‘Nkumadiɔndjɔ, otetsha woho wa nɔmba’

‘Ombeki ande ɔmɔtshi akawotela ati: Nkumadiɔndjɔ, otetsha woho wa nɔmba.’​—LUKA 11:1.

1. Bonde kakalɔmbɛ ombeki wa Yeso ɔmɔtshi Yeso dia nde mbaetsha woho wa nɔmba?

LO DIAASO dimɔtshi l’ɔnɔnyi 32 T.D., ombeki waki Yeso ɔmɔtshi akawendaka etena kakinde lo nɔmba. Nde kokoka mboka kɛnɛ kakatɛka Yeso She, nɛ dia ondo nde akalɔmbaka l’otema. Koko, lam’akashidiya Yeso nɔmba, ombeki ɔsɔ akawotɛ ate: ‘Nkumadiɔndjɔ otetsha woho wa nɔmba.’ (Luka 11:1) Kakɔna kakôtshutshuya dia nde mbɔlɔmba dikambo sɔ? Dɔmbɛlɔ aki dikambo dimɔtshi diakasalemaka mbala la mbala lo lɔsɛnɔ ndo l’ɔtɛmwɛlɔ w’ase Juda. Afundelo wa lo Hɛbɛru wekɔ l’alɔmbɛlɔ efula lo dibuku di’Esambu ndo l’ahole akina. Ɔnkɔnɛ, ombeki ɔsɔ kɔnɔmba dia vɔ mbetsha dui dimɔtshi diakinde kombeyaka kana diende atasalaka ndoko lushi. Aha la tâmu, nde akekesanɛ l’alɔmbɛlɔ wa lâdiko w’ɛlɔmɔ w’ewandji w’ɔtɛmwɛlɔ w’ase Juda. Koko kakianɛ nde akɛnyi Yeso alɔmba, ndo ondo nde akɛnyi di’otshikitanu wa woke efula wakikɔ lam’asa alɔmbɛlɔ wa kawotake w’ewandji w’ɛtɛmwɛlɔ w’ase Juda la yoho yakalɔmbaka Yeso.​—Mateu 6:5-8.

2. (a) Kakɔna kɛnya dia Yeso konanga mbuta dia sho pombaka vusola dɔmbɛlɔ di’ɛnyɛlɔ l’ɛtɛkɛta akɔ wâmɛ? (b) Lande na kayakiyanyaso dia mbeya woho wahombaso nɔmbaka?

² Suke la ngɔndɔ 18 la ntondo ka lasɔ, lo Dako diande dia lo Dikona, Yeso akasha ambeki ande ɛnyɛlɔ ka yoho yakawahombe salaka alɔmbɛlɔ awɔ. (Mateu 6:9-13) Ondo ombeki ɔsɔ komonga wonya akɔ, ɔnkɔnɛ la ngandji tshɛ Yeso akavusola awui w’ohomba wa lo dɔmbɛlɔ sɔ di’ɛnyɛlɔ. Ekɔ ohomba mbeya dia nde kovusola dɔmbɛlɔ sɔ nto l’ɛtɛkɛta akɔ wâmɛ, kɛsɔ akɛnya dia nde kombisha dɔmbɛlɔ dia l’ɔtɛmwɛlɔ diakawahombe kimɛ l’ɔtɛ ko ditaka mbala la mbala. (Luka 11:1-4) Oko ombeki ɔsɔ wahashilami lokombo lande, sho lawɔ kombolaka mbetshama woho wahombaso nɔmbaka di’alɔmbɛlɔ aso ndeka tosukanya la Jehowa. Nyɛsɔ tɔsɛdingole otondo wa dɔmbɛlɔ di’ɛnyɛlɔ, oko wakafunde ɔpɔstɔlɔ Mateo. Diɔ diekɔ l’akambo esambele, asato mendanaka l’asangwelo waki Nzambi ndo anɛi mendanaka l’ehomba aso wa lo demba ndo wa lo nyuma. Lo sawo nɛ tayɔsɛdingola akambo asato w’etatelo.

