Jehowa ekɔ Nzambi kele ka lowando
“[Nzambi] kema kolo, dia ndi mbuhela ulimu anyu la ngandji kakanyenya antu lu lukumbu landi.”—HEBERU 6:10.
1. Ngande wakɛnya Jehowa lowando lande le Ruta w’ose Mɔaba?
JEHOWA mandolaka efula welo wadja wanɛ wayanga l’otema ɔtɔi dia sala lolango lande ndo nde mbafutaka lo yɛdikɔ y’efula. (Heberu 11:6) Bɔaza pami ka kɔlamelo akeyaka dimɛna dui sɔ dia diambo diendana la lonto laki Nzambi. Diɔ diakɔ diakandatɛ Ruta w’ose Mɔaba, lakakokɛ okilande la ngandji tshɛ ate: “[Jehowa] akutsheli uku akayatshi. [Jehowa] . . . akufuti difutu diaye tshe!” (Ruta 2:12) Onde Ruta akatshɔkwama oma le Nzambi? Eelo! Ndo ɔkɔndɔ ande fundama lo Bible! Ndo nto, nde akayotshukanaka la Bɔaza ndo akayokomaka lɔtshɛtshɛ lɔmɔtshi laki nkumekanga Davidi la Yeso Kristo. (Ruta 4:13, 17; Mateu 1:5, 6, 16) Ɔsɔ ekɔ ɛnyɛlɔ kɛmɔtshi l’atei wa bɛnyɛlɔ dia lo Bible diɛnya woho wandola Jehowa ekambi ande.
2, 3. a) Kakɔna ketɛ ɛtɛkɛta wa lowando waki Jehowa diambo efula na? b) Lande na kakoka Jehowa mɛnya lowando la mɛtɛ? Sha ɛnyɛlɔ.
2 Jehowa otoyânya, otondonga nde bu la lowando le anto. Heberu 6:10 mbutaka ɔnɛ: “[Nzambi] kema kolo, dia ndi mbuhela ulimu anyu la ngandji kakanyenya antu lu lukumbu landi, uku akanyakimanyia ekilami, ndu uku atshanyu edja ndu elo.” Kɛnɛ ketɛ ɛtɛkɛta ɛsɔ ɛtɛkɛta wa diambo ele woho wandola Nzambi anto wayakimɔ tshɛ kânga mbewɔ atshi wa pɛkato ndo mbahawakome lo lotombo lande.—Romo 3:23.
3 L’ɔtɛ weso kema kokele, sho mbeyaka fɔnya dia etsha aso w’anto wamamema Nzambi wekɔ anyanya ndo hatokoke tshɔkwama oma le Nzambi. Koko, Jehowa shihodiaka dimɛna eyango ndo awui wele laso ndo nde mbɔsaka olimu wôkambɛso l’anima aso tshɛ la nɛmɔ di’efula. (Mateu 22:37) Tɔshi ɛnyɛlɔ kɛnɛ: Mama kɛmɔtshi ambotana woshasha w’adidi wele bu ndo oshinga wolo lâdiko dia mɛsa ande. Nde kokaka mbɔsa woshasha ɔsɔ oko bu la nɛmɔ efula ndo mɔnyɔla woshasha akɔ. Koko mukanda wele kâmɛ la woshasha ɔsɔ mɛnyaka dia yana yande ya yimato mbakɔshi tshɛ kaki lande dia mbosombɛ woshasha ɔsɔ. Etena kɛsɔ woshasha ɔsɔ waya la nɛmɔ dia woho okina le mama kɛsɔ. Ondo la asɔi w’ɔngɛnɔngɛnɔ lo washo, nde ambokumbatɛ ɔnande ndo ambowotɛ woho wambondɔngɛnangɛna woshasha ɔsɔ.
4, 5. Ngande wakokoya Yeso Jehowa lo mɛnya lowando lande?
