Jehowa ndola tɔɔ la ngandji ka kɔlamelo
“[Jehowa] . . . eli too la ngandji ka shikaa.”—OSAMBU 145:8.
1. Polo lo yɛdikɔ yakɔna yakoma ngandji ka Nzambi?
‘NZAMBI ekɔ ngandji.’ (1 Joani 4:8) Etelo kɛsɔ kananda otema mɛnyaka dia yoho yalɔmbɔla Jehowa ndja oma lo ngandji. Ngasɔ mbediɔ mɛtɛ, nɛ dia kânga anto wahokitanyiya wekɔ lo kondja wahɔ oma lo yanyi la mvula yalɔshande la ngandji! (Mateu 5:44, 45) Oma lo ngandji koka Nzambi anto wa l’andja, kânga atunyi ande koka ndjatshumoya ko kadimɔ otsha le nde ndo kondja lɔsɛnɔ la pondjo. (Joani 3:16) Kem’edja, Jehowa ayanga ndanya anto wambotshininala lo kɔlɔ woho w’anto wawoka ngandji kondja lɔsɛnɔ la pondjo l’andja w’oyoyo wa losembwe.—Osambu 37:9-11, 29; 2 Petero 3:13.
2. Naa dikambo dimɔtshi dia lânde diendana la ngandji diɛnya Jehowa otsha le wanɛ wakayakimɔ lende na?
2 Jehowa mɛnyaka ngandji kande otsha le atɛmɔdi ande wa mɛtɛ lo yoho ya dimɛna efula ndo y’aha l’ekomelo. Ngandji ka ngasɔ mɛnyama lo tshɛkɛta ya lo Hɛbɛru yokadimɔmi ɔnɛ: “ngandji ka shikaa,” kana “ngandji ka kɔlamelo.” Davidi laki Nkumekanga k’Isariyɛlɛ w’edjedja akɔsaka ngandji ka shikaa kaki Jehowa la nɛmɔ efula. Oma lo kɛnɛ kakandɛnyi ndamɛ ndo lo woho wakandakane yimba lo yoho yasalɛ Nzambi anto akambo, Davidi akonge l’akoka wa memba l’eshikikelo tshɛ ate: ‘Jehowa ndola tɔɔ la ngandji ka shikaa [kana, ‘ngandji ka kɔlamelo’].’—Osambu 145:8.
Teye ekambi waki Nzambi wa kɔlamelo
3, 4. (a) Ngande watokimanyiya Osambu 145 dia mbeya wanɛ wele ekambi waki Nzambi wa kɔlamelo? (b) Ngande ‘watshɔkɔla’ ekambi wa kɔlamelo Nzambi na?
3 Hana ka nyango omvutshi Samuɛlɛ akate lo dikambo dia Jehowa Nzambi ate: “We ayulamaka ekulu [“w’ekambi ayɛ wa kɔlamelo,” NW].” (1 Samuele 2:9) Waa na asɔ wele “ekambi wa kɔlamelo” na? Nkumekanga Davidi akasha okadimwelo. L’ɔkɔngɔ wa nde tombola waonga waki Jehowa wa diambo, nde akate ate: “Ekambi ayɛ wa kɔlamelo wayokɔtshɔkɔla.” (Osambo 145:10, NW) Ondo wɛ koka ndjambola ɔnɛ, ngande wakoka anto tshɔkɔla Nzambi? Ntondotondo, vɔ salaka dikambo sɔ, lo mbôtombola kana lo tɛkɛta dimɛna dikambo diande.
4 Ekambi waki Jehowa wa kɔlamelo mbeyamaka lo woho wakambawɔ l’enyɔ awɔ dia tɛkɛta dimɛna dikambo diande. Kakɔna kalekawɔ tɛkɛta etena kasanganawɔ l’asekawɔ kana lo sanganya y’Akristo? Aha la tâmu, vɔ ndekaka tɛkɛtaka akambo wendana la Diolelo diaki Jehowa! Ekambi waki Nzambi wa kɔlamelo ndjaokaka woho wakayaoke Davidi lakembe ate: “Vo wayutaka dia lutumbu la diulelu diaye [diaki Jehowa], wayoteketaka dia wulu aye.”—Osambu 145:11.
