Onde wɛ ekɔ mɛtɛ la mbetawɔ lo lokumu l’ɔlɔlɔ?
‘Diolelo diaki Nzambi diaya suke. Nyokadimole etema ndo nyônge la mbetawɔ lo lukumu l’ɔlɔlɔ.’—MAKO 1:15.
1, 2. Ngande wakokayɛ nembetshiya Mako 1:14, 15?
YESO akatatɛ olimu ande w’ohomba efula la Ngalileya l’ɔnɔnyi 30 T.D. Nde akasambishaka “lukumu l’ololo la [Nzambi],” ndo ɛtɛkɛta ande w’ɔnɛ: “Etena kambukuka, diulelu dia Nzambi diaya suki. Nyukadimuli etema, [nyônge la mbetawɔ lo lokumu l’ɔlɔlɔ]” wakatshutshuya ase Ngalileya efula dia mbɔsa yɛdikɔ mɔtshi.—Mako 1:14, 15.
2 ‘Etena kakashikikɛma’ ka Yeso tatɛ olimu ande ndo k’anto mbɔsa tɛdikɔ tayowakimanyiya dia vɔ mbetawɔma le Nzambi kakakoke. (Luka 12:54-56) ‘Diolelo diaki Nzambi diaki suke’ nɛ dia Yeso, Nkumekanga kakasɔnama aki l’atei awɔ. Olimu ande w’esambishelo wakatshutshuya anto waki l’etema w’ɔlɔlɔ dia vɔ ndjatshumoya. Ko ngande wakawɛnya ‘mbetawɔ lo lokumu l’ɔlɔlɔ’ ndo ngande wakokaso kiɛnya sho lawɔ?
3. Anto wambɛnya dia wekɔ la mbetawɔ lo lokumu l’ɔlɔlɔ lo sala dikambo diakɔna?
3 L’ɛnyɛlɔ ka Yeso, ɔpɔstɔlɔ Petero akakeketsha anto dia vɔ kadimola etema. Lushi la Pɛntɛkɔsta ka l’ɔnɔnyi 33 T.D., nde akatɛ ase Juda waki la Jerusalɛma ate: “Nyukadimuli etema, nyubatizami, nyu tshe untu l’untu lu lukumbu la Jesu Kristu, ne dia edimanyelu ka kolo yanyu, ku nyu nyayulungula ushasha wa [nyuma k’ekila].” Nunu di’anto wakakadimola etema, wakabatizama ndo wakakome ambeki waki Yeso. (Etsha 2:38, 41; 4:4) L’ɔnɔnyi 36 T.D., ase Wedja wanɛ wakayatshumoya wakayele lokolo lakɔ lamɛ. (Etsha 10:1-48) Lo nshi yaso nyɛ, mbetawɔ kele la nunu di’anto lo lokumu l’ɔlɔlɔ mbatshutshuyaka dia vɔ ndjatshumoya lo pɛkato yawɔ, ndjakimɔ le Nzambi ndo batizama. Vɔ wambetawɔ lokumu l’ɔlɔlɔ la panda ndo olambo waki Yeso wa tshungo. Ndo nto, vɔ wekɔ lo sala kɛnɛ kele ɔlɔlɔ ndo wambeta la Diolelo diaki Nzambi wedi.
4. Mbetawɔ kɛdikɛdi na?
4 Ko mbetawɔ kɛdikɛdi na? Ɔpɔstɔlɔ Paulo akafunde ate: ‘Mbetawɔ ekɔ dikongelo dia shikaa di’akambo walongamɛ onto, wɛnyɛlɔ wa lo sɛkɛ w’akambo wa mɛtɛ wele hawɛnama.’ (Heberu 11:1) Mbetawɔ kaso toshikikɛka dia dikambo tshɛ diakalake Nzambi l’Ɔtɛkɛta ande diayokotshama aha onyake. Ekɔ oko tamboshila la nongola mukanda wele la shinyatirɛ y’aseka lɛɛta wɛnya di’ɛngɔ kapanda kaya kakiso. Mbetawɔ ekɔ nto “wɛnyɛlɔ wa lo sɛkɛ,” kana dietawɔ dia lo sɛkɛ diendana la diangɔ diahɛnama. Shɛnɔdi nd’otema aso woludi la lowando toshikikɛka di’akambo asɔ wekɔ mɛtɛ kânga mbele tatawaɛnyi.—2 Koreto 5:7; Efeso 1:18.
