Ɛlɔngɔlɔngɔ l’esekaseka—Onde nyekɔ lo tahame lo nyuma?

HIDEO ekɔ lo mbuta ate: “Lam’akimi lo kalasa ka sekɔndɛrɛ, dimi komonga la nsaki k’efula ka kambɛ Jehowa kânga mbakamɔtɔka lo nsanganya y’Akristo. Mbala efula yimba yami aki ya monga onto la lokumu kamɛ l’asekami wa la kalasa kana monga oko ɔnɛnɛ ɔmɔtshi watakɛndakɛnda la lotamanya tshɛ lo shinga l’ɔngɛnyi ande ɔmɔtshi wa womoto. Dimi komonga l’oyango wa shikaa lo lɔsɛnɔ ndo la nsaki ka pama lo nyuma.” L’ɛnyɛlɔ kaki Hideo, ɛlɔngɔlɔngɔ l’esekaseka efula nyangaka dia sɛnaka paka lo yoho yele heyama ɔtɛ l’ekolo, mbut’ate hawokombola dia monga l’eyango ɛmɔtshi w’ɔlɔlɔ kana dia pama lo nyuma.

Naka wɛ eke ɔlɔngɔlɔngɔ kana osekaseka, kete ondo wɛ ngɛnangɛnaka efula wonya wayashayɛ lo tɔkɛnyɔ. Koko mbeyaka monga ko wɛ hangɛnangɛna elimu wa lo nyuma oko wangɛnangɛnayɛ tɔkɛnyɔ. Onde onto kokaka ndjala l’ɔngɛnɔngɛnɔ lo monga l’eyango wa lo nyuma? Tɔsɛdingole ɛtɛkɛta ɛnɛ waki omembi w’esambo wata ɔnɛ: “Olembe wa [Jehowa] eli ololo tshe, vo watululaka utema; Aui wa [Jehowa] weli shikaa, watushaka enginya yimba. . . . Elembe wa [Jehowa] weli pudipudi, watosenyaka ashu.” (Osambu 19:7, 8) Ɔtɛkɛta wa Nzambi mbeyaka kimanyiya “enginya” dia nde sala akambo la lomba, ‘lo mbɔsɛnya washo.’ Eelo, wɛ koka ngɛnangɛna l’akambo wa lo nyuma. Ko kakɔna kakoka kokimanyiya dia wɛ ngɛnangɛna akambo wa lo nyuma na? Lende ahombayɛ tatɛ?

Tshutshuyama dia kambɛ Nzambi

Ntondotondo, wɛ pombaka tshutshuyama. Tɔshi ɛnyɛlɔ kaki Nkumekanga ka dikɛnda ka la Juda le Josiya. Lam’akawashola Buku di’Ɛlɛmbɛ wa Jehowa lo tɛmpɛlɔ, Josiya akadjanga dia vɔ mbadiɛ awui wa lɔkɔ ndo otema ande wakanandema efula oma lo kɛnɛ kakandôke. Oma lɔkɔ, “Josiya akanya akambu tshe wa wononyi uma lu wedja tshe w’asi Isariyele.” (2 Ekondo 34:14-21, 33) Wadielo w’Ɔtɛkɛta wa Nzambi akatshutshuya Josiya dia nyomoleka tɔla ɔtɛmwɛlɔ wa mɛtɛ otsha la ntondo.

Ndo wɛ lawɔ kokaka kombola kambɛ Jehowa lo mbadiaka Bible mbala la mbala ndo lo kanaka yimba la kɛnɛ kadiayɛ. Dui sɔ mbakayotshutshuyaka Hideo. Nde akatatɛ mbekesanɛ efula l’ombatshi mboka ɔmɔtshi waya opalanga, mbut’ate Ɔmɛnyi wa Jehowa wakambɛ Jehowa olimu wa lo tena tshɛ. Ombatshi mboka ɔsɔ aki ombeki w’etete wa Bible ndo nde akasalaka la wolo dia kamba la wetshelo w’oma lɔkɔ lo lɔsɛnɔ lande. Oko wakandakeketshama efula oma l’ɛnyɛlɔ k’ombatshi mboka ɔsɔ, Hideo akayotatɛka mbeka Bible ndo kamba la wetshelo w’oma lɔkɔ ndo akayongaka la nsaki k’efula ka kambɛ Jehowa ndo anto akina. Ohamelo ande wa lo nyuma akayokonya dia nde monga la lɔsɛnɔ lele l’oyango ɔmɔtshi.

