Dia kondja difuto, tonge la ndjâkimɛ!
‘Onto tshɛ lɔtɔ lo kɛnyɔ y’ɔsɛmanelo, mongaka la ndjâkimɛ l’akambo tshɛ.’—1 KORETO 9:25.
1. Lo ndjela Efeso 4:22-24, ngande waketawɔ miliyɔ y’anto dia sala lolango laki Jehowa?
NAKA wɛ ambobatizamaka oko Ɔmɛnyi wa Jehowa, kete wɛ akɛnya lo sɛkɛ dia wɛ nangaka ndawɔ lowango lele la difuto dia lɔsɛnɔ la pondjo. Wɛ aketawɔ dia salaka lolango laki Jehowa. La ntondo ka ndjakimɔ le Jehowa, efula ka l’atei aso wakahombe sala etshikitanu wa weke dia ndjakimɔ kawɔ monga dikambo di’oshika ndo dietawɔma le Nzambi. Takayele dako nɛ diakasha Paulo Akristo ate: ‘Nyonya ditshelo dia dionga dianyu dia ntondo, lonto l’edjedja, latolangaka dia ndjela saki ya lokeso. Nyɔlɔtɛ lonto l’oyoyo, lakatongama lo ndjela losembwe la kɔlamelo ya mɛtɛ.’ (Efeso 4:22-24) L’ɛtɛkɛta ekina, la ntondo ka ndjalambola le Nzambi, sho pombaka tshika yoho ya lɔsɛnɔ y’edjedja yahetawɔma.
2, 3. Ngande wɛnya 1 Koreto 6:9-12 dia weho ehende w’etshikitanu wekɔ ohomba di’onto mbetawɔma le Nzambi?
2 Akambo amɔtshi wendana la lonto l’edjedja wahomba wanɛ walanga koma Ɛmɛnyi wa Jehowa tshika wekɔ ditshelo diasekɛma lo yoho ya hwe l’Ɔtɛkɛta wa Nzambi. Paulo akashile akambo amɔtshi latei awɔ lo mukanda wakandafundɛ ase Kɔrɛtɔ, lo mbuta ate: “Atshi w’akambu wa sonyi, kuyanga atemodi wa dikishi, kuyanga amunanyi, kuyanga akanga a nende, kuyanga atshi w’akambu wa sonyi la apami, kuyanga evi, kuyanga akanga w’ekomiya, kuyanga ambidjoki a wanu, kuyanga atenganyi, kuyanga apotwanyi, vo tshe hawukiti diulelu dia [Nzambi].” Oma lâsɔ, nde akɛnya di’Akristo wa lo ntambe ka ntondo wakasale etshikitanu wahombama wendana la lonto lawɔ, lo kotsha ate: “Nyu amotshi nyaki osoku.” Tolembete dia nde akate ate, nyu nyaki koko aha ɔnɛ nyu nyekɔ.—1 Koreto 6:9-11.
3 Paulo akɛnya dia etshikitanu ekina wakahombe monga nto ohomba, nɛ dia nde akatetemala mbuta ate: “Dimi la wulu wa ntsha akambu tshe, keli aha akambu tshe mbusunganyi.” (1 Koreto 6:12) Diakɔ diele, efula k’anto walanga koma Ɛmɛnyi wa Jehowa ɛlɔ kɛnɛ tonaka dia sala akambo amɔtshi oyadi kânga vɔ bu kɔlɔ nɛ dia akambo akɔ bu ohomba efula kana wekɔ paka la nɛmɔ dia lo tshanda mɔtshi tsho. Akambo asɔ mbeyaka mbaɔsɛ wenya efula ndo mbekola timba tawɔ diaha vɔ tetemala la mbesa akambo woleki ohomba.
4. Ɛtɛkɛta akɔna wakafunde Paulo wetawɔ Akristo wamboyakimɔ le Nzambi?
4 Lam’ele ndjakimɔ le Nzambi ekɔ oko onto layalambola la tshondo, onto pombaka sala dikambo sɔ la lolango lande hita koko aha lo tshutshuyama la wolo. Akristo wamboyakimɔ le Nzambi mbetawɔka ɛtɛkɛta ɛnɛ waki Paulo wakandate l’ɔkɔngɔ wa nde koma Okristo ate: “Dimi lakashisha diango tshe dikambu dia [Kristo], lambudiala uku diango dia mbikadja, dia dimi kundja Kristu.” (Filipi 3:8) Paulo aketawɔ dia tshika diangɔ diele bu ohomba efula woho wa nde tetemala la kambɛ Nzambi.
