Ngande wakokayɛ nɔmba Nzambi dia nde kohokamɛ?
Jehowa Nzambi ekɔ ɔnɛ “latokaka dɔmbɛlɔ.” (Osambo 65:2) Sho koka nsawola la nde dihole tshɛ ndo wonya tshɛ, oyadi la dui dia wolo kana di’ɔkɔkɛ. Jehowa nangaka dia sho nsawola la nde oko “Ombutshi,” ndo nde mɛtɛ ekɔ Ombutshi woleki tshɛ wakokaso monga la wɔ. (Mateo 6:9) La ngandji tshɛ, Jehowa tetshaka woho wa sho mbɔlɔmba ndo woho wa nde tohokamɛ.
TƆLƆMBƐ JEHOWA NZAMBI LO LOKOMBO LA YESO
“Ɛngɔ tshɛ kayonyɔlɔmba Papa lo lokombo lami, nde ayonyoshatɔ.”—Joani 16:23.
Ɛtɛkɛta wa Yeso mɛnyaka hwe dia Jehowa nangaka dia sho mbɔlɔmba, aha lo tshimbo y’esato, asanto, andjelo kana y’anto wambovɔka, koko lo lokombo la Yeso Kristo. Etena kalɔmbaso Nzambi lo lokombo la Yeso, sho mɛnyaka dia sho mbeyaka ɔkɛndɛ w’ohomba wele la Yeso, nde akate ɔnɛ: “Ndooko onto laya le Papa paka lo tshimbo yami”.—Joani 14:6.
TƆLƆMBAKE AWUI W’OMA K’ƐSE OTEMA
“Nyodihole etema anyu la ntondo kande.”—Osambo 62:8.
Etena kalɔmbaso Jehowa, sho pombaka nsawola la nde oko onto lasawola l’ombutshi wa ngandji. Lo dihole dia mbadiɛka tsho alɔmbɛlɔ w’oma lo dibuku kana mbutaka tsho awui wambotokimɛka l’ɔtɛ, sho pombaka ntɛkɛta la nde la dilɛmiɛlɔ tshɛ ndo oma k’ɛse otema.
TƆLƆMBAKE LO YOHO YƆTƆNƐ LA LOLANGO LA NZAMBI
“Kɛnɛ tshɛ kɔɔlɔmbaso kɔtɔnɛ la lolango lande, nde tokɛka.”—1 Joani 5:14.
Lo Bible, Jehowa Nzambi totɛka kɛnɛ kayondotosalɛ ndo kɛnɛ kakombolande dia sho mbosalɛ. Dia alɔmbɛlɔ aso mbetawɔma le Nzambi, sho pombaka nɔmba lo “yoho yɔtɔnɛ la lolango lande.” Dia nsala dui sɔ, ekɔ ohomba sho mbeka Bible dia sho monga l’akoka wa mboweya dimɛna. Naka sho nsala ngasɔ, kete alɔmbɛlɔ aso wayowɔngɛnyangɛnya.
KAKƆNA KAHOMBASO NƆMBAKA?
Lɔmbaka lo dikambo di’ehomba ayɛ. Sho kokaka nɔmba Nzambi dikambo di’ehomba aso wa lushi la lushi, mbuta ate diangɔ dia ndɛ, ahɔndɔ wa ndɔta ndo dihole dia mbishɛ ɔtɛ. Sho pombaka nto mbɔlɔmba lomba dia mbɔsa tɛdikɔ t’amɛna ndo dia nde tosha wolo wa mbikikɛ ehemba wahomana la so. Sho kokaka mbɔlɔmba dia nde tosha mbetawɔ, woho wa sho dimanyiyaka anto akina ndo mbɔlɔmba ekimanyielo.—Luka 11:3, 4, 13; Jakɔba 1:5, 17.
Lɔmbaka lo dikambo di’anto akina. Ambutshi woka anawɔ ngandji ngɛnangɛnaka efula etena kɛnyanya anawɔ ngandji lam’asawɔ. Jehowa nto kombolaka dia mɛna anande wa la nkɛtɛ wayakiyanya lo dikambo di’onto la wonyande. Ekɔ ohomba nɔmbaka lo dikambo di’elonganyi aso, di’anaso, dia nkumbo yaso ndo dia angɛnyi aso. Ombeki Jakɔba akafunde ate: “Nyɔlɔmbanɛke.”—Jakɔba 5:16.
Tokake Nzambi losaka. Bible mbutaka lo dikambo dia Otungi aso ɔnɛ: “[Nde a]kasale akambo w’ɛlɔlɔ lo nyɔlɔshɛ avula oma l’olongo, lo nyosha deko diangɔnya diangɔ ndo lo ndodia etema anyu la mbo ya ndɛ ndo l’ɔngɛnɔngɛnɔ.” (Etsha 14:17) Etena kakanaso yimba l’awui tshɛ wakatosalɛ Nzambi, tayotshutshuyama dia mbooka losaka lo dɔmbɛlɔ. Ɔnkɔnɛ, sho pombaka mɛnya dia tekɔ la lowando le Nzambi lo mbokitanyiya.—Kɔlɔsayi 3:15.
