Tambetshama dia sambisha dimɛna dimɛna
“Nyu nyayuyala emenyi ami lu Jerusalema, lu Judiya tshe la Samariya edja ndu l’ekumelu ka kete.”—ETSHA 1:8.
1, 2. Ɔkɛndɛ akɔna wakalongola Petero ndo akawoshawɔ?
“JESU y’usi Nazareta . . . akatokokomiya ati: Nyusambisha antu, nyuwaenya nyati: Ndi akasonwama le [Nzambi], dia ndjala umbuledi a wasena la wakavu.” (Etsha 10:38, 42) Oma l’ɛtɛkɛta ɛsɔ, ɔpɔstɔlɔ Petero akewoya Kɔnɛliyo nde la nkumbo kande ɔkɛndɛ wakandalongola wa monga osambisha.
2 Etena kakɔna kakasha Yeso ɔkɛndɛ ɔsɔ na? Ondo Petero akakanyiyaka kɛnɛ kakate Yeso l’ɔkɔngɔ wa nde mbolɔ ndo yema la ntondo ka nde mbudɛ l’olongo. Lo diaaso sɔ, Yeso akatɛ ambeki ande wa kɔlamelo ate: “Nyu nyayuyala emenyi ami lu Jerusalema, lu Judiya tshe la Samariya edja ndu l’ekumelu ka kete.” (Etsha 1:8) Koko yema la ntondo ka lâsɔ, Petero akeyaka dia oko wakinde ombeki waki Yeso, nde ayohomba mbutɛ anto akina akambo wendana la mbetawɔ kande le Yeso.
Waketshama ɛnɔnyi oko esato
3. Dihindo diakɔna diakasale Yeso, ndo leeta lakɔna lakandasha Petero nde la Andɛlɛ?
3 Ngɔndɔ efula l’ɔkɔngɔ wa batismu kande lo 29 T.D., Yeso akasambisha lo ndjale ka Ngalileya, lo dihole diakakambaka Petero nde l’ɔnango Andɛlɛ olimu wa munda nse. Vɔ wakakambe otsho w’otondo aha la munda kânga yangɔ. Koko, Yeso akawatɛ ate: “Mosemiya watu utsha lu dingunda, nyukitshakitsha tei yanyu, keli nyokoke nsi.” Lam’akawasale kɛnɛ kakawatɛ Yeso, “vo wakandi nsi efula, ku tei yakate.” Lam’akandɛnyi dihindo sɔ, Petero akandama la wɔma, koko Yeso akokeketsha lo mbotɛ ate: “Tukaki woma. Uma ka kakiane, we ayundaka antu.”—Luka 5:4-10.
4. a) Ngande wakalɔngɔsɔla Yeso ambeki ande dia vɔ sambisha? b) Ngande wakahombe monga olimu w’ambeki waki Yeso lo mbɛdika l’olimu waki Yeso ndamɛ?
4 Aha la tshimbatshimba, Petero la Andɛlɛ, kâmɛ ndo Jakɔba la Joani, ana waki Zebede wakatshike wato awɔ ko wakayele Yeso. Ɛnɔnyi oko esato, vɔ wakatshindɛ Yeso lo kɛndɔ yande y’esambishelo ndo wakakondja ohokwelo wa monga esambisha. (Mateu 10:7; Mako 1:16, 18, 20, 38; Luka 4:43; 10:9) L’ekomelo k’etena ka ohokwelo kɛsɔ, lo Nisana 14, 33 T.D., Yeso akawatɛ ate: “One lambetawo, ndu ndi ayutsha elimu watumutshaka. Ndu elimu wuleki ene mbayundutsha.” (Joani 14:12) Ambeki waki Yeso wakahombe sambisha efula ndeka ndo woho wakasambisha Yeso. Oko wakiwɔ oma la dieka, vɔ ndo wanɛ wakahombe ndjokoma ambeki lo nshi yayaye wakahombe sambisha lo “wedja tshe” polo lo “ekumelu k’andja.”—Mateu 28:19, 20.
