Lâdiko dia ewo kanyu, nyokotsha ndjâkimɛ
‘Lâdiko dia ewo kanyu, nyokotsha ndjâkimɛ.’—2 PETERO 1:5-8.
1. Efula k’ekakatanu wele l’anto ndjaka oma lo woho wewɔ bu l’akoka wa sala dikambo diakɔna?
L’ETENA kakawaleke ndɔshana la nɔɔnɔ dia wolo l’États-Unis, akɛnda wa lo wodja ɔsɔ wakalongola dako diata ɔnɛ: “Ta wate hayi.” Otonga mɛtɛ dikambo dia dimɛna efula otondonga onto tshɛ sala dia tona aha tsho nɔɔnɔ dia wolo koko ndo ɔnwɛlɔ wa wanu wa tshambandeko, lɔsɛnɔ l’awui a mindo, okanda wa lokeso ndo ‘nsaki ya demba ya kɔlɔ!’ (Romo 13:14) Ko onto akɔna akoka sɛma ate, mbuta hayi ekɔ dikambo dia wɔdu na?
2. (a) Naa bɛnyɛlɔ diele lo Bible diɛnya dia okakatanu wa mbuta ɔnɛ hayi wakamɛ oma k’edjedja? (b) Bɛnyɛlɔ sɔ tokeketshaka dia sala na?
2 Lam’ele anto tshɛ wele bu kokele wekɔ l’okakatanu dia monga la ndjâkimɛ, sho pombaka nyanga dia mbeka woho wa mbidja otshumba lo ta dia nɛndja wɛɔdu aso wa demba. Bible tɛkɛtaka dikambo di’anto amɔtshi wakasɛnaka lo nshi y’edjedja wakasale la wolo dia kambɛ Nzambi olimu koko waki l’okakatanu lo tena dimɔtshi dia mbuta ɔnɛ hayi l’akambo amɔtshi. Tohɔ dikambo diaki Davidi ndo dia pɛkato kande ka monanyi kakandasale la Batɛshɛba. Pɛkato kɛsɔ kakakonya lo nyɔi k’ɔna lakandote oma lo monanyi ndo k’om’aki Batɛshɛba. Vɔ tshɛ waki anto waki komonga l’onongo. (2 Samuele 11:1-27; 12:15-18) Kana ohokanyiya dikambo di’ɔpɔstɔlɔ Paulo laketawɔ lo sɛkɛ ate: “Dimi hatutshaka akambu w’ololo walangami ntsha, keli latutshaka akambu wa kolo wahamalangi ntsha.” (Romo 7:19) Onde ndo wɛ mbatoyakiyanyaka ngasɔ tena dimɔtshi? Paulo akatetemala ate: “Dimi ngenangenaka l’elembe wa [Nzambi] uma k’esi utema. Keli dimi lambushula olembe ukina walo la olembe wa lu yimba yami ta l’atei wa beke dia dimba diami. Olembe ako ambumbete fumbe k’olembe wa kolo keli lu beke diami dia dimba. Omenyi fono mbemi! Akona ayutshungula uma lu dimba dia nyoi ne?” (Romo 7:22-24) Bɛnyɛlɔ diele lo Bible koka keketsha yɛdikɔ yaso yaha mpekɔ pondjo lo welo wadjaso dia nyomoleka monga la ndjâkimɛ.
Ndjâkimɛ ekɔ dionga diahomba mbekama
3. Lembetshiya lande na kahatakoke nongamɛ di’ɔnɛ kɛnɛmɔla ndjâkimɛ ekɔ dikambo dia wɔdu.
3 Ndjâkimɛ kele ndo la dikoka dia mbuta ɔnɛ hayi, shilama lo 2 Petero 1:5-7 kâmɛ la mbetawɔ, lɔkɛwɔ l’ɔlɔlɔ, ewo, ekikelo, omamemelo le Nzambi, lolango l’onto l’ɔnango, ndo ngandji. Lo waonga w’amɛna asɔ tshɛ, ndoko dionga diotɔso ladiɔ. Sho pombaka mbeka dia monga lawɔ. Dia kɛnɛmɔla waonga asɔ lo yɛdikɔ y’efula, sho pombaka mbɔsa yɛdikɔ ndo mbidja welo. Onde lâsɔ sho koka nongamɛ ɔnɛ monga la ndjâkimɛ ekɔ dikambo dia wɔdu efula?