TONGE LA SOLO DIA LOTUTSHA NDO TOTETEMALE NƆMBA
Lo tena dimɔtshi, sho mbeyaka nkɔmɔ l’ɔtɛ wahatakondja ekadimwelo mbala kakɔ ɔtɔi lo alɔmbɛlɔ aso wa l’otema ɔtɔi. Onde sho kokaka nkomɛ lo mbuta dia Nzambi hayasha le so? Ndooko! Tɔsɛdingole awui wayela anɛ wɛnya dia sho pombaka tsho ntetemala nɔmba.
Steve, lakatatɛkɛtshi lo sawo dia l’etatelo mbutaka ate: “Otondonga dimi kotetemala nɔmba tshike lo toshisha elongamelo ka nyomonga l’ɔngɛnɔngɛnɔ nto.” Kakɔna kakokimanyiya dia nde ntshikitanya ekanelo kande? Nde akatatɛ mbeka Bible nde akeke ohomba wa dɔmbɛlɔ ndo wa ntetemala nɔmba. Steve mbutaka ate: “Lekɔ lo nɔmba Nzambi lo mbokaloya losaka lo osukɔ ande tshɛ wa la ngandji wakamalongola oma le angɛnyi ami w’eshika, kakianɛ laya l’ɔngɛnɔngɛnɔ wemi talongaka la wɔ.”
Ko kayotota lo dikambo dia Jenny lakayaokaka dia nde bu la nɛmɔ, diakoka Nzambi mbohokamɛ? Nde mbutaka ate: “Etena kakamaleke ndjaoka dia dimi bu la nɛmɔ, lakalɔmbɛ Nzambi dia nde nkimanyiyami dia dimi nshihodia lande na kakamayaokaka dia dimi bu la nɛmɔ.” Kakɔna kakokimanyiya? Nde mbutaka ate: “Sawola la Nzambi akakimanyiya dia ntshikitanya ekanelo kami, oyadi kaanga ka manya otema ami, Nzambi hamanya, dui sɔ diakakimanyiya diaha dimi mpekɔ koko ntetemala nɔmba.” Etombelo akɔna wambonga la dui sɔ? “Dɔmbɛlɔ diambokimanyiya dia mɛna dia Nzambi ekɔ onto la mɛtɛ, lokana ngandji, lakokanɛ, Shɛso ndo Ɔngɛnyi, layongaka tena tshɛ lawɔ lo dikambo diami ndo lakimanyiya etena tshɛ katetemalami nsala kɛnɛ kalangande.”
“Isabel mbutaka ate: “Lamboshihodia dia Nde akakadimola l’alɔmbɛlɔ ami lo yoho ya dimɛna efula” etena kɛnande Gerard, ɔnande la pami angɛnangɛna la lɔsɛnɔ kaanga kende l’ɛkɔmɔ
Tɔsɛdingole nto kɛnɛ kakakomɛ Isabel. Etena kakandonge la diemi, adɔkɔtɛlɛ ande wakawotɛ dia ɔna layondota ayonga l’ɛkɔmɔ ka wolo efula. Nde aki la lonyangu l’efula. Anto amɔtshi wakawosha alako dia nde ntondja diemi. Nde mbutaka ate: “Lakayaoke dia laki nsuke la mvɔ l’ɔtɛ wa okiyanu waki la mi l’otema.” Kakɔna kakandasale? Nde mbutaka ate: “Lakalɔmbɛ, lakalɔmbɛ Nzambi dia nde sukɛmi.” L’edjedja ka wonya, nde akayotaka ɔna pami, lokombo ande, Gerard ndo nde akotɔ la ɛkɔmɔ kakɔ. Ko onde Isabel akayaoke dia Nzambi akakadimola lo alɔmbɛlɔ ande? Eelo, nde akayaoke dia Nde akakadimola! Lo yoho yakɔna? Isabel mbutaka ate: “Etena kɛnami ɔnami la pami wonya ɔnɛ wayande l’ɛnɔnyi 14, angɛnangɛna la lɔsɛnɔ kaanga mbende l’ɛkɔmɔ lakashihodia dia ɔsɔ ekɔ okadimwelo wa dimɛna w’alɔmbɛlɔ ami, ɔsɔ ekɔ ɔtshɔkɔ wa woke efula wakambisha Nzambi.”
Dɔmbɛlɔ diami dia l’otema ɔtɔi diakakonya dia dimi nkana yimba la ɛtɛkɛta wa omembi w’esambo wata ɔnɛ: “Jehowa le, wɛ ayoka ɔsɛngɔsɛngɔ w’akanga wa memakana. Wɛ ayoshikikadia etema awɔ ndo ayowadja yimba dimɛna.” (Osambo 10:17) Ande ɛkɔkɔ wa diambo wa ntetemala nɔmba lee!
Lo Bible sho tanaka alɔmbɛlɔ efula waki Yeso. Dɔmbɛlɔ dialeka mbeyama ele nɛ diakandetsha ambeki ande. Wetshelo akɔna wakokaso nkondja oma lɔkɔ?