5. Ngande weyaso dia Jehowa mbidjaka yimba etena katɛkɛta ekambi ande wa kɔlamelo dimɛna lo lokombo lande?
5 Onde Jehowa mbidjaka yimba etena k’otombola ekambi ande wa kɔlamelo? Eelo, nde mbidjaka yimba lo kɛnɛ katawɔ. Lo prɔfɛsiya kɛmɔtshi kendana l’ɔtɛmwɛlɔ wa mɛtɛ lo nshi yaso nyɛ, Malaki akafunde ate: “Ku wane wakuki [Jehowa] woma, wakatanela; [Jehowa] akahukama, akuki. Ku buku di’euhwelu diakafundama la ntundu kandi lu dikambu dia wane wakuki [Jehowa] woma, ndu waketawo lukumbu landi.” (Malaki 3:16) Jehowa ngɛnangɛnaka efula etena katɛkɛta ekambi ande wa kɔlamelo dimɛna lo lokombo lande, ndo nde mbaohɔka.
6. Oma l’olimu akɔna weyaso wanɛ wele ekambi waki Nzambi wa kɔlamelo?
6 Wanɛ wele ekambi waki Jehowa wa kɔlamelo koka mbeyama nto oma lo dihonga ndo yɛdikɔ yɔsawɔ ya sambisha anto wele bu atɛmɔdi waki Nzambi ka mɛtɛ. Eelo mɛtɛ, ekambi waki Nzambi wa kɔlamelo ‘mbewoyaka ana w’anto etsha ande wa nkudu ndo lotombo la woke wa lowandji lande.’ (Osambu 145:12) Onde wɛ nyangaka ndo kambaka dimɛna la waaso tshɛ dia mbewoya wanɛ wele bu ambetawudi akambo wendana la lowandji laki Jehowa? Otshikitanyi la mandji y’ana w’anto yayanga la ndanyema kema edja, lowandji lande ekɔ lowandji layotshikala pondjo pondjo. (1 Timote 1:17) Anto pombaka mbeka akambo wendana la lowandji la pondjo laki Jehowa aha la tshimbatshimba ko mbeta lo wedi alɔ ndo lisukɛ. Davidi akembe ate: “Diulelu diaye dieli diulelu dia pundju, ndu luwandji laye layutshikalaka lu nonga tshe.”—Osambu 145:13.
7, 8. Kakɔna kakatombe lo 1914, ndo djembetelo yakɔna yɛnya dia Nzambi ekɔ lo nɔmbɔla kakianɛ lo tshimbo ya Diolelo di’Ɔnande?
7 Tatɛ oma lo 1914, takakondja ɛkɔkɔ ekina efula wakatotshutshuya dia tɛkɛta akambo wendana la lowandji laki Jehowa. L’ɔnɔnyi ɔsɔ, Nzambi akashikikadia Diolelo diaki Mɛsiya l’olongo ndo akadje Yeso Kristo lele Ɔna Davidi oko Nkumekanga. Ɔsɔku mbakakotsha Jehowa daka diande di’ɔnɛ lowandji la Davidi layotshikala pondjo pondjo.—2 Samuele 7:12, 13; Luka 1:32, 33.
8 Ndjembetelo yɛnya dia Jehowa ekɔ lo nɔmbɔla kakianɛ lo tshimbo ya Diolelo di’Ɔnande Yeso Kristo, yekɔ lo mɛnama l’okotshamelo wa djembetelo yendana la wôngelo waki Yeso. Dikambo dioleki diambo lo kɛnɛ kendana la djembetelo shɔ ko olimu wakate Yeso dia wayokambema oma le ekambi waki Nzambi wa kɔlamelo, etena kakandate ate: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.” (Mateu 24:3-14) Lam’ele ekambi waki Nzambi wa kɔlamelo wekɔ lo kotsha prɔfɛsiya kɛsɔ l’ohetoheto, ndekana miliyɔ shamalo y’apami, wamato, ndo ana wekɔ lo kamba olimu wa woke ɔsɔ wahakambemaki nto pondjo. Kem’edja wanɛ watona Diolelo diaki Jehowa wayolanyema.—Enyelo 11:15, 18.
