Ekambi Waki Nzambi pombaka nanga lɔsɛngɔ
‘Kakɔna kakɔlɔmba Jehowa, naka aha dia monga la losembwe ndo nanga lɔsɛngɔ la kɛndakɛnda la ndjakitshakitsha kâmɛ la Nzambi kayɛ?’—MIKA 6:8.
1, 2. (a) Lande na kele kema dikambo dia diambo leso dia Jehowa nongamɛ di’ekambi ande monga la lɔsɛngɔ? (b) Wembola akɔna wendana la lɔsɛngɔ wasungana sɛdingɔma?
JEHOWA ekɔ Nzambi ka lɔsɛngɔ. (Romo 2:4; 11:22) Atshukanyi wa ntondo, Adama la Eva wakahombe mɛtɛ ngɛnangɛna dikambo sɔ! L’ekambɔ k’Ɛdɛna, vɔ wakadingama la ditongami diɛnama diakɛnyaka lɔsɛngɔ lele la Nzambi otsha le anto waki la dikoka dia ngɛnangɛna ladiɔ. Ndo Nzambi ekɔ lo tetemala monga la lɔsɛngɔ otsha le anto tshɛ, oyadi kânga otsha le akanga wa lɔhɛndɛ kana wa kɔlɔ.
2 Oko wakawatongama l’efanelo ka Nzambi, anto wekɔ la dikoka dia kɛnɛmɔla waonga ande. (Etatelu 1:26) Diakɔ diele, kema dikambo dia diambo dia Jehowa nongamɛ dia sho monga la lɔsɛngɔ. Mika 6:8 mbutaka dia ekambi waki Nzambi pombaka ‘nanga lɔsɛngɔ.’ Ko lɔsɛngɔ kɛdikɛdi na? Ngande wɔtɔnɛ lɔsɛngɔ la elowa ekina wa nyuma ka Nzambi? Lam’ele anto wekɔ la dikoka dia monga la lɔsɛngɔ, lande na kele andja ɔnɛ ekɔ dihole diele l’awui w’esehe ndo wa lohetsho na? Oko weso Akristo, lande na kahombaso sala la wolo dia monga la lɔsɛngɔ lo yoho yasɛnaso l’anto akina?
Lɔsɛngɔ kɛdikɛdi na?
3. Lɔsɛngɔ kɛdikɛdi na le yɛ?
3 Lɔsɛngɔ kɛdikɛdi ndjasha l’otema ɔtɔi dikambo di’ɔlɔlɔ w’anto akina. Lɔ kɛnɛmɔmaka oma l’etsha wakimanyiya ndo oma l’ɛtɛkɛta w’ɔkɔmi. Monga la lɔsɛngɔ nembetshiyaka sala kɛnɛ kele ɔlɔlɔ lo dihole dia sala oseka dikambo tshɛ dia kɔlɔ. Onto lele la lɔsɛngɔ mbidjaka anto lo demba, ekɔ la dilɛmiyɛlɔ, mbokanaka kɛtshi ndo ekɔ la lolango. Nde ekɔ la dionga dia lokaho ndo di’ɔkɔmi otsha le anto akina. Ɔpɔstɔlɔ Paulo akalake ate: ‘Nyɔlɔtɛ etema wa kɛtshi, wa lɔsɛngɔ, w’okitshakitsha, wa tshitshi ndo wa lotutsha.’ (Kolosai 3:12) Ɔnkɔnɛ, lɔsɛngɔ ekɔ dihɔndɔ dimɔtshi dia didjidji diahomba oseka Kristo tshɛ ndɔta.
