“Wɛmɛ oto kele kɔlamelo”

1, 2. Lande na kakoka mbuta ɔnɛ nshisha kɔlamelo ekɔ dikambo diakeyaka nkumekanga Davidɛ dimɛna?

NSHISHA kɔlamelo ekɔ dikambo diakeyaka nkumekanga Davidɛ dimɛna. Lo etena kɛmɔtshi, akambo wa kɔlɔ wakasotshasotsha diolelo diande diaki la ofutanu nɛ dia anto wa lo wodja ande hita wakawɔtwɛ sheke. Laadiko dia laasɔ, anto wakaleke monga suke la nde wakashisha kɔlamelo yawɔ otsha le nde. Ɛnyɛlɔ Mikalɛ laki wadɛnde la ntondo. L’etatelo nde “akalangaka Davidɛ” ndo aha la taamu nde akosukɛ dia kotsha ɛkɛndɛ ande wa nkumekanga. Koko, Mikalɛ akayokomaka “akatatɛ mbɔɔnyɔla l’otema ande,” polo ndo lo nde mbɔsa Davidɛ oko “pami k’anyanya lee.”​—1 Samuɛlɛ 18:20; 2 Samuɛlɛ 6:16, 20.

² Davidɛ aki nto la ondaki ande wakawelɛka Ahitɔfɛlɛ. Alako ande wakɔsamaka la nɛmɔ efula watekana oko vɔ waki ɛtɛkɛta w’oma le Jehowa. (2 Samuɛlɛ 16:23) Koko onto lakandɛkɛka otema ɔsɔ kotetemala monga la kɔlamelo otsha le Davidɛ ndo akayosanganaka kaamɛ la anto wakɔtɔ sheke dia tɔmbɔkwɛ Davidɛ. Onto akɔna akatatɛ mbidja sheke ya ɔtɔmbɔkwɛlɔ shɔ? Ɔnande hita Abisalɔma! La mayɛlɛ tshɛ, Abisalɔma “akatetemala mbiva etema w’ase Isariyɛlɛ,” dia nde ndjaetɛ otunyi wa nkumekanga. Ɔtɔmbɔkwɛlɔ waki Abisalɔma wakakome wolo efula woho ɔnɛ wele Davidɛ akahombe paka ndawɔ dia kokɛ lɔsɛnɔ lande.​—2 Samuɛlɛ 15:1-6, 12-17.

3. Eshikikelo kakɔna kaki la Davidɛ?

³ Onde laasɔ ndooko onto lakatshikala la kɔlamelo le Davidɛ? Kaanga l’atei wa ekakatanu tshɛ waki lande, Davidɛ akeyaka dimɛna dia onto ɔmɔtshi aki la kɔlamelo le nde. Naa onto ɔsɔ? Onto akɔ ko Jehowa Nzambi ndamɛ. Davidɛ akate lo dikambo diande ate: “Le kanga kɔlamelo, wɛ mbosalɛka akambo la kɔlamelo.” (2 Samuɛlɛ 22:26) Kɔlamelo kɛdikɛdi na, ndo ngande washa Jehowa ɛnyɛlɔ koleki tshɛ ka dionga sɔ?

Kɔlamelo kɛdikɛdi na?

4, 5. a) “Kɔlamelo” kɛdikɛdi na? b) Ngande wotshikitanyi kɔlamelo la omamemelo?

⁴ Lo ndjela Afundelo wa lo Hɛbɛru, “kɔlamelo” kɛdikɛdi lɔsɛngɔ lokakatanyi la ngandji otsha le ɛngɔ kɛmɔtshi, polo lama wayokotshama oyango wendana la ɛngɔ kakɔ. Oko wele kɔlamelo ɛnamelo ka ngandji, yɔ ndeka omamemelo nɛ dia onto mongaka la omamemelo l’ɔtɛ wa ɔkɛndɛ ɔmɔtshi wahombande nkotsha. Koko ngandji mbatshutshuya onto dia monga la kɔlamelo.a Naka omembi w’esambo akatɛkɛta dikambo dia ngɔndɔ oko “ɔmɛnyi wa kɔlamelo l’olongo,” kete lo woho ɔnɛ wɛnamatɔ mbala la mbala l’otsho l’olongo. (Osambo 89:37) L’ɔtɛ wa dikambo sɔ, mbele ngɔndɔ la kɔlamelo. Koko ngɔndɔ bu la kɔlamelo yalembetshiyama lo Bible nɛ dia, lo ndjela Bible, lam’ele kɔlamelo ekɔ ɛnamelo ka ngandji, dionga sɔ bu le diangɔ.

