Tokoke lonyuma l’etshumanelo Kaso
‘Ngandji ka mamba ka Nkumadiɔndjɔ Yeso Kristo kayale la yimba yakɛnɛmɔlanyu.’—FIL. 4:23.
NGANDE WAKOKASO NKIMANYIYA DI’ETSHUMANELO KASO MONGA LA LONYUMA LA DIMƐNA . . .
etena katɛmɔlaso kâmɛ l’anangɛso?
l’ohetoheto wele la so l’esambishelo?
lo mbutɛka dikumanyi pɛkato ya weke?
1. Lande na kakândɔma etshumanelo ka la Filipi ndo ka la Tuyatira?
AKRISTO w’ase Filipi wa lo ntambe ka ntondo komonga la diangɔ efula dia l’emunyi. Koko vɔ waki la lokaho ndo wakɛnya asekawɔ ambetawudi ngandji k’efula. (Fil. 1:3-5, 9; 4:15, 16) Lo divɛsa di’ekomelo dia lo mukanda wakandâfundɛ, ɔpɔstɔlɔ Paulo akakoke mɛtɛ mbuta ɔnɛ: ‘Ngandji ka mamba ka Nkumadiɔndjɔ Yeso Kristo kayale la yimba yakɛnɛmɔlanyu.’ (Fil. 4:23) Lam’ele ndo Akristo waki l’etshumanelo ka la Tuyatira mbaki la yimba ya lokaho ya ngasɔ, Yeso Kristo akawatɛ ate: “Dimi mbeyaka etsha aye la ngandji kaye, la mbetawo kaye la ekambelo kaye, la etetemalu kaye. Ndu dimi mbeyaka nti: Etsha aye wa l’okongo wambuleka wa la ntundu waki.”—Eny. 2:19.
2. Ngande wakokaso nkimanyiya etshumanelo kaso dia tɔ monga la lonyuma la dimɛna?
2 Woho wakɔ wâmɛ mbele ɛlɔ kɛnɛ, etshumanelo tshɛ k’Ɛmɛnyi wa Jehowa kekɔ la waonga atɔ. Tshumanelo dimɔtshi mbeyamaka djekoleko l’ɔtɛ wokanawɔ ngandji la wangasanu tshɛ. Tshumanelo dikina ndekaka mbeyama lo woho wasambishawɔ l’ohetoheto tshɛ ndo wɔsawɔ olimu wa lo tena tshɛ la nɛmɔ. Naka ɔmɔmɔ la l’atei aso nsala la wolo dia monga la lonyuma la dimɛna, kete kâmɛ kayonga l’etshumanelo ndo tɔ kayohama lo nyuma. (1 Kor. 1:10) Koko lɔkɛwɔ la kɔlɔ lele la so mbeyaka nkonya di’etshumanelo kaso ndala djɔ ya lo nyuma ndo ndjiha washo lo pɛkato ya weke yasalema. (1 Kor. 5:1; Eny. 3:15, 16) Lonyuma la ngande lele l’etshumanelo kanyu? Ngande wakoka ɔmɔmɔ la l’atei anyu mbisha lonya di’etshumanelo kanyu monga la lonyuma la dimɛna?
TOKIMANYIYA ASE ETSHUMANELO DIA VƆ MONGA LA LONYUMA LA DIMƐNA
3, 4. Ngande wakokaso ‘ntombola Jehowa l’etshumanelo kande’?
3 Omembi w’esambo Davidi akembe ate: ‘Dimi layokotombolaka wɛ Jehowa l’etshumanelo kayɛ ka woke. L’atei wa lemba l’anto mbayomokembɛka.’ (Osam. 35:18) Nde kotshika ntombola Jehowa etena kakinde kâmɛ l’atɛmɔdi ande akina. Nsanganya yasalema lo tshumanelo lomingu la lomingu, mbidja ndo Wekelo wa Tshoto y’Etangelo, toshaka waaso wa sho mɛnya ohetoheto aso etena kashaso kɔmatɛrɛ yɛnya mbetawɔ kele la so. Onto l’onto ayambole ɔnɛ: ‘Onde dimi mbɔsaka diɛsɛ diele la mi dia mbɔtɔka lo nsanganya la nɛmɔ? Onde dimi nɔngɔsɔlaka nsanganya tshɛ dia tosha kɔmatɛrɛ yakeketsha? Oko wemi papa ka nkumbo, onde dimi kimanyiyaka anami dia vɔ nɔngɔsɔla kɔmatɛrɛ la ntondo ndo toyisha l’ɛtɛkɛta awɔ vɔamɛ?’