4. Ngande wakɛnya Jehowa lokolo lo kɛnɛ kendana la woho wa mɛnya lɔsɛngɔ le anto?
4 Jehowa Nzambi akɛnya lokolo lo kɛnɛ kendana l’ɔkɛnɛmwɛlɔ wa lɔsɛngɔ. Oko wakadite Paulo, etena ‘kakɛnama lɔsɛngɔ ndo ngandji ka Nzambi Oshimbedi aso otsha le anto, nde akatoshimbɛ oma lo wɔtshɛlɔ wakatokonya lo lɔsɛnɔ, diɛsɛ oma l’ehilwelo kaso k’oyoyo oma le nyuma k’ekila.’ (Tito 3:4, 5) Nzambi ‘mbɔtshaka’ kana mbɛdiaka, mbut’ate kitaka Akristo esɔ lo dikila diaki Yeso, lo sala woho wa vɔ kondja wahɔ oma lo nɛmɔ di’olambo wa tshungo waki Kristo. Vɔ piloyamaka nto eyoyo oma lo nyuma k’ekila ndo komaka “etungamelu k’uyuyu” oko ana wa Nzambi wa lo nyuma. (2 Koreto 5:17) Ndo nto, lɔsɛngɔ laki Nzambi ndo ngandji kande kakɛnama ndo le “ului a wuki . . . wakotsha ahondo awo wakawaedia la dikila dia Ona-Okoko.”—Enyelo 7:9, 14; 1 Joani 2:1, 2.
5. Lande na kahomba wanɛ walɔmbɔma oma le nyuma ka Nzambi monga la lɔsɛngɔ?
5 Lɔsɛngɔ ekɔ nto olowa ɔmɔtshi wa nyuma k’ekila kaki Nzambi kana wolo ande wakamba olimu. Paulo akate ate: ‘Elowa wa nyuma vɔ ɛnɛ: ngandji, ɔngɛnɔngɛnɔ, wɔladi, lotutsha, ɔlɔlɔ, lɔsɛngɔ, mbetawɔ, ki, ndjakimɛ. Ɔlɛmbɛ kema l’akambo wa woho ɔsɔ.’ (Ngalatiya 5:22, 23) Lâsɔ, shi wanɛ walɔmbɔma oma le nyuma ka Nzambi pombaka monga la lɔsɛngɔ otsha le anto akina?
Lɔsɛngɔ la mɛtɛ kema wɔdu
6. Etena kakɔna konga lɔsɛngɔ wɔdu, ndo lande na?
6 Amɔtshi mbɔsaka lɔsɛngɔ oko wɔdu. Vɔ kanaka ɔnɛ onto pombaka monga otema wolo ndo awui wolo lo tena dimɔtshi woho w’anto akina mbeya wolo ande. Koko, nɔmbaka di’onto sala la wolo efula dia monga la lɔsɛngɔ l’oshika ndo dia mbewɔ monga la yoho ya lɔsɛngɔ ya kɔlɔ. Lam’ele lɔsɛngɔ l’oshika ekɔ olowa ɔmɔtshi wa nyuma kaki Nzambi, lɔ halokoke monga wɔdu ɔmɔtshi kana dionga dimɔtshi dietawɔ akambo wa kɔlɔ. Koko, lɔsɛngɔ la kɔlɔ ekɔ wɔdu watshutshuya onto dia mbetawɔ akambo wa kɔlɔ.
7. (a) Ngande wakɛnama dia Eli akatshike awui wa kɔlɔ? (b) Lande na kahomba dikumanyi mbewɔ dia monga la lɔsɛngɔ la kɔlɔ?
7 Tɔshi ɛnyɛlɔ kaki Eli laki ɔlɔmbɛdi wa lâdiko l’Isariyɛlɛ. Nde akanyaka yimba oma l’awui wakasalaka anande wakawelɛka Hofeni la Finehasi, lo dihole dia nde mbasha dilanya. Ana asɔ wakakambaka oko ɛlɔmbɛdi lo tabɛrnakɛlɛ. Oko wakiwɔ kɔngɛnangɛnaka elambo wakawashaka Ɔlɛmbɛ wa Nzambi lotshungɔ la mbɔsa, vɔ wakatomaka ose olimu dia tɔlɔmba nyama keke oyoyo oma le onto lakayaka dia ndjolambola la ntondo ka ndo vɔ nambola wata l’elambwelo. Ana waki Eli wakasalaka ndo dieyanelo dia mindo vɔ la wamato wakakambaka lo ɛɔtwɛlɔ ka tabɛrnakɛlɛ. Koko, lo dihole dia nde mbashimba di’aha vɔ tetemala la nambola elambo, lohango laki Eli laki oko onto l’asɛngasɛnga. (1 Samuele 2:12-29) Diakɔ diele, kema dikambo dia diambo lo woho ɔnɛ wele “diui dia [Jehowa] diakukemaka pai pai lu nshi sho.” (1 Samuele 3:1) Dikumanyi di’Akristo pombaka menda ɔlɔlɔ di’aha ndjokoma lo monga la lɔsɛngɔ la kɔlɔ otsha le atshi wa kɔlɔ wakoka mbidja lonyuma l’etshumanelo lo wâle. Lɔsɛngɔ l’oshika hadihe washo l’ɛtɛkɛta ndo l’etsha wa kɔlɔ wasekola ɛlɛmbɛ waki Nzambi.
