Tatohekɔke pondjo dia fudia lowando laso
“We [Nzambi], ndi tukanyi taye le mi dimena li! Ndi efula keli wuki ato li!”—OSAMBU 139:17.
1, 2. Lande na kahombaso ngɛnangɛna Ɔtɛkɛta wa Nzambi ndo ngande wakɛnya omembi w’esambo lowando lande?
ƐNGƆ kɛmɔtshi k’ohomba efula kakashɔma. Etena kakalɔngɔswamaka tɛmpɛlɔ ka Jehowa la Jerusalɛma, Hilikiya, Ɔlɔmbɛdi a Lâdiko akashola “buku di’elembe wa [Jehowa] waki uma le Mose.” Aha la tâmu efundelo awɔ wa ntondo wakashile fundama yɛdikɔ y’ɛnɔnyi suke la 800 la ntondo ka woshwelo ɔsɔ! Ohokanyiya ɔngɛnɔngɛnɔ waki la nkumekanga Josiya lakokaka Nzambi wɔma etena kakawakitsha buku di’ɛlɛmbɛ sɔ la ntondo kande! Lo mɛtɛ, nde akadingɛnangɛna heyama ndo mbala kakɔ ɔtɔi nde akalɔmbɛ Shafana, sekeletɛlɛ kande dia mbadiɛdɔ.—2 Ekondo 34:14-18.
2 Ɛlɔ kɛnɛ, Ɔtɛkɛta wa Nzambi koka mbadiema oma le miliyara y’anto lo tshondo kana lo tenyi diawɔ dimɔtshi. Ko onde dui sɔ kitshakitshaka nɛmɔ ndo ohomba w’Afundelo? Kema, nɛ dia vɔ wekɔ la tokanyi ta Kanga-Wolo-Tshɛ takafundama dikambo dia wahɔ aso. (2 Timote 3:16) Lo kɛnɛmɔla yoho yakandɔsaka Ɔtɛkɛta wa Nzambi, omembi w’esambo Davidi, akafunde ate: “We [Nzambi], ndi tukanyi taye le mi dimena li! Ndi efula keli wuki ato li!”—Osambu 139:17.
3. Kakɔna kɛnya dia Davidi aki la lonyuma la dimɛna efula?
3 Lowando laki la Davidi le Jehowa, l’Ɔtɛkɛta ande ndo l’ɔlɔngɔswɛlɔ ande wendana l’ɔtɛmwɛlɔ wa mɛtɛ kokitakita kânga yema. Esambu efula w’amɛna wakafunde Davidi kɛnɛmɔlaka nsaki yande. Ɛnyɛlɔ, l’Osambu 27:4, nde akafunde ate: “Engo otoi kakamalombe [Jehowa] to kayumuyangaka, dia dimi mbidjase lu luudu la [Jehowa] lu nshi tshe ya lumu lami; dia menda dimena dia [Jehowa], ndu dia mamba dia etemwelo kandi.” Lo Hɛbɛru ka ntondo, tshɛkɛta “mamba” nembetshiyaka tetemala menda, sɛdingola, menda l’ɔngɛnɔngɛnɔ, l’ɔlɔ ndo la diando. Mbokɛmaka hwe dia Davidi aki la lonyuma la dimɛna ndo akandolaka mɛtɛ tɛdikɔ ta lo nyuma taki Jehowa ndo akangɛnangɛnaka efula dikambo dia mɛtɛ tshɛ diambosholaka Nzambi. Ekɔ mɛtɛ ɔlɔlɔ sho mbokoya dionga diande dia lowando.—Osambu 19:7-11.