4. Lande na k’ɔsa anto efula dia vɔ bu l’ohomba wa monga la ndjâkimɛ ko dikambo sɔ ɛnyadiɔ na?
4 Lo mɛtɛ, anto efula mbeyaka mbɔsa di’oko vɔ bu l’ohomba wa monga la ndjâkimɛ. Vɔ wekɔ lo sɛna woho walangawɔ, oyadi vɔ mbeyaka kana haweye, vɔ wekɔ lo sɛna lo ndjela kɛnɛ kawatshutshuya yimba yawɔ yele bu kokele ndo hawodje yimba l’etombelo wa kɔlɔ wele la dionga diawɔ oyadi le wɔ vɔamɛ kana le anto akina. (Jude 10) Oshishelo wa dikoka ndo wa lolango la mbuta ɔnɛ hayi wamboleka mɛnama nshi nyɛ oleki nshi ya ntondo. Kɛsɔ mɛnyaka mɛtɛ dia tekɔ lo sɛna lo “nshi y’ekumelu” yakatɛkɛta Paulo ate: “Tena dia wulu diayuyala. Antu wayuyalanga, wayulanga ukundji, wayosema, wayutakula, wayotengana, . . wahayakimela.”—2 Timote 3:1-3.
5. Lande na kadja Ɛmɛnyi wa Jehowa yimba lo dikambo dia ndjâkimɛ, ndo naa dako diakashama lo dikambo sɔ diele diekekɔ ohomba ɛlɔ kɛnɛ?
5 Ɛmɛnyi wa Jehowa mbeyaka dimɛna ɔnɛ monga la ndjâkimɛ ekɔ dikambo dia wolo. L’ɛnyɛlɔ kaki Paulo, vɔ mbeyaka dimɛna dia ekɔ tshondo ya ta mbele lam’asa nsaki ka ngɛnyangɛnya Nzambi lo sɛna yoho y’ɔtɔnɛ l’ɛlɛmbɛ ande la yoho ya lɔsɛnɔ yâtshutshuya yimba yawɔ yele bu kokele dia monga layɔ. Diakɔ diele, aya edja efula kayangawɔ dia mbidja otshumba lo ta dialɔshana nsaki hiende shɔ. Lo 1916, numɛlɔ kɛmɔtshi k’edjedja ka jurunalɛ yadiayɛ nyɛ kakatɛkɛta dia “yoho ya lɔsɛnɔ ya dimɛna yahombaso sɛna lo mbahemɛ demba, tokanyi, ɛtɛkɛta, ndo lɔkɛwɔ laso.” Yɔ yakɛnya ohomba wa kimɛ divɛsa dia lo Filipi 4:8 lo yimba. Dako di’oma le Nzambi diele lo divɛsa sɔ diekekɔ ohomba ɛlɔ kɛnɛ kânga mbele aya oko ɛnɔnyi 2000 wakadiashama ndo ondo amboleka wolo dikitanyiya ɛlɔ kɛnɛ oleki l’etena kakadiafundama kana lo 1916. Diakɔ mbele, Akristo wekɔ lo sala la wolo dia mbuta ɔnɛ hayi la ntondo ka nsaki ya l’andja ɔnɛ nɛ dia vɔ mbeyaka ɔnɛ lo sala dikambo sɔ vɔ mɛnyaka dia wekɔ lo mbetawɔ kɛnɛ kawatɛ Otungi awɔ.
