Totshikale nge oko wanɛ wɛna ɔnɛ lahɛnama!
‘[Mɔsɛ] akatetemala monga nge oko onto lɛna ɔnɛ lahɛnama.’—HEBERU 11:27.
1. Dikambo diakɔna diendana la Nzambi diakɛnya Yeso lo Dako diande dia lo Dikona?
JEHOWA ekɔ Nzambi kahɛnama. Lam’akalɔmbɛ Mɔsɛ dia mɛna lotombo Lande, Jehowa akôkadimola ate: “We heyi mena elundji kami; ne dia untu heyi menami, ku ndi tshikala la lumu.” (Etumbelu 33:20) Ndo ɔpɔstɔlɔ Joani akafunde ate: “Nduku untu lakenyi [Nzambi].” (Joani 1:18) Kânga Yeso kokoka mɛna Nzambi etena kakinde lanɛ la nkɛtɛ oko onto. Diakɔ diele, lo Dako diande dia lo Dikona Yeso akate ate: “Wane weli la etema wa pudipudi, weko la otshoko, ne dia vo wayena [Nzambi].” (Mateu 5:8) Kakɔna kakalange Yeso mbuta lasɔ na?
2. Lande na kahatakoke mɛna Nzambi la washo aso anɛ na?
2 Afundelo mɛnyaka dia Jehowa ekɔ Nyuma kahɛnama. (Joani 4:24; Kolosai 1:15; 1 Timote 1:17) Diakɔ diaki Yeso kombuta di’ɔnɛ sho anto koka mɛtɛ mɛna Jehowa la washo aso anɛ. Mɛtɛ, Akristo w’akitami w’esɔ wayɛna Jehowa Nzambi l’olongo l’ɔkɔngɔ wa vɔ mbolɔ oko ditongami dia lo nyuma. Koko anto wele “la etema wa pudipudi” ndo l’elongamelo ka nsɛna pondjo la nkɛtɛ wekɔ nto l’akoka wa ‘mɛna’ Nzambi. Ngande wakoka salema dikambo sɔ?
3. Ngande wakoka anto mana waonga amɔtshi waki Nzambi fundo?
3 Sho mbekaka awui amɔtshi wendana la Jehowa lo sɛdingola diangɔ diakandatonge la yambalo tshɛ. Lâsɔ sho koka mamba nkudu kele lande ndo tshutshuyama dia mbetawɔ dia nde ekɔ Nzambi, Otungi. (Heberu 11:3; Enyelo 4:11) Lo dikambo sɔ, ɔpɔstɔlɔ Paulo akafunde ate: “Akambu wa [Nzambi] ndu wulu andi wa pundju la efanelu kandi la [Nzambi] waki komenamaka umaka etungelu k’andja wambenama hwe kakiane. Antu wambumana akambu ako fundu uma lu diango diakandatungi wuhu wahawakuki ndjayindja.” (Romo 1:20) Ɔnkɔnɛ, ɛtɛkɛta waki Yeso watɛkɛta dia mɛna Nzambi mendanaka ndo la dikoka dia mana waonga waki Jehowa amɔtshi fundo. Dia mɛnaka akambo woho ɔsɔ ekɔ ohomba monga l’ewo k’oshika ndo mana akambo fundo lo yoho ya lo nyuma la ‘washo wa l’otema.’ (Efeso 1:18) Ɛtɛkɛta ndo etsha waki Yeso tosholɛka nto akambo efula wendana la Nzambi. Diɔ diakɔ diakate Yeso ate: “One lakamenyi, akenyi Papa.” (Joani 14:9) Yeso akakɛnɛmɔla lonto laki Jehowa tshɛ lo tshɛ. Ɔnkɔnɛ, mbeya lɔsɛnɔ laki Yeso ndo wetshelo ande koka tokimanyiya dia mɛna kana mana waonga amɔtshi waki Nzambi fundo.