Tonge la lowando lo diɛsɛ diaso dia mbeya akambo wa mɛtɛ wa lo Bible
4. Kakɔna kakakonya Yeso dia ‘ngɛnangɛna efula le nyuma k’ekila’?
4 Monga la eokelo k’Ɔtɛkɛta wa Nzambi halemanɛ la diewo dia mukanda kana la wetshelo wa l’andja ɔnɛ watshutshuya anto dia monga la lotamanya. Koko, dui sɔ nemanɛka la ngandji ka lɔsɛngɔ ka Jehowa kokande akanga w’okitshakitsha ndo anto wele l’etema w’ɛlɔlɔ weya ehomba awɔ wa lo nyuma. (Mateu 5:3; 1 Joani 5:20) Etena kakakane Yeso yimba lo dikambo di’ɔnɛ nkombo y’anto amɔtshi wele kema kokele yambofundama l’olongo, nde “akangenangena le [nyuma k’ekila]. Ndi akati ati: Papa, uwandji w’ulungu la kete lambukandula, ne dia we akashe akambu ane le akanga a tumba la ewu, ku ambuwashula le tokendakenda.”—Luka 10:17-21.
5. Lande na kele ambeki wa Yeso takawahombe mɔnyɔla akambo wa mɛtɛ wa Diolelo wakawawasholɛ?
5 L’ɔkɔngɔ wa nde sala dɔmbɛlɔ dia l’otema ɔtɔi sɔ, Yeso akakadimɔ otsha le ambeki ande ndo akawatɛ ate: “Ashu wena akambu wenanyu, weko la otshoko, ne dia amvutshi efula la khumi ya dikanga wakalangi mena akambu wenanyu, ku vo kumbaena; wakalangi mbuka akambu wukanyu, ku kumbauka.” Eelo, Yeso akakeketsha ambeki ande wa kɔlamelo diaha mɔnyɔla akambo wa mɛtɛ wa nɛmɔ efula wakawawasholɛ. Akambo wa mɛtɛ asɔ, vɔ kombasholɛ nɔnga ya ntondo y’ekambi wa Nzambi kana ‘akanga a tomba ndo ambewi wa mukanda’ wa lo nshi ya Yeso!—Luka 10:23, 24.
6, 7. a) Ɛkɔkɔ akɔna wele laso watotshutshuya dia ngɛnangɛnaka akambo wa mɛtɛ waki Nzambi? b) Otshikitanu akɔna wele ɛlɔ kɛnɛ lam’asa ɔtɛmwɛlɔ wa mɛtɛ la wa kashi?
6 Lo nshi yaso nyɛ, tekɔ la ɛkɔkɔ efula wa ngɛnangɛna akambo wa mɛtɛ waki Nzambi, nɛ dia oma lo tshimbo ‘y’ɔhɔmbɔ wa kɔlamelo ndo wa kɛsɔ,’ Jehowa ambosha ekambi ande eokelo k’efula k’Ɔtɛkɛta ande. (Mateu 24:45; Danyele 12:10) Lo kɛnɛ kendana la etena k’ekomelo, ɔprɔfɛta Danyɛlɛ akafunde ate: “Efula wayulawolawo lene la lene, ewu kayuyala efula.” (Danyele 12:4) Onde wɛ hetawɔ dia ɛlɔ kɛnɛ ewo ka Nzambi ‘kaya efula’ ndo ɔnɛ ekambi wa Jehowa wekɔ lo ndeshama dimɛna lo nyuma?
7 Tekɔ lo mɛna mɛtɛ otshikitanu wele lam’asa ɔngɔnyi wa lo nyuma wele l’ekambi wa Nzambi la lofunge lele lo Babilɔna ka Woke! Etombelo wele la dui sɔ ele, efula ka wanɛ wamboshama sɔnyi oma le ɛtɛmwɛlɔ wa kashi wekɔ lo kadimɔ oya l’ɔtɛmwɛlɔ wa mɛtɛ. Vɔ wekɔ anto wele oko ɛkɔkɔ ‘wahalange ndjɔtɔ lo pɛkato ya Babilɔna ka Woke’ kana ‘ndjolongola asui atɔ.’ Jehowa la ekambi ande mbelɛka anto asɔ tshɛ oya lo etshumanelo k’Akristo wa mɛtɛ.—Enyelo 18:2-4; 22:17.