Tokondja wahɔ oma lo lowandji laki Jehowa
9, 10. Otshikitanu akɔna wele lam’asa Jehowa l’ewandji w’ana w’anto?
9 Naka tekɔ Akristo wamboyakimɔka le Nzambi, kete diɔtɔnganelo diasaso la Nkumadiɔndjɔ Jehowa telaka wahɔ efula. (Osambu 71:5; 116:12) Ɛnyɛlɔ, lam’ele tekɔ lo mboka Nzambi wɔma ndo tekɔ lo sala kɛnɛ kele ɔlɔlɔ, sho mbetawɔmaka le nde ndo lo nyuma tekɔ suke lande. (Etsha 10:34, 35; Jakoba 4:8) Koko, ewandji w’ana w’anto mbokanaka mbala efula paka l’ɛnɛnɛ ɛmɔtshi, oko ewandji w’asɔlayi, akanga w’ɛngɔnyi kana akɛnyi wa tɔkɛnyɔ wa lokumu. Lo ndjela jurunalɛ mɔtshi ya l’Afrikɛ yelɛwɔ Sowetan, owandji ɔmɔtshi wa lɛɛta wa lokumu akate ɛtɛkɛta wayela ɛnɛ lo dikambo di’ahole wasɛna ase wola w’efula lo wodja ande ate: “Lamboka lande na kele efula ka l’atei aso hawolange koma l’ahole wasɛna ase wola. Ekɔ nɛ dia sho nangaka mbohɛ di’ahole asɔ wekɔ. Ahole asɔ ndanyaka nkum’otema kaso ndo sho hatɔngɛnangɛna kɛndakɛnda [la mutuka] aso w’oshinga wolo l’etadimbo wa l’ahole asɔ.”
10 Mɛtɛ ewandji ɛmɔtshi w’ana w’anto ndjakiyanyaka l’otema ɔtɔi dikambo di’ɔlɔlɔ w’anto walɔmbɔlawɔ. Koko kânga wanɛ woleki ɔlɔlɔ l’atei awɔ haweye anto walɔmbɔlawɔ dimɛna dimɛna. Aha la tâmu, sho koka ndjambola ɔnɛ: Onde ekɔ owandji ɔmɔtshi wayakiyanya dikambo di’anto ande tshɛ polo lo nde kimanyiya ɔmɔmɔ la l’atei awɔ esadi eto l’etena ka pâ? Eelo, owandji ɔmɔtshi wasala dikambo sɔ ekɔ. Davidi akafunde ate: “[Jehowa] atusukelaka wane tshe watokokaka. Ndi katusimbulaka wane tshe wukutami.”—Osambu 145:14.
11. Ekakatanu akɔna wahomana l’ekambi waki Nzambi wa kɔlamelo ndo ekimanyelo kakɔna kele la wɔ?
11 Ekakatanu ndo mpokoso efula komɛka ekambi wa kɔlamelo waki Jehowa l’ɔtɛ wewɔ bu anto wa kokele ndo wasɛnawɔ l’andja walɔmbwama oma le Satana, “kanga kolo.” (1 Joani 5:19; Osambu 34:19) Akristo pomanaka l’ɛhɛnyɔhɛnyɔ. Amɔtshi wekɔ la hemɔ yahakɔnɔ, kana l’ɔkɛi l’ɔtɛ wa nyɔi ka wakiwɔ wa ngandji. Tena dimɔtshi, ekambi wa kɔlamelo waki Jehowa kɔmɔka otema l’ɔtɛ wa munga mɔtshi yasalawɔ. Koko, oyadi okakatanu wa woho akɔna wahomana la wɔ, Jehowa ekɔ nshi tshɛ suke dia mbisha onto l’onto la l’atei awɔ ekeketshelo ka lo nyuma. Nkumekanga Yeso Kristo akayakiyanyaka woho akɔ wamɛ la ngandji tshɛ dikambo di’anto ande wa kɔlamelo.—Osambu 72:12-14.
