Ɔsa woshasha ayɛ wa lɔsɛnɔ la nɛmɔ diɛdimi lalɔ
‘Dikila dia Kristo diayɛdia nkum’etema yaso oma l’etsha wa nyɔi dia sho mbeya kambɛ Nzambi kasɛna olimu w’ekila.’—HEBERU 9:14.
1. Kakɔna kɛnya dia sho mbɔsaka lɔsɛnɔ la nɛmɔ di’efula?
NAKA vɔ kombola ɔnɛ nɛmɔ dia ngande diele la lɔsɛnɔ layɛ, ngande wayoyokadimola? Sho mbɔsaka lɔsɛnɔ la nɛmɔ di’efula, oyadi laso kana l’anto akina. Woho watshɔso le onganga diatosakemɛ etena keso la hemɔ kana woho wasalaso ɛgzamɛ laka enganga mbala la mbala, shikikɛka dikambo sɔ. Sho nangaka tshikala la lɔsɛnɔ ndo la demba dia wolo. Kânga efula ka wanɛ waya esombe ndo wele la dikɔmɔ hawolange mvɔ; vɔ nangaka tshikala la lɔsɛnɔ.
2, 3. (a) Lo ndjela Tukedi 23:22, ɔkɛndɛ akɔna wele laso? (b) Ngande wendana Nzambi l’ɔkɛndɛ wɔtɛkɛtshiwɔ lo Tukedi 23:22?
2 Nɛmɔ diele la lɔsɛnɔ lo washo ayɛ ekɔ la shɛngiya lo diɔtɔnganelo diasayɛ l’anto akina. Ɛnyɛlɔ, Ɔtɛkɛta wa Nzambi mbutaka ɔnɛ: “Uhukami aui wa sho lakakuti, tonyolaki nyo lam’ayandi usumbi.” (Tukedi 23:22) ‘Mpokamɛ’ halembetshiya tsho mboka ɛtɛkɛta; yokedi shɔ nembetshiyaka mboka ko l’ɔkɔngɔ kitanyiya. (Etumbelu 15:26; Euhwelu k’Elembe 7:12; 13:18; 15:5; Jashua 22:2; Osambu 81:13) Ɔkɔkɔ akɔna watosha Ɔtɛkɛta wa Nzambi watotshutshuya dia mpokamɛka ambutshi aso? Aha paka nɛ dia shɔ kana nyɔ wambɔsɛna edja koleka kana ɔnɛ vɔ koleka mbeya akambo. Ɔkɔkɔ woshawɔ lanɛ ele vɔ ‘mbakakote.’ Dikadimwelo dimɔtshi dia Bible kadimolaka divɛsa sɔ ɔnɛ: “Hokamɛ shɔ lakakosha lɔsɛnɔ.” Mbokɛmaka dia naka wɛ mbɔsaka lɔsɛnɔ layɛ la nɛmɔ, kete wɛ ayoka dia wɛ ekɔ l’ɔkɛndɛ ɔmɔtshi otsha le ɔnɛ lele kiɔkɔ ya lɔsɛnɔ lɔsɔ.
3 Lo mɛtɛ, naka wɛ ekɔ Okristo wa mɛtɛ, kete wɛ mbetawɔka dia Jehowa mbele Kiɔkɔ ya ntondo ya lɔsɛnɔ layɛ. Oma le nde ‘mbeyɛ la lɔsɛnɔ’; mbakokayɛ ‘mbeteta,’ ndo sala akambo oko etongami kele la nsaki; ndo wɛ ‘ekɔ’ ɛlɔ kɛnɛ ndo kokaka kanyiya lo kɛnɛ kendana l’akambo wayoyosala lo nshi yayaye ndo lo kɛnɛ kendana la lɔsɛnɔ la pondjo. (Etsha 17:28; Osambu 36:9; Undaki 3:11) Lo ndjela Tukedi 23:22, ekɔ ɔlɔlɔ sho ‘mpokamɛ’ Nzambi l’okitanyiya tshɛ, takombola shihodia ndo sala akambo lo yoho yɔtɔnɛ la woho wɔsande lɔsɛnɔ koko aha lo ndjela yoho yɔsa anto akina lɔsɛnɔ.
