Jehowa wambɔsa yɛdikɔ ya tetemala monga la lɔkɛwɔ la dimɛna efula