Mbo ya ndɛ y’amɛna lo tena diahombama
12, 13. Ngande wakotshiya Jehowa “engo tshe keli la lumu” ehomba atɔ?
12 Oma lo ngandji kande ka shikaa, Jehowa kotshaka ehomba tshɛ waki ekambi ande. L’atei wa diangɔ sɔ mbele ndo olotshelo wa mbo ya ndɛ y’asha ekeketshelo. Nkumekanga Davidi akafunde ate: “We [Jehowa] atuwashaka mbu ya nde l’etena kayo. We atukhukulaka lunya laye, atulutshaka engo tshe keli la lumu.” (Osambu 145:15, 16) Kânga lo tena dia mpokoso, Jehowa mbeyaka nɔngɔsɔla akambo woho w’ekambi ande wa kɔlamelo ‘kondjaka diangɔ dia ndɛ dia lushi la lushi.’—Luka 11:3; 12:29, 30.
13 Davidi akate ate “engo tshe keli la lumu” katolotaka. Dikambo sɔ mendanaka ndo la waa nyama. Otond’onga aha efula ka tombatomba diele lo nkɛtɛ ndo l’ashi, tshike ditongami diele l’ashi, tofudu, ndo nyama ya l’okonda totowonga la hiɛlɛlɛ ya mpɛnga kana mbo ya ndɛ. (Osambu 104:14) Koko Jehowa salaka dia diangɔ sɔ tshɛ ndotshama.
14, 15. Ngande washama mbo ya ndɛ ya lo nyuma ɛlɔ kɛnɛ?
14 Otshikitanyi la nyama, anto wekɔ nto l’ehomba wa lo nyuma. (Mateu 5:3) Jehowa kotshiyaka ekambi ande wa kɔlamelo ehomba awɔ wa lo nyuma lo yoho ya diambo mɛtɛ! La ntondo ka nyɔi kande, Yeso akalake dia ‘ɔhɔmbɔ wa kɔlamelo ndo wa kɛsɔ’ ayoshaka ambeki ande ‘mbo ya ndɛ ya lo nyuma lo tena diahombama.’ (Mateu 24:45) Atshikadi w’akitami w’esɔ 144 000 mbakenga olui ɔsɔ ɛlɔ kɛnɛ. Lo tshimbo y’olui ɔsɔ mbasha Jehowa mbo ya ndɛ ya lo nyuma tshavutshavu.
15 Ɛnyɛlɔ, efula k’ekambi waki Jehowa ɛlɔ kɛnɛ wekɔ l’ekadimwelo k’oyoyo ndo ka shikaa ka Bible l’ɔtɛkɛta awɔ. Les Saintes Écritures —Traduction du monde nouveau ekɔ mɛtɛ ɔtshɔkɔ wa dimɛna efula! Ndo nto, miliyɔ y’ekanda wakimanyiya dia mbeka Bible wekɔ lo tomba l’ɛtɛkɛta ndekana 300. Mbo ya ndɛ ya lo nyuma shɔ tshɛ yaya lo tena diahombama yekɔ mɛtɛ ɔtshɔkɔ le atɛmɔdi wa mɛtɛ waki Nzambi wa l’andja w’otondo. Onto akɔna ahomba tombɔma l’ɔtɛ wa diangɔ sɔ tshɛ na? Paka Jehowa Nzambi. Oma lo ngandji kande ka shikaa, nde akasale di’olui w’ɔhɔmbɔ mbishaka ‘mbo ya ndɛ lo tena diahombama.’ Oma lo tshimbo ya mbo ya ndɛ shɔ, Jehowa kotshaka ‘nsaki k’oseka ɛngɔ tshɛ kele la lɔsɛnɔ’ lo paradiso ka lo nyuma ka nshi nyɛ. Ndo ekambi waki Jehowa wekɔ l’ɔngɛnɔngɛnɔ l’elongamelo kele la wɔ k’ɔnɛ kem’edja, nkɛtɛ nyɛ yayokadimɔ paradiso ka mɛtɛ mɛtɛ!—Luka 23:42, 43.