Ɔsa lɔsɛnɔ la nɛmɔ
4. L’etatelo k’ɔkɔndɔ w’anto, ngande wakayokokama dilɛmiyɛlɔ dia lɔsɛnɔ dikambo di’ohomba?
4 L’etatelo k’ɔkɔndɔ w’anto, Jehowa akɛnya hwe dia nde kombisha onto lotshungɔ la kamba la lɔsɛnɔ lo woho tshɛ walangande kana kamba lalɔ lo yoho ya kɔlɔ. L’ɔtɛ wa kandjema k’efula kaki lande, Kɛna akakumiya lɔsɛnɔ laha l’onongo, mbut’ate nde akadiake Abɛlɛ w’ɔnango. Onde wɛ fɔnyaka dia Kɛna aki la lotshungɔ la mbɔsa yɛdikɔ ya woho ɔsɔ lo kɛnɛ kendana la lɔsɛnɔ? Nzambi kɔmɛnya dia Kɛna aki la lotshungɔ lɔsɔ. Nde akasandja Kɛna lo mombola ate: “Kakayatshi na? [Hokamɛ!] Delu dia dikila dia onanyo diambukuma pulu ndu le mi.” (Etatelu 4:10) Tekɔ lo mboka lâsɔ dia dikila diaki Abɛlɛ diakatshɔma la nkɛtɛ diaki didjidji dia lɔsɛnɔ lande, lakawahembola osondjo, ndo lɔ lakalelɛka Nzambi dia nde sɔmbɔya.—Heberu 12:24.
5. (a) Ɔlɛmbɛ akɔna wakadje Nzambi lo nshi ya Nɔa ndo waa na wakendanaka l’ɔlɛmbɛ ɔsɔ? (b) Lo woho akɔna wele ɔlɛmbɛ ɔsɔ waki naa di’ohomba efula?
5 L’ɔkɔngɔ wa Mvula k’Elola, andja wakatatɛ nto l’anima enanɛi. Lo awui amɔtshi wakandate wendana l’anto tshɛ, Nzambi akɛnya hwe woho wakandɔsaka lɔsɛnɔ la dikila. Nde akate di’anto kokaka ndɛ emunyi wa nyama, koko nde akadje ɔlɛmbɛ ɔnɛ ate: “Dikendakenda tshe dieli la lumu diayuyala mbu ya nde yanyu. Dimi lambunyushadio uku akamanyusha tumbatumba tshe. Dikambu otoi, ku tanyuyilekaki esenyu, ndu lam’ekiyo la dikila.” (Etatelu 9:3, 4) Ase Juda amɔtshi wakayengesola ɔlɛmbɛ ɔsɔ lo mbuta di’anto tâkawahombaka ndɛ omunyi kana dikila dia nyama keke la lɔsɛnɔ. Koko akayɛnamaka hwe l’ɔkɔngɔ dia kɛnɛ kakasekɛ Nzambi aki dikila diosuke lɔsɛnɔ. Ndo nto, didjango diakasha Nzambi Nɔa aki nna dia woke efula diakendanaka l’okotshamelo wa sangwelo Diande diendana la dikila, sangwelo diakahombe ndjosha anto diaaso dia kondja lɔsɛnɔ la pondjo.
6. Oma lo tshimbo ya Nɔa, ngande wakake Nzambi epole ɔsɛkɛ lo nɛmɔ diele la lɔsɛnɔ lo washo Ande?
6 Nzambi akatetemala mbuta ate: “Dimi layolomba dikila dia [“anima anyu,” NW]; layudilomba le nyama la nyama. Layolomba dikila di’untu uma le untu, ndu dikila di’untu uma le onangu. Lam’atundja untu tshe dikila dia untu omotshi, wayutundja ndu dikila diandi lu dikambu dia untu ako, ne dia [Nzambi] akatungi untu lu efanelu kandi.” (Etatelu 9:5, 6) Sho koka mɛna oma l’ɛtɛkɛta ɛsɔ wakawatɛ nkumbo k’otondo k’anto dia le Nzambi dikila di’onto kɛdikɛdi lɔsɛnɔ lande. Otungi mbishaka onto lɔsɛnɔ, ndo ndoko onto lahomba kumiya lɔsɛnɔ lɔsɔ lele lo dikila. Naka l’ɛnyɛlɔ ka Kɛna, onto ɔmɔtshi ambodiaka, kete Otungi ekɔ la lotshungɔ la ‘nɔmba’ lɔsɛnɔ l’ondjakanyi ɔsɔ.