8. Ngande wakakɛnɛmɔla Yeso lɔsɛngɔ l’oshika?
8 Yeso Kristo lele Ɛnyɛlɔ kaso, komonga la lɔsɛngɔ la kɔlɔ ndoko lushi. Koko nde aki ɛnyɛlɔ koleki tshɛ ka lɔsɛngɔ l’oshika. Ɛnyɛlɔ, ‘nde akoke anto kɛtshi nɛ dia wakahɛnyahɛnyamaka ndo kondjala la ekimanyielo oko ɛkɔkɔ waha la olami.’ Anto wele l’etema w’ɛlɔlɔ komboka wɔma dia ndja oya le Yeso ndo kânga dia mbela anawɔ wa tɔkɛndakɛnda oya le nde. Ohokanyiya lɔsɛngɔ ndo kɛtshi kakandɛnya etena ‘kakandɛmbɛ tɔkɛndakɛnda l’anya ande ndo kakandatatɛ la mbâtshɔkɔla’! (Mateu 9:36; Mako 10:13-16) Koko, kânga mbaki Yeso la lɔsɛngɔ, nde akayelaka paka kɛnɛ kaki dimɛna lo washo wa She lele l’olongo. Ndoko lushi lakadihe Yeso washo la ntondo k’akambo wa kɔlɔ ndo nde aki la dihonga di’oma le Nzambi dia manya ewandji w’ɛtɛmwɛlɔ l’ɔtɛ wa lokeso lawɔ. Oko wɛnamadiɔ lo Mateu 23:13-26, nde akate mbala efula etelo k’ɔnɛ: “Fono kayayi lenyu, afundji la Afarise, akanga a lukesu!”
Lɔsɛngɔ la waonga akina wa nyuma ka Nzambi
9. Ngande wɔtɔnɛ lɔsɛngɔ la lotutsha ndo la ɔlɔlɔ?
9 Lɔsɛngɔ mbɔtɔnɛka la waonga akina wa nyuma ka Nzambi. Lɔsɛngɔ shilama lam’asa “lotuca” la “ɔlɔɔlɔ.” Lo mɛtɛ, onto lele la lɔsɛngɔ mɛnyaka dionga sɔ lo monga la lotutsha. Nde mongaka la solo dia lotutsha oyadi kânga otsha le anto wa kɔlɔ. Lɔsɛngɔ mbɔtɔnɛka la ɔlɔlɔ lo yoho nyɛ yele, lɔ mɛnyamaka oma l’awui wasalema dikambo dia wahɔ w’anto akina. Mbala mɔtshi tshɛkɛta ya lo Grɛkɛ yakawakambe la yɔ lo Bible dikambo dia “lɔsɛngɔ” koka kadimɔma ɔnɛ “ɔlɔlɔ.” Woho wakɛnama dionga sɔ l’atei w’Akristo wa ntondo akambiya apanganu efula, ndo lo ndjela Tertullien, wakakome polo ndo lo mbeta ambeki waki Yeso ɔnɛ: ‘anto woleki monga la lɔsɛngɔ.’
