Totetemale kamba dihɛka lo dihɛka
‘Dimi layokadimola ɔtɛkɛta w’anto dia vɔ ndjala pudipudi, dia vɔ tshɛ mbeya ntɛndɛ lokombo la Jehowa, la mbokambɛ dihɛka lo dihɛka.’—ZEFANIYA 3:9.
1. Kakɔna kele lo salema dia kotsha kɛnɛ kofundami lo Zefaniya 3:9?
ƐLƆ kɛnɛ, ɛtɛkɛta oko 6 000 wekɔ lo tɛkɛtama l’andja w’otondo. Lâdiko di’ɛtɛkɛta ɛsɔ, tekɔ nto l’ɛtɛkɛta ekina wa weho la weho watɛkɛtama oma le elui ɛmɔtshi w’anto. Koko oyadi kânga anto wekɔ lo tɛkɛta ɛtɛkɛta efula wotshikitanyi ɛnyɛlɔ oko Arabɛ la Zulu, Nzambi ambosala dikambo dimɔtshi dia diambo mɛtɛ. Nde ambosala di’anto wa l’ahole tshɛ mbeka ndo tɛkɛta paka ɔtɛkɛta wamɛ wa pudipudi. Dikambo sɔ diekɔ lo kotsha daka diakashama lo tshimbo y’omvutshi Zɛfaniya diata ɔnɛ: ‘Dimi Jehowa Nzambi layokadimola ɔtɛkɛta w’anto dia vɔ ndjala pudipudi, dia vɔ tshɛ mbeya ntɛndɛ lokombo la Jehowa, dia mbokambɛ dihɛka lo dihɛka.’—Zefaniya 3:9.
2. ‘Ɔtɛkɛta wa pudipudi’ kɛdikɛdi na, ndo kakɔna kambosala di’ɔtɛkɛta ɔsɔ tɛkɛtama na?
2 ‘Ɔtɛkɛta wa pudipudi’ ɔsɔ kɛdikɛdi akambo wa mɛtɛ waki Nzambi watanema l’Ɔtɛkɛta ande, mbut’ate lo Bible. Djekoleko akambo wa mɛtɛ wendana la Diolelo diaki Nzambi diayokidia lokombo lande, nyindja lowandji lande ndo diayela anto ɛtshɔkɔ. (Mateu 6:9, 10) Oko wewɔ tshɔi y’ɔtɛkɛta yamɛ ya pudipudi wa lo nyuma lo nkɛtɛ k’otondo, vɔ wekɔ lo tɛkɛtama oma le anto wa lo wedja tshɛ ndo wa nkoho tshɛ y’alemba. Vɔ mbakimanyiyaka dia kambɛ Jehowa ‘dihɛka lo dihɛka.” Ɔnkɔnɛ, vɔ wekɔ lo mbokambɛ kamɛ, kana “l’osanga.”—The New English Bible.
Shɔnɔdi bu l’atei w’ekambi waki Nzambi
3. Kakɔna katokimanyiya dia kambɛ Nzambi kamɛ?
3 Oko weso Akristo, tekɔ lo ngɛnangɛna woho weso lo kamba kamɛ kânga mbatɛkɛtaso ɛtɛkɛta efula wotshikitanyi. Kânga mbasambishaso lokumu l’ɔlɔlɔ la Diolelo l’ɛtɛkɛta efula watɛkɛta anto, sho tekɔ lo kambɛ Nzambi lo kamɛ. (Osam. 133:1) Dikambo sɔ koka salema nɛ dia oyadi dihole diakɔna diodjashiso lanɛ la nkɛtɛ, sho tshɛ tekɔ lo tɛkɛta paka ɔtɛkɛta wamɛ wa pudipudi dia tombola Jehowa.
