Onde wɛ ekɔ la ‘solo dia lotutsha’?
‘Woho akɔna w’anto wahombanyu monga l’etsha wa lɔkɛwɔ l’ekila ndo lo ditshelo di’anto wamamema Nzambi etena kenyu lo kongɛ ndo nama wôngelo wa lushi la Jehowa lo yimba!’—2 PETERO 3:11, 12.
1, 2. Ɛnyɛlɔ kakɔna kakokaso kamba latɔ dia mɛnya woho ‘wakongɛso’ lushi la Jehowa?
OHƆSA ɛnyɛlɔ ka nkumbo kɛmɔtshi kakongɛ angɛndangɛnda dia vɔ ndjɔlɛ kâmɛ la wɔ dambo dimɔtshi. Wonya wahomba angɛndangɛnda akɔ koma wekɔ lo ndjasukana esadi esadi. Womoto ekɔ lo sala tshɛ dia shidiya la mbesha diangɔ. Omɛnde l’ana wekɔ lo mbokimanyiya dia ndjashikikɛ dia diangɔ tshɛ diaya l’ɔnɔngɔ. Onto tshɛ ekɔ l’ɔngɛnɔngɛnɔ. Eelo, nkumbo k’otondo kekɔ lo konga l’asolo walomɔlomɔ okomelo w’angɛndangɛnda, olelo wa dimɛna wayowɔlɛ kâmɛ ndo asawo w’amɛna wayowosawola.
2 Oko weso Akristo, sho tekɔ lo kongɛ ɛngɔ kɛmɔtshi koleki ohomba. Ɛngɔ kakɔna kakongɛso kɛsɔ na? Sho tshɛ tekɔ lo kongɛ ‘lushi la Jehowa’! Polo lam’ayoya lushi lɔsɔ, sho pombaka monga oko omvutshi Mika, ɔnɛ lakate ate: ‘Dimi layendɛka le Jehowa. Dimi layokongɛka le Nzambi ka panda kami.’ (Mika 7:7) Onde dikambo sɔ mɛnyaka dia sho pombaka kɔma anya? Ndooko. Tekɔ l’olimu efula wa kamba.
3. Lo ndjela 2 Petero 3:11, 12, dionga dia ngande diahomba Akristo monga ladiɔ?
3 Ɔpɔstɔlɔ Petero tokimanyiyaka dia sho monga la yimba ya dimɛna etena kakongɛso. Nde akate ate: ‘Woho akɔna w’anto wahombanyu monga l’etsha wa lɔkɛwɔ l’ekila ndo lo ditshelo di’anto wamamema Nzambi etena kenyu lo kongɛ ndo nama wôngelo wa lushi la Jehowa lo yimba!’ (2 Petero 3:11, 12) Tolembete dia lanɛ Petero kombidjaka tâmu lo woho w’anto wahombaso monga ndo nde komboka wombola wa mbeya woho w’anto wahombaso monga. Lo mikanda ande ehende wakafundama lo wolo wa nyuma ka Nzambi, nde akɛnya woho w’anto wahomba Akristo monga. Nde akalake Akristo nto dia vɔ kɛnɛmɔlaka ‘etsha wa lɔkɛwɔ l’ekila ndo ditshelo di’anto wamamema Nzambi.’ Kânga mbele lâsɔ ko ambeta oko ɛnɔnyi 30 tatɛ lam’akasha Yeso djembetelo yendana ‘l’ekomelo ka dikongɛ nɛ di’akambo,’ Akristo takawahombe tshika dia mambalɛka. (Mateu 24:3) Vɔ wakahombe ‘kongɛka ndo namaka lo timba tawɔ’ wôngelo wa lushi la Jehowa.