6. Lande na kele hatohombe kɔmɔ otema etena kayangaso dia monga la ndjâkimɛ?
6 Lo Ngalatiya 5:22, 23 ndjâkimɛ shilama l’ɔnɔngɔ w’‘elowa wa nyuma k’ekila.’ Naka sho kɛnɛmɔla dionga sɔ kâmɛ la ‘ngandji, ɔngɛnɔngɛnɔ, ki, solo dia lotutsha, kɛtshi, ɔlɔlɔ, mbetawɔ, ndo memakana,’ kete tayokondja wahɔ efula. Sala dikambo sɔ ayotoshimba, oko wakate Petero, di’aha sho monga ‘anto wambɔla yɔɔ kana wahatɔ elowa’ l’olimu wakambɛso Nzambi. (2 Petero 1:8) Koko hatohombe kɔmɔ otema kana mɛna dia ndoko k’ɔlɔ kakokaso sala naka hatɔkɛnɛmɔdi waonga asɔ esadi esadi ndo lo yoho yakombolaso. Ondo wɛ ambɛnaka dia lo kalasa ombeki ɔmɔtshi mbeyaka kimɛ akambo esadi esadi oleki ambeki okina. Kana l’olimu, onto ɔmɔtshi mbeyaka mbeka ɔkɛndɛ ɔmɔtshi w’oyoyo esadi eto oleki asekande akina wakamba lande. Woho akɔ wamɛ mbele anto amɔtshi mbekaka ndo kɛnɛmɔlaka waonga w’Okristo esadi esadi oleki akina. Kɛnɛ kele ohomba ele, tetemala la kɛnɛmɔla waonga wangɛnyangɛnya Nzambi lo yɛdikɔ yɛdimi l’akoka aso. Tayokoka sala dikambo sɔ lo kamba dimɛna l’ekimanyielo kasha Jehowa lo tshimbo y’Ɔtɛkɛta ande ndo y’etshumanelo. Yɛdikɔ ya mbidja welo dia tetemala la pama mboleki ohomba lo dihole dia nyanga dia kotsha oyango aso esadi esadi amboleka.
7. Kakɔna kɛnya dia ndjâkimɛ ekɔ ohomba?
7 Sho la dia mbeyaka dia sho koka mbewɔ “etsha wa dimba” naka sho monga la ndjâkimɛ ka dimɛna. Koko anto wele bu kokele wekɔ la sɔngu ka sala ‘etsha ɛmɔtshi wa demba oko monanyi, akambo wa sɔnyi, nsaki y’akambo wa kɔlɔ, ɔtɛmwɛlɔ wa dikishi, diɔtɔnganelo dia l’ɛdiɛngɛ, lotunu, otshanu, kandjema, kɛlɛ, diatɔnelo, shɛmanedi, tâmu, tato.’ (Ngalatiya 5:19, 20) Ɔnkɔnɛ, sho pombaka tetemala ndɔsha la wolo ndo ndjashikikɛ dia minya nsaki ya kɔlɔ yaya oyadi oma l’otema kana lo yimba.
Anto amɔtshi wekɔ l’okakatanu efula dia monga la ndjâkimɛ
8. Akambo akɔna wakoka mbetɛ monga la ndjâkimɛ dikambo dia wolo efula le anto amɔtshi?
8 Akristo amɔtshi wekɔ l’okakatanu efula dia monga la ndjâkimɛ oleki akina. Lande na? Woho wakawodiama oma le ambutshi awɔ, kana akambo amɔtshi wakâkomɛ mbeyaka ndjokonya ndjâkimɛ dikambo dia wolo le wɔ. Naka sho bu l’okakatanu dia monga kana dia kɛnɛmɔla ndjâkimɛ, kete tekɔ l’ɔkɔkɔ wa monga l’ɔngɛnɔngɛnɔ. Koko, sho pombaka mɛtɛ monga la kɛtshi ndo la eokelo k’ɔlɔlɔ otsha le wanɛ wele l’okakatanu efula dia monga la ndjâkimɛ, oyadi kânga woho wewɔ bu la dionga sɔ toshaka pâ lo lomu. Lam’ele sho tshɛ kema anto wa kokele, akɔna l’atei aso lele l’ɔkɔkɔ w’oshika wa pomɛ tolo ɔnɛ dimi kele onto losembwe?—Romo 3:23; Efeso 4:2.