4. Lande na kahahombe shɔnɔdi monga l’atei w’ekambi waki Nzambi?
4 Ndoko shɔnɔdi yahomba monga l’atei w’ekambi waki Nzambi. Ɔpɔstɔlɔ Petero akɛnya dikambo sɔ hwe lam’akandasambisha lo luudu la Kɔnɛliyo, owandji ɔmɔtshi w’alembe w’ose Wodja l’ɔnɔnyi 36 T.D., ndo nde akatshutshuyama dia mbuta ate: “Mete, dimi lambeya nti: [Nzambi] kema la shonodi y’antu. Keli ndi mbetawoka wa lu wedja tshe, wane wawuka woma la watsha akambu w’ololo.” (Etsha 10:34, 35) Lam’ele dikambo sɔ diekɔ mɛtɛ, shɔnɔdi bu l’etshumanelo k’Akristo, oyadi lo yoho y’anto wa lo kabila ɔtɔi mongaka kamɛ kana lo yoho ya semulaka anto amɔtshi.
5. Lande na kele bu dimɛna nyanga mbidja tâto l’etshumanelo?
5 Lo kɛnɛ kendana l’otshwelo ande lo Mbalasa ka Diolelo, ombeki ɔmɔtshi wa Bible akate ate: “Mbala efula ɔtɛmwɛlɔ tshɛ kotolaka anto wele la woho ɔmɔtshi wa lokoho la demba kana anto w’oma lo dioho dimɔtshi. . . . Kele Ɛmɛnyi wa Jehowa wakadjasɛ vɔ tshɛ kamɛ, aha la ndjela lokoho kana dioho diele l’onto.” Koko Akristo amɔtshi wa l’etshumanelo ka la Kɔrɛtɔ k’edjedja wakadjaka diatɔnelo l’etshumanelo. Lo sala ngasɔ, vɔ wakashimbaka dia nyuma k’ekila kaki Nzambi kamba olimu atɔ, nɛ dia tɔ mbidjaka kamɛ ndo wɔladi. (Ngalatiya 5:22) Naka sho nyangaka dia mbidja tâto l’etshumanelo, kete tekɔ lo ndɔshana l’ɛlɔmbwɛlɔ ka nyuma. Nyɛsɔ tohɔke ɛtɛkɛta waki Paulo le ase Kɔrɛtɔ wata ɔnɛ: “Anyasu, dimi lambunyosengasenga lu lukumbu la Khumesu Jesu Kristu, dia nyu tshe mvuta diui otoi, diaha nyu mbatana, keli dia nyu nduwanyema lu yimba ndu lu tukanyi kame.” (1 Koreto 1:10) Lo mukanda wakandafundɛ as’Ɛfɛsɔ, Paulo akadje nto dikako vɔlɛ l’ohomba w’anto monga kamɛ.—Efeso 4:1-6, 16.
6, 7. Dako diakɔna diakasha Jakɔba lo dikambo dia shɔnɔdi, ndo ngande wakotshama ɛtɛkɛta ande?
6 Akristo nɔmbamaka nshi tshɛ di’aha monga la shɔnɔdi. (Romo 2:11) Lam’ele anto amɔtshi wa l’etshumanelo ka lo ntambe ka ntondo wakalekaka nɛmiya ase ɛngɔnyi, ombeki Jakɔba akafunde ate: “Anyami, tanyukimelaki mbetawo ka Khumesu Jesu Kristu, Khumadiondjo ka lutumbu, kame la shonodi le antu. Naka untu omotshi ayoto l’etemwelo kanyu udji lohete la paunyi lu luhita la olotshi ahondo w’ololo, ku ndu kanga wula lolotshi ahondo wa kolo ayoto; lam’ayunyetawo untu lolotshi ahondo w’ololo nyati: Uyudjase lu dihuli di’ololo ne; ku lam’ayunyutela kanga wula nyati: Emala lene, kana udjase la tshina dia kihuna k’ekulu ami, laso nyu kema la shonodi l’atei anyu uka? Nyu hanyuyala uku embadi weli la tukanyi ta kolo?”—Jakoba 2:1-4.
