Jehowa tokanelaka

“Nyukitsha ukananu anyu tshe le [Nzambi], ne dia ndi atunyukanelaka.”​—1 PETERO 5:7.

1. Lo awui akɔna w’ohomba wele Jehowa nde la Satana tshikitana tshɛ lo tshɛ?

JEHOWA nde la Satana wekɔ la waonga wotshikitanyi tshɛ lo tshɛ. Onto tshɛ lakutwama otsha le Jehowa hakokaki kotwama nto otsha le Satana. Dibuku dimɔtshi dieyama efula tɛkɛtaka dikambo di’otshikitanu ɔsɔ. Lo kɛnɛ kendana l’elimu waki Satana, oko wɔkɔndwamiwɔ lo dibuku dia lo Bible dia Jobo, Encyclopædia Britannica (1970) mbutaka ɔnɛ: ‘Olimu wakamba Satana ele wa takindolaka lo nkɛtɛ k’otondo dia tayangaka ditshelo kana anto wa nde mamatanyiyɛ onongo. Ɔnkɔnɛ, olimu ande tshikitana la wɔnɛ wakamba “washo wa Nkumadiɔndjɔ,” wakindola andja w’otondo dia keketsha awui tshɛ wele ɔlɔlɔ (II Ɛkɔndɔ xvi, 9). Satana hetawɔ akambo w’ɔlɔlɔ wasala anto ndo kanga mbetawɔ Nzambi dia nde pemba anto, nde hotshika dia nde mbahemba woho woleki akoka awɔ.’ Eelo, ɔsɔ ekɔ otshikitanu!​—Jobo 1:6-12; 2:1-7.

2, 3. (a) Ngande wɔkɛnɛmɔmi dimɛna kitshimudi ya tshɛkɛta “Diabolo” lo menda kɛnɛ kakakomɛ Jɔbɔ? (b) Ngande wɛnya Bible dia Satana ekɔ lo tetemala la mamatanyiyɛ ekambi waki Jehowa lanɛ la nkɛtɛ?

² Tshɛkɛta ya lo Grɛkɛ yokadimɔmi ɔnɛ “Diabolo” nembetshiyaka “ɔsɔngwedi wa kashi,” kana “omamatanyishi.” Dibuku dia Jɔbɔ mɛnyaka woho wakamamatanyiya Satana Jɔbɔ, okambi waki Jehowa wa kɔlamelo ɔnɛ nde ekɔ lo mbokambɛ l’ɔtɛ wa wahɔ ande hita lo mbuta ate: “Undi, Jobo mbukaka [Nzambi] woma wukuka?” (Jobo 1:9) Ɔkɔndɔ wa lo dibuku dia Jobo mɛnyaka dia kânga mbakinde l’atei w’ehemba ndo w’asui, Jɔbɔ akaleke ndjasukanya otsha le Jehowa. (Jobo 10:9, 12; 12:9, 10; 19:25; 27:5; 28:28) Oma l’ɔkɔngɔ wa nde pembama wolo efula, nde akatɛ Nzambi ate: “Dimi lakukaka lukumu l’akambu aye lu atui, keli kakiane lambukena la ashu ami.”​—Jobo 42:5.

³ Tatɛ oma lo nshi ya Jɔbɔ shɔ, onde Satana ambotshika dia sɔngwɛ ekambi waki Nzambi? Ndoko. Dibuku di’Enyelo mɛnyaka dia lo nshi y’ekomelo nyɛ, Satana ekɔ lo tetemala la mamatanyiyɛ anango Kristo w’akitami w’esɔ ndo anyawɔ wa kɔlamelo. (2 Timote 3:12; Enyelo 12:10, 17) Diɔ diakɔ diele ekɔ ohomba efula dia sho Akristo wa mɛtɛ tshɛ monga l’okitanyiya otsha le Jehowa, Nzambi kaso katokanɛ, lo mbokambɛ l’ɔtɛ wa ngandji kawokaso ndo mɛnya dia emamatanya waki Satana wekɔ kashi. Naka tayosalaka ngasɔ, kete tayɔngɛnyangɛnyaka otema waki Jehowa.​—Tukedi 27:11.

Jehowa nyangaka toho ta tokimanyiya

4, 5. (a) Otshikitanyi la Satana, kakɔna kayanga Jehowa lanɛ la nkɛtɛ? (b) Naka sho nangaka pomɔ lokolo l’ɔlɔ lo washo wa Jehowa, kakɔna kahombaso sala na?