4 Oko weyande dimɛna eyango ndo elelo aso, Jehowa ngɛnangɛnaka etena kawoshaso kɛnɛ koleki nɛmɔ le so, oyadi tshitshɛ kana efula mbetɔ. Lo dikambo sɔ, Yeso akokoya She lo yoho ya kokele. Tohɔ ɔkɔndɔ wa ekenga ehende wa falanga waki wadi aki odo. “Jesu akedia ashu, akenyi akanga w’engonyi wadja eshasha awo l’ekitshelu. Ndi akenyi ndu wadi aki udu, kanga wula, adja ekenga ehendi loko. Ndi akati ati: wadi aki udu, kanga wula, akadjisha wushasha wuleki eshasha wudjishawo, vo tshe. Ne dia vo wakadjisha weshasha awo uma l’efula ka diango dieli la wo; keli ndi, uma lu wula andi, mbudjishandi kene tshe kaki la ndi kakandahumbi ndjakimanyia.”—Luka 21:1-4.
5 Eelo, lo mbeya lɔsɛnɔ laki womoto ɔsɔ, mbuta ate woho wakinde wadi aki odo ndo ose wola, Yeso akashihodia nɛmɔ dia mɛtɛ diaki la woshasha ande ndo akatshutshuyama dia mbândola. Kɛsɔ mbakoka mbutama ndo lo dikambo dia Jehowa. (Joani 14:9) Shi ekɔ dui di’ekeketshelo dia mbeya ɔnɛ oyadi awui akɔna wele laso, sho koka pomɔ lokolo l’ɔlɔ lo washo wa Nzambi kaso kele la lowando ndo k’Ɔnande?
Jehowa akatshɔkɔla ose Etiyɔpiya lakokaka Nzambi wɔma
6, 7. Lande na ndo ngande wakɛnya Jehowa lowando laki lande le Ɛbɛdɛ-mɛlɛkɛ?
6 Afundelo mɛnyaka mbala efula dia Jehowa mandolaka wanɛ wasala lolango lande. Tɔsɛdingole kɛnɛ kakandasalɛ Ɛbɛdɛ-mɛlɛkɛ pami k’ose Etiyɔpiya kakokaka Nzambi wɔma kakasɛnaka lo nshi ya Jeremiya ndo kaki okambi waki Zedekiya, nkumekanga ka Juda kaki komonga la kɔlamelo. Ɛbɛdɛ-mɛlɛkɛ akeye di’ana wa nkumi ya dikanga ya Juda wakamamatanyiya ɔprɔfɛta Jeremiya ɔnɛ nde ekɔ lo minganyiya anto ndo wakawodje lo difuku dia lɔtɛkɛ dia nde vɔ la ndjala lɔkɔ. (Jeremiya 38:1-7) Lo mbeya dia Jeremiya akahetshamaka efula l’ɔtɛ wa losango lakandasambishaka, Ɛbɛdɛ-mɛlɛkɛ akadje lɔsɛnɔ lande lo wâle ko akalɔmbɛ nkumekanga dikambo dimɔtshi. La dihonga tshɛ, ose Etiyɔpiya ɔsɔ akate ate: “Khumemi khum’ekanga, antu ane wakatshi kolo lu akambu tshe wakawatshela umvutshi Jeremiya, lakawadji lu difuku. Ndi ayuvo la ndjala lene endi.” Oma lo didjango diaki nkumekanga, Ɛbɛdɛ-mɛlɛkɛ akɔshi apami 30 dia totondja ɔprɔfɛta waki Nzambi oma lo difuku sɔ.—Jeremiya 38:8-13.
7 Jehowa akɛnyi dia mbetawɔ kaki Ɛbɛdɛ-mɛlɛkɛ mbakôkimanyiya dia minya wɔma tshɛ wakakoke monga lande. Ɔnkɔnɛ, Jehowa akɛnya lowando lande lo dikambo sɔ ndo akatɛ Ɛbɛdɛ-mɛlɛkɛ oma lo tshimbo ya Jeremiya ate: “Enda, dimi lutsha nshidiya aui wakamataka dia ntshela usumba one kolo, aha ololo. . . . Keli dimi layukushimbela lushi lako. We hukimwama lu anya w’antu wukaye woma. . . . Dimi layukushimbela, . . . Lumu laye layuyala engo kaye ka dimbu, ne dia we akambekama.” (Jeremiya 39:16-18) Eelo, Jehowa akatshungola Ɛbɛdɛ-mɛlɛkɛ ndo Jeremiya oma l’anya w’ana wa kɔlɔ wa nkumi ya dikanga ya Juda ndo l’ɔkɔngɔ diko l’anya w’ase Babilɔna, wanɛ wakalanya Jerusalɛma vwa. Osambu 97:10 mbutaka ɔnɛ: “[Jehowa] katulamaka nyumu y’ekilami andi, katâtshungulaka uma l’anya w’antu wa kolo.”