7 Etena kakayaka akanga w’ɛngɔnyi wele bu ambetawudi wɔlɔtshi mpɛtɛ ya paunyi l’ahɔndɔ wa tilili lo nsanganya y’Akristo kamɛ ndo akanga wa wola wɔlɔtshi ahɔndɔ w’emusu, akanga w’ɛngɔnyi wakalongɔmaka lo yoho ya lânde. Vɔ wakawashaka ‘ahole w’amɛna dia vɔ mbidjasɛ’ koko wakatɛka akanga wa wola dia tshikala wemema kana mbidjasɛ lo nkɛtɛ l’ekolo w’onto ɔmɔtshi. Koko aha la shɔnɔdi, Nzambi akakimɔ olambo wa Yeso wa tshungo dikambo di’akanga w’ɛngɔnyi ndo di’ase wola. (Jobo 34:19; 2 Koreto 5:14) Lâsɔ, naka talanga ngɛnyangɛnya Jehowa ndo mbokambɛ dihɛka lo dihɛka, kete hatohombe monga la shɔnɔdi, kana ‘mbɔsa anto amɔtshi la nɛmɔ l’oyango wa sho kondja wahɔ.’—Jude 4, 16.
Tewɔ engunungunu
8. Kakɔna kakatombe l’ɔtɛ w’engunungunu w’ase Isariyɛlɛ?
8 Dia sho nama kamɛ kaso ndo tetemala mbetawɔma le Nzambi, sho la dia kitanyiya dako diaki Paulo diata ɔnɛ: “Nyutshi akambu tshe aha la engunungunu.” (Filipi 2:14, 15) Ase Isariyɛlɛ waki komonga la mbetawɔ wakatshungɔ oma lo lɔhɔmbɔ l’Edjibitu wakangunɛngunɛ Mɔsɛ la Arɔna ndo kânga Jehowa Nzambi. L’ɔtɛ wa dikambo sɔ, apami tshɛ waki tatɛ oma l’ɛnɔnyi 20 ndo ndekana kɔmbɔtɔ lo Nkɛtɛ ya Daka, koko wakavu l’oswe wa shɛnga l’edja k’ɛnɔnyi 40 wakawakɛndakɛnda lɔkɔ, onyake Jashua la Kalɛba wanɛ waki la mbetawɔ kamɛ ndo ase Lewi mbaki komvɔ. (Walelu 14:2, 3, 26-30; 1 Koreto 10:10) Engunungunu awɔ mɛtɛ wakakonya lo kɔlɔ!
9. Kakɔna kakakomɛ Miriyama l’ɔtɛ w’engunungunu ande?
9 Kɛsɔ mɛnyaka kɛnɛ kakoka komɛ wodja w’otondo l’ɔtɛ w’engunungunu. Ko kayotota dikambo di’engunungunu w’anto amɔtshi? Miriyama kadiyɛnde la Mɔsɛ nde l’Arɔna w’ɔnango wakangunanguna vate: “Undi, [Jehowa] akahumbi nteketa paka uma le Mose utu? Ndi konteketa ndu uma le su?” Ɔkɔndɔ mbutaka nto ɔnɛ: “[Jehowa] akuki dikambu so.” (Walelu 12:1, 2) Naa etombelo wakonge la dikambo sɔ na? Miriyama, ɔnɛ laki mɛtɛ ɔpɔhɔdi w’engunungunu ɛsɔ akashama nsɔnyi oma le Jehowa. Woho akɔna? Nde akandama la hemɔ ka sudi ndo akahombe tɔlama l’andja wa pango nshi esambele edja ndo sudi kande kamboshila.—Walelu 12:9-15.
10, 11. Engunungunu waha pe mbeyaka tondja etombelo akɔna? Sha ɛnyɛlɔ.