Anto wele la lowando ndjaka oya le Nzambi
8, 9. Ngande wakotshama ɛtɛkɛta wa lo Hangai 2:7 ɛlɔ kɛnɛ?
8 Lo kɛnɛ kendana la luudu lande la lo nyuma l’ɔtɛmwɛlɔ, Jehowa akate ate: “Dimi layusutshasutsha wedja tshe dia diango di’ushinga a wulu dia wedja tshe ndja. Ku dimi layuludia luudu lone la lutumbu.” (Hangai 2:7) Prɔfɛsiya ka diambo kɛsɔ kakakotshama lo nshi ya Hangai etena kakanyomohika atshikadi w’ekambi wa Nzambi wakakalola oma lo fumbe tɛmpɛlɔ ka la Jerusalɛma. Ɛlɔ kɛnɛ, ɛtɛkɛta waki Hangai wekɔ lo kotshama nto lo kɛnɛ kendana la tɛmpɛlɔ ka woke ka Jehowa ka lo nyuma.
9 Miliyɔ y’anto yamboshila mbɔtɔ lo tɛmpɛlɔ ka didjidji kɛsɔ dia tɛmɔla Nzambi “lu nyuma la lu mete,” ndo ɔnɔnyi tshɛ nkama ya nunu ya “diango di’ushinga a wulu dia wedja tshe,” wekɔ lo tetemala la pongumɔ lɔkɔ. (Joani 4:23, 24) Ɛnyɛlɔ, alapɔlɔ wa l’andja w’otondo w’ɔnɔnyi w’olimu wa 2006 mɛnyaka dia anto 248 327 wakabatizama dia mɛnya ndjâkimɔ kawɔ le Jehowa. Ekɔ oko lushi tshɛ yɛdikɔ ya l’atei atei y’anto 680 batizamaka! Woho walangawɔ akambo wa mɛtɛ ndo wakombolawɔ kambɛ Jehowa oko apandjudi wa Diolelo mɛnyaka dia vɔ wakakotwama mɛtɛ oma le Nzambi.—Joani 6:44, 65.
10, 11. Kɔndɔla ɔkɔndɔ ɔmɔtshi wɛnya woho wakayokomaka anto lo ngɛnangɛna akambo wa mɛtɛ wa lo Bible.
10 Efula k’anto asɔ wele la etema w’ɛlɔlɔ wakakotwama lo akambo wa mɛtɛ nɛ dia wakɛnyi ‘otshikitanu wele lam’asa onto ɔlɔlɔ la onto a kɔlɔ, ɔnɛ lakambɛ Nzambi la ɔnɛ lahokambɛ.’ (Malaki 3:18) Tende kɛnɛ kakakomɛ Wayne nde la Virginia, atshukanyi wakatɛmɔlaka l’Asɔnyi koko waki la ambola efula wakiwɔ komonga l’ekadimwelo. Vɔ konangaka ata ndo wakatshimbaka yimba etena kakawɛnaka ewandji awɔ w’ɔtɛmwɛlɔ watshɔkɔla asɔlayi la ekoma. Etena kakakome atshukanyi asɔ esombe, vɔ wakɛnyi dia ase ɔtɛmwɛlɔ awɔ kombadjaka yimba nto, kânga mbele lo ɛnɔnyi efula wakete, Virginia mbaki l’ɔkɛndɛ wa mbetshaka lo Kalasa ka Lushi la lomingu ketshawɔ awui w’ɔtɛmwɛlɔ. Vɔ mbutaka ɔnɛ: “Ndoko onto lakayaka dia ndjotenda kana ndjakiyanya dia lonyuma laso. Kɛnɛ tshɛ kakakombolaka ɔtɛmwɛlɔ aso aki falanga yaso. Takayaoke oko ekalema.” Vɔ wakayolekaka monga la lonyangu etena kakayetawɔka ɔtɛmwɛlɔ awɔ dia pami la pami kana womoto la womoto kokaka tshukana.
