“Tanyokake woma, tanyateke asolo”

“Tanyukaki woma, tanyateki asulu. . . . [Jehowa] ayuyala la nyu.”​—2 EKONDO 20:17.

1. Etombelo akɔna wamonga la terɔrismɛ le anto ndo lande na kele mbokɛmaka dia vɔ kokaka monga la wɔma lo dikambo sɔ?

TERƆRISMƐ! Tshɛkɛta shɔ mbokiyaka anto wɔma, ndo mbakonyaka dia ndjaoka oko anto wele bu l’ekokelo ndo l’ekimanyielo. Yɔ mbishaka kanyi ya kandji, lonyangu ndo kɛlɛ. Ndo yɔ mbokiyaka anto efula wɔma lo kɛnɛ kendana la mpokoso kayowakomɛ lo nshi yayaye. Wɔma ɔsɔ wele l’anto ndja lo woho ɔnɛ wele aya ɛnɔnyi akumi walɔsha wedja ɛmɔtshi toho totshikitanyi ta terɔrismɛ aha la vɔ kondja etombelo w’amɛna efula.

2. Ngande wasala Ɛmɛnyi wa Jehowa lo dikambo nɛ diendana la terɔrismɛ, ndo eongelo kawɔ kɛsɔ monyiyaka wembola akɔna?

² Koko elongamelo k’oshika kekɔ. Ɛmɛnyi wa Jehowa wasambisha l’ohetoheto lo wedja 234 ndo lo bɛtshi dia nkɛtɛ wekɔ lo mɛna akambo la sso di’ɔlɔlɔ, mbut’ate wekɔ l’elongamelo kɛmɔtshi. Lo dihole dia vɔ mboka wɔma ɔnɛ terɔrismɛ hashilaki pondjo, vɔ wekɔ l’eshikikelo ɔnɛ ndoko edja terɔrismɛ ayanga shila. Onde ekɔ mɛtɛ dimɛna mɛna akambo la sso di’ɔlɔlɔ oko vɔ? Onto akɔna ayokoka tshungola andja lo pondjo oma lo sui sɔ ndo ngande wakoka salema dikambo sɔ? Lam’ele ondo woho ɔmɔtshi w’awui wa ngala wambotokomɛka sho tshɛ, ekɔ ohomba sho sɛdingola kɛnɛ kâtshutshuya dia monga l’elongamelo ka ngasɔ.

3. Kakɔna kakonya anto dia monga la wɔma, ndo kakɔna kakatama lo kɛnɛ kendana la nshi yaso nyɛ?

³ Ekɔ ɛkɔkɔ efula wotshikitanyi washa anto wɔma ɛlɔ kɛnɛ. Ohokanyiya dikambo di’efula k’anto wahayokoka ndjakokɛ l’ɔtɛ wayawɔ esombe wa lokosombe kana anto wele la wa hemɔ yahakɔnɔki ndo anto walɔ ta dia ta dia kondja diangɔ diele lawɔ ohomba lo lɔsɛnɔ. Ohokanyiya woho waya lɔsɛnɔ okandokando! Nyɔi ka shashimoya k’oma lo aksida kana mpokoso kɛmɔtshi mbeyaka ndanya esadi eto diangɔ tshɛ dialangaso kana ndjaka anto tshɛ wokaso ngandji. Wɔma ndo ekiyanu wa ngasɔ ndo lokema l’ewanu watomba lam’asa anto ambetɛ mɛtɛ nshi yasɛnaso nyɛ nshi yakate ɔpɔstɔlɔ Paulo ate: “Eyi wati: Lu nshi y’ekumelu, tena dia wulu diayuyala. Antu wayuyalanga, . . . wayuyala waha la ngandji ka mete, akanga w’ududu, amamanyishi, wahayakimela, akanga w’usihi, atunyi w’akambu w’ololo.”​—2 Timote 3:1-3.

