Bonde kahombaso tetemala la nɔmbaka?
“Nyutetemalaki nomba; nyukaki lusaka lu akambu tshe.”—1 Tesalonika 5:17, 18.
1, 2. Ngande wakɛnya Danyɛlɛ dia nde ngɛnangɛnaka diɛsɛ diaki lande dia nɔmbaka, ndo dui sɔ diaki l’etombelo akɔna lo diɔtɔnganelo diaki lam’asande la Nzambi?
OMVUTSHI Danyɛlɛ aki la mbekelo ka nɔmbaka Nzambi mbala shato lo lushi. Nde akalɔmbaka lo luudu lande la la diko lele adidishi alɔ akɛlɛ otsha l’osomba wa Jerusalɛma. (1 Khumi ya Dikanga 8:46-49; Danyele 6:10) Kânga lam’akadje nkumekanga Dariyo ka la Mediya ɔlɛmbɛ dia ndoko onto lahomba nɔmba onto okina paka nde, Danyɛlɛ kondjambola dia kana nde pombaka tetemala nɔmba kana bu. Oyadi dikambo sɔ diakadjaka lɔsɛnɔ lande lo wâle kana bu, pami kɛsɔ akatetemala la nɔmbaka Jehowa.
2 Jehowa ngande wakandɔsaka Danyɛlɛ na? Lam’akaye ondjelo dia ndjokadimola lo dɔmbɛlɔ dimɔtshi diaki Danyɛlɛ, nde akete Danyɛlɛ ate “olangemi” kana “onto ɔmɔtshi lalangema efula.” (Danyɛlɛ 9:20-23; The New English Bible) Lo prɔfɛsiya k’Ezekiyɛlɛ, Jehowa mbelɛka Danyɛlɛ ate pami k’ɔlɔlɔ. (Ezekiyele 14:14, 20) Lam’akinde la lɔsɛnɔ, alɔmbɛlɔ waki Danyɛlɛ wakakeketsha diɔtɔnganelo diasande la Nzambi kande, dikambo diele kânga Dariyo akadietawɔ.—Danyele 6:16.
3. Oko wadiɛnya kɛnɛ kakakomɛ misiɔnɛrɛ ɔmɔtshi, ngande wakoka dɔmbɛlɔ tokimanyiya dia nama olowanyi aso?
3 Alɔmbɛlɔ wa mbala la mbala koka nto tokimanyiya dia ndɔshana l’ehemba wa wolo. Naka sho sɛdingola ɛnyɛlɔ kaki Harold King, misiɔnɛrɛ ɔmɔtshi wa la Chine wakahombe mbetsha ɛnɔnyi etanu lo lokanu lakawawodje ndamɛ lo mvuduvudu yande, kete tayɛna mɛtɛ ka dikambo sɔ. Lo dikambo dia kɛnɛ kakokomɛ, ɔnangɛso King mbutaka ate: “Vɔ koka manganyami l’asekami koko aha la Nzambi kami. . . . Ɔnkɔnɛ, aha la mboka onto tshɛ laketaka lo mvuduvudu yami ya lokanu wɔma, dimi lakakaka adwe mbala shato lo lushi ndo lakalɔmbaka la dui dia wolo, lo mbɔhɔ Danyɛlɛ, ɔnɛ latɛkɛta Bible dikambo diande. . . . Aki oko lo tena sɔ nyuma ka Nzambi akalɔmbɔlaka wɔɔngɔ ami l’akambo woleki ohomba ndo akatutshaka otema ami. Alɔmbɛlɔ wakambela mɛtɛ wolo ndo ekeketshelo ka lo nyuma!”