4. Kakɔna kahombama dia ‘nama wôngelo wa lushi la Jehowa lo yimba’?
4 Tshɛkɛta ya lo Grɛkɛ yokadimɔmi lanɛ ɔnɛ ‘namaka lo yimba’ nembetshiyaka “samanyisha” (accélérer). Ekɔ mɛtɛ dia hatokoke ‘samanyisha’ lushi la Jehowa lo yoho ya mɛtɛ mɛtɛ. Sho hatokoke mɛtɛ sala dikambo sɔ nɛ dia ‘hateye lushi kana wonya’ wayoya Yeso Kristo dia ndjolanya atunyi wa She. (Mateu 24:36; 25:13) Dibuku dimɔtshi nembetshiyaka dia vɛrbɛ y’oma lɛnɛ otumbi etelo k’ɔnɛ ‘samanyisha’ lanɛ nembetshiyaka “‘sala esadi esadi’ ndo kɛsɔ mbɔtɔnɛka efula la ‘monga l’ohetoheto, kalanganya anya kana mbidja yimba lo dikambo dimɔtshi.’” Ɔnkɔnɛ, Petero akakeketshaka asekande ambetawudi dia vɔ kombola efula wôngelo wa lushi la Jehowa. Vɔ wakakokaka sala dikambo sɔ lo namaka lushi lakɔ lo yimba. (2 Petero 3:12) Lam’ele “lushi la wuki ndu la woma [la Jehowa]” laya suke efula, sho pombaka monga la dionga dia woho ɔsɔ.—Joele 2:31.
Tokongɛke lo kɛnɛmɔlaka ‘etsha wa lɔkɛwɔ l’ekila’
5. Ngande wakokaso mɛnya dia tekɔ lo kombola efula dia mɛna ‘lushi la Jehowa’?
5 Naka tekɔ lo kombola efula dia ndjoka lo lushi la Jehowa, kete sho pombaka kɛnɛmɔla saki kɛsɔ oma lo ‘etsha aso wa lɔkɛwɔ l’ekila ndo lo ditshelo diaso di’anto wamamema Nzambi.’ Etelo k’ɔnɛ, ‘etsha wa lɔkɛwɔ l’ekila’ mbeyaka tohola dako diaki Petero diata ɔnɛ: “Nyuyali uku ana w’ukitanyia. Tanyuyafonyaki la saki kanyu ka ntundu lam’akinyu dinginya. Keli one lakanyeti, eko ekila, okone ndu nyu nyuyali ekila lu ditshelu dianyu tshe. Ne dia ambufundama ati: Nyuyali ekila, ne dia dimi leko ekila.”—1 Petero 1:14-16.
6. Ahombaso sala dia sho monga ekila na?
6 Dia monga ekila, sho pombaka monga pudipudi lo demba, lo yimba lo lɔkɛwɔ ndo lo nyuma. Onde tekɔ lo ndjalɔngɔsɔla dikambo dia ‘lushi la Jehowa’ lo monga ekila oko weso anto watɛmbɛ lokombo la Jehowa? Ɔsɔ bu dikambo dia tshitshɛ ɛlɔ kɛnɛ dia nama lɔkɛwɔ la pudipudi la ngasɔ nɛ dia ɛlɛmbɛ wa l’andja ɔnɛ wendana la lɔkɛwɔ wekɔ lo tatetemala ndâna. (1 Koreto 7:31; 2 Timote 3:13) Onde tekɔ lo mɛna woho watatetemala monga otshikitanu lam’asa ɛlɛmbɛ aso wendana la lɔkɛwɔ la wɛnɛ w’ase andja ɔnɛ? Naka hatɛnyi dikambo sɔ, kete sho taya bu ki. Onde hatɛnyi otshikitanu ɔsɔ nɛ di’ɛlɛmbɛ wa l’andja ɔnɛ wekɔ lo nanya ɛlɛmbɛ aso kânga mbele ɛlɛmbɛ aso wekɔ lâdiko efula? Naka ɔsɔku mbediɔ, kete sho la dia mbɔsa yɛdikɔ ya dimɛna ya nɔngɔsɔla dikambo sɔ dia sho ngɛnyangɛnya Nzambi.
7, 8. (a) Ngande wakokaso ndjohɛ ohomba wa monga ‘l’etsha wa lɔkɛwɔ l’ekila’? (b) Naa tɛdikɔ tahombaso mbɔsa aha la tshimbatshimba?