Eokelo k’akambo wa lo nyuma kekɔ ohomba efula
4. Ngande wɛnamande di’anto efula bu la eokelo ka lo nyuma ɛlɔ kɛnɛ?
4 Ɛlɔ kɛnɛ, aya mɛtɛ wolo tana anto wele la mbetawɔ ndo la eokelo ka mɛtɛ k’akambo wa lo nyuma. Paulo akate ate: “Aha untu tshe mbeli la mbetawo.” (2 Tesalonika 3:2) Efula wamboyasha tshɛ l’eyango awɔ vamɛ ndo waya bu la mbetawɔ le Nzambi. Dionga diawɔ dia kɔlɔ ndo woho wewɔ bu la eokelo ka lo nyuma mbashimbaka dia vɔ mɛna Nzambi la washo wa l’otema, nɛ dia ɔpɔstɔlɔ Joani akafunde ate: “One latutshaka kolo atenyi [Nzambi].” (3 Joani 11) Lam’ele weho w’anto wa ngasɔ hawɛnyi Nzambi la washo awɔ, vɔ salaka akambo oko nde hakoke mɛna kɛnɛ katshawɔ. (Ezekiyele 9:9) Vɔ mɔnyɔlaka awui wa lo nyuma, diakɔ diahawakoke kondja ‘ewo k’oshika kaki Nzambi.’ (Tukedi 2:5) Diɔ diakɔ, diakafunde Paulo ate: “Untu a la kete halungula akambu wa Nyuma ka [Nzambi], ne dia vo weko uku akambu w’anyanya le ndi. Ndi heyi mbalimbitela, ne dia vo watulimbitshiyamaka uma le Nyuma.”—1 Koreto 2:14.
5. Kakɔna keya anto washikikɛ yimba yawɔ l’akambo wa lo nyuma?
5 Koko, naka sho shikikɛ yimba yaso l’akambo wa lo nyuma, kete tayeyaka dia kânga mbele Jehowa bu Nzambi kona dia munda anto la munga, nde mbeyaka etena kasalaso akambo lo ndjela tokanyi kana nsaki yaso ya kɔlɔ. Lo mɛtɛ, “mbuka y’untu yeko la ntundu ka [Jehowa], ndi atendaka mbuka yandi tshe.” (Tukedi 5:21) Naka tambosala pɛkato, kete sho pombaka ndjatshumoya ndo nyanga edimanyielo ka Jehowa nɛ dia sho mbokaka ngandji ndo hatolange mbônyangiya.—Osambu 78:41; 130:3.
Kakɔna katokimanyiya dia monga nge?
6. Monga nge kɛdikɛdi na?
6 Kânga mbahatakoke mɛna Jehowa la washo aso anɛ, tohɔke nshi tshɛ dia nde ekɔ lo ntɛna. Mbeya dia nde ekɔ ndo shikikɛ ɔnɛ nde mongaka suke la wanɛ tshɛ watɔtɛndɛka, ayotokimanyiya dia monga nge ndo tayonga la kɔlamelo ya wolo efula otsha le nde. (Osambu 145:18) Sho koka monga oko Mɔsɛ, ɔnɛ lakafunde Paulo dikambo diande ate: “Dia mbetawo, mbakandamo uma l’Edjibitu, kumbuka kele ka khum’ekanga woma; ne dia ndi akatetemala, uku untu lena one lahenamaka.”—Heberu 11:27.
7, 8. Kakɔna kakakimanyiya Mɔsɛ dia monga la dihonga la ntondo ka Farawɔ na?
7 Dia kotsha ɔkɛndɛ wakawosha Nzambi wa nɔmbɔla ase Isariyɛlɛ oma lo lɔhɔmbɔ l’Edjibito, Mɔsɛ akɛnamaka esangɔ efula la ntondo ka Farawɔ kanga ngala lo sɛkɛ diande dia nkumekanga diakalole tɔɔ l’ewandji wa weke w’ɛtɛmwɛlɔ ndo w’alembe. Ondo wakasange dikishi lo pele dia luudu la nkumekanga. Koko, Jehowa, kânga mbahandɛnama, Mɔsɛ akawɔsaka dia nde ekɔ onto la mɛtɛ, otshikitanyi la dikishi dia tozambizambi taha la lɔsɛnɔ ta l’Edjibito. Diakɔ diele Mɔsɛ komboka Farawɔ wɔma!