Tekɔ l’ohomba wa mbetawɔ!
5. Lande na kele mbetawɔ kekɔ ohomba efula?
5 Takotɔ la mposa k’akambo wa lo nyuma, koko aha la mbetawɔ. Diakɔ diele, “aha antu tshe mbeli la mbetawo.” (2 Tesalonika 3:2) Koko dia kita alaka waki Nzambi, Akristo pombaka monga la mbetawɔ. (Heberu 6:12) L’ɔkɔngɔ wa nde nshila bɛnyɛlɔ efula di’anto waki la mbetawɔ, Paulo akafunde ate: “Ne dia shu tambudingama la ului a wuki w’emenyi, osoku ndu shu tunya wetshu tshe, la akambu wa kolo watutudingamaka lam’esu weodu, tusaki esakelu kasu ka luwangu keli la ntundu l’eteti. Tendaki Jesu, utatedi la unduwanyi wa mbetawo kasu.” (Heberu 12:1, 2) Naa “akambu wa kolo watutudingamaka” asɔ na? Akambo akɔ ko: monga kema la mbetawɔ, kana oshishelo atɔ l’ɔkɔngɔ wa monga la tɔ. Dia sho tetemala monga la mbetawɔ ka nge, sho pombaka ‘mbika washo aso le Yeso’ ndo ndjela ɛnyɛlɔ kande. Sho pombaka nto tona awui wa mindo, ndɔshana l’etsha wa demba, mbewɔ eyango wa lomombo la l’emunyi, filozofi y’ase andja ɔnɛ ndo mbekelo yahɔtɔnɛ l’Afundelo. (Ngalatiya 5:19-21; Kolosai 2:8; 1 Timote 6:9, 10; Jude 3, 4) Ndo nto, sho pombaka mbetawɔ dia Nzambi ekɔ la so ndo ɔnɛ alako wele l’Ɔtɛkɛta ande kimanyiyaka mɛtɛ.
6, 7. Bonde kasunganande dia sho nɔmba dia monga la mbetawɔ?
6 Aha oma lo welo la nsaki kaso shamɛ mbayotokoka monga la mbetawɔ. Mbetawɔ ekɔ olowa ɔmɔtshi wa nyuma k’ekila kaki Nzambi, kana wolo ande wakamba olimu. (Ngalatiya 5:22, 23) Lâsɔ, ahombaso sala dia keketsha mbetawɔ kaso? Yeso akate ate: “Okone, naka nyu, antu wa kolo, mbeyaka mbisha an’anyu eshasha w’ololo, Shenyu le l’ulungu huleka mbisha wane wôlomba [nyuma k’ekila]!” (Luka 11:13) Nyɛsɔ tɔlɔmbake Nzambi dia nde tosha nyuma k’ekila, nɛ dia tɔ koka tosha mbetawɔ keso la tɔ ohomba dia sala lolango lande kânga lo tena dia wolo.—Efeso 3:20.
7 Ekɔ kawɔ sho nɔmba dia nyomoleka monga la mbetawɔ. Lam’akayange Yeso tondja ɔdiɛngɛ oma le dikɛnda dimɔtshi dia pami, she aki ɔna pami ɔsɔ akalɔmbɛ ate: ‘Dimi lekɔ la mbetawɔ! Okimanyiya lɛn’emi l’ohomba wa mbetawɔ!’ (Mako 9:24) Ambeki waki Yeso wakɔ̂lɔmbɛ vate: “Ufudia mbetawo kasu.” (Luka 17:5) Ɔnkɔnɛ, nyɛsɔ tɔlɔmbake dia monga la mbetawɔ, tele l’eshikikelo ɔnɛ Nzambi ayoka alɔmbɛlɔ wa ngasɔ.—1 Joani 5:14.