9. Naa wɛɔdu w’alemba wele l’anto amɔtshi, ndo etena kakɔna kayoshila wɛɔdu ɛsɔ tshɛ?
9 Ɛnyɛlɔ: Ondo sho koka mbeya dia asekaso amɔtshi w’Akristo wakatshike nɔ mfɔka kana nɔɔnɔ dia wolo diahaleke mbidjoya efula mbeyaka monga ko wekekɔ mbala mɔtshi la nsaki k’efula ka diangɔ sɔ. Kana amɔtshi wele l’okakatanu dia tshika deshi kana nɔshi dia tshambandeko. Akina wekɔ l’okakatanu dia nama nemi yawɔ, oma lɔkɔ, vɔ takanaka mbala efula l’ɛtɛkɛta. Dia ndɔshana la wɛɔdu wa demba ɛsɔ, pombaka sala la wolo tshɛ dia monga la ndjâkimɛ. Lande na? Jakoba 3:2 suyaka l’ɔlɔlɔ tshɛ ɔnɛ: “Shu tshe takanaka lu akambu efula. Naka untu hatakana lu [ɛtɛkɛta] andi, keti ndi ambuluwana, ndi mbeyaka nshimbela dimba diandi tshe.” Amɔtshi wekekɔ la mposa ka wolo ka kɛnya tɔkɛnyɔ ta falanga. Kana vɔ mbeyaka monga l’okakatanu dia mbahemɛ waonga awɔ wa kɔlɔ. Mbeyaka mbɔsa nshi kambe dia mbeka woho wa ndɔshana dimɛna la wɛɔdu wa demba ɛsɔ kana wɛɔdu ekina wa woho akɔ. Oyadi ohamelo wa woho akɔna wayotosala lo kɛnɛ kendana l’ɔlɔshanelo wa la wɛɔdu wa demba, nsaki ya kɔlɔ shɔ yayoyoshila tshɛ paka etena kayotokoma anto wa kokele. L’etena kâkatakongɛ dikambo sɔ, sala la wolo tshɛ dia monga la ndjâkimɛ ayotokimanyiya dia mbewɔ kalola nto lo yoho ya lɔsɛnɔ ya kɔlɔ. Lam’atatatetemala la ndɔ ta sɔ, nyɛsɔ tokimanyiyanake lam’asaso aha la sho mpekɔ.—Etsha 14:21, 22.
10. (a) Lande na kele monga la ndjâkimɛ l’akambo wa dieyanelo ekɔ dikambo dia wolo efula le anto amɔtshi? (b) Otshikitanu akɔna wa wolo wakasale ɔnangɛso ɔmɔtshi? (Enda kiombo ya lo lɛkɛ 16.)
10 Dikambo dikina diele anto amɔtshi wekɔ l’okakatanu efula dia monga la ndjâkimɛ ele dikambo dia dieyanelo. Nzambi akatotonge sho onto la mposa ka dieyanelo. Koko, anto amɔtshi wekɔ l’okakatanu efula dia mbidja dieyanelo lo dihole diahombama mbut’ate, lo ndjela kɛnɛ kata ɛlɛmbɛ waki Nzambi. Okakatanu awɔ mbeyaka ndeka monga wolo nɛ dia vɔ wekɔ la mposa ka dieyanelo ka wolo efula. Tɛkɔ lo sɛna l’andja wele l’ofukutanu l’akambo wa dieyanelo, andja waleka tshutshuya mposa ka dieyanelo lo toho efula totshikitanyi. Kɛsɔ mbeyaka monga okakatanu le Akristo walanga tshikala enyemba lo tshanda mɔtshi dia vɔ tokokambɛ Nzambi aha la wesanu wendana la diwala. (1 Koreto 7:32, 33, 37, 38) Koko, lo ndjela dako dia l’Afundelo diata dia ‘ndeka dimɛna tshuka kana tshukama lo dihole dia mɛnaka pâ la mposa,’ vɔ mbeyaka mbɔsa yɛdikɔ ya tshuka kana tshukama nɛ dia dikambo sɔ bu kɔlɔ. Koko, l’etena kakɔ kâmɛ vɔ mbɔsaka yɛdikɔ ya tshukana “paka lu lulangu la Khumadiondjo,” oko walaka Afundelo. (1 Koreto 7:9, 39) Sho koka ndjâshikikɛ dia Jehowa ngɛnangɛnaka lo kɛnɛ kasalawɔ dia ndjela atɔndɔ ande wa losembwe. Asekawɔ Akristo mbɔsaka di’ekɔ dikambo di’ɔngɛnɔngɛnɔ efula dia monga kâmɛ l’atɛmɔdi wa mɛtɛ wakitanyiya ɛlɛmbɛ wa lâdiko ɛsɔ wendana la lɔkɛwɔ ndo w’olowanyi.
