Woho wakoka nyɔi ka Yeso koshimbɛ
AMBETA suke la ɛnɔnyi 2 000, lo dambo dia Elekanelo dia ase Juda dia l’ɔnɔnyi 33 tena diaso nɛ, pami kɛmɔtshi kaha l’onongo akavu di’anto akina monga la lɔsɛnɔ. Akɔna aki pami kɛsɔ na? Nde aki Yeso y’ose Nazarɛta. Waa na wakoka kondja wahɔ oma lo tshelo ya diambo shɔ? Nkumbo k’anto k’otondo. Divɛsa dimɔtshi dieyama efula dia lo Bible mbutaka lo tshena pe dia olambo washimbɛ nsɛnɔ ɔsɔ ɔnɛ: “[Nzambi] akalangi wa la kete utamanya, mbakandawasha On’andi etoi lakanduti, dia untu tshe lawetawo, tavokaki, keli ayali la lumu la pundju.”—Joani 3:16.
Kânga mbêya anto efula divɛsa nɛ, anto yema tshitshɛ tsho mbashihodia mɛtɛ kitshimudi yadiɔ. Vɔ ndjambolaka ɔnɛ: ‘Lande na keso l’ohomba wa olambo wa Kristo? Ngande wakoka nyɔi k’onto ɔtɔi tshungola anto tshɛ oma lo nyɔi?’ Bible mbishaka ekadimwelo wokɛma hwe ndo wangɛnyangɛnya lo ambola asɔ.
Woho wakayâhemɛka nyɔi nkumbo k’anto
Anto amɔtshi fɔnyaka dia anto wakatongama dia nsɛna la nkɛtɛ lo tshanda ya tshitshɛ tsho, diɛnɛ la ekakatanu, ngɛnangɛna lo yɛdikɔ mɔtshi ko oma lâsɔ mvɔ ko ntshɔ otsha lo dihole dimɔtshi dioleki dimɛna. Lo ndjela kanyi shɔ, nyɔi kekɔ etenyi kɛmɔtshi ka sangwelo diaki Nzambi lo dikambo di’anto. Koko, Bible mɛnyaka dia nyɔi kekɔ lo pɛnyahɛnya anto l’ɔtɛ w’ɔkɔkɔ okina. Tɔ mbutaka ɔnɛ: “Uku akayi kolo la kete uma le untu otoi, la nyoi uma lu kolo; ku nyoi akadiangana le antu tshe ne dia antu tshe wakatshi kolo.” (Romo 5:12) Divɛsa nɛ mɛnyaka dia anto mvɔka l’ɔtɛ wa pɛkato. Ko akɔna ele “untu otoi” lele oma lo tshimbo yande mbakaye etombelo wa kɔlɔ w’oma lo pɛkato wakadiangana le nkumbo k’anto?
Dibuku dimɔtshi (The World Book Encyclopedia) mbutaka dia ase siansɛ efula mbetawɔka dia weho w’anto tshɛ wakaye oma lo kiɔkɔ yâmɛ, ndo Bible mɛnyaka hwe dia kiɔkɔ yâmɛ shɔ ele “untu otoi.” Sho mbadiaka lo Etatelu 1:27 ɔnɛ: “[Nzambi] akatungi untu lu efanelu kandi. Lu efanelu kandi kakandûtungi. Pami la umuntu mbakandâtungi.” Ɔnkɔnɛ Bible mbutaka dia atshukanyi wa ntondo waki lotombo la etongelo ka Nzambi Kanga-Wolo-Tshɛ.
Ɔkɔndɔ wa lo dibuku dia Etatelu totɛka akambo akina wendana la lɔsɛnɔ l’onto l’ɔkɔngɔ wa Jehowa Nzambi tonga onto la ntondo. Diakɔ diele, l’ɔkɔndɔ ɔsɔ w’otondo, Nzambi konimola dikambo dia nyɔi, onyake etena kakandatɛkɛta dikambo dia etombelo w’oma l’ɔtɔmbɔkwɛlɔ. (Etatelu 2:16, 17) Nde akakombolaka dia anto nsɛna lo paradiso ka dimɛna efula la nkɛtɛ l’ɔngɛnɔngɛnɔ ndo la demba dia dimɛna pondjo pondjo. Nde kokombolaka dia vɔ tshunda osombe ndo l’ekomelo ndjovɔ. Ko ngande wakayâhemɛka nyɔi anto tshɛ?