7. Bonde kahombaso mbidja yimba efula l’ɛtɛkɛta wakatɛ Nzambi Nɔa lo kɛnɛ kendana la dikila?
7 Oma l’ɛtɛkɛta ande, Nzambi akadjangɛ anto di’aha kamba la dikila lo yoho ya kɔlɔ. Onde wɛ atayambolaka wate lande na kakadje Nzambi didjango sɔ? Ndo ɔnɛ ɔkɔkɔ akɔna wakatshutshuya Nzambi dia mbɔsa dikila la nɛmɔ dia ngasɔ? Lo mɛtɛ, okadimwelo mendanaka la wetshelo ɔmɔtshi woleki ohomba wa lo Bible. Wetshelo ɔsɔ mbele tshondo y’etshina ka losango latɛmbɛ Akristo anto, kânga mbele ɛtɛmwɛlɔ efula hawolidje yimba. Naa wetshelo ɔsɔ, ndo ngande wendana lɔsɛnɔ layɛ, tɛdikɔ tayɛ ndo ditshelo diayɛ la wetshelo akɔ?
Naa yoho ya dimɛna ya kamba la dikila?
8. Lo Ɛlɛmbɛ, ɔlɛmbɛ akɔna wakadje Jehowa lo kɛnɛ kendana l’okambelo wa la dikila?
8 Jehowa akalembetshiya awui efula lo dikambo dia lɔsɛnɔ ndo dia dikila lam’akandasha ase Isariyɛlɛ Ɛlɛmbɛ. Lam’akinde lo sala dikambo sɔ, nde akɔshi yɛdikɔ kina yendana l’okotshamelo wa sangwelo diande. Ondo wɛ akohɔ dia Ɛlɛmbɛ wakalɔmbaka anto dia nambola Nzambi elambo, ɛnyɛlɔ oko, olambo wa shima, w’esɔ ndo wa tshɔ. (Akambu w’Asi Lewi 2:1-4; 23:13; Walelu 15:1-5) Aki nto ndo olambo wa nyama. Lo kɛnɛ kendana l’elambo ɛsɔ, Nzambi akate ate: “Ne dia lumu la dimba leko lu dikila. Dimi lakanyushalo [l’elambwelo] dia ntungela [anima] anyu ekesanelu, ne dia dio diele dikila diatutungaka ekesanalu dikambu dia lumu. Diako mbakamatela asi Isariyele nti: Untu talekaki dikila.” Jehowa akate nto dia naka onto ɔmɔtshi kana mengenga ambotodiaka nyama kalɛwɔ, nde pombaka sedia dikila diatɔ ko difɛ nkɛtɛ. Nkɛtɛ kekɔ kihona k’ekolo wa Nzambi, ɔnkɔnɛ, lo mbitshola dikila lo nkɛtɛ, onto aketawɔka dia lɔsɛnɔ lambokalola otsha le Kiɔkɔ ya lɔsɛnɔ.—Akambu w’Asi Lewi 17:11-13; Isaya 66:1.