⁵ Lo ndjela kanyi yele layɔ lo Afundelo, kɔlamelo pɛtahɛtaka. Ɔkɛnɛmwɛlɔ ayɔ mɛnyaka dia diɔtɔnganelo diekɔ lam’asa onto lele la kɔlamelo nde la onto lɛnyande kɔlamelo yakɔ. Kɔlamelo hengengɔ oko asuku wa lo ndjale wengengɔ la lɔpɛpɛ. Koko kɔlamelo kana ngandji ka kɔlamelo mongaka shikaa ndo la wolo wa tondoya ekakatanu woleki tshɛ wolo.

6. a) Ngande wahaleke mɛnama kɔlamelo le anto ɛlɔ kɛnɛ, ndo kakɔna kɛnya Bible lo dikambo sɔ? b) Naa yoho yoleki dimɛna ya mbeya ele kɔlamelo, ndo lande na?

⁶ Kɔlamelo ya ngasɔ mɛtɛ hayoleke mɛnama ɛlɔ kɛnɛ. Mbala efula angɛnyi wa ma ma mongaka “suke dia tɛtshatɛtshana lam’asawɔ.” Lofulo la atshukanyi wakakitɔna la elonganyi awɔ lekɔ lo tadɛ tsho. (Tokedi 18:24; Malaki 2:14-16) Woho wambofulanɛ akambo wa lokeso tokonyaka lo mbuta woho wakate omvutshi Mika ɔnɛ: “Kanga kɔlamelo aya bu la nkɛtɛ.” (Mika 7:2) Kaanga mbele mbala efula anto bu la kɔlamelo, Jehowa kɛnɛmɔlaka dionga dia dimɛna sɔ lo yoho ya diambo. Diakɔ diele, yoho yoleki dimɛna ya mbeya ɛnamelo ka woke ka ngandji kande kɛsɔ ele mbeka nganɛ wakambande la kɔlamelo yande ya diambo.

Kɔlamelo ya Jehowa heyama mbɛdika

7, 8. Lande na kakoka mbutama ɔnɛ Jehowa ndamɛ oto kele kɔlamelo?

⁷ Bible mbutaka lo dikambo dia Jehowa ɔnɛ: “Wɛmɛ oto kele kɔlamelo.” (Ɛnyɛlɔ 15:4) Ngande wakokadiɔ monga ngasɔ? Shi anto ndo andjelo wakɛnya vɔ lawɔ kɔlamelo ya diambo lo tena dimɔtshi? (Jɔbɔ 1:1; Ɛnyɛlɔ 4:8) Ko kayotota lo dikambo dia Yeso Kristo? Onde nde kema onto la “kɔlamelo” laki Nzambi? (Osambo 16:10) Ko ngande wakokadiɔ mbutama ɔnɛ Jehowa ndamɛ oto kele kɔlamelo?

⁸ Ntondotondo ele nɛ dia kɔlamelo ekɔ ɛnamelo kɛmɔtshi ka ngandji. Lam’ele “Nzambi ekɔ ngandji,” ndo oko wende tshondo ya eongelo ka dionga sɔ, akɔna okoki kɛnɛmɔla kɔlamelo lo yoho yoleki? (1 Joani 4:8) Eelo, andjelo ndo anto koka kɛnɛmɔla waonga wa Nzambi, koko Jehowa ndamɛ oto mbele la kɔlamelo lo yoho yoleki tshɛ. Oko wende “Tango Andja,” nde ambɛnya kɔlamelo edja efula ndeka oseka etongami tshɛ kele l’olongo kana la nkɛtɛ. (Danyɛlɛ 7:9) Laasɔ, Jehowa mbele ɛnyɛlɔ koleki tshɛ ka kɔlamelo; ndooko etongami kande kakoka mbɛdima lande lo dikambo sɔ. Tende bɛnyɛlɔ dimɔtshi.