4 Sho kokaka mɛnya ɔnɛ tamboyashikikɛ dia nsala kɛnɛ kele ɔlɔlɔ oma lo woho wembaso esambo lo nsanganya. Davidi akate ate: “Utema ami ambukikitala, [Nzambi] li, utema ami ambukikitala. Dimi layimbaka esambu, ee, layimbaka esambu wa diandu.” (Osam. 57:7) Esambo wembaso lo nsanganya toshaka diaaso dia dimɛna dia ‘membɛ ndo ntombola’ Jehowa l’etema aso tshɛ. Naka hateye esambo ɛmɔtshi, shi sho koka mbeka esambo akɔ etena kasalaso Ɔtɛmwɛlɔ wa lo nkumbo wa la dikɔlɔ? Nyɛsɔ tosale kɛnɛ tshɛ kakokaso nsala dia ‘membɛka Jehowa ndo mbotombolaka etena tshɛ kekeso la lɔsɛnɔ.’—Osam. 104:33.
5, 6. Ngande wakokaso nongola asekaso ambetawudi, ndo shɛngiya yakɔna yakoka monga la dui sɔ l’etshumanelo kaso?
5 Nongolaka anangɛso l’akadiyɛso ekɔ yoho kina yakokaso pamia ngandji l’atei w’etshumanelo. Lo tshapita y’ekomelo ya mukanda wakandafundɛ ase Hɛbɛru, Paulo akawasha ndo dako nɛ: “Nyutetemali mbukana ngandji. Tanyuhelaki menya angendangenda ketshi.” (Heb. 13:1, 2) Mbelɛ emendji weteta la wadiɛwɔ kana ekambi ekina wa lo tena tshɛ dia ndjɔlɛ la wɔ yangɔ ekɔ yoho yoleki dimɛna yakokaso mɛnya lokaho. Sho koka mbelɛka ndo wadi waki edo, ambutshi wodia anawɔ vɔamɛ kana anto akina wele l’ohomba w’ekimanyielo kaso dia ndjɔlɛ la wɔ kâmɛ ndo ndjosala la wɔ Ɔtɛmwɛlɔ wa lo nkumbo lo tena dimɔtshi.
6 Paulo akatɛ Timɔtɛ dia nde mbewola anto wa lo nshi yande “dia vo ntshela akina ololo, la dia vo ndjala engonyi wa lu elimu w’ololo, la dia vo ndjala la lukahu, ndu wuki akina ketshi. Vo wayaumbeli tshina di’ololo dia lumu l’etena kayuya, ne dia vo nkimela lumu la mete.” (1 Tim. 6:17-19) Lo ndjela divɛsa nɛ, Paulo akalɔmbaka asekande ambetawudi dia vɔ monga la lokaho. Kânga l’etena kɛnɛ kaya ekondjelo wolo, sho koka monga la yimba ya lokaho. Ɛnyɛlɔ naka wɛ ekɔ la mutuka, shi wɛ kokaka mɛmbaka anangɛso kana akadiyɛso otsha l’esambishelo kana lo nsanganya? Ko ngande wakoka anangɛso wakimanyiyama asɔ mɛnya lowando lele la wɔ le wanɛ wâkimanyiya? Yoho mɔtshi ele lo mbasombɛ yema y’esasɛ wa mbidjaka lo mutuka.a Ndo nto, shi woho wayatshungolɛso etena dia mbetsha wenya kâmɛ l’anangɛso l’akadiyɛso wa lo nyuma ayowaɛnya dia sho mbaokaka ngandji? Naka sho salɛka ‘wanɛ wotɔ la so lo mbetawɔ’ ɔlɔlɔ ndo mongaka suke dia mbetsha wenya aso lo wahɔ awɔ ndo mbakahɛ diangɔ diaso dimɔtshi, kete tayohamia ngandji kawaokaso ndo tayokimanyiya di’etshumanelo kaso monga la lonyuma la dimɛna.—Ngal. 6:10.
7. Ngande wele nama toseke kimanyiyaka di’etshumanelo monga la lonyuma la dimɛna?
7 Akambo akina ahende wakoka nkeketsha dimama dia ngandji diele lam’asaso l’asekaso ambetawudi ele lɔngɛnyi ndo olamelo wa toseke. (Adia Tukedi 18:24.) Angɛnyi w’eshika hawoshola pondjo awui awɔ wa toseke. Etena katotɛ anangɛso kana akadiyɛso toseke tawɔ, vɔ wekɔ l’eshikikelo dia hatotosanyɛ anto akina ndo dui sɔ kimanyiyaka dia dimama dia ngandji diele lam’asaso ndeka nkeketala. Nyɛsɔ tokanake ngandji k’efula l’etshumanelo kaso oko ase nkumbo ɔtɔi lo monga anto wɛkɛwɔ otema ndo walama toseke.—Tuk. 20:19.