5. Lo woho akɔna wa lowango lakatondoya Paulo, ndo ngande wakokaso sala oko nde?
5 Paulo aki la ndjâkimɛ lo lowango lande l’Okristo ndo akakoke mbuta l’ekomelo ate: “Dimi lakalo ta di’ololo, lambushidiya esakelu ka luwangu, lakalami mbetawo. Okone wambunkitshiya dembo dia kusu di’akambu w’ololo, diayumbisha Khumadiondjo, umbadi w’ololo, lushi lako. Ndi humbishadio dime, keli ndu wane tshe wakalangi mena enelo kandi.” (2 Timote 4:7, 8) Onde sho tayonga l’akoka wa mbuta ngasɔ lushi lɔmɔtshi? Tayokoka mbuta ngasɔ naka sho monga la ndjâkimɛ etena katatalawɔ lowango laso l’Okristo aha la mpekɔ polo l’ekomelo.
Ekɔ ohomba monga la ndjâkimɛ dia sala ɔlɔlɔ
6. Ndjâkimɛ kɛdikɛdi na, ndo naa toho tohende tahombaso kiɛnya?
6 Tshɛkɛta ya lo Hɛbɛru ndo ya lo Grɛkɛ yokadimɔmi lo Bible ɔnɛ ‘ndjâkimɛ’ nembetshiyaka di’onto ekɔ la wolo lâdiko diande kana nde ndjahemɛ ndamɛ. Mbala efula yɔ mɛnyaka woho wayakimɛ onto diaha nde sala kɛnɛ kele kɔlɔ. Koko, mbokɛmaka dia sho pombaka nto mɛnya ndjâkimɛ lo yɛdikɔ mɔtshi etena kakambaso l’alemba aso dia sala elimu w’ɔlɔlɔ. Oko weso anto wele bu kokele, sho mbotɔka la saki ka sala kɛnɛ kele kɔlɔ, lasɔ tekɔ la weho ehende w’ata wahombaso ndɔ. (Undaki 7:29; 8:11) Etena kayalamaso di’aha sala kɛnɛ kele kɔlɔ, sho pombaka nto sala la wolo dia tshaka kɛnɛ kele ɔlɔlɔ. Eelo, nama alemba aso di’aha sala kɛnɛ kele kɔlɔ ekɔ yoho mɔtshi latei wa toho toleki amɛna ta mbewɔ kɔlɔ.
7. (a) Lo dikambo diakɔna diahombaso nɔmba oko wakasale Davidi? (b) Kana yimba l’akambo akɔna wayototshutshuya dia ndeka monga la ndjâkimɛ?
7 Aha la tâmu, ndjâkimɛ ekɔ ohomba efula naka talanga sɛna lo yoho yɔtɔnɛ la ndjakimɔ kaso le Nzambi. Sho pombaka nɔmba woho wakalɔmbɛ Davidi ɔnɛ: ‘Nzambi le, ombisha otema wa pudipudi, ndo yimba y’oyoyo, yele nge.’ (Osambu 51:10) Sho koka kana yimba l’ɛlɔlɔ waya oma lo mbewɔ akambo wa kɔlɔ kana wakoka tela wâle l’alemba. Ohokanyiya wâle wakoka tokomɛ naka hatotondoyisha dia mbewɔ akambo asɔ: hemɔ ya wolo, ohandjwelo wa lɔngɛnyi la lam’asaso l’anto, ndo kânga nyɔi ka wanyandja. Lo wedi okina, tokanyiya yema di’efula k’ɛlɔlɔ wakokaso kondja lo sɛna yoho ya lɔsɛnɔ yatetsha Jehowa. Koko, lo mɛtɛ tatoheke di’otema aso wekɔ lokeso. (Jeremiya 17:9) Sho pombaka mbɔsa yɛdikɔ ya shika tanga lo tɔsɛngiya t’oma l’otema aso tatotshutshuya dia minya yimba lo wadjango waki Jehowa.