10. Ngande wɔtɔnɛ lɔsɛngɔ la ngandji?
10 Lɔsɛngɔ mbɔtɔnɛka la ngandji. Yeso akate lo dikambo di’ambeki ande ate: “Uma lu dikambu ne, antu tshe wayeya vati: Ambeki ami mbenyu, naka nyu nyayukana ngandji.” (Joani 13:35) Ndo Paulo akate lo kɛnɛ kendana la ngandji kɛsɔ ate: ‘Ngandji ekɔ lotutsha ndo lɔsɛngɔ.’ (1 Koreto 13:4) Lɔsɛngɔ mbɔtɔnɛka nto la ngandji lo tshɛkɛta y’ɔnɛ ‘ngandji ka lɔsɛngɔ,’ yakambema mbala efula l’Afundelo. Ɔsɔ ekɔ lɔsɛngɔ laya oma lo ngandji ka kɔlamelo. Lokombo la lo Hɛbɛru lakadimɔma ɔnɛ “ngandji ka lɔsɛngɔ” nembetshiyaka awui efula koko aha lolango l’oludi l’ɔsɛngɔsɛngɔ loto. Lɔsɛngɔ mbakakatanya onto l’ɛngɔ kɛmɔtshi la ngandji tshɛ edja ndo l’etena kayokotshama oyango atɔ. Ngandji ka lɔsɛngɔ ka Jehowa kana ngandji kande ka kɔlamelo kɛnɛmɔmaka lo weho wotshikitanyi. Ɛnyɛlɔ, tɔ mɛnamaka l’etsha ande w’etshungwelo ndo w’ekokelo.—Osambu 6:4; 40:11; 143:12.
11. Eshikikelo kakɔna katosha ngandji ka lɔsɛngɔ kaki Nzambi?
11 Lɔsɛngɔ la Jehowa kotolaka anto oya lende. (Jeremiya 31:3) Etena konga ekambi waki Nzambi wa kɔlamelo l’ohomba w’etshungwelo kana w’ekimanyielo, vɔ mbeyaka dia ngandji kande ka lɔsɛngɔ kekɔ mɛtɛ ngandji ka kɔlamelo. Tɔ hatoshila oya lewɔ. Ɔnkɔnɛ, vɔ koka nɔmba la mbetawɔ tshɛ oko wakalɔmbɛ omembi w’esambo ate: ‘Lemi, dimi latɛkamaka lo ngandji kayɛ ka lɔsɛngɔ; otema ami atoyalaka l’ɔngɛnɔngɛnɔ lo panda kayɛ.’ (Osambo 13:5) Lam’ele ngandji ka Nzambi kekɔ la kɔlamelo, ekambi ande koka ndjaɛkɛ tshɛ le nde. Vɔ wekɔ l’eshikikelo kɛnɛ: “[Jehowa] hatukadjaka antu andi, ndu hatosekaka wudja andi.”—Osambu 94:14.
Lande na kele andja ɔnɛ wambolola l’awui w’esehe?
12. Etena kakɔna ndo ngande wakatatɛ lowandji lasɔkisha anto?
12 Okadimwelo lo dimbola sɔ mendanaka la kɛnɛ kakete l’ekambɔ k’Ɛdɛna. L’etatelo k’ɔkɔndɔ w’anto, etongami kɛmɔtshi ka lo nyuma akayonga la lokaki ndo la lotamanya ndo akakongɛ kanyi mɔtshi woho wa nde koma omboledi w’andja ɔnɛ. Etombelo w’oma lo kanyi yande shɔ akayôkonyaka “umbuledi a kete nye” woleki sɔkisha anto. (Joani 12:31) Nde akayeyamaka oko Satana Diabolo, otunyi woleki woke waki Nzambi ndo w’anto. (Joani 8:44; Enyelo 12:9) Sheke yande ya lokaki ya monga la lowandji lasɛmanɛ la lowandji laki Jehowa loludi la lɔsɛngɔ yakɛnama yema tshitshɛ l’ɔkɔngɔ wa Eva tongama. Ɔnkɔnɛ, lowandji la kɔlɔ lakatatɛ etena kakasɔnɛ Adama dia monga la dipanda oma lo lowandji laki Nzambi ko mbikasha lɔsɛngɔ Lande tshɛ. (Etatelu 3:1-6) Lo dihole dia vɔ ndjâlɔmbɔla mɛtɛ vɔamɛ, Adama la Eva wakayonga la shɛngiya ya lokaki ndo ya lotamanya yaki Diabolo ndo wakayokoma l’ɛse k’ɛlɔmbwɛlɔ kande.