Shɛso ka ngandji

3, 4. Alangaso mbuta lam’etaso Jehowa ɔnɛ “Shesu”?

³ Oma k’etatelo, Yeso akɛnya di’alɔmbɛlɔ aso pombaka kɛnɛmɔla diɔtɔnganelo dia ma ma ndo dioludi la dilɛmiɛlɔ le Jehowa. Lo tɛkɛta lo wahɔ w’ambeki ande waki suke lande l’omamu wa dikona, Yeso akawatɛ dia nɔmbaka Jehowa ɔnɛ “Shesu le l’ulungu.” (Mateu 6:9) Lo ndjela nomb’ewo kɛmɔtshi, oyadi kânga Yeso akakambe la tshɛkɛta ya lo Hɛbɛru kana ya l’Arameyɛ yakeyamaka le anto efula, tshɛkɛta yakandakambe layɔ dikambo dia “Shesu” yekɔ oko ‘tshɛkɛta yatokambaka l’ana’ dia tɛkɛta dikambo dia papa kawɔ. Mbelɛ Jehowa ɔnɛ “Shesu” mɛnyaka dia tekɔ la diɔtɔnganelo dia dimɛna la nde ndo ndjaɛkɛ kaso le nde.

⁴ Lo mbuta “Shesu,” sho mbetawɔka dia tekɔ l’atei wa nkumbo k’apami la wamato wetawɔ dia Jehowa kele Kiɔkɔ ya Lɔsɛnɔ. (Isaya 64:8; Etsha 17:24, 28) Akristo wakotɔ lo nyuma wekɔ oko ‘ana waki Nzambi’ wa yanyi ndo vɔ kokaka ‘mbeta Nzambi ɔnɛ: Aba! Shɛso!’ (Romo 8:14, 15) Vɔ wekɔ la miliyɔ y’asekawɔ wa kɔlamelo wambôlambolaka nsɛnɔ yawɔ le Jehowa ndo wambɛnyaka ndjakimɔ kawɔ lo nongola batismu ka l’ashi. “Ekoko ekina” ɛsɔ tshɛ, koka ndjasukanya le Jehowa lo lokombo la Yeso ndo mbelɛ ɔnɛ “Shesu.” (Joani 10:16; 14:6) Mbala la mbala sho koka nɔmbaka Shɛso lele l’olongo dia mbotombola, mbôka losaka l’ɛlɔlɔ ande tshɛ oya le so, ndo dia sho kitsha wetsho aso tshɛ le nde, l’eshikikelo k’ɔnɛ nde ndjakiyanyaka dikambo dia so.​—Filipi 4:6, 7; 1 Petero 5:6, 7.

Ngandji ka lokombo la Jehowa

5. Naa ɛtɛkɛta wa tatelo wa dɔmbɛlɔ di’ɛnyɛlɔ, ndo lande na kasunganawɔ mbeta lo dihole dia ntondo?

⁵ Ɛtɛkɛta wa tatelo wa dɔmbɛlɔ sɔ mbidjaka dikambo di’oleki ohomba lo dihole dia ntondo. Vɔ mbutaka ɔnɛ: “Lukumbu laye [lakidiame].” (Mateu 6:9) Eelo, ekidiamelo ka lokombo la Jehowa pombaka monga dikambo dioleki ohomba le so, nɛ dia sho mbolangaka ndo hatolange mɛna toho totshikitanyi tamboshama lokombo lande nsɔnyi. Ɔtɔmbɔkwɛlɔ waki Satana ndo woho wakandanganyiya atshukanyi wa ntondo dia vɔ tɔmbɔkwɛ Jehowa Nzambi akahindɛ lokombo La nde akambo lo woho wakandate ɔnɛ Nzambi hakambe dimɛna la lowandji lande oko wende owandji w’andja w’otondo. (Etatelu 3:1-6) Ndo nto, tatɛ l’ɔtɔmbɔkwɛlɔ wa ntondo, lokombo la Jehowa lakɔnywama oma l’etsha wa sɔnyi ndo oma lo wetshelo w’anto anɛ wayasɛma dia vɔ mbasala akambo lo lokombo lande.