Etatelu tshapita 3 kɔndɔlaka woho wakɔshi atshukanyi wa ntondo yɛdikɔ ya kɔlɔ la lolango lawɔ dia tɔmbɔkwɛ Jehowa Nzambi, Ombishi wa lɔsɛnɔ. Diakɔ diele Nzambi akawasha dilanya diakandawaewoya la ntondo. Nde akatɛ pami ate: “We eko ditshu, okone we ayukalula utsha lu ditshu.” (Etatelu 3:19) Oko wakawatɛ Nzambi, atɔmbɔki ahende asɔ wakayovɔka.
Koko, etombelo wa kɛnɛ kakawasale kokomɛ tsho le atshukanyi wa ntondo. Ɔtɔmbɔkwɛlɔ awɔ akashishɛ anawɔ elongamelo ka lɔsɛnɔ la kokele lakawakoke monga lalɔ. Jehowa akadje ndo ekanawɔ waki watotɔ lo sangwelo diande etena kakandatɛ Adama la Eva ate: “Nyuyali la diwutshi, nyufulaneli, nyuludia kete, nyuyûleli. Nyuleli nsi ya lu ashi a waki, fudu ya l’ulungu, la dikendakenda tshe dieli la lumu diakendakenda la kete.” (Etatelu 1:28) L’edjedja ka wonya, nkumbo k’anto wakahombe ndjolodia nkɛtɛ ndo monga la lɔsɛnɔ la dimɛna efula aha la mvɔ. Koko tshɛwɔ Adama, “untu otoi” akâsondja lo lɔhɔmbɔ la pɛkato ndo l’ekomelo nyɔi. Ɔpɔstɔlɔ Paulo, kanula mɔtshi ya onto la ntondo akafunde ate: “Dimi leli dimba diakasundjama lu kolo.”—Romo 7:14.
Oko wakalanya dengalenga ɛngɔ kɛmɔtshi k’oshinga wolo atete edja, mbele lo sala pɛkato, Adama akalanya etongelo ka diambo kaki Nzambi lo yɛdikɔ y’efula, mbuta ate anto. Ana waki Adama wakote anawɔ hita, oma lâsɔ ekanawɔ wakote vɔ lawɔ ko totanɛka polo ndo ɛlɔ kɛnɛ. Lɔlɔnga tshɛ lakotɔka, lakolaka ndo l’ekomelo lakavɔka. Lande na kakawavɔka vɔ tshɛ? Nɛ dia vɔ tshɛ waki tokanula taki Adama. Bible mbutaka ɔnɛ: “Antu efula wakavu ne dia kolo k’untu otoi.” (Romo 5:15) Hemɔ, lotshundu l’osombe, mbekelo ka salaka akambo wa kɔlɔ ndo nyɔi ekɔ etombelo wa kɔlɔ efula w’oma lo woho wakasondja Adama nkumbo kande hita. Sho tshɛ tekɔ l’atei wa nkumbo kɛsɔ.
Lo mukanda wakandafundɛ Akristo wa la Rɔma, ɔpɔstɔlɔ Paulo akatɛkɛta dikambo dia eongelo ka kɔlɔ efula kele la anto wele kema kokele, mbidja ndo ndamɛ, ndo dia ta diakandalɔshanaka la pɛkato. Nde akate ate: “Omenyi fono mbemi! Akona ayutshungula uma lu dimba dia nyoi ne.” Shi ɔsɔ ekɔ dimbola di’ohomba? Onto akɔna akahombe tshungola Paulo ndo anto akina tshɛ oma lo lɔhɔmbɔ la pɛkato la nyɔi? Paulo ndamɛ akakadimola ate: “Lusaka le [Nzambi] uma le Jesu Kristu Khumesu.” (Romo 7:14-25) Eelo, Otungi aso akɔshi yɛdikɔ ya totshungola lo tshimbo ya Ɔnande, Yeso Kristo.