8 Kakɔna kakasha Mɔsɛ dihonga dia mɛnama esangɔ efula la ntondo ka Farawɔ na? Afundelo totɛka ɔnɛ: “Mose aki untu kanga memakana ka wulu, ndeka antu tshe wa la kete.” (Walelu 12:3) Mbokɛmaka hwe dia eokelo kande k’akambo wa lo nyuma ndo mbetawɔ kande ka wolo k’ɔnɛ Nzambi ekɔ kâmɛ la nde akasha Mɔsɛ wolo wakahombamaka dia monga otomami waki ‘Ɔnɛ lahɛnama’ la ntondo ka nkumekanga k’okonda k’ase Edjibito. Naa toho tɔmɔtshi tɛnya wanɛ ‘wɛna’ Nzambi kahɛnama mbetawɔ kawɔ le nde ɛlɔ kɛnɛ na?
9. Naa yoho mɔtshi yakokaso tetemala la monga nge?
9 Yoho mɔtshi ya mɛnya mbetawɔ ndo tetemala monga nge oko anto wɛna Ɔnɛ lahɛnama ele sambisha la dihonga oyadi kânga l’atei w’ɛhɛnyɔhɛnyɔ. Yeso akewola ambeki ande ate: “Antu tshe wayunyuhetsha ne dia lukumbu lami.” (Luka 21:17) Nde akawatɛ nto ate: “Ukambi haleki uwandji andi. Naka vo wakansuya, wayunyusuya ndu nyu.” (Joani 15:20) Oko wakadite Yeso, kombet’edja oma l’ɔkɔngɔ wa nyɔi kande, ambeki ande wakahɛnyahɛnyama nɛ dia wakanemɛ, wakadjama lo nkanu, ndo wakakɔmama. (Etsha 4:1-3, 18-21; 5:17, 18, 40) Kânga mbakawahɛnyahɛnyama efula, apɔstɔlɔ waki Yeso ndo ambeki akina wakatetemala la sambisha lokumu l’ɔlɔlɔ la dihonga.—Etsha 4:29-31.
10. Ekimanyielo ka ngande kakondjaso l’olimu aso lam’eyaso ɔnɛ Jehowa ekɔ lo tokokɛ?
10 L’ɛnyɛlɔ ka Mɔsɛ, ambeki waki Yeso wa ntondo kombotshama wɔma oma le efula k’atunyi awɔ wakɛnamaka. Ambeki waki Yeso waki la mbetawɔ le Nzambi, diɔ diakɔ diakawakoke mbikikɛ ɛhɛnyɔhɛnyɔ wa wolo wakahomana lawɔ. Eelo, vɔ wakatetemala monga nge oko wanɛ wɛna Ɔnɛ lahɛnama. Ɛlɔ kɛnɛ, woho weyaso wonya tshɛ ɔnɛ Jehowa ekɔ lo tokokɛ tokeketshaka ndo toshaka dihonga l’olimu aso w’esambishelo ka Diolelo. Ɔtɛkɛta wa Nzambi mbutaka ɔnɛ: “Woma w’untu watuwambaka djunga. Keli one latekamaka [Jehowa], ayushimbamela.” (Tukedi 29:25) Diɔ diakɔ dieso hatokawola ɛkɔngɔkɔngɔ la wɔma w’ɛhɛnyɔhɛnyɔ; kana mboka olimu aso sɔnyi. Mbetawɔ kaso totshutshuyaka dia sambisha asukanyi aso, asekaso wa l’olimu, wa la kalasa, ndo anto akina la dihonga tshɛ.—Romo 1:14-16.