11 L’edjedja ka wonya, okana waki Wayne nde la Virginia ndo l’ɔkɔngɔ dikɔ ɔnawɔ la womoto wakakome Ɛmɛnyi wa Jehowa. Kânga mbele l’etatelo Wayne la Virginia kɔngɛnangɛna dikambo sɔ, l’ɔkɔngɔ diko vɔ wakayotshikitanyaka kanyi yawɔ ndo wakayetawɔka mbeka Bible. Wayne mbutaka ate: “L’ɔkɔngɔ wa ngɔndɔ shato tsho, takeke awui efula wendana la Bible ndeka ndo awui wakateke lo ɛnɔnyi ndekana 70 wa ntondo! Takayeyaka dia lokombo la Nzambi ekɔ Jehowa ndo ndoko kakateyaka lo dikambo dia Diolelo ndo dia Paradiso ka la nkɛtɛ.” Kombeta edja, atshukanyi asɔ wakatatɛ mbɔtɔ lo nsanganya y’Akristo ndo sambisha. Virginia mbutaka ate: “Sho nangaka mbewoya onto tshɛ akambo wa mɛtɛ.” Vɔ wakabatizama lo 2005, lâsɔ ko vɔ ahende waya la ɛnɔnyi 80 la ndjahe. Vɔ wakate ɔnɛ: “Tamboyotana tshunda dia mɛtɛ di’Akristo.”
Tonge la lowando lo woho weso l’akoka wa ntsha ‘elimu tshɛ w’ɔlɔlɔ’
12. Jehowa kakɔna kokondoshaka ekambi ande ndo ahombaso sala dia kondja wahɔ oma lɔkɔ?
12 Jehowa kimanyiyaka ekambi ande nshi tshɛ dia sala lolango lande. Ɛnyɛlɔ, Nɔa akalongola adjango wokɛma hwe ndo wa shikaa wakendanaka la woho wa mbika wato a luudu, wato wakahombe mbikama paka lo ndjela kɛnɛ kakawɛnya Nzambi! Ndo kɛsɔ mbakasalema. Lande na? Nɛ dia Nɔa “akatshi osoku. Dikambu tshe diakawutela [Nzambi] mbakandatshi.” (Etatelu 6:14-22) Ndo ɛlɔ kɛnɛ, Jehowa mbishaka ekambi ande kɛnɛ kahombama dia vɔ sala lolango lande. Lo mɛtɛ, olimu aso wa ntondo ele wa sambisha lokumu l’ɔlɔlɔ la Diolelo diaki Nzambi diakashikikɛma ndo kimanyiya anto wakoka dia koma ambeki wa Yeso Kristo. Ndo oko wakidiɔ lo dikambo dia Nɔa, dia sho sala olimu aso dimɛna, paka sho monga l’okitanyiya. L’okitanyiya tshɛ, sho pombaka ndjela ɛlɔmbwɛlɔ kasha Jehowa oma lo tshimbo y’Ɔtɛkɛta ande ndo y’okongamelo ande.—Mateu 24:14; 28:19, 20.
13. Oma lo tshimbo yakɔna yatetsha Jehowa?
13 Dia kotsha olimu ɔsɔ, sho pombaka mbeka dia ‘manyamanya’ ehomɔ kaso ka woke, mbuta ate Ɔtɛkɛta wa Nzambi, wele “ololo mbetsha antu, la mbalaka, la mbaewula, la mbaekiya lu akambu w’ololo. Dia untu a [Nzambi] aluwani, ndu akuki dia ntsha elimu w’ololo tshe.” (2 Timote 2:15; 3:16, 17) Oko wakidiɔ lo ntambe ka ntondo, Jehowa toshaka wetshelo w’ohomba oma lo tshimbo y’etshumanelo k’Akristo. Ɛlɔ kɛnɛ, lo tshumanelo 99 770 dia l’andja w’otondo, Kalasa k’olimu wa teokrasi ndo Losanganya l’olimu salemaka lomingu tshɛ dia tokimanyiya l’olimu aso. Onde wɛ mɛnyaka lowando layɛ lo nsanganya y’ohomba shɔ lo mbɔtɔka lɔkɔ mbala la mbala ndo lo kambaka l’awui wekayɛ lɔkɔ?—Heberu 10:24, 25.