TONGE L’OHETOHETO L’ESAMBISHELO
8. Dako diakɔna diakalongola ase Laodikiya, ndo lande na?
8 Yeso akatɛ etshumanelo ka la Laodikiya ate: “Dimi mbeyaka etsha aye nti: We kema tshitshi kema dja. Utumulanga ku we ndjala tshitshi kuyanga dja. Okone ne dia we eko djungudungu, aha dja, aha tshitshi, dimi layukohongola uma l’unyo ami.” (Eny. 3:15, 16) Ase etshumanelo ka la Laodikiya komonga l’ohetoheto l’olimu w’Okristo. Dui sɔ diaki la shɛngiya lo diɔtɔnganelo diaki lam’asawɔ vɔamɛ. Diakɔ diakawasha Yeso dako la ngandji tshɛ ate: “Dimi latulakaka, lat[ongolaka] wane wukami ngandji. Okone ukalangani, ukadimuli utema.”—Eny. 3:19.
9. Shɛngiya yakɔna yakoka monga la woho wayashaso l’esambishelo lo lonyuma l’ase etshumanelo kaso?
9 Di’etshumanelo kaso monga la lonyuma la dimɛna, sho pombaka monga l’ohetoheto l’olimu w’esambishelo. Etshumanelo kekɔ l’oyango wa nyanga anto wele oko ɛkɔkɔ wele l’ɛtshi kaso ka nkɛtɛ ndo mbakeketsha lo nyuma. Ɔnkɔnɛ, sho pombaka ndjasha l’olimu wa mbetɛ anto ambeki l’ohetoheto oko wakasalaka Yeso. (Mat. 28:19, 20; Luke 4:43) Etena katataleke monga l’ohetoheto l’olimu w’esambishelo mbataleke mpama kâmɛ kaso ‘k’anto wakamba olimu kâmɛ la Nzambi.’ (1 Kor. 3:9) Etena kayasha anangɛso ndo akadiyɛso akina l’esambishelo dia mɛnya mbetawɔ ndo lowando lele la wɔ l’akambo wa lo nyuma, sho tshutshuyamaka dia mbaoka ngandji ndo mbalɛmiya efula. Ndo nto, “mvuta diui otoi” l’esambishelo kimanyiyaka di’etshumanelo kaso monga kâmɛ.—Adia 1 Koreto 1:10.
10. Naka sho ndowanya akoka aso wa nsambisha, dui sɔ diayonga l’etombelo akɔna lo lonyuma l’ase etshumanelo akina?
10 Welo wadjaso dia ndjalowanya l’olimu w’esambishelo wekɔ nto la shɛngiya ya dimɛna le anto akina. Naka sho ndjasha efula le wanɛ wasambishaso ndo nsala la wolo dia munanda etema awɔ, kete ohetoheto wele la so wayohama. (Mat. 9:36, 37) Ndo nto, lam’ele ohetoheto sambemɛka, anto akina kokaka monga la wɔ l’ɛnyɛlɔ kaso. Lo dihole dia nde mbatoma ɔtɔi ɔtɔi l’esambishelo, Yeso akatome ambeki ande ahende ahende. (Luka 10:1) Dui sɔ kombashaka tsho ekeketshelo ndo olowanyelo, koko diakafudiaka ndo ohetoheto awɔ. Shi sho tshɛ ngɛnangɛnaka nsambisha kâmɛ l’apandjudi wele l’ohetoheto? Ohetoheto wele la wɔ tokeketshaka ndo totshutshuyaka dia sho ndjasha l’esambishelo.—Romo 1:12.