16, 17. (a) Bɛnyɛlɔ diakɔna diɛnya woho waya mbo ya ndɛ ya lo nyuma la wonya? (b) Ngande wɛnya Osambu 145 kanyi yele l’ekambi waki Nzambi wa kɔlamelo lo kɛnɛ kendana la wombola woleki woke wakonyiya Satana?
16 Tɔsɛdingole ɛnyɛlɔ ka lânde ka mbo ya ndɛ ya lo nyuma yaya l’etena kahombama. Lo 1939, Ta dia Hende dia l’Andja w’Otondo diakatatɛ l’Erɔpɛ. L’ɔnɔnyi akɔ wâmɛ ɔsɔ, Tshoto y’Etangelo ya Ngɔndɔ ka Dikumi l’Ɔtɔi 1, yaki la sawo diaki l’ɔtɛ a dui ɔnɛ: “Lomangemange.” Diɛsɛ oma lo wetshelo wa dimɛna wakawakondja oma lɔkɔ, Ɛmɛnyi wa Jehowa wa l’andja w’otondo wakalame lomangemange la wolo l’akambo wa wedja wakalɔshanaka. Ewandji wa wedja tshɛ wakalɔshanaka wakawaoke kɛlɛ efula l’ɔtɛ wa dikambo sɔ l’edja k’ɛnɔnyi akɔ esamalo wakalɔma ta. Koko, kânga mbakawashimbe ɔtɛmwɛlɔ awɔ ndo mbakawahɛnyahɛnyama, ekambi waki Nzambi wa kɔlamelo wakatetemala la sambisha lokumu l’ɔlɔlɔ la Diolelo. Tatɛ lo 1939 polo lo 1946, vɔ waki l’ohamelo wa diambo wa pursa 157. Ndo nto, woho wakawasale la wolo dia nama olowanyi awɔ etena kakalɔmaka ta, akatetemala la kimanyiya anto dia vɔ mbeya ɔtɛmwɛlɔ wa mɛtɛ.—Isaya 2:2-4.
17 Mbo ya ndɛ ya lo nyuma yatosha Jehowa hayoye tsho l’etena kahombama, koko yekɔ ndo mbo ya ndɛ yasha olesha wa dimɛna efula. Etena kakayasha wedja la wolo tshɛ l’akambo wa ta lam’akalɔmaka Ta dia Hende di’Andja w’Otondo, ekambi waki Jehowa wakakimanyiyama dia ndjasha lo dikambo dimɔtshi di’oleki panda kawɔ ohomba. Jehowa akâkimanyiya dia vɔ shihodia ɔnɛ dikambo di’oleki woke dia l’andja w’otondo, ele wombola wendana la lowandji laki Jehowa lakoka paka lande. Ekɔ mɛtɛ ɔngɛnɔngɛnɔ dia mbeya di’oma lo kɔlamelo yawɔ, Ɔmɛnyi wa Jehowa tshɛ ekɔ lo mbisha yema ya lonya l’oyindjamelo wa lowandji laki Jehowa ndo ekɔ lo mɛnya dia Satana ekɔ kanga kashi! (Tukedi 27:11) Otshikitanyi la Satana lamamatanyiya Jehowa akambo wa kashi ndo lɔnyɔla yoho yalɔmbɔlande, ekambi waki Jehowa wa kɔlamelo wekɔ lo tetemala la mbewoya lo sɛkɛ ɔnɛ: “[Jehowa] keli ololo lu etsha andi tshe, ndu ekila lu elimu andi tshe.”—Osambu 145:17.