4. Naa elongamelo ka dimɛna kendana l’akambo wahindja anto asolo katanaso lo 2 Timote 3:1-3?

⁴ Kânga mbakɔndɔla divɛsa sɔ akambo wahindja asolo, diɔ mbishaka nto elongamelo. Tolembete dia tena dia pâ diayoyala lo “nshi y’ekumelu” ka dikongɛ di’akambo dia kɔlɔ diaki Satana. Kɛsɔ mɛnyaka di’etshungwelo kaya suke ndo ɔnɛ kem’edja andja wa kɔlɔ ɔnɛ wayanga pɛnama l’andja wayɔlɔmbwama oma le Diolelo dia kokele diaki Nzambi. Diolelo diaketsha Yeso ambeki ande dia vɔ dilɔmbaka. (Mateu 6:9, 10) Diolelo sɔ diekɔ lowandji laki Nzambi la l’olongo, ‘lahalanyemaki pondjo.’ Ndo omvutshi Danyɛlɛ mbutaka dia diɔ “diayulanya waulelu [w’ana w’anto] tshe, diayâshila ushiki, ku dio diame diayushikikala pundju.”​—Danyele 2:44.

Lomangemange l’Akristo halɔtɔnɛ la terɔrismɛ

5. Tɛdikɔ takɔna t’oma la mbɔsa wedja efula lo kɛnɛ kendana la terɔrismɛ?

⁵ Aya ɛnɔnyi akumi wele terɔrismɛ ambodiaka anto efula. Andja w’otondo wamboyoleka sɛna wolo lo dikambo dia terɔrismɛ tatɛ oma lo mpokoso ka terɔrismɛ kakasalema l’osomba wa New York ndo wa Washington, Ngɔndɔ ka divwa 11, 2001. Lo menda woho wambokokanɛ terɔrismɛ l’andja w’otondo, wedja efula wakasangana esadi eto dia kilɔsha. Ɛnyɛlɔ, lo ndjela alapɔlɔ ɔmɔtshi wa lo tita sango, lo Ngɔndɔ ka dikumi l’ahende 4, 2001, “wa ministrɛ 55 w’oma lo Erɔpɛ, Amérique du Nord ndo Asie Central wenda akambo wa lam’asa wodja awɔ la wedja ekina wakɔshi yɛdikɔ” ya mbidja welo awɔ kâmɛ dia ndɔshana la terɔrismɛ. Owandji ɔmɔtshi wa woke w’asɔlayi wa l’États–Unis akândola yɛdikɔ yakɔshi wa ministrɛ ɛsɔ lo mbuta dia yɔ “yayokeketsha nto” welo wadjawɔ dia shidiya terɔrismɛ. Esadi eto, miliyɔ nkama y’anto wamboyasha lo dikambo sɔ dielɛ jurunalɛ The New York Times Magazine ɔnɛ “etatelo ka ta di’akanga a wolo.” Onde welo wambodjama ɛsɔ wayonga l’etombelo w’amɛna? Anto efula, onyake wanɛ wayaɛkɛ le Jehowa wekɔ la wɔma ndo wekɔ lo ndjakiyanya lo kɛnɛ kendana l’etombelo w’oma lo ta sɔ.

6. (a) Lande na kele lo tena dimɔtshi anto mongaka l’okakatanu dia mbetawɔ lomangemange lele l’Ɛmɛnyi wa Jehowa? (b) Ɛnyɛlɔ kakɔna kendana l’akambo wa pɔlitikɛ kakatshikɛ Yeso ambeki ande?

⁶ Ɛmɛnyi wa Jehowa mbeyamaka dimɛna l’ɔtɛ wa lomangemange lele lawɔ l’akambo wa pɔlitikɛ. Kânga mbele anto efula mbeyaka mbetawɔ lomangemange lele l’Ɛmɛnyi wa Jehowa lo tena dia wɔladi, vɔ ndjotshikitanyaka tokanyi tawɔ lo tena diatomba ekakatanu kana ata. Mbala efula, wɔma ndo etombelo wa kɔlɔ w’oma lo ta ndjokonyaka anto dia vɔ monga la ngandji k’efula ka wodja. Kɛsɔ ndjokonyaka wolo le anto amɔtshi dia mboka lande na kahomba onto tona sukɛ welo wadja anto tshɛ dikambo di’ɔlɔlɔ wa wodja. Koko Akristo wa mɛtɛ mbeyaka dia vɔ pombaka kitanyiya didjango diaki Yeso diata ‘di’aha monga wa la nkɛtɛ nyɛ.’ (Joani 15:19; 17:14-16; 18:36; Jakoba 4:4) Kɛsɔ nɔmbaka dia vɔ monga la lomangemange l’akambo wa pɔlitikɛ ndo l’akambo wendana l’atshunda w’anto. Yeso ndamɛ akasha ɛnyɛlɔ ka dimɛna lo dikambo sɔ. Lo menda lomba la kokele laki lande ndo akoka wa diambo waki lande, nde akakoke kimanyiya ase pɔlitikɛ wa lo nshi yande dia kandola akambo waki lawɔ. Koko nde akatone ndjasha l’akambo wa pɔlitikɛ. L’etatelo k’olimu ande w’esambishelo, nde akatone la wolo tshɛ lowandji lakalange mbosha Satana lâdiko wa waolelo tshɛ wa la nkɛtɛ. L’ɔkɔngɔ diko, nde akewɔ la wolo tshɛ di’aha anto mbodja owandji wa pɔlitikɛ la wolo.​—Mateu 4:8-10; Joani 6:14, 15.