9. Lo ndjela Ɛlɛmbɛ, paka lo dikambo diakɔna diakahombaka anto kamba la dikila ndo l’oyango akɔna?
9 Ɛlɛmbɛ wekɔ la kitshimudi le so, koko vɔ komonga tsho mbekelo mɔtshi ya l’ɔtɛmwɛlɔ. Onde wɛ ambɛna bonde kele ase Isariyɛlɛ kopombaka ndɛ dikila? Nzambi akate ate: ‘Diakɔ diakamatɛ ana w’ase Isariyɛlɛ nte: Ndoko anima ɔtɔi l’atei anyu wahomba ndɛ dikila.’ Aki l’ɔkɔkɔ akɔna? Jehowa mbutaka ate: ‘Dimɛmɛ lakadje dikila lo elambwelo dia nyotongela ekesanelo dikambo di’anima anyu.’ Onde tambɛna dia dikambo sɔ diambotokimanyiya dia shihodia lande na kakatɛ Nzambi Nɔa di’anto hawohombe ndɛ dikila? Otungi akɔshi yɛdikɔ ya mbisha dikila nɛmɔ di’efula, dia ndjokamba ladiɔ lo yoho ya lânde dia shimbɛ nsɛnɔ y’anto efula. Dikila diakahombe ndjonga l’ɔkɛndɛ w’ohomba efula lo edimanyielo ka pɛkato. Ɔnkɔnɛ, lo Ɛlɛmbɛ, paka lo elambwelo mbaketawɔ Nzambi dia vɔ kamba la dikila dia tongela ase Isariyɛlɛ wanɛ wakayangaka edimanyielo ka Jehowa ekesanelo.
10. Lande na kele dikila dia nyama kokonya lo edimanyielo ka tshɛ ka pɛkato ndo elambo wakalambɔmaka lo ndjela Ɛlɛmbɛ wakoholaka ase Isariyɛlɛ dikambo diakɔna?
10 Aha oma lo Lokristokristo mboye kanyi ya kamba la dikila dikambo di’edimanyielo ka pɛkato. Lo tɛkɛta dikambo dia yɛdikɔ ya l’Ɛlɛmbɛ shɔ yakɔshi Nzambi, ɔpɔstɔlɔ Paulo akafunde ate: “Uku wata elembe, mbatami nti: Diango tshe diambediama la dikila, lam’aha ekwelo ka dikila, keti edimanyelu ka kolo kema laawo.” (Heberu 9:22) Paulo akɛnya hwe di’elambo wakalɔmbamaka kokonyaka ase Isariyɛlɛ anto wa kokele, waha la pɛkato. Nde akafunde ate: “Keli lu elambu ako, kaki euhwelu k’akambu wa kolo lu eleku l’eleku. Ne dia dikila dia waumi a ngombe la dia mbudi hadieyi minyia antu kolo.” (Heberu 10:1-4) Koko, elambo ɛsɔ waki l’oyango ɔmɔtshi. Vɔ wakoholaka ase Isariyɛlɛ dia vɔ waki atshi wa pɛkato ndo waki l’ohomba w’ɛngɔ kekina dia vɔ kondja edimanyielo ka tshɛ. Ko naka dikila diele diɔ diaki didjidji dia nsɛnɔ ya nyama kokokaka komba pɛkato yawɔ tshɛ, onde woho ɔmɔtshi wa dikila diakakoke sala dikambo sɔ?
Ekandwelo kaki ɔnɛ lele kiɔkɔ ya lɔsɛnɔ
11. Ngande weyaso di’elambo wa dikila dia nyama wakakotolaka yambalo y’anto otsha lo dikambo dimɔtshi?
11 Ɛlɛmbɛ wakakotolaka yambalo lo ɛngɔ kɛmɔtshi kaki ohomba efula lo ekotshamelo ka sangwelo dia Nzambi. Paulo akambola ate: “Dikambu kuna dieli elembe?” Nde akakadimola ate: “Vo wakadjama ne dia kolo, edja ndu lam’akayi kanula yakawalaki: daka diako diakadjama uma le andjelo le oteketedi [Mɔsɛ].” (Ngalatiya 3:19) Woho akɔ wâmɛ, Paulo akafunde ate: “Ne dia elembe waki didjidji tu dia akambu w’ololo wayayi, waha efanelu mete mete ka diango so.”—Heberu 10:1.