13-15. (a) Naa etombelɔ ɛmɔtshi wa kɔlɔ wakayala oma lo woho wakawatɔmbɔkwɛ lowandji la Jehowa la losembwe? (b) Lande na kele akambo w’okonda l’andja ɔnɛ?
13 Tɔsɛdingole etombelo ɛmɔtshi wa kɔlɔ w’oma lo dikambo sɔ. Adama la Eva wakatshanyema oma l’etenyi ka nkɛtɛ kaki paradiso. Vɔ wakamɔ lɛnɛ aki tombatomba ndo elowa w’amɛna ndo wa wɔdu kondja ko ntshɔ otsha l’andja w’ekambɔ k’Ɛdɛna dia tɛna pâ. Nzambi akatɛ Adama ate: “Kete yambudjama mananu dikambu diaye, ne dia we aketawo diui dia wadeye, ndu akali utamba wakamanyusike nti: Tanyolekaki. Uma lu pa kayuyolekaka mbu ya nde nshi tshe ya lumu laye. We ayolekaka tumbatumba uma l’ekambo, keli atende la ahangula-koi wayutumbaka lu kete dikambu diaye.” Mananu kakadjama nkɛtɛ kɛsɔ akalembetshiya ɔnɛ okambelo atɔ akahombe koma wolo efula. Etombelo w’oma lo woho wakadjama nkɛtɛ mananu, mbidja ndo atɛndɛ l’ahangola-kɔyi, wakɛnama efula le ana waki Adama polo l’etena ka Lamɛka la she Nɔa tɛkɛta dikambo dia ‘pâ k’elimu awɔ w’anya w’oma lo nkɛtɛ yakadje Jehowa mananu.’—Etatelu 3:17-19; 5:29.
14 Adama la Eva wakengɔnya nto wɔladi la lonyangu. Nzambi akatɛ Eva ate: “Dimi layukufudiyaka asui lu nshi yaye ya diemi, ndu y’eutelu kaye k’ona. We ayutaka ana la lono. Utema aye ayekamaka paka le umeye, la ndi ayukulela.” L’ɔkɔngɔ diko, Kɛna laki ɔna enondo laki Adama la Eva akayosalaka dikambo dimɔtshi di’esehe dia ndjaka Abɛlɛ wa kosɛnde.—Etatelo 3:16; 4:8.
15 Ɔpɔstɔlɔ Joani mbutaka ate: “Wa la kete tshe weko lu wulu wa kanga kolo.” (1 Joani 5:19) L’ɛnyɛlɔ k’omboledi awɔ, andja wa nshi nyɛ kɛnɛmɔlaka waonga wa kɔlɔ wele oko lokaki ndo lotamanya. Ɔnkɔnɛ, kema dikambo dia diambo woho wambolola andja ɔnɛ l’akambo w’okonda ndo w’esehe. Koko akambo asɔ hawototetemala ngasɔ oto. Jehowa ayosala woho wa lɔsɛngɔ ndo kɛtshi ndeka kɛnɛmɔma lo Diolelo diande lo dihole di’akambo w’okonda ndo w’esehe.
Lo Diolelo diaki Nzambi lɔsɛngɔ layodja otshumba
16. Lande na kele lowandji laki Nzambi l’oma lo tshimbo ya Kristo Yeso lekɔ la lɔsɛngɔ, ndo kɛsɔ totshutshuyaka dia sala na?
