Wembola w’oma le ambadi

Naa “mumuya” katɛkɛtawɔ lo Heberu 4:9-11, ndo woho akɔna ‘wɔtɔ onto lo momuya kɛsɔ’ na?

Ɔpɔstɔlɔ Paulo akafundɛ Akristo w’ase Hɛbɛru wa lo ntambe ka ntondo ate: “Okone mumuya ka lushi l’ekila kambutshikala le antu wa [Nzambi]. Ne dia one lotwe lu mumuya kandi, ambumuya uma lu elimu andi, uku akumuya [Nzambi] uma lu elimu andi. Okone tutetemali dia shu mboto lu mumuya kako.”​—Heberu 4:9-11.

Lam’akatɛkɛta Paulo dia diomuyelo diaki Nzambi oma l’elimu ande, ondo nde akatɛkɛta dia kɛnɛ katanema lo Etatelu 2:2, lɛnɛ adiaso ɔnkɔnɛ: “Ku lushi l’esambeli, [Nzambi] akakimo ulimu andi wakandatshaka. Ku ndi akumuya lushi lako uma l’ulimu andi tshe.” Bonde kele Jehowa “akumuya lushi l’esambeli”? Lo mɛtɛ, aha l’ɔtɛ w’ɔnɛ nde akayange dia mbɔdia demba nɛ dia nde akalɛmbɛ “uma l’ulimu andi tshe.” Divɛsa diayela nembetshiyaka hwe dia mɛnya lande na kakomuya Nzambi, diɔ mbutaka ɔnɛ: “[Nzambi] akatshokola lushi l’esambeli, akalukidia, ne dia lushi lako mbakandumuya uma l’ulimu andi tshe w’etungelu.”​—Etatelu 2:3; Isaya 40:26, 28.

“Lushi l’esambeli” lakatshikitana la nshi shamalo ya la ntondo y’etongelo lo woho wele Nzambi akalitshɔkɔla ndo akalikidia, lɔ lakakitshama lânde kana lakakimɔma dia sangwelo dia lânde. Sangwelo diakɔna sɔ na? L’etatelo, Nzambi akewoya sangwelo diande lo kɛnɛ kendana l’anto ndo la nkɛtɛ. Nzambi akatɛ pami ka ntondo la wadɛnde ate: “Nyuyali la diwutshi, nyufulaneli, nyuludia kete, nyuyûleli. Nyuleli nsi ya lu ashi a waki, fudu ya l’ulungu, la dikendakenda tshe dieli la lumu diakendakenda la kete.” (Etatelu 1:28) Kânga mbele Nzambi akasale di’anto la nkɛtɛ monga l’etatelo ka kokele, nshi efula yakahombe mbeta la ntondo k’onto ndjolɛ nkɛtɛ k’otondo ndo kikonya paradiso koludi la nkumbo ka kokele dia kotsha sangwelo diaki Nzambi. Ɔnkɔnɛ, “lushi l’esambeli” Nzambi akomuya, kana akakumiya olimu ande w’etongelo wa lanɛ la nkɛtɛ dia kɛnɛ kambondoshila ntonga kotshama lo ndjela lolango lande. L’ekomelo ka “lushi l’esambele” lɔsɔ, kɛnɛ tshɛ kakasangoya Nzambi kakahombe kotshama. Edja ka ngande kakahombe mbiviya diomuyelo sɔ na?

Naka sho mboka sso nto l’ɛtɛkɛta wa Paulo wa lo Heberu, tayɛna dia nde akate hwe dia “mumuya ka lushi l’ekila kambutshikala le antu wa [Nzambi],” ndo nde akatshutshuya asekande Akristo dia sala la wolo dia vɔ “mboto lo mumuya kako.” Kɛsɔ mɛnyaka dia lam’akafunde Paulo ɛtɛkɛta ɛsɔ, ko “lushi l’esambeli” la momuya ka Nzambi lamboviya oko ɛnɔnyi 4000, latakomɛ. Lɔ halotokomɛ edja ndo sangwelo dia Nzambi diendana l’anto ndo la nkɛtɛ diambokotshama tshɛ lo tshɛ l’ekomelo ka lowandji l’Ɛnɔnyi Kinunu la Yeso Kristo, ɔnɛ lele “Uwandji a lushi l’ekila.”​—Mateu 12:8; Enyelo 20:1-6; 21:1-4.

Oko wakinde l’elongamelo ka diambo kɛsɔ lo yimba, Paulo akalembetshiya woho wakoka onto mbɔtɔ lo momuya ka Nzambi. Nde akafunde ate: ‘Onto lambɔtɔ lo mumuya ka Nzambi ambomuya ndo oma l’elimu ande hita’. Kɛsɔ tɛnyaka dia kânga mbakiwɔ l’etatelo ka kokele, anto lo tshɛ kawɔ watɔtɔ lo momuya ka Nzambi. Aki ngasɔ nɛ dia Adama la Eva kotetemala nɛmiya momuya ka Nzambi, “lushi l’esambeli” lo mbetawɔ kɛnɛ kakandalɔngɔsɔla dikambo diawɔ. Koko, vɔ wakatɔmbɔkɔ ndo wakalange ndjalɔmbɔla aha l’ekimanyielo ka Nzambi. Lo mɛtɛ, vɔ wakayele ekongelo k’akambo kaki Satana lo dihole dia mbetawɔ ɛlɔmbwɛlɔ ka la ngandji kaki Nzambi. (Etatelu 2:15-17) Diɔ diakɔ diakawashisha elongamelo ka nsɛna pondjo lo paradiso ka la nkɛtɛ. Tatɛ oma l’etena kɛsɔ, anto tshɛ wakakome ɛhɔmbɔ wa pɛkato ndo wa nyɔi.​—Romo 5:12, 14.

Ɔtɔmbɔkwɛlɔ w’anto kombitola sangwelo diaki Nzambi. Lushi lande la momuya lekɔ lo tatetemala. Koko Jehowa akɔshi yɛdikɔ ya ngandji, mbut’ate olambo wa tshungo w’Ɔnande Yeso Kristo, woho w’onto tshɛ layonga la mbetawɔ l’olambo akɔ monga l’elongamelo ka dimɛna ka tshungɔ ndo momuya oma lo pâ ya pɛkato la nyɔi. (Romo 6:23) Diakɔ diakatshutshuya Paulo asekande Akristo dia vɔ ‘momuya oma l’elimu awɔ hita.’ Vɔ wakahombe mbetawɔ yɛdikɔ yakɔshi Nzambi dikambo dia panda koko aha nyanga dia vamɛ ndjalɔngɔsɔlɛ nshi yayaye lo mbata akambo vamɛ oko wakasale Adama la Eva. Vɔ wakahombe nto mbewɔ ndjayangɛ tɛkɛ nɛndɛ.

Naka onto tshindja eyango ande wa lokaki kana wa l’andja ɔnɛ l’ɔkɔngɔ dia sala lolango laki Nzambi, kete mɛtɛ nde ayokeketshama ndo ayomuya. Yeso akasha leeta la shikaa lɔnɛ ate: “Nyuyi le mi, nyu tshe watukambaka ndu weli la wetshu wa wulu, ku dimi layunyusha mumuya. Nyembe lokoho lami, nyeki akambu uma le mi. Ne dia dimi la memakana la ndjakitshakitsha l’utema, ku nyu nyayutana mumuya l’etema anyu, ne dia lokoho lami leko ololo, la ushiko ami weko usadi.”​—Mateu 11:28-30.

Elembetshiyelo kakasha Paulo lo kɛnɛ kendana la momuya ka Nzambi ndo woho wakoka onto mbɔtɔ lo momuya kakɔ aki mɛtɛ kiɔkɔ y’ekeketshelo le Akristo w’ase Hɛbɛru wa la Jerusalɛma, wanɛ wakakikɛ ɛhɛnyɔhɛnyɔ ndo wakɔnywama l’ɔtɛ wa mbetawɔ kawɔ. (Etsha 8:1; 12:1-5) Woho akɔ wamɛ, ɛtɛkɛta waki Paulo mbeyaka monga kiɔkɔ y’ekeketshelo le Akristo ɛlɔ kɛnɛ. Lam’eyaso ɔnɛ ekotshamelo ka daka diaki Nzambi dia kadimola nkɛtɛ paradiso lo ɛlɔmbwɛlɔ ka Diolelo diande dia losembwe kaya kasuke, sho lawɔ pombaka momuya oma l’elimu aso ndo sala la wolo dia mbɔtɔ lo momuya kɛsɔ.​—Mateu 6:10, 33; 2 Petero 3:13.

[Esato wa lo lɛkɛ 31]

Daka diaki Nzambi dia paradiso ka la nkɛtɛ diayokotshama lo komelo ka lushi lande la momuya