⁴ Satana ekɔ lo takindola lo nkɛtɛ dia tayangaka onto la nde mamatanyiyɛ onongo kana la nde munda. (Jobo 1:7, 9; 1 Petero 5:8) Otshikitanyi la nde, Jehowa nyangaka dia kimanyiya anto wele l’ohomba wa wolo ande. Omvutshi Hanani akatɛ Nkumekanga Asa ate: “[Jehowa] atukaka ashu andi lu kete tshe, dia nsukela waku weli la etema tshe le ndi.” (2 Ekondo 16:9) Otshikitanu w’efula wekɔ mɛtɛ lam’asa woho wasɛdingola Satana anto la lohetsho tshɛ la ekokelo koludi la ngandji kaki Jehowa!

⁵ Jehowa hatɔngɛ lo mayɛlɛ l’oyango wa kɔlɔ wa mbishola kiɔmɔ kɔmɔ tshɛ yasalaso. Omembi w’esambo akafunde ate: “[Jehowa] utunduyala we ali efula ka kolo, we Khumadiondjo, akona ututshikala?” (Osambu 130:3) Okadimwelo wa wombola ɔsɔ vɔ ɔnɛ: ndoko onto lotokoka memala. (Undaki 7:20) Naka sho ndjasukanya le Jehowa l’otema ɔtɔi, kete washo ande wayokadimɔ le so, aha dia tânya, koko dia menda welo wadjaso ndo kadimola l’alɔmbɛlɔ wɔlɔmbaso dia tokimanyiya ndo todimanyiya. Ɔpɔstɔlɔ Petero akafunde ate: “Ashu wa Khumadiondjo weko le antu w’ololo, atui andi weko hwe lu dombelo diawo. Keli [nde mendaka atshi w’akambo wa kɔlɔ l’elundji ka kɔlɔ].”​—1 Petero 3:12.

6. Woho akɔna wele awui wakakomɛ Davidi wekɔ ekeketshelo ndo ɔhɛmwɛlɔ le so?

⁶ Davidi komonga kokele ndo akasale pɛkato ka woke. (2 Samuele 12:7-9) Koko nde akadiholɛ Jehowa otema ande ndo akayasukanya oya le nde lo dɔmbɛlɔ dia l’etete tshɛ. (Osambu 51:1-12) Jehowa akoke dɔmbɛlɔ diande ndo akawodimanyiya, kânga mbakadiɛnɛ Davidi l’etombelo wa kɔlɔ w’oma lo pɛkato kande. (2 Samuele 12:10-14) Dui sɔ pombaka monga ekeketshelo ndo ɔhɛmwɛlɔ le so. Ekɔ ekeketshelo dia sho mbeya ɔnɛ Jehowa ekɔ suke dia todimanyiya pɛkato yaso naka tayoyatshumoya mɛtɛ, ndo sho pombaka mbeya dia pɛkato mbelaka etombelo wa kɔlɔ mbala efula. (Ngalatiya 6:7-9) Naka sho nangaka ndjasukanya la Jehowa, kete sho pombaka mangana etale l’akambo tshɛ wahɔngɛnyangɛnya.​—Osambu 97:10.

Jehowa kotolaka ekambi ande oya le nde

7. Jehowa weho akɔna w’anto wendande, ndo ngande wâkotolande oya le nde?

⁷ Davidi akafunde l’osambo ande ɔmɔtshi ate: “Kuyanga [Jehowa] eko ladiku, ndi atukanelaka kanga ndjakitshakitsha. Keli ndi atulimbitelaka kanga utaku uma l’etali.” (Osambo 138:6) Lo kanyi yakɔ yamɛ, osambo okina mbutaka ɔnɛ: “Akona edimi la [Jehowa, Nzambi]? Ndi katudjaseka ladiku lu kiti kandi. Ndi atukaka ashu andi l’ulungu ndu la kete. Ndi atunyaka usi wula uma lu ditshu.” (Osambu 113:5-7) Eelo, Otungi wa nkudu tshɛ w’andja w’otondo mbokaka washo ande lanɛ la nkɛtɛ, ndo washo ande wekɔ lo mɛna ‘anto wele la ndjakitshakitsha,’ ‘akanga memakana,’ anto “wakhuma akhumu ndu walela, ne dia akambu tshe wa wononyi wambutshama.” (Ezekiyele 9:4) Nde kotolaka anto wa ngasɔ oya le nde oma lo tshimbo y’Ɔnande. Lam’akinde la nkɛtɛ, Yeso akate ate: “Nduku untu leya ndja le mi, tshikima Papa lakantumi kûkutudi. . . . Untu heyi ndja le mi, tshikima Papa kuwusha wulu uku.”​—Joani 6:44, 65.