4. Wembola akɔna wendana la dɔmbɛlɔ wayotɔsɛdingola lo sawo nɛ?
4 Bible mbutaka ɔnɛ: “Nyutetemalaki nomba; nyukaki lusaka lu akambu tshe.” (1 Tesalonika 5:17, 18) Lo ndjela dako sɔ, nyɛsɔ tɔsɛdingole wembola wayela ɛnɛ: Bonde kahombaso mbidjaka yimba lo alɔmbɛlɔ aso? Ɛkɔkɔ akɔna wele laso watotshutshuya dia tetemala ndjasukanyaka le Jehowa? Ndo kakɔna kahombaso sala naka toyaoka dia hatosungana nɔmba Nzambi l’ɔtɛ wa munga yaso?
Tokeketsha lɔngɛnyi laso l’ekimanyielo ka dɔmbɛlɔ
5. Naa lɔngɛnyi la lânde latokimanyiya dɔmbɛlɔ dia sho monga lalɔ?
5 Onde wɛ nangaka Jehowa kɔsa oko ɔngɛnyi ande? Nde akete owandji wa nkumbo Abarahama ate ɔngɛnyi ami. (Isaya 41:8; Jakoba 2:23) Jehowa nangaka dia sho monga la diɔtɔnganelo dia ngasɔ lam’asaso la nde. Nde tɔlɔmbaka dia sho ndjasukanya le nde. (Jakoba 4:8) Kema leeta lɔsɔ pombaka totshutshuya dia kana yimba dimɛna lo kɛnɛ kendana la dɔmbɛlɔ, diɛsɛ dia lânde diakandatosha? Ekɔ wolo wa mamba di’onto kondja diaaso dia tɛkɛta l’owandji ɔmɔtshi wa woke wa lɛɛta, kana koma ɔngɛnyi ande! Koko, Otungi w’andja ɔnɛ tokeketshaka dia sho ndjasukanya le nde lo dɔmbɛlɔ wonya tshɛ walangaso ndo weso l’ohomba wa sala dikambo sɔ. (Osambu 37:5) Alɔmbɛlɔ aso wa l’etete tokimanyiyaka dia monga la lɔngɛnyi l’oshika lam’asaso la Jehowa.
6. Kakɔna katetsha ɛnyɛlɔ kaki Yeso lo kɛnɛ kendana l’ohomba wa ‘tetemala la nɔmbaka’?
6 Koko sho koka esadi eto minya yimba oma lo dɔmbɛlɔ! Ekakatanu wa lushi la lushi wa lo lɔsɛnɔ koka tɔsa tshɛ polo ndo lo sho mbohɛ tɛkɛta la Nzambi. Yeso akakeketsha ambeki ande dia ‘tetemala la nɔmbaka,’ ndo nde ndamɛ akasalaka dikambo sɔ. (Mateu 26:41) Kânga mbele mbala efula nde aki l’awui efula wa sala oma ko pindju polo otsho, nde akayaombɛka etena ka sawola la She lele l’olongo. Tena dimɔtshi, Yeso aketɔka la “hyutshihutshi, unya atahuto” dia nɔmba. (Mako 1:35) Lo waaso akina, nde akatshɔka lo dihole dia diɛta l’ekomelo ka lushi dia tɔlɔmba Jehowa. (Mateu 14:23) Mbala tshɛ, Yeso akayaombɛka etena ka nde nɔmba ndo sho la dia salaka ngasɔ.—1 Petero 2:21.
7. Akambo akɔna wahomba totshutshuya dia sawolaka la Shɛso lele l’olongo lushi la lushi na?
7 Lushi tshɛ lam’ahomanaso l’ekakatanu, ehemba ndo lam’ɔsaso tɛdikɔ, sho kondjaka waaso efula w’ɔlɔlɔ wa sala alɔmbɛlɔ waso shoamɛ. (Efeso 6:18) Etena kayangaso ɛlɔmbwɛlɔ kaki Nzambi l’akambo tshɛ wa lo lɔsɛnɔ, lɔngɛnyi lasaso la nde keketshamaka. Shi lɔngɛnyi lele lam’asa anto ahende komaka wolo efula etena kewɔ vɔ tshɛ l’ekakatanu? (Tukedi 17:17) Woho akɔ wâmɛ, diɔtɔnganelo diele lam’asaso la Jehowa diayonga wolo efula naka sho ndjaɛkɛ le nde ndo naka sho kondja ekimanyielo kande.—2 Ekondo 14:11.