9. Ngande wele Jehowa la “kɔlamelo lo kɛnɛ tshɛ kasalande”?

⁹ Jehowa ekɔ “la kɔlamelo lo kɛnɛ tshɛ kasalande.” (Osambo 145:17) Lo woho akɔna na? Osambo 136 kadimolaka lo dimbola sɔ lo shila etsha ɛmɔtshi w’etshungwelo wakasale Jehowa, mbidja ndo etshungwelo ka diambo ka ase Isariyɛlɛ lo ndjale ka Beela. Diakɔ diele, divɛsa tshɛ di’Osambo ɔsɔ komɛka la etelo k’ɔnɛ: “Ngandji kande ka kɔlamelo tshikalaka pondjo!” Etena kadiayɛ Osambo ɔsɔ (watanema nto lo kiombo yata ɔnɛ “Awui wa kana yimba” wele lo lɛkɛ 347), wɛ ayamba dia mɛna toho efula takɛnya Jehowa kɔlamelo otsha le wodja ande. Eelo, Jehowa mɛnyaka kɔlamelo yande le ekambi ande wa kɔlamelo, lo mboka alelo awɔ ndo lo mbekɛ lonya la wonya dia mbaakimanyiya. (Osambo 34:6) Edja tshɛ katshikala ekambi ande la kɔlamelo le nde mbatetemala Jehowa la mbaɛnya ngandji kande ka kɔlamelo.

10. Ngande wɛnya Jehowa kɔlamelo lo kɛnɛ kendana la ɛlɛmbɛ ande?

¹⁰ Ndo nto, Jehowa mɛnyaka kɔlamelo le ekambi ande lo woho wayelande ɛlɛmbɛ ande. Otshikitanyi la anto amɔtshi wengengɔ la akambo ndo wayela paka nango la nsaki yawɔ, Jehowa hatshikitanya woho wɔsande kɛnɛ kele ɔlɔlɔ la kɛnɛ kele kɔlɔ. Kaanga mbambeta nunu di’ɛnɔnyi, kanyi yande hayotshikitana lo akambo wele oko diɔtɔnganelo dia la ɛdiɛngɛ, ɔtɛmwɛlɔ wa dikishi, ndo odiakelo. Nde akate lo tshimbo y’omvutshi ande Isaya ate: “Polo lam’ayonyotshunda esombe, dimi hatotshikitana.” (Isaya 46:4) Diakɔ mbele, sho koka monga la eshikikelo dia tayokondja wahɔ naka sho nkitanyiya ɛlɛmbɛ ande wendana la lɔkɛwɔ wɛnyami hwe lo Ɔtɛkɛta ande.​—Isaya 48:17-19.

11. Sha bɛnyɛlɔ diɛnya dia Jehowa kotshaka alaka ande.

¹¹ Jehowa mɛnyaka kɔlamelo yande nto lo nkotsha alaka ande. Kɛnɛ tshɛ kalakande kotshamaka. Diakɔ diakate Jehowa ate: “Ɔtɛkɛta watomba oma lo onyɔ ami . . . hawotokalola le mi okalolakalola, koko ndooko onyake vɔ wayokotsha kɛnɛ tshɛ kalangami ndo wayoshidiya mɛtɛ kɛnɛ kakamotome dia tosala.” (Isaya 55:11) Woho wende la kɔlamelo lo ɔtɛkɛta ande, mɛnyaka dia Jehowa ekɔ la kɔlamelo le ekambi ande. Nde hahɛ ekambi ande asolo laadiko dia kongɛka kɛnɛ kahandatosala. Woho wakotsha Jehowa ɛtɛkɛta ande akatshutshuya okambi ande Jashua dia mbuta ate: “Ndooko kaanga daka 1 diakete pa lo alaka tshɛ w’amɛna wakalake Jehowa ase luudu l’Isariyɛlɛ. Vɔ tshɛ wakakotshama.” (Jashua 21:45) Laasɔ hatokoke mboka wɔma pondjo ɔnɛ tatokoyokama longe shate kana mvula lo kanyiya ɔnɛ Jehowa hokotsha alaka ande amɔtshi.​—Isaya 49:23; Rɔmɔ 5:5.

12, 13. Lo toho takɔna tele ngandji ka lɔsɛngɔ kaki Jehowa “tshikalaka pondjo”?

¹² Oko wakatadiɛnyi ntondo, Bible totɛka dia ngandji ka kɔlamelo ka Jehowa “tshikalaka pondjo.” (Osambo 136:1) Lo yoho yakɔna? Ntondo lo yoho nyɛ yele edimanyielo ka Jehowa kekɔ ka pondjo. Tshapita 26 akatɛnya dia Jehowa minyaka yimba oma lo pɛkato yakandadimanyiyɛ onto. Lam’ele “anto tshɛ wakasale pɛkato ndo hawokome lo lotombo la Nzambi,” sho tshɛ pombaka monga la ɔngɛnɔngɛnɔ lo woho wele ngandji ka kɔlamelo ka Jehowa tshikalaka pondjo.​—Rɔmɔ 3:23.