“Sho latenaka lu usheshe, ayukufuta”
8, 9. Oko wakadiɛnya Yeso, weho akɔna w’alɔmbɛlɔ wangɛnangɛna Jehowa?
8 Djembetelo kina yɛnya dia Jehowa mandolaka ndo ngɛnangɛnaka woho wômamemaso koka mɛnama oma lo kɛnɛ kata Bible lo dikambo dia dɔmbɛlɔ. Pami kɛmɔtshi ka lomba akate ate: ‘Dɔmbɛlɔ dia kanga losembwe diatɔngɛnyangɛnyaka Nzambi.’ (Tukedi 15:8) Lo nshi ya Yeso, ewandji w’ɛtɛmwɛlɔ efula wakalɔmbaka lo sɛkɛ, aha dia mɛnya omamemelo wa mɛtɛ koko dia vɔ mambiya anto. Yeso akate ate: “Vo wambulungula difutu diawo.” Nde akatɛ ambeki ande ate: “Keli we, lam’ayuyolomba, oto lu luudu laye, udihi lukuki, olombe Sho leli lu usheshe. Ku Sho latenaka lu usheshe, ayukufuta.”—Mateu 6:5, 6.
9 Lo mɛtɛ, Yeso kɔmɛnya dia ekɔ kɔlɔ nɔmba lo sɛkɛ, nɛ dia lo waaso amɔtshi ndamɛ akalɔmbɛ lo sɛkɛ. (Luka 9:16) Jehowa ngɛnangɛnaka dikambo sɔ efula etena kɔ̂lɔmbaso l’otema ɔtɔi aha la monga la kanyi ya mambiya anto akina. Lo mɛtɛ, alɔmbɛlɔ aso wa lo woshɛshɛ mɛnyaka woke woke wa ngandji ndo wa wɛkamu aso le Nzambi. Bu dikambo dia diambo lo woho wele Yeso akayangaka ahole wa woshamu dia nɔmba. Mbala kɛmɔtshi, nde akasale dikambo sɔ “la hyutshihutshi, unya atahuto.” Mbala kekina, “ndi akambela lu akuna ndame dia ntolomba.” Ndo la ntondo ka nsɔna apɔstɔlɔ ande 12, Yeso akalɔmbɛ otsho w’otondo.—Mako 1:35; Mateu 14:23; Luka 6:12, 13.
10. Dui diakɔna diakokaso ndjashikikɛ naka alɔmbɛlɔ aso kɛnɛmɔlaka nsaki ya mɛtɛ ndo y’oma k’ɛse otema?
10 Ohokanyiya woho wakahokamɛ Jehowa alɔmbɛlɔ w’oma k’ɛse otema waki Ɔnande la yambalo tshɛ! Lo mɛtɛ, Yeso akalɔmbɛ tena dimɔtshi “la delu dia wulu la asoi lu ashu, ku [Nzambi] akawukela ne dia woma waka[ndaw]ukaka.” (Heberu 5:7; Luka 22:41-44) Etena kakɛnɛmɔla alɔmbɛlɔ aso nsaki ya mɛtɛ ndo y’oma k’ɛse otema, sho koka ndjashikikɛ dia Shɛso lele l’olongo ekɔ lo tohokamɛ la yambalo tshɛ ndo la lowando. Eelo, “[Jehowa] eli lasuki la wane tshe . . . watuwetaka lu mete.”—Osambu 145:18.
11. Ngande wayaoka Jehowa lo kɛnɛ kendana la awui wasalaso lo woshɛshɛ?
11 Naka Jehowa ngɛnangɛnaka etena kɔ̂lɔmbaso lo woshɛshɛ, kete lâsɔ nde ngɛnangɛnaka efula etena kôkitanyiyaso lo woshɛshɛ! Eelo, Jehowa mbeyaka kɛnɛ kasalaso lo woshɛshɛ. (1 Petero 3:12) Lo mɛtɛ, etena keso la kɔlamelo ndo l’okitanyiya kânga etena keso shoamɛ mɛnyaka dimɛna dia ‘otema aso tshɛ’ wekɔ le Jehowa, mbuta ate tekɔ l’otema wele la eyango wa pudipudi ndo wamboyashikikɛ dia sala paka kɛnɛ kele ɔlɔlɔ. (1 Ekondo 28:9) Lɔkɛwɔ la ngasɔ ngɛnyangɛnyaka otema wa Jehowa mɛtɛ!—Tukedi 27:11; 1 Joani 3:22.