18. Naa ɛnyɛlɔ kɛmɔtshi kele atete edja ka mbo ya ndɛ ya lo nyuma yaya l’etena kahombama y’alesha efula?
18 Ɛnyɛlɔ kekina ka mbo ya ndɛ ya lo nyuma y’amɛna yaya l’etena kahombama ndo yalesha ko dibuku Approchez-vous de Jéhovah diakatombe lo nkama ya Nsanganya ya Distrikɛ yaki l’ɔtɛ a dui ɔnɛ: “Apandjudi wa Diolelo Wele l’Ohetoheto” yakasalema l’andja w’otondo lo 2002/2003. Dibuku sɔ diakafundama oma le ‘ɔhɔmbɔ wa kɔlamelo ndo wa kɛsɔ’ ndo diakatondjama oma le Ɛmɛnyi wa Jehowa, tɛkɛtaka dikambo dia waonga wa diambo waki Jehowa Nzambi, mbidja ndo wanɛ wɔtɛkɛtami l’Osambu 145. Dibuku dia dimɛna efula sɔ diayonga mɛtɛ ohomba efula ndo diayokimanyiya ekambi waki Nzambi wa kɔlamelo dia vɔ nyomoleka sukana la nde.
Etena ka ndeka ndjasukanya le Jehowa
19. Etena kakɔna k’ohomba efula kayasukana, ndo ngande wayotosala l’etena kɛsɔ?
19 Etena koleki tshɛ ohomba kahomba kandɔma dikambo diendana la lowandji la Jehowa kekɔ lo tasukana. Oko wakadiatɛkɛtama l’Ezekiyele tshapita 38, ndoko edja Satana ayanga komiya ɔkɛndɛ wakinde wa “Ngongo ka lo kete ya Mangongo.” Nde ayɔlɔsha ekambi waki Jehowa wa l’andja w’otondo. Satana ayɔlɔsha la wolo ande tshɛ dia nanya olowanyi w’ekambi waki Nzambi wa kɔlamelo. Oleki nshi ya ntondo, atɛmɔdi wa Jehowa wayonga l’ohomba wa mbɔlɔmba l’etete, polo ndo kânga ndela dia nyanga ekimanyielo. Onde wɔma woludi la dilɛmiɛlɔ wokawɔ Jehowa ndo ngandji kawɔ ayonga anyanya? Ndoko, nɛ di’Osambu 145 mbutaka ɔnɛ: “[Jehowa] eli lasuki la wane tshe watuwetaka, ee, lasuki la waku tshe watuwetaka lu mete. Ndi atukutshaka [nsaki] ya waku watuwukaka woma, atukaka delu diawo, atâshimbelaka. [Jehowa] atulamaka wane tshe watuwukaka ngandji, keli ndi ayulanya antu wa kolo tshe.”—Osambu 145:18-20.
20. Ngande wɛnama mɛtɛ k’ɛtɛkɛta wele l’Osambu 145:18-20?
20 Ayonga mɛtɛ dikambo di’ɔngɛnɔngɛnɔ efula dia sho sukana la Jehowa ndo la wolo ande wa panda etena kayondonya akambo wa kɔlɔ tshɛ! L’etena k’ohomba efula kamboleka sukana kɛsɔ, Jehowa ayohokamɛ paka “waku tshe watuwetaka lu mete.” Nde mɛtɛ hatohokamɛ akanga wa dungi pende. Ɔtɛkɛta wa Nzambi mɛnyaka hwe dia, yɛdikɔ tshɛ yayoyɔsa otshi wa kɔlɔ dia ndjɔtɛndɛlɛ lokombo la Jehowa l’etena k’ekomelo ayonga anyanya.—Tukedi 1:28, 29; Mika 3:4; Luka 13:24, 25.
21. Ngande wɛnya ekambi waki Jehowa wa kɔlamelo dia vɔ ngɛnangɛnaka dia kamba la lokombo la Nzambi?
21 Ɛlɔ kɛnɛ oleki nshi ya ntondo mamboleka ohomba wa wanyandja wa ‘mbeta Jehowa lo mɛtɛ.’ Ekambi ande wa kɔlamelo ngɛnangɛnaka dia kamba la lokombo lande l’alɔmbɛlɔ awɔ ndo lo kɔmatɛrɛ yashawɔ lo nsanganya yawɔ. Vɔ kambaka la lokombo la Jehowa l’asawo wa lam’asawɔ. Ndo vɔ mbewoyaka lokombo laki Jehowa l’olimu awɔ w’esambishelo la dihonga tshɛ.—Romo 10:10, 13-15.