8. Wetshelo akɔna wakondjaso oma l’ɛnyɛlɔ kaki Nehemiya, Yeso ndo Hana lo kɛnɛ kendana l’otale w’alɔmbɛlɔ aso?
8 Sho koka monga l’ɔngɛnɔngɛnɔ efula nɛ dia Nzambi hatodjɛ elelo lo kɛnɛ kendana l’otale wahomba monga l’alɔmbɛlɔ aso kana mbala yahombaso sawolaka la nde lo dɔmbɛlɔ! Nehemiya akasale esadi esadi dɔmbɛlɔ dia l’etei k’otema la ntondo ka nde nɔmba nkumekanga ka Pɛrɛsiya dikambo dimɔtshi. (Nehemiya 2:4, 5) Yeso nde lawɔ akasale dɔmbɛlɔ dia mondo etena kakandalɔmbɛ Jehowa dia mbosha wolo wa nde mbolola Lazaro. (Joani 11:41, 42) Hana lo wedi ande, ‘akalɔmbɛ etena k’otale la ntondo ka Jehowa’ lo mbɔkɛnɛmɔlɛ kɛnɛ kaki l’otema ande. (1 Samuele 1:12, 15, 16) Alɔmbɛlɔ aso w’onto ndamɛ koka monga tomondo kana etale lo ndjela ehomba ndo akambo wele laso.
9. Bonde kele alɔmbɛlɔ aso la dia ndjala l’ɛtɛkɛta wa lotombo ndo wa lowando lo kɛnɛ tshɛ katosalɛ Jehowa na?
9 Alɔmbɛlɔ efula wa lo Bible kɛnɛmɔlaka lowando lakɛnya anto lo kɛnɛ kendana la dihole dia lâdiko diele la Jehowa ndo l’elimu ande wa diambo. (Etumbelu 15:1-19; 1 Ekondo 16:7-36; Osambu 145) Lo ɛnɛlɔ kɛmɔtshi, ɔpɔstɔlɔ Joani akɛnyi dikumanyi 24, mbut’ate lofulo la kokele l’Akristo w’akitami w’esɔ l’ahole awɔ wa l’olongo wata vate: “Khumesu, la [Nzambi k]asu, we kukuki dia nungula lutumbu la kenemo la wulu, ne dia we kakatungi diango tshe. Dio diakatungama uma lu lulangu laye.” (Enyelo 4:10, 11) Sho lawɔ tekɔ l’ɔkɔkɔ wa tombolaka Otungi aso mbala la mbala. Ambutshi mongaka l’ɔngɛnɔngɛnɔ efula etena kawasha ɔnawɔ losaka l’otema ɔtɔi l’ɔtɛ wa dikambo dimɔtshi di’ɔlɔlɔ diosalewɔ! Kana yimba la lowando tshɛ lo ngandji k’otamanya kaki Jehowa ndo kɛnɛmɔla lowando laso l’akambo asɔ ekɔ yoho ya dimɛna efula ya ndowanya alɔmbɛlɔ aso.
Bonde kahombaso ‘tetemala la nɔmbaka’?