7 Lo menda woho wowɛnya awui wa mindo l’Ɛtɛrnɛtɛ ndo woho wakoka onto menda awui asɔ lo ndamɛ, dɔkɔtɛlɛ dimɔtshi mbutaka di’“anto amɔtshi wokokaka tetemala menda awui wa mindo wa dieyanelo” l’ekimanyielo k’ehomɔ kɛsɔ etena kɛnɛ kele vɔ komongaka la diaaso sɔ ntondo. Naka sho menda awui wa mindo wa ngasɔ l’Ɛtɛrnɛtɛ, kete mɛtɛ tekɔ lo mɔnyɔla didjango dia lo Bible diata ‘di’aha minanda ɛngɔ ka mindo.’ (Isaya 52:11) Onde tayɛna dia tekɔ mɛtɛ lo ‘nama wôngelo wa lushi la Jehowa lo yimba’? Kana onde tekɔ lo taloya lushi lɔsɔ lo timba taso, lo kanyiya ɔnɛ oyadi sho kolanyaka timba taso l’awui wa mindo, tekekɔ l’etena k’otale ka sho ndjoyaɛdia? Naka tekɔ la mbekelo ka mendaka awui wa mindo asɔ, kete aha la tshimbatshimba sho pombaka nɔmba Jehowa dia nde ‘minya washo aso oma l’awui w’anyanya asɔ, ndo dia nde totshika la lɔsɛnɔ lo mboka kande hita’!—Osambu 119:37.
8 Ɛmɛnyi wa Jehowa efula ɛlɔngɔlɔngɔ l’esekaseka ndo epalanga wekɔ lo ndjela ɛlɛmbɛ wa lâdiko waki Nzambi wendana la lɔkɛwɔ ndo wekɔ lo mbewɔ awui wa mindo wa l’andja ɔnɛ. Lo mbeya dia nshi yambotshikala yaya bu efula ndo lo mbidja yimba l’ɔhɛmwɛlɔ wakasha Petero w’ɔnɛ: ‘Lushi la Jehowa layoya oko wovi,’ vɔ wekɔ lo tetemala la kɛnɛmɔla ‘etsha wa lɔkɛwɔ l’ekila.’ (2 Petero 3:10) Awui wasalawɔ mɛnyaka dia vɔ wekɔ ‘lo kongɛ ndo nama wôngelo wa lushi la Jehowa lo yimba.’a
Tokongɛke lo monga la ‘ditshelo di’anto wamamema Nzambi’
9. Kakɔna kayototshutshuya omamemelo le Nzambi dia sho sala?
9 Ekɔ nto ohomba monga la ‘ditshelo di’anto wamamema Nzambi’ naka talanga namaka lushi la Jehowa lo yimba. ‘Mamema Nzambi’ kɛdikɛdi monga la dilɛmiɛlɔ di’efula otsha le Nzambi, dilɛmiɛlɔ diayototshutshuya dia sho sala kɛnɛ kele ɔlɔlɔ lo washo ande. Ndjakakatanya la kɔlamelo tshɛ le Jehowa ayototshutshuya dia monga la ditshelo di’anto wamamema Nzambi. Lolango lande ele di’“antu tshe nshimbamela ndu nkuma lu ewu ka mete.” (1 Timote 2:4) Nzambi “halangi nduku omotshi nshisho, keli ndi nangaka tshe wakadimuli etema.” (2 Petero 3:9) Lâsɔ, shi omamemelo aso le Nzambi la dia totshutshuya dia sho nyomoleka mbidja welo dia kimanyiya anto dia vɔ mbeka awui wendana la Jehowa ndo mbôkoya?—Efeso 5:1.