16 Jehowa nde la Yeso Kristo lele Nkumekanga kakandasɔnɛ lo Diolelo diande, nɔmbaka di’anto wele l’ɛse k’ɛlɔmbwɛlɔ kawɔ mbeyama dia wekɔ la lɔsɛngɔ. (Mika 6:8) Yeso Kristo akatɛnya yema tshitshɛ tsho woho wayɛnama lɔsɛngɔ l’ɛlɔmbwɛlɔ kakawosha She. (Heberu 1:3) Dikambo sɔ koka mɛnama l’ɛtɛkɛta waki Yeso wɛnya kɛnɛ kakasalaka ewandji w’ɛtɛmwɛlɔ wakɛndjaka anto wetsho w’efula. Nde akate ate: “Nyuyi le mi, nyu tshe watukambaka ndu weli la wetshu wa wulu, ku dimi layunyusha mumuya. Nyembe lokoho lami, nyeki akambu uma le mi. Ne dia dimi la memakana la ndjakitshakitsha l’utema, ku nyu nyayutana mumuya l’etema anyu, ne dia lokoho lami leko [la lɔsɛngɔ], la ushiko ami weko usadi.” (Mateu 11:28-30) Lokema l’emboledi wa la nkɛtɛ, oyadi ewandji w’ɛtɛmwɛlɔ kana weho ekina w’ewandji, wekɔ lo pɛnyahɛnya anto l’ɛlɛmbɛ w’aha pe ndo l’elimu wahawawasha ndo losaka. Koko, kɛnɛ kalɔmba Yeso ambeki ande kotshaka ehomba awɔ ndo mbɛdimaka la akoka awɔ. Lɔkɔhɔ laki Yeso mbishaka mɛtɛ ekeketshelo ndo lekɔ la lɔsɛngɔ! Kema tambokeketshama dia mbôkoya lo monga la lɔsɛngɔ otsha le anto akina?—Joani 13:15.
17, 18. Lande na kakokaso monga l’eshikikelo ɔnɛ wanɛ wolɛ la Kristo l’olongo ndo atomami ande wa la nkɛtɛ wayonga la lɔsɛngɔ?
17 Alako w’eshika wakasha Yeso apɔstɔlɔ ande mɛnyaka otshikitanu w’efula wele lam’asa ɛlɔmbwɛlɔ ka Diolelo diaki Nzambi l’ɛlɔmbwɛlɔ k’ana w’anto. Bible mbutaka ɔnɛ: “Tamu takatumbi l’atei [w’ambeki] vati: Akona uleki wuki l’atei asu? Ndi akawatela ati: Khumi ya dikanga y’asi wedja watuwaulelaka la ngala. Ku asi wedja watuwaetaka vati: Atshi w’ololo. Keli nyu, tanyuyalaki osoku. One lunyuleki wuki ayali uku kushenyu; la olombodi ayali uku ukambi anyu. Uleki wuki na, one ludjashi lale ma, kana one lûkambela ulimu? Aha one ludjashi lale ma? Keli dimi leko l’atei anyu uku ukambi.”—Luka 22:24-27.
18 Emboledi w’ana w’anto nyangaka dia mɛnya lɔnɛnɛ lawɔ lo ‘mbolɛ’ anto ndo lo nyanga titrɛ ya weke watekana titrɛ yakɔ mbawaetsha lâdiko dia wanɛ walɔmbɔlawɔ. Koko Yeso akate dia lɔnɛnɛ la mɛtɛ ndjâka oma lo kambɛ anto akina, mbut’ate sala tshɛ dia mbâkambɛ la wolo ndo l’etete. Wanɛ tshɛ wayolɛ la Kristo l’olongo kana wayokamba oko atomami ande wa la nkɛtɛ pombaka sala tshɛ dia ndjela ɛnyɛlɔ kande k’okitshakitsha ndo ka lɔsɛngɔ.
19, 20. (a) Ngande wakɛnya Yeso woke woke wa lɔsɛngɔ laki Jehowa? (b) Ngande wakokaso mbokoya Jehowa l’ɔkɛnɛmwɛlɔ wa lɔsɛngɔ?