8, 9. (a) Lande na kahombaso sho tshɛ ndja oya le Yeso? (b) Dikambo diakɔna diakotola yambalo yaso lo kɛnɛ kendana l’ɔlɔngɔswɛlɔ w’olambo wa tshungo?

⁸ Anto tshɛ pombaka ndja oya le Yeso ndo monga la mbetawɔ l’olambo wa tshungo nɛ dia vɔ wakotɔ akanga wa pɛkato ndo wakangana la Nzambi. (Joani 3:36) Vɔ pombaka ndjaokanya la Nzambi. (2 Koreto 5:20) Nzambi kokonga di’atshi wa pɛkato mbɔlɔmba dia nde sala ɔlɔngɔswamelo ɔmɔtshi wakokawɔ tana wɔladi lam’asawɔ la nde. Ɔpɔstɔlɔ Paulo akafunde ate: “[Nzambi] akatenya ngandji kandi ne dia Kristu akatuvwela lam’akisu antu wa kolo. Naka shu takekesanela la [Nzambi] lu nyoi ka on’andi lam’akisu atunyi, ku lam’akatekesanela la ndi, shu tayuleka nshimbamela ne dia lumu landi.”​—Romo 5:8, 10.

⁹ Ɔpɔstɔlɔ Paulo akashikikɛ dikambo dimɔtshi dia mɛtɛ dia woke di’ɔnɛ Nzambi ekɔ lo sala di’anto wekesanele la nde ndamɛ, lam’akandafunde ate: “Dia dikambu ne mbakenama ngandji ka [Nzambi] le su, ne dia [Nzambi] akatumi On’andi etoi la kete, dia shu ndjala la lumu uma le ndi. Dia dikambu ne mbeli ngandji, aha ne dia shu takalangi [Nzambi], keli ne dia ndi akatulangi. Ndi akatumi On’andi dia ndjala ulambu ne dia kolo yasu.” (1 Joani 4:9, 10) Kanyi y’ɔlɔlɔ yakatombe oma le Nzambi koko aha oma le anto. Onde wɛ hoke dia wɛ ekɔ lo kotɔma oya le Nzambi kakɛnya ngandji kande k’efula otsha le anto wele aha tsho waki ‘atshi wa pɛkato,’ koko waki nto ‘atunyi’ ande?​—Joani 3:16.

Sho pombaka nyanga Jehowa

10, 11. (a) Kakɔna kahombaso sala dia nyanga Jehowa? (b) Woho akɔna wakokaso mbɔsa andja waki Satana ɔnɛ?

¹⁰ Oko wadieyaso, Jehowa hatotshutshuya dia sho ndja oya le nde la wolo. Sho pombaka mboyanga, “[ta]tawamamba dia [sho] mbêna, keli ndi kema etali uma le untu la untu.” (Etsha wa Atumami 17:27) Sho pombaka mbeya lotshungɔ lele la Jehowa la nde tɔlɔmba dia sho monga l’okitanyiya le nde. Ombeki Jakɔba akafunde ate: “Okone nyukitanyiaki aui wa [Nzambi]. Nyosemaneli l[a] uhimbanyi, ku ndi ayunyulawo. Nyusukani le [Nzambi], ku ndi ayusukana le nyu. Nyu antu wa kolo, nyotsha anya anyu; nyedia etema anyu nyu akanga w’etema ehendi.” (Jakobo 4:7, 8) Tatokake wɔma dia sho shikɛ Satana tanga ndo mbɛkama Jehowa.

¹¹ Kɛsɔ nembetshiyaka dia sho la dia ndjanganya sho shamɛ oma l’andja ɔnɛ wa kɔlɔ waki Satana. Jakɔba akafunde nto ate: “Nyu hanyeyi nyati: Ongenyi w’akambu wa la kete eko utunyi a [Nzambi]? Okone untu tshe lalanga ndjala ongenyi w’akambu wa la kete, ambuyaete utunyi a [Nzamabi.]” (Jakoba 4:4) Lo yoho kina, naka sho nangaka monga angɛnyi waki Jehowa, kete sho pombaka nongamɛ dia petshama oma le andja waki Satana.​—Joani 15:19; 1 Joani 3:13.

12. (a) Ɛtɛkɛta akɔna w’ekeketshelo wakafunde Davidi? (b) Ɔhɛmwɛlɔ akɔna wakasha Jehowa oma lo tshimbo y’omvutshi Azariya?

