Ɛlɔngɔlɔngɔ l’esekaseka wangɛnyangɛnya otema wa Jehowa

Asawo wa wekelo anɛ wakalɔngɔswama lo yoho ya lânde dikambo di’ɛlɔngɔlɔngɔ l’esekaseka wele l’atei w’Ɛmɛnyi wa Jehowa. Ɔnkɔnɛ, tambokeketsha ɛlɔngɔlɔngɔ l’esekaseka dia vɔ nɔngɔsɔla asawo wa wekelo anɛ dimɛna efula ndo mbisha kɔmatɛrɛ efula etena kayowekama lo Wekelo wa Tshoto y’Etangelo wa l’etshumanelo.

“On’ami, uyali kanga yimba, ongenyangenya utema ami. Ku dimi layeya nkaluya diui le one latomonyolaka.”​—TUKEDI 27:11.

1, 2. (a) Ɛnya woho wele naka onto kotɔma yema lo diangɔ dia l’andja ɔnɛ hɛnya dia nde hasungana monga Okristo. (Romo 7:21) (b) Wetshelo akɔna wamboyokondja oma l’ɛnyɛlɔ kaki Asafu? (Enda lo kiombo ya lo lɛkɛ 7.)

OHƆSA dia wɛ ekɔ lo nanga somba ahɔndɔ lo makashinyi. Etena kendayɛ ahɔndɔ wohanewɔ, wɛ ambɛna dihɔndɔ dimɔtshi diambokɔngɛnyangɛnya mbala kakɔ ɔtɔi. Mɛnamaka dia dangi dia dihɔndɔ diakɔ, woke ndo otale adiɔ mbɛdima la yɛ, ndo diekɔ oshinga dimɛna. Koko, l’ɔkɔngɔ wa wɛ disɛdingola dimɛna, wɛ ambamba heyama. Wɛ amboshola dia tokoma ta dihɔndɔ diakɔ tambolana ndo diɔ kɔtɛlama dimɛna l’ehembo. Kânga mbediɔ dimɛna lo washo, dihɔndɔ diakɔ kɔtɛlama dimɛna. Onde wɛ ayetawɔ shisha falanga yayɛ dia somba dihɔndɔ diele bu dimɛna sɔ?

² Ohɛdika dikambo sɔ la lɔsɛnɔ layɛ oko weyɛ Okristo w’ɔlɔngɔlɔngɔ kana w’osekaseka. Naka wɛ mboka sso l’andja ɔnɛ, kete wɛ ayɛna dia diangɔ dia lɔkɔ diekɔ amɛna efula oko dihɔndɔ diohanewɔ lo makashinyi sɔ. Ɛnyɛlɔ, asekayɛ wa la kalasa mbeyaka ntshɔ lo waa fɛtɛ mɔtshi y’ɔngɛnɔngɛnɔ efula, nnɔ dinɔnɔ dia wolo, wanu, alaka wa kashi watanɛwɔ lo kɛnɛ kendana la tshuki ndo ndjasha l’akambo wa dieyanelo la ntondo ka vɔ tshukana. Onde tena dimɔtshi wɛ kombolaka yoho ya lɔsɛnɔ ya ngasɔ? Onde wɛ kombolaka dia ndɛta yema kɛnɛ kelɛ anto asɔ ɔnɛ lotshungɔ? Naka ngasɔ mbediɔ, kete tɔsake esadi eto dia wɛ ekɔ otshi wa kɔlɔ ndo ɔnɛ wɛ hasungana monga Okristo. Bible mbutaka di’andja ɔnɛ koka monga la shɛngiya ya wolo efula kânga le anto walanga ngɛnyangɛnya Nzambi.​—2 Timote 4:10.

3. (a) Bonde kele ekɔ kɔlɔ ndjasha l’awui wa l’andja ɔnɛ? (b) Ngande wakɛnya Okristo ɔmɔtshi kɔlɔ kaya oma lo ndjasha l’eyango wa l’andja ɔnɛ?

³ Lam’alangɛ, ohɔsɛdingola kakianɛ diangɔ dia l’andja ɔnɛ dimɛna dimɛna, oko woho wakokayɛ sɛdingola dihɔndɔ diakayalange somba. Yambola wate: ‘Kakɔna k’ɔlɔ kele lo dikongɛ nɛ di’akambo na?’ Bible mbutaka di’‘andja ɔnɛ wekɔ lo tete.’ (1 Joani 2:17) Ɔngɛnɔngɛnɔ tshɛ wakoka ndja oma l’andja ɔnɛ ekɔ wa tshenyitenyi. Ndo nto, lɔkɛwɔ lahɔtɔnɛ la lolango laki Nzambi mbelaka etombelo wa kɔlɔ efula. Ndoko ɔlɔlɔ wakokaso kondja oma lo lɔkɛwɔ la ngasɔ. Okristo ɔmɔtshi wakadiɛnɛ la kɛnɛ kakandelɛ ɔnɛ “asui w’oma lo woho wakandakambe la nshi yande y’osekaseka lo yoho ya kɔlɔ” akate ate: “Akambo wa l’andja ɔnɛ mbeyaka mɛnama oko wekɔ amɛna efula. Ndo andja nangaka ketawoya dia wɛ koka ndjasha l’ɛngɛnɔngɛnɔ wa lɔkɔ aha la wâle. Koko dikambo sɔ bu mɛtɛ. Andja wayokamba la yɛ, ndo l’ɔkɔngɔ wa vɔ shidiya kamba la yɛ, vɔ wayokokadja.”a Lande na kahombayɛ mbetsha nshi yayɛ y’ɔlɔngɔlɔngɔ kana y’osekaseka lo yoho ya lɔsɛnɔ ya kɔlɔ ya ngasɔ na?

Ekokelo oma le ‘kanga kɔlɔ’

4, 5. (a) Kakɔna kakalɔmbɛ Yeso lo dɔmbɛlɔ diakandasale otsha le Jehowa yema tshitshɛ la ntondo ka nyɔi kande? (b) Bonde kele ɔsɔ aki dɔmbɛlɔ di’oshika?

⁴ Oko weyawɔ dia ndoko k’ɔlɔ kayowasha andja ɔnɛ, ɛlɔngɔlɔngɔ l’esekaseka wele l’atei w’Ɛmɛnyi wa Jehowa salaka la wolo tshɛ dia mbewɔ lɔngɛnyi la l’andja ɔnɛ. (Jakoba 4:4) Onde wɛ ekɔ ɔtɔi ɔmɔtshi l’atei w’ɛlɔngɔlɔngɔ l’esekaseka wele la kɔlamelo? Naka ngasɔ mbediɔ, kete wɛ pombaka mandɔma. Ekɔ mɛtɛ dia shika tanga la ntondo ka tɔsɛngiya t’asekayɛ ndo monga la dionga diotshikitanyi la wɔ bu dikambo dia wɔdu, koko onto lakoka kokimanyiya ekɔ.

⁵ Yema tshitshɛ la ntondo ka nyɔi kande, Yeso akalɔmbɛ Jehowa dia ‘kokɛ’ ambeki ande ‘oma l’anya wa kanga kɔlɔ.’ (Joani 17:15) Yeso akasale dɔmbɛlɔ sɔ l’ɔkɔkɔ w’oshika. Nde akeyaka ɔnɛ tshikala la kɔlamelo hatonga dikambo dia wɔdu le ambeki ande, oyadi w’epalanga kana w’akɛnda. Lande na? Ntondotondo, oko wakate Yeso, ambeki ande wayɔlɔshana l’otunyi wele la wolo efula wahɛnama, mbut’ate ‘kanga kɔlɔ,’ Satana Diabolo. Bible mbutaka ɔnɛ etongami ka kɔlɔ ka lo nyuma kɛsɔ ‘atetetaka oko kimbwe kadikita kayanga onto la nde ndɛ.’​—1 Petero 5:8.

6. Ngande weyaso dia Satana bu la kɛtshi otsha le ɛlɔngɔlɔngɔ l’esekaseka?

⁶ L’ɔkɔndɔ w’anto w’otondo, Satana ekɔ lo sala la wolo dia pɛnyahɛnya anto woho woleki tshɛ kɔlɔ. Ohokanyiya asui wa wolo wakasoya Satana Jɔbɔ nde la nkumbo kande. (Jobo 1:13-19; 2:7) Ondo wɛ mbohɔka akambo amɔtshi wambosalema lo nshi yeyɛ la lɔsɛnɔ wɛnya yimba ya ngala yele la Satana. Diabolo ekɔ lo mɔnganya la mayɛlɛ tshɛ dia minda onto ndo l’oyango ande ɔsɔ, nde bu kânga la yema ya kɛtshi tshitshɛ le ɛlɔngɔlɔngɔ l’esekaseka. Ɛnyɛlɔ, l’etatelo ka ntambe ka ntondo, Herɔdɛ akɔshi yɛdikɔ ya ndjaka ana w’apami tshɛ wa la Jerusalɛma waki l’ɛnɔnyi ehende kana l’ɛse ka lâsɔ. (Mateu 2:16) Ondo Satana mbakatshutshuya Herɔdɛ dia nde sala dikambo sɔ l’oyango wa ndjaka ɔna lakahombe ndjokoma lushi lɔmɔtshi Mɛsiya waki Nzambi wakalakema ndo mbela elomboyelo kaki Nzambi le Satana! (Etatelu 3:15) Mɛnamaka hwe dia Satana bu la ngandji otsha le ɛlɔngɔlɔngɔ l’esekaseka. Oyango ande woleki ele wa ndjakisha anto efula. Dikambo sɔ diekɔ mɛtɛ djekoleko ɛlɔ kɛnɛ nɛ dia Satana akakashema oma l’olongo oya lanɛ la nkɛtɛ la ‘nkɛlɛ ka wolo ndo nde mbeyaka dia nde ekɔ l’etena ka mondo keto.’​—Enyelo 12:9, 12.

7. (a) Ngande wotshikitanyi Jehowa la Satana? (b) Kakɔna kalanga Jehowa lo kɛnɛ kendana la lɔsɛnɔ layɛ?

⁷ Otshikitanyi la Satana lele ‘la nkɛlɛ k’efula’ Jehowa ekɔ la “ketshi ka mamba.” (Luka 1:78) Nde mbokaka anto ngandji lo yoho yoleki tshɛ. Lo menda woho wɛnya Otungi aso dionga dia woke sɔ lo yoho yoleki tshɛ, Bible mbutaka ɔnɛ: “[Nzambi] eli ngandji.” (1 Joani 4:8) Otshikitanu wekɔ mɛtɛ lam’asa jambizambi ya dikongɛ di’akambo nɛ la Nzambi keyɛ la diɛsɛ dia tɛmɔla! Etena kele Satana nyangaka onto la nde ndjaka, Jehowa lo wedi ande “halangi nduku [onto] nshisho.” (2 Petero 3:9) Nde mbɔsaka dia lɔsɛnɔ l’onto tshɛ lekɔ la nɛmɔ efula, mbidja ndo lakiyɛ. Etena kakotɛ Jehowa lo tshimbo y’Ɔtɛkɛta ande diaha wɛ monga onto la l’andja ɔnɛ, nde hayange dia koshimba ɔngɛnɔngɛnɔ kana susa lotshungɔ lakiyɛ. (Joani 15:19) Koko nde ekɔ lo kokokɛ dikambo dia kanga kɔlɔ. Shɔ lele l’olongo nangaka dia wɛ kondja ɛngɔ kɛmɔtshi koleki ɛngɛnɔngɛnɔ wa tshanda tsho wa l’andja ɔnɛ. Kɛnɛ kakombolande ekɔ dia wɛ monga la ‘lɔsɛnɔ l’oshika,’ mbut’ate lɔsɛnɔ la pondjo lo paradiso ka la nkɛtɛ. (1 Timote 6:17-19) Jehowa nangaka dia wɛ monga la lɔsɛnɔ la dimɛna, ndo nde kolakaka dia wɛ kotsha oyango ɔsɔ. (1 Timote 2:4) Ndo nto, Jehowa ekɔ lo keta lo yoho ya lânde. Naa leeta lɔsɔ na?

“Ongenyangenya utema ami”

8, 9. (a) Woshasha akɔna wakokayɛ mbisha Jehowa? (b) Ngande wɔnyɔla Satana Jehowa oko wakadiɛnyama lo dikambo diaki Jɔbɔ?

⁸ Onde wɛ atashaka ɔngɛnyi ayɛ ɔmɔtshi woshasha ko wɛ mɛna ɔmɔnɔmɔnɔ wa shashimoya l’elungi kande ndo lowando lo woho wowoshayɛ woshasha akɔ? Ondo wɛ akakanyiya efula ndo l’etena k’otale ndo akasale la wolo dia tana ɛngɔ kakoka mbɔngɛnyangɛnya. Kakianɛ, ohokana yimba la wombola ɔnɛ: Woho akɔna wa woshasha wakokayɛ mbisha Otungi ayɛ, Jehowa Nzambi na? Ntondotondo, kanyi shɔ mbeyaka mɛnama oko anyanya. Kakɔna kahomba Kanga-Nkudu-Tshɛ nongamɛ oma le onto na? Kakɔna kakokayɛ mbosha kende bu latɔ? Bible kadimolaka lo wembola ɛsɔ lo Tukedi 27:11 ɔnɛ: “On’ami, uyali kanga yimba, ongenyangenya utema ami. Ku dimi layeya nkaluya diui le one latomonyolaka.”

⁹ Oko wadieyayɛ oma lo wekelo ayɛ wa Bible, ekɔ Satana Diabolo mbɔnyɔla Jehowa. Nde mbutaka di’onto tshɛ lakambɛ Nzambi hasale dikambo sɔ la ngandji, koko l’ɔtɛ wa wahɔ wakondjande. Satana akafune dia naka ekambi waki Nzambi mpinama wolo kete vɔ wayotona ɔtɛmwɛlɔ wa mɛtɛ esadi eto. Ɛnyɛlɔ, ohenda kɛnɛ kakatɛ Satana Jehowa lo dikambo dia Jɔbɔ, pami ka losembwe ate: “We kumbudinga lukumbu dia mbulama, ndi la wa lu luudu landi la diango diandi tshe? We akatshokola ulimu w’anya andi, dungalunga diandi diambufulanela la kete. Keli uhusimbula lunya laye kakiane, unandi kene tshe keli la ndi. Mete, ndi ayukoseka kaku.”​—Jobo 1:10, 11.

10. (a) Ngande weyaso dia tâmu takadje Satana lo kɛnɛ kendana la kɔlamelo yaki anto kokomɛ paka le Jɔbɔ? (b) Ngande wendanayɛ la dikambo dia lowandji la l’andja w’otondo?

¹⁰ Oko wadiɛnya Bible, Satana akadje tâmu aha tsho dia kɔlamelo yaki Jɔbɔ, koko ndo dia kɔlamelo y’anto tshɛ wakambɛ Nzambi, mbidja ndo kɔlamelo yakiyɛ. Lam’akandatɛkɛtaka lo kɛnɛ kendana l’anto tshɛ, Satana akatɛ Jehowa ate: “Kene tshe keli la untu [aha paka Jɔbɔ oto koko onto tshɛ], ndi nkikimoka ne dia lumu landi.” (Jobo 2:4) Onde wɛ mɛnaka woho wendanayɛ la dikambo di’ohomba efula sɔ? Oko wɛnyamidiɔ lo Tukedi 27:11, Jehowa mbutaka dia ekɔ ɛngɔ kɛmɔtshi kakokayɛ mbosha, ɛngɔ kakɔ ko okadimwelo wa nde mbisha ɔnɛ lawɔnyɔla, mbut’ate Satana. Ohokanyiya yema, Owandji waheme andja w’otondo ekɔ lo kɔlɔmba dia wɛ mbisha okadimwelo lo dikambo dioleki ohomba lo tena tshɛ. Ɔsɔ ekɔ mɛtɛ ɔkɛndɛ ndo diaaso dia lânde le yɛ! Onde wɛ koka kotsha kɛnɛ kakɔlɔmba Jehowa? Jɔbɔ akakikotsha. (Jobo 2:9, 10) Yeso ndo lokema l’anto akina wa l’ɔkɔndɔ w’anto wakakotsha dikambo sɔ, mbidja ndo ɛlɔngɔlɔngɔ l’esekaseka efula. (Filipi 2:8; Enyelo 6:9) Wɛ lawɔ koka sala woho akɔ wâmɛ. Koko tohɛke dia, ndoko onto latanema l’atei atei lo dikambo sɔ. Oma l’etsha ayɛ, wɛ ayɛnya dia wɛ ekɔ lo sukɛ diɔnyɔ diaki Satana kana okadimwelo waki Jehowa. Wedi akɔna wayoyɔsɔna na?

Jehowa kokanɛka

11, 12. Onde ɔsɔnwɛlɔ ayɛ wa kambɛ Jehowa kana bu wekɔ la shɛngiya ya wolo efula le nde? Lembetshiya.

¹¹ Onde ɔsɔnwɛlɔ wayoyosala wekɔ ohomba lo washo wa Jehowa? Onde anto efula wambotshikala la kɔlamelo otsha le nde atakoke dia nde mbisha Satana okadimwelo wahombama? Mɛtɛ, Diabolo akate dia ndoko onto lakambɛ Jehowa la ngandji, ndo kashi ka dikambo sɔ kamboshilaka mɛnama. Koko, Jehowa nangaka dia wɛ mbeta lo wedi ande lo dikambo diendana la lowandji la l’andja w’otondo nɛ dia nde ndjakiyanyaka dikambo diayɛ lo yoho ya lânde. Yeso akate ate: “Shenyu leli l’ulungu halangi nduku kiendakenda mvo.”​—Mateu 18:14.

¹² Lo mɛtɛ, Jehowa ndjakiyanyaka lo kɛnɛ kendana l’ɔsɔnwɛlɔ wayoyosala. Kɛnɛ koleki ele, nde mendanaka l’ɔsɔnwɛlɔ akɔ. Bible mɛnyaka hwe dia Jehowa ndjakiyanyaka efula dikambo di’etombelo w’oma l’etsha w’ɔlɔlɔ kana wa kɔlɔ wasala anto. Ɛnyɛlɔ, etena kakatɔmbɔkɔka ase Isariyɛlɛ mbala la mbala, Jehowa ‘akanyangaka.’ (Osambu 78:40, 41) La ntondo ka Mvula k’Elola ka lo nshi ya Nɔa, etena ‘kakafulanɛ kɔlɔ k’anto ,’ Jehowa “akanyangi efula.” (Etatelu 6:5, 6) Ohokanyiya ohomba wa dikambo sɔ. Naka wɛ sɔna yoho ya lɔsɛnɔ ya kɔlɔ, kete wɛ ayonyangiya Otungi ayɛ. Kɛsɔ halembetshiya dia Nzambi ekɔ wɔdu kana dia nde ekɔ kanga lonyangu. Koko nde kolangaka ndo ndjakiyanyaka dikambo di’ɔlɔlɔ ayɛ. Lo wedi okina, etena kasalayɛ kɛnɛ kele ɔlɔlɔ, wɛ ngɛnyangɛnyaka otema wa Jehowa. Nde ekɔ l’ɔngɛnɔngɛnɔ aha tsho lo woho wamboyokotsha lofulo l’ekadimwelo wahombande mbisha Satana, koko nɛ dia nde kokaka kosha ɛtshɔkɔ kakianɛ. Ndo kɛsɔ mɛtɛ mbayangande sala. (Heberu 11:6) Jehowa Nzambi ekɔ mɛtɛ Shɔ koludi la ngandji!

Ɛtshɔkɔ efula oma ko kakianɛ

13. Ngande wele kambɛ Jehowa mbelaka ɛtshɔkɔ oma ko kakianɛ na?

¹³ Aha paka lo nshi yayaye tsho mbakokayɛ kondja ɛtshɔkɔ waya oma lo kambɛ Jehowa. Ɛlɔngɔlɔngɔ l’esekaseka efula wele l’atei w’Ɛmɛnyi wa Jehowa wekɔ lo tshɔkwama ndo wekɔ lo kondja ɛngɛnɔngɛnɔ efula ɛlɔ kɛnɛ ndo vɔ kokaka kondja akambo asɔ mɛtɛ. Omembi w’esambo akafunde ate: “Adjangu wa [Jehowa] weli usimbwi, watongenyangenyaka utema.” (Osambu 19:8) Jehowa ndeka mbeya kɛnɛ koleki ɔlɔlɔ le so oleki oseka onto tshɛ. Jehowa akate lo tshimbo y’omvutshi Isaya ate: “Dimi leli [Jehowa, Nzambi k]aye, latuketshaka dia we nduwana. Ndu latukolombolaka lu mbuka kahumbaye ntsho. Utunduyala we akalungi elembe ami, tshiki ki kaye kutuyala utamanya, la sambu kaye k’ololo kutuluwana otekoya.”​—Isaya 48:17, 18.

14. Ngande wakoka atɔndɔ wa lo Bible kokimanyiya dia wɛ mbewɔ pâ kaya oma l’abasa?

¹⁴ Kitanyiya atɔndɔ wa lo Bible ayokokimanyiya dia wɛ mbewɔ lonyangu ndo ekiyanu. Ɛnyɛlɔ, Bible mbutaka dia wanɛ wakonge la ngandji ka falanga “wakayatshatsha la nyangu ya wulu efula.” (1 Timote 6:9, 10) Onde osekayɛ ɔmɔtshi ambohomɔka akambo wɛnya mɛtɛ k’avɛsa anɛ? Ɛlɔngɔlɔngɔ l’esekaseka ɛmɔtshi wakakama abasa efula l’ɔtɛ wakawayange dia paka somba dihɔndɔ di’oshinga wolo kana ɛngɔ kekina kele lo modɛ nshi nyɛ dia vɔ monga anto wa lokumu. Mbɔsa abasa w’efula, wayofutama la wahɔ l’etena k’otale dia somba diangɔ dieyɛ mɛtɛ bu l’akoka wa disomba ekɔ yoho mɔtshi ya lɔhɔmbɔ ya kɔlɔ efula!​—Tukedi 22:7.

15. Lo woho akɔna wakoka atɔndɔ wa lo Bible kokokɛ oma lo pâ kaya oma l’etombelo wa kɔlɔ w’oma l’awui wa dieyanelo?

¹⁵ Tende nto dikambo di’awui wa mindo wa dieyanelo. L’andja w’otondo, lofulo laheyama mbadia l’esekaseka wahatatshukama weke l’ɛnɔnyi dikumi l’ɛmɔtshi wekɔ lo ntshɔ waemi ɔnɔnyi tshɛ. Amɔtshi mbotaka ana wele vɔ bu oyadi la saki kana l’akoka wa mbaodia. Akina tondjaka waemi ndo ndjongaka la nkum’otema kele bu ki. Ndo ekɔ ɛlɔngɔlɔngɔ l’esekaseka wakondja hemɔ yasambiyama oma l’awui wa dieyanelo, ɛnyɛlɔ oko SIDA. Le onto leya Jehowa, kɛnɛ koleki tshɛ kɔlɔ, ele olanelo wa diɔtɔnganelo diele lam’asande la Jehowa.b (Ngalatiya 5:19-21) Diakɔ diele mɛtɛ Bible mbutaka ɔnɛ: “Nyulawo munanyi.”​—1 Koreto 6:18.

Kambɛ ‘Nzambi k’ɔngɛnɔngɛnɔ’

16. (a) Ngande weyaso dia Jehowa nangaka dia wɛ ngɛnangɛna la nshi yayɛ y’ɔlɔngɔlɔngɔ kana y’osekaseka na? (b) Lande na kakɛnya Jehowa mboka kahombayɛ ndjela?

¹⁶ Bible mbutaka dia Jehowa ekɔ ‘Nzambi k’ɔngɛnɔngɛnɔ.’ (1 Timote 1:11) Nde nangaka dia wɛ lawɔ monga l’ɔngɛnɔngɛnɔ. Ɔtɛkɛta ande mbutaka ɔnɛ: “Olongo a pami [kana osekaseka] li, ongenangenaki lu nshi yaye y’olongolongo [kana y’osekaseka].” (Undaki 11:9) Koko Jehowa mɛnaka etale ndo mbeyaka mɛna la ntondo etombelo wa lɔkɛwɔ la dimɛna kana la kɔlɔ. Diakɔ diakolakande ate: “Uhoki utungi aye lu nshi yaye y’olongo a pami, ntundu nshi ya kolo yatakuki, ndu deku diatasukana diayuyuta wati: Dimi halongenangena ladio.”​—Undaki 12:1.

17, 18. Ngande wakɛnya osekaseka ɔmɔtshi w’Okristo ɔngɛnɔngɛnɔ wele lande lo woho wakambɛnde Jehowa, ndo ngande wakokayɛ tana woho akɔ w’ɔngɛnɔngɛnɔ?

¹⁷ Ɛlɔ kɛnɛ ɛlɔngɔlɔngɔ l’esekaseka efula wekɔ l’ɔngɛnɔngɛnɔ efula lam’akambɛwɔ Jehowa. Ɛnyɛlɔ, osekaseka ɔmɔtshi w’ɛnɔnyi 15 welɛwɔ Lina akate ate: “Lekɔ lo ndjaoka dimɛna efula ndo lekɔ lo ndjalɛnya. Lekɔ la demba dia dimɛna nɛ dia dimi hanɔ mfɔka kana nɔnɔ dia wolo. Lekɔ lo kondja ɛlɔmbwɛlɔ ka dimɛna l’etshumanelo, ɛlɔmbwɛlɔ kakimanyiya dia ndɔshanya la tɔsɛngiya ta kɔlɔ taki Satana. Dimi lekɔ wonya tshɛ l’elungi k’ɔngɛnɔngɛnɔ diɛsɛ oma lo lɔngɛnyi lakeketsha lele lo Mbalasa ka Diolelo. Kɛnɛ koleki ele lekɔ l’elongamelo koleki tshɛ dimɛna ka lɔsɛnɔ la pondjo.”

¹⁸ L’ɛnyɛlɔ kaki Lina, Akristo efula w’ɛlɔngɔlɔngɔ l’esekaseka wekɔ lo ndɔ tshondo ya ta dia nama mbetawɔ kawɔ, ndo dikambo sɔ mbashaka ɔngɛnɔngɛnɔ. Vɔ mbeyaka dia lɔsɛnɔ lawɔ, kânga mbakokalɔ ndola l’ekakatanu lo tena dimɔtshi, lekɔ l’oyango w’oshika ndo layonga dimɛna lo nshi yayaye. Tetemala la kambɛ Nzambi kayakiyanya mɛtɛ dikambo di’ɔlɔlɔ ayɛ. Ngɛnyangɛnya otema ande, ko nde ayotatɛ kɔngɛnyangɛnya tatɛ ɛlɔ kɛnɛ ndo pondjo pondjo!​—Osambu 5:11.

[Nɔte ya l’ɛse ka dikatshi]

Onde wɛ akohɔ?

• Wâle akɔna wele layɛ oma le ‘kanga kɔlɔ,’ Satana?

• Ngande wakokayɛ ngɛnyangɛnya otema wa Jehowa?

• Ngande wɛnya Bible dia Jehowa ndjakiyanyaka dikambo diayɛ?

• Naa ɛtshɔkɔ ɛmɔtshi waya oma lo kambɛ Jehowa?

[Kiombo/Osato wa lo lɛkɛ 7]

Pami k’ɔlɔlɔ ambohanda takɔ mboka

Asafu aki opomi wa mishiki wa lokumu wa lo tɛmpɛlɔ kaki Jehowa ka l’Isariyɛlɛ w’edjedja ndo nde aki ose Lɛwi. Nde akakome polo ndo lo tonga esambo ɛmɔtshi wakembama l’ɔtɛmwɛlɔ. Kânga mbakinde la diɛsɛ dia lânde di’olimu, Asafu akayokotwamaka etena kɛmɔtshi otsha lo lɔkɛwɔ la kɔlɔ l’asekande, wanɛ wakandɛnaka dia wekɔ lo mɔnyɔla ɛlɛmbɛ waki Nzambi aha la vɔ kondja dilanya. L’ɔkɔngɔ diko, Asafu akayosuyaka ate: “Ekulu ami wakahahoka, la akaka ami wakayangi nselo. Dimi lakuki dingalinga kandjema, lam’akamendaka lukulu l’olo lakahumo antu wa kolo.”​—Osambu 73:2, 3.

L’ɔkɔngɔ diko, Asafu akatshu lo ɛtɛmwɛlɔ kaki Nzambi ndo akalɔmbɛ lo kɛnɛ kendana la dikambo sɔ. Oko wakandayongaka nto l’akoka wa sɛdingola dikambo sɔ lo yoho ya lo nyuma, nde akayoshihodia dia Jehowa petshaka akambo wa kɔlɔ ndo ɔnɛ: anto wa kɔlɔ ndo anto w’ɔlɔlɔ wayona kɛnɛ kakawonɛ. (Osambu 73:17-20; Ngalatiya 6:7, 8) Lo mɛtɛ, anto wa kɔlɔ wekɔ lo nkɛtɛ y’ɔsɛlɔ. L’edjedja ka wonya, vɔ wayɔkɔ lam’ayolanya Jehowa dikongɛ nɛ dia kɔlɔ.​—Enyelo 21:8.

[Esato wa lo lɛkɛ 9]

Jehowa ekɔ lo ndjakiyanya efula dikambo di’ɔlɔlɔ wakiyɛ, koko oyango waki Satana ele wa kosalɛ kɔlɔ

[Osato wa lo lɛkɛ 10]

Ɛlɔngɔlɔngɔ l’esekaseka efula wekɔ l’ɔngɛnɔngɛnɔ woleki tshɛ lo woho wakambɛwɔ Jehowa kâmɛ l’asekawɔ Akristo