5. Lo toho takɔna takokaso kondja wahɔ oma lo ohokwelo wakasha Yeso ambeki ande?
5 Tekɔ lo sɛna lo nshi “y’ekumelu k’etena kene.” (Mateu 24:3) Otshikitanyi l’ambeki wa lo ntambe ka ntondo asɔ, sho hatokoke tshindɛ Yeso ndo menda woho wasambishande anto. Koko, sho koka kondja wahɔ oma lo ohokwelo wakasha Yeso lo mbadia lo Bible woho wakandasambishaka ndo alako wakandasha ambeki ande. (Luka 10:1-11) Koko, tayɛna lo sawo nɛ dikambo dimɔtshi di’ohomba efula diakɛnya Yeso ambeki ande, dikambo diakɔ ko: monga la yimba ya dimɛna lo dikambo di’olimu w’esambishelo.
Toyakiyanya dikambo di’anto
6, 7. Dionga diakɔna diaki la Yeso diakokimanyiya dia kondja etombelo w’ɔlɔlɔ, ndo ngande wakokaso mbôkoya lo dikambo sɔ?
6 Lande na kakasambisha Yeso dimɛna ngasɔ na? Ɔkɔkɔ ɔmɔtshi ele nɛ dia nde akayakiyanyaka efula dikambo di’anto. Omembi w’esambo akatatshi dia Yeso ‘ayoka amɛnyi fɔnu la ase wola kɛtshi.’ (Osambu 72:13) Nde akakotsha mɛtɛ prɔfɛsiya kɛsɔ. Bible mbutaka kɛnɛ kakete lo diaaso dimɔtshi ɔnɛ: “Lam’akandenyi elui w’antu, ndi akawauki ketshi, ne dia vo wakahenyahenyama, ndu kundjala la ekimanyelu, uku ekoko waha la ulami.” (Mateu 9:36) Kânga atshi wa pɛkato wa mamba wakɛnaka dia nde akayakiyanyaka dikambo diawɔ ndo wakakotɔmaka oya le nde.—Mateu 9:9-13; Luka 7:36-38; 19:1-10.
7 Ɛlɔ kɛnɛ sho lawɔ koka kondja etombelo w’amɛna naka sho ndjakiyanya woho akɔ wâmɛ dikambo di’anto. La ntondo ka tomba l’esambishelo, lande na kahayɔshi etena ka kana yimba lo woho wele anto l’ohomba w’efula wa mboka losango latayawaɛmbɛ na? Kanyiya ekakatanu wakokawɔ monga lawɔ wele paka Diolelo mbayoyeshidiya. Onga la kanyi y’ɔlɔlɔ otsha le onto tshɛ nɛ dia wɛ heye onto akɔna layetawɔ losango latayasambisha. Ondo onto okina layoyosambisha akalɔmbɛ Nzambi di’onto oko wɛ ndja ndjowenda ndo mbokimanyiya!
Ngandji mbakôtshutshuyaka
8. L’ɛnyɛlɔ ka Yeso, kakɔna katshutshuya ambeki ande dia sambisha lokumu l’ɔlɔlɔ?
8 Lokumu l’ɔlɔlɔ lakasambishaka Yeso lakendanaka l’okotshamelo wa lolango laki Jehowa, okidiamelo wa lokombo Lande, ndo oyindjamelo wa lowandji Lande, mbut’ate akambo woleki ohomba efula wele la ntondo k’anto. (Mateu 6:9, 10) Lam’ele nde aki la ngandji otsha le She, Yeso akalame olowanyi ande polo l’ekomelo ndo akasambisha dimɛna dimɛna akambo wendana la Diolelo diayoyoshidiya ekakatanu ɛsɔ tshɛ. (Joani 14:31) Oko watshutshuyamawɔ oma lo ngandji, ambeki waki Yeso wa nshi nyɛ wekɔ l’etete l’olimu w’esambishelo. Ɔpɔstɔlɔ Joani akate ate: “Ngandji ka [Nzambi] kene, dia shu nama elembe andi: ku elembe andi hawuleki wutshu,” mbidja ndo ɔlɛmbɛ wa sambisha lokumu l’ɔlɔlɔ ndo wa mbetɛ anto ambeki.—1 Joani 5:3; Mateu 28:19, 20.