¹² Etena katɔlɔsha andja ɔnɛ waki Satana lo yoho mɔtshi yotshikitanyi, sho pombaka ndeka sukana le Jehowa lo dɔmbɛlɔ, ndo mbɔlɔmba ekimanyielo. Davidi, lele Jehowa akotshungola mbala efula akafunde dikambo di’ekeketshelo kaso ate: “[Jehowa] eli lasuki la wane tshe watuwetaka, Ee, lasuki la waku tshe watuwetaka lu mete. Ndi atukutshaka nangu ya waku watuwukaka woma, atukaka delu diawo, atâshimbelaka. [Jehowa] atulamaka wane tshe watuwukaka ngandji, keli ndi ayulanya antu wa kolo tshe.” (Osambu 145:18-20) Osambu ɔnɛ mɛnyaka dia Jehowa kokaka toshimbɛ etena kahembama ɔmɔmɔ l’atei aso ndo ɔnɛ nde ayoshimbɛ ekambi ande lo tshɛ kawɔ “uma lu pa ka wuki.” (Enyelo 7:14) Jehowa ayongaka suke la so naka sho tayotshikalaka suke la nde. Lam’akandalɔmbwama oma le ‘nyuma ka Nzambi,’ omvutshi Azariya akate kɛnɛ kakokaso mbɔsa di’ekɔ dikambo dia mɛtɛ dieyama le anto tshɛ ate: “[Jehowa] atuyalaka la nyu lam’ayunyuyalaka kame la ndi. Naka nyu nyayûyanga, nyu nyayûtana; keli naka nyu nyayôseka, ndi ayunyoseka.”​—2 Ekondo 15:1, 2.

Jehowa pombaka monga Onto la Mɛtɛ le so

13. Woho akɔna wokokiso mɛnya dia Jehowa ekɔ onto la mɛtɛ le so?

¹³ Ɔpɔstɔlɔ Paulo akafunde lo dikambo dia Mɔsɛ dia “ndi akatetemala uku untu lena one lahenamaka.” (Heberu 11:27) Eelo mɛtɛ, ndoko lushi lakɛnyi Mɔsɛ Jehowa. (Etumbelu 33:20) Koko Jehowa aki onto la mɛtɛ le nde woho wele aki oko nde Akawɛnyi. Woho akɔ wamɛ, oma l’ɔkɔngɔ w’ehemba ande, washo wa mbetawɔ waki Jɔbɔ wakɛnyi Jehowa dimɛna dimɛna, oko Nzambi ketawɔ di’ekambi ande wa kɔlamelo pembama koko nde ekɔ Nzambi kahâkalɛki pondjo. (Jobo 42:5) Akatama lo dikambo di’Enɔka ndo dia Nɔa ɔnɛ vɔ ‘wakakɛndakɛnda la Nzambi.’ Vɔ wakasale dikambo sɔ paka dia ngɛnyangɛnya Nzambi ndo dia mbokitanyiya. (Etatelu 5:22-24; 6:9, 22; Heberu 11:5, 7) Naka Jehowa ekɔ onto la mɛtɛ le so woho wakinde le Enɔka, Nɔa, Jɔbɔ ndo le Mɔsɛ, kete ‘tayowodjaka yimba’ lo mboka yaso tshɛ, ndo nde “ayo[t]olongoswela mbuka ya[so].”​—Tukedi 3:5, 6.

14. “Mamema” Jehowa kɛdikɛdi na?

¹⁴ Yema tshitshɛ la ntondo k’ase Isariyɛlɛ mbɔtɔ lo Nkɛtɛ ya Daka, Mɔsɛ akalake ate: “Nyuyelaki [Jehowa, Nzambi k]anyu, nyuwukaki woma. Nyulamaki elembe andi, nyukitanyiaki dui diandi. Nyûkambelaki ulimu, ndu nyûmamemi.” (Euhwelu k’Elembe 13:4) Vɔ wakahombe ndjela Jehowa, mbôka wɔma, mbokitanyiya ndo mbomamema. Lo kɛnɛ kendana la tshɛkɛta yokadimɔmi lanɛ ɔnɛ “mamema,” nomb’ewo kɛmɔtshi l’awui wa Bible mbutaka dia “tshɛkɛta shɔ nembetshiyaka diokanelo di’efula.” Omembi w’esambo akate ate: “Ekesanelu ka [Jehowa] keko le wane watuwukaka woma.” (Osambu 25:14) Tayonga la diokanelo ndo la diɔtɔnganelo di’oshinga wolo ndo dia dimɛna efula sɔ lam’asaso la Jehowa, naka nde ayonga onto la mɛtɛ le so ndo naka tayonga la ngandji k’efula le nde lo mbewɔ dia mbonyangiya lo yoho mɔtshi.​—Osambo 19:9-14.