11. Ngande wakokaso kimanyiya ɔnangɛso kana kadiyɛso kalanga tshuka kana tshukama koko atakondja diaaso dia sala dikambo sɔ?
11 Ko akoka salema naka onto hatane olonganyi wakoka lande? Ohokanyiya okiyanu wakoka monga l’onto lalanga tshuka kana tshukama koko nde bu l’akoka wa sala dikambo sɔ! Ondo nde ekɔ lo mɛna woho watshuka kana watshukama asekande ndo wongawɔ l’ɔngɛnɔngɛnɔ lo yɛdikɔ mɔtshi, koko nde atatane olonganyi wahombama lende. Le amɔtshi wele l’okakatanu ɔsɔ, vɔ mbeyaka ndjoyasha mbala la mbala lo tshelo ya mindo ya esuse. Lo weho tshɛ, ndoko Okristo walanga aha la nde mbeya kɔmɔla otema w’osekande lasala la wolo dia tshikala pudipudi la ntondo ka nde tshuka kana tshukama. Koko, sho koka kɔmɔla osekaso Okristo otema aha la mbeya lo mombola wembola wahasungana wele oko: “Nshi yakɔna yayotshuka kana yayotshukama?” Onto mbeyaka mbuta dikambo sɔ aha la nde monga la kanyi ya kɔlɔ, koko ekɔ dimɛna efula dia sho monga la ndjâkimɛ lo nama lolemi laso! (Osambu 39:1) Enyemba wele l’atei aso watshikala pudipudi sunganaka dia sho mbawandola l’otema ɔtɔi. Lo dihole dia tondja ɛtɛkɛta wakoka kɔmɔla onto otema, sho la dia sala la wolo dia tondja ɛtɛkɛta wakeketsha. Ɛnyɛlɔ, sho koka sala la wolo dia mbetaka ndo enyemba etena ketaso epalanga ɛmɔtshi dia sho sanga lonya lo dambo dimɔtshi kana l’osanganelo ɔmɔtshi wa dimɛna w’Akristo.
Ndjâkimɛ lo diwala
12. Lande na kele ekɔ ohomba kânga le atshukanyi dia monga la ndjâkimɛ?
12 Tshuka kana tshukama hanya ohomba wa monga la ndjâkimɛ l’akambo wendana la dieyanelo. Ɛnyɛlɔ, mposa ka dieyanelo kaki omi kana ka wadi mbeyaka tshikitana efula. Kana demba diaki olonganyi ɔmɔtshi mbeyaka konya dieyanelo dia dimɛna dikambo dia wolo kana diahakoke salema. Ondo l’ɔtɛ wa kɛnɛ kakôkomɛ ntondo, olonganyi ɔmɔtshi mbeyaka monga l’okakatanu dia kitanyiya dako diata ɔnɛ: “Umi akitshiya wadendi lam’alangandi; ndu wadi akitshiya umendi lam’alangandi.” Lo tena dia ngasɔ, olonganyi okina mbeyaka monga l’ohomba wa nyomoleka monga la ndjâkimɛ. Koko vɔ tshɛ koka mbohɔka dako dia la ngandji diakasha Paulo Akristo wotshukanyi ate: ‘Tanyodimanake tshikima nyambokana lo tshanda mɔtshi, dia nyu ndjasha lo dɔmbɛlɔ ko nyu ndjonga kâmɛ nto, di’aha Satana ndjonyohemba l’ɔtɛ wahanyakoke ndjâkimɛ.’—1 Koreto 7:3, 5.