22. Lande na kele ekɔ ohomba efula shika tanga la ntondo k’eyango ndo nsaki y’andja ɔnɛ?
22 Dia sho tetemala monga la lɔngɛnyi la dimɛna la Jehowa Nzambi, ekɔ ohomba efula sho tetemala shika tanga la ntondo k’akambo wakoka tela wâle wa lo nyuma, oko nsaki ka lomombo la l’emunyi, tɔkɛnyɔ ta kɔlɔ, yimba ya tona dimanyiya anto watosalɛ kɔlɔ, kana tona dia kimanyiya wanɛ wele lo dihombo. (1 Joani 2:15-17; 3:15-17) Naka hatosadi etshikitanu, kete eyango ndo waonga wa ngasɔ mbeyaka ndjotokonya lo sala pɛkato ya weke, ko ndjokoma ko hatoyetawɔma le Jehowa. (1 Joani 2:1, 2; 3:6) Ekɔ dikambo dia lomba dia mbohɔka wonya tshɛ ɔnɛ Jehowa ayotetemalaka tɛnya ngandji kande ka shikaa, kana ngandji ka kɔlamelo paka naka tekɔ lo tetemala la monga la kɔlamelo otsha le nde.—2 Samuele 22:26.
23. Naa nshi yele la ntondo y’amɛna yakongɛ ekambi waki Nzambi tshɛ wele la kɔlamelo?
23 Lâsɔ, nyɛsɔ totetemale la mbidja tokanyi taso paka lo nshi yayaye y’ɔngɛnɔngɛnɔ yakongɛ ekambi waki Jehowa tshɛ wele la kɔlamelo. Lo sala ngasɔ, tayonga l’atei wa wanɛ wayɔngɛnangɛna, wayɔtshɔkɔla, ndo wayotombola Jehowa ‘lushi l’otondo ndo lo pondjo pondjo.’ (Osambu 145:1, 2) Nyɛsɔ, ‘totetemale ndjalama lo ngandji ka Nzambi, tele l’elongamelo ka lɔsɛnɔ la pondjo.’ (Jude 20, 21) Lam’atetemalaso la kondja wahɔ oma lo waonga wa diambo waki Shɛso, kâmɛ ndo lo ngandji ka shikaa k’efula kɛnyande wanɛ wawoka ngandji, nsaki yaso yongake nshi tshɛ oko nsaki kakakɛnɛmɔla Davidi l’ɛtɛkɛta w’ekomelo w’Osambu 145 wata ɔnɛ: “Unyo ami wayandulaka [Jehowa]. Antu tshe wayutumbulaka lukumbu landi l’ekila, pundju, pundju!”
Ngande wayoyokadimola?
• Ngande watokimanyiya Osambu 145 dia mbeya ekambi wa kɔlamelo waki Nzambi?
• Ngande ‘walotsha Jehowa nsaki k’ɛngɔ tshɛ kele la lɔsɛnɔ’?
• Lande na kahombaso nyomoleka sukana la Jehowa?
[Osato wa lo lɛkɛ 9]
Ekambi wa kɔlamelo waki Nzambi ngɛnangɛnaka dia tɛkɛta dikambo di’etsha ande wa nkudu
[Osato wa lo lɛkɛ 10]
Ekambi waki Jehowa kimanyiyaka anto akina la dihonga tshɛ dia vɔ mbeya akambo wendana la lotombo la lowandji lande
[Osato wa lo lɛkɛ 11]
Jehowa mbishaka “engo tshe keli la lumu” mbo ya ndɛ
[Efundelo wɛnya kanga]
Waa nyama: Parque de la Naturaleza de Cabárceno
[Osato wa lo lɛkɛ 12]
Jehowa keketshaka ndo nɔmbɔlaka ekambi ande wa kɔlamelo wayanga ekimanyielo le nde lo dɔmbɛlɔ