7, 8. (a) Kakɔna kahalange lomangemange lele l’Ɛmɛnyi wa Jehowa mɛnya ndo lande na? (b) Ngande wɛnya Romo 13:1, 2 di’Akristo hawohombe ndjasha l’awui wa ngala wasalema otsha le mandji yalɔmbɔla?

⁷ Lomangemange lele l’Ɛmɛnyi wa Jehowa hahombe mɛnya dia vɔ sukɛka kana mbetawɔka awui wa ngala. Le wɔ, sala dikambo sɔ ayɛnya dia vɔ bu ekambi waki Nzambi ka “ngandji [ndo k]a ki” oko wayatawɔ. (2 Koreto 13:11) Vɔ wambeka nganɛ wɔsa Jehowa awui wa ngala. Omembi w’esambo akafunde ate: “[Jehowa] atushishimaka untu ololo ndu untu a kolo. Keli utema andi atuhetshaka untu a kolo, ndu one latulangaka akambu wa djawudi.” (Osambu 11:5) Vɔ mbeyaka nto kɛnɛ kakatɛ Yeso ɔpɔstɔlɔ Petero ate: “Ukaluya yombo yaye lu dihusu; ne dia wane tshe wakimela yombo, wayuvo la yombo.”​—Mateu 26:52.

⁸ Kânga mbɛnya ɔkɔndɔ w’ana w’anto dimɛna dia mbala efula Akristo wa kashi kondjakimɛ dia kamba la “yombo,” mbut’ate wakayasha l’awui w’ata, aha ngasɔ mbediɔ le Ɛmɛnyi wa Jehowa. Vɔ hawoyatambiya l’akambo wa ngasɔ. Ɛmɛnyi wa Jehowa kitanyiyaka la kɔlamelo tshɛ didjango diele lo Romo 13:1, 2 diata ɔnɛ: “Untu tshe alembele embuledi andi. Nduku diulelu diaha uma le [Nzambi], ne dia waulelu tshe weli uma le [Nzambi]. Okone untu tshe lahendwela umbuledi, ambuh[indol]a olembe wa [Nzambi]. Wane watuyalaka la uhedia, watuyayangelaka unungu.”

9. Lo toho takɔna tohende talɔsha Ɛmɛnyi wa Jehowa terɔrismɛ?

⁹ Koko, lam’ele terɔrismɛ kekɔ kɔlɔ efula, onde Ɛmɛnyi wa Jehowa hawohombe sala dikambo dimɔtshi dia kilɔsha? Eelo, vɔ pombaka ndo wekɔ lo kilɔsha. Ntondotondo, vɔ hawosukɛ akambo wa terɔrismɛ. Dui dia hende, vɔ mbetshaka anto atɔndɔ wa lo Bible wele naka anto mbakitanyiya, kete ndoko onto layoyakimɔ nto lo weho w’awui tshɛ wa ngala.a Ɔnɔnyi wetshi, Ɛmɛnyi wa Jehowa waketsha wenya 1 202 381 302 dia mbetsha anto yoho ya lɔsɛnɔ yahomba Okristo sɛna. Wenya ɛsɔ kombetshama wetshametshama nɛ dia diɛsɛ oma lo wenya ɛsɔ anto 265469 wakakome Ɛmɛnyi wa Jehowa wambobatizama wakɛnya la ntondo k’anto woho wahawayetawɔ kânga yema awui wa ngala.