9, 10. Lâdiko dia ngandji ka Jehowa, ngandji kakɔna nto katotshutshuya dia sambisha dimɛna dimɛna?
9 Yeso akatɛ ambeki ande ate: “Naka nyu nangakami, nyayukitanyia elembe ami. One leli la elembe ami, ndu latêkitanyiyaka, ndi kananga.” (Joani 14:15, 21) Ɔnkɔnɛ, ngandji ka Yeso pombaka totshutshuya dia sambisha akambo wa mɛtɛ ndo kitanyiya akambo akina wakadjanga Yeso. Lo diaaso dimɔtshi diakɛnama Yeso l’ɔkɔngɔ w’eolwelo kande, Yeso akakɔkɔmiya Petero ate: “Uleshaki an’ami w’ekoko. . . . Ulamaki ekoko ami. . . . Uleshaki ekoko ami.” Kakɔna kakahombe tshutshuya Petero dia sala dikambo sɔ? Yeso akakadimola lo wombola ɔsɔ etena kakandambola Petero mbala ko mbala ɔnɛ: ‘Onde wɛ mbokakami ngandji? Onde wɛ mbokakami ngandji? Onde wɛ ekɔ la ngandji le mi?’ Eelo, ngandji kaki la Petero otsha le Yeso kakahombe mbotshutshuya dia sambisha dimɛna dimɛna ndo mbokimanyiya dia tana “ekoko” waki Yeso, oma lâsɔ ko nde ndjonga onami awɔ wa lo nyuma.—Joani 21:15-17.
10 Ɛlɔ kɛnɛ sho hatɛnana la Yeso oko wakidiɔ lo dikambo diaki Petero. Koko, sho shihodiaka dimɛna kɛnɛ kakasale Yeso lo dikambo diaso. Etema aso munandemaka la ngandji ka mamba kakôkonya lo “mvwela antu tshe.” (Heberu 2:9; Joani 15:13) Sho ndjaokaka woho wakayaoke Paulo etena kakandafunde ate: “Ngandji ka Kristu atuto[tshutshuyaka] . . . Ndi akavwela tshe, ne dia waku weli la lumu, tawuyalaki la lumu dikambu diawo vame, keli dia one lakâvwela.” (2 Koreto 5:14, 15) Sho mɛnyaka dia sho mbɔsaka ngandji kaki Yeso la nɛmɔ efula ndo ɔnɛ sho lawɔ mbolangaka lo kotsha l’otema ɔtɔi ɔkɛndɛ wa sambisha dimɛna dimɛna. (1 Joani 2:3-5) Hatohombe monga la wendjudi l’olimu w’esambishelo, oko anto wɔsa di’olambo waki Yeso kema la nɛmɔ.—Heberu 10:29.
Tetawɔke di’ɛngɔ kɛmɔtshi kekola yimba oma lo kɛnɛ kele ohomba
11, 12. L’oyango akɔna wakaye Yeso lanɛ la nkɛtɛ, ndo ngande wakandɛnya dia nde akɔsaka dikambo sɔ oko olimu woleki tshɛ ohomba?
11 Lam’aki Yeso la ntondo ka Pɔnsɔ Pilato, nde akate ate: “Dimi lakuto dia dikambu ne. Dia dikambu ne mbakamayi la kete, dia mvuta akambu wa mete.” (Joani 18:37) Yeso kotshikɛ ndoko ɛngɔ dihole dia tɔ mbekola yimba yande oma lo sambisha akambo wa mɛtɛ. Ɔsɔ mbaki lolango laki Nzambi lo dikambo diande.