10. Ngande wakoka dɔmbɛlɔ tokimanyiya dia keketsha mbetawɔ kaso?
10 Ekɔ ohomba efula nɔmbaka mbala la mbala dikambo dia mbetawɔ kaso. L’ɔkɔngɔ wa nde mɛnya ohomba wa ‘nɔmbaka mbala tshɛ aha la mpekɔ,’ Yeso akambola ate: “Lam’ayuya On’a untu, ndi ayutana mbetawo la kete?” (Luka 18:1-8) Alɔmbɛlɔ w’oma k’ɛse otema keketshaka mbetawɔ. Lam’akakome Abarahama owandji wa nkumbo osombe, koko nde atote ndoko ɔna, nde akatɛkɛta la Nzambi lo kɛnɛ kendana la dikambo sɔ. Jehowa akokadimola lo mbɔlɔmba ntondo dia nde mbalɛ l’olongo ndo mbadia tɔɔtɔ naka nde kokaka sala dikambo sɔ. Oma lâsɔ, Nzambi akashikikɛ Abarahama ate: “Ukuku mbayuyala tukanula taye.” Etombelo akɔna wakonge la dikambo sɔ na? Abarahama ‘akonge la mbetawɔ le Jehowa; ko nde akadiema oko onto ɔlɔlɔ oma le nde.’ (Etatelu 15:5, 6) Naka sho diholɛ Jehowa etema aso lo dɔmbɛlɔ, mbetawɔ eshikikelo katoshande oma lo Bible, ndo monga l’okitanyiya le nde, kete nde ayokeketsha mbetawɔ kaso.
11. Ngande wakoka dɔmbɛlɔ tokimanyiya dia ndɔshana l’ekakatanu?
11 Dɔmbɛlɔ koka tokimanyiya nto dia kandola ekakatanu. Onde awui wele layɛ lo lɔsɛnɔ wekɔ wotsho le yɛ ndo wɛ ekɔ lo mɛna wolo mbikikɛ ekakatanu wele layɛ? Bible totɛka ɔnɛ: “Ukitsha wutshu aye le [Jehowa], ku ndi ayukembelawo. Ndi hetawo untu ololo sutshasutshama.” (Osambu 55:22) Etena kalangaso mbɔsa tɛdikɔ ta wolo, sho koka mbokoya ɛnyɛlɔ kaki Yeso. Nde akalɔmbɛ otsho w’otondo la ntondo ka sɔna apɔstɔlɔ ande 12. (Luka 6:12-16) Ndo l’otsho wa la ntondo ka nyɔi kande, Yeso akalɔmbɛ efula woho wele ‘dungu diande diakakɛlɛ polo la nkɛtɛ watekana dikila.’ (Luka 22:44) Etombelo akɔna wakonge la dikambo sɔ na? “[W]akawukela ne dia woma wakandukaka [Nzambi].” (Heberu 5:7) Alɔmbɛlɔ aso wa l’etete ndo waha la mpekɔ wayotokimanyiya dia ndɔshana l’akambo watshindja wɔɔngɔ ndo l’ehemba wa wolo.
12. Ngande wɛnya dɔmbɛlɔ dia Jehowa ndjakiyanyaka dikambo diaso?
12 Ɔkɔkɔ okina wa ndjasukanya le Jehowa lo dɔmbɛlɔ ele nde lawɔ ayoyasukanya le so. (Jakoba 4:8) Naka sho diholɛ Jehowa otema lo dɔmbɛlɔ, shi kete tayoka dia nde mbidjaka yimba l’ehomba aso ndo tokokɛka la ngandji tshɛ? Sho mbokamaka ngandji oma le Nzambi l’onto ndo l’onto. Jehowa kombisha onto okina ɔkɛndɛ wa mpokamɛka alɔmbɛlɔ, koko nde ndamɛ mbahokamɛ alɔmbɛlɔ tshɛ w’ekambi ande oko wende Shɛwɔ lele l’olongo. (Osambu 66:19, 20; Luka 11:2) Ndo nde tɔlɔmbaka dia sho ‘kitsha ekiyanu aso tshɛ le nde nɛ dia nde tokanɛka.’—1 Petero 5:6, 7.
13, 14. Ɛkɔkɔ akɔna watotshutshuya dia tetemala la nɔmbaka?