14. Ngande wɛnya ekambi wa Jehowa lowando lawɔ lo diɛsɛ diele lawɔ dia kambɛ Nzambi? (Dja ndo kɔmatɛrɛ ya lo alapɔlɔ wele lo lɛkɛ xx polo xx.)
14 Lo ndjâkimɔ tshɛ l’olimu w’esambishelo, miliyɔ y’ekambi wa Nzambi wa l’andja w’otondo mɛnyaka lowando lawɔ lo wetshelo walongolawɔ. Ɛnyɛlɔ, l’ɔnɔnyi w’olimu wa 2006, apandjudi wa Diolelo 6 741 444 waketsha wenya 1 333 966 199 lo toho totshikitanyi t’olimu ɔsɔ ndo wakeke l’anto 6 286 618 Bible lawakawɔ. Ɔsɔ ekɔ tsho awui amɔtshi angana l’atei w’awui wele lo alapɔlɔ w’andja w’otondo. Tambokɔlɔmba dia wɛ mboka sso dimɛna lo alapɔlɔ ɔsɔ ndo kondja ekeketshelo oma lɔkɔ, oko wakakeketshama anangɛso wa lo ntambe ka ntondo lo yɛdikɔ y’efula etena kakawoke alapɔlɔ w’ohamelo w’olimu w’esambishelo wakakambema lo nshi yawɔ.—Etsha 1:15; 2:5-11, 41, 47; 4:4; 6:7.
15. Lande na kahahombe ndoko onto kɔmɔ otema lo kɛnɛ kendana la olimu wakambɛnde Jehowa l’anima ande tshɛ?
15 Ekoko wa lotombo wadɛ otsha le Nzambi ɔnɔnyi tshɛ mɛnyaka lowando l’efula lele l’ekambi wa Jehowa lo diɛsɛ diele lawɔ dia mbeya Jehowa ndo sambisha awui wendana la nde. (Isaya 43:10) Lo mɛtɛ, elambo wa lotombo walambola anangɛso la akadiyɛso waya esombe, wele la hemɔ kana la dikɔmɔ kokaka mbɛdikama la woshasha wa tshitshɛ waki wadi aki odo. Koko tatohɛke dia Jehowa la Ɔnande mandolaka mɛtɛ wanɛ tshɛ wakambɛ Nzambi l’anima awɔ tshɛ, etena kasalawɔ kɛnɛ tshɛ kakokawɔ sala.—Luka 21:1-4; Ngalatiya 6:4.
16. Naa dihomɔ dia wetshelo diakatosha Nzambi lo ɛnɔnyi akumi wetshi ɛnɛ?
16 Lâdiko wa tetsha dikambo di’olimu w’esambishelo, Jehowa toshaka nto dihomɔ dia wetshelo di’amɛna efula oma lo tshimbo y’okongamelo ande. Lo ɛnɔnyi akumi wetshi ɛnɛ, takalongola dihomɔ dimɔtshi diele oko: La vérité qui conduit à la vie éternelle; Kokaka we monga la loseno la pondjo lo paradiso ka la kete, Ewo katɔla otsha lo lɔsɛnɔ la pondjo ndo atete edja sho mala nongola dibuku Bible etshatɔ mɛtɛ? Wanɛ wangɛnangɛna mɛtɛ dihomɔ sɔ kambaka la diɔ dimɛna l’olimu w’esambishelo.