12 Satana akahembe Yeso lo dikambo sɔ. Yema tshitshɛ l’ɔkɔngɔ wa batismu kande, Satana akalange mbôkonya onto la woke l’andja ɔnɛ, mbut’ate mbosha “waulelu tshe wa l’andja ndu lutumbu lawo.” (Mateu 4:8, 9) L’ɔkɔngɔ, ase Juda wakalange mbodja nkumekanga. (Joani 6:15) Anto amɔtshi mbeyaka ndjambola ɛlɔ kɛnɛ dia kana anto wotokondja wahɔ efula otondonga Yeso aketawɔ kɛnɛ kakalange Satana mbosha kɛsɔ, ondo lo kanyiya dia otondokoma nkumekanga, Yeso otokoka sala akambo efula w’ɔlɔlɔ lo dikambo di’anto. Koko Yeso akatone woho w’ekanelo ka yimba kɛsɔ. Nde akɔshi dia sambisha lokumu l’ɔlɔlɔ mbele dikambo dioleki tshɛ ɔlɔlɔ diakandahombe sala.
13, 14. a) Kakɔna kaki kombekola yimba yaki Yeso oma l’olimu ande wakaleke ohomba? b) Kakɔna kakasale Yeso kânga mbakinde wola lo kɛnɛ kendana la lomombo la l’emunyi?
13 Ndo nto, Yeso kombetawɔ di’eyango w’ɔngɔnyi mbekola yimba. Diɔ diakɔ diakinde komonga ɔngɔnyi. Nde komonga kânga la luudu lande hita. Lo diaaso dimɔtshi, nde akate ate: “Mbulu yeko la afuku, fudu ya l’ulungu yeko la kefu, keli On’a untu kema la lama mbetamia ote andi.” (Mateu 8:20) Lo ndjela Bible, lam’akavu Yeso, ɛngɔ kâmɛ k’oshinga wolo kaki lande aki dihɔndɔ diele asɔlayi w’ase Rɔma wakadioke owale. (Joani 19:23, 24) Ko onde lâsɔ, Yeso aki la lɔsɛnɔ lele bu ɔngɛnɔngɛnɔ? Ndooko!
14 Kɛnɛ kakasale Yeso ndeka etale kɛnɛ kakoka akanga w’ɛngɔnyi washa weshasha wa kɛtshi sala. Paulo akate ate: “Ne dia nyu mbeyaka ngandji ka mamba ka Khumesu Jesu Kristu, nyati: Kuyanga ndi aki ongonyi, ndi akayala la wula dia dikambu diasu, dia nyu ndjala engonyi uma lu wula andi.” (2 Koreto 8:9; Filipi 2:5-8) Kânga mbakinde wola lo kɛnɛ kendana la lomombo la l’emunyi, Yeso akadiholɛ anto wele l’okitshakitsha mboka dia vɔ kondja lɔsɛnɔ la pondjo la kokele. Tekɔ mɛtɛ la lowando efula le nde! Ndo tekɔ l’ɔngɛnɔngɛnɔ efula lo difuto diakandakondja nɛ dia nde aketɛ osalelo wa lolango laki Nzambi dikambo dioleki ohomba lo lɔsɛnɔ lande!—Osambu 40:8; Etsha 2:32, 33, 36.