13 Dɔmbɛlɔ koka tokimanyiya dia monga l’ohetoheto w’efula l’esambishelo ndo tokeketshaka etena kahomanaso la wendjudi ndo l’ɔlɔshamelo wakoka tokonya lo sho ndjaoka oko hatoyokotsha ɔkɛndɛ aso. (Etsha 4:23-31) Dɔmbɛlɔ koka tokokɛ nto oma lo ‘tolonga taki Diabolo.’ (Efeso 6:11, 17, 18) Lam’asalaso la wolo dia ndɔshana l’ehemba wa lushi la lushi, sho koka tetemala la nɔmba Nzambi dia nde tokeketsha. Lo dɔmbɛlɔ di’ɛnyɛlɔ diaki Yeso nde akalɔmbɛ nto Jehowa dia ‘totshungola oma le kanga kɔlɔ,’ Satana Diabolo.—Mateu 6:13.
14 Naka sho tetemala la nɔmba dia kondja ekimanyielo woho wa nɛndja tokanyi taso ta kɔlɔ, kete Jehowa ayotokimanyiya. Tekɔ l’eshikikelo ɔnɛ: “[Nzambi] eko la kolamelu; ndi hetawo dia nyu mpimbama uleki wulu anyu. Keli lam’ayuya ehimba, ndi ayunyutshela mbuka ka nyu mpanda dia nyu ndjala la wulu wa nshikikala.” (1 Koreto 10:13) Ɔpɔstɔlɔ Paulo ndamɛ akɛnyi woho wakawosha Jehowa wolo l’atei w’ekakatanu wotshikitanyi wakahomana la nde. Nde akate ate: “Dimi mbeyaka ntsha akambu tshe la wulu wa one latunkikitshaka.”—Filipi 4:13; 2 Koreto 11:23-29.
Totetemale la nɔmbaka kânga mbeso atshi wa kɔlɔ
15. Kakɔna kakoka tomba naka lɔkɛwɔ laso haloyɔtɔnɛ l’ɛlɛmbɛ waki Nzambi?
15 Di’alɔmbɛlɔ aso mbokɛma dimɛna, sho hatohombe tona alako w’oma l’Ɔtɛkɛta wa Nzambi. Ɔpɔstɔlɔ Joani akafunde ate: “Shu tatulungulaka kene tshe kalombasu, ne dia shu tatulamaka elembe andi, ndu tatutshaka akambu watôngenyangenyaka.” (1 Joani 3:22) Kakɔna kakoka tomba naka lɔkɛwɔ laso haloyɔtɔnɛ l’ɛlɛmbɛ waki Nzambi na? Adama l’Eva wakayashɛ l’ɔkɔngɔ wa vɔ sala pɛkato l’ekambɔ k’Ɛdɛna. Sho lawɔ koka monga la kanyi ya ndjashɛ ‘lo washo wa Jehowa’ ndo tshika dia nɔmbaka. (Etatelu 3:8) Klaus, omendji ɔmɔtshi w’eteta wambohokɔ akambo akate ate: “Dimi mɛnaka dia mbala efula nna dia ntondo dia kɔlɔ diatakola wanɛ woka Jehowa ɔkɔngɔ ndo watshika ɔlɔngɔswamelo ande ele vɔ tshikaka dia nɔmbaka.” (Heberu 2:1) Kɛsɔ mbakakomɛ José Ángel. Nde mbutaka ate: “Suke l’ɛnɔnyi enanɛi w’etondo, dimi lakalɔmbaka Jehowa paka lo pai. Lakokaka di’oko halosungana tɛkɛta la nde, kânga mbakamatetemalaka mbɔ̂sa oko Shɔmi lele l’olongo.”
16, 17. Sha bɛnyɛlɔ diɛnya woho wakoka tokimanyiya alɔmbɛlɔ wa lushi la lushi dia tondoya wɛɔdu wa lo nyuma.