Ekɔ ohomba efula monga la mbetawɔ l’ɔtɛkɛta wa Nzambi
8. Ngande wakoka tokimanyiya mbetawɔ kele laso l’Ɔtɛkɛta wa Nzambi?
8 Yema tshitshɛ la ntondo ka nyɔi kande k’olambo, Yeso akatɛ ambeki ande ate: “Etema anyu tawodidimake. Nyônge la mbetawɔ le Nzambi, nyônge nto la mbetawɔ le mi.” (Joani 14:1, NW) Oko weso Akristo, sho tekɔ la mbetawɔ le Nzambi ndo le Ɔnande. Ko kayotota dikambo di’Ɔtɛkɛta wa Nzambi? Vɔ koka monga la shɛngiya ya dimɛna lo lɔsɛnɔ laso naka sho mboweka ndo kamba la wɔ l’eshikikelo tshɛ ɔnɛ vɔ wekɔ l’alako ndo l’ɛlɔmbwɛlɔ koleki tshɛ dimɛna le so.—Heberu 4:12.
9, 10. Ngande wakokayɛ nembetshiya kɛnɛ kotami lo Jakoba 1:5-8 lo dikambo dia mbetawɔ?
9 Oko weso bu kokele, sho pomanaka l’ekakatanu efula lo lɔsɛnɔ. Koko, monga la mbetawɔ l’Ɔtɛkɛta wa Nzambi mbeyaka mɛtɛ tokimanyiya. (Jobo 14:1) Ɛnyɛlɔ, tɔshi dia hateye woho wa ndɔshana l’ohemba ɔmɔtshi. Ɔtɛkɛta wa Nzambi tolakaka ɔnɛ: “Naka [onto] omotshi ambuhumba [lomba], ndi alombe [Nzambi], katushaka antu tshe diango la lukahu, hâhangwela, ku ndi ayuwusha[lɔ]. Keli ndi alombe la mbetawo, aha la tamu, ne dia untu ladja tamu, eko uku sukhu di’ashi a wuki, diasukuyama la diasutshasutshama la loheledi. Untu uku takanaki ati: Layulungula engo uma le Khumadiondjo; untu uku eko la etema ehendi, atahahoka lu akambu andi tshe.”—Jakoba 1:5-8.
10 Jehowa Nzambi hatotohangwɛ lo woho weso bu la lomba ndo wɔ̂lɔmbaso dia likondja. Koko, nde ayotokimanyiya dia menda ohemba la sso di’ɔlɔlɔ. Asekaso ambetawudi kana wekelo aso wa Bible mbeyaka tohola avɛsa amɔtshi wakoka tokimanyiya efula. Kana nyuma k’ekila kaki Jehowa koka tɔlɔmbɔla lo toho tokina. Shɛso lele l’olongo ayotosha lomba woho wa sho mbeya ndɔshana l’ehemba naka sho ‘tetemala la mbɔlɔmba la mbetawɔ, aha la tâmu.’ Naka sho monga oko sukhu di’ashi diasutshasutshama la lɔpɛpɛ, kete hatokoke nongamɛ dia nongola ɛngɔ oma le Nzambi. Lande na? Nɛ dia dui sɔ diayɛnya dia hateye mbɔsa yɛdikɔ ndo ɔnɛ sho mbahahɔka l’alɔmbɛlɔ kana diɔ mɛnamaka oma lo toho tokina, ɛnyɛlɔ yoho yɛnyaso mbetawɔ kaso otsha le Nzambi. Lâsɔ, sho pombaka monga la mbetawɔ ka nge l’Ɔtɛkɛta wa Nzambi ndo l’ɛlɔmbwɛlɔ kashawɔ. Nyɛsɔ tɔsɛdingole bɛnyɛlɔ dimɔtshi diɛnya woho watokimanyiya ndo watɔlɔmbɔla Ɔtɛkɛta wa Nzambi.