15. Kakɔna kele la nɛmɔ efula ndeka ɔngɔnyi?
15 Ɛlɔ kɛnɛ, Akristo wasala la wolo dia mbokoya Yeso tonaka dia oyango w’ɔngɔnyi mbekola timba tawɔ. (1 Timote 6:9, 10) Vɔ suyaka dia ɔngɔnyi mbeyaka mbetɛ lɔsɛnɔ l’onto dimɛna efula, koko vɔ mbeyaka di’ɔngɔnyi hasale ndoko dikambo lo kɛnɛ kendana la nshi yawɔ yayaye ya pondjo. Etena kavɔ Okristo, ɔngɔnyi ande wa l’emunyi bu nto la nɛmɔ le nde oko woho waki dihɔndɔ diaki Yeso komonga nto la nɛmɔ le nde lam’akandavu. (Undaki 2:10, 11, 17-19; 7:12) Etena kavɔ Okristo, ɛngɔ kâmɛ kele la nɛmɔ dia mɛtɛ kele lande ele diɔtɔnganelo diasande la Jehowa ndo la Yeso Kristo.—Mateu 6:19-21; Luka 16:9.
Ɔlɔshamelo kombɔkɔmɔla otema
16. Kakɔna kakasale Yeso la ntondo k’ɔlɔshamelo?
16 Ɔlɔshamelo kombekola yimba yaki Yeso oma lo sambisha akambo wa mɛtɛ. Kânga mbakandeyaka di’olimu ande wa la nkɛtɛ wayoyokomɛ lo nde ndjakema nyɔi k’olambo, dikambo sɔ kombɔkɔmɔla otema. Lo dikambo dia Yeso, Paulo akate ate: “Ne dia ongenongeno wakakitshama la ntundu kandi. Ndi akonyola sonyi kawo, akatudjase lu lunya la pami la kiti ka diulelu ka [Nzambi].” (Heberu 12:2) Tolembete dia Yeso “akonyola sonyi.” Nde kondjakiyanya lo kɛnɛ kakahombe atunyi kanyiya lo dikambo diande. Nde akadje yimba yande tshɛ l’osalelo wa lolango laki Nzambi.
17. Wetshelo akɔna wakondjaso oma lo wokikelo waki Yeso?
17 Lo mɛnya wetshelo wakondjaso oma lo wokikelo waki Yeso, Paulo akakeketsha Akristo ate: “Nyukaneli one lakayashikike l’atei w’amonyodi wa kolo lu dikambu diandi, dia nyu nyutukokomo, nyutukuheko l’etema anyu.” (Heberu 12:3) Eelo, ɔlɔshamelo kana woho watɔ̂la anto lushi la lushi mbeyaka tɔkɔmɔla otema. Sho kokaka mpekɔ dia tetemala shika tanga la ntondo ka tɔsɛngiya ta l’andja ɔnɛ, ɛnyɛlɔ oko watɛkɛta ase nkumbo kaso kɔlɔ lo dikambo diaso etena katotshutshuyawɔ dia sho sala dikambo dimɔtshi diafɔnyawɔ ɔnɛ diayotokonya onto l’oshika. Koko, l’ɛnyɛlɔ ka Yeso sho nongamɛka dia Jehowa tosukɛ etena kayashikikɛso dia mbetsha Diolelo lo dihole dia ntondo lo lɔsɛnɔ laso.—Mateu 6:33; Romo 15:13; 1 Koreto 2:4.
18. Wetshelo akɔna wakokaso kondja oma l’ɛtɛkɛta wakatɛ Yeso Petero?
18 Woho wakatone Yeso di’aha yimba yande mbekɔ l’akambo akina akɛnama etena kakandatatɛ mbutɛ ambeki ande awui wendana la nyɔi kakokongɛka. Petero akakeketsha Yeso dia ‘nde ndjala ɔlɔlɔ’ le nde ndamɛ ndo akoshikikɛ ate, “dikambu diako tadiuyalaki pundju le ye!” Yeso kombetawɔ dia mpokamɛ dikambo tshɛ diakakoke kitshakitsha yɛdikɔ yande ya sala lolango laki Jehowa. Nde akakadimɔ ko mbɛdiya Petero ɔkɔngɔ ndo akate ate: “Satana, utshimbi l’okongo ami! Utamba a ntakanyami mbeye, ne dia we kema lu leke la [Nzambi] paka lu leke l’antu.” (Mateu 16:21-23) Woho akɔ wâmɛ, nyɛsɔ tɔsake mbala tshɛ yɛdikɔ ya tona tokanyi t’anto. Lo dihole dia ndjelaka tokanyi t’anto, nyɛsɔ tɔlɔmbwamake nshi tshɛ la tokanyi taki Nzambi.