10. Lande na kahombaso ndjalama oma lo ‘lokeso l’okundji’?
10 Lɔsɛnɔ laso layolola la ditshelo di’anto wa mamema Nzambi naka sho nyanga ntondotondo Diolelo diaki Nzambi. (Mateu 6:33) Kɛsɔ nɔmbaka dia sho monga la wɛdimo lo kɛnɛ kendana la lomombo la l’emunyi. Yeso akalake ate: “Nyedi, nyewo okomiya a diango tshe; ne dia lumu la untu haluyala ne dia efula ka diango dieli landi.” (Luka 12:15) Kânga mbahatakoke shoamɛ mbeya dia taya la ngandji k’efula k’okundji, sho la dia mbeya ɔnɛ ‘ekiyanu wa lo dikongɛ nɛ di’akambo ndo lokeso l’okundji’ koka ‘tshidia ɔtɛkɛta’ wa Nzambi. (Mateu 13:22) Ondo bu dui dia tshitshɛ di’onto ndjakotshɛ ehomba wa lo lɔsɛnɔ. L’ahole amɔtshi, anto efula fɔnyaka ɔnɛ dia monga la lɔsɛnɔ la dimɛna, paka vɔ monɔ otsha lo wedja w’ɛngɔnyi, ondo lo mangana la nkumbo yawɔ ɛnɔnyi efula. Kânga ekambi waki Nzambi ɛmɔtshi wekɔ l’ekanelo ka yimba kɛsɔ. Lo tshɔ lo wodja okina, vɔ koka tokondjiyɛ ase nkumbo diangɔ dianyanyema ɛlɔ kɛnɛ. Ko kakɔna kakoka komɛ lonyuma la wakiwɔ wa ngandji wakatshikala na? Naka onto lahomba nɔmbɔla nkumbo dimɛna aya bu, onde vɔ wayonga la lonyuma lahombama dia ndjoka lo lushi la Jehowa?
11. Ngande wakɛnya onto ɔmɔtshi lakonɔ dia toyanga olimu lo wodja okina dia ditshelo di’anto wamamema Nzambi diekɔ ohomba efula ndeka ɔngɔnyi?
11 Pami kɛmɔtshi kakonɔ oma la Philippines dia toyanga olimu lo wodja okina, akeke akambo wa mɛtɛ wa lo Bible oma l’Ɛmɛnyi wa Jehowa la Japon. Lam’akandeye ɛkɛndɛ wele l’Afundelo wendana la lowandji, nde akɛnyi di’ekɔ ohomba nde kimanyiya ase nkumbo kande dia vɔ koma atɛmɔdi wa Jehowa. (1 Koreto 11:3) Wadɛnde lakatshikala la Philippines akatone la wolo tshɛ mbetawɔ k’oyoyo k’omɛnde ndo akalange dia nde tshikala lɛnɛ akinde ko mbatomɛka falanga lo dihole dia nde kalola dia ndjetsha ase nkumbo awui w’oma lo Bible. Woho wakandashihodia dia nshi yambotshikala yaya bu efula, ndo wakandayakiyanyaka dikambo dia wakinde wa ngandji, akotshutshuya dia nde kalola la Philippines. Nde akakondja etombelo w’ɔlɔlɔ lo kimanyiya ase nkumbo kande la solo dia lotutsha ndo la ngandji tshɛ. L’ɔkɔngɔ diko, ase nkumbo kande wakayokomaka kâmɛ l’ɔtɛmwɛlɔ wa mɛtɛ ndo wadɛnde akakome okambi wa lo tena tshɛ.
12. Lande na kahombaso mbidja eyango wa lo nyuma lo dihole dia ntondo lo lɔsɛnɔ laso?
12 Lɔsɛnɔ laso koka mbɛdikama la lɔnɛ l’anto wele lo luudu lɔmɔtshi lele lo nongola. Onde ayonga dui dia lomba nyanga dia kokɛ diangɔ dia lo luudu lɔsɔ etena kɛnɛ kele lɔ layanga nyukɔ la dja? Shi ayonga ohomba efula kokɛ nsɛnɔ, mbut’ate lɔsɛnɔ laso shoamɛ, la nkumbo kaso ndo l’anto akina wodjashi lo luudu lɔsɔ? Eelo, dikongɛ di’akambo nɛ diekɔ lo taleke sukana otsha l’elanyelo kadiɔ, ndo nsɛnɔ y’anto efula yekɔ lo wâle. Oko weyaso dui sɔ, aha la tâmu, sho la dia mbetsha awui wa lo nyuma lo dihole dia ntondo ndo ndjasha l’ohetoheto tshɛ l’olimu w’esambishelo ka Diolelo washimbɛ nsɛnɔ.—1 Timote 4:16.