12. Lo kɛnɛ kendana la dikila, ngande wakokaso mɛna woshwelo wa sangwelo diaki Nzambi?
12 Oko wakatadiɛnyi l’etatelo ka sawo nɛ, tohɔ dia lo nshi ya Nɔa, Nzambi akate di’anto wakakokaka ndɛ emunyi wa nyama dia sukɛ lɔsɛnɔ lawɔ, koko aha dikila. L’ɔkɔngɔ diko, Nzambi akate dia ‘anima wa nyama wekɔ lo dikila.’ Eelo, nde akɔshi dikila oko didjidji dia lɔsɛnɔ ndo akate ate: ‘Dimɛmɛ lakakitsha dikila lo elambwelo dia tongela anima anyu ekesanelo.’ Ɔsɔ aki woshwelo okina wa diambo wakendanaka la sangwelo diaki Nzambi. Ɛlɛmbɛ waki didjidji di’akambo w’ɔlɔlɔ wakahombe ndja. Naa akambo akɔ w’ɔlɔlɔ na?
13. Bonde kele nyɔi kaki Yeso kaki ohomba?
13 Akambo asɔ wakendanaka la nyɔi ka Yeso Kristo. Wɛ mbeyaka dia Yeso akasoyama ndo akahanema l’otamba. Nde akavu oko kanga kɔlɔ. Paulo akafunde ate: “Lam’akisu weodu, lam’akakuki etena kako, Kristu akavwela amonyodi wa [Nzambi]. Keli [Nzambi] akatenya ngandji kandi ne dia Kristu akatuvwela lam’akisu antu wa kolo.” (Romo 5:6, 8) Lo tovwɛ, Kristo akakimɔ tshungo dia komba pɛkato yaso. Olambo wa tshungo ɔsɔ ekɔ dikambo dimɔtshi di’ohomba diendana la losango l’Akristo. (Mateu 20:28; Joani 3:16; 1 Koreto 15:3; 1 Timote 2:6) Diɔtɔnganelo diakɔna diele lam’asa dikambo sɔ la dikila ndo la lɔsɛnɔ ndo ngande wendana lɔsɛnɔ laso la dikambo sɔ?
14, 15. (a) Ngande wele woho wakakadimɔma Efeso 1:7 lo dikadimwelo dimɔtshi mbikaka epole ɔsɛkɛ lo nyɔi ka Yeso? (b) Dui diakɔna diendana la Efeso 1:7 diakadinyadinya dikadimwelo efula dia Bible?
14 Ɛtɛmwɛlɔ ɛmɔtshi mbikaka epole ɔsɛkɛ lo nyɔi ka Yeso ndo anto wa lɔkɔ mbutaka ɔnɛ “Yeso akavu dikambo diawɔ.” Dikadimwelo dimɔtshi dia Bible kadimolaka Efeso 1:7 yoho nyɛ: “Le nde ndo oma lo tshimbo ya nyɔi kande mbakatatshungɔ, mbut’ate mbakandatonyɛ pɛkato yaso.” (The American Bible, kaki Frank Scheil Ballentine, 1902) “Oma lo nyɔi ka Kristo mbayaso la lotshungɔ, ndo pɛkato yaso yambodimanyiyama.” (Today’s English Version, 1966) “Ekɔ le Kristo ndo oma lo tshimbo yande ndo oma l’olambo wa lɔsɛnɔ lande mbakatatshungɔ, etshungwelo kalembetshiya edimanyielo ka pɛkato.” (The New Testament, ka William Barclay, 1969) “Ekɔ oma lo tshimbo ya nyɔi ka Kristo mambotokondja edimanyielo ka pɛkato yaso ndo mambototshungɔ.” (The Translator’s New Testament, 1973) Wɛ koka mɛna lo toho takakadimɔma divɛsa sɔ dia wekɔ lo mbika epole ɔsɛkɛ lo nyɔi ka Yeso. ‘Ɔnkɔnɛ,’ amɔtshi mbeyaka mbuta dia ‘nyɔi ka Yeso kekɔ mɛtɛ ohomba. Ko dui diakɔna diahakɛnɛmɔmi lo dikadimwelo ndo na?’