12, 13. Ngande wakokaso nama yimba ndo otema aso ndo monga oko Natanyɛlɛ ombeki wa kɔlamelo?
12 Ɔnkɔnɛ, Akristo wa kɔlamelo ndjalamaka diaha sala pɛkato lo woshɛshɛ, pɛkato yalanya yimba ndo otema, ɛnyɛlɔ wendelo w’awui wa mindo ndo wa ngala. Kânga mbakoka anto mbishɛ pɛkato yawɔ mɔtshi, sho mbeyaka dia “diango tshe dieko etakataka ndu diatenamaka hwe la ntundu ka ashu wa one lahumbasu [“ndjokoya la nde,” NW].” (Heberu 4:13; Luka 8:17) Lo sala la wolo dia mbewɔ awui wakoka nyangiya Jehowa, sho namaka nkum’otema ka pudipudi ndo ngɛnangɛnaka dia mbeya dia tekɔ lo mbetawɔma le Nzambi. Eelo, ndoko tâmu dia Jehowa ngɛnangɛnaka mɛtɛ onto “latokendakendaka ololo, latutshaka akambu w’uluwanyi, ndu latutaka mete l’utema andi.”—Osambu 15:1, 2.
13 Lâsɔ ngande wakokaso kokɛ yimba ndo otema aso l’andja ɔnɛ wambolola l’awui wa kɔlɔ? (Tukedi 4:23; Efeso 2:2) Lâdiko wa sho kondja wahɔ oma lo kɛnɛ tshɛ katosha Jehowa dia keketsha mbetawɔ kaso, sho pombaka mbidja welo dia tona kɛnɛ kele kɔlɔ ndo sala kɛnɛ kele ɔlɔlɔ. Sho la dia sala dui sɔ aha la tshimbatshimba diaha nsaki ya mindo ndjotshɔ diemi l’otema aso ko ndjôta pɛkato. (Jakoba 1:14, 15) Ohokanyiya ɔngɛnɔngɛnɔ wayonga layɛ naka Yeso mbuta lo dikambo diayɛ oko wakandate lo dikambo diaki Natanyɛlɛ ate: ‘Enda onto laha la lokeso.’ (Joani 1:47) Natanyɛlɛ, lakawelɛka nto ɔnɛ Baratɔlɔmayo akayongaka la diɛsɛ dia koma ɔtɔi ɔmɔtshi l’atei w’apɔstɔlɔ 12 wa Yeso.—Mako 3:16-19.
“Olombedi a ladiku a ketshi la wa kolamelu”
14. Kakɔna kakate Yeso kakatshikitana la kɛnɛ kakate anto akina lo dikambo dia kɛnɛ kakasale Mariya?
14 Oko wakinde ‘efanelo ka Nzambi kasɛna,’ mbuta ate ka Jehowa, Yeso akokoyaka She nshi tshɛ lo yoho ya kokele lo mandolaka wanɛ wakakambɛka Nzambi l’otema wa pudipudi. (Kolosai 1:15) Ɛnyɛlɔ, nshi tshanu la ntondo ka nde kimɔ lɔsɛnɔ lande, Yeso la ambeki ande amɔtshi wakelamɛ laka Simɔna k’ose Bɛtaniya. La dikɔlɔ sɔ, Mariya wa kadiyɔ aki Lazaro la Mata “akoshi livere otoi la malashi wa narado w’ushinga wulu (wele l’oshinga wɛdimi la difuto di’ose olimu di’ɔnɔnyi w’otondo),” ko akatɛ Yeso l’ɔtɛ ndo l’ekolo. (Joani 12:3) Amɔtshi wakate ɔnɛ: “Ukundi alanyawo malashi okone na?” Koko Yeso aki la kanyi yotshikitanyi lo kɛnɛ kakasale Mariya. Nde akɛnyi dia ɔsɔ aki tshelo ya lokaho l’efula ndo yaki la kitshimudi ya woke lo kɛnɛ kendana la nyɔi kande kaki k’emembe ndo la okundelo ande. Ɔnkɔnɛ, lo dihole dia mɔnyɔla Mariya, Yeso akawosha nɛmɔ. Nde akate ate: “L’ahuli tshe wa la kete, lene ayuwusambishaka lukumu l’ololo lone, wayutaka ndu dikambu diambutsha umuntu one. Dio diayuyala euhwelu kandi.”—Mateu 26:6-13.