Sho pombaka monga “aha la vadi”
13. Dionga dia ngande diakombolaso tanema ladiɔ lam’ayoya lushi la Jehowa?
13 Lo mbidja dikako vɔlɛ l’ohomba wa monga la solo dia lotutsha, Petero akate ate: “Elangimi ami, ne dia nyu nyambulungamela akambu ane, nyutetemali dia nyu ntanema la ki, aha la vadi, aha la unungu lu ashu andi.” (2 Petero 3:14) Lâdiko dia nde daka dia monga l’etsha wa lɔkɛwɔ l’ekila ndo ditshelo di’anto wamamema Nzambi, Petero akatɛtɛ l’ohomba wa sho monga anto wambɛdiama la dikila di’oshinga wolo diaki Yeso lo washo wa Jehowa. (Enyelo 7:9, 14) Kɛsɔ nɔmbaka di’anto monga la mbetawɔ l’olambo wa tshungo waki Yeso, ndo koma okambi waki Jehowa wamboyakimɔ le nde ndo wambobatizama.
14. Kakɔna kalɔmbama dia monga ‘aha la vadi’?
14 Petero tɔlɔmbaka dia sho sala la wolo tshɛ dia monga “aha la vadi.” Onde tekɔ lo tetemala nama ahɔndɔ aso wa lɔkɛwɔ l’Okristo ndo lonto laso aha la vadi, mbut’ate, mbewɔ di’andja ɔnɛ todja mindo? Etena kɛnaso vadi ya mindo lo dihɔndɔ diaso, sho nyangaka esadi eto dia ndjinya. Naka dihɔndɔ dialekaso nanga mbɔtwɛ vadi shɔ, kete tayosala tshɛ dia ndjinya. Onde sho salaka ngasɔ naka ahɔndɔ aso wa lo nyuma mambɔtɔ mindo, mbut’ate lonto kana lɔkɛwɔ laso laya kɔlɔ?
15. (a) Lande na kakahombaka ase Isariyɛlɛ mbindja tofufɔ l’atshuku w’elɔtɔ awɔ? (b) Bonde kahomba Ɛmɛnyi wa Jehowa wa nshi nyɛ tshikitana l’anto akina?
15 Ase Isariyɛlɛ wakahombaka mbidjaka “tufufo lu atshuku w’eloto awo” ndo ‘mbidjaka ɔkɔdi w’odima lâdiko dia fufɔ la fufɔ.’ Lande na? Woho wa vɔ mbohɔka wadjango waki Jehowa, mbakitanyiyaka, ndo ‘monga ekila’ la ntondo ka Nzambi kawɔ. (Walelu 15:38-40) Oko weso ekambi waki Jehowa wa nshi nyɛ, sho tshikitana l’ase andja ɔnɛ nɛ dia tekɔ lo kitanyiya ɛlɛmbɛ ndo atɔndɔ waki Nzambi. Ɛnyɛlɔ, sho namaka lɔkɛwɔ la pudipudi, sho mbɔsaka dikila oko ɛngɔ k’ekila, sho mbewɔka toho tshɛ t’ɔtɛmwɛlɔ wa dikishi. (Etsha 15:28, 29) Anto efula tɔlɛmiyaka lo woho wambotoyashikikɛ la wolo tshɛ di’aha ndjadja mindo.—Jakoba 1:27.
Sho pombaka monga “aha l’unungu”