6. Kakɔna kahatahombe sala naka sho nɔmbaka dia lokombo la Jehowa kidiama?

⁶ Woho walɔmbaso dia lokombo laki Jehowa kidiama mɛnyaka wedi weso lo kɛnɛ kendana la lowandji la l’andja w’otondo, mbut’ate sho mɛnya dia sho mbetawɔka lotshungɔ lele la Jehowa la nɔmbɔla andja w’otondo. Jehowa nangaka dia ditongami dia timba, mbut’ate andjelo l’anto wetawɔ la lolango lawɔ dia ndjakitshakitsha l’ɔngɛnɔngɛnɔ l’ɛse ka lowandji lande la losembwe mbidjasɛ l’andja w’otondo, nɛ dia vɔ mbolangaka ndo nangaka kɛnɛ tshɛ kalembetshiya lokombo lande. (1 Ekondo 29:10-13; Esambu 8:1; 148:13) Ngandji kokaso lokombo la Jehowa kayotokimanyiya di’aha sala oseka dikambo tshɛ diakoka mbisha lokombo lande l’ekila sɔnyi. (Ezekiyele 36:20, 21; Romo 2:21-24) Lam’ele ki k’andja w’otondo ndo k’anto wele lɔkɔ nemanɛka l’okidiamelo wa lokombo la Jehowa ndo la ndjakitshakitsha la ngandji l’ɛse ka lowandji lande, dɔmbɛlɔ diaso di’ɔnɛ “lukumbu laye [lakidiame]” mɛnyaka eshikikelo kele laso ɔnɛ sangwelo dia Jehowa diayokotshama dia lotombo lande.​—Ezekiyele 38:23.

Diolelo dialɔmbaso dikambo diadiɔ

7, 8. (a) Ele Diolelo diakatetsha Yeso dia nɔmbaka dikambo diadiɔ? (b) Kakɔna kamboteka lo dikambo dia Diolelo sɔ lo dibuku dia Danyele ndo di’Enyelo?

⁷ Dikambo dia hende dia lo dɔmbɛlɔ di’ɛnyɛlɔ mbutaka ɔnɛ: “Diulelu diaye diayi.” (Mateu 6:10) Dikambo sɔ mbɔtɔnɛka efula la dikambo dia ntondo dialɔmbama lo dɔmbɛlɔ sɔ. Ehomɔ kayokamba la Jehowa dia kidia lokombo lande l’ekila ele Diolelo dia Mɛsiya, mbut’ate lowandji lande la l’olongo, lele Ɔn’ande Yeso Kristo, mbele Khum’ekanga kakasɔnwama. (Osambu 2:1-9) Prɔfɛsiya ka Danyele tɛkɛtaka dia Diolelo dia Mɛsiya oko “dive” diakamɔ oma lo ‘dikona.’ (Danyele 2:34, 35, 44, 45) Dikona sɔ ele lowandji laki Jehowa la l’andja w’otondo, ɔnkɔnɛ Diolelo diolembetshiyami oko dive diekɔ ɛnamelo k’oyoyo k’ɛlɔmbwɛlɔ ka Jehowa ka l’andja w’otondo. Lo prɔfɛsiya kɛsɔ, dive, ‘diakayokoma dikona dia woke diakakokanɛ la nkɛtɛ k’otondo,’ kɛsɔ mɛnyaka dia Diolelo dia Mɛsiya diele didjidji dia lowandji laki Nzambi laheme ladiko dia tshɛ layɔlɔmbɔla nkɛtɛ k’otondo.

