Ambola w’oma le ambadi

Ngande weyaso ɔnɛ lomba lɔtɛkɛtshiwɔ lo Tukedi 8:22-31 mendanaka la Yeso Kristo la ntondo ka nde ndjotɔ oko onto?

Lo kɛnɛ kendana la lomba lɔtɛkɛtshiwɔ lo Tukedi sho mbadiaka ɔnɛ: “[Jehowa] akantungi l’etatelu k’ulimu andi, untu la ntundu ka etsha andi w’edjedja. . . . La ntundu k’ekungu watakeketala, ndu la ntundu k’akuna watayala, mbakamuto. . . Lam’akandashikike ulungu, dimi laki lawo. . . . Dimi, ukambi a komba, laki lasuki la ndi. Dimi lakôngenyangenyaka nshi tshe, ndu lakangenangenaka la ntundu kandi tena tshe, . . . ndu lakayala la ongenongeno ami kame l’antu.”

Divɛsa nɛ hakoke tɛkɛta dia lomba la Nzambi kana dia lomba longa la onto lele lɔ hɛnama. Lande na kataso ngasɔ? Nɛ dia lomba latɛkɛtama lanɛ mɛnyama oko lomba ‘lakasalema’ kana lakatongama oko etatelo ka etsha wa Jehowa. Oma ko mɔmbɔkɔmbɔla, Jehowa Nzambi aki, ndo atongaka la lomba tena tshɛ. (Osambu 90:1, 2) Lam’ele lomba laki Jehowa kema la etatelo, lɔ kokoka tongama. Lɔ kokoka ‘tongama lo pâ.’ Ndo nto, lo divɛsa nɛ lomba mɛnyama atɛkɛta kana asala akambo oko onto.​—Tukedi 8:1.

Dibuku dia Tukedi mbutaka dia oma ko mɔmbɔkɔmbɔla lomba laki kâmɛ la Jehowa, Otungi oko “ukambi a komba.” Dui sɔ mbɔtɔnɛka mɛtɛ la Yeso. Edja efula la ntondo ka nde ndja la nkɛtɛ, Yeso akakambe kâmɛ la Jehowa, diakɔ diele Ɔtɛkɛta wa Nzambi mbutaka ɔnɛ: “Ndi keli ladiku dia diango tshe, diango tshe diambukutshama le ndi.”​—Kolosai 1:17; Enyelo 3:14.

Ɔna onto koka mbɔsama mɛtɛ oko lomba latɛkɛta dibuku dia Tukedi, lam’ele nde ekɔ Ɔnɛ lakatosholɛ sangwelo ndo wadjango wa lomba waki Jehowa. La ntondo ka nde ndjotɔ oko onto, Yeso aki Ɔtɛkɛta wa Nzambi mbuta ate Yɛmba awui yande. (Joani 1:1) Bible kɔndɔlaka lo dikambo diande ɔnɛ nde ekɔ ‘wolo ndo lomba la Nzambi.’ (1 Koreto 1:24, 30) Ɔsɔ ekɔ mɛtɛ ɛtɛkɛta w’amɛna efula wendana la Ɔna Nzambi lakangɛnangɛnaka dikambo di’ana w’anto ndo lakatshutshuyama dia kimɔ lɔsɛnɔ lande oko tshungo lo wahɔ awɔ!​—Joani 3:16.