Tokambe dimɛna la dibuku Bible etshatɔ
17, 18. a) Tenyi diakɔna dia lo dibuku Bible etshatɔ diangɛnangɛnayɛ sawola l’anto l’esambishelo? b) Kakɔna kakate omendji ɔmɔtshi w’otshimbedi lo dikambo dia dibuku Bible etshatɔ?
17 Dibuku Bible etshatɔ mɛtɛ? diekɔ la totshapita 19, la okotsha wele l’awui efula kâmɛ ndo l’ɛtɛkɛta wokɛma hwe ndo wa wɔdu. Diɔ diekɔ mɛtɛ ehomɔ ka dimɛna efula lo kɛnɛ kendana l’olimu aso w’esambishelo. Ɛnyɛlɔ, tshapita 12 yekɔ l’ɔtɛ a dui wata ɔnɛ: “Sɛna lo yoho yangɛnyangɛnya Nzambi.” Tshapita shɔ nembetshiyaka ombeki nganɛ wakokande koma ɔngɛnyi wa Nzambi, dui diele anto efula hawodikanyiyaka ndo diafɔnyawɔ ɔnɛ hadiokoke salema. (Jakoba 2:23) Ngande wakalongɔma ehomɔ ka wekelo wa Bible kɛsɔ na?
18 Omendji ɔmɔtshi w’otshimbedi wa lo wodja w’Australie akate dia dibuku Bible etshatɔ “kotolaka ampokami mbala kakɔ ɔtɔi oya lo sawo.” Nde akakotsha dia dibuku sɔ diekɔ wɔdu efula kamba la diɔ woho ɔnɛ wele diɔ “diambonyomoyosha apandjudi wa Diolelo efula dihonga ndo ɔngɛnɔngɛnɔ l’olimu w’esambishelo. Diɔ diakɔ diele amɔtshi mbelɛka dibuku sɔ ɔnɛ ɛngɔ ka nɛmɔ efula!”
19-21. Kɔndɔla ɛkɔndɔ ɛmɔtshi wɛnya nɛmɔ diele la dibuku Bible etshatɔ.
19 Lo wodja wa Guyana, mama kɛmɔtshi akatɛ ombatshi mboka ɔmɔtshi wakakɔkɔla lo soko diande ate: “Ekɔ paka Nzambi mbakakotomi.” Omi aki mama kɛsɔ akôtshike la ana ahende wa totshitshɛ. Ombatshi mboka ɔsɔ akafola dibuku Bible etshatɔ lo tshapita 1 ndo akadia la dui dia wolo odingɔ 11, l’ɛse k’ɔtɛ a dui wata ɔnɛ: “Ngande wayaoka Nzambi etena kɛnande awui wa kɔlɔ watokomɛ?” Ombatshi mboka akate ate: “Awui asɔ wakananda otema ande woho w’anyanya. Nde akemala, akatshimbe lo luudu lombawɔ diangɔ ko akalele efula.” Mama kɛsɔ aketawɔ dia kadiyɛso kɛmɔtshi ka lo ngelo kawɔ mbekaka la nde Bible mbala la mbala ndo nde ekɔ lo tatetemala pama.
20 José, lele lo wodja w’Espagne akavusha wadɛnde lo aksida ɔmɔtshi. Nde akayange esambelo lo ndjâkimɔ lo nɔnɔ dia wolo ndo lo ntshɔ le wanɛ weka eongelo ka yimba y’onto. Koko waa nomb’ewo shɔ kokoka mbisha José okadimwelo lo dimbola diakalekaka mbotshindja wɔɔngɔ di’ɔnɛ: “Lande na kaketawɔ Nzambi dia wadɛmi mvɔ?” Lushi lɔmɔtshi, José akahomana la Francesc lakakambaka la nde lo kɔpanyi ɔtɔi. Francesc akɔ̂lɔmbɛ dia vɔ kɛtshanya tshapita 11 ya dibuku Bible etshatɔ yele l’ɔtɛ a dui ɔnɛ: “Lande na katshika Nzambi asui?” Elembetshiyelo washa Afundelo ndo ɛnyɛlɔ k’ombetsha nde la ombeki kele lo dibuku sɔ kakambiya José heyama. Nde akatatɛ mbeka Bible la waasaso tshɛ, akɔtɔ lo losanganya l’otshimbedi ndo ɛlɔ kɛnɛ nde ɔtɔka lo nsanganya ya lo Mbalasa ka Diolelo ka lo ngelo kawɔ.