Wadielo wa Bible wa lushi la lushi kokaka keketsha ɛlɔngɔlɔngɔ l’esekaseka. Takahiro mbutaka ate: “Oyadi lakashidi ndala ko lamboyohɔ dia latasale wadielo ami wa Bible, dimi pombaka mbetɔ dia kiada. Lo sala ɔsɔku, dimi mbokaka dia lekɔ lo nɔmbwama oma le Jehowa. Wadielo wa Bible wa lushi la lushi akakimanyiya efula dia dimi pama lo nyuma. Oko wakamɔshi yɛdikɔ ya nyomoleka ndjasha l’olimu wa Jehowa, dimi lakatatɛ kamba olimu w’ombatshi mboka wa pondjo yema tshitshɛ l’ɔkɔngɔ wa dimi shidiya kalasa ka sekɔndɛrɛ. Ndo lekɔ lo ngɛnangɛna olimu ɔsɔ heyama.”

Lâdiko wa wadielo wa Bible, kakɔna nto kakoka keketsha nsaki kele layɛ ka tombola Jehowa? Tomohiro aketshama akambo wa mɛtɛ wa lo Bible oma le nyango. Nde mbutaka ate: “Paka l’ɔkɔngɔ wa dimi shidiya la mbeka dibuku La vie a bien un but lâsɔ ko lele l’ɛnɔnyi 19 mbakayonandemaka otema ami la ngandji ka Jehowa ndo l’olambo wa tshungo waki Yeso. Lowando laki lami lo ngandji ka Jehowa lakatshutshuya dia dimi nyomoleka ndjasha l’olimu ande.” (2 Koreto 5:14, 15) L’ɛnyɛlɔ kaki Tomohiro, ɛlɔngɔlɔngɔ l’esekaseka efula keketshamaka dia pama lo nyuma lo salaka wekelo wa dimɛna w’onto ndamɛ wa Bible.

Ko ayoyosala naka polo nd’etena kɛnɛ wɛ atonge la nsaki k’oma k’ɛse otema ka kambɛ Jehowa na? Onde ekɔ onto ɔmɔtshi lakokayɛ nɔmba ekimanyielo? Ɔpɔstɔlɔ Paulo akafunde ate: “Ne dia Nzambi katukambaka l’etema anyu, dia nyu nanga la ntsha lulangu landi.” (Filipi 2:13) Naka wɛ nɔmba Jehowa dia nde kokimanyiya, kete la ngandji tshɛ nde ayokosha nyuma kande k’ekila, kayokokimanyiya aha tsho dia wɛ ‘mbɔsa yɛdikɔ mɔtshi’ koko nto dia wɛ ‘nanga mbɔsa yɛdikɔ yakɔ.’ Kɛsɔ nembetshiyaka dia nyuma k’ekila kaki Nzambi kayolomialomia nsaki kele layɛ ka nyomoleka ndjasha l’olimu waki Jehowa ndo tɔ kayokokimanyiya dia wɛ pama lo nyuma. Lo weho akɔ tshɛ, yaɛkɛ lo wolo waki Jehowa ndo keketsha otema ayɛ!

Yadjɛ eyango

Naka wɛ amboyashikikɛ dia nyomoleka kambɛ Jehowa, kete ekɔ ohomba wɛ ndjadjɛ eyango ɛmɔtshi dia wɛ pama lo nyuma. Osekaseka ɔmɔtshi welɛwɔ Mana akate ate: “Ndjadjɛ eyango aki dikambo diakakimanyiya efula. Lo dihole dia takawolaka otsha l’ɔkɔngɔ, dimi lakayongaka l’akoka wa pama otsha la ntondo la dihonga tshɛ. Aha la mbohɛ eyango wele lami, dimi lakalɔmbɛ Jehowa l’otema ɔtɔi dia nde nɔmbɔlami, ndo lakonge l’akoka wa pama aha la yimba yami mbekekɔ l’awui akina.”