15 Lo mɛtɛ, otondonga paka dikadimwelo nɛ to mbele laso, tshike ekɔ dui dimɔtshi di’ohomba efula diototohandɔ ndo dui sɔ totodiotosha diaaso dia sho monga la eokelo ka tshɛ ka losango la lo Bible. Dikadimwelo sɔ dinyadinyaka woho ɔnɛ wele afundelo w’etatelo w’Efeso 1:7 wekɔ lo kamba la tshɛkɛta ya lo Grɛkɛ yalembetshiya “dikila.” Ɔnkɔnɛ, dikadimwelo efula, ɛnyɛlɔ oko Traduction du monde nouveau kadimolaka dimɛna awui w’oma l’efundelo w’etatelo asɔ lo mbutaka ɔnɛ: “Oma lo tshimbo yande mambototshungɔ oma lo tshungo, mbut’ate diɛsɛ oma lo dikila di’onto ɔsɔ, eelo, edimanyielo ka kɔlɔ yaso lo ndjela ɔngɔnyi wa ngandji kande k’otamanya.”
16. Etelo k’ɔnɛ ‘dikila di’onto ɔsɔ’ pombaka mbidja kanyi yakɔna lo yimba yaso?
16 Etelo k’ɔnɛ ‘dikila di’onto ɔsɔ’ kekɔ la kitshimudi y’ohomba efula ndo tɔ pombaka totshutshuya dia kana yimba la akambo wendana la dikila. Aha nyɔi k’onto ɔmɔtshi keto mbaki ohomba, koyanga nyɔi ka Yeso onto la kokele. Nde akakotsha kɛnɛ kaki didjidji lo Ɛlɛmbɛ, djekoleko lo Lushi l’Ekesanelo. Lo lushi la lânde lɔsɔ, nyama yaketawɔmaka lo ndjela Ɛlɛmbɛ yakalambɔmaka. Oma lâsɔ, ɔlɔmbɛdi wa lâdiko akɔsaka dikila dimɔtshi dia nyama shɔ dia ntshɔ ladiɔ otsha lo dihole Dioleki Ekila dia lo tabɛrnakɛlɛ kana tɛmpɛlɔ, ko todilambola Nzambi lɛkɔ, watekana oko onto lele mɛtɛ la ntondo Kande.—Etumbelu 25:22; Akambu w’Asi Lewi 16:2-19.
17. Ngande wakakotsha Yeso kɛnɛ kaki didjidji dia Lushi l’Ekesanelo?
17 Yeso akakotsha kɛnɛ kaki didjidji dia Lushi l’Ekesanelo, oko wakadilembetshiya Paulo. Ntondotondo, nde akate dia l’Isariyɛlɛ, ɔlɔmbɛdi wa lâdiko akɔtɔka lo Dihole Dioleki Ekila mbala ɔtɔi l’ɔnɔnyi la dikila diakandalambolaka ‘dikambo dia pɛkato yande ndamɛ ndo dikambo dia pɛkato yakasalaka anto aha la vɔ mbeya.’ (Heberu 9:6, 7) Lo yoho yɔtɔnɛ la kɛnɛ kakasalemaka lo Lushi l’Ekesanelo, l’ɔkɔngɔ wa nde mbolwama oko etongami ka lo nyuma, Yeso akadɛ l’olongo. Oko etongami ka lo nyuma, lele komonga la demba ndo la dikila dia l’emunyi, nde akakoke mɛnama la ntondo ka ‘Nzambi dikambo diaso.’ Kakɔna kakandatokimɔka le Nzambi? Aha ɛngɔ kɛmɔtshi ka l’emunyi, koko ɛngɔ kɛmɔtshi k’ohomba efula. Paulo akate nto ate: “Keli lam’akene Kristu uku olombedi a ladiku. . . . Ndi komboto la dikila dia mbudi la dia esongo wa ngombe, keli la dikila diandi ndame. Ndi akoto etena otoi lu Dihuli di’Ekila, lam’akandalungwela antu etshungwelu ka pundju. Ne dia naka dikila dia mbudi la dia waumi wa ngombe, . . . mbeyaka nkidia la mbedia antu uma lu kolo yawo lam’amongawo diango diako, l’alimba awo, undi dikila dia Kristu, lakayakimo aha la diwadi le [Nzambi] lu wulu a nyuma ka pundju, hadiuleki mbedia khum’etema yanyu uma lu etsha wa nyoi, dia nyu nkambela [“Nzambi kasɛna,” NW] ulimu uka?” Eelo, Yeso akasha Nzambi nɛmɔ dia dikila diande dia lɔsɛnɔ.—Heberu 9:11-14, 24, 28; 10:11-14; 1 Petero 3:18.