10 Ngunanguna bu tsho kiyana l’ɔtɛ w’akambo amɔtshi wa kɔlɔ. Anto watetemala la ngunanguna ndekaka mbidja yimba efula lo tokanyi kana dihole diele lawɔ, lo kotola yambalo y’anto oya le wɔ vɔamɛ koko aha le Nzambi. Naka hatendji dimɛna dikambo sɔ mbeyaka ndjodja diatɔnelɔ lam’asaso l’anangɛso wa lo nyuma ndo nanya welo wadjawɔ dia kambɛ Nzambi dihɛka lo dihɛka. Ekɔ ngasɔ nɛ dia anto wangunanguna mbokiyaka ekiyanu awɔ walongamɛ aha la tâmu di’anto akina wayeta la wɔ wedi.
11 Ɛnyɛlɔ, onto ɔmɔtshi mbeyaka mɔnyɔla yoho yasha ekumanyi kɛmɔtshi asawo l’etshumanelo kana woho wakotshande ɛkɛndɛ ande. Naka sho mbisha onto ɔsɔ lotui, kete sho mbeyaka ndjotatɛ kanyiya oko nde. Mbeyaka monga ko la ntondo ka lɔtɔngɔ la diɔnyɔ ndjonɛma lo yimba yaso, elimu waki ekumanyi kɛsɔ kotoshaka kɛlɛ, koko kakianɛ vɔ wotosha kɛlɛ. Oma lâsɔ, kɛnɛ tshɛ kayosalaka ekumanyi kɛsɔ kayongaka anyanya lo washo aso, ndo sho lawɔ mbeyaka ndjotatɛ mbongunɛngunɛ. Dionga dia ngasɔ kema ɔlɔlɔ l’etshumanelo k’ekambi waki Jehowa.
12. Engunungunu koka monga l’etombelo akɔna lo diɔtɔnganelo diasaso la Nzambi?
12 Ngunɛngunɛ apami wele l’ɔkɛndɛ wa nama ɛkɔkɔ waki Nzambi mbeyaka tokonya dia mbatɛnga. Engunungunu wa ngasɔ kana mbamamatanyiyɛ awui wa kɔlɔ koka ndjodja diɔtɔnganelo diasaso la Nzambi lo wâle. (Etumbelu 22:28) Atɛnganyi wahayatshumoya hawotokita Diolelo diaki Nzambi. (1 Koreto 5:11; 6:10) Ombeki Jude akafunde dikambo di’anto wangunanguna, wanɛ “watonyolaka diulelu, watotengaka [akanga] wa lutumbu,” kana apami wele l’ɛkɛndɛ l’etshumanelo. (Jude 8) Nzambi hetawɔ akanga w’engunungunu asɔ, ndo sho pombaka la lomba tshɛ mbewɔ yoho yawɔ ya lɔsɛnɔ ya kɔlɔ shɔ.
13. Lande na kele aha engunungunu tshɛ mbele kɔlɔ?
13 Koko aha engunungunu tshɛ mbele kɔlɔ lo washo wa Nzambi. Nzambi akoke woho ‘wakayakiyanyaka’ anto lo dikambo dia Sɔdɔmɔ la Ngɔmɔra, ko nde akalanya esomba wa kɔlɔ ɛsɔ. (Etatelu 18:20, 21; 19:24, 25) La Jerusalɛma, yema tshitshɛ l’ɔkɔngɔ wa Pɛntɛkɔsta ka l’ɔnɔnyi 33 T.D., “asi Juda wa lu leke laki asi Ngirika wakangunangunela asi Heberu, ne dia vo wakakale wadi waki edu awo lu ekahelu ka diango ka la lushi la lushi.” Ɔnkɔnɛ, “atumami dikumi l’ahendi” wakakandola dikambo sɔ lo sɔna “apami esambeli” dia vɔ ‘kamba olimu w’ohomba’ wa kahanyaka diangɔ dia ndɛ. (Etsha 6:1-6) Dikumanyi dia nshi nyɛ ‘hawohombe ndiha atui’ l’engunungunu wele kema wa kɔlɔ. (Tukedi 21:13) Ndo lo dihole dia mɔnyɔla asekawɔ atɛmɔdi, dikumanyi la dia monga anto wakeketsha ndo wôdia.—1 Koreto 8:1.