16. Kakɔna kahombama dia sho tetemala monga “aha l’unungu”?
16 Petero akate nto dia sho la dia tanema “aha l’unungu.” Ngande wakokaso sala dui sɔ? Diwadi dia mindo vɔ koka dinya kana disola koko aha ngasɔ mbediɔ lo kɛnɛ kendana l’onongo. Monga l’onongo mɛnyaka dia dikambo dimɔtshi dia kɔlɔ diekɔ le onto, mbut’ate nde ekɔ la munga. Ɔpɔstɔlɔ Paulo akalake Akristo wa la Filipi ate: “Nyutshi akambu tshe aha la engunungunu, ndu la tamu, Dia nyu ndjala nyaha la unungu, nyaha la lukesu, ana a [Nzambi] waha la ekomo l’atei a lolonga la kolo ndu lahasimbwi, nyambenama l’atei awo uku esasi wa kete.” (Filipi 2:14, 15) Naka sho kitanyiya dako sɔ, kete tayewɔ engunungunu ndo tâmu ndo tayokambɛ Nzambi l’eyango wa pudipudi. Ngandji ka Jehowa ndo ka wonyaso onto kayototshutshuya dia sambisha “lokumu l’ololo lone la diulelu.” (Mateu 22:35-40; 24:14) Ndo nto, tayotetemala mbewoya lokumu l’ɔlɔlɔ kânga mbele mbeyaka monga k’anto efula hawoke bonde ketawɔso mbetsha wenya dia kimanyiya anto akina dia vɔ mbeka awui wendana la Nzambi ndo l’Ɔtɛkɛta ande, mbut’ate Bible.
17. Eyango akɔna wahombaso monga lawɔ etena kayangaso waɛsɛ w’olimu l’etshumanelo k’Akristo?
17 Lam’ele sho nangaka tanema “aha l’unungu,” sho la dia sɛdingola kɛnɛ katotshutshuya dia ndjadjɛ eyango tshɛ wele laso. Tambotonaka yoho ya lɔsɛnɔ y’ase andj’ɔnɛ wasala akambo la lokaki, ɛnyɛlɔ sala la wolo tshɛ dia monga ɔngɔnyi kana monga onto la lokumu. Naka tekɔ lo nyanga dia kondja waɛsɛ w’olimu l’etshumanelo k’Akristo, kete tonge l’eyango wa pudipudi ndo totshutshuyamake mbala tshɛ la ngandji ka Jehowa ndo k’anto akina. Ekɔ mɛtɛ ekeketshelo dia mɛna apami wele la lonyuma la dimɛna ‘wayanga olimu w’omendji’ l’ɔngɛnɔngɛnɔ ndo la saki ka ndjakitshakitsha ka kambɛ Jehowa ndo asekawɔ ambetawudi oko ɛhɔmbɔ. (1 Timote 3:1; 2 Koreto 1:24) Lo mɛtɛ, wanɛ wakotsha kɛnɛ kahombama dia kamba oko dikumanyi ‘namaka ɛkɔkɔ wa Nzambi l’ɛtɛma w’ɔngɛnɔngɛnɔ, oko wele lolango la Nzambi, aha dikambo di’okundji koko la yimba y’ɔlɔngɔswami; vɔ hawahemɛ wanɛ wele sango diaki Nzambi, koko vɔ komaka bɛnyɛlɔ di’ɔlɔlɔ le ɛkɔkɔ.’—1 Petero 5:1-4.
Sho pombaka sɛna lo ‘wɔladi’
18. Oma lo waonga akɔna weyama Ɛmɛnyi wa Jehowa dimɛna?
18 L’ekomelo, Petero tɔlɔmbaka dia sho sɛna lo ‘wɔladi.’ Dia kitanyiya kɛnɛ kalɔmbama kɛsɔ, sho la dia monga la wɔladi la Jehowa ndo l’asukanyi aso. Petero tɛtɛ̂ka l’ohomba wa sho ‘tamanya mbokana ngandji’ ndo wa nama wɔladi lam’asaso l’asekaso Akristo. (1 Petero 2:17; 3:10, 11; 4:8; 2 Petero 1:5-7) Dia nama wɔladi wele lam’asaso, sho la dia mbokana ngandji. (Joani 13:34, 35; Efeso 4:1, 2) Ngandji ndo wɔladi wele lam’asaso ndekaka mɛnama lam’asalema nsanganya yaso ya wedja efula. Lo losanganya lɔmɔtshi lakasalema la Costa Rica l’ɔnɔnyi 1999, onto ɔmɔtshi lakasondjaka diangɔ lo sɛkɛ di’aviyɔ akomala efula nɛ di’Ɛmɛnyi wa Jehowa wa lo ngelo kɛsɔ wakalongolaka angɛndangɛnda wakaye lo losanganya wakakombaka diangɔ diakasondjaka onto ɔsɔ aha la vɔ mbeya. Koko lushi la hende, nde akɛnyi ngandji ndo wɔladi waki lawɔ lo woho wakalongolaka Ɛmɛnyi wa Jehowa angɛndangɛnda asɔ la wasaso tshɛ kânga mbakiwɔ kombaeyaka. Lushi l’ekomelo, onto ɔsɔ nde lawɔ akatatɛ ndjayola angɛndangɛnda asɔ ndo akalɔmbɛ di’onto ɔmɔtshi mbeka lande Bible.