¹³ Koko ngandji ka kɔlamelo ka Jehowa tshikalaka pondjo lo yoho kina nto. L’Ɔtɛkɛta ande, Jehowa ndakaka dia onto ɔlɔlɔ ayonga “oko osongo wonɛmi suke la ɛkɛdi w’ashi, osongo watɔ elowa lo eleko kawɔ, wele akatshi awɔ hawɔlɛngɛ. Ndo kɛnɛ tshɛ kasalande kayolowana.” (Osambo 1:3) Ohokanyiya woho wokoki monga osongo wafuka wele akatshi awɔ hawɔlɛngɛ! Woho akɔ wamɛ mbele, naka sho nanga Ɔtɛkɛta wa Nzambi, kete tayɔsɛna edja, tayonga la wɔladi, ndo tayosala akambo efula. La kɔlamelo tshɛ, Jehowa mbishaka ekambi ande wa kɔlamelo ɛtshɔkɔ wa pondjo. L’andja w’oyoyo wa losembwe wayanga mbela Jehowa, anto w’okitanyiya wayokamaka ngandji kande ka kɔlamelo pondjo pondjo.​—Ɛnyɛlɔ 21:3, 4.

Jehowa “hatokalɛ ekambi ande wa kɔlamelo”

14. Ngande wɛnya Jehowa dia nde mbɔsaka kɔlamelo y’ekambi ande la nɛmɔ?

¹⁴ Jehowa ambɛnyaka kɔlamelo yande lo yoho yaheyama mbuta. Lam’ele Jehowa hatshikitana kaanga yema, kɔlamelo yande le ekambi ande wa kɔlamelo hayotshikitana pondjo. Omembi w’esambo akafunde ate: “Dimi laki dikɛnda ndo wonya ɔnɛ laya osombe, koko dimi talɛnaka onto ɔlɔlɔ akalema, kana anande walɔmbana mbo ya ndɛ. Nɛ dia Jehowa nangaka losembwe, ndo nde hatokalɛ ekambi ande wa kɔlamelo.” (Osambo 37:25, 28) Mɛtɛ, Jehowa mbahombaso ntɛmɔla, nɛ dia nde mbele Otungi aso. (Ɛnyɛlɔ 4:11) Koko, lam’ele nde ekɔ la kɔlamelo, Jehowa mbɔsaka etsha aso wa kɔlamelo la nɛmɔ.​—Malaki 3:16, 17.

15. Lembetshiya nganɛ wele woho wakekɛ Jehowa lonya dia tshungola ase Isariyɛlɛ, mɛnyaka kɔlamelo Yande.

¹⁵ Oma lo ngandji kande ka kɔlamelo, Jehowa kimanyiyaka ekambi ande mbala la mbala etena kewɔ lo paa. Omembi w’esambo shikikɛka ate: “Nde namaka nsɛnɔ y’ekambi ande wa kɔlamelo; nde mbatshaka oma lo anya w’akanga wa kɔlɔ.” (Osambo 97:10) Tende kɛnɛ kakandasalɛ wodja wa Isariyɛlɛ. L’ɔkɔngɔ wa nde mbatsha lo dihindo oma lo Ndjale ka Beela, ase Isariyɛlɛ wakawembɛ ɔnɛ: “Oma lo ngandji kayɛ ka kɔlamelo, wɛ ambɔlɔmbɔla anto wakayatshungola.” (Etombelo 15:13) Woho wakawashimbamɛ oma lo ashi wa ndjale ka Beela aki mɛtɛ ɛnamelo kɛmɔtshi ka ngandji ka kɔlamelo ka Jehowa. Diakɔ diakatɛ Mɔsɛ ase Isariyɛlɛ ate: “Aha l’ɔtɛ w’ɔnɛ nyu mbaki wodja wakaleke anto efula mbakanyoke Jehowa ngandji ndo mbakandanyɔsɔnɛ, nɛ dia nyu mbaki wodja wakaleke tshitshɛ l’atei w’anto tshɛ. Koko, l’ɔtɛ wa ngandji kakanyoke Jehowa ndo l’ɔtɛ wakandalame etshibelo kakandatshibɛ watshɛnyu, mbakanyotondja Jehowa la lonya la wolo dia nyotshungola oma lo luudu la lɔhɔmbɔ, oma l’anya wa Farawɔ nkumekanga k’Edjibito.”​—Eohwelo k’Ɛlɛmbɛ 7:7, 8.