15, 16. Wahɔ akɔna wakondjaso oma lo woho wakasɛnɛ Yeso oko onto ndo wakandakambɛ Nzambi oko onto?
15 Ande diɛsɛ diele laso dia Yeso onto lele la lowando monga Omboledi aso lee! Lo mɛtɛ, lɔsɛnɔ laki Yeso la lanɛ la nkɛtɛ lakɔ̂lɔngɔsɔla lo kɛnɛ kendana l’olimu wakawombɛ Jehowa wa kamba oko Ɔlɔmbɛdi a Lâdiko, ntondotondo wa lo etshumanelo k’akitami, k’oma lâsɔ w’andja w’otondo.—Kolosai 1:13; Heberu 7:26; Enyelo 11:15.
16 La ntondo ka nde ndja la nkɛtɛ, Yeso aki la nsaki ndo la ngandji ka lânde lo dikambo di’anto. (Tukedi 8:31) Lo nsɛna oko onto, nde akashihodia dimɛna elɛwɔ sowa ndo mbikikɛ ehemba l’olimu wakambɛso Nzambi. Ɔpɔstɔlɔ Paulo akafunde ate: “Okone diaki la [Yeso] dia nfanyema la anyandi lu akambu tshe, dia ndi ndjala olombedi a ladiku a ketshi la wa kolamelu . . . Ne dia ndame akasuyama ndu akahimbama, mbeyandi nkimanyia wane wambuhimbama.” Yeso kokaka “ntuka ketshi lu weodu asu” nɛ dia nde “akahimbama lu wehu tshe uku shu, keli kuntsha kolo.”—Heberu 2:17, 18; 4:15, 16.
17, 18. a) Kakɔna kɛnya mikanda wakawatomɛ tshumanelo esambele dia l’Asie Mineure lo kɛnɛ kendana la ɛtɛkɛta woludi la lowando waki Yeso? b) Akristo w’akitami wakalɔngɔswama dia dikambo diakɔna?
17 Woho wakeyaka Yeso ekakatanu waki l’ambeki ande dimɛna akɛnama hwe l’ɔkɔngɔ wa eolwelo kande. Tɔsɛdingole mikanda wakandatomɛ tshumanelo esambele dia l’Asie Mineure, oko wakadifunde ɔpɔstɔlɔ Joani. Yeso akatɛ etshumanelo ka la Smurina ate: “Dimi mbeyaka asui aye, ndu wula aye.” Lanɛ, Yeso ekɔ lo mbuta ate: ‘Dimi mbeyaka dimɛna ekakatanu wele layɛ; dimi mbeyaka dimɛna awui wele lo kokomɛ.’ Oma lâsɔ, lam’ele ndamɛ akasowe polo lo nyɔi, nde akakotsha la kɛtshi ndo la eshikikelo tshɛ ate: “Utetemali edja ndu lu nyoi, ku dimi layukusha dembo dia kusu dia lumu.”—Enyelo 2:8-10.
18 Mikanda wakatomɛ Yeso tshumanelo esambele sɔ ndola la ɛtɛkɛta wɛnya dia nde akeyaka dimɛna ekakatanu waki la ambeki ande ndo lowando la mɛtɛ laki lande lo dikambo dia olowanyi awɔ. (Enyelo 2:1–3:22) Tohɔ dia Yeso wanɛ wakandafundɛ awui asɔ ko Akristo w’akitami waki la elongamelo ka tolɛ kâmɛ la nde l’olongo. Oko Nkumɛwɔ, vɔ wakalɔngɔswama dikambo di’ɔkɛndɛ awɔ wa woke wa kimanyiya anto wasowa dia vɔ nongola ɛtshɔkɔ w’oma l’olambo wa tshungo wa Kristo.—Enyelo 5:9, 10; 22:1-5.