14. Dia mbewɔ engunungunu, dionga diakɔna diahombaso mɛtɛ monga ladiɔ?
14 Sho tshɛ pombaka mbewɔ engunungunu nɛ dia dionga sɔ diekɔ wâle lo lonyuma laso. Dionga dia ngasɔ mbeyaka nanya kamɛ kaso. Nyɛsɔ tetawɔke nshi tshɛ dia nyuma k’ekila mbidja ngandji lam’asaso. (Ngalatiya 5:22) Naka sho kitanyiya ‘ɔlɛmbɛ wa nkumadiɔndjɔ wa ngandji,’ kete dui sɔ diayotokimanyiya dia tetemala kambɛ Jehowa dihɛka lo dihɛka.—Jakoba 2:8; 1 Koreto 13:4-8; 1 Petero 4:8.
Tewɔ emamatanya
15. Ngande wakokayɛ tshikitanya vate vate la emamatanya ?
15 Lam’ele engunungunu mbeyaka tokonya lo vate vate ya kɔlɔ, sho la dia monga la yambalo l’awui watɛkɛtaso. Mbuta ɔnɛ vate vate kɛdikɛdi mbuta awui w’anyanya lo dikambo di’anto ndo di’akambo awɔ. Mamatanyiyɛ onto dikambo kɛdikɛdi mbôhindɛ dikambo dia kashi l’oyango wa nanya lokumu lande. Ɛtɛkɛta wa ngasɔ wekɔ kɔlɔ ndo hawɔtɔnɛ la lolango laki Nzambi. Lo dikambo sɔ, Nzambi akatɛ ase Isariyɛlɛ ate: ‘Tanyetetake l’atei wa wodja anyu oko anto watamamatanyiyɛ anto akambo.’—Akambo w’Ase Lewi 19:16.
16. Kakɔna kakate Paulo lo dikambo dia vate vate, ndo shɛngiya yakɔna yele la dako sɔ le so?
16 Lam’ele asawo w’anyanya mbeyaka ndjokonya l’emamatanya, Paulo akahangwɛ la dihonga tshɛ akanga wa vate vate. L’ɔkɔngɔ wa nde tɛkɛta dikambo dia wadi waki edo wakasunganaka kimanyiyama oma le etshumanelo, nde akatɛkɛta dikambo dia wadi waki edo wayaetɛ “tusuasua, wayukindula lu luudu la luudu. Vo hawuyala tusuasua tutu, keli wayuyala la shonganya la esaku; wayuta aui wahawakuki mvuta.” (1 Timote 5:11-15) Naka Okristo ɔmɔtshi wa womoto ambɛna dia nde tshɔbɔlaka l’asawo wakoka konya l’emamatanya, kete nde pombaka ndjela dako diaki Paulo diata dia monga la “kenemo, aha [amamatanyishi].” (1 Timote 3:11) Lo mɛtɛ, Akristo w’apami lawɔ la dia mbewɔ vate vate ya kɔlɔ.—Tukedi 10:19.
Totshike nomboshana!
17, 18. (a) Kakɔna kakate Yeso lo kɛnɛ kendana la nombosha anangɛso? (b) Ngande wakokaso kamba l’ɛtɛkɛta waki Yeso wendana la nombosha anto?
17 Oyadi kânga hatomamantanyɛ ndoko onto dikambo, sho la dia sala la wolo di’aha nombosha anto akina. Yeso akanya dionga dia ngasɔ lam’akandate ate: “Tanyalaki akambu w’antu, vo watukala akambu anyu. Ne dia wayala akambu anyu uku walanyu akambu awo. Wayunyedikela diango uku awaedikelanyu. Ukundi enaye fumvufumvu lu su dia unyaye, keli we hakani dia wima utamba weli lu su diaye? Ukundi eyaye mvutela unyaye wati: Ela nkutundja fumvufumvu lu su diaye, lam’eli wima utamba lu su diaye weme? We kanga lukesu, ntundu utayatundjisha wima utamba uma lu su diaye. Ku kuyenyi ololo dia ntundja fumvufumvu yeli lu su dia unyaye.”—Mateu 7:1-5.