Wɛ pombaka ndjadjɛ eyango w’amɛna ndo wakokayɛ kotsha. Mbadiaka tshapita ɔtɔi ya Bible lushi tshɛ mbeyaka monga oyango ɔmɔtshi wa dimɛna wakokayɛ ndjadjɛ. Wɛ kokaka nto mbɔsa oyango wa tatɛ salaka eyangelo. Lo dikambo sɔ, tekɔ l’ehomɔ kɛmɔtshi k’eyangelo katanema l’Angɛlɛ, lɔkɔ, wɛ mbeyaka mbeka waonga waki Jehowa wɔlɔngami l’ɛse k’ɔtɛ a dui wahɔnyi wata ɔnɛ: “Les qualités par Nom” l’ɛse ka lokombo “Jehovah” lo Index des publications de la Société Watch Tower. Ekɔ la mbɔtwɛlɔ ndekana 40 yakokayɛ sɛdingola, ndo aha la tâmu eyangelo ɛsɔ wayoleka kosukanya le Jehowa ndo kotshutshuya dia wɛ nyomoleka mbokambɛ. Ekɔ eyango ekina wakokayɛ ndjadjɛ dia kotsha, oko dia mbishaka kânga kɔmatɛrɛ ɔtɔi lo losanganya l’Akristo tshɛ lalɔmbama di’ampokami mbisha kɔmatɛrɛ, nyanga dia l’oseka losanganya tshɛ wɛ mbeya os’etshumanelo ɔmɔtshi dimɛna dimɛna, ndo sala di’aha mbetsha lushi aha la nɔmba Jehowa ndo mbewoya anto akina dikambo diande.

Naka wɛ atafundja lokombo lo Kalasa k’Olimu wa Teokrasi, ɔsɔ mbeyaka monga oyango wa dimɛna le yɛ. Onde wɛ ambotatɛka la sambisha lo sɛkɛ? Naka kema, ondo wɛ koka sala wolo dia koma opandjudi wah’atabatizama. Sɛdingola dimɛna diɔtɔnganelo diasayɛ la Jehowa, oma lâsɔ ko wɛ ndjakimɔ le nde. Ɛlɔngɔlɔngɔ l’esekaseka efula salaka la wolo dia sɛna lo yoho yɔtɔnɛ la ndjakimɔ kawɔ lo kamba olimu wa lo tena tshɛ.

Kânga mbele ekɔ ohomba ndjadjɛ eyango lo lɔsɛnɔ, paka wɛ mbewɔ yimba ya shɛmanedi. Wɛ ayotana ɔngɛnɔngɛnɔ w’efula oma lo kɛnɛ kasalayɛ, naka wɛ hayaɛdiki l’anto akina.​—⁠Ngalatiya 5:26; 6:⁠4.