19 Tende dako dikina di’oludi la ngandji diakasha Yeso. Dia mɛnya woke woke wa lɔsɛngɔ laki Jehowa, Yeso akate ate: ‘Naka nyu nangaka paka wanɛ wanyolanga, ohomba akɔna wele dikambo sɔ le nyu? Nɛ dia ndo asadi wa pɛkato nangaka wanɛ wawaoka ngandji. Ndo naka nyu ntshaka ɔlɔlɔ paka le wanɛ watonyotshɛka ɔlɔlɔ, ohomba akɔna wele dikambo sɔ le nyu? Ndo asadi wa pɛkato watotshaka woho akɔ wâmɛ. Ndo nto, naka nyu sɔndjaka aha la wahɔ le wanɛ watonyolongamɛka nyate tayolongola, wahɔ akɔna wele la dikambo sɔ le nyu na? Ndo asadi wa pɛkato watɔsɔndjaka asadi wa pɛkato aha la wahɔ dia ndjolongola oko wakawakimɔ. Koko, nyotetemale la nanga atunyi anyu ndo la sala ɔlɔlɔ ndo la kimɔ aha la wahɔ kana l’elongamelo ka nongola ɛngɔ kɛmɔtshi; ko difuto dianyu diayonga woke ndo nyayonga ana wa Nkum’olongo, nɛ dia nde ekɔ la lɔsɛngɔ otsha le akanga wa lɔhɛndɛ l’akanga wa kɔlɔ. Nyotetemale monga la kɛtshi oko Shɛnyu lokana kɛtshi.’—Luka 6:32-36.
20 Lɔsɛngɔ la Nzambi kema lokaki. Lɔ halɔmbɛ ndoko ɛngɔ kana nongamɛ ɛngɔ kɛmɔtshi. La lɔsɛngɔ tshɛ, Jehowa “[atɔlɔshaka] mvula le antu w’ololo ndu le antu wa kolo.” (Mateu 5:43-45; Etsha 14:16, 17) Dia mbokoya Shɛso lele l’olongo, sho hatotone tsho dia salɛ akanga wa lɔhɛndɛ kɔlɔ koko sho mbâsalɛka ɔlɔlɔ oyadi kânga wanɛ wasala awui oko atunyi aso. Lam’ongaso la lɔsɛngɔ, sho mɛnyaka Jehowa nde la Yeso dia sho nangaka monga l’ɛse ka Diolelo diaki Nzambi, etena kayoleka mɛnama lɔsɛngɔ ndo elowa ekina wa nyuma kaki Nzambi lo weho wa diɔtɔnganelo tshɛ di’ana w’anto.
Lande na kahombaso monga la lɔsɛngɔ?
21, 22. Lande na kahombaso kɛnɛmɔla lɔsɛngɔ?
21 Le Okristo w’oshika, kɛnɛmɔla lɔsɛngɔ ekɔ dikambo di’ohomba efula. Ɔsɔ ekɔ djembetelo yɛnya dia nyuma ka Nzambi kekɔ lo kamba olimu. Ndo nto, etena kakɛnɛmɔlaso lɔsɛngɔ la mɛtɛ, sho mbokoyaka Jehowa Nzambi ndo Kristo Yeso. Lɔsɛngɔ ekɔ nto kɛnɛ kalɔmbama le wanɛ wayonga l’ɛse k’ɛlɔmbwɛlɔ ka Diolelo dia Nzambi. Lâsɔ, sho pombaka nanga lɔsɛngɔ ndo mbeka woho wa likɛnɛmɔla.
22 Naa toho tɔmɔtshi t’eshika takokaso kɛnɛmɔla lɔsɛngɔ lo lɔsɛnɔ laso la lushi la lushi? Sawo diayela diayɔtɛkɛta dikambo sɔ.
Ngande wayoyokadimola?
• Lɔsɛngɔ kɛdikɛdi na?
• Lande na kele andja ɔnɛ ekɔ dihole diele l’awui w’esehe ndo wa lohetsho?
• Ngande weyaso dia lɔsɛngɔ layodja otshumba l’ɛse k’ɛlɔmbwɛlɔ kaki Nzambi?
• Lande na kele ɔkɛnɛmwɛlɔ wa lɔsɛngɔ ohomba le wanɛ walanga nsɛna lo Diolelo dia Nzambi?
[Osato wa lo lɛkɛ 8]
Dikumanyi di’Akristo salaka la wolo dia kɛnɛmɔla lɔsɛngɔ lo yoho yasɛnawɔ l’ɛkɔkɔ
[Osato wa lo lɛkɛ 9]
Ngandji ka lɔsɛngɔ kaki Jehowa hashile otsha le ekambi ande lo tena dia wolo
[Osato wa lo lɛkɛ 10]
La lɔsɛngɔ tshɛ Jehowa tondjaka wonya ndo ndɔshaka mvula le anto tshɛ