Ɔnɛ lahɛnama ekɔ lo nɔmbɔla ekambi ande
11. Lo ndjela Petero nde la Juda, ngande wakɛnya anto amɔtshi wa l’atei w’etshumanelo k’Akristo dia vɔ kema la eokelo k’akambo wa lo nyuma?
11 Mbetawɔ tokimanyiyaka dia mɛna ɔnɛ Jehowa mbalɔmbɔla ɔlɔngɔswamelo ande wa la nkɛtɛ. Lâsɔ sho pombaka mbewɔ dia monga la dionga dia diɔnyɔ otsha le wanɛ wele l’ɛkɛndɛ l’atei w’etshumanelo. Ɔpɔstɔlɔ Petero nde la Juda y’ɔnango Yeso wakewola anto lo dikambo di’anto amɔtshi waki komonga la eokelo k’akambo wa lo nyuma ko wakatɛkɛtaka kɔlɔ dikambo di’apami wakalɔmbɔlaka l’atei w’Akristo. (2 Petero 2:9-12; Jude 8) Onde wanɛ wakandandaka la dikɔmɔ asɔ wakakoke tɛkɛta ngasɔ la ntondo ka Jehowa otondonga wakawɛnaka la washo awɔ? Ndooko! Koko lam’ele Nzambi hɛnama, apami wa kɔlɔ asɔ kombidja yimba di’ɔnɛ nde ayoyokoya la wɔ.
12. Dionga diakɔna diahomba monga laso otsha le wanɛ walɔmbɔla l’atei w’etshumanelo?
12 Mɛtɛ, etshumanelo k’Akristo kengama l’anto wele kema kokele. Wanɛ wakamba oko dikumanyi salaka munga yakoka mbala mɔtshi tonyangiya. Koko, Jehowa ekɔ lo kamba l’anto asɔ oko anami w’ɛkɔkɔ ande. (1 Petero 5:1, 2) Apami ndo wamato wele la lonyuma la dimɛna mbeyaka ɔnɛ ɔsɔ ekɔ ehomɔ kɛmɔtshi kakamba la Jehowa dia nɔmbɔla ekambi ande. Ɔnkɔnɛ, oko weso Akristo, sho mbewɔka dionga dia diɔnyɔ, di’engunungunu ndo sho mongaka la dilɛmiɛlɔ lo kɛnɛ kakalɔngɔsɔla Nzambi dia nɔmbɔla ekambi ande. Lo monga l’okitanyiya otsha le wanɛ watɔlɔmbɔla, sho mɛnyaka dia sho mɛnaka Ɔnɛ lahɛnama.—Heberu 13:17.
Tɔsake Nzambi oko ombetsha aso wa woke
13, 14. Mbɔsa Jehowa oko Ombetsha wa Woke alembetshiyande le yɛ?
13 Ekɔ dikambo dikina nto diatɔlɔmba dia monga la shɛnɔdi ya lo nyuma. Isaya akate ate: “Ashu anyu wayenaka Umbetsha anyu.” (Isaya 30:20) Dia mbeya ɔnɛ Jehowa mbele ɔnɛ latolakanya oma lo tshimbo y’ɔlɔngɔswamelo ande, sho pombaka monga la mbetawɔ. (Mateu 24:45-47) Mbɔsa Nzambi oko Ombetsha aso wa Woke halembetshiya tsho monga la mbekelo y’ɔlɔlɔ ya wekelo wa Bible kana ya wɔtwɛlɔ wa lo nsanganya y’Akristo mbala la mbala. Dikambo sɔ nembetshiyaka kondja wahɔ tshɛ oma lo kɛnɛ katosha Nzambi dikambo dia wahɔ aso wa lo Nyuma. Oko ɛnyɛlɔ, sho pombaka monga la yambalo yoleki nyɛ yokongaka laso lo ɛlɔmbwɛlɔ katosha Jehowa oma lo tshimbo yaki Yeso woho waha sho ndjoshisha lonyuma laso.—Heberu 2:1.