21 Roman, omindji ɔmɔtshi w’okanda wa la Pologne wele l’ɛnɔnyi 40 akɔsaka Ɔtɛkɛta wa Nzambi la nɛmɔ nshi tshɛ. Koko lam’ele nde akayashaka efula l’olimu ande, nde akahame yema tsho lo wekelo ande wa Bible. Koko, nde akɔtɔ lo losanganya lɔmɔtshi la distrikɛ ndo akalongola kɔpi kɛmɔtshi ka dibuku Bible etshatɔ. L’ɔkɔngɔ wa lâsɔ, nde akasale etshikitanu. Nde akate ate: “Lo dibuku nɛ, wetshelo tshɛ w’ohomba wa lo Bible kakatana kâmɛ oko ɛngɔ ɔtɔi.” Ɛlɔ kɛnɛ, Roman ekɔ lo mbeka Bible mbala la mbala ndo ekɔ lo tahame dimɛna.
Totetemale fudia lowando laso
22, 23. Ngande wakokaso tetemala mɛnya lowando laso lo dikambo di’elongamelo kele la ntondo kaso?
22 Oko wakadialembetshiyama lo Losanganya la distrikɛ la dimɛna efula laki l’ɔtɛ a dui ɔnɛ: “Etshungwelo kaya suke!,” Akristo wa mɛtɛ nomɔlɔmɔka dia kondja ‘etshungwelo ka pondjo’ kakalakema oma le Nzambi ndo kayowokondja diɛsɛ oma lo dikila diakatshola Yeso Kristo. Ndoko yoho yoleki dimɛna ya mɛnya lowando laso l’oma k’ɛse otema lo kɛnɛ kendana la elongamelo ka diambo kɛsɔ naka aha lo tetemala ndjaɛdia “uma lu etsha wa nyoi, dia [sho] nkambela [Nzambi k]a lumu.”—Heberu 9:12, 14.
23 Eelo, woho watetemala miliyɔ ndekana shamalo y’apandjudi wa Diolelo l’olimu wa Nzambi kânga mbasɛngiyamawɔ dia ndjasha l’awui awɔ hita ekɔ tshondo ya dihindo. Ɔsɔ ekɔ nto djembetelo yɛnya di’ekambi wa Jehowa ngɛnangɛnaka efula diɛsɛ diele lawɔ dia kambɛ Nzambi, weya dia ‘pâ kawɔ le Nkumadiɔndjɔ kema anyanya.’ Tatohekɔke pondjo dia fudia lowando lɔsɔ!—1 Koreto 15:58; Osambu 110:3.
Ngande wayoyokadimola?
• Kakɔna katetsha omembi w’esambo lo kɛnɛ kendana la lowando lahombaso monga lalɔ otsha le Nzambi ndo lo tɛdikɔ tande ta lo nyuma?
• Ngande wakotshama ɛtɛkɛta wa lo Hangai 2:7 ɛlɔ kɛnɛ?
• Ngande washa Jehowa ekambi ande kɛnɛ kahombama dia vɔ mbokambɛ dimɛna?
• Kakɔna kakokayɛ sala dia mɛnya dia wɛ mandolaka ɔlɔlɔ wa Jehowa?
[Tablo ka lo lɛkɛ 27-30]
ALAPƆLƆ W’OLIMU W’ƐMƐNYI WA JEHOWA WA L’ANDJA W’OTONDO 2006
(Enda okanda)
[Esato wa lo lɛkɛ 31]
Jehowa toshaka tshɛ kahombama dia sala lolango lande