Ɔkɛndɛ wele la Yeso lo woho wayotshungola Nzambi anto
Yeso akalembetshiya ɔkɛndɛ wele lande wa tshungola anto oma lo lɔhɔmbɔ la pɛkato la nyɔi. Nde akate ate: ‘Ɔna onto akaye dia ndjokimɔ lɔsɛnɔ lande oko tshungo dikambo dia anto efula.’ (Mateu 20:28) Lo woho akɔna wele lɔsɛnɔ laki Yeso tshungo? Wahɔ akɔna wakondjaso oma lo nyɔi kande?
Bible nembetshiyaka Yeso oko onto laki “kuntsha kolo” ndo ‘lakakakitɔna la atshi wa pɛkato.’ L’edja tshɛ ka lɔsɛnɔ lande, Yeso akakitanyiya Ɛlɛmbɛ waki Nzambi lo yoho ya kokele. (Heberu 4:15; 7:26) Ɔnkɔnɛ, nyɔi ka Yeso komonga etombelo w’oma lo pɛkato ndo woho wakinde kokitanyiya Nzambi oko Adama. (Ezekiyele 18:4) Koko, Yeso aketawɔ mvɔ nyɔi kakinde kokoka mvɔ l’oyango wa kotsha lolango laki She la tshungola anto oma lo pɛkato la nyɔi. Oko wotamidiɔ la diko, Yeso aketawɔ ndja ‘dia ndjokimɔ lɔsɛnɔ lande oko tshungo.’ Ngandji k’efula kaki lande akatshutshuya Yeso dia nde mbetawɔ “mvwela antu tshe.”—Heberu 2:9.
Lɔsɛnɔ lakalambola Yeso lakɛdima la lɔnɛ lakashisha Adama etena kakandasale pɛkato. Etombelo akɔna waki la nyɔi kaki Yeso? Jehowa aketawɔ olambo ɔsɔ oko ‘tshungo kɛdimi dikambo dia anto tshɛ.’ (1 Timote 2:6) Ɔnkɔnɛ, Nzambi akakambe la nɛmɔ dia lɔsɛnɔ laki Yeso dia somba kana tshungola anto tshɛ oma lo lɔhɔmbɔ la pɛkato la nyɔi.
Bible tɛkɛtaka mbala la mbala dikambo dia tshelo yoleki tshɛ ya ngandji kakɛnya Otungi w’onto. Paulo akohola Akristo dia vɔ ‘wakasombama la oshinga a wolo.’ (1 Koreto 6:20; 7:23) Petero akafunde dia Nzambi kokamba la paonyi kana fɛsa dia tshungola Akristo oma lo nyɔi, koko nde akakambe la dikila dia Ɔnande. (1 Petero 1:18, 19) Diɛsɛ oma l’olambo wa tshungo waki Kristo, Jehowa akalɔngɔsɔla dia tshungola anto oma lo nyɔi ka pondjo.
Onde wɛ ayokondja wahɔ oma lo tshungo ka Kristo?
Lo menda efula k’ɛtshɔkɔ waya oma lo tshungo ka Kristo, ɔpɔstɔlɔ Joani akafunde ate: “[Yeso Kristo] keli ulambu wa ntulambwela dia kolo yasu, aha ulambu ashu shame atu, keli weko ndu wa antu tshe wa la kete.” (1 Joani 2:2) Eelo, anto tshɛ kokaka kondja wahɔ oma lo tshungo ka Kristo. Onde kɛsɔ nembetshiyaka ɔnɛ onto tshɛ ayokondja wahɔ mbala kakɔ ɔtɔi oma lo olambo wa nɛmɔ efula waki Yeso ɔsɔ? Ndooko. Tohɔ dikambo dia etshungwelo kakatatɛkɛtshi lo sawo dietshi. Wanɛ wakasalaka la wolo dia tshungola anto wakakumamɛ lo difuku wakawaokɛ ɔkɔdi wakawakeleka ɛngɔ kɛmɔtshi, koko onto l’onto akahombe mbɔtɔ l’ɛngɔ kɛsɔ dia nde tomba. Woho akɔ wâmɛ mbele, wanɛ wakombola kondja wahɔ oma l’olambo wa tshungo waki Kristo hawohombe kongɛ tsho ɛtshɔkɔ waki Nzambi, koko vɔ pombaka sala dui dimɔtshi.