14 Mbala mɔtshi, sho nɔmbamaka dia mbidja welo wa lânde dia kondja wahɔ w’efula oma lo mbo ya ndɛ ya lo nyuma. Oko ɛnyɛlɔ, wonya wadiaso kana wekaso sho mbeyaka mbeta esadi esadi l’ɛkɔndɔ ɛmɔtshi wa lo Bible wɛnaso dia ekɔ wolo mbashihodia. Lam’adiaso Tshoto y’Etangelo la Réveillez-vous !, ondo sho tokomaka ndo lo tshika di’aha mbadia asawo amɔtshi nɛ dia akambo wa lɔkɔ kema la wahɔ efula le so. Kana sho mbeyaka tshika dia yimba yaso mbekɔ l’ahole akina wonya weso lo nsanganya y’Akristo. Koko, sho koka tetemala monga la yambalo naka sho kana yimba dimɛna l’akambo wasɛdingɔma. Lowando l’efula lele laso lo wetshelo wa lo nyuma walongolaso mɛnyaka dia sho mbetawɔka dia Jehowa kele Ombetsha aso wa Woke.
Sho pombaka ndjokoya la Nzambi
15. Ngande wakasale anto amɔtshi akambo wate kana oko Jehowa hawaɛnyi?
15 Ekɔ ohomba efula monga la mbetawɔ le Ɔnɛ lahɛnama, nɛ di’akambo wa kɔlɔ wamboleka kokanɛ djekoleko “l’etena [kɛnɛ] k’ekumelu.” (Danyele 12:4) Lokeso ndo awui wa mindo wa dieyanelo wambokokanɛ l’andja. Lo mɛtɛ, ekɔ ɔlɔlɔ sho mbohɔka dia Jehowa ekɔ lo menda etsha aso oyadi kânga etena kahakoke anto mɛna kɛnɛ kasalaso. Anto amɔtshi wakohɛ dikambo sɔ. Vɔ koka ndjasha lo lɔkɛwɔ lahɔtɔnɛ l’Afundelo etena kahakoke anto akina mbaɛna. Ɛnyɛlɔ, amɔtshi hawoshike ekolo l’ohemba wa wendelo wa tɔkɛnyɔ ta kɔlɔ ndo w’awui wa mindo l’Internet, lo televiziɔ ndo lo weho ekina wɛnyawɔ akambo asɔ shi nyɛ. Lam’ele wendelo w’akambo asɔ koka salema lo woshɛshɛ, amɔtshi wakasale akambo watekana oko nkɛwɔ yawɔ kɔmɛnamaka lo washo waki Jehowa.
16. Kakɔna kahomba tokimanyiya dia ndjela ɛlɛmbɛ waki Jehowa wa lâdiko?
16 Ekɔ ohomba mbohɔka ɛtɛkɛta waki ɔpɔstɔlɔ Paulo wata ɔnɛ: “Okone shu tshe, untu l’untu, tayuyateketela le [Nzambi].” (Romo 14:12) Sho pombaka mbeya dia mbala tshɛ kasalaso pɛkato, tekɔ lo mindjɛ Jehowa. Mbeya dikambo sɔ pombaka tokimanyiya dia ndjela ɛlɛmbɛ ande wa lâdiko ndo mbewɔ lɔkɛwɔ la mindo. Bible toholaka ɔnɛ: “Nduku engo kakatungama, kahenama lu ashu andi. Keli diango tshe dieko etakataka ndu diatenamaka hwe la ntundu ka ashu wa one lahumbasu.” (Heberu 4:13) Mɛtɛ, sho pombaka ndjokoya la Nzambi, koko ngandji k’efula kokaso Jehowa mbele ɔkɔkɔ woleki totshutshuya dia sala lolango lande ndo kitanyiya ɛlɛmbɛ ande wa losembwe. Lâsɔ, tonge la shɛnɔdi l’akambo wele oko ɔsɔnwɛlɔ aso wa tɔkɛnyɔ ndo lo lɔkɛwɔ lahomba monga laso otsha le onto lele bu pami kana womoto oko sho.