18 Sho hatohombe funa dia sho koka tondja “fumvufumvu” lo sso di’ɔnangɛso, mbut’ate mbokimanyiya etena kɛnɛ kele “wima w’otamba” wa didjidji nanyaka dikoka diaso dia mbɔsa yɛdikɔ ya dimɛna. Lo mɛtɛ, naka sho shihodiaka dimɛna woho wele Nzambi ekɔ la nkɛtshi, kete hatotongaka suke dia nombosha anangɛso l’akadiyɛso wa lo nyuma. Ngande wakokaso mbaoka nkɛtshi woho wawaoka Shɛso lele l’olongo na? Aha la tâmu, Yeso akatɔhɛmɔla ‘di’aha nombosha anto di’aha sho lawɔ ndjolomboshama’! Naka sho mbeya l’otema ɔtɔi dia tekɔ la munga, kete dikambo sɔ diayotoshimba di’aha sho nombosha anto lo yoho yele bu dimɛna lo washo wa Nzambi.
Tekɔ wɔdu koko anto wele la nɛmɔ
19. Ngande wahombaso mbɔsa asekaso ambetawudi?
19 Naka tamboyashikikɛ dia kambɛ Nzambi dihɛka lo dihɛka kamɛ l’asekaso ambetawudi, kete tayewɔ dia mbakanɛka kɔlɔ ndo tayonga anto wa ntondo wa mbasha nɛmɔ. (Romo 12:10) Lo mbuta mɛtɛ, tayoyanga ɔlɔlɔ wakiwɔ, koko aha wakiso hita, ndo kamba elimu ɛmɔtshi w’ehomba lo wahɔ awɔ. (Joani 13:12-17; 1 Koreto 10:24) Ngande wakokaso nama dionga dia dimɛna efula sɔ na? Ele lo mbeya di’ombetawudi tshɛ ekɔ la nɛmɔ lo washo waki Jehowa ndo ɔnɛ tekɔ l’ohomba w’asekaso ambetawudi, oko wele etenyi tshɛ ka demba kekɔ l’ohomba wa tenyi dikina.—1 Koreto 12:14-27.
20, 21. Ɛtɛkɛta wa lo 2 Timote 2:20, 21 alembetshiyawɔ le so na?
20 Eelo mɛtɛ, Akristo wekɔ diangɔ dia awomba dia wɔdu diambowosha olimu w’ohomba efula. (2 Koreto 4:7) Naka sho nangaka tetemala kamba olimu w’ekila ɔsɔ dia tombola Jehowa, kete sho la dia monga la dihole dia nɛmɔ la ntondo kande ndo k’Ɔnande. Paka lo tshikala pudipudi lo lɔkɛwɔ ndo lo nyuma mbakokaso tshikala diangɔ dia nɛmɔ dia Nzambi kamba ladiɔ. Lo dikambo sɔ, Paulo akafunde ate: “Lu luudu la wuki kema diango dia paunyi la fesa tu, keli ndu di’etamba ndu dia kete; dikina dia nemo, dikina diaha nemo. Okone naka untu ambuyaedia ndame uma lu kolo sho, ndi ayuyala uku engo ka nemo, kukidiami, kakalongoswama l’ulimu w’ololo tshe.”—2 Timote 2:20, 21.