Mbetawɔ ndo ehomba aso
11. Monga la mbetawɔ l’Ɔtɛkɛta wa Nzambi toshaka eshikikelo kakɔna lo kɛnɛ kendana l’ehomba aso wa lushi la lushi?
11 Ko kayotota naka tekɔ lo diɛnɛ la ndjala, ohomba wa luudu kana la wola? Mbetawɔ kaso l’Ɔtɛkɛta wa Nzambi toshikikɛka ɔnɛ Nzambi ayotokotshiyɛka ehomba aso wa lushi la lushi ndo ɔnɛ l’andja w’oyoyo Nzambi ayosha wanɛ tshɛ wa woka ngandji diangɔ di’amɛna tshavutshavu. (Osambu 72:16; Luka 11:2, 3) Sho mbeyaka keketshama lo kana yimba woho wakasale Jehowa di’omvutshi ande Elidja kondja diangɔ dia ndɛ l’etena kaki ndjala ka kasha. L’ɔkɔngɔ diko, dia kokɛ lɔsɛnɔ laki womoto ɔmɔtshi nde l’ɔnande ndo laki Elidja, Nzambi akasale lo dihindo di’aha ofushi wa nshima ndo esɔ kaki mama kɛsɔ shila. (1 Khumi ya Dikanga 17:2-16) Woho akɔ wamɛ mbakasukɛ Jehowa Jeremiya lo kotsha ehomba ande lam’akadinge ase Babilɔna Jerusalɛma. (Jeremiya 37:21) Kânga mbaki Jeremiya ndo Elidja komonga la diangɔ dia ndɛ efula, Jehowa akawasha kɛnɛ kaki lawɔ ohomba. Ɔsɔku mbasalɛnde ndo wanɛ wele la mbetawɔ le nde ɛlɔ kɛnɛ.—Mateu 6:11, 25-34.
12. Ngande wakoka mbetawɔ tokimanyiya dia sho ndjakotshiyɛka ehomba aso?
12 Mbetawɔ kâmɛ ndo okambelo wa l’atɔndɔ wa lo Bible hatotokonya ɛngɔnyi wa l’emunyi, koko tɔ kayotokimanyiya dia sho ndjakondjiyɛka kɛnɛ keso mɛtɛ la tɔ ohomba lushi la lushi. Ɛnyɛlɔ: Bible tolakaka dia monga anto wele la losembwe, anto w’eshika nd’anto wakamba olimu dimɛna. (Tukedi 22:29; Undaki 5:18, 19; 2 Koreto 8:21) Tatɔnyɔlake pondjo ohomba wa monga ekambi wele la lokumu l’ɔlɔlɔ. Kânga l’ahole wele wolo tana elimu w’amɛna, anto wele la losembwe, wele l’akoka wahombama ndo wele l’etete l’olimu wekɔ la diɛsɛ dia kondja olimu oleki anto akina. Kânga mbakoka as’olimu asɔ monga la yema ya lomombo tshitshɛ la l’emunyi, vɔ kondjaka mbala tshɛ kɛnɛ kewɔ la tɔ mɛtɛ ohomba ndo wekɔ l’ɔngɛnɔngɛnɔ wa ndɛ diangɔ di’oma lo dungu diawɔ.—2 Tesalonika 3:11, 12.
Mbetawɔ tokimanyiyaka dia mbikikɛ lonyangu
13, 14. Ngande watokimanyiya mbetawɔ dia mbikikɛ kandji?
13 Ɔtɛkɛta wa Nzambi mɛnyaka hwe dia ndoko kɔlɔ di’onto ndela lam’avushande lakinde ɔmɔtshi la ngandji. Abarahama, owandji wa nkumbo waki la kɔlamelo akalele heyama lam’akavu wadɛnde la ngandji, Sara. (Etatelu 23:2) Davidi aki la lonyangu heyama lam’akandoke dindjɛyi dia nyɔi k’ɔnande Abisalɔma. (2 Samuele 18:33) Kânga Yeso laki onto la kokele akalele lam’akavu ɔngɛnyi ande Lazaro. (Joani 11:35, 36) Lam’avɔ lakiso ɔmɔtshi la ngandji, sho mbeyaka monga la kandji kaheyama l’asolo, koko mbetawɔ kele laso l’alaka wele l’Ɔtɛkɛta wa Nzambi koka tokimanyiya dia mbikikɛ kandji kɛsɔ.