17. Woho akɔna wayasha Jehowa le so?
17 Jehowa ndjashaka efula le so, koko kɛsɔ halembetshiya dia nde ekɔ lo tokongɛ dia sho sala munga woho wa nde tosha dilanya. Koko, nde tɔsɛdingolaka la ngandji kele oko kɛnɛ katongaka l’ombutshi wa pami walanga dia futa anande wele l’okitanyiya. Ekɔ mɛtɛ ekeketshelo efula dia mbeya ɔnɛ Shɛso lele l’olongo ngɛnangɛnaka mbetawɔ kaso ndo ‘futaka wanɛ woyanga l’otema ɔtɔi’! (Heberu 11:6) Nyɛsɔ tonge la mbetawɔ k’oshika le Jehowa ndo ‘tôkambe olimu l’otema ɔtɔi.’—1 Ekondo 28:9.
18. Lam’ele Jehowa ekɔ lo ntenda ndo ekɔ lo mɛna kɔlamelo yaso, eshikikelo kakɔna kakondjaso oma l’Afundelo na ?
18 Tukedi 15:3 mbutaka ɔnɛ: “Ashu wa [Jehowa] weko lu ahuli tshe, watendaka antu wa kolo ndu antu w’ololo.” Eelo, Nzambi ekɔ lo menda akanga wa kɔlɔ ndo ekɔ lo kɛndakɛnda lawɔ lo ndjela lɔkɛwɔ lawɔ. Koko, naka tekɔ l’atei wa “antu w’ololo,” kete sho koka monga l’eshikikelo ɔnɛ Jehowa ekɔ lo nembetɛ etsha aso wa kɔlamelo. Mbetawɔ kaso keketshamaka mɛtɛ lam’eyaso dia ‘pâ kaso le Nkumadiɔndjɔ kema anyanya’ ndo dia ɔnɛ Ɔnɛ lahɛnama ‘hatohɛ olimu aso ndo ngandji kakatɛnya lo lokombo lande’!—1 Koreto 15:58; Heberu 6:10.
Tɔlɔmbɛ Jehowa dia nde tɔsɛdingola
19. Naa wahɔ ɛmɔtshi watomba oma lo monga la mbetawɔ ka nge le Jehowa?
19 Oko weso ekambi waki Jehowa wa kɔlamelo, nde tɔsaka la nɛmɔ. (Mateu 10:29-31) Kânga mbahandɛnama, nde koka monga onto la mɛtɛ le so ndo sho koka mbɔsa diɔtɔnganelo di’oshinga wolo diele lam’asaso la nde la nɛmɔ di’efula. Monga la dionga dia ngasɔ otsha le Shɛso lele l’olongo telaka ɛtshɔkɔ efula. Mbetawɔ kaso ka wolo tokimanyiyaka dia monga l’otema wa pudipudi ndo la nkum’otema ka dimɛna la ntondo ka Jehowa. Mbetawɔ k’oshika tokimanyiyaka nto dia mbewɔ nsɛna lɔsɛnɔ la dungi pende. (1 Timote 1:5, 18, 19) Mbetawɔ kaso ka nge le Nzambi mbishaka anto ɛnyɛlɔ k’ɔlɔlɔ ndo koka monga tshondo y’ekeketshelo le wanɛ wasɛna laso. (1 Timote 4:12) Ndo nto, mbetawɔ ka ngasɔ toshaka lɔkɛwɔ letawɔma le Nzambi ndo ngɛnyangɛnyaka otema waki Jehowa.—Tukedi 27:11.
20, 21. (a) Lande na kele ekɔ dimɛna dia Jehowa tendaka? (b) Ngande wakokaso kamba l’Osambu 139:23, 24 lo dikambo diaso shamɛ?