⁸ Wanɛ wayolɛ kâmɛ la Yeso lo Diolelo sɔ wekɔ anto 144 000 wanɛ “wakasumbama uma l’atei w’antu” dia tolɛ lande oko nkumi ya dikanga ndo ɛlɔmbɛdi. (Enyelo 5:9, 10; 14:1-4; 20:6) Danyɛlɛ akatɛkɛta di’anto asɔ oko “ekilami wa Khum’Ulungu,” wanɛ wele kâmɛ l’Owandji awɔ Kristo, wakalongola “diulelu, luwandji, la wuki a waulelu weli l’esi ulungu tshe . . . Diulelu diawo, dieli diulelu dia pundju, la ambuledi tshe wayuyala l’okongo awo, ndu wayâkitanyiaka.” (Danyele 7:13, 14, 18, 27) Ɔsɔku mbele lowandji la l’olongo laketsha Kristo ambeki ande dia nɔmbaka.

Lande na tetemala nɔmba dia Diolelo ndja?

9. Lande na kele ekɔ ohomba le so dia nɔmba dia Diolelo diaki Nzambi ndja?

⁹ Lo dɔmbɛlɔ diande di’ɛnyɛlɔ, Kristo akatetsha dia nɔmba di’oyelo wa Diolelo diaki Nzambi. Ekotshamelo ka prɔfɛsiya ya lo Bible mɛnyaka dia Diolelo dia Mɛsiya diakashile la shikikɛma l’olongo l’ɔnɔnyi 1914.a Onde, lâsɔ eke ohomba sho nɔmba ‘di’oyelo’ wa Diolelo sɔ? Eelo. Nɛ dia lo prɔfɛsiya ka Danyele, Diolelo dia Mɛsiya, diɛnyami oko dive, diekɔ lo ndɔsha mandji ya pɔlitikɛ y’ana w’anto, yɛnyami oko lohingu la woke. Dive diayɔlɔsha lohingu la woke, diayoliwɛdjawɛdja polo likonya ofushi oto. Prɔfɛsiya ka Danyele mbutaka lo dikambo dia Diolelo sɔ ɔnɛ: “Dio hadiuyala l’okongo a wudja ukina. Dio diayulanya waulelu ako tshe, diayâshila ushiki, ku dio diame diayushikikala pundju.”​—Danyele 2:44.

10. Lande na kakongaso l’asolo walomɔlomɔ oyelo wa Diolelo diaki Nzambi?

¹⁰ Tekɔ lo kongɛ l’asolo walomɔlomɔ oyelo wa Diolelo diaki Nzambi dia diɔ ndjolanya dikongɛ di’akambo nɛ dia kɔlɔ nɛ dia dikambo sɔ diayolembetshiya ekidiamelo ka lokombo l’ekila laki Jehowa ndo wonyelo wa wanɛ tshɛ walɔsha lowandji laki Nzambi. Sho nɔmbaka l’etete ɔnɛ: “Diulelu diaye diayi,” ndo sho mbutaka kâmɛ l’ɔpɔstɔlɔ Joani ɔnɛ: “Ayali osoku! Khumadiondjo Jesu uyi!” (Enyelo 22:20) Eelo, Yeso aye mɛtɛ dia ndjokidia lokombo la Jehowa ndo dia ndjoyindja lowandji Lande, di’ɛtɛkɛta w’omembi w’esambo kotshama, vɔ mbutaka ɔnɛ: “Kaweyi vati: We latuwetaka Vati: [Jehowa], weme keli Khum’Ulungu, umbuledi wa kete tshe.”​—Osambu 83:18.

“Lulangu laye latshami”

11, 12. (a) Kakɔna kalɔmbaso lam’alɔmbaso dia lolango laki Nzambi ‘tshama la nkɛtɛ oko atshamalɔ l’olongo’? (b) Kakɔna kalembetshiya nto dɔmbɛlɔ diaso dialɔmbaso dia lolango laki Jehowa salema?