8. Mɛtɛ kakɔna keyaso oma l’akambo watokomɛ? Sha ɛnyɛlɔ.
8 Efula ka l’atei aso mbeyaka oma lo kɛnɛ kakâkomɛ dia mbala efula nsaki yaso ya demba ya kɔlɔ nyangaka dia nima dja ya nsaki kele laso ka sala ɔlɔlɔ. Tɔshi ɛnyɛlɔ k’olimu w’esambishelo ka Diolelo. Jehowa ngɛnangɛnaka woho wetawɔ anto dia kamba olimu ɔsɔ washimbɛ nsɛnɔ. (Osambu 110:3; Mateu 24:14) Koko le efula ka l’atei aso, monga la mbekelo ka sambisha lo sɛkɛ komonga dikambo dia wɔdu. Dikambo sɔ akalɔmbaka, ndo ondo diakalɔmbɛ dia sho mbahemɛ demba diaso, ‘dikɔmɔla’ ndo ‘dilɛmbia oko fumbe,’ lo dihole dia ditshikɛ dihole dia diɔ totoma dia sala kɛnɛ kadingɛnyangɛnya.—1 Koreto 9:16, 27; 1 Tesalonika 2:2.
Onde ‘l’akambo tshɛ’?
9, 10. Kakɔna kalɔmbama dia monga la ‘ndjâkimɛ l’akambo tshɛ’?
9 Dako diele lo Bible diata dia sho monga la ‘ndjâkimɛ l’akambo tshɛ’ mɛnyaka dia hatohombe tsho pembetɛ lo mbahemɛ dionga diaso kana lo tshika lɔkɛwɔ la kɔlɔ. Sho mbeyaka mɛna dia tekɔ la ndjâkimɛ l’akambo asɔ, ndo naka ngasɔ mbediɔ, kete sho mɛtɛ koka monga l’ɔkɔkɔ wa ndjala la lowando. Ko kayotota l’akambo akina wa lo lɔsɛnɔ wele ondo ohomba wa ndjâkimɛ hawoleke mɛnama na? Ɛnyɛlɔ, tɔshi di’onto ɔmɔtshi ekɔ lo sɛna lo wodja w’ɔngɔnyi, wele anto wekɔ la lɔsɛnɔ la dimɛna efula. Shi ayonga dikambo dia lomba naka nde mbewɔ dia shishaka falanga tshanana? Ambutshi pombaka mbetsha anawɔ diaha vɔ somba ɛngɔ tshɛ kɛnawɔ, l’ɔtɛ w’ɔnɛ kekɔ dimɛna lo washo, kana kekɔ oshinga wɔdu. Ekɔ mɛtɛ dia naka vɔ nangaka dia wetshelo wa ngasɔ ndjelama dimɛna, ambutshi pombaka mbisha ɛnyɛlɔ k’ɔlɔlɔ.—Luka 10:38-42.
10 Lɔsɛnɔ l’aha paka monga la kɛnɛ kakombolaso monga latɔ mbeyaka keketsha yɛdikɔ yaso ya monga la ndjâkimɛ. Dikambo sɔ mbeyaka nto tokimanyiya dia ngɛnangɛna la diangɔ dia l’emunyi diele laso ndo dɔ koka totshutshuya dia ndeka mboka wanɛ wele bu la diɔ kɛtshi, oko wadihombawɔ aha la lolango lawɔ, koko lo woho wewɔ bu l’akoka wa dikondja. Eelo, yoho ya lɔsɛnɔ y’aha kawotake tshikitana la waonga wele l’anto efula ɛlɔ kɛnɛ, ɛnyɛlɔ woho watawɔ ɔnɛ “onto hayatokɛ fusa” kana “wɛ mbasungana mbɔsa kɛnɛ koleki dimɛna.” Wanɛ wasɛmɔya diangɔ woho w’anto disomba keketshaka saki k’anto ndjasha l’ɛngɛnɔngɛnɔ wa kakiye, koko vɔ salaka dikambo sɔ l’oyango wa kondja wahɔ efula l’ekanda wandawɔ. Dikambo sɔ mbeyaka kitshakitsha welo wadjaso dia monga la ndjâkimɛ. Jurunalɛ mɔtshi y’oma lo wodja ɔmɔtshi wa l’Erɔpɛ wele l’ɔngɔnyi efula yakate atete edja ɔnɛ: “Naka nɔmbamaka di’anto wasɛna lo wola w’efula monga la ndjâkimɛ lo kɛnɛ kendana la saki ya kɔlɔ, kete hoke wanɛ wasɛna lo wedja wele l’ɛngɔnyi efula wa nshi nyɛ!”