10. Naa elongamelo kele l’anto dia shidiya awui wa ngala wa l’andja ɔnɛ?

¹⁰ Ndo nto, Ɛmɛnyi wa Jehowa mbeyaka dia vɔ hawokokaki shidiya akambo wa kɔlɔ wa l’andja ɔnɛ oma lo welo awɔ hita. Diɔ diakɔ diayaɛkɛwɔ tshɛ le Jehowa Nzambi ɔnɛ lakoka sala dikambo sɔ. (Osambu 83:18) Oyadi welo akɔna tshɛ wayodja anto, vɔ hawokoke shidiya awui wa ngala. Ofundji ɔmɔtshi wa Bible akatewola ntondo lo kɛnɛ kendana la “nshi y’ekumelu” ate: “Antu wa kolo la akanga a lukesu wayuhama lu akambu awo wa kolo; vo wayukesana, ku wayukesama.” (2 Timote 3:1, 13) Oko wediɔ ɔsɔku, ndoko k’ɔlɔ kayotomba l’elongamelo kele l’anto ka minya akambo wa kɔlɔ l’andja ɔnɛ. Lo wedi okina, sho koka ndjaɛkɛ tshɛ le Jehowa dia nde minya awui wa ngala tshɛ ndo lo pondjo.​—Osambu 37:1, 2, 9-11; Tukedi 24:19, 20; Isaya 60:18.

Vɔ kema la wɔma lo kɛnɛ kendana la ta dia woke diakôngɛ

11. Tɛdikɔ takɔna tamboshilaka Jehowa mbɔsa dia shidiya awui wa ngala?

¹¹ Lam’ele Nzambi ka wɔladi petshaka awui wa ngala, sho kokaka mboka lande na kambondôshilaka la mbɔsa tɛdikɔ tɔmɔtshi dia ndanya kiɔkɔ y’akambo wa kɔlɔ, mbut’ate Satana Diabolo. Nde ambôshilaka nɛndja Satana lo yoho ya sɔnyi lo tshimbo ya Mikayɛlɛ, ondjelo wa woke, mbut’ate Yeso Kristo, owandji w’oyoyo wakandahenya l’okudi. Bible kɔndɔlaka dikambo sɔ lo yoho nyɛ ɔnɛ: “Ta diaki l’ulungu. Mikaele la andjelo andi wakatshu dia tolosha ului ako ta. Ului ako la andjelo andi wakalo ta. Keli vo kumbaleka wulu; vo kutana dihuli ntu l’ulungu. Wakakadja ului ako a wuki w’edjedja, wetawo vati: Uhimbanyi Satana, ukeshi a wa la kete tshe-wakawukadja la kete ndi la andjelo andi.”​—Enyelo 12:7-9.

12, 13. (a) Kakɔna ketɛ ɔnɔnyi wa 1914 ɔnɔnyi wotshikitanyi l’ekina? (b) Kakɔna kakate prɔfɛsiya k’Ezekiyɛlɛ lo dikambo dia wanɛ wasukɛ Diolelo diaki Nzambi?

¹² Woho walɔnga Bible akambo lo tena diawɔ ndo akambo wasalema l’andj’ɔnɛ mɛnyaka dia ta diaki l’olongo sɔ diakalɔma lo 1914. Tatɛ oma l’etena kɛsɔ, akambo wa l’andja ɔnɛ wekɔ lo tatetemala tshɔ otsha lo kɔlɔ. Enyelo 12:12 nembetshiyaka bonde kediɔ ngasɔ lo mbuta ɔnɛ: “Ulungu li, ongenengene ndu wane watudjaseka loko. Fono kayuyala la kete ndu l’ashi a wuki, ne dia uhimbanyi akayi lenyu. Ndi eko la kele ka wuki; ndi mbeyaka ati: Etena kami kambusukana.”

¹³ Mbokɛmaka bonde kele kɛlɛ kaki Diabolo kekɔ lo tshɔ ntondotondo otsha le atɛmɔdi waki Nzambi w’akitami w’esɔ ndo le “ekoko ekina” w’asekawɔ. (Joani 10:16; Enyelo 12:17) Ɔlɔshamelo ɔsɔ wayanga koma lo kondoko etena kayanga Diabolo ndɔsha la wolo tshɛ wanɛ tshɛ wasukɛ Diolelo diaki Nzambi ndo wayaɛkɛ lɔkɔ. Ezekiyɛlɛ tshapita 38 mbelɛka ta dioleki tshɛ wolo diayɔlɔsha Satana ekambi waki Nzambi ɔnɛ ta diaki “Ngongo, [ka] lu kete ya Mangongo.”