¹¹ Yeso aketsha nto ambeki ande dia nɔmbaka ɔnɛ: “Lulangu laye latshami la kete uku atshamalo l’ulungu.” (Mateu 6:10) Andja wakatongama oma lo lolango la Jehowa. Ditongami dia nkudu dia l’olongo mbutaka ɔnɛ: “[Jehowa, Nzambi k] asu, we kukuki dia nungula lutumbu la kenemo la wulu, ne dia we kakatungi diango tshe. Dio diakatungama uma lu lulangu laye.” (Enyelo 4:11) Jehowa ekɔ la sangwelo lo dikambo dia “diango dia l’ulungu, ndu diango dia la kete.” (Efeso 1:8-10) Lo nɔmba dia lolango la Nzambi salema, tekɔ lo nɔmba Jehowa dia nde kotsha sangwelo diande. Ndo nto, sho mɛnyaka dia sho kombolaka dia lolango la Nzambi tshâma l’andja w’otondo.

¹² Oma lo dɔmbɛlɔ sɔ sho kɛnɛmɔlaka nsaki kele laso ka mbɔtɔnganyiya nsɛnɔ yaso la lolango laki Jehowa. Yeso akate ate: “Ma diami, dieli ntsha lulangu la one lakantumi, la dia nshidiya ulimu andi.” (Joani 4:34) L’ɛnyɛlɔ ka Yeso, oko weso Akristo wamboyakimɔka, sho ngɛnangɛnaka sala lolango la Nzambi. Ngandji kaso otsha le Jehowa ndo otsha le Ɔnande totshutshuyaka dia nsɛna ‘aha lo ndjela nsaki y’anto, koko lo ndjela lolango la Nzambi.’ (1 Petero 4:1, 2; 2 Koreto 5:14, 15) Sho salaka la wolo tshɛ dia tona sala akambo weyaso ɔnɛ hawɔtɔnɛ la lolango laki Jehowa. (1 Tesalonika 4:3-5) Lo somba etena dia mbeka ndo dia mbadia Bible, sho ‘shihodiaka ele lolango laki Jehowa,’ mbidja ndo otombelo wa mbala la mbala l’olimu w’esambishelo ka “lukumu l’ololo lone la diulelu.”​—Efeso 5:15-17; Mateu 24:14.

Lolango laki Jehowa l’Olongo

13. Ngande wakasalemaka lolango laki Nzambi la ntondo ka Satana tɔmbɔkɔ?

¹³ Lolango laki Jehowa lakasalemaka l’olongo la ntondo k’ɔnande ɔmɔtshi la lo nyuma tɔmbɔkɔ ndo ndjokoma Satana. Dibuku dia Tukedi tɛkɛtaka di’Ɔna Nzambi l’enondo oko lomba lɛnyama oko onto. Diɔ mɛnyaka dia l’etena k’otale efula kaheyama mbɛdika Ɔna Nzambi ɛtɔi lakandôte “[akangɛnangɛnaka] la ntundu kandi tena tshe,” angɛnangɛna dia sala lolango la She. L’ɔkɔngɔ diko, nde akayokoma “okambi wa komba” waki Jehowa wakokimanyiya dia tonga diangɔ tshɛ dia “l’ulungu ndu la kete, diango dienama ndu diango diahenama.” (Tukedi 8:22-31; Kolosai 1:15-17) Jehowa akakambe la Yeso oko Dui, kana Yɛmb’awui.​—Joani 1:1-3.