TATONGUNANGUNAKE NDO TATOSHƐKE PƐKATO
11. Dionga diakɔna dia kɔlɔ diaki l’ase Isariyɛlɛ amɔtshi wa lo nshi ya Mɔsɛ, ndo dui sɔ diaki l’etombelo akɔna le wɔ?
11 Mingu ngana l’ɔkɔngɔ wa Jehowa mbaetɛ wodja ande, ase Isariyɛlɛ wakatatɛ ngunanguna. Dui sɔ diakâkonya dia vɔ mbɔtɔmbɔkwɛ nde l’enyimpala ande. (Etum. 16:1, 2) Paka ase Isariyɛlɛ yema tshitshɛ tsho mbakɔtɔ lo Nkɛtɛ ya daka. Kânga Mɔsɛ kɔmbɔtɔ lo Nkɛtɛ ya daka l’ɔtɛ wakinde kotombola Jehowa lo washo w’ase Isariyɛlɛ. (Euh. 32:48-52) Kakɔna kakokaso nsala ɛlɔ kɛnɛ diaha sho ndjonga la lɔkɛwɔ la kɔlɔ?
12. Ahombaso nsala dia mbewɔ engunungunu?
12 Sho pombaka mbewɔ engunungunu. Naka sho monga l’okitshakitsha ndo nɛmiya enyimpala waki Nzambi, kete tayewɔ dui sɔ. Dui dikina diakoka tokimanyiya dia mbewɔ engunungunu ele nsɔna la yambalo tshɛ anto wahombaso mbɔtɔ la wɔ lɔngɛnyi. Naka sho ndjasha lo tɔkɛnyɔ ta kɔlɔ kana mbetsha wenya efula kâmɛ l’asekaso wa l’olimu kana wa la kalasa wele bu Ɛmɛnyi wa Jehowa, kete dui sɔ diayonga l’etombelo wa kɔlɔ efula le so. Sho pombaka mpembola losambi l’anto tshɛ wele la waonga wa kɔlɔ kana wele la yimba ya dipanda.—Tuk. 13:20.
13. Engunungunu koka tokonya lo wâle wa lo nyuma akɔna?
13 Engunungunu kokaka tokonya lo wâle ekina wa lo nyuma. Ɛnyɛlɔ, engunungunu koka shishɛ ase etshumanelo wɔladi ndo kâmɛ kele lam’asawɔ. Ndo nto, naka sho tɛkɛtaka kɔlɔ lo dikambo di’asekaso ambetawudi, kete dui sɔ howasha tsho pâ l’asolo, koko diayotokonya ndo lo pɛkato nkina yele oko lɔtɛndɔ ndo lɔtɛngɔ. (Lew. 19:16; 1 Kor. 5:11) Akristo amɔtshi wa lo ntambe ka ntondo ‘wakɔnyɔlaka lowandji ndo wakatɛkɛtaka kɔlɔ lo dikambo di’akanga a lotombo.’ (Jude 8, 16) Lam’ele Akristo asɔ wakangunɛngunɛka dikumanyi, Nzambi akawaoke ɔkɔngɔ.
14, 15. a) Ndjiha washo lo pɛkato kambosala onto ɔmɔtshi kokaka monga la shɛngiya yakɔna l’etshumanelo? b) Kakɔna kayotosala naka tambeya di’ɔnangɛso kana kadiyɛso kapanda ambosala pɛkato ka woke?
14 Ko ahombaso nsala naka tambeya ɔnɛ ɔnangɛso kana kadiyɛso kɛmɔtshi akasale pɛkato ka woke kele oko mbidjɔ wanu, menda esato wɛnyawɔ anto etakataka, monanyi kana loseka? (Ef. 5:11, 12) Naka hatoshodi pɛkato kɛsɔ, kete Jehowa mbeyaka minya nyuma kande oma l’etshumanelo kaso ndo dui sɔ diayokonya diaha wɔladi monga lɔkɔ. (Ngal. 5:19-23) Oko waki Akristo wa l’etshumanelo ka la Kɔrɛtɔ l’ɔkɛndɛ wa minya atshi wa pɛkato oma l’atei awɔ, ɛlɔ kɛnɛ anto tshɛ wele la shɛngiya ya kɔlɔ pombaka mbitshanyema oma l’etshumanelo dia nkokɛ lonyuma latɔ. Ko kakɔna kakokayɛ nsala di’etshumanelo kanyu monga la wɔladi?
15 Oko wakatashidi mbuta la diko, sho pombaka momba toseke, djekoleko etena katotɛ anto akina nsaki ndo tokanyi tawɔ t’oma k’ɛse otema. Ekɔ mɛtɛ kɔlɔ ka mamba ndo dui diasha pâ l’asolo dia mbetola eshimu wa kana. Koko kɛsɔ hatshi ɔnɛ etena kasala onto ɔmɔtshi pɛkato ka woke hatohombe mbewoya dikumanyi. (Adia Akambu w’Asi Lewi 5:1.) Ɔnkɔnɛ, naka tambeya di’ɔnangɛso kana kadiyɛso kapanda ambosala pɛkato ka woke, tôkeketsha dia nde tɛnana la dikumanyi dia nyanga ekimanyielo. (Jak. 5:13-15) Naka nde hasadi dui sɔ l’ɔkɔngɔ wa nshi ngana, kete shoamɛ pombaka totɛ dikumanyi.
