Ɛlɔngɔlɔngɔ, Naa Eyango Anyu Wa Lo Nyuma Na?
1 Jehowa mbeyaka woho wonga onto l’ɔngɛnɔngɛnɔ l’olimu wa dimɛna ndo waha la wekamu. (Enda lo Etatelu 1:28; 2:15, 19.) Nshi yaso nyɛ, nde ambosha ekambi ande lotumu la sambisha ndo mbetsha. Tekɔ ndo l’oyango wa komelo wa kondja lɔsɛnɔ la pondjo lo Paradiso. La tokomaka lɛsɔ, sho pombaka ndjadjɛ eyango wa lo nyuma watakotshaka yema yema naka sho nangaka kamba la wolo wele laso ndo l’ekundji aso lo yoho y’ɔlɔlɔ.—1 Kor. 9:26.
2 Eyango w’Eshika le Ɛlɔngɔlɔngɔ: Ɛlɔngɔlɔngɔ wotohomba monga l’eyango wa Teokrasi wasungana l’akoka w’onto l’onto. (1 Tim. 4:15) Tɔkɛndakɛnda tɔmɔtshi takakotsha oyango wa mbeya lokombo la dibuku tshɛ dia lo Bible la ntondo ka vɔ mbeya kânga mbadia. L’ekimanyielo ka wekelo wa lo nkumbo, ana mbekaka woho wa nɔngɔsɔlaka nsanganya l’oweso wa mbisha ekadimwelo w’eshika ndo dia fundja nkombo yawɔ lo Kalasa k’Olimu wa Teokrasi. Lam’atshindɛwɔ ambutshi awɔ l’esambishelo, vɔ mbekaka woho wa kamba olimu wa sambisha ndo vɔ pamaka dia koma apandjudi wahatabatizama. Ekɔ dimɛna dia ambutshi sawolaka l’anawɔ tena la tena lo dikambo dia oyango wa ndjakimɔ le Nzambi ndo batizama.
3 Naka wɛ êke l’ɛnɔnyi dikumi l’ɛmɔtshi, naa eyango wa lo nyuma wayadjɛyɛ na? ‘Ohɔke Otungi ayɛ wa Woke’ lo mbidjaka yimba yayɛ tshɛ l’eyango wele mɛtɛ ohomba lo lɔsɛnɔ. (Und. 12:1; Osam. 71:17) Lande na kahayonge ombatshi mboka wa tshanda lo nshi ya vakashi na? Onde wɛ ambokanyiyaka dia kamba olimu wa lo tena tshɛ lo monga ombatshi mboka wa pondjo? Ko akanayɛ dia mbeka ɔtɛkɛta ɔmɔtshi w’angɛndangɛnda woho wa wɛ ndjokimanyiya olui ɔmɔtshi kana etshumanelo kɛmɔtshi katɛkɛta ɔtɛkɛta akɔ w’angɛndangɛnda l’etenyi kanyu ka nkɛtɛ kana lo dihole dikina? Efula k’anangɛso l’akadiyɛso wakamba ɛlɔ kɛnɛ lo Bɛtɛlɛ kana oko emendji weteta kana misiɔnɛrɛ, wakayadjɛ oyango wa kamba olimu wa lo tena tshɛ lam’akiwɔ wakɔtɔ kalasa. Lande na kahayawaokoya na?
4 Nyu wanɛ wakadjɔ awɛlɛ, nyoyatshutshuya dia mbokoya ɛnyɛlɔ ka Yeso. Kânga lam’akinde êke l’ɛnɔnyi 12, nde akatɛkɛtaka akambo wa lo nyuma oko opalanga w’onto. (Luka 2:42-49, 52) Naka nyu ndjadjɛ eyango w’ɔlɔlɔ wayonyosokoya lo salaka wekelo w’onto ndamɛ, lo mbadiaka Bible lushi tshɛ ndo lo nyangaka dia mongaka wonya tshɛ l’Akristo wambotshunda wɔɔngɔ lo nsanganya ndo l’olimu w’esambishelo, kete nyayeka awui efula oma le wɔ wayonyokimanyiya dia nyu mbetsha anto akina dikambo dia Diolelo diaki Nzambi, oko akasale Yeso.