14. Wetshelo akɔna wakondjaso oma l’Osambu 103 lo kɛnɛ kendana la woho wakotsha andjelo lolango laki Jehowa l’olongo?

¹⁴ Omembi w’esambo mɛnyaka dia lowandji la Jehowa lekɔ lâdiko di’etongelo tshɛ ndo dia nunu la nunu di’andjelo kitanyiyaka ɛtɛkɛta ande washa wetshelo kamɛ ndo wadjango ande. Sho mbadiaka ɔnɛ: “[Jehowa] akakitsha kiti kandi ka diulelu l’ulungu. Diulelu diandi dieli ladiku dia andja tshe. Nyutumbuli [Jehowa], nyu andjelu andi! Nyu akanga a khudu utamanya, nyatutshaka aui andi, nyatukitanyiyaka aui andi! Nyutumbuli [Jehowa], nyu lulimbilimbi landi tshe, nyu ekambi andi watutshaka lulangu landi! Nyutumbuli [Jehowa], nyu ditungatunga diandi tshe, l’ahuli tshe wa [lowandji l]andi!”​—Osambu 103:19-22.

15. Ngande wele woho wakakondja Yeso lowandji la Diolelo akonge la shɛngiya dia lolango laki Nzambi salema l’olongo?

¹⁵ Oko wadiɛnya dibuku dia Jobo, kânga l’ɔkɔngɔ w’ɔtɔmbɔkwɛlɔ ande, Satana akatetemala monga la diaaso dia mbudɛ l’olongo. (Jobo 1:6-12; 2:1-7) Koko, dibuku di’ɛnyɛlɔ diakalake ɔnɛ etena kayokoka kayotshanyema Satana nde l’ɛdiɛngɛ ande oma l’olongo. Ondo etena kɛsɔ kakakoke yema tshitshɛ l’ɔkɔngɔ wa Yeso Kristo nongola lowandji la Diolelo l’ɔnɔnyi 1914. Oma lâsɔ, atɔmbɔki asɔ komonga nto la dihole l’olongo. Vɔ wakakadjema l’emamu wa nkɛtɛ. (Enyelo 12:7-12) Ndoko londjo la wanɛ wɔnyɔla lowandji laki Jehowa lakokɛma nto l’olongo, paka ekoko wa lotombo la “Ona-Okoko,” Yeso Kristo, ndo wa nɛmbɛ lotombo laki Jehowa. (Enyelo 4:9-11) Lolango laki Jehowa lekɔ mɛtɛ lo salema l’olongo.

Lolango laki Jehowa lo dikambo dia nkɛtɛ

16. Ngande wahɔtɔnɛ dɔmbɛlɔ di’ɛnyɛlɔ la wetshelo wa Lokristokristo wendana l’elongamelo kele l’anto?

¹⁶ Ɛtɛmwɛlɔ wa lo Lokristokristo wambonya nkɛtɛ oma l’asangwelo waki Nzambi, lo mbuta ɔnɛ anto w’ɔlɔlɔ tshɛ tshɔka l’olongo. Koko Yeso akatetsha dia nɔmbaka ɔnɛ: “Diulelu diaye diayi. Lulangu laye latshami la kete uku atshamalo l’ulungu.” (Mateu 6:10) Onde ekɔ dui dia mɛtɛ dia mbuta ɔnɛ lolango laki Jehowa lekɔ lo salema ɛlɔ kɛnɛ lo nkɛtɛ nyɛ yambolola tɔɔ l’awui wa ngala, wɛngiya, elando ndo nyɔi? Ndooko! Ɔnkɔnɛ, sho pombaka nɔmba l’etete dia lolango laki Nzambi salema la nkɛtɛ, lo ndjela daka diaki Nzambi diakafunde ɔpɔstɔlɔ Petero ɔnɛ: “Ne dia daka diandi, mbalungamelasu ulungu w’uyuyu [Diulelu dia Mɛsiya dialɔmbwama oma le Kristo] la kete y’uyuyu [tshunda di’anto wa losembwe], lene udjashi akambu w’ololo.”​—2 Petero 3:13.