Ondo wɛ ndjaokaka diele oko wɛ bu l’akoka ndo wɛ mɛnaka wolo ndjadjɛ eyango w’amɛna. L’etena kɛsɔ, yela dako nɛ diele lo Bible: “Uhuke tui, ulungaki aui wa kanga yimba.” (Tukedi 22:17) Lɔmba ekimanyielo le ambutshi ayɛ kana le Akristo wambotshunda. Ambutshi ndo anto akina pombaka monga l’ekanelo k’ɔlɔlɔ ndo kiɔkɔ y’ekeketshelo lo dikambo sɔ. Ɛlɔngɔlɔngɔ l’esekaseka mbeyaka shisha ɔngɛngɔngɛnɔ naka vɔ sala la wolo dia kotsha eyango wowadje anto akina ndo dikambo sɔ mbeyaka ndjɛnya diele oko bu ohomba ndjadjɛ eyango. Kɛsɔ mbakakomɛ osekaseka ɔmɔtshi lakate ate: “Ambutshi ami wakambidjɛ eyango efula, ɛnyɛlɔ oyango wa fundja lokombo lo Kalasa k’Olimu wa Teokrasi, sambisha, nongola batismu ndo koma ombatshi mboka. Lakasale la wolo tshɛ dia kotsha eyango ɛsɔ tshɛ. Etena kakamakotshaka oyango ɔmɔtshi, ambutshi ami komandolakami, koko wakambidjɛka oyango okina wakamahombe kotsha. Ɔnkɔnɛ, lakokaka dia wekɔ lo tshutshuyami la wolo dia kotsha eyango ɛsɔ. Dimi lakahekɔ ndo lakɛnyi di’ekɔ anyanya mbakotsha.” Naa kɔlɔ kaki la dikambo sɔ na? Eyango ɛsɔ tshɛ waki eyango w’amɛna koko aha ndamɛ mbakayadjɛwɔ. Dia wɛ tondoya, wɛ pombaka tshutshuyama dia wɛmɛ ndjadjɛ eyango!

Ohokanyiya dikambo diaki Yeso Kristo. Lam’akandaye lanɛ la nkɛtɛ, nde akeyaka kɛnɛ kakalongamɛka Jehowa She, oma le nde. Sala lolango laki Jehowa komonga tsho oyango ɔmɔtshi wakahombe Yeso kotsha, koko aki olimu wakandahombe kamba. Ngande wakɔshi Yeso olimu ɔsɔ na? Nde akate ate: “Ma diami, dieli ntsha lulangu la one lakantumi, la dia nshidiya ulimu andi.” (Joani 4:34) Yeso akangɛnangɛnaka sala lolango laki Jehowa ndo akakotsha kɛnɛ tshɛ kakalongamɛka She oma le nde. Sala lolango laki Nzambi aki oko diangɔ dia ndɛ le Yeso, ndo nde akokaka ɔlɔ ndo akangɛnangɛnaka dia shidiya olimu wakawawosha. (Heberu 10:5-10) Ndo wɛ lawɔ kokaka tana ɔngɛnɔngɛnɔ naka wɛ tshutshuyama l’otema ɔtɔi dia sala kɛnɛ kakokeketsha ambutshi ayɛ dia sala.

Tohekɔke sala kɛnɛ kele ɔlɔlɔ

Naka wɛ amboyadjɛ oyango ɔmɔtshi, sala la wolo dia mbôkotsha. Ngalatiya 6:9 mbutaka ɔnɛ: “Tatuhekoki dia ntsha ditshelu di’ololo, ne dia tayuna lu eleku ka muna, naka hatuheko.” Toyaɛkɛke lo wolo ayɛ hita. Wɛ mbeyaka pomana l’ekakatanu ndo tena dimɔtshi wɛ mbeyaka mboka lo tshanda mɔtshi dia wɛ ambɔkɔmɔ. Koko Bible toshikikɛka ɔnɛ: “[Endɛka le Nzambi] lu akambu aye tshe, ku ndi ayukolongoswela mbuka yaye.” (Tukedi 3:⁠6) Jehowa ayokosukɛ naka wɛ kamba la wolo dia kotsha eyango ayɛ wa lo nyuma.

Eelo, lo monga la nsaki ka kambɛ Jehowa ndo lo ndjadjɛ eyango wa lo nyuma, wɛ ayonga l’akoka wa sala di’‘ehamelo kayɛ mɛnama le anto tshɛ.’ (1 Timote 4:15) Oma lâsɔ wɛ ayonga la lɔsɛnɔ lele l’oyango wa dimɛna, la kambɛ Nzambi.

[Osato wa lo lɛkɛ 31]

Mbadia Bible ndo kana yimba la kɛnɛ kadiayɛ ayokokeketsha dia wɛ kambɛ Jehowa

[Osato wa lo lɛkɛ 32]

Yeso akakotsha kɛnɛ kakalongamɛka She oma le nde