19. Lande na kele ekɔ ohomba efula sɛna la wɔladi lam’asaso l’asekaso ambetawudi?
19 Woho wayangaso l’otema ɔtɔi dia wɔladi monga lam’asaso l’anangɛso l’akadiyɛso wa lo nyuma koka monga la shɛngiya lo woho wakongaso l’otema ɔtɔi lushi la Jehowa ndo daka diande di’andja w’oyoyo. (Osambu 37:11; 2 Petero 3:13) Tɔshi dia tekɔ l’okakatanu dia sɛna lo wɔladi l’ombetawudi ɔmɔtshi w’osekaso. Onde hatokoke fɔnya woho wayotodjasɛ la nde lo wɔladi lo Paradiso? Naka tekɔ la dui dimɔtshi lam’asaso l’ɔnangɛso kana la kadiyɛso kɛmɔtshi, kete aha la tshimbatshimba sho la dia ‘mbidja wɔladi lam’asaso la nde.’ (Mateu 5:23, 24) Ekɔ ohomba efula sala ngasɔ naka sho nangaka monga la wɔladi la Jehowa.—Osambu 35:27; 1 Joani 4:20.
20. Lo toho takɔna takokaso kɛnɛmɔla ‘solo dia lotutsha’?
20 Onde onto l’onto l’atei aso ekɔ lo ‘kongɛ ndo lo nama wôngelo wa lushi la Jehowa lo yimba’? Saki k’efula kele laso ka mɛna ekomelo k’akambo wa kɔlɔ kɛnɛmɔmaka lo woho watshikalaso ekila l’andja ɔnɛ woludi l’awui wa mindo. Ndo nto, woho wakombolaso efula oyelo wa lushi la Jehowa ndo lɔsɛnɔ la l’ɛlɔmbwɛlɔ ka Diolelo mɛnamaka oma lo ditshelo diaso di’anto wamamema Nzambi. Ndo elongamelo kaso ka sɛna l’andja w’oyoyo wa wɔladi mɛnamaka oma lo woho wayangaso wɔladi kakianɛ lam’asaso l’asekaso ambetawudi. Lo sala ngasɔ, sho mɛnyaka dia tekɔ la ‘solo dia lotutsha’ ndo tekɔ lo ‘nama wôngelo wa lushi la Jehowa lo yimba.’
[Nɔte ya l’ɛse ka dikatshi]
a Dia kondja bɛnyɛlɔ dimɔtshi, enda lo Tshoto y’Etangelo ya Ngɔndɔ ka Ntondo 1, 2000, lɛkɛ 16 ndo Annuaire des Témoins de Jéhovah wa 1997, lɛkɛ 51.
Onde wɛ akohɔ?
• ‘Nama wôngelo wa lushi la Jehowa lo yimba’ kɛdikɛdi na?
• Ngande wakɛnɛmɔma ‘solo dia lotutsha’ lo kɛnɛ kendana la lɔkɛwɔ laso?
• Lande na kele ‘ditshelo di’anto wamamema Nzambi’ diekɔ ohomba efula?
• Ahombaso sala dia sho tanema la ntondo ka Jehowa aha la vadi, aha l’onongo ndo lo wɔladi’?
[Osato wa lo lɛkɛ 11]
‘Solo dia lotutsha’ kɛnɛmɔmaka l’etsha wa lɔkɛwɔ l’ekila
[Esato wa lo lɛkɛ 12]
Olimu w’esambishelo ka Diolelo ekɔ olimu washimbɛ nsɛnɔ
[Osato wa lo lɛkɛ 14]
Nyɛsɔ tonge la wɔladi l’anto akina etena kakongɛso lushi la Jehowa