13. Kakɔna kakokaso sala lo dikambo di’anto wasala la wolo dia monga la ndjâkimɛ na?
13 Atshukanyi koka monga l’ɔngɛnɔngɛnɔ efula mɛtɛ naka vɔ tshɛ mbeka dia monga la ndjâkimɛ ka dimɛna lo kɛnɛ kendana la diɔtɔnganelo di’oleki mbakakatanya sɔ, mbut’ate dieyanelo. Koko, vɔ pombaka nto monga la eokelo ka dimɛna otsha le asekawɔ atɛmɔdi wâkalɔsha la wolo dia monga la ndjâkimɛ lo dikambo sɔ. Tatohɛke pondjo dia nɔmba Jehowa dia nde mbisha anangɛso wa lo nyuma lomba, dihonga ndo wolo wa vɔ tetemala ndɔ ta dia monga la ndjâkimɛ ndo dia vɔ takola wanya wahombama dia mbidja nsaki ya kɔlɔ otshumba.—Filipi 4:6, 7.
Totetemale kimanyiyana lam’asaso
14. Lande na kahombaso monga la kɛtshi ndo la eokelo ka dimɛna otsha le asekaso Akristo?
14 Mbala mɔtshi, sho mbeyaka mɛna wolo dia monga la eokelo ka dimɛna otsha le asekaso Akristo walɔsha la wolo dia monga la ndjâkimɛ l’akambo weso bu l’okakatanu dia kɛnɛmɔla dikoka sɔ. Koko anto tshɛ bu woho ɔtɔi. Le amɔtshi, nsaki yawɔ mbalekaka wolo etena kele akina wekɔ l’akoka wa mbahemɛ nsaki yawɔ. Amɔtshi bu kânga la yema y’okakatanu tshitshɛ dia ndjalama, ndo le wɔ monga la ndjâkimɛ bu dikambo dia wolo. Akina wekɔ l’okakatanu efula lo dikambo sɔ. Koko, tatohɛke di’onto lalɔsha dia tshika tshelo mɔtshi bu onto la kɔlɔ. Asekaso Akristo wekɔ l’ohomba wa eokelo kaso ka dimɛna ndo wa sho mbaoka kɛtshi. Ɔngɛnɔngɛnɔ aso nemanɛka nto la woho watetemalaso mboka wanɛ walɔsha dia pamia ndjâkimɛ kɛtshi. Sho koka mɛna dikambo sɔ l’ɛtɛkɛta waki Yeso wele lo Mateu 5:7.
15. Bonde kele ɛtɛkɛta wele l’Osambu 130:3 mbishaka ekeketshelo lo kɛnɛ kendana la ndjâkimɛ?
15 Hatohombe pondjo kanɛ osekaso Okristo kɔlɔ l’ɔtɛ w’ɔnɛ lo tena dimɔtshi nde hakɛnɛmɔla lonto l’Okristo. Ekɔ mɛtɛ dikambo di’ekeketshelo etena keyaso ɔnɛ, sho kɔkɔ̂ka mbala ɔtɔi, Jehowa mɛnaka efula ka mbala yahatakɔ kânga mbele asekaso Akristo hawɛnyi mbala shɔ tshɛ. Sho kondjaka ekeketshelo koleki tshɛ lo mbohɔka ɛtɛkɛta wele l’Osambu 130:3 wata ɔnɛ: “[Jehowa], utunduyala we ali efula ka kolo, we Khumadiondjo, akona ututshikala?”
16, 17. (a) Ngande wakokaso kamba la Ngalatiya 6:2, 5 lo kɛnɛ kendana la ndjâkimɛ? (b) Kakɔna kayotɔsɛdingola nto lo dikambo dia ndjâkimɛ?