19, 20. Wanɛ wakenga “ului a wuki” ngande wɛnyawɔ lowando lawɔ le Jehowa kâmɛ ndo le Ɔnande?
19 Lo mɛtɛ, ngandji koka Yeso ambeki ande w’akitami mbokande ndo “ekoko ekina” wa kɔlamelo, wele miliyɔ ya l’atei awɔ mbakenga “ului a wuki w’antu . . . , [w’]uma lu wedja tshe,” wayoka lo ‘fɔnu ka woke.’ (Joani 10:16; Enyelo 7:9, 14) Anto asɔ wekɔ lo mbeta lo wedi waki Yeso nɛ dia wekɔ la lowando l’olambo ande wa tshungo ndo lo elongamelo kele lawɔ ka lɔsɛnɔ la pondjo. Ngande wɛnyawɔ lowando lawɔ na? Vɔ liɛnyaka lo ‘kambɛ Nzambi olimu w’ekila ndo la yanyi ndo l’otsho.’—Enyelo 7:15-17.
20 Alapɔlɔ wa l’andja w’otondo w’ɔnɔnyi w’olimu wa 2006 wele lo lɛkɛ 27 polo 30, mɛnyaka hwe dia ekambi wa kɔlamelo ɛsɔ wekɔ lo kambɛ Jehowa ‘olimu w’ekila ndo la yanyi ndo l’otsho.’ Ɔnkɔnɛ, lo ɔnɔnyi ɔsɔ, vɔ la yema y’atshikadi w’Akristo w’akitami wakasambisha wenya 1 333 966 199 yɛdikɔ yɛdimi la ɛnɔnyi ndekana 150 000!
Tetemala mɛnya lowando!
21, 22. a) Lo kɛnɛ kendana la mɛnya lowando, bonde kahomba Akristo ndeka ndjalama ɛlɔ kɛnɛ? b) Kakɔna kayotɔsɛdingola lo sawo diayela?
21 Lo yoho yasalɛwɔ anto wele kema kokele akambo, Jehowa la Ɔnande wakɛnya lowando lawɔ l’efula lananda otema mɛtɛ. Lonyangu ko, efula k’anto hawoleke mbidja yimba l’awui wa Nzambi koko vɔ ndekaka mbidja yimba l’awui awɔ hita. Lo kɛnɛ kendana l’anto wa lo “nshi y’ekumelu” nyɛ, Paulo akafunde ate: “Anto wayoyakanɛ, wayonga la lokaki la falanga . . . Vɔ hawotonga la lowando.” (2 Timote 3:1-5, Phillips) Anto asɔ tshikitana efula l’Akristo wa mɛtɛ, wele oma lo alɔmbɛlɔ wa l’otema ɔtɔi, oma l’okitanyiya wa la lolango ndo oma l’olimu wakambawɔ l’anima awɔ tshɛ, vɔ mɛnyaka lowando lawɔ lo kɛnɛ tshɛ kambasalɛ Nzambi!—Osambu 62:8; Mako 12:30; 1 Joani 5:3.
22 Lo sawo diayela, tayovusola awui amɔtshi l’atei wa diangɔ di’efula dia lo nyuma diatosha Jehowa la ngandji tshɛ. Nyɛsɔ tofudia lowando laso lo kanaka yimba lo ‘weshasha w’ɛlɔlɔ’ ɛsɔ.—Jakoba 1:17.
Ngande wayoyokadimola?
• Ngande wakɛnya Jehowa dia nde ekɔ Nzambi kele la lowando?
• Ngande wakokaso ngɛnyangɛnya otema wa Jehowa kânga lo woshɛshɛ?
• Lo toho takɔna takɛnya Yeso lowando?
• Ngande wele lɔsɛnɔ laki Yeso oko onto la lo demba akôkimanyiya dia monga omboledi wele la kɛtshi ndo la lowando?
[Osato wa lo lɛkɛ 19]
Oko watɔngɛnangɛnaka ombutshi tɔtɛkɛta t’ɔnande, mbatɔngɛnangɛnaka Jehowa etena kawoshaso kɛnɛ koleki ɔlɔlɔ le so