11. Lande na kele nyanga dia sɛna aha paka monga la kɛnɛ kakombolaso ekɔ ohomba efula, ko kakɔna ketɛ dikambo sɔ wolo?
11 Naka tekɔ l’okakatanu dia tshikitanya kɛnɛ kakombolaso monga latɔ la kɛnɛ keso mɛtɛ latɔ ohomba, kete ayonga ohomba efula sho ndjashikikɛ di’aha salaka akambo oko anto wele bu la tomba. Ɛnyɛlɔ, naka tekɔ lo nanga tshika tshelo ya tondjaka falanga otondjatondja, kete sho mbeyaka mbɔsa yɛdikɔ y’aha mbɔsa abasa, ndo ya tshɔka tosomba diangɔ paka la yema ya falanga yahombama tsho. Tohɔ dia Paulo akate dia ‘omamemelo le Nzambi kâmɛ la ngɛnangɛna la kɛnɛ kele laso ekɔ dikambo diele la wahɔ efula.’ Nde akate ate: “Shu kundja nduku l’engo la kete nye, ku hateyi ntola nduku engo uma la kete. Keli lam’ayutuyala la diango dia nde ndu la diango dia ndota, shu tayuyala la ongenongeno lu diango diako.” (1 Timote 6:6-8) Onde sho ngɛnangɛnaka la kɛnɛ kele laso? Nyanga dia sɛna lɔsɛnɔ l’ɔsɛlɛngɛ, mbut’ate aha la ndjamɔtshɛ diangatangata oyadi woho akɔna wele diangɔ sɔ, nɔmbaka di’onto mbɔsa yɛdikɔ ndo monga la ndjâkimɛ. Ɔsɔ ekɔ yoho ya lɔsɛnɔ yasungana sho sɛna.
12, 13. (a) Lo toho takɔna tele sanganya y’Akristo nɔmbaka dia monga la ndjâkimɛ? (b) L’akambo akɔna nto wahombaso monga la ndjâkimɛ?
12 Wɔtwɛlɔ wa lo sanganya y’Akristo ya weke kana ya totshitshɛ nɔmbaka nto di’onto monga la ndjâkimɛ lo yoho ya lânde. Ɛnyɛlɔ, dionga sɔ diekɔ ohomba efula diaha timba taso mbekekɔka l’akambo akina wonya wa losanganya. (Tukedi 1:5) Ayonga ohomba wa monga la ndjâkimɛ di’aha fukutanya anto lo tɛkɛtaka tɔhɔtɛhɔtɛ l’anto wodjashi suke laso lo dihole dia mbisha ɔtɛkɛtshi yambalo yaso tshɛ. Dia tshikitanya ekongelo kaso woho wa komaka la wonya lo sanganya nɔmbaka dia monga la ndjâkimɛ. Ndo nto, ndjâkimɛ mbeyaka monga ohomba dia ndjatshungolɛ etena ka nɔngɔsɔlaka sanganya k’oma lâsɔ ndjosha kɔmatɛrɛ lɔkɔ.
13 Monga la ndjâkimɛ l’akambo wa totshitshɛ keketshaka dikoka diaso dia sala dikambo sɔ l’akambo wa weke. (Luka 16:10) Lâsɔ, ekɔ mɛtɛ dimɛna efula dia sho ndjaekiya dia mbadiaka Bible l’ekanda wakilembetshiya mbala la mbala, mbekaka ekanda ɛsɔ ndo kanaka yimba la kɛnɛ kekaso! Ekɔ dikambo dia lomba mɛtɛ dia sho ndjalama lo kɛnɛ kendana l’elimu wa kɔlɔ, angɛnyi, waonga, mbekelo, kana diaha ndjasha l’akambo wakoka tɔsɛ wonya w’ohomba wakokaso kambɛ Nzambi! Monga l’akambo efula wa sala l’olimu waki Jehowa ekɔ mɛtɛ ekokelo ka dimɛna oma l’akambo wakoka tonya oma lo paradiso ka lo nyuma, mbut’ate oma l’etshumanelo ka l’andja w’otondo.