Diolelo diayela ɛlɔlɔ wa pondjo
19. Kânga mbakandasale ahindo efula, kakɔna kaki etenyi kakaleke ohomba k’olimu waki Yeso?
19 Yeso akasale ahindo efula dia mɛnya dia nde aki Mɛsiya. Nde akolola ndo anto wakavu. Akambo asɔ wakakotolaka elui w’anto, koko Yeso kondja la nkɛtɛ paka dia ndjosala elimu wa kimanyiya anto. Nde akaye dia ndjosambisha akambo wa mɛtɛ. Nde akeyaka dia ɛlɔlɔ tshɛ wa lo demba wayondosalɛ anto wekɔ wa lo tshanda mɔtshi tsho. Anto wakolola Yeso wakahombe ndjovɔ nto. Paka lo sambisha akambo wa mɛtɛ mbakandahombe kimanyiya anto amɔtshi dia vɔ kondja lɔsɛnɔ la pondjo.—Luka 18:28-30.
20, 21. Wɛdimo akɔna wele l’Akristo wa mɛtɛ lo kɛnɛ kendana l’elimu w’ɔlɔlɔ?
20 Ɛlɔ kɛnɛ anto amɔtshi wekɔ lo mbokoya elimu w’ɔlɔlɔ wakasale Yeso, ɛnyɛlɔ lo mbikisha mpitadi kana lo kimanyiya ase wola wa l’andja w’otondo. Tena dimɔtshi, vɔ shishɛka falanga efula dia sala elimu ɛsɔ, ndo otema awɔ w’ɔlɔlɔ mandɔmaka; koko ekimanyielo tshɛ kashawɔ anto kekɔ ka lo tshanda mɔtshi tsho. Paka Diolelo mbayoyotshungola anto lo pondjo. Ɔnkɔnɛ, Ɛmɛnyi wa Jehowa salaka tshɛ, oko wakasale Yeso dia sambisha akambo wa mɛtɛ wendana la Diolelo sɔ.
21 Akristo wa mɛtɛ wekɔ lo sala elimu w’ɔlɔlɔ. Paulo akafunde ate: “Lam’ekisu la etena k’ololo, tutshelaki antu tshe ololo, ndjekaleka le embetawudi.” (Ngalatiya 6:10) Lo tena dia pâ kana etena kele onto ɔmɔtshi lo dihombo, hatengenga dia ‘sala kɛnɛ kele ɔlɔlɔ’ otsha le asukanyi aso kana otsha le anangɛso l’akadiyɛso w’Akristo. Koko sho mbidjaka yimba yaso tshɛ lɛnɛ ahombayɔ monga, mbut’ate lo esambishelo k’akambo wa mɛtɛ.
Tokondja wetshelo oma l’ɛnyɛlɔ kaki yeso
22. Lande na kasambisha Akristo anyawɔ anto?
22 Paulo akafunde ate: “Fono keko le mi, naka dimi halasambisha lukumu l’ololo!” (1 Koreto 9:16) Nde komonga la wendjudi lo dikambo dia lokumu l’ɔlɔlɔ nɛ dia lisambisha aki kitshimudi ya lɔsɛnɔ le nde ndamɛ ndo le wanɛ wakohokamɛka. (1 Timote 4:16) Sho mbɔsaka olimu aso woho akɔ wâmɛ. Sho nangaka kimanyiya anyaso anto. Sho nangaka mɛnya ngandji kaso otsha le Jehowa. Sho nangaka mɛnya ngandji kaso otsha le Yeso ndo lowando laso lo ngandji kande ka mamba le so. Ɔnkɔnɛ, sho sambishaka lokumu l’ɔlɔlɔ ndo sɛnaka ‘aha lo ndjela nsaki y’anto, koko dia lolango laki Nzambi.’—1 Petero 4:1, 2.