14 Paulo akate ate: ‘Dimi lambolongamela le Nzambi dia eolwelo k’anto w’ɔlɔlɔ la k’anto wa kɔlɔ oma lo nyɔi kayoyala.’ (Etsha 24:15) Sho pombaka monga la mbetawɔ lo yɛdikɔ yakɔshi Nzambi ya mbolola nyemba y’anto oma lo nyɔi. (Joani 5:28, 29) L’atei awɔ mbayonga Abarahama la Sara, Isaka la Rɛbɛka, Jakɔbɔ la Lea—wony’ɔnɛ vɔ tshɛ wakaladi djɔ ya nyɔi ndo wekɔ lo konga dia ndjolwama l’andja w’oyoyo waki Nzambi. (Etatelu 49:29-32) Ayonga mɛtɛ ɔngɛnɔngɛnɔ wa mamba etena kayemɔ wakiso wa ngandji oma lo nyɔi oya lo lɔsɛnɔ lanɛ la nkɛtɛ! (Enyelo 20:11-15) Ekɔ mɛtɛ dia l’etena kɛnɛ kakatakongɛ dikambo sɔ, mbetawɔ hatoshidiya ekiyanu tshɛ, koko tɔ kayotokimanyiyaka dia sho sukana la Nzambi, ɔnɛ latokimanyiya dia sho mbikikɛ kandji konga laso lam’avushaso lakiso ɔmɔtshi la ngandji.—Osambu 121:1-3; 2 Koreto 1:3.
Mbetawɔ keketshaka onto lambɔkɔmɔ otema
15, 16. (a) Lande na kakokaso mbuta di’ɔkɔmwɛlɔ w’otema bu dikambo di’oyoyo le wanɛ wele la mbetawɔ? (b) Akokaso sala dia ndɔshana l’ɔkɔmwɛlɔ w’otema?
15 Ɔtɛkɛta wa Nzambi mɛnyaka dia kânga wanɛ wele la mbetawɔ le Nzambi mbeyaka kɔmɔ otema. Lam’akandadiɛnɛka l’ehemba wa wolo, Jɔbɔ akɛnyi di’oko Nzambi ambowoka ɔkɔngɔ. (Jobo 29:2-5) Ohandjwelo wa Jerusalɛma ndo wa mpele diayɔ akanyangiya Nehemiya efula. (Nehemiya 2:1-3) Petero akanyange heyama l’ɔkɔngɔ wa nde manguna Yeso, diakɔ ‘diakandalele heyama.’ (Luka 22:62) Paulo akakeketsha asekande ambetawudi wa l’etshumanelo ka la Tɛsalɔnika dia vɔ ‘keketsha wanɛ wambɔkɔmɔ etema.’ (1 Tesalonika 5:14) Ɔnkɔnɛ, bu dikambo di’oyoyo ɛlɔ kɛnɛ di’onto lele la mbetawɔ kɔmɔ otema. Ko akokaso sala dia ndɔshana l’ɔkɔmwɛlɔ w’otema na?
16 Sho mbeyaka kɔmɔ otema l’ɔtɛ w’ekakatanu efula wa wolo wele laso. Lo dihole dia mbɔsa ekakatanu ɛsɔ oko amboleka wolo, sho koka monga l’akoka wa takandolaka ekakatanu akɔ yema yema lo kamba l’atɔndɔ wa lo Bible. Dui sɔ mbeyaka tokimanyiya dia kitshakitsha ɔkɔmwɛlɔ aso w’otema. Olimu wa lo yɛdikɔ yahombama ndo diomuyelo dia dimɛna mbeyaka nto tokimanyiya. Ekɔ mɛtɛ dia: Monga la mbetawɔ le Nzambi ndo l’Ɔtɛkɛta ande toshaka lonyuma la dimɛna nɛ dia tɔ keketshaka eshikikelo kaso k’ɔnɛ nde mɛtɛ tokanɛka.
17. Ngande weyaso dia Jehowa tokanɛka?
17 Petero toshaka eshikikelo kakeketsha kɛnɛ ate: “Nyuyakitshakitsha la tshina dia lunya la wulu la [Nzambi], dia ndi nyumbiya lam’ayukuka etena kanyu. Nyukitsha ukananu anyu tshe le ndi, ne dia ndi atunyukanelaka.” (1 Petero 5:6, 7) Omembi w’esambo akembe ate: “[Jehowa] atusukelaka wane tshe watokokaka. Ndi katusimbulaka wane tshe wukutami.” (Osambu 145:14) Sho pombaka mbetawɔ ɛtɛkɛta w’eshikikelo ɛsɔ nɛ dia vɔ tanemaka l’Ɔtɛkɛta wa Nzambi. Kânga mbakoka ɔkɔmwɛlɔ w’otema tetemala, mbetawɔ kaso keketshamaka efula lo mbeya dia sho koka kitsha ekiyanu aso tshɛ le Shɛso ka ngandji lele l’olongo!