Tonge anto wambotshunda lo kɛnɛ kendana la ndjâkimɛ
14. (a) Ngande wahomba ana mbeka dia monga la ndjâkimɛ? (b) Naa ɛlɔlɔ wakoka ndja naka ana mbetshama dia monga la ndjâkimɛ oma ko tɔkɛndakɛnda?
14 Ɔn’ashashi hotɔ la ndjâkimɛ. Traktɛ kɛmɔtshi kakafunde waa nomb’ewo yendana la waonga w’ana mbutaka ɔnɛ: “Ndjâkimɛ haye twamɛmɛ kana lo shashimoya. Ana ndo akɛnda wekɔ l’ohomba w’ɛlɔmbwɛlɔ ndo ekimanyielo k’ambutshi dia vɔ tatɛ mbeka dia monga la ndjâkimɛ. . . . Oma l’ekimanyielo k’ambutshi, ana ndjôlaka la ndjâkimɛ l’edja k’ɛnɔnyi tshɛ wewɔ lo kalasa.” Wekelo ɔmɔtshi wakasalema lo dikambo di’ana wele l’ɛnɔnyi ɛnɛi akɛnya dia ana wakawetsha dia monga la ndjâkimɛ lo yɛdikɔ mɔtshi “komaka mbala tshɛ ɛlɔngɔlɔngɔ kana esekaseka w’eshika, weyama dimɛna, wele la dihonga, ndo wakoka anto mbɛkɛ otema le wɔ.” Ana wakiwɔ kombetsha dionga sɔ “ndekaka ndjakakitola l’anto, momalaka esadi ndo mongaka ɛtɛ wolo. Vɔ hawoshike ekolo la ntondo k’ekiyanu ndo vɔ ndawɔka ekakatanu.” Eelo, dia koma opalanga w’oshika, ɔna pombaka mbeka dia monga la ndjâkimɛ.
15. Kakɔna kɛnya onto lele bu la ndjâkimɛ ndo dikambo sɔ tshikitana l’oyango akɔna wahombaso kotsha wele lo Bible?
15 Woho akɔ wamɛ mbele, naka sho nangaka koma Akristo wambotshunda, kete sho pombaka mbeka dia kɛnɛmɔla ndjâkimɛ. Onto lele bu la ndjâkimɛ mɛnyaka dia nde ekekɔ dikɛnda lo nyuma. Bible tolakaka dia monga ‘epalanga l’akoka wa eokelo k’akambo.’ (1 Koreto 14:20) Oyango aso ele wa “shu tshe [monga kâmɛ] l’utundu wa mbetawo, wa yimba y’On’a [Nzambi], edja ndu tambuyala dikumanyi di’apami, lu yediko ya diema y’elulelu ka Kristu.” Lande na? “Diaha shu ntshikala uku akenda, diaha [sho] nsutshasutshama la pepe tshe ya [w]etshelu, uma lu yewu y’antu, lu lukesu la munganyiya antu.” (Efeso 4:13, 14) Lo mɛtɛ, mbeka dia monga la ndjâkimɛ ekɔ dikambo di’ohomba efula lo lonyuma laso.
Tongake la ndjâkimɛ
16. Ngande washa Jehowa ekimanyielo?
16 Tekɔ l’ohomba w’ekimanyielo kaki Nzambi dia sho monga la ndjâkimɛ, ndo nde mbetawɔka dia tokimanyiya. Ɔtɛkɛta wa Nzambi, wekɔ oko talatala ka kokele katɛnya ahole wahombaso ndjalɔngɔsɔla, ndo vɔ tɛnyaka woho wa sala dikambo sɔ. (Jakoba 1:22-25) Anangɛso l’akadiyɛso watoka ngandji wekɔ nto suke dia tokimanyiya. Dikumanyi di’Akristo nto mbetawɔka l’ɔlɔlɔ tshɛ dia tokimanyiya. Jehowa ndamɛ mbetawɔka dia tosha nyuma kande k’ekila l’ɔlɔlɔ tshɛ naka sho mbɔlɔmba tɔ. (Luka 11:13; Romo 8:26) Lasɔ, tokambake la dihomɔ sɔ tshɛ l’ɔngɛnɔngɛnɔ. Alako wele lo lɛkɛ 21 mbeyaka tokimanyiya lo dikambo sɔ.