20 Naka tekɔ mɛtɛ la lomba, kete sho pombaka ngɛnangɛna woho watokokɛ Jehowa. Aha paka dia nde tenda tsho mbalangaso koko sho nangaka nto dia nde sɛdingola tokanyi ndo ditshelo diaso dimɛna. Lo dɔmbɛlɔ, tɔlɔmbɛ Jehowa dia nde tɔsɛdingola dia mbishola lɛnɛ eso la tokanyi tɔmɔtshi ta kɔlɔ. Nde koka tokimanyiya dia ndɔshana l’ekakatanu aso ndo dia ndjalɔngɔsɔla l’ahole wahombama. Diɔ diakɔ mɛtɛ di’akembe omembi w’esambo Davidɛ ate: “[Nzambi] li, unshishimi, umani utema ami fundu, ombediki, ulimbiteli tukanyi tami! Umendi kana dikambu dia kolo dieko le mi, onombolaki lu mbuka ka pundju!”—Osambu 139:23, 24.
21 Davidi akalɔmbɛ dia Jehowa mboshishima dia menda kana dikambo dimɔtshi “dia kolo” diekɔ lende. L’ɛnyɛlɔ k’omembi w’esambo, onde sho hatokombola dia Nzambi shishima otema aso dia menda lɛnɛ eso l’eyango wa kɔlɔ? Lâsɔ, la mbetawɔ tshɛ, tɔlɔmbɛ Jehowa dia nde tɔsɛdingola. Ko ahombaso sala naka tambohandjɔ wɔɔngɔ l’ekiyanu w’oma lo munga mɔtshi kana oma lo dikambo dimɔtshi diatosha pâ diele l’atei w’otema aso na? Lâsɔ, totetemale la nɔmba Jehowa, Nzambi kaso ka ngandji l’otema ɔtɔi ndo la ndjakitshakitsha tshɛ tokitanyiya ɛlɔmbwɛlɔ ka nyuma kande k’ekila ndo alako wele l’Ɔtɛkɛta ande. Sho koka monga l’eshikikelo dia nde ayotosukɛ ndo ayotokimanyiya dia tetemala lo mboka kayotokonya lo lɔsɛnɔ la pondjo.—Osambu 40:11-13.
22. Naa yɛdikɔ yahombaso mbɔsa lo kɛnɛ kendana la Ɔnɛ lahɛnama?
22 Eelo, Jehowa ayotɔtshɔkɔla lo tosha lɔsɛnɔ la pondjo naka sho kotsha kɛnɛ kalɔmbande. Lo mɛtɛ, sho pombaka mbetawɔ wolo ndo lowandji lande, oko wakasale ɔpɔstɔlɔ Paulo lam’akandafunde ate: “Kakiane khum’ekanga ka pundju, kahavu, kahenama lu ashu, [Nzambi k]ame, kenemo la lutumbu wayali le ndi pundju pundju! Ayali osoku!” (1 Timote 1:17) Nyɛsɔ tongake nshi tshɛ la dilɛmiɛlɔ di’oma k’ɛse otema dia ngasɔ otsha le Jehowa. Oyadi kɛnɛ tshɛ kokoki tokomɛ, tɔshi yɛdikɔ ya shikaa dia tetemala monga nge oko wanɛ wɛna Ɔnɛ lahɛnama.
Ngande wayoyokadimola?
• Ngande wokoki anto mɛna Nzambi?
• Naka Jehowa ekɔ onto la mɛtɛ le so, ngande wayotosala etena kahɛnyahɛnyamaso?
• Mbɔsa Jehowa oko Ombetsha aso wa Woke kɛdikɛdi na?
• Lande na kahombaso nanga dia Jehowa tɔsɛdingola?
[Osato wa lo lɛkɛ 14]
Mɔsɛ komboka Farawɔ wɔma, nde akasale akambo oko ɔnɛ lakakokaka mɛna Jehowa, Nzambi kahɛnama
[Osato wa lo lɛkɛ 17]
Tatotshake akambo pondjo watekana oko Jehowa hakoke mɛna kɛnɛ kasalaso
[Osato wa lo lɛkɛ 19]
Sho nyangaka ewo kaki Nzambi l’otema ɔtɔi nɛ dia sho mbɔsaka oko Ombetsha aso wa Woke