Bonde kahombaso mbeya otunyi wa Kristo?

Ɔpɔstɔlɔ ɔmɔtshi wakasambiyama la nyuma ka Nzambi akafunde aya edja efula ate: “Uku akanyuki ati: Utunyi a Kristu ukuya.” (1 Joani 2:18) Ɔsɔ ekɔ mɛtɛ ɛtɛkɛta wakotola yambalo! Aya ɛnɔnyi nkama wayambola anto kitshimudi y’ɛtɛkɛta ɛsɔ. Ele otunyi wa Kristo? Etena kakɔna kayondoya? Kakɔna kayondosala lam’ayondoya?

AYA ɛnɔnyi efula welamɛ anto efula ɔnɛ atunyi wa Kristo. Lo nshi y’edjedja ase Juda, waa papa l’Ɔrɔma y’aseka Mupɛ ndo nkumi ya dikanga y’ase Rɔma waki l’atei w’anto wakɔsamaka oko “atunyi a Kristu.” Ɛnyɛlɔ, etena kakatone nkumekanga Frédéric II (1194-1250) dia sangana l’anto akina dia ndɔ ta lo wahɔ w’ɛkɛlɛsiya, Papa l’Ɔrɔma kakawelɛka Grégoire IX akate ate nde ekɔ otunyi wa Kristo ndo akawotshanya oma l’ɛkɛlɛsiya. Innocent IV, lakayɔhɛnaka Grégoire akayowotshanya nto oma l’ɛkɛlɛsiya. Frédéric nde lawɔ akayotaka dia Innocent ekɔ otunyi wa Kristo.

Ɔpɔstɔlɔ Joani oto mbele ofundji wa Bible wakakambe la tshɛkɛta “utunyi a Kristu.” Lo mikanda ehende wele la lokombo lande, tshɛkɛta shɔ tanemaka mbala tshanu, l’ɔtɔi kana l’efula. Avɛsa watanema tshɛkɛta shɔ wekɔ lo kiombo yele lo lɛkɛ layela. Oma lo avɛsa asɔ, sho koka mɛna dia otunyi wa Kristo ekɔ kanga kashi ndo okesanyi, lele l’oyango wa nanya diɔtɔnganelo diasa onto la Kristo ndo la Nzambi. Ɔnkɔnɛ, ɔpɔstɔlɔ akalake asekande Akristo ate: “Elangimi ami, tanyetawoki nyuma tshe, keli nyuhimbi nyuma, kana yo yeko ya [Nzambi]; ne dia amvutshi efula wa kashi wambukukanela l’andja.”​—1 Joani 4:1.

Yeso lawɔ akahɛmɔla ambeki ande lo kɛnɛ kendana l’akesanyi kana aprɔfɛta wa kashi lo mbuta ate: “[Vɔ] watuyakaka le nyu, wolotshi dikuhu dia ekoko, keli l’etema awo weli ndjaundu ya ngala. Nyayâlimbitela uma lu elua [kana etsha] awo.” (Mateu 7:15, 16) Onde Yeso akahɛmɔlaka ambeki ande ndo lo dikambo dia atunyi wa Kristo wa didjidji? Tende woho wakokaso mbeya okesanyi wa kɔlɔ efula asɔ.