16, 17. a) Lɔhɛndɛ lakɔna la kɔlɔ lakɛnya ase Isariyɛlɛ, ko ngande wakawaoke Jehowa kɛtshi? b) Ngande wakɛnya efula k’ase Isariyɛlɛ dia vɔ “hawoyokoka nkɔnɔ” ndo ɛnyɛlɔ kawɔ toshaka ɔhɛmwɛlɔ akɔna?

¹⁶ Lo tshɛ kawɔ, ase Isariyɛlɛ kɔmɛnya lowando lawɔ le Jehowa l’ɔtɛ wa ngandji kande ka kɔlamelo. L’ɔkɔngɔ wa nde mbatshungola, “vɔ wakatetemala mbosalɛ [Jehowa] pɛkato lo tɔmbɔkwɛ Ɔnɛ-Laheme-Tshɛ.” (Osambo 78:17) Lo edja ka nkama y’ɛnɔnyi, vɔ wakatɔmbɔkɔ mbala efula, wakoke Jehowa ɔkɔngɔ dia kadimɔ otsha le tonzambizambi ta kashi ndo dia nsala ditshelo di’apanganu diakahombaka mbadja mindo. Koko, Jehowa kopembola sheke yande. Lo tshimbo y’omvutshi Jɛrɛmiya, nde akakome polo lo sɛngasɛnga ekambi ande ate: “Isariyɛlɛ w’ɔtɔlɔki le, kalola . . . Dimi hantokenda la nkɛlɛ, nɛ dia dimi lekɔ la kɔlamelo.” (Jɛrɛmiya 3:12) Oko wakatadiɛnyi lo tshapita 26, ase Isariyɛlɛ efula waki atui wolo. “Vɔ wakatetemala mɔnyɔla akɛndji wa Nzambi ka mɛtɛ ndo wakɔnyɔla ɛtɛkɛta ande ndo wakɔlɛ amvutshi ande.” Etombelo akɔna wakonge? “Nkɛlɛ ka Jehowa [kakaye] le wodja ande, polo ndo vɔ hawoyokoka nkɔnɔ.”​—2 Ɛkɔndɔ 36:15, 16.

¹⁷ Wetshelo akɔna wakondjaso oma lo dikambo sɔ? Kɔlamelo ya Jehowa bu tshungu kana wetawɔwetawɔ. Mɛtɛ Jehowa “[ndola] tɔɔ la ngandji ka kɔlamelo” ndo ngɛnangɛnaka dia mboka kɛtshi naka kokaka. Koko naka ambɛnama dia otshi wa pɛkato halange ndjatshumoya kaanga yema, kete Jehowa ndjelaka ɛlɛmbɛ ande wa kokele ko mbosha dilanya. Oko wakadite Mɔsɛ, Jehowa “lo weho akɔ tshɛ, nde hatshike onto lele la onongo aha la mbosha dilanya.”​—Etombelo 34:6, 7.

18, 19. a) Ngande wɛnya Jehowa kɔlamelo lo mbisha anto wa kɔlɔ dilanya? b) Ngande wɛnya Jehowa kɔlamelo yande otsha le ekambi ande wakavu la ɛhɛnyɔhɛnyɔ?

¹⁸ Mbisha anto wa kɔlɔ dilanya ekɔ nto tshelo ya kɔlamelo. Kɛsɔ mbɛnyama lo dibuku di’Ɛnyɛlɔ lɛnɛ adjangɛ Jehowa andjelo esambele ate: “Nyotshu nyototshole alɔnga 7 wa nkɛlɛ ka Nzambi la nkɛtɛ.” Etena kakatshola ondjelo wa sato dɔnga diande “lo ɛkɛdi ndo lo tɔkɔkɔ t’ashi,” vɔ wakahilɔ dikila. Oma laasɔ, ondjelo akatɛ Jehowa ate: “Wɛ lekɔ ndo lakikɔ, wɛ Kanga kɔlamelo, wɛ ekɔ kanga losembwe nɛ dia wɛ ambela dombo nɛ, dikambo vɔ wakatshola dikila dia ekilami ndo di’amvutshi, ko wɛ ambowasha dikila dia vɔ nnɔ. Vɔ kokaka mɛtɛ dinɔ.”​—Ɛnyɛlɔ 16:1-6.