18. Lande na kele kɛnɛ kata Bible lo dikambo dia dikila kekɔ ohomba efula le Akristo ɛlɔ kɛnɛ?
18 Akambo wa mɛtɛ w’oma le Nzambi asɔ tokimanyiyaka dia shihodia akambo wa diambo tshɛ wa kɛnɛ kata Bible lo dikambo dia dikila, mbut’ate, lande na kadiɔsa Nzambi woho wadiɔsande, ngande wahombaso mbɔsa dikila ndo bonde kahombaso kitanyiya ɛlɛmbɛ waki Nzambi wendana l’okambelo wa la dikila. Naka wɛ mbadia abuku wa l’Afundelo w’Akristo w’ase Ngirika, kete wɛ ayotana waa rɛferansɛ efula wendana la dikila dia Kristo. (Enda kiombo.) Rɛferansɛ ɛsɔ mɛnyaka hwe di’Okristo tshɛ pombaka monga la mbetawɔ ‘lo dikila dia Yeso.’ (Romo 3:25) Paka ‘oma lo dikila diakatshola Yeso’ mbakokaso kondja edimanyielo ka pɛkato ndo monga la wɔladi lam’asaso la Nzambi. (Kolosai 1:20) Dui sɔ diekɔ mɛtɛ lo dikambo di’anto wele Yeso akadje la wɔ sheke ya lânde dia vɔ tôlɛ la nde l’olongo. (Luka 22:20, 28-30; 1 Koreto 11:25; Heberu 13:20) Ekɔ mɛtɛ di’ɛlɔ kɛnɛ, “ului a wuki” wayoka oma lo “fonu ka wuki” kayaye, wayokondja lɔsɛnɔ la pondjo lo paradiso ka lanɛ la nkɛtɛ. Lo yoho ya didjidji, vɔ ‘wambɔtsha ahɔndɔ awɔ lo dikila dia Ɔn’ɔkɔkɔ.’—Enyelo 7:9, 14.
19, 20. (a) Lande na kakasekɛ Nzambi okambelo wa la dikila ndo ngande wahombaso mbɔsa dikambo sɔ? (b) Kakɔna kahombaso sala la wolo dia mbeya?
19 Mbokɛmaka hwe dia dikila diekɔ la kitshimudi ya lânde lo washo wa Nzambi. Diɔ pombaka nto monga la kitshimudi ya lânde le so. Otungi, ɔnɛ layakiyanya dikambo dia lɔsɛnɔ, ekɔ la lotshungɔ la sekɛ anto dikila. Lo woho wayakiyanyande efula dikambo dia lɔsɛnɔ, koyanga dia lɔsɛnɔ laso, nde akɔshi yɛdikɔ ya ndjokamba la dikila lo yoho mɔtshi yoleki ohomba efula, mbut’ate yoho yâmɛ yakoka tokondjiyɛ lɔsɛnɔ la pondjo. Yoho shɔ mendanaka la dikila di’oshinga wolo diaki Yeso. Sho kokaka mɛtɛ monga la lowando lo yoho yakasale Jehowa Nzambi akambo lo wahɔ wakiso lo kamba la dikila dia Yeso lo yoho yakoka shimbɛ nsɛnɔ yaso! Ndo sho pombaka nto monga la lowando le Yeso lo woho wakandetawɔ mbitshola dikila diande oko olambo dikambo diaso! Lo mɛtɛ, sho kokaka shihodia nsaki yakakɛnɛmɔla ɔpɔstɔlɔ Joani lakate ate: “Ndu uma le Jesu Kristu omenyi a kolamelu, ona enundu lakulwama uma lu nyoi, umbuledi a khumi ya dikanga ya la kete. Le one latutukaka ngandji, ndu lakatutshungula uma lu kolo yasu la dikila diandi; lakatete akanga a diulelu la elombedi a [Nzambi] Shi; lutumbu la diulelu, wayali le ndi pundju pundju! Ayali osoku!”—Enyelo 1:5, 6.