17. Sangwelo diakɔna diele la Jehowa lo dikambo dia nkɛtɛ?

¹⁷ Jehowa aki la sangwelo dimɔtshi lam’akandatonge nkɛtɛ. Nyuma kande k’ekila kakakimanyiya omvutshi Isaya dia funda ɔnɛ: “Okone mbata [Jehowa], lakatungi ulungu (ndi eli [Nzambi]!), lakatungi kete, ndu lakayitshi (ndi kakayishikike; ndi kuyitunga utungatunga, keli akayitungi dia antu mbidjase loko!) kata ati: dimi keli [Jehowa], nduku ukina.” (Isaya 45:18) Nzambi akakitsha atshukanyi wa ntondo l’ekambɔ k’Ɛdɛna, mbut’ate lo paradiso ndo akawatɛ ate: “Nyuyali la diwutshi, nyufulaneli, nyuludia kete, nyuyûleli.” (Etatelu 1:27, 28; 2:15) Aha la tâmu, sangwelo di’Otungi ele di’anto wa losembwe ndo wayakitshakitsha l’ɔngɛnɔngɛnɔ l’ɛse ka lowandji la Jehowa mbidjasɛ la nkɛtɛ ndo nsɛna pondjo pondjo lo Paradiso kakalake Yeso.​—Osambu 37:11, 29; Luka 23:43.

18, 19. (a) Kakɔna kahomba salema la ntondo ka lolango laki Nzambi salema la nkɛtɛ? (b) Awui akɔna akina wa lo dɔmbɛlɔ di’ɛnyɛlɔ diaki Yeso wayɔsɛdingwama lo sawo diayela?

¹⁸ Lolango laki Jehowa lo dikambo dia nkɛtɛ halokotshamaki pondjo lam’ele nkɛtɛ ndola l’apami ndo la wamato wɔnyɔla lowandji lande. Lo kamba la ditongami dia lo nyuma dia wolo l’ɛse k’ɛlɔmbwɛlɔ ka Kristo, Nzambi “[ayola]nya wane watulanyaka kete.” Dikongɛ di’otondo di’akambo diaki Satana dia kɔlɔ kâmɛ l’ɛtɛmwɛlɔ adiɔ wa kashi, awui adiɔ wa pɔlitikɛ wa kɔlɔ, okanda adiɔ wa la lokaki ndo wa lokeso, alembe adiɔ, ayonyɛma pondjo pondjo. (Enyelo 11:18; 18:21; 19:1, 2, 11-18) Lowandji laki Jehowa layoyindjama ndo lokombo lande layokidiama. Akambo asɔ tshɛ sho mbalɔmbaka lam’ataso ɔnɛ: “Shesu le l’ulungu, Lukumbu laye [lakidiame]. Diulelu diaye diayi. Lulangu laye latshami La kete uku atshamalo l’ulungu.”​—Mateu 6:9, 10.

¹⁹ Lo dɔmbɛlɔ diande di’ɛnyɛlɔ, Yeso akɛnya dia sho koka nɔmbaka di’ehomba aso. Ehomba ɛsɔ wakandatetsha dia nɔmbaka dikambo diawɔ wayɔsɛdingwama lo sawo diayela.

[Nɔtɛ ka l’ɛse ka dikatshi]

Wembola w’ovuswelo

• Bonde kele ekɔ ohomba le so dia mbelɛ Jehowa ɔnɛ “Shesu”?

• Lande na kele ekɔ dikambo di’ohomba efula dia sho nɔmba di’okidiamelo wa lokombo laki Jehowa?

• Lande na kalɔmbaso dia Diolelo diaki Nzambi ndja?

• Kakɔna kalangaso mɛnya lam’alɔmbaso dia lolango la Nzambi salema la nkɛtɛ oko atshamalɔ l’olongo?

[Osato wa lo lɛkɛ 19]

Dɔmbɛlɔ diaki Yeso diakatshikitana etale efula l’alɔmbɛlɔ wa kawotake w’Afarisɛ

[Osato wa lo lɛkɛ 20]

Akristo nɔmbaka dia Diolelo diaki Nzambi ndja, dia lokombo lande kidiama, ndo dia lolango lande salema