Mbetawɔ ndo ehemba ekina
18, 19. Ngande watokimanyiya mbetawɔ dia sho mbikikɛ hemɔ ndo keketsha asekaso ambetawudi watata?
18 Sho mbeyaka pomana l’ohemba wa woke efula wa mbetawɔ etena kandamaso kana kandama lakiso ɔmɔtshi la ngandji la hemɔ ka wolo. Kânga mbele Bible hɛnya dia Jehowa akakɔnɔla lo dihindo Akristo wele oko Epaforodito, Timɔtɛ ndo Torofimo, aha la tâmu tɔ mɛnyaka dia Jehowa akâkimanyiya dia vɔ mbikikɛ. (Filipi 2:25-30; 1 Timote 5:23; 2 Timote 4:20) Ndo nto, lo dikambo dia “one latukanelaka usi wula” omembi w’esambo akembe ate: “[Jehowa] atuwushaka wulu lam’endi lu tangi l’asui. We atûsambaka lu kandji yandi tshe lam’endi lu tangi.” (Osambu 41:1-3) Ngande wakoka ɛtɛkɛta waki omembi w’esambo tokimanyiya dia sho keketsha asekaso ambetawudi wele la hemɔ?
19 Yoho mɔtshi yakokaso kimanyiya anto asɔ lo nyuma ele nɔmba kâmɛ la wɔ ndo lo dikambo dia wanɛ wele la hemɔ. Kânga mbahatakoke nɔmba ɛlɔ kɛnɛ dia Nzambi mbakɔnɔla lo dihindo, sho koka mbɔlɔmba dia nde mbasha wolo wa lo yimba wayowakimanyiya dia vɔ mbikikɛ hemɔ kawɔ ndo wolo wa lo nyuma wele lawɔ ohomba dia mbikikɛ tena dia pâ dia ngasɔ. Jehowa ayowasukɛ, ndo mbetawɔ kawɔ kayokeketshama lo kongɛ etena kele ‘ndoko onto layota ate, dimi la hemɔ.’ (Isaya 33:24) Ekɔ mɛtɛ ekeketshelo dia mbeya ɔnɛ lo tshimbo ya Yeso Kristo ɔnɛ lakolɔ oma lo nyɔi ndo ya Diolelo dia Nzambi, anto wele l’okitanyiya wayotshungɔ lo pondjo oma lo pɛkato, hemɔ ndo nyɔi! Lo menda akambo wa diambo walongamɛso asɔ, sho mbokaka Jehowa ‘ɔnɛ layɔkɔnɔla hemɔ yaso tshɛ’ losaka.’—Osambu 103:1-3; Enyelo 21:1-5.
20. Lande na kakokaso mbuta dia mbetawɔ mbeyaka tokeketsha lo “nshi ya mpukusu” y’osombe?
20 Mbetawɔ koka nto tokimanyiya dia sho mbikikɛ “nshi ya mpukusu” y’osombe, etena katatatshunde ndo katashile wolo wa demba. (Undaki 12:1-7) Ɔnkɔnɛ, esombe wele l’atei aso koka nɔmba woho wakalɔmbɛ omembi w’esambo w’osombe ɔnɛ lakembe ate: “Khumadiondjo, [Jehowa], we keli elungamelu kami . . . Tunsukulaki lu nshi yami y’usumbi, tonsekaki lam’ashila wulu ami.” (Osambu 71:5, 9) Omembi w’esambo akɛnyi ohomba wa Jehowa mbosukɛ, woho akɔ mbayaoka asekaso Akristo efula wanɛ wambotshunda l’olimu wa Nzambi. Diɛsɛ oma lo mbetawɔ kawɔ, vɔ koka monga l’eshikikelo ɔnɛ anya waki Jehowa wayowasukɛka pondjo pondjo.—Euhwelu k’Elembe 33:27.
Totetemale monga la mbetawɔ l’ɔtɛkɛta wa Nzambi
21, 22. Naka tekɔ la mbetawɔ, ngande wayonga dikambo sɔ la shɛngiya lo diɔtɔnganelo diasaso la Nzambi?