16 Amɔtshi l’atei aso koka mboka di’oko hawosungana nɔmba l’ɔtɛ wa wɛɔdu ɛmɔtshi wa lo nyuma wele lawɔ kana l’ɔtɛ wa dui dimɔtshi dia kɔlɔ diambowosala. Ko tete le l’etena kɛsɔ mbasungana mɛtɛ sho kondja wahɔ oma lo yɛdikɔ shɔ, mbut’ate oma lo dɔmbɛlɔ. Jɔna akalawɔ olimu wakawawosha. Koko ‘oma l’ɔkɛyi ande, Jɔna akalelɛ Jehowa, ko nde akoke delo diande. Jɔna akalelɛ Jehowa oma l’Odimu a Pɛngando dia nde mbokimanyiya ko Jehowa akoke dui dia nde.’ (Jona 2:2) Jɔna akalɔmbɛ, ko Jehowa akakadimola lo dɔmbɛlɔ diande ndo Jɔna akayokɔlɔnganaka lo nyuma.
17 José Ángel lawɔ akalɔmbɛ l’etete tshɛ dia kondja ekimanyielo. Nde mbohɔka ate: “Dimi lakadihola otema ami ndo lakalɔmbɛ Nzambi edimanyielo kande, ko nde akakimanyiya mɛtɛ. Hafɔnya dia lotokalola nto l’etshumanelo aha l’ekimanyielo ka dɔmbɛlɔ. Ɛlɔ kɛnɛ, lɔlɔmbaka mbala la mbala lushi tshɛ ndo dimi nongamɛka l’asolo walomɔlomɔ tena diatomɔlɔmbaka.” Hatohombe mengenga dia tɛkɛta la Nzambi lo kɛnɛ kendana la munga yaso ndo mbɔlɔmba edimanyielo la ndjâkitshakitsha tshɛ. Lam’akasuya Nkumekanga Davidi pɛkato yande, Jehowa akokimwɛyɔ. (Osambu 32:3-5) Jehowa nangaka tokimanyiya koko aha dia tânya. (1 Joani 3:19, 20) Ndo alɔmbɛlɔ wa dikumanyi dia l’etshumanelo koka tokimanyiya lo nyuma, nɛ di’alɔmbɛlɔ wa ngasɔ wekɔ la ‘wolo w’efula.’—Jakoba 5:13-16.
18. Eshikikelo kakɔna kele l’ekambi waki Nzambi oyadi wambotakɔ mboka woho akɔna?
18 Ombutshi akɔna wakoka tona ɔnande laya ndjɔlɔmba ekimanyielo la ndjâkitshakitsha tshɛ kana lalanga kondja dako l’ɔkɔngɔ wa nde sala munga kɛmɔtshi na? Wɛla w’ɔna la lotshito mɛnyaka di’oyadi tambotakɔ mboka woho akɔna, Shɛso lele l’olongo ngɛnangɛnaka etena kakalolaso le nde. (Luka 15:21, 22, 32) Jehowa keketshaka wanɛ wambonganɛ dia vɔ mbêlɛ, ‘nɛ dia nde dimanyiyɛka anto lo yɛdikɔ y’efula.’ (Isaya 55:6, 7) Kânga mbakasale Davidi pɛkato efula ya weke, nde akalelɛ Jehowa lo mbuta ate: “[Nzambi] li, uhukami dombelo diami, tuyasheki lam’akolombami.” Nde akate nto ate: “Dimi layukiyanaka, layukhumaka akhumu yanyi tshe, ku [Jehowa] ayumbukela.” (Osambu 55:1, 17) Dui sɔ toshaka mɛtɛ eshikikelo k’efula!
19. Naka tambɛna oko alɔmbɛlɔ aso hawokadimɔma, lande na kahatahombe mbɔsa dikambo sɔ oko djembetelo yɛnya dia hatoyetawɔma le Nzambi?