14. Naa toho tɔmɔtshi takakokamɛ Ɛmɛnyi wa Jehowa lo nshi yakete, ndo onde dikambo sɔ diayongaka nshi tshɛ ngasɔ?

¹⁴ Tatɛ lam’akakashema Satana oma l’olongo, ekambi waki Nzambi wakakokamɛ tena dimɔtshi oma l’ɔlɔshamelo waki Satana diɛsɛ oma lo welo w’atshunda amɔtshi wa pɔlitikɛ watɛkɛtawɔ lo yoho ya didjidji l’​Enyelo 12:15, 16. Lo yoho yotshikitanyi, Bible mɛnyaka dia lo ta di’ekomelo diayɔlɔsha Satana ekambi waki Nzambi, ndoko atshunda w’anto wayokoka kokɛ wanɛ wayaɛkɛ le Jehowa. Onde dikambo sɔ koka mbokiya Akristo wɔma kana mbawata asolo? Ndooko!

15, 16. (a) Ɛtɛkɛta w’eshikikelo wakatɛ Jehowa ekambi ande wa lo nshi ya Jɛhɔshafata mbishaka kiɔkɔ yakɔna y’elongamelo le ekambi ande wa nshi nyɛ? (b) Ɛnyɛlɔ kakɔna kakatshikɛ Jɛhɔshafata nde l’anto waki lande ekambi waki Nzambi wa nshi nyɛ?

¹⁵ Nzambi ayosukɛ ekambi ande woho wakandasukɛ wodja ande wa mɛtɛ mɛtɛ lo nshi ya Nkumekanga Jɛhɔshafata. Sho mbadiaka ɔnɛ: “Nyuhukami, nyu asi Juda tshe, nyu asi Jerusalema ndu we khum’ekanga Jehoshafata, [Jehowa] kanyutela ati: Tanyukaki woma, tanyat[ɛ]ki ului one a wuki asulu, ne dia ta ne kema dianyu, dio dieko dia [Nzambi]. . . . Nyu hanyuyala la dikambu dia ndo lawo lu ta ne, kanyuyalonge, kanyemali ki. Juda la Jerusalema li, kanyendi etshungwelu kene kayunyutshugula [Jehowa]. Tanyukaki woma, tanyateki asulu, kanyutshu lui dia ntolo la wo, ne dia [Jehowa] ayuyala la nyu.”​—2 Ekondo 20:15-17.

¹⁶ Wakashikikɛ ase Juda dia vɔ hawotohomba ndɔ ta. Woho akɔ wamɛ mbele etena kayɔlɔsha Ngɔngɔ ka la Mangɔngɔ ekambi waki Nzambi, vɔ hawotɔsa dihomɔ dia ta dia mɛtɛ mɛtɛ dia ndjakokɛ. Koko, vɔ ‘wayemala ki ndo wayɛna panda ka Jehowa.’ Memala ki halembetshiya dia vɔ pombaka kɔma anya oko mpingu, nɛ dia kânga lam’akalɔshama ekambi waki Nzambi lo nshi yaki Jɛhɔshafata vɔ kɔ̂kɔma anya oko mpingu. Sho mbadiaka ɔnɛ: “Jehoshafata akakole elundji lu kete. Asi Juda tshe la asi Jerusalema wakayakosha lo kete la ntundu ka [Jehowa] wôtemola. . . . Lam’akandashili nkitshanyia la wudja, ndi akâsonwela emimbi watimbelaka [Jehowa] esambu, ndu watôtemolaka l’otemwelo wuleki dimena wa shikaa, watatshu la ntundu k’alimbi watati vati: Nyuki [Jehowa] lusaka, ne dia ngandji kandi ka mamba katutshikalaka pundju.” (2 Ekondo 20:18-21) Eelo, kânga la ntondo k’andɔshi, ekambi waki Nzambi wakatetemala la tombola Jehowa la waasaso. Ɔsɔ ekɔ ɛnyɛlɔ kahomba Ɛmɛnyi wa Jehowa ndjela etena kayowɔlɔshama oma le Ngɔngɔ.

17, 18. (a) Dionga diakɔna di’ɔlɔlɔ diele l’Ɛmɛnyi wa Jehowa ɛlɔ kɛnɛ lo kɛnɛ kendana l’ɔlɔshamelo w’oma le Ngɔngɔ? (b) Naa waohwelo w’oma la nongola ɛlɔngɔlɔngɔ l’esekaseka w’Akristo?