21 Monga la mbetawɔ lo lokumu l’ɔlɔlɔ ndo l’Ɔtɛkɛta wa Nzambi w’otondo tokimanyiyaka dia sho nyomoleka sukana la Jehowa. (Jakɔba 4:8) Lo mɛtɛ, nde ekɔ Nkumadiɔndjɔ kaso, koko nde ekɔ nto Otungi ndo Shɛso. (Isaya 64:8; Mateu 6:9; Etsha 4:24) Omembi w’esambo akembe ate: “We keli Papa, [Nzambi k]ami, la dive dia panda kami.” (Osambu 89:26) Naka sho monga la mbetawɔ le Jehowa ndo l’Ɔtɛkɛta ande wakasambiyama, kete ndo sho lawɔ mbeyaka mbɔ̂sa oko ‘Dive dia panda kaso.’ Ɔsɔ mɛtɛ ekɔ diɛsɛ dia mamba!
22 Jehowa mbele She aki Akristo wakotɔ lo nyuma kamɛ ndo asekawɔ wele l’elongamelo ka nsɛna lanɛ la nkɛtɛ. (Romo 8:15) Hatonyangaki pondjo naka sho monga la mbetawɔ le Shɛso lele l’olongo. Davidi akate ate: “Lam’amboseka papa la nyomi, [Jehowa] ayunungula.” (Osambu 27:10) Ndo nto, tekɔ l’eshikikelo kɛnɛ ɔnɛ: “[Jehowa] hoseka wudja andi, ne dia lukumbu landi la wuki.”—1 Samuele 12:22.
23. Kakɔna kahombama dia sho monga la diɔtɔnganelo dia pondjo la Jehowa?
23 Lo mɛtɛ, dia sho monga la diɔtɔnganelo dia pondjo la Jehowa, sho pombaka mɛtɛ monga la mbetawɔ lo lokumu l’ɔlɔlɔ ndo mbetawɔ Afundelo oko wewɔ mɛtɛ, mbut’ate mbetawɔ dia vɔ wekɔ Ɔtɛkɛta wa Nzambi. (1 Tesalonika 2:13) Sho pombaka monga la mbetawɔ ka shikaa le Jehowa ndo mbetawɔ di’Ɔtɛkɛta ande monga osase lo mboka kaso. (Osambu 119:105; Tukedi 3:5, 6) Mbetawɔ kaso kayohama naka sho mbɔ̂lɔmba l’eshikikelo ɔnɛ nde ayotoka kandji, kɛtshi, ndo ayotosukɛ.
24. Naa kanyi y’ekeketshelo yele lo Romo 14:8?
24 Mbetawɔ totshutshuyaka dia sho ndjakimɔ le Nzambi pondjo pondjo. Naka tekɔ la mbetawɔ ka nge, kânga mvɔ mbovweso, tekɔ ekambi ande wakayakimɔ le nde wele l’elongamelo k’eolwelo. Eelo, “kana teko la lumu, kana tambuvo shu teko wa Khumadiondjo.” (Romo 14:8) Tatohɛke pondjo kanyi y’ekeketshelo shɔ lam’ayaɛkɛso l’Ɔtɛkɛta wa Nzambi ndo watetemalaso monga la mbetawɔ lo lokumu l’ɔlɔlɔ.
Ngande wayoyokadimola?
• Mbetawɔ kɛdikɛdi na ndo lande na keso l’ohomba wa dionga sɔ?
• Bonde keso l’ohomba wa monga la mbetawɔ lo lokumu l’ɔlɔlɔ ndo l’Ɔtɛkɛta wa Nzambi w’otondo?
• Ngande watokimanyiya mbetawɔ dia sho ndɔshana l’ehemba wa weho la weho?
• Kakɔna kayotokimanyiya dia sho tetemala monga la mbetawɔ?
[Esato wa lo lɛkɛ 8]
Jehowa akasukɛ Jeremiya la Elidja nɛ dia vɔ waki la mbetawɔ
[Esato wa lo lɛkɛ 9]
Jɔbɔ, Petero, ndo Nehemiya waki la mbetawɔ ka nge
[Esato wa lo lɛkɛ 11]
Dia monga la diɔtɔnganelo dia pondjo la Jehowa, sho pombaka monga la mbetawɔ lo lokumu l’ɔlɔlɔ