Ambola w’oma le ambadi

Onde l’etei ka ɔshɛtɛ wa sheke aki paka pase pende dia ave, kana ndo diangɔ dikina?

Lo etena ka osapwelo wa tɛmpɛlɔ ka Sɔlɔmɔna lo 1026 la ntondo ka tena diaso, “nduku engo kaki l’oshete, tshikima pasi pendi di’ave diakatadji Mose lu Horeba lam’akadji [Jehowa] l’asi Isariyele sheki lu etumbelu kawo uma lu Edjibitu.” (2 Ekondo 5:10) Koko, akambo wakayotshikitana.

“Ngondo ka satu, l’okongo w’etumbelu kawo uma l’Edjibitu,” ase Isariyɛlɛ wakakakome lo oswe wa Sinai. (Etumbelu 19:1, 2) Oma lâsɔ, Mɔsɛ akadɛ l’okongo wa Sinai ndo akatolongola pase pende dia ave diakafundama Ɛlɛmbɛ. Nde akate ate: “Dimi lakakalula, lakahulo uma l’ukungu; lakadji pasi diako di’ave lu oshete wa sheki wakamatshi. Dio dieko loko uku akambidjangela [Jehowa].” (Euhwelu k’Elembe 10:5) Ɔsɔ aki ɔshɛtɛ wa lo tshanda mɔtshi tsho wakatɛ Jehowa Mɔsɛ dia nde sala dia mbidja pase di’ave diakafundama Ɛlɛmbɛ. (Euhwelu k’Elembe 10:1) Vɔ kokamba la ɔshɛtɛ wa sheke polo oya l’ekomelo k’ɔnɔnyi 1513 la ntondo ka tena diaso.

Yema tshitshɛ l’ɔkɔngɔ wa vɔ tshungɔ oma l’Edjibito, ase Isariyɛlɛ wakatatɛ ngunanguna dikambo dia diangɔ dia ndɛ. Ɔnkɔnɛ, Jehowa akawasha mana. (Etumbelu 12:17, 18; 16:1-5) L’etena kɛsɔ, Mɔsɛ akatɛ Arɔna ate: “Ose utika omotshi, udji mana yediko ya omera otoi loko, dia yo namema la ntundu ka [Jehowa] lu nonga tshe.” Ɔkɔndɔ mbutaka ɔnɛ: “Arona akayikitsha la ntundu k’oshete wa sheki, dia yo namema, [lo eombelo ka ekanda w’ohomba] uku akadjangela [Jehowa] Mose.” (Etumbelu 16:33, 34) Kânga mbele aha la tâmu, Arɔna akadje mana lo oteka l’etena kɛsɔ, nde akahombe ndjoyikitsha la ntondo ka Ɔshɛtɛ paka Mɔsɛ ambosala Ɔshɛtɛ akɔ ndo ambodja pase di’ave lɔkɔ.

Oko wakatadiɛnyi, ɔshɛtɛ wa sheke wakayosalemaka lo ekomelo ka 1513 la ntondo ka tena diaso. Danga dia Arɔna diakayodjamaka lo Ɔshɛtɛ edja efula l’ɔkɔngɔ wa ɔtɔmbɔkwɛlɔ wa Kɔra nde l’anto akina. Ɔpɔstɔlɔ Paulo akatɛkɛta dia “oshete wa sheki . . . , [wele] puki ka paunyi kaki la mana loko, ndu danga dia Arona diakamene songusongu, ndu pasi di’ave dia sheki.”​—Heberu 9:4.

Mana aki diangɔ dia ndɛ diakasha Nzambi ase Isariyɛlɛ lo ɛnɔnyi 40 wakawasale l’oswe. Vɔ kondjikondjaka nto etena ‘kakawatatɛ ndɛ diangɔ dimɔtshi dia lo nkɛtɛ’ ya daka. (Jashua 5:11, 12) Danga dia Arɔna diakakitshama lo ɔshɛtɛ wa sheke l’oyango ɔmɔtshi, mbuta ate, oko djembetelo, kana ɔmɛnyi le lɔlɔnga l’atɔmbɔki. Kɛsɔ mɛnyaka dia danga sɔ diakatshikala lɔkɔ l’edja tshɛ ka lɔkɛndɔ lawɔ l’oswe. Lâsɔ koka mbutama mɛtɛ dia yema tshitshɛ l’ɔkɔngɔ w’ase Isariyɛlɛ mbɔtɔ lo Nkɛtɛ ya daka, ndo la ntondo k’osapwelo wa tɛmpɛlɔ ka Sɔlɔmɔna, danga dia Arɔna ndo dɔnga dia paonyi dia mana akanyɛma oma lo ɔshɛtɛ wa sheke.