16. Lande na kele mbutɛ dikumanyi kɔlɔ kosadi onto ɔmɔtshi l’etshumanelo kimanyiyaka dia kikokɛ?
16 Etshumanelo k’Akristo ekɔ dihole di’ekokelo ka lo nyuma ndo sho pombaka dikokɛ lo mbutɛka dikumanyi pɛkato ya weke. Naka vɔ wambokimanyiya otshi wa pɛkato dia nde ndjatshumoya ko nde ambetawɔ engwelo, kete nde hatolanya lonyuma l’etshumanelo nto. Ko dikumanyi ayowosala l’onto lakasale pɛkato ka woke lahayatshumoya ndo lahetawɔ alako wa la ngandji wawoshawɔ? Nde ayotshanyema ndo lo nsala ngasɔ, dikumanyi wayolama pudipudi k’etshumanelo. Bible mbutaka ɔnɛ: “Nyokimɔ onto ɔsɔ le Satana dia shɛngiya ya kɔlɔ yakandadje l’etshumanelo nshila l’oyango wa nama yimba y’etshumanelo lo lushi la Nkumadiɔndjɔ.” (1 Kor. 5:5, NW) Dia nama lonyuma la dimɛna l’etshumanelo, nɔmbamaka di’onto tshɛ la l’atei aso nsala kɛnɛ kahombama, nkamba kâmɛ la dikumanyi ndo nkokɛ lonyuma l’etshumanelo.
TONGE ‘KÂMƐ LO NYUMA’
17, 18. Kakɔna kayotokimanyiya dia monga ‘kâmɛ lo nyuma’?
17 Lam’ele Akristo wa lo ntambe ka ntondo “wakakolamela lu wetshelu wa atumami,” vɔ waki kâmɛ l’etshumanelo. (Etsha 2:42) Vɔ wakɔsaka alako w’oma l’Afundelo ndo wetshelo w’oma le dikumanyi la nɛmɔ. Lam’ele ndo dikumanyi dia nshi nyɛ mbakamba kâmɛ l’ɔhɔmbɔ wa kɔlamelo ndo wa kɛsɔ, ose etshumanelo tshɛ keketshamaka ndo kimanyiyamaka dia monga kâmɛ. (1 Kor. 1:10) Naka sho nkitanyiya wetshelo w’oma lo Bible watetsha okongamelo waki Jehowa ndo ndjela ɛlɔmbwɛlɔ ka dikumanyi, kete tayɛnya ɔnɛ ‘tekɔ lo mbidja welo wa l’otema ɔtɔi dia monga kâmɛ lo nyuma.’—Ef. 4:3.
18 Nyɛsɔ tosalake kɛnɛ tshɛ kakokaso nsala di’etshumanelo kaso monga la lonyuma la dimɛna ndo ntetemala lilama. Naka sho nsala ngasɔ, kete ‘ngandji ka mamba ka Yeso Kristo kayoyala la yimba yakɛnɛmɔlaso.’—Fil. 4:23.
[Nɔte ka l’ɛse ka dikatshi]
a Kana naka wɛ ekɔ la yônge ya dimɛna, kete wɛ koka ndjadjɛ oyango wa takolaki ɔnangɛso kana kadiyɛso kɛmɔtshi kele l’okakatanu dia ntshɔ ndamɛ lo nsanganya kana l’esambishelo. Ko ahomba nsala wanɛ walongola ekimanyielo ka la ngandji tshɛ kɛsɔ na? Vɔ wayokokɛ lonyuma l’etshumanelo naka vɔ monga la lowando, ɛnyɛlɔ lo ndjalɔngɔsɔlaka la wonya diaha mbetshɛ wanɛ waya dia ndjowaɔsa wenya ndo diaha vɔ tokomaka l’ɔkɔngɔ lo nsanganya.
[Osato wa lo lɛkɛ 19]
Onde wɛ kimanyiyaka di’etshumanelo kanyu monga la lonyuma la dimɛna lo nɔngɔsɔlaka kɔmatɛrɛ yakeketsha?
[Osato wa lo lɛkɛ 20]
Tokimanyiya di’etshumanelo kaso monga la lonyuma la dimɛna lo mbekaka esambo aso wa Diolelo