Kakɔna kâlɔmba Nzambi? Joani 3:36 totɛka ɔnɛ: “One letawo Ona, eko la lumu la pundju. Keli one lahakitanyia diui dia Ona, henyi lumu la pundju, kele ka [Nzambi] keko le ndi.” Nzambi tɔlɔmbaka dia sho monga la mbetawɔ l’olambo waki Kristo. Koko, aha lâsɔ ato. “Dia dikambu ne mbeyasu mete shati: Shu [mbeyaka Yeso] naka shu tatulamaka elembe andi.” (1 Joani 2:3) Mbokɛmaka hwe ɔnɛ, dia onto tshungɔ oma lo pɛkato la nyɔi, nde pombaka monga la mbetawɔ l’olambo wa tshungo waki Kristo ndo kitanyiya wadjango ande.
Yoho mɔtshi ya dimɛna ya mɛnya mbetawɔ kaso lo tshungo kaki Yeso ele monga la lowando lo nyɔi kande, lo kiohɔka oko wakandadjanga. La ntondo ka nde mvɔ, Yeso akale mma dia didjidji kâmɛ la apɔstɔlɔ ande wa kɔlamelo ndo akawatɛ ate: “Kanyutshaki okone, dia mbuhomi.” (Luka 22:19) Ɛmɛnyi wa Jehowa ngɛnangɛnaka efula lɔngɛnyi lasawɔ la Ɔna Nzambi ndo vɔ kitanyiyaka didjango sɔ. Ɔnɔnyi ɔnɛ, Eohwelo ka nyɔi ka Yeso Kristo kayosalema Lushi la samalo, Ngɔndɔ ka sato 22, l’ɔkɔngɔ wa ɛɔtwɛlɔ ka wonya. Tambokelɛ la wangasanu tshɛ dia wɛ ndjɔtɔ lo losanganya la lânde lɔsɔ dia kitanyiya didjango diaki Yeso. Ɛmɛnyi wa Jehowa wa lo ngelo kanyu wayokoka kewoya dihole ndo wonya wayosalema losanganya lɔsɔ. Lo Eohwelo, wɛ ayeka akambo efula wendana la kɛnɛ kahombayɛ sala dia olambo wa tshungo wa Kristo kotshungola oma lo nyɔi kakaye oma lo pɛkato ka Adama.
Ɛlɔ kɛnɛ, anto yema tshitshɛ tsho mbashihodia ndo mbele la lowando lo olambo wa woke wakawasha Otungi awɔ ndo Ɔnande wâtshungola oma lo elanyelo. Wanɛ wele la mbetawɔ l’olambo ɔsɔ wekɔ la ɔkɔkɔ wa lânde wa monga la ɔngɛnɔngɛnɔ. Ɔpɔstɔlɔ Petero akafunde lo kɛnɛ kendana la asekande Akristo ate: “Nyambuwetawo [Yeso]. Nyambutamanya ngenangena lu ongenongeno a lutumbu waheyama mvuta. Nyu nyambulungula panda l’etema anyu uku ekundjelu ka mbetawo kanyu.” (1 Petero 1:8, 9) Lo monga la ngandji otsha le Yeso Kristo ndo la mbetawɔ lo olambo ande wa tshungo, lɔsɛnɔ layɛ kokaka monga la ɔngɛnɔngɛnɔ efula oma ko kakianɛ etena kakongɛyɛ dia ndjotshungwama oma lo pɛkato la nyɔi.
[Osato wa lo lɛkɛ 6]
Yeso akakimɔ lɔsɛnɔ lande dia minya etombelo w’oma lo pɛkato kaki Adama
[Osato wa lo lɛkɛ 7]
Eohwelo ka nyɔi ka Yeso Kristo kayosalema Lushi la samalo, Ngɔndɔ ka sato 22, l’ɔkɔngɔ wa ɛɔtwɛlɔ ka wonya