23, 24. a) Wetshelo akɔna wakondjaso oma lo dihindo dia wondelo wa nse? b) Ɛlɔ kɛnɛ, waa na wasambisha dimɛna dimɛna?
23 Oko Yeso, timba taso hatomɔ oma l’olimu aso woleki tshɛ ohomba etena katɔ̂la anto amɔtshi kana katonawɔ la kɛlɛ tshɛ losango laso. Sho kondjaka wetshelo oma lo dihindo diakasale Yeso etena kakandete Petero nde la Andɛlɛ dia mboyela. Sho mbeyaka dia naka sho kitanyiya Yeso, ndo mboka ɛtɛi aso wa didjidji kânga l’ashi wɛnama di’oko hatotonda kânga ɛngɔ, kete tayokoka kondja etombelo w’amɛna. Akristo efula wakakondja etombelo w’amɛna l’ɔkɔngɔ wa kamba ɛnɔnyi efula lo bɛtshi dia nkɛtɛ diɛnama oko ndoko onto lakoka mbetawɔ. Akina waki l’akoka wa monɔ lo bɛtshi dia nkɛtɛ dioleki anto mbetawɔ losango laso ko wakakondja etombelo w’amɛna. Oyadi kakɔna tshɛ kasalaso, hatototshika dia sambisha akambo wa mɛtɛ. Sho mbeyaka dia Yeso atate di’ɔnɛ olimu w’esambishelo wamboshila l’ɛtshi kɛmɔtshi ka nkɛtɛ.—Mateu 24:14.
24 Ɛmɛnyi wa Jehowa ndekana miliyɔ shamalo wekɔ lo kamba kakianɛ lo wedja ndekana 230. Tshoto y’Etangelo ya Ngɔndɔ ka hende 1, 2005, yayonga l’alapɔlɔ w’olimu wakawakambe l’andja w’otondo l’ɔnɔnyi w’olimu 2004. Alapɔlɔ ɔsɔ wayɛnya woho watshɔkɔla Jehowa olimu w’esambishelo. L’etena kambotshikalɛ dikongɛ nɛ di’akambo, nyɛsɔ totetemale kitanyiyaka ɛtɛkɛta waki Paulo w’ekeketshelo wata ɔnɛ: “Usambishaki diui; utetemalaki mbatela.” (2 Timote 4:2) Nyɛsɔ totetemale la sambisha dimɛna dimɛna polo lam’ayota Jehowa ate tanyosambishake nto.
Tatɛ ɔnɔnyi ɔnɛ, Alapɔlɔ w’ɔnɔnyi w’olimu w’Ɛmɛnyi wa Jehowa wa l’andja w’otondo hawototombaka nto lo Tshoto y’Etangelo ya Ngɔndɔ ka ntondo 1. Vɔ wayotombaka lo Tshoto y’Etangelo ya Ngɔndɔ ka hende 1.
Onde wɛ kokaka kadimola?
• Ngande wakokaso kondja wahɔ oma lo ohokwelo wakasha Yeso ambeki ande?
• Dionga diakɔna diaki la Yeso otsha le anto wakandasambishaka?
• Kakɔna katotshutshuya dia sambisha dimɛna dimɛna?
• Lo toho takɔna takokaso mbidja yimba yaso tshɛ l’osalelo wa lolango laki Nzambi woho wakasale Yeso?
[Osato wa lo lɛkɛ 25]
Yeso akaye la nkɛtɛ ntondotondo dia ndjosambisha akambo wa mɛtɛ
[Esato wa lo lɛkɛ 26]
Ɛmɛnyi wa Jehowa ndjashaka tshɛ dia sambisha dimɛna dimɛna