Onde wɛ mɛnaka woho wakokokɛ Jehowa?

15, 16. (a) Ngande wɛnya Osambu 34 dia Jehowa tokanelaka? (b) Kakɔna kahombaso sala naka tekɔ la pâ dia mbohɔ awui w’ɔlɔlɔ wambotosalɛ Jehowa?

¹⁵ Tshelo mɔtshi yaki Satana ya mayɛlɛ ele nde pembaka dia tohiya dia sho mɛna ɔnɛ Jehowa, Nzambi kaso ekɔ lo tetemala la kokɛ ekambi ande wa kɔlamelo. Davidi, Nkumekanga k’Isariyɛlɛ akɛnyi dia Jehowa akokokɛ kânga etena kakinde l’atei w’ɛhɛnyɔhɛnyɔ woleki wolo. Etena kakandatshutshuyama dia ndjashɛ la ntondo ka Akishi, Nkumekanga ka Ngata, nde akembe osambo wa dimɛna efula, waki l’ɛtɛkɛta ɛnɛ wa mbetawɔ w’ɔnɛ: “Nyolemiaki [Jehowa], kame la mi, shu tshe tediaki lukumbu landi kame. Dimi lakayangi [Jehowa], ku ndi akambetawo, akantshungula uma lu weoma ami tshe. Ondjelo wa [Jehowa] atudingaka wane watuwukaka woma, atâshimbelaka. Nyunganeli, nyeyi nyati: [Jehowa] eli ololo! Untu latuyangaka eshamelu kandi le ndi, eli la ongenongeno. [Jehowa] eko lasuki la wane weli la etema wambate. Ndi atushimbelaka waku weli la etema wa ndjakitshakitsha. Asui w’untu l’ololo watuyalaka efula, keli [Jehowa] atûtshungulaka uma loko nshi tshe.”​—Osambu 34:3, 4, 7, 8, 18, 19; 1 Samuele 21:10-15.

¹⁶ Onde wɛ ambetawɔ dia Jehowa ekɔ la nkudu ka nde shimbɛ anto? Onde wɛ mɛnaka woho watokokɛ andjelo ande? Onde wɛ ambônganɛ ndo ambɛna dia Jehowa ekɔ ɔlɔlɔ? Dikambo diakɔna diakakosalɛ Jehowa mbala k’ekomelo diakayɛnyi lo yoho ya lânde wate nde akakosalɛ ɔlɔlɔ? Ohokanyiya yema. Onde nde akonge lo luudu l’ekomelo lakayakomɛ la sambisha, lam’akayoke wɛmɛ dia wolo wa tetemala aya bu? Ondo oma lâsɔ wɛ akayongaka la wolo wa sawola l’ompokami ayɛ sawo dia dimɛna efula. Onde wɛ akohɔ dia kaloya Jehowa losaka lo woho wakandakosha wolo wa lâdiko wakiyɛ l’ohomba ndo lo woho wakandakɔtshɔkɔla? (2 Koreto 4:7) Lo wedi okina, ondo wɛ ekɔ la pâ dia mbohɔ awui amɔshi w’ɔlɔlɔ wakakosalɛ Jehowa. Ondo dia wɛ mbohɔ awui akɔ paka wɛ nyomokanyiya oma l’ɔkɔngɔ wa lomingu, wa ngɔndɔ, w’ɔnɔnyi, kana ndekana. Ko naka ekɔ ngasɔ, lande na kahayadje welo wa lânde dia ndjasukanya oya le Jehowa ndo menda woho wakɔlɔmbɔlande? Ɔpɔstɔlɔ Petero akalake Akristo ate: “Nyuyakitshakitsha la tshina dia lunya la wulu la [Nzambi]. . . . Nyukitsha ukananu anyu tshe le ndi, ne dia ndi atunyukanelaka.” (1 Petero 5:6, 7) Lo mɛtɛ, wɛ ayamba heyama lo menda woho wakokanɛnde!​—Osambu 73:28.