20 Nzambi kaso koleki lomba ndo Ombishi wa Lɔsɛnɔ ekɔ lo mbohɔ ɔkɛndɛ ɔsɔ washimbɛ nsɛnɔ. Lâsɔ, sho pombaka ndjambola ɔnɛ: ‘Shɛngiya yakɔna yahomba monga la dikambo sɔ lo tɛdikɔ ndo lo ditshelo diaso?’ Sawo diayela diayokadimola lo wombola ɔsɔ.
Ngande Wayoyokadimola?
• Kakɔna kakokaso mbeka lo woho wakɔsaka Nzambi dikila lo ndjela ɔkɔndɔ wendana la Abɛlɛ nde la Nɔa?
• Lo Ɛlɛmbɛ, elelo akɔna wakadje Nzambi lo kɛnɛ kendana l’okambelo wa la dikila, ndo lande na?
• Ngande wakakotsha Yeso kɛnɛ kaki didjidji dia Lushi l’Ekesanelo?
• Ngande wakoka dikila dia Yeso shimbɛ nsɛnɔ yaso?
[Kiombo ya lo lɛkɛ 12]
DIKILA DIAKƆNA DIASHIMBƐ NSƐNƆ?
“Nyuyalami ololo, ndu nyulami limba tshe ololo, wako wakanyukitsha [nyuma k’ekila] alami, dia nyu ndesha [etshumanelo ka Nzambi k]akandasumbi la dikila [di’Ɔnande].”—Etsha 20:28.
“Okone tayuleka nshimbamela uma lu kele ka [Nzambi] dikambu dia ndi, ne dia tambuyindjama la dikila diandi.”—Romo 5:9.
“Nyu tanyaki la elungamelu, tanyaki la [Nzambi] lu kete nye. Keli kakiane, nyu wane waki etali le Kristu Jesu, nyambusukana lu dikila dia Kristu.”—Efeso 2:12, 13.
“Ne dia Shesu akalangi dia elulelu k’akambu tshe ndjala le ndi, la dia ndi mbekesanyia diango tshe la ndi, mbakandete ki lu dikila dia l’utamba andi [w’asui].”—Kolosai 1:19, 20.
“Okone anyasu, ne dia shu la dihunga dia mboto lu etemwelo ne dia dikila dia Jesu.”—Heberu 10:19.
“Nyu kuntshungwama la diango diayulana, la fesa kana paunyi, uma lu ditshelu dianyu di’anyanya, diakanyakiti uma le watshenyu. Keli nyu nyakatshungwama la dikila di’ushinga a wulu, uku dia ona okoko laha la munga kuyanga vadi, dia Kristu ndame.”—1 Petero 1:18, 19.
“Keli naka shu tatokendakendaka lu yanyi, uku wendi lu yanyi, keti shu tambekesanela kame, ndu dikila dia Jesu On’andi diambutedia uma lu akambu wa kolo tshe.”—1 Joani 1:7.
“We kukuki dia nungula wombo a buku one, ndu dia ndjihula tulimbitelu tawo, ne dia we akadiakema, akasumbila [Nzambi] antu la dikila diaye: w’uma lu wauhu tshe ndu w’eteketa tshe, ndu w’uma lu wehu tshe, la waulelu tshe.”—Enyelo 5:9.
“Osongwedi wa anyasu ambukandjema . . . Vo wakuleki wulu ne dia dikila dia Ona-Okoko ndu dia diui diawo. Vo kumbuka nyumu yawo ngandji edja ndu lu nyoi.”—Enyelo 12:10, 11.
[Osato wa lo lɛkɛ 16]
Oma lo tshimbo y’Ɛlɛmbɛ, Nzambi akɛnya hwe dia dikila diakakokaka dimanyiyɛ anto pɛkato
[Osato wa lo lɛkɛ 16]
Oma lo tshimbo ya dikila dia Yeso, nsɛnɔ efula koka shimbamɛ