Ambola w’oma le ambadi
Lam’ele Jehowa hetawɔ ɔtɛmwɛlɔ wa dikishi, lande na kakinde kombisha Arɔna dilanya l’ɔtɛ wakandasale yana ya ngɔmbɛ ya paonyi?
Etena kakasale Arɔna yana ya ngɔmbɛ ya paonyi, oko wɔkɔndwamidiɔ lo Etumbelu tshapita 32, nde akɔnyɔla ɔlɛmbɛ waki Nzambi wendana la ɔtɛmwɛlɔ wa dikishi. (Etum. 20:3-5) Diakɔ diele, “[Jehowa] akuki Arona kele efula, akalangi mbudiaka, ku [Mɔsɛ a]kôlombela [le Nzambi] ndu l’etena keku.” (Euh. 9:19, 20) Onde ɛsɛngɔsɛngɔ waki Mɔsɛ, pami k’ɔlɔlɔ waki la ‘wolo efula’ lo dikambo diaki Arɔna? (Jak. 5:16) Eelo, mɛnamaka dia l’ɔtɛ w’ɛsɛngɔsɛngɔ ɛsɔ ndo l’ɔtɛ w’ɛkɔkɔ ekina ehende, Jehowa akakadimola dɔmbɛlɔ diaki Mɔsɛ ndo nde kombisha Arɔna dilanya.
Ondo ɔkɔkɔ ɔmɔtshi wakinde kombosha dilanya wakendanaka la kɔlamelo y’efula yaki la Arɔna. Etena kakalongola Mɔsɛ ɔkɛndɛ wa ntshɔ la ntondo ka Farawɔ ndo totondja ase Isariyɛlɛ oma l’Edjibito, Jehowa akasɔnɛ Arɔna dia nde ntshindɛ Mɔsɛ ndo tɔtɛkɛta oko onyimpala ande. (Etum. 4:10-16) L’okitanyiya tshɛ, apami ahende asɔ wakɛnama la ntondo ka nkumekanga k’Edjibito mbala efula ndo wakadiɛnɛ l’ɔtɛ w’otema wolo waki la Farawɔ. Ɔnkɔnɛ, etena kakiwɔ weke l’Edjibito, Arɔna akeyamaka l’ɔtɛ wa kɔlamelo y’efula yaki la nde ndo l’olimu wakandakambɛka Jehowa la etete.—Etum. 4:21.
Tɔsɛdingole nto kɛnɛ kakakonya Arɔna dia ndjosala yana ya ngɔmbɛ ya paonyi. Mɔsɛ akasale nshi 40 l’Okongo wa Sinai. “Lam’akenyi antu vati: Mose ambutubiya, hahulo uma ladiku di’ukungu,” vɔ waketawoya Arɔna dia mbasalɛ ekishi, ko Arɔna akasalɛ yana ya ngɔmbɛ ya paonyi. (Etum. 32:1-6) Koko kɛnɛ kakayosalaka Arɔna l’ɔkɔngɔ mɛnyaka dia Arɔna mɛtɛ kombetawɔka ɔtɛmwɛlɔ wa dikishi. Mɛnamaka dia nde akayetawɔka nsala kɛnɛ kakɔsɛngiya anto. Ɛnyɛlɔ, etena kakayokandolaka Mɔsɛ dikambo diendana la ɔtɛmwɛlɔ wa dikishi lo yoho ya diambo, ana w’apami tshɛ w’ase Lɛwi, mbidja ndo Arɔna wakete lo wedi wa Jehowa. Nunu sato di’atɛmɔdi wa dikishi wanɛ wakamɛ ntshutshuya anto l’ɔtɛmwɛlɔ wa dikishi wakadiakema.—Etum. 32:25-29.
Oma lâsɔ, Mɔsɛ akayotɛ wodja ate: “Nyu nyakatshi kolo ka wuki.” (Etum. 32:30) Ɔnkɔnɛ, aha Arɔna oto mbaki la onongo wa kɔlɔ kakasalema. Koko, Arɔna nde la wodja wakakondja wahɔ oma lo kɛtshi k’efula kaki Jehowa.
L’ɔkɔngɔ wa dikambo diendana la yana ya ngɔmbɛ ya paonyi, Jehowa akadjanga dia Arɔna monga ɔlɔmbɛdi wa lâdiko. Nzambi akatɛ Mɔsɛ ate: “Kolotsha Arona eloto w’ekila, kûkiti iso, ndu kûkidia, dia ndi ntsha ulimu ami w’olombedi.” (Etum. 40:12, 13) Mɛnamaka dia Jehowa akadimanyiya Arɔna lo wɔdu waki la nde. Lo mɛtɛ, Arɔna akasukɛka ɔtɛmwɛlɔ wa mɛtɛ la kɔlamelo tshɛ, koko nde komonga ɔtɔmbɔki wakasukɛka ɔtɛmwɛlɔ wa dikishi.