16 Dia ngɛnyangɛnya Jehowa, sho tshɛ onto l’onto pombaka monga la ndjâkimɛ, koko sho koka monga l’eshikikelo dia anangɛso w’Akristo wayotokimanyiya lo dikambo sɔ. Kânga mbele onto ndamɛ mbahomba mɛmba wotsho ande, sho keketshamaka dia kimanyiyana woho wa ndɔsha wɛɔdu wa demba. (Ngalatiya 6:2, 5) Sho koka monga la dilɛmiyɛlɔ otsha le ombutshi, olonganyi, kana osekaso latoshimba di’aha sho ntshɔ l’ahole wahatahombe ntshɔ, di’aha sho menda diangɔ diahatahombe menda, kana di’aha sho sala akambo wahatahombe sala. Onto ɔsɔ ekɔ lo tokimanyiya dia sho monga la ndjâkimɛ!
17 Akristo efula mbeyaka mbetawɔ kɛnɛ kɔtɛkɛtshiso lo dikambo dia ndjâkimɛ, koko ondo vɔ wambɛna dia wakahombe nyomoyalɔngɔsɔla efula lo dikambo sɔ. Ondo vɔ kombolaka nyomoleka kɛnɛmɔla ndjâkimɛ lo yɛdikɔ yahombama le onto lele bu kokele. Onde ngasɔ mbediɔ le yɛ? Ko kakɔna kakokayɛ sala dia kɛnɛmɔla olowa ɔsɔ wa nyuma ka Nzambi na? Ndo ngande wakoka okotshelo w’akambo asɔ kokimanyiya l’eyango ayɛ wa nshi yayaye oko weye Okristo na? Sawo diayaye diayokadimola lo wembola ɛsɔ.
Onde wɛ akohɔ?
Lande na kele ndjâkimɛ . . .
• kekɔ ohomba le Akristo?
• kekɔ wolo le anto amɔtshi?
• kekɔ ohomba lo diwala?
• kekɔ dionga diahombaso kimanyiyana dia monga ladiɔ?
[Kiombo/Osato wa lo lɛkɛ 16]
Nde akeke dia mbuta ate hayi
Ɔmɛnyi wa Jehowa ɔmɔtshi wa l’Allemagne akakambaka oko jɛra lo luudu lɔmɔtshi la tita sango. Nde aki nto l’ɔkɛndɛ wa mendaka prɔgramɛ 30 yaketaka lo televiziɔ ndo lo aradiyo. Wonya waki alɛdi kɔmɛnamaka dimɛna lo televiziɔ, nde akahombaka menda dimɛna dimɛna dia mbeya lende ele ɛkɔmɔ. Nde akate ate: “Ofukutanu w’alɛdi wakasalemaka suke la mbala tshɛ paka lo wonya wa kɔlɔ, mbut’ate wonya wakawɛnyaka awui wa ngala kana wa dieyanelo. Akambo wa mindo wakamɛnaka wakatshikalaka lo yimba yami nshi kana mingu efula watekana oko wakafundama lo wɔɔngɔ ami.” Nde suyaka dia dikambo sɔ diaki la shɛngiya ya kɔlɔ lo lonyuma lande. Nde mbutaka ate: “Dimi lakayotatɛ monga kanga ɛkɛlɛkɛlɛ, nɛ dia awui wa ngala wakamɛnaka akayombisha okakatanu dia dimi monga la ndjâkimɛ. Awui wa dieyanelo wakamɛnaka wakayotondjaka okakatanu lam’asami la wadɛmi. Dimi lakalɔka ta dia ta lushi tshɛ dia shika tanga la ntondo ka tɔsɛngiya ta kɔlɔ tɔsɔ. Di’aha tɔsɛngiya ta kɔlɔ tɔsɔ ndjombahemɛ, lakɔshi yɛdikɔ ya nyanga olimu okina, oyadi kânga difuto dia lɛkɔ diayonga yema tshitshɛ. Kombeta edja, dimi lakakondja olimu okina. Kɛnɛ kakamakombolaka kakakotshama.”
[Esato wa lo lɛkɛ 15]
Ewo k’oma lo wekelo wa Bible tokimanyiyaka dia monga la ndjâkimɛ