21 Anto wahakɛndakɛnda lo yoho yɔtɔnɛ la wadjango waki Nzambi wekɔ ‘diangɔ diele bu la nɛmɔ.’ Koko naka sho monga la lɔkɛwɔ l’ɔlɔlɔ, kete tayonga ‘diangɔ dia nɛmɔ, diokidiami kana diɔlɔngɔswami dikambo di’olimu tshɛ w’ɔlɔlɔ.’ Lâsɔ, onto l’onto ayambole ate: ‘Onde dimi lekɔ “engo ka nemo”? Onde dimi lekɔ la shɛngiya ya dimɛna le asekami ambetawudi? Onde lekɔ ose etshumanelo lakamba dihɛka lo dihɛka l’asekami ambetawudi?’
Totetemale kamba dihɛka lo dihɛka
22. Etshumanelo k’Akristo koka mbɛdikama l’ɛngɔ kakɔna?
22 Etshumanelo k’Akristo kekɔ oko nkumbo. Naka ase nkumbo tshɛ wekɔ atɛmɔdi wa Jehowa, kete yimba ya mbokana ngandji, ya kimanyiyana ndo y’ɔngɛnɔngɛnɔ yayonga lo nkumbo. Nkumbo mbeyaka kengama l’anto wele la waonga wotshikitanyi, koko onto tshɛ ekɔ la dihole dia nɛmɔ. Woho akɔ wamɛ mbele l’etshumanelo. Kânga mbeso la waonga wotshikitanyi ndo mbeso bu kokele, Nzambi akatokotola oya le nde lo tshimbo ya Kristo. (Joani 6:44; 14:6) Jehowa la Yeso tolangaka, ndo oko nkumbo kele kamɛ, sho pombaka monga la ngandji lam’asaso.—1 Joani 4:7-11.
23. Kakɔna kahombaso mbohɔka ndo ndjashikikɛ dia sala?
23 Etshumanelo k’Akristo kele oko nkumbo kekɔ tɔ lawɔ dihole dialongamɛso di’anto wa lɔkɔ monga la kɔlamelo. Ɔpɔstɔlɔ Paulo akafunde ate: “Okone dimi nangaka apami nomba lu ahuli tshe, wedia anya w’ekila waha la kele la tamu.” (1 Timote 2:8) Paulo akakakatanya kɔlamelo la alɔmbɛlɔ wa lo sɛkɛ “lu ahuli tshe” lɛnɛ asangana Akristo kamɛ. Paka apami wele la kɔlamelo mbahomba salaka alɔmbɛlɔ wa lo sɛkɛ dikambo di’etshumanelo. Eelo, Nzambi nongamɛka dia sho tshɛ monga la kɔlamelo otsha le nde ndo lam’asaso. (Undaki 12:13, 14) Nyɛsɔ toyashikikɛ dia kamba kamɛ lonya lo lonya, oko tenyi dia demba. Nyɛsɔ nto tokambe kamɛ oko weso anto wa lo nkumbo k’atɛmɔdi wa Jehowa. Lâdiko di’akambo asɔ tshɛ, nyɛsɔ tohɔke dia tekɔ l’ohomba w’asekaso Akristo ndo tayetawɔma le Nzambi ndo kondja ɛtshɔkɔ oma le nde naka sho tetemala la kambɛ Jehowa dihɛka lo dihɛka.
Ngande wayoyokadimola?
• Kakɔna kakimanyiya ekambi waki Jehowa dia mbokambɛ dihɛka lo dihɛka?
• Lande na kêwɔ Akristo dia monga la shɔnɔdi?
• Lo dikambo di’engunungunu, kakɔna kakokayɛ mbuta ɔnɛ kekɔ kɔlɔ?
• Bonde kahombaso nɛmiya ambetawudi w’asekaso?
[Osato wa lo lɛkɛ 15]
Petero akɛnyi dia ‘Nzambi bu la shɔnɔdi’
[Osato wa lo lɛkɛ 16]
Onde wɛ mbeyaka bonde kakasha Nzambi Miriyama nsɔnyi?
[Osato wa lo lɛkɛ 18]
Akristo wa kɔlamelo kambɛka Jehowa dihɛka lo dihɛka l’ɔngɛnɔngɛnɔ