17. Ekeketshelo kakɔna katanaso lo Tukedi 24:16?
17 Ekɔ mɛtɛ ekeketshelo dia mbeya dia Jehowa ngɛnangɛnaka welo wadjaso dia mbɔngɛnyangɛnya! Dikambo sɔ pombaka totshutshuya dia sho tetemala la sala la wolo dia nyomoleka monga la ndjâkimɛ. Oyadi efula ka mbala kahatatondoya dia monga la dikoka sɔ, hatohombe pondjo mpekɔ dia mbidja welo lo dikambo sɔ. Bible mbutaka dia “untu ololo atokokaka tena esambeli, ku ndi atunelaka ntu.” (Tukedi 24:16) Mbala tshɛ katondoyaso dia ngɛnyangɛnya Jehowa, sho kondjaka ɔkɔkɔ wa monga l’ɔngɛnɔngɛnɔ. Sho koka nto monga l’eshikikelo dia Jehowa ekɔ lo tɔngɛnangɛna. Ɔmɛnyi wa Jehowa ɔmɔtshi mbutaka dia la ntondo ka nde nambola Jehowa lɔsɛnɔ lande, mbala tshɛ kakandatondoyaka lomingu l’otondo aha la nɔ mfɔka, nde akongaka l’ɔngɛnɔngɛnɔ nɛ dia nde akasombaka ɛngɔ k’ohomba la falanga yele ndjâkimɛ akokimanyiya di’aha nde somba layɔ mfɔka.
18. (a) Kakɔna kahombama lo ta dialɔshaso dia monga la ndjâkimɛ? (b) Eshikikelo kakɔna katosha Jehowa?
18 Kɛnɛ koleki tshɛ ele, sho pombaka mbohɔka dia ndjâkimɛ mendanaka la yimba ndo la saki. Sho koka mɛna dikambo sɔ l’ɛtɛkɛta ɛnɛ waki Yeso: “Untu tshe lenda umuntu, ku ndi ambûkumbula, ndi ambunana la ndi l’utema.” (Mateu 5:28; Jakoba 1:14, 15) Onto layanga dia mbahemɛ yimba ndo saki yande ayɛna dia bu wolo nde mbahemɛ demba diande di’otondo. Lâsɔ, tokeketsha yɛdikɔ yakatɔshi ya mbewɔ aha tsho dia sala kɔlɔ koko mbewɔ di’aha kânga kanyiya dikambo sɔ. Naka tokanyi ta kɔlɔ tambotoyɛ lo yimba, kete sho pombaka tikasha aha la tshimbatshimba. Sho koka ndawɔ ehemba lo tetemala la mbika washo aso le Yeso lo dɔmbɛlɔ. (1 Timote 6:11; 2 Timote 2:22; Heberu 4:15, 16) Etena kasalaso dikambo sɔ la wolo aso tshɛ, tayoyelaka dako diele l’Osambu 55:22, diata ɔnɛ: “Ukitsha wutshu aye le [Jehowa], ku ndi ayukembelawo. Ndi hetawo untu ololo sutshasutshama.”
Onde wɛ akohɔ?
• Lo toho takɔna tohende tahombaso monga la ndjâkimɛ?
• ‘Monga la ndjâkimɛ l’akambo tshɛ’ kɛdikɛdi na?
• L’alako akɔna w’ohomba wɛnya woho wa monga la ndjikimɛ wakayaleki mbidja yimba lo wekelo ɔnɛ?
• Lende atatɛ ndjâkimɛ?
[Kiombo/Esato wa lo lɛkɛ 21]
Woho wa Keketsha Ndjâkimɛ
• Tonge la ndjâkimɛ oyadi kânga l’akambo wa totshitshɛ
• Tokanake yimba lo wahɔ atɔ wa kakianɛ ndo wa lo nshi yayaye
• Tonya kɛnɛ katona Nzambi ko kikitanyiya la kɛnɛ ketawɔnde
• Tokashake tokanyi ta kɔlɔ tatoyɛ lo yimba aha la tshimbatshimba
• Tolodiake timba taso l’akambo wa lo nyuma wôdia
• Tetawɔ ekimanyielo kakoka Akristo wambotshunda tosha
• Tewɔ akambo wakoka todja l’ohemba
• Tɔlɔmbɛ Nzambi dia nde tokimanyiya lo tena diahembamaso
[Esato wa lo lɛkɛ 18, 19]
Ndjâkimɛ totshutshuyaka dia sala kɛnɛ kele ɔlɔlɔ