¹⁹ Tolembete dia lam’akandewoyaka losango la elanyelo lɔsɔ, ondjelo akelɛ Jehowa ɔnɛ “Kanga kɔlamelo.” Lande na? Nɛ dia etena kashande anto wa kɔlɔ dilanya, Jehowa mɛnyaka kɔlamelo le ekambi ande wele efula ka l’atei awɔ wakahɛnyahɛnyama polo lo nyɔi. La kɔlamelo tshɛ, nde mbohɔka ekambi ande wa kɔlamelo ɛsɔ dimɛna. Nde nomɔlomɔka dia mbaɛna nto, ndo oko wata Bible, sangwelo diande ele dia mbaafuta lo mbaolola. (Jɔbɔ 14:14, 15) Jehowa hohɛ ekambi ande wa kɔlamelo l’ɔtɛ wayawɔ bu la lɔsɛnɔ. Koko, “le nde, vɔ tshɛ wekɔ lo nsɛna.” (Luka 20:37, 38) Sangwelo diande dia mbolola wanɛ tshɛ wohɔnde ekɔ djembetelo ya woke ya kɔlamelo yande.

Ngandji ka kɔlamelo ka Jehowa konyaka lo panda

20. Waa na wele “diangɔ dia diwomba dia kɛtshi”, ndo ngande wawaɛnya Jehowa kɔlamelo?

²⁰ Lo ɔkɔndɔ w’anto w’otondo, Jehowa akɛnya kɔlamelo ya diambo otsha le anto wa kɔlamelo. L’edja ka nunu di’ɛnɔnyi, Jehowa “akakikɛ la solo dia lotutsha di’efula diangɔ dia diwomba dia nkɛlɛ diasungana ndanyema.” Lande na? “Dui sɔ diakasalema dia mbeyanya ɛngɔnyi wa lotombo lande le diangɔ dia diwomba dia kɛtshi diakandalɔngɔsɔla la ntondo dikambo dia lotombo.” (Rɔmɔ 9:22, 23) “Diangɔ dia diwomba dia kɛtshi” sɔ ele anto wakoka nkondja panda wakakitama nyuma k’ekila dia monga ekitɔ kaamɛ la Kristo lo Diolelo diande. (Mateo 19:28) Jehowa akɛnya kɔlamelo yande le Abrahama lo woho wakandadiholɛ anto asɔ mboka ka panda nɛ dia nde akolake lo sheke yande ate: “Wedja tshɛ wa la nkɛtɛ wayoyakondjɛ ɔtshɔkɔ lo tshimbo ya kanula yayɛ, nɛ dia wɛ ambokitanyiya dui diami.”​—Etatelo 22:18.

21. a) Ngande wɛnya Jehowa “olui a woke w’anto” wahomba tomba oma lo “mfɔnu ka woke” kɔlamelo? b) Kɔlamelo ya Jehowa kotshutshuyaka dia nsala na?

²¹ Jehowa mɛnyaka kɔlamelo ya woho akɔ waamɛ le “olui a woke w’anto” wayotomba oma lo “mfɔnu ka weke” ndo wayɔsɛna pondjo pondjo lo nkɛtɛ kayokadimɔ paradiso. (Ɛnyɛlɔ 7:9, 10, 14) Kaanga mbele ekambi ande bu kokele, Jehowa mbashaka elongamelo ka nsɛna pondjo pondjo lo nkɛtɛ diɛsɛ oma lo ɛnamelo koleki tshɛ ka kɔlamelo yande, mbuta ate tshungo. (Joani 3:16; Rɔmɔ 5:8) Kɔlamelo ya Jehowa kotolaka anto wele la mposa ka losembwe. (Jɛrɛmiya 31:3) Oko wamboyeya dia nde ekɔ ndo ayongaka nshi tshɛ la kɔlamelo, onde wɛ hayaoke dia wɛ amboleka ndjasukanya la nde? Lam’ele tekɔ la nsaki ka ndjasukanya la Nzambi, nyɛsɔ tɛnya lowando laso lo ngandji kande lo keketsha yɛdikɔ yaso ya ndeka mbookambɛ la kɔlamelo.