19 Kayotota naka Nzambi hakadimudi mbala kakɔ ɔtɔi l’alɔmbɛlɔ aso na? Lâsɔ sho pombaka ndjashikikɛ di’alɔmbɛlɔ aso mbɔtɔnɛka la lolango laki Jehowa ndo ɔnɛ sho mbatomaka lo lokombo la Yeso. (Joani 16:23; 1 Joani 5:14) Ombeki Jakɔba akatɛkɛta dikambo di’Akristo amɔtshi wele alɔmbɛlɔ awɔ kokadimɔma nɛ dia vɔ ‘wakalɔmbaka l’oyango wa kɔlɔ.’ (Jakoba 4:3) Lo wedi okina, naka tambɛna di’oko alɔmbɛlɔ aso hawokadimɔma, hatohombe mbuta esadi eto ɔnɛ hatoyetawɔma le Nzambi. Jehowa koka mbetawɔ mbala mɔtshi di’atɛmɔdi ande wa kɔlamelo tetemala la nɔmba lo dikambo dimɔtshi l’etena kɛmɔtshi la ntondo ka vɔ ndjɛna hwe dia nde amboshila kadimola lo dɔmbɛlɔ diawɔ. Yeso akate ate: ‘Nyotetemale la nɔmba, ko wayonyosha.’ (Mateu 7:7) Ɔnkɔnɛ, sho pombaka ‘tetemala lo dɔmbɛlɔ.’—Romo 12:12.
Tɔlɔmbake mbala la mbala
20, 21. (a) Bonde kahombaso tetemala la nɔmbaka lo “nshi y’ekumelu” nyɛ? (b) Kakɔna kayotolongola lo ndjasukanyaka lushi la lushi la ntondo ka kiti ka diolelo kaki Jehowa kanga ngandji k’otamanya na?
20 Tɔsɛngiya ndo ekakatanu wekɔ efula lo “nshi y’ekumelu” nyɛ yele la “tena dia wulu.” (2 Timote 3:1) Ndo yimba yaso mbeyaka tshɔ tshɛ l’ekakatanu wele laso. Koko alɔmbɛlɔ aso wa l’etete wayotokimanyiya dia kimɔ nsɛnɔ yaso tshɛ l’awui wa lo nyuma kânga l’atei w’ekakatanu, ehemba ndo ɔkɔmwɛlɔ waha pe. Alɔmbɛlɔ walɔmbaso Jehowa lushi la lushi koka tosha osukɔ weso l’ohomba.
21 Jehowa ɔnɛ “Latukaka dombelo,” hatotɛ pondjo ɔnɛ hakoke nyohokamɛ nɛ dia lekɔ la wesanu efula. (Osambu 65:2) Tatohekɔke pondjo dia tɛkɛta la nde. Lɔngɛnyi lasaso la Nzambi ndeka ɛngɔ tshɛ kakoka monga laso ohomba. Tatɔnyɔlake pondjo dikambo sɔ. ‘Ɔnkɔnɛ, tosukane la dihonga la ntondo ka kiti ka diolelo ka ngandji ka mamba, dia sho mbokama kɛtshi oma le Nzambi ndo mɛna ngandji kande ka mamba dikambo di’ekimanyielo kaso l’etena k’ɔlɔlɔ.’—Heberu 4:16.
Ngande wayoyokadimola?
• Kakɔna kekaso oma l’ɛnyɛlɔ kaki omvutshi Danyɛlɛ lo kɛnɛ kendana l’ohomba wa dɔmbɛlɔ?
• Ngande wakokaso keketsha lɔngɛnyi lasaso la Jehowa?
• Bonde kahombaso tetemala la nɔmbaka?
• Bonde kele tokanyi ta ndjaɔsa oko anto w’anyanya hahombe toshimba dia sho nɔmba Jehowa?
[Osato wa lo lɛkɛ 16]
Nehemiya akasale dɔmbɛlɔ dia mondo ndo dia l’etei k’otema la ntondo kande tɛkɛta la nkumekanga
[Osato wa lo lɛkɛ 17]
Hana ‘akalɔmbɛ etena k’otale la ntondo ka Jehowa’
[Esato wa lo lɛkɛ 18]
Yeso akalɔmbɛ otsho w’otondo la ntondo ka sɔna apɔstɔlɔ ande 12
[Esato wa lo lɛkɛ 20]
Sho kondjaka waaso wa nɔmba lo lushi l’otondo