Totetemale nyanga Jehowa

17. Kakɔna kele ohomba naka sho nangaka tetemala nyanga Jehowa?

¹⁷ Sho pombaka tetemala nama diokanelo diele lam’asaso la Jehowa. Lam’akandalɔmbaka She, Yeso akate ate: “Lumu la pundju lone, eli nkêya, weme [Nzambi k]a mete, la Jesu Kristu, lakayatumi.” (Joani 17:3) Dia mbeya Jehowa nde l’Ɔnande pombaka sho tetemala mbidja welo. Tekɔ l’ohomba w’ekimanyielo ka dɔmbɛlɔ ndo ka nyuma k’ekila dia shihodia “akambu a waki wa [Nzambi w’ohomba efula].” (1 Koreto 2:10; Luka 11:13) Tekɔ nto l’ohomba w’ɛlɔmbwɛlɔ kaki ‘ɔhɔmbɔ wa kɔlamelo ndo wa kɛsɔ’ dia ndodja tomba taso la mbo ya ndɛ ya lo nyuma yatoshande “lu tena diayo.” (Mateu 24:45) Oma lo tshimbo shɔ mbatolaka Jehowa dia sho mbadiaka Ɔtɛkɛta ande lushi la lushi, mbɔtɔka lo nsanganya yaso y’Akristo mbala la mbala, ndo sambishaka dimɛna “lukumu l’ololo lone la diulelu.” (Mateu 24:14) Naka tayosalaka ngasɔ, kete tayotetemala nyanga Jehowa, Nzambi kaso katokokɛ.

18, 19. (a) Dikambo diakɔna diahombaso ndjashikikɛ dia sala? (b) Naka sho ntona Satana la wolo tshɛ ndo tetemala nyanga Jehowa, ɛtshɔkɔ akɔna wayotokondja?

¹⁸ Satana ekɔ lo mbidja welo ande tshɛ dia mbela ekambi waki Jehowa ɛhɛnyɔhɛnyɔ, wekamu ndo asui oma l’ahole tshɛ. Nde nyangaka dia fukutanya wɔladi wele laso ndo nanya diɔtɔnganelo di’ɔlɔlɔ diele lam’asaso la Nzambi kaso. Nde halange sho tetemala l’olimu aso wa nyanga anto wele l’etema w’ɔlɔlɔ ndo mbakimanyiya dia vɔ mbeta lo wedi wa lowandji laki Jehowa la l’andja w’otondo. Koko sho pombaka ndjashikikɛ dia tshikala la kɔlamelo le Jehowa, ndjaɛkɛ le nde dia nde totshungola oma le kanga kɔlɔ. Naka tayetawɔ dia nɔmbwama l’Ɔtɛkɛta wa Nzambi ndo tetemala kamba kâmɛ l’ɔlɔngɔswamelo ande wɛnama, kete tayokoka monga l’eshikikelo ɔnɛ nde ayotosukɛka nshi tshɛ.​—Isaya 41:8-13.

¹⁹ Ɔnkɔnɛ, nyɛsɔ sho tshɛ toshike tanga la wolo tshɛ la ntondo ka Satana ndo ka totshelo tande ta mayɛlɛ ndo toyangake nshi tshɛ Jehowa, Nzambi kaso ka ngandji ɔnɛ lahatohekɔ ‘tokeketsha ndo tosha wolo.’ (1 Petero 5:8-11) Naka tayosalaka ngasɔ, kete ‘tayoyalamaka lo ngandji ka Nzambi, etena kakongaso dia ndjokama kɛtshi oma le Nkumɛso Yeso Kristo la kanyi ya kondja lɔsɛnɔ la pondjo.’​—Jude 21.

Ngande wayoyokadimola?

• Tshɛkɛta “Diabolo” alembetshiyayɔ, ndo ngande wasungana Diabolo la tshɛkɛta shɔ?

• Woho akɔna wotshikitanyi Jehowa nde la Satana lo yoho yendande anto lanɛ la nkɛtɛ?

• Lande na kahomba onto mbetawɔ olambo wa tshungo dia nde sukana le Jehowa?

• Tshɛkɛta “mamema” Jehowa, alangayɔ nembetshiya ndo ngande wakokaso tetemala mboyanga?

[Osato wa lo lɛkɛ 15]

Kânga lam’akinde l’ehemba, Jɔbɔ akɛnyi dia Jehowa akokokɛ

[Esato wa lo lɛkɛ 16]

Wadielo wa Bible wa lushi la lushi, wɔtwɛlɔ wa lo nsanganya y’Akristo wa mbala la mbala, ndo esambishelo ka l’etete, toholaka dia Jehowa tokokɛka