¹⁷ Polo l’etena kɛsɔ, ndo l’ɔkɔngɔ wa ta dia Ngɔngɔ tatɛ, Ɛmɛnyi wa Jehowa wayotetemala la sukɛ Diolelo diaki Nzambi. Vɔ wayotetemala la keketshama ndo kokamɛ lo sanganaka kâmɛ lo tshumanelo ndekana 94 600 dia l’andja w’otondo. (Isaya 26:20) Ɔnɛ ekɔ mɛtɛ etena ka tombola Jehowa la dihonga! Lo mɛtɛ, kânga mbalongamɛwɔ ɔlɔshamelo wa woke oma le Ngɔngɔ, Ɛmɛnyi wa Jehowa hawokalola ɛkɔngɔkɔngɔ la wɔma. Koko vɔ wekɔ lo ndjatshutshuya dia nyomoleka nambola olambo awɔ wa lotombo lo yoho yɛdimi l’akoka awɔ.​—Osambu 146:2.

¹⁸ Dionga di’ɔlɔlɔ sɔ diekɔ lo kɛnɛmɔma oma le nunu di’ɛlɔngɔlɔngɔ l’esekaseka wakatatɛ ndjasha l’olimu wa lo tena tshɛ. Traktɛ kele l’ɔtɛ a dui ɔnɛ: Ɛlɔngɔlɔngɔ​—Kakɔna Kayonyosala la Lɔsɛnɔ Lanyu? kakatombe lo nsanganya ya distrikɛ ya lo 2002 mɛnyaka dia ndeka dimɛna sɔna yoho ya lɔsɛnɔ shɔ. Akristo tshɛ, oyadi akɛnda kana epalanga wekɔ l’ɔngɛnɔngɛnɔ dia nongolaka waohwelo wa woho ɔsɔ waya la wonya wahombama.​—Osambu 119:14, 24, 99, 119, 129, 146.

19, 20. (a) Lande na kahahombe Akristo mboka wɔma kana mbatɛ asolo? (b) Kakɔna kayoteka lo sawo diayela?

¹⁹ Akristo hawohombe mboka wɔma kana mbatɛ asolo lo kɛnɛ kendana l’akambo weta l’andja ɔnɛ. Vɔ mbeyaka dia kem’edja Diolelo diaki Nzambi diayanga minya weho w’akambo wa ngala tshɛ mbala ɔtɔi lo pondjo. Vɔ keketshamaka nto lo mbeya ɔnɛ anto efula wakashisha sɛnɔ yawɔ oma l’awui wa ngala wayolɔ. Le amɔtshi, ɔsɔ ayonga diaaso dia ntondo diayowokondja dia mbeka awui wendana la Jehowa, le akina, eolwelo kɛsɔ ayowasha nto diaaso dia vɔ tetemala la kambɛ Nzambi oko anto wamboyakimɔ le nde.​—Etsha 24:15.

²⁰ Oko weso Akristo wa mɛtɛ, sho shihodiaka ohomba wa nama lomangemange laso l’Okristo ndo wa ndjashikikɛ dia sala dikambo sɔ. Sho nangaka kukutɛ elongamelo kaso ka monga l’akoka ‘wa memala ki ndo mɛna panda kaki Jehowa.’ Sawo diayela diayokeketsha mbetawɔ kaso lo tɛnya akambo wasalema nshi nyɛ wataleke tosha shɛnɔdi ya lâdiko lo kɛnɛ kendana l’ekotshamelo ka prɔfɛsiya ya lo Bible.

[Nɔte ya l’ɛse ka dikatshi]

Onde wɛ koka nembetshiya?

• Bonde kele anto efula mɛnaka akambo ɛlɔ kɛnɛ la sso dia kɔlɔ?

• Bonde kɛna Ɛmɛnyi wa Jehowa akambo la sso di’ɔlɔlɔ lo kɛnɛ kendana la nshi yayaye?

• Kakɔna kamboshila Jehowa sala dia minya kiɔkɔ y’akambo wa ngala?

• Bonde kahatahombe mboka ta diayotɔlɔsha Ngɔngɔ wɔma?

[Osato wa lo lɛkɛ 23]

Yeso akasha ɛnyɛlɔ ka dimɛna lo kɛnɛ kendana la lomangemange

[Esato wa lo lɛkɛ 26]

Nunu di’ɛlɔngɔlɔngɔ l’esekaseka wayasha l’ɔngɛnɔngɛnɔ l’olimu wa lo tena tshɛ

[Efundelo wɛnya kanga osato wa lo lɛkɛ 22]

